| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༢. བྷཎྜནསུཏྟཾ
2. Bhaṇḍanasuttaṃ
༡༢༥. ‘‘ཡསྶཾ, བྷིཀྑཝེ, དིསཱཡཾ བྷིཀྑཱུ བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརནྟི, མནསི ཀཱཏུམྤི མེ ཨེསཱ, བྷིཀྑཝེ, དིསཱ ན ཕཱསུ ཧོཏི, པགེཝ གནྟུཾ! ནིཊྛམེཏྠ གཙྪཱམི – ‘ཨདྡྷཱ ཏེ ཨཱཡསྨནྟོ ཏཡོ དྷམྨེ པཛཧིཾསུ, ཏཡོ དྷམྨེ བཧུལམཀཾསུ 1། ཀཏམེ ཏཡོ དྷམྨེ པཛཧིཾསུ? ནེཀྑམྨཝིཏཀྐཾ, ཨབྱཱཔཱདཝིཏཀྐཾ, ཨཝིཧིཾསཱཝིཏཀྐཾ – ཨིམེ ཏཡོ དྷམྨེ པཛཧིཾསུ། ཀཏམེ ཏཡོ དྷམྨེ བཧུལམཀཾསུ? ཀཱམཝིཏཀྐཾ, བྱཱཔཱདཝིཏཀྐཾ, ཝིཧིཾསཱཝིཏཀྐཾ – ཨིམེ ཏཡོ དྷམྨེ བཧུལམཀཾསུ’། ཡསྶཾ, བྷིཀྑཝེ, དིསཱཡཾ བྷིཀྑཱུ བྷཎྜནཛཱཏཱ ཀལཧཛཱཏཱ ཝིཝཱདཱཔནྣཱ ཨཉྙམཉྙཾ མུཁསཏྟཱིཧི ཝིཏུདནྟཱ ཝིཧརནྟི, མནསི ཀཱཏུམྤི མེ ཨེསཱ, བྷིཀྑཝེ, དིསཱ ན ཕཱསུ ཧོཏི, པགེཝ གནྟུཾ! ནིཊྛམེཏྠ གཙྪཱམི – ‘ཨདྡྷཱ ཏེ ཨཱཡསྨནྟོ ཨིམེ ཏཡོ དྷམྨེ པཛཧིཾསུ, ཨིམེ ཏཡོ དྷམྨེ བཧུལམཀཾསུ’’’།
125. ‘‘Yassaṃ, bhikkhave, disāyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṃ! Niṭṭhamettha gacchāmi – ‘addhā te āyasmanto tayo dhamme pajahiṃsu, tayo dhamme bahulamakaṃsu 2. Katame tayo dhamme pajahiṃsu? Nekkhammavitakkaṃ, abyāpādavitakkaṃ, avihiṃsāvitakkaṃ – ime tayo dhamme pajahiṃsu. Katame tayo dhamme bahulamakaṃsu? Kāmavitakkaṃ, byāpādavitakkaṃ, vihiṃsāvitakkaṃ – ime tayo dhamme bahulamakaṃsu’. Yassaṃ, bhikkhave, disāyaṃ bhikkhū bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti, manasi kātumpi me esā, bhikkhave, disā na phāsu hoti, pageva gantuṃ! Niṭṭhamettha gacchāmi – ‘addhā te āyasmanto ime tayo dhamme pajahiṃsu, ime tayo dhamme bahulamakaṃsu’’’.
‘‘ཡསྶཾ པན, བྷིཀྑཝེ, དིསཱཡཾ བྷིཀྑཱུ སམགྒཱ སམྨོདམཱནཱ ཨཝིཝདམཱནཱ ཁཱིརོདཀཱིབྷཱུཏཱ ཨཉྙམཉྙཾ པིཡཙཀྑཱུཧི སམྤསྶནྟཱ ཝིཧརནྟི, གནྟུམྤི མེ ཨེསཱ, བྷིཀྑཝེ, དིསཱ ཕཱསུ ཧོཏི, པགེཝ མནསི ཀཱཏུཾ! ནིཊྛམེཏྠ གཙྪཱམི – ‘ཨདྡྷཱ ཏེ ཨཱཡསྨནྟོ ཏཡོ དྷམྨེ པཛཧིཾསུ, ཏཡོ དྷམྨེ བཧུལམཀཾསུ། ཀཏམེ ཏཡོ དྷམྨེ པཛཧིཾསུ? ཀཱམཝིཏཀྐཾ , བྱཱཔཱདཝིཏཀྐཾ, ཝིཧིཾསཱཝིཏཀྐཾ – ཨིམེ ཏཡོ དྷམྨེ པཛཧིཾསུ། ཀཏམེ ཏཡོ དྷམྨེ བཧུལམཀཾསུ? ནེཀྑམྨཝིཏཀྐཾ, ཨབྱཱཔཱདཝིཏཀྐཾ, ཨཝིཧིཾསཱཝིཏཀྐཾ – ཨིམེ ཏཡོ དྷམྨེ བཧུལམཀཾསུ’། ཡསྶཾ , བྷིཀྑཝེ, དིསཱཡཾ བྷིཀྑཱུ སམགྒཱ སམྨོདམཱནཱ ཨཝིཝདམཱནཱ ཁཱིརོདཀཱིབྷཱུཏཱ ཨཉྙམཉྙཾ པིཡཙཀྑཱུཧི སམྤསྶནྟཱ ཝིཧརནྟི, གནྟུམྤི མེ ཨེསཱ, བྷིཀྑཝེ, དིསཱ ཕཱསུ ཧོཏི, པགེཝ མནསི ཀཱཏུཾ! ནིཊྛམེཏྠ གཙྪཱམི – ‘ཨདྡྷཱ ཏེ ཨཱཡསྨནྟོ ཨིམེ ཏཡོ དྷམྨེ པཛཧིཾསུ, ཨིམེ ཏཡོ དྷམྨེ བཧུལམཀཾསཱུ’’’ཏི། དུཏིཡཾ།
‘‘Yassaṃ pana, bhikkhave, disāyaṃ bhikkhū samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṃ! Niṭṭhamettha gacchāmi – ‘addhā te āyasmanto tayo dhamme pajahiṃsu, tayo dhamme bahulamakaṃsu. Katame tayo dhamme pajahiṃsu? Kāmavitakkaṃ , byāpādavitakkaṃ, vihiṃsāvitakkaṃ – ime tayo dhamme pajahiṃsu. Katame tayo dhamme bahulamakaṃsu? Nekkhammavitakkaṃ, abyāpādavitakkaṃ, avihiṃsāvitakkaṃ – ime tayo dhamme bahulamakaṃsu’. Yassaṃ , bhikkhave, disāyaṃ bhikkhū samaggā sammodamānā avivadamānā khīrodakībhūtā aññamaññaṃ piyacakkhūhi sampassantā viharanti, gantumpi me esā, bhikkhave, disā phāsu hoti, pageva manasi kātuṃ! Niṭṭhamettha gacchāmi – ‘addhā te āyasmanto ime tayo dhamme pajahiṃsu, ime tayo dhamme bahulamakaṃsū’’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༢. བྷཎྜནསུཏྟཝཎྞནཱ • 2. Bhaṇḍanasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༢. ཀུསིནཱརསུཏྟཱདིཝཎྞནཱ • 1-2. Kusinārasuttādivaṇṇanā
