| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
144. ப⁴ண்ட³னகாரகவத்து²கதா²
144. Bhaṇḍanakārakavatthukathā
240. சதுத்த²பஞ்சமாதி ச²ஸு பக்கே²ஸு பொட்ட²பாத³மாஸஸ்ஸ ஜுண்ஹபக்க²காளபக்க²ஸங்கா²தா சதுத்த²பஞ்சமா. ததியோதி ஸாவணமாஸஸ்ஸ காளபக்கோ² ததியோ. ததியசதுத்த²பஞ்சமா வாதி எத்த² ததியோதி ஸாவணமாஸஸ்ஸ காளபக்கோ². சதுத்தோ²தி பொட்ட²பாத³மாஸஸ்ஸ ஜுண்ஹபக்கோ². பஞ்சமோதி தஸ்ஸேவ காளபக்கோ². ‘‘ததிய…பே॰… பஞ்சமா வா’’தி பதா³னி ‘‘த்³வே வா தயோ வா’’தி பதே³ஹி யதா²க்கமங் யோஜேதப்³பா³னி. சதுத்தே² வா கதேதி சதுத்த²பக்கே² வா பன்னரஸிபா⁴வேன கதே. த்³வே சாதுத்³த³ஸிகாதி ததியபக்கே² ச சாதுத்³த³ஸியா ஸத்³தி⁴ங் த்³வே சாதுத்³த³ஸிகா. இமேதி ப⁴ண்ட³னகாரகா. தேதி ப⁴ண்ட³னகாரகா.
240.Catutthapañcamāti chasu pakkhesu poṭṭhapādamāsassa juṇhapakkhakāḷapakkhasaṅkhātā catutthapañcamā. Tatiyoti sāvaṇamāsassa kāḷapakkho tatiyo. Tatiyacatutthapañcamā vāti ettha tatiyoti sāvaṇamāsassa kāḷapakkho. Catutthoti poṭṭhapādamāsassa juṇhapakkho. Pañcamoti tasseva kāḷapakkho. ‘‘Tatiya…pe… pañcamā vā’’ti padāni ‘‘dve vā tayo vā’’ti padehi yathākkamaṃ yojetabbāni. Catutthe vā kateti catutthapakkhe vā pannarasibhāvena kate. Dve cātuddasikāti tatiyapakkhe ca cātuddasiyā saddhiṃ dve cātuddasikā. Imeti bhaṇḍanakārakā. Teti bhaṇḍanakārakā.
அஸங்விஹிதாதி எத்த² அகாரஸ்ஸ விரஹத்த²ங் த³ஸ்ஸெந்தோ ஆஹ ‘‘ஸங்வித³ஹனவிரஹிதா’’தி. தத்த² ஸங்வித³ஹனவிரஹிதாதி ஸங்வித³ஹனரக்க²விரஹிதா. ஆக³மனஜானநத்தா²யாதி ப⁴ண்ட³னகாரகானங் ஆக³மனஸ்ஸ ஜானநத்தா²ய. கிலந்தத்தா²தி தும்ஹே கிலந்தா ப⁴வத². ‘‘ஸம்மோஹங் கத்வா’’தி இமினா விக்கி²த்வாதி பத³ஸ்ஸ விக்கே²பங் கத்வாதி அத்த²ங் த³ஸ்ஸேதி. நோ சே லபே⁴தா²தி எத்த² கிமத்தா²ய ந லபே⁴தா²தி ஆஹ ‘‘ப³ஹிஸீமங் க³ந்து’’ந்தி. ‘‘ப⁴ண்ட³னகாரகானங்…பே॰… ஹொந்தீ’’தி இமினா அலப⁴னஸ்ஸ காரணங் த³ஸ்ஸேதி. யந்தி ஆக³மங் ஜுண்ஹங். கோமுதி³யா சாதுமாஸினியாதி பச்சி²மகத்திகபுண்ணமாயங். ஸா ஹி குமுதா³னமத்தி²தாய கோமுதீ³, சதுன்னங் வஸ்ஸிகானங் மாஸானங் பூரணத்தா சாதுமாஸினீதி வுச்சதி. ததா³ ஹி குமுதா³னி ஸுபுப்பி²தானி ஹொந்தி, தஸ்மா குமுதா³னங் ஸமூஹா, குமுதா³னி ஏவ வா கோமுதா³, தே எத்த² அத்தீ²தி கோமுதீ³தி வுச்சதி, குமுத³வதீதி வுத்தங் ஹோதி . அவஸ்ஸங் பவாரேதப்³ப³ந்தி து⁴வங் பவாரேதப்³ப³ங். ஹீதி ஸச்சங், யஸ்மா வா. தந்தி கோமுதி³ங் சாதுமாஸினிங்.
Asaṃvihitāti ettha akārassa virahatthaṃ dassento āha ‘‘saṃvidahanavirahitā’’ti. Tattha saṃvidahanavirahitāti saṃvidahanarakkhavirahitā. Āgamanajānanatthāyāti bhaṇḍanakārakānaṃ āgamanassa jānanatthāya. Kilantatthāti tumhe kilantā bhavatha. ‘‘Sammohaṃ katvā’’ti iminā vikkhitvāti padassa vikkhepaṃ katvāti atthaṃ dasseti. No ce labhethāti ettha kimatthāya na labhethāti āha ‘‘bahisīmaṃ gantu’’nti. ‘‘Bhaṇḍanakārakānaṃ…pe… hontī’’ti iminā alabhanassa kāraṇaṃ dasseti. Yanti āgamaṃ juṇhaṃ. Komudiyā cātumāsiniyāti pacchimakattikapuṇṇamāyaṃ. Sā hi kumudānamatthitāya komudī, catunnaṃ vassikānaṃ māsānaṃ pūraṇattā cātumāsinīti vuccati. Tadā hi kumudāni supupphitāni honti, tasmā kumudānaṃ samūhā, kumudāni eva vā komudā, te ettha atthīti komudīti vuccati, kumudavatīti vuttaṃ hoti . Avassaṃ pavāretabbanti dhuvaṃ pavāretabbaṃ. Hīti saccaṃ, yasmā vā. Tanti komudiṃ cātumāsiniṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 144. ப⁴ண்ட³னகாரகவத்து² • 144. Bhaṇḍanakārakavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ப⁴ண்ட³னகாரகவத்து²கதா² • Bhaṇḍanakārakavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ப⁴ண்ட³னகாரகவத்து²கதா²வண்ணனா • Bhaṇḍanakārakavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ப⁴ண்ட³னகாரகவத்து²கதா²வண்ணனா • Bhaṇḍanakārakavatthukathāvaṇṇanā
