| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā |
ಭಣ್ಡನಕಾರಕವತ್ಥುಕಥಾ
Bhaṇḍanakārakavatthukathā
೨೪೦. ದ್ವೇ ತಯೋ ಉಪೋಸಥೇ ಚಾತುದ್ದಸಿಕೇ ಕಾತುನ್ತಿ ಏತ್ಥ ಚತುತ್ಥಪಞ್ಚಮಾ ದ್ವೇ, ತತಿಯೋ ಪನ ಪಕತಿಯಾಪಿ ಚತುದ್ದಸಿಕೋಯೇವಾತಿ। ತಸ್ಮಾ ತತಿಯಚತುತ್ಥಾ ವಾ ತತಿಯಚತುತ್ಥಪಞ್ಚಮಾ ವಾ ದ್ವೇ ತಯೋ ಚಾತುದ್ದಸಿಕಾ ಕಾತಬ್ಬಾ। ಅಥ ಚತುತ್ಥೇ ಕತೇ ಸುಣನ್ತಿ, ಪಞ್ಚಮೋ ಚಾತುದ್ದಸಿಕೋ ಕಾತಬ್ಬೋ। ಏವಮ್ಪಿ ದ್ವೇ ಚಾತುದ್ದಸಿಕಾ ಹೋನ್ತಿ। ಏವಂ ಕರೋನ್ತಾ ಭಣ್ಡನಕಾರಕಾನಂ ತೇರಸೇ ವಾ ಚಾತುದ್ದಸೇ ವಾ ಇಮೇ ಪನ್ನರಸೀಪವಾರಣಂ ಪವಾರೇಸ್ಸನ್ತಿ। ಏವಂ ಪವಾರೇನ್ತೇಹಿ ಚ ಬಹಿಸೀಮಾಯ ಸಾಮಣೇರೇ ಠಪೇತ್ವಾ ‘‘ತೇ ಆಗಚ್ಛನ್ತೀ’’ತಿ ಸುತ್ವಾ ಲಹುಂ ಲಹುಂ ಸನ್ನಿಪತಿತ್ವಾ ಪವಾರೇತಬ್ಬಂ। ಏತಮತ್ಥಂ ದಸ್ಸೇತುಂ ‘‘ತೇ ಚೇ ಭಿಕ್ಖವೇ…ಪೇ॰… ತಥಾ ಕರೋನ್ತೂ’’ತಿ ವುತ್ತಂ।
240.Dve tayo uposathe cātuddasike kātunti ettha catutthapañcamā dve, tatiyo pana pakatiyāpi catuddasikoyevāti. Tasmā tatiyacatutthā vā tatiyacatutthapañcamā vā dve tayo cātuddasikā kātabbā. Atha catutthe kate suṇanti, pañcamo cātuddasiko kātabbo. Evampi dve cātuddasikā honti. Evaṃ karontā bhaṇḍanakārakānaṃ terase vā cātuddase vā ime pannarasīpavāraṇaṃ pavāressanti. Evaṃ pavārentehi ca bahisīmāya sāmaṇere ṭhapetvā ‘‘te āgacchantī’’ti sutvā lahuṃ lahuṃ sannipatitvā pavāretabbaṃ. Etamatthaṃ dassetuṃ ‘‘te ce bhikkhave…pe… tathā karontū’’ti vuttaṃ.
ಅಸಂವಿಹಿತಾತಿ ಸಂವಿದಹನರಹಿತಾ ಆಗಮನಜಾನನತ್ಥಾಯ ಅಕತಸಂವಿದಹಿತಾ; ಅವಿಞ್ಞಾತಾವ ಹುತ್ವಾತಿ ಅತ್ಥೋ। ತೇಸಂ ವಿಕ್ಖಿತ್ವಾತಿ ‘‘ಕಿಲನ್ತತ್ಥ ಮುಹುತ್ತಂ ವಿಸ್ಸಮಥಾ’’ತಿಆದಿನಾ ನಯೇನ ಸಮ್ಮೋಹಂ ಕತ್ವಾತಿ ಅತ್ಥೋ। ನೋ ಚೇ ಲಭೇಥಾತಿ ನೋ ಚೇ ಬಹಿಸೀಮಂ ಗನ್ತುಂ ಲಭೇಯ್ಯುಂ; ಭಣ್ಡನಕಾರಕಾನಂ ಸಾಮಣೇರೇಹಿ ಚ ದಹರಭಿಕ್ಖೂಹಿ ಚ ನಿರನ್ತರಂ ಅನುಬದ್ಧಾವ ಹೋನ್ತಿ। ಆಗಮೇ ಜುಣ್ಹೇತಿ ಯಂ ಸನ್ಧಾಯ ಆಗಮೇ ಜುಣ್ಹೇ ಪವಾರೇಯ್ಯಾಮಾತಿ ಞತ್ತಿಂ ಠಪೇಸುಂ, ತಸ್ಮಿಂ ಆಗಮೇ ಜುಣ್ಹೇ ಕೋಮುದಿಯಾ ಚಾತುಮಾಸಿನಿಯಾ ಅಕಾಮಾ ಪವಾರೇತಬ್ಬಂ, ಅವಸ್ಸಂ ಪವಾರೇತಬ್ಬಂ, ನ ಹಿ ತಂ ಅತಿಕ್ಕಮಿತ್ವಾ ಪವಾರೇತುಂ ಲಬ್ಭತಿ। ತೇಹಿ ಚೇ ಭಿಕ್ಖವೇ ಭಿಕ್ಖೂಹಿ ಪವಾರಿಯಮಾನೇತಿ ಏವಂ ಚಾತುಮಾಸಿನಿಯಾ ಪವಾರಿಯಮಾನೇ।
Asaṃvihitāti saṃvidahanarahitā āgamanajānanatthāya akatasaṃvidahitā; aviññātāva hutvāti attho. Tesaṃ vikkhitvāti ‘‘kilantattha muhuttaṃ vissamathā’’tiādinā nayena sammohaṃ katvāti attho. No ce labhethāti no ce bahisīmaṃ gantuṃ labheyyuṃ; bhaṇḍanakārakānaṃ sāmaṇerehi ca daharabhikkhūhi ca nirantaraṃ anubaddhāva honti. Āgame juṇheti yaṃ sandhāya āgame juṇhe pavāreyyāmāti ñattiṃ ṭhapesuṃ, tasmiṃ āgame juṇhe komudiyā cātumāsiniyā akāmā pavāretabbaṃ, avassaṃ pavāretabbaṃ, na hi taṃ atikkamitvā pavāretuṃ labbhati. Tehi ce bhikkhave bhikkhūhi pavāriyamāneti evaṃ cātumāsiniyā pavāriyamāne.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೧೪೪. ಭಣ್ಡನಕಾರಕವತ್ಥು • 144. Bhaṇḍanakārakavatthu
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಭಣ್ಡನಕಾರಕವತ್ಥುಕಥಾವಣ್ಣನಾ • Bhaṇḍanakārakavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಭಣ್ಡನಕಾರಕವತ್ಥುಕಥಾವಣ್ಣನಾ • Bhaṇḍanakārakavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೪೪. ಭಣ್ಡನಕಾರಕವತ್ಥುಕಥಾ • 144. Bhaṇḍanakārakavatthukathā
