| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. භණ්‌ඩනසුත්‌තං
2. Bhaṇḍanasuttaṃ
125. ‘‘යස්‌සං, භික්‌ඛවෙ, දිසායං භික්‌ඛූ භණ්‌ඩනජාතා කලහජාතා විවාදාපන්‌නා අඤ්‌ඤමඤ්‌ඤං මුඛසත්‌තීහි විතුදන්‌තා විහරන්‌ති, මනසි කාතුම්‌පි මෙ එසා, භික්‌ඛවෙ, දිසා න ඵාසු හොති, පගෙව ගන්‌තුං! නිට්‌ඨමෙත්‌ථ ගච්‌ඡාමි – ‘අද්‌ධා තෙ ආයස්‌මන්‌තො තයො ධම්‌මෙ පජහිංසු, තයො ධම්‌මෙ බහුලමකංසු 1. කතමෙ තයො ධම්‌මෙ පජහිංසු? නෙක්‌ඛම්‌මවිතක්‌කං, අබ්‍යාපාදවිතක්‌කං, අවිහිංසාවිතක්‌කං – ඉමෙ තයො ධම්‌මෙ පජහිංසු. කතමෙ තයො ධම්‌මෙ බහුලමකංසු? කාමවිතක්‌කං, බ්‍යාපාදවිතක්‌කං, විහිංසාවිතක්‌කං – ඉමෙ තයො ධම්‌මෙ බහුලමකංසු’. යස්‌සං, භික්‌ඛවෙ, දිසායං භික්‌ඛූ භණ්‌ඩනජාතා කලහජාතා විවාදාපන්‌නා අඤ්‌ඤමඤ්‌ඤං මුඛසත්‌තීහි විතුදන්‌තා විහරන්‌ති, මනසි කාතුම්‌පි මෙ එසා, භික්‌ඛවෙ, දිසා න ඵාසු හොති, පගෙව ගන්‌තුං! නිට්‌ඨමෙත්‌ථ ගච්‌ඡාමි – ‘අද්‌ධා තෙ ආයස්‌මන්‌තො ඉමෙ තයො ධම්‌මෙ පජහිංසු, ඉමෙ තයො ධම්‌මෙ බහුලමකංසු’’’.
125. ‘‘Yassaṃ, bhikkhave, disāyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṃ! Niṭṭhamettha gacchāmi – ‘addhā te āyasmanto tayo dhamme pajahiṃsu, tayo dhamme bahulamakaṃsu 2. Katame tayo dhamme pajahiṃsu? Nekkhammavitakkaṃ, abyāpādavitakkaṃ, avihiṃsāvitakkaṃ – ime tayo dhamme pajahiṃsu. Katame tayo dhamme bahulamakaṃsu? Kāmavitakkaṃ, byāpādavitakkaṃ, vihiṃsāvitakkaṃ – ime tayo dhamme bahulamakaṃsu’. Yassaṃ, bhikkhave, disāyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṃ! Niṭṭhamettha gacchāmi – ‘addhā te āyasmanto ime tayo dhamme pajahiṃsu, ime tayo dhamme bahulamakaṃsu’’’.
‘‘යස්‌සං පන, භික්‌ඛවෙ, දිසායං භික්‌ඛූ සමග්‌ගා සම්‌මොදමානා අවිවදමානා ඛීරොදකීභූතා අඤ්‌ඤමඤ්‌ඤං පියචක්‌ඛූහි සම්‌පස්‌සන්‌තා විහරන්‌ති, ගන්‌තුම්‌පි මෙ එසා, භික්‌ඛවෙ, දිසා ඵාසු හොති, පගෙව මනසි කාතුං! නිට්‌ඨමෙත්‌ථ ගච්‌ඡාමි – ‘අද්‌ධා තෙ ආයස්‌මන්‌තො තයො ධම්‌මෙ පජහිංසු, තයො ධම්‌මෙ බහුලමකංසු. කතමෙ තයො ධම්‌මෙ පජහිංසු? කාමවිතක්‌කං , බ්‍යාපාදවිතක්‌කං, විහිංසාවිතක්‌කං – ඉමෙ තයො ධම්‌මෙ පජහිංසු. කතමෙ තයො ධම්‌මෙ බහුලමකංසු? නෙක්‌ඛම්‌මවිතක්‌කං, අබ්‍යාපාදවිතක්‌කං, අවිහිංසාවිතක්‌කං – ඉමෙ තයො ධම්‌මෙ බහුලමකංසු’. යස්‌සං , භික්‌ඛවෙ, දිසායං භික්‌ඛූ සමග්‌ගා සම්‌මොදමානා අවිවදමානා ඛීරොදකීභූතා අඤ්‌ඤමඤ්‌ඤං පියචක්‌ඛූහි සම්‌පස්‌සන්‌තා විහරන්‌ති, ගන්‌තුම්‌පි මෙ එසා, භික්‌ඛවෙ, දිසා ඵාසු හොති, පගෙව මනසි කාතුං! නිට්‌ඨමෙත්‌ථ ගච්‌ඡාමි – ‘අද්‌ධා තෙ ආයස්‌මන්‌තො ඉමෙ තයො ධම්‌මෙ පජහිංසු, ඉමෙ තයො ධම්‌මෙ බහුලමකංසූ’’’ති. දුතියං.
‘‘Yassaṃ pana, bhikkhave, disāyaṃ bhikkhū samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṃ! Niṭṭhamettha gacchāmi – ‘addhā te āyasmanto tayo dhamme pajahiṃsu, tayo dhamme bahulamakaṃsu. Katame tayo dhamme pajahiṃsu? Kāmavitakkaṃ , byāpādavitakkaṃ, vihiṃsāvitakkaṃ – ime tayo dhamme pajahiṃsu. Katame tayo dhamme bahulamakaṃsu? Nekkhammavitakkaṃ, abyāpādavitakkaṃ, avihiṃsāvitakkaṃ – ime tayo dhamme bahulamakaṃsu’. Yassaṃ , bhikkhave, disāyaṃ bhikkhū samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṃ! Niṭṭhamettha gacchāmi – ‘addhā te āyasmanto ime tayo dhamme pajahiṃsu, ime tayo dhamme bahulamakaṃsū’’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. භණ්‌ඩනසුත්‌තවණ්‌ණනා • 2. Bhaṇḍanasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-2. කුසිනාරසුත්‌තාදිවණ්‌ණනා • 1-2. Kusinārasuttādivaṇṇanā
