| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
10. ப⁴ண்ட³படிஸாமனவினிச்ச²யகதா²
10. Bhaṇḍapaṭisāmanavinicchayakathā
53. ஏவங் சீவரவிப்பவாஸவினிச்ச²யங் கதெ²த்வா இதா³னி ப⁴ண்ட³படிஸாமனவினிச்ச²யங் கதே²துங் ‘‘ப⁴ண்ட³ஸ்ஸ படிஸாமன’’ந்திஆதி³மாஹ. தத்த² ப⁴டி³தப்³ப³ங் பா⁴ஜேதப்³ப³ந்தி ப⁴ண்ட³ங், ப⁴டி³தப்³ப³ங் இச்சி²தப்³ப³ந்தி வா ப⁴ண்ட³ங், ப⁴ண்ட³ந்தி பரிப⁴ண்ட³ந்தி ஸத்தா ஏதேனாதி வா ப⁴ண்ட³ங், மூலத⁴னங், பரிக்கா²ரோ வா. வுத்தஞ்ஹி அபி⁴தா⁴னப்பதீ³பிகாயங் –
53. Evaṃ cīvaravippavāsavinicchayaṃ kathetvā idāni bhaṇḍapaṭisāmanavinicchayaṃ kathetuṃ ‘‘bhaṇḍassapaṭisāmana’’ntiādimāha. Tattha bhaḍitabbaṃ bhājetabbanti bhaṇḍaṃ, bhaḍitabbaṃ icchitabbanti vā bhaṇḍaṃ, bhaṇḍanti paribhaṇḍanti sattā etenāti vā bhaṇḍaṃ, mūladhanaṃ, parikkhāro vā. Vuttañhi abhidhānappadīpikāyaṃ –
‘‘பா⁴ஜனாதி³பரிக்கா²ரே, ப⁴ண்ட³ங் மூலத⁴னேபி சா’’தி.
‘‘Bhājanādiparikkhāre, bhaṇḍaṃ mūladhanepi cā’’ti.
தஸ்ஸ ப⁴ண்ட³ஸ்ஸ, படிஸாமியதே படிஸாமனங், ரக்க²ணங் கோ³பனந்தி அத்தோ². தேனாஹ ‘‘பரேஸங் ப⁴ண்ட³ஸ்ஸ கோ³பன’’ந்தி. மாது கண்ணபிளந்த⁴னங் தாலபண்ணம்பீதி பி-ஸத்³தோ³ ஸம்பா⁴வனத்தோ². தேன பகே³வ அஞ்ஞாதகானங் ஸந்தகந்தி த³ஸ்ஸேதி. கி³ஹிஸந்தகந்தி இமினா பஞ்சன்னங் ஸஹத⁴ம்மிகானங் ஸந்தகங் படிஸாமேதுங் வட்டதீதி தீ³பேதி. ப⁴ண்டா³கா³ரிகஸீஸேனாதி ஏதேன விஸ்ஸாஸக்³கா³ஹாதி³னா க³ஹெத்வா படிஸாமெந்தஸ்ஸ அனாபத்தீதி த³ஸ்ஸேதி. தேன வக்க²தி ‘‘அத்தனோ அத்தா²ய க³ஹெத்வா படிஸாமேதப்³ப³’’ந்தி. ச²ந்தே³னபி ப⁴யேனபீதி வட்³ட⁴கீஆதீ³ஸு ச²ந்தே³ன , ராஜவல்லபா⁴தீ³ஸு ப⁴யேன ப³லக்காரேன பாதெத்வா க³தேஸு ச படிஸாமேதுங் வட்டதீதி யோஜேதப்³ப³ங்.
Tassa bhaṇḍassa, paṭisāmiyate paṭisāmanaṃ, rakkhaṇaṃ gopananti attho. Tenāha ‘‘paresaṃ bhaṇḍassa gopana’’nti. Mātu kaṇṇapiḷandhanaṃ tālapaṇṇampīti pi-saddo sambhāvanattho. Tena pageva aññātakānaṃ santakanti dasseti. Gihisantakanti iminā pañcannaṃ sahadhammikānaṃ santakaṃ paṭisāmetuṃ vaṭṭatīti dīpeti. Bhaṇḍāgārikasīsenāti etena vissāsaggāhādinā gahetvā paṭisāmentassa anāpattīti dasseti. Tena vakkhati ‘‘attano atthāya gahetvā paṭisāmetabba’’nti. Chandenapi bhayenapīti vaḍḍhakīādīsu chandena , rājavallabhādīsu bhayena balakkārena pātetvā gatesu ca paṭisāmetuṃ vaṭṭatīti yojetabbaṃ.
ஸங்கோ³பனத்தா²ய அத்தனோ ஹத்தே² நிக்கி²த்தஸ்ஸ ப⁴ண்ட³ஸ்ஸ கு³த்தட்டா²னே படிஸாமனபயோக³ங் வினா ‘‘நாஹங் க³ண்ஹாமீ’’திஆதி³னா அஞ்ஞஸ்மிங் பயோகே³ அகதே ரஜ்ஜஸங்கோ²பா⁴தி³காலே ‘‘ந தா³னி தஸ்ஸ த³ஸ்ஸாமி, ந மய்ஹங் தா³னி த³ஸ்ஸதீ’’தி உபோ⁴ஹிபி ஸகஸகட்டா²னே நிஸீதி³த்வா து⁴ரனிக்கே²பே கதேபி அவஹாரோ நத்தி². கேசி பனெத்த² ‘‘பாராஜிகமேவ படிஸாமனபயோக³ஸ்ஸ கதத்தா’’தி வத³ந்தி, தங் தேஸங் மதிமத்தங், ந ஸாரதோ பச்சேதப்³ப³ங். படிஸாமனகாலே ஹிஸ்ஸ தெ²ய்யசித்தங் நத்தி², ‘‘ந தா³னி தஸ்ஸ த³ஸ்ஸாமீ’’தி தெ²ய்யசித்துப்பத்திக்க²ணே ச ஸாமினோ து⁴ரனிக்கே²பசித்தப்பவத்தியா ஹேதுபூ⁴தோ காயவசீபயோகோ³ நத்தி², யேன ஸோ ஆபத்திங் ஆபஜ்ஜெய்ய. ந ஹி அகிரியஸமுட்டா²னா அயங் ஆபத்தீதி. தா³னே ஸஉஸ்ஸாஹோ, ரக்க²தி தாவாதி அவஹாரங் ஸந்தா⁴ய அவுத்தத்தா ‘‘நாஹங் க³ண்ஹாமீ’’திஆதி³னா முஸாவாத³கரணே பாசித்தியமேவ ஹோதி, ந து³க்கடங் தெ²ய்யசித்தாபா⁴வேன ஸஹபயோக³ஸ்ஸபி அபா⁴வதோதி க³ஹேதப்³ப³ங்.
Saṅgopanatthāya attano hatthe nikkhittassa bhaṇḍassa guttaṭṭhāne paṭisāmanapayogaṃ vinā ‘‘nāhaṃ gaṇhāmī’’tiādinā aññasmiṃ payoge akate rajjasaṅkhobhādikāle ‘‘na dāni tassa dassāmi, na mayhaṃ dāni dassatī’’ti ubhohipi sakasakaṭṭhāne nisīditvā dhuranikkhepe katepi avahāro natthi. Keci panettha ‘‘pārājikameva paṭisāmanapayogassa katattā’’ti vadanti, taṃ tesaṃ matimattaṃ, na sārato paccetabbaṃ. Paṭisāmanakāle hissa theyyacittaṃ natthi, ‘‘na dāni tassa dassāmī’’ti theyyacittuppattikkhaṇe ca sāmino dhuranikkhepacittappavattiyā hetubhūto kāyavacīpayogo natthi, yena so āpattiṃ āpajjeyya. Na hi akiriyasamuṭṭhānā ayaṃ āpattīti. Dāne saussāho, rakkhati tāvāti avahāraṃ sandhāya avuttattā ‘‘nāhaṃ gaṇhāmī’’tiādinā musāvādakaraṇe pācittiyameva hoti, na dukkaṭaṃ theyyacittābhāvena sahapayogassapi abhāvatoti gahetabbaṃ.
யதி³பி முகே²ன த³ஸ்ஸாமீதி வத³தி…பே॰… பாராஜிகந்தி எத்த² கதரபயோகே³ன ஆபத்தி, ந தாவ பட²மேன ப⁴ண்ட³படிஸாமனபயோகே³ன ததா³ தெ²ய்யசித்தபா⁴வா, நாபி ‘‘த³ஸ்ஸாமீ’’தி கத²னபயோகே³ன ததா³ தெ²ய்யசித்தே விஜ்ஜமானேபி பயோக³ஸ்ஸ கப்பியத்தாதி? வுச்சதே – ஸாமினா ‘‘தே³ஹீ’’தி ப³ஹுஸோ யாசியமானோபி அத³த்வா யேன பயோகே³ன அத்தனோ அதா³துகாமதங் ஸாமிகஸ்ஸ ஞாபேஸி, யேன ச ஸோ அதா³துகாமோ அயங் விக்கி²பதீதி ஞத்வா து⁴ரங் நிக்கி²பதி, தேனேவ பயோகே³னஸ்ஸ ஆபத்தி. ந ஹெத்த² உபனிக்கி²த்தப⁴ண்டே³ பரியாயேன முத்தி அத்தி². அதா³துகாமதாய ஹி ‘‘கதா³ தே தி³ன்னங், கத்த² தே தி³ன்ன’’ந்திஆதி³பரியாயவசனேனபி ஸாமிகஸ்ஸ து⁴ரேனிக்கி²பாபிதே ஆபத்தியேவ. தேனேவ அட்ட²கதா²யங் வுத்தங் ‘‘கிங் தும்ஹே ப⁴ணத²…பே॰… உபி⁴ன்னங் து⁴ரனிக்கே²பேன பி⁴க்கு²னோ பாராஜிக’’ந்தி. பரஸந்தகஸ்ஸ பரேஹி க³ண்ஹாபனே ஏவ ஹி பரியாயதோ முத்தி, ந ஸப்³ப³த்தா²தி க³ஹேதப்³ப³ங். அத்தனோ ஹத்தே² நிக்கி²த்தத்தாதி எத்த² அத்தனோ ஹத்தே² ஸாமினா தி³ன்னதாய ப⁴ண்டா³கா³ரிகட்டா²னே டி²தத்தா ச டா²னாசாவனேபி நத்தி² அவஹாரோ, தெ²ய்யசித்தேன பன க³ஹணே து³க்கடதோ ந முச்சதீதி வேதி³தப்³ப³ங். ஏஸேவ நயோதி அவஹாரோ நத்தி², ப⁴ண்ட³தெ³ய்யங் பன ஹோதீதி அதி⁴ப்பாயோ.
Yadipi mukhena dassāmīti vadati…pe… pārājikanti ettha katarapayogena āpatti, na tāva paṭhamena bhaṇḍapaṭisāmanapayogena tadā theyyacittabhāvā, nāpi ‘‘dassāmī’’ti kathanapayogena tadā theyyacitte vijjamānepi payogassa kappiyattāti? Vuccate – sāminā ‘‘dehī’’ti bahuso yāciyamānopi adatvā yena payogena attano adātukāmataṃ sāmikassa ñāpesi, yena ca so adātukāmo ayaṃ vikkhipatīti ñatvā dhuraṃ nikkhipati, teneva payogenassa āpatti. Na hettha upanikkhittabhaṇḍe pariyāyena mutti atthi. Adātukāmatāya hi ‘‘kadā te dinnaṃ, kattha te dinna’’ntiādipariyāyavacanenapi sāmikassa dhurenikkhipāpite āpattiyeva. Teneva aṭṭhakathāyaṃ vuttaṃ ‘‘kiṃ tumhe bhaṇatha…pe… ubhinnaṃ dhuranikkhepena bhikkhuno pārājika’’nti. Parasantakassa parehi gaṇhāpane eva hi pariyāyato mutti, na sabbatthāti gahetabbaṃ. Attano hatthe nikkhittattāti ettha attano hatthe sāminā dinnatāya bhaṇḍāgārikaṭṭhāne ṭhitattā ca ṭhānācāvanepi natthi avahāro, theyyacittena pana gahaṇe dukkaṭato na muccatīti veditabbaṃ. Eseva nayoti avahāro natthi, bhaṇḍadeyyaṃ pana hotīti adhippāyo.
54. பஞ்சன்னங் ஸஹத⁴ம்மிகானந்தி பி⁴க்கு²பி⁴க்கு²னீஸிக்க²மானஸாமணேரஸாமணேரீனங். ஏதேன ந கேவலங் கி³ஹீனங் ஏவ, அத² கோ² தாபஸபரிப்³பா³ஜகாதீ³னம்பி ஸந்தகங் படிஸாமேதுங் ந வட்டதீதி த³ஸ்ஸேதி. நட்டே²பி கீ³வா ந ஹோதி, கஸ்மா? அஸம்படிச்சா²பிதத்தாதி அத்தோ². து³தியே ஏஸேவ நயோதி கீ³வா ந ஹோதி, கஸ்மா? அஜானிதத்தா. ததியே ச ஏஸேவ நயோதி கீ³வா ந ஹோதி, கஸ்மா? படிக்கி²பிதத்தா. எத்த² ச காயேன வா வாசாய வா சித்தேன வா படிக்கி²த்தோபி படிக்கி²த்தோயேவ நாம ஹோதி.
54.Pañcannaṃ sahadhammikānanti bhikkhubhikkhunīsikkhamānasāmaṇerasāmaṇerīnaṃ. Etena na kevalaṃ gihīnaṃ eva, atha kho tāpasaparibbājakādīnampi santakaṃ paṭisāmetuṃ na vaṭṭatīti dasseti. Naṭṭhepi gīvā na hoti, kasmā? Asampaṭicchāpitattāti attho. Dutiye eseva nayoti gīvā na hoti, kasmā? Ajānitattā. Tatiye ca eseva nayoti gīvā na hoti, kasmā? Paṭikkhipitattā. Ettha ca kāyena vā vācāya vā cittena vā paṭikkhittopi paṭikkhittoyeva nāma hoti.
தஸ்ஸேவ கீ³வா ஹோதி, ந ஸேஸபி⁴க்கூ²னங், கஸ்மா? தஸ்ஸேவ ப⁴ண்டா³கா³ரிகஸ்ஸ ப⁴ண்டா³கா³ரே இஸ்ஸரபா⁴வதோ. ப⁴ண்டா³கா³ரிகஸ்ஸ கீ³வா ந ஹோதி அலஸஜாதிகஸ்ஸேவ பமாதே³ன ஹரிதத்தா. து³தியே ப⁴ண்டா³கா³ரிகஸ்ஸ கீ³வா ந ஹோதி தஸ்ஸ அனாரோசிதத்தா. நட்டே² தஸ்ஸ கீ³வா தேன ட²பிதத்தா. தஸ்ஸேவ கீ³வா, ந அஞ்ஞேஸங் தேன ப⁴ண்டா³கா³ரிகேன ஸம்படிச்சி²தத்தா ட²பிதத்தா ச. நத்தி² கீ³வா தேன படிக்கி²பிதத்தா. நட்ட²ங் ஸுனட்ட²மேவ ப⁴ண்டா³கா³ரிகஸ்ஸ அஸம்படிச்சா²பனதோ. நட்டே² கீ³வா தேன ட²பிதத்தா. ஸப்³ப³ங் தஸ்ஸ கீ³வா தஸ்ஸ ப⁴ண்டா³கா³ரிகஸ்ஸ பமாதே³ன ஹரணதோ. தத்தே²வ உபசாரே விஜ்ஜமானேதி ப⁴ண்டா³கா³ரிகஸ்ஸ ஸமீபேயேவ உச்சாரபஸ்ஸாவட்டா²னே விஜ்ஜமானே.
Tasseva gīvā hoti, na sesabhikkhūnaṃ, kasmā? Tasseva bhaṇḍāgārikassa bhaṇḍāgāre issarabhāvato. Bhaṇḍāgārikassa gīvā na hoti alasajātikasseva pamādena haritattā. Dutiye bhaṇḍāgārikassa gīvā na hoti tassa anārocitattā. Naṭṭhe tassa gīvā tena ṭhapitattā. Tasseva gīvā, na aññesaṃ tena bhaṇḍāgārikena sampaṭicchitattā ṭhapitattā ca. Natthi gīvā tena paṭikkhipitattā. Naṭṭhaṃ sunaṭṭhameva bhaṇḍāgārikassa asampaṭicchāpanato. Naṭṭhe gīvā tena ṭhapitattā. Sabbaṃ tassa gīvā tassa bhaṇḍāgārikassa pamādena haraṇato. Tattheva upacāre vijjamāneti bhaṇḍāgārikassa samīpeyeva uccārapassāvaṭṭhāne vijjamāne.
55. மயி ச மதே ஸங்க⁴ஸ்ஸ ச ஸேனாஸனே வினட்டே²தி எத்த² கேவலங் ஸங்க⁴ஸ்ஸ ஸேனாஸனங் மா வினஸ்ஸீதி இமினா அதி⁴ப்பாயேன விவரிதும்பி வட்டதியேவாதி வத³ந்தி. ‘‘தங் மாரெஸ்ஸாமீ’’தி எத்தகே வுத்தேபி விவரிதுங் வட்டதி ‘‘கி³லானபக்கே² டி²தத்தா அவிஸயோ’’தி வுத்தத்தா. மரணதோ ஹி பரங் கே³லஞ்ஞங் அவிஸயத்தஞ்ச நத்தி². ‘‘த்³வாரங் சி²ந்தி³த்வா ஹரிஸ்ஸாமா’’தி எத்தகே வுத்தேபி விவரிதுங் வட்டதியேவ. ஸஹாயேஹி ப⁴விதப்³ப³ந்தி தேஹிபி பி⁴க்கா²சாராதீ³ஹி பரியேஸித்வா அத்தனோ ஸந்தகம்பி கிஞ்சி கிஞ்சி தா³தப்³ப³ந்தி வுத்தங் ஹோதி. அயஞ்ஹி ஸாமீசீதி ப⁴ண்டா³கா³ரே வஸந்தானங் இத³ங் வத்தங். லோலமஹாதே²ரோதி மந்தோ³ மோமூஹோ ஆகிண்ணவிஹாரீ ஸதா³ கீளாபஸுதோ வா மஹாதே²ரோ.
55.Mayica mate saṅghassa ca senāsane vinaṭṭheti ettha kevalaṃ saṅghassa senāsanaṃ mā vinassīti iminā adhippāyena vivaritumpi vaṭṭatiyevāti vadanti. ‘‘Taṃ māressāmī’’ti ettake vuttepi vivarituṃ vaṭṭati ‘‘gilānapakkhe ṭhitattā avisayo’’ti vuttattā. Maraṇato hi paraṃ gelaññaṃ avisayattañca natthi. ‘‘Dvāraṃ chinditvā harissāmā’’ti ettake vuttepi vivarituṃ vaṭṭatiyeva. Sahāyehi bhavitabbanti tehipi bhikkhācārādīhi pariyesitvā attano santakampi kiñci kiñci dātabbanti vuttaṃ hoti. Ayañhi sāmīcīti bhaṇḍāgāre vasantānaṃ idaṃ vattaṃ. Lolamahātheroti mando momūho ākiṇṇavihārī sadā kīḷāpasuto vā mahāthero.
56. இதரேஹீதி தஸ்மிங்யேவ க³ப்³பே⁴ வஸந்தேஹி பி⁴க்கூ²ஹி. விஹாரரக்க²ணவாரே நியுத்தோ விஹாரவாரிகோ, வுட்³ட⁴படிபாடியா அத்தனோ வாரே விஹாரரக்க²ணகோ. நிவாபந்தி ப⁴த்தவேதனங். சோரானங் படிபத²ங் க³தேஸூதி சோரானங் ஆக³மனங் ஞத்வா ‘‘பட²மதரங்யேவ க³ந்த்வா ஸத்³த³ங் கரிஸ்ஸாமா’’தி சோரானங் அபி⁴முக²ங் க³தேஸு. ‘‘சோரேஹி ஹடப⁴ண்ட³ங் ஆஹரிஸ்ஸாமா’’தி தேஸங் அனுபத²ங் க³தேஸுபி ஏஸேவ நயோ. நிப³த்³த⁴ங் கத்வாதி ‘‘அஸுககுலே யாகு³ப⁴த்தங் விஹாரவாரிகானங்யேவா’’தி ஏவங் நியமனங் கத்வா. த்³வே திஸ்ஸோ யாகு³ஸலாகா ச சத்தாரி பஞ்ச ஸலாகப⁴த்தானி ச லப⁴மானோவாதி இத³ங் நித³ஸ்ஸனமத்தங், ததோ ஊனங் வா ஹோது அதி⁴கங் வா, அத்தனோ ச வெய்யாவச்சகரஸ்ஸ ச யாபனமத்தங் லப⁴னமேவ பமாணந்தி க³ஹேதப்³ப³ங். நிஸ்ஸிதகே ஜக்³கா³பெந்தீதி அத்தனோ அத்தனோ நிஸ்ஸிதகே பி⁴க்கா²சரியாய போஸெந்தா நிஸ்ஸிதகேஹி விஹாரங் ஜக்³கா³பெந்தி. அஸஹாயஸ்ஸாதி ஸஹாயரஹிதஸ்ஸ. ‘‘அஸஹாயஸ்ஸ அது³தியஸ்ஸா’’தி பாடோ² யுத்தோ. பச்சி²மங் புரிமஸ்ஸேவ வேவசனங். அஸஹாயஸ்ஸ வா அத்தது³தியஸ்ஸ வாதி இமஸ்மிங் பன பாடே² ஏகேன ஆனீதங் த்³வின்னங் நப்பஹோதீதி அத்தது³தியஸ்ஸபி வாரோ நிவாரிதோதி வத³ந்தி, தங் ‘‘யஸ்ஸ ஸபா⁴கோ³ பி⁴க்கு² ப⁴த்தங் ஆனெத்வா தா³தா நத்தீ²’’தி இமினா ந ஸமேதி, வீமங்ஸிதப்³ப³ங். விமதிவினோத³னியங் (வி॰ வி॰ டீ॰ 1.112) பன ‘‘அத்தது³தியஸ்ஸாதி அப்பிச்ச²ஸ்ஸ. அத்தாஸரீரமேவ து³தியோ, ந அஞ்ஞோதி ஹி அத்தது³தியோ, தது³ப⁴யஸ்ஸபி அத்த²ஸ்ஸ விபா⁴வனங் ‘யஸ்ஸா’திஆதி³. ஏதேன ஸப்³பே³ன ஏகேகஸ்ஸ வாரோ ந பாபேதப்³போ³தி த³ஸ்ஸேதீ’’தி வுத்தங்.
56.Itarehīti tasmiṃyeva gabbhe vasantehi bhikkhūhi. Vihārarakkhaṇavāre niyutto vihāravāriko, vuḍḍhapaṭipāṭiyā attano vāre vihārarakkhaṇako. Nivāpanti bhattavetanaṃ. Corānaṃ paṭipathaṃ gatesūti corānaṃ āgamanaṃ ñatvā ‘‘paṭhamataraṃyeva gantvā saddaṃ karissāmā’’ti corānaṃ abhimukhaṃ gatesu. ‘‘Corehi haṭabhaṇḍaṃ āharissāmā’’ti tesaṃ anupathaṃ gatesupi eseva nayo. Nibaddhaṃ katvāti ‘‘asukakule yāgubhattaṃ vihāravārikānaṃyevā’’ti evaṃ niyamanaṃ katvā. Dve tisso yāgusalākā ca cattāri pañca salākabhattāni ca labhamānovāti idaṃ nidassanamattaṃ, tato ūnaṃ vā hotu adhikaṃ vā, attano ca veyyāvaccakarassa ca yāpanamattaṃ labhanameva pamāṇanti gahetabbaṃ. Nissitake jaggāpentīti attano attano nissitake bhikkhācariyāya posentā nissitakehi vihāraṃ jaggāpenti. Asahāyassāti sahāyarahitassa. ‘‘Asahāyassa adutiyassā’’ti pāṭho yutto. Pacchimaṃ purimasseva vevacanaṃ. Asahāyassa vā attadutiyassa vāti imasmiṃ pana pāṭhe ekena ānītaṃ dvinnaṃ nappahotīti attadutiyassapi vāro nivāritoti vadanti, taṃ ‘‘yassa sabhāgo bhikkhu bhattaṃ ānetvā dātā natthī’’ti iminā na sameti, vīmaṃsitabbaṃ. Vimativinodaniyaṃ (vi. vi. ṭī. 1.112) pana ‘‘attadutiyassāti appicchassa. Attāsarīrameva dutiyo, na aññoti hi attadutiyo, tadubhayassapi atthassa vibhāvanaṃ ‘yassā’tiādi. Etena sabbena ekekassa vāro na pāpetabboti dassetī’’ti vuttaṃ.
பாகவத்தத்தா²யாதி நிச்சங் பசிதப்³ப³யாகு³ப⁴த்தஸங்கா²தவத்தத்தா²ய. ட²பெந்தீதி தா³யகா ட²பெந்தி. தங் க³ஹெத்வாதி தங் ஆராமிகாதீ³ஹி தீ³யமானங் பா⁴க³ங் க³ஹெத்வா. உபஜீவந்தேன டா²தப்³ப³ந்தி அப்³போ⁴காஸிகருக்க²மூலிகேனபி பாகவத்தங் உபனிஸ்ஸாய ஜீவந்தேன அத்தனோ பத்தசீவரரக்க²ணத்தா²ய விஹாரவாரே ஸம்பத்தே டா²தப்³ப³ங். ந கா³ஹாபேதப்³போ³தி எத்த² யஸ்ஸ அப்³போ⁴காஸிகஸ்ஸபி அத்தனோ அதி⁴கபரிக்கா²ரோ சே ட²பிதோ அத்தி², சீவராதி³ஸங்கி⁴கபா⁴கே³பி ஆலயோ அத்தி², ஸோபி கா³ஹாபேதப்³போ³ . பரிபுச்ச²ந்தி புச்சி²தபஞ்ஹவிஸ்ஸஜ்ஜனங், அட்ட²கத²ங் வா. தி³கு³ணந்தி அஞ்ஞேஹி லப்³ப⁴மானதோ த்³விகு³ணங். பக்க²வாரேனாதி அட்³ட⁴மாஸவாரேன.
Pākavattatthāyāti niccaṃ pacitabbayāgubhattasaṅkhātavattatthāya. Ṭhapentīti dāyakā ṭhapenti. Taṃ gahetvāti taṃ ārāmikādīhi dīyamānaṃ bhāgaṃ gahetvā. Upajīvantena ṭhātabbanti abbhokāsikarukkhamūlikenapi pākavattaṃ upanissāya jīvantena attano pattacīvararakkhaṇatthāya vihāravāre sampatte ṭhātabbaṃ. Na gāhāpetabboti ettha yassa abbhokāsikassapi attano adhikaparikkhāro ce ṭhapito atthi, cīvarādisaṅghikabhāgepi ālayo atthi, sopi gāhāpetabbo . Paripucchanti pucchitapañhavissajjanaṃ, aṭṭhakathaṃ vā. Diguṇanti aññehi labbhamānato dviguṇaṃ. Pakkhavārenāti aḍḍhamāsavārena.
இதி வினயஸங்க³ஹஸங்வண்ணனாபூ⁴தே வினயாலங்காரே
Iti vinayasaṅgahasaṃvaṇṇanābhūte vinayālaṅkāre
ப⁴ண்ட³படிஸாமனவினிச்ச²யகதா²லங்காரோ நாம
Bhaṇḍapaṭisāmanavinicchayakathālaṅkāro nāma
த³ஸமோ பரிச்சே²தோ³.
Dasamo paricchedo.
