| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
10. бхан̣д̣абадисааманавинижчаяагат̇аа
10. Bhaṇḍapaṭisāmanavinicchayakathā
53. бхан̣д̣асса бадисаамананд̇и барзсам̣ бхан̣д̣асса г̇обанам̣. барзсан̃хи (баажи. адта. 506) габбияавад̇т̇у ваа ход̇у агаббияавад̇т̇у ваа, анд̇амасо маад̇у ган̣н̣абил̣анд̇ханам̣ гаалабан̣н̣амби г̇ихисанд̇агам̣ бхан̣д̣ааг̇ааригасийсзна бадисаамзнд̇асса баажид̇д̇ияам̣. сажз бана маад̇аабид̇уунам̣ санд̇агам̣ авассам̣ бадисаамзд̇аб̣б̣ам̣ габбияабхан̣д̣ам̣ ход̇и, ад̇д̇ано ад̇т̇ааяа г̇ахзд̇ваа бадисаамзд̇аб̣б̣ам̣. ‘‘ид̣̇ам̣ бадисаамзд̇ваа д̣̇зхий’’д̇и бана вуд̇д̇з ‘‘на ваддад̇ий’’д̇и бадигкибид̇аб̣б̣ам̣. сажз ‘‘бадисаамзхий’’д̇и баад̇зд̇ваа г̇ажчанд̇и, балиб̣од̇хо наама ход̇и, бадисаамзд̇ум̣ ваддад̇и. вихаарз гаммам̣ гаронд̇аа вад̣дхагийаад̣̇аяо ваа рааж̇аваллабхаа ваа ‘‘ад̇д̇ано убагаран̣абхан̣д̣ам̣ ваа саяанабхан̣д̣ам̣ ваа бадисаамзд̇ваа д̣̇зт̇аа’’д̇и вад̣̇анд̇и, чанд̣̇знаби бхаязнаби на гаад̇аб̣б̣амзва, г̇уд̇д̇адтаанам̣ бана д̣̇ассзд̇ум̣ ваддад̇и, б̣алаггаарзна баад̇зд̇ваа г̇ад̇зсу жа бадисаамзд̇ум̣.
53.Bhaṇḍassapaṭisāmananti paresaṃ bhaṇḍassa gopanaṃ. Paresañhi (pāci. aṭṭha. 506) kappiyavatthu vā hotu akappiyavatthu vā, antamaso mātu kaṇṇapiḷandhanaṃ kālapaṇṇampi gihisantakaṃ bhaṇḍāgārikasīsena paṭisāmentassa pācittiyaṃ. Sace pana mātāpitūnaṃ santakaṃ avassaṃ paṭisāmetabbaṃ kappiyabhaṇḍaṃ hoti, attano atthāya gahetvā paṭisāmetabbaṃ. ‘‘Idaṃ paṭisāmetvā dehī’’ti pana vutte ‘‘na vaṭṭatī’’ti paṭikkhipitabbaṃ. Sace ‘‘paṭisāmehī’’ti pātetvā gacchanti, palibodho nāma hoti, paṭisāmetuṃ vaṭṭati. Vihāre kammaṃ karontā vaḍḍhakīādayo vā rājavallabhā vā ‘‘attano upakaraṇabhaṇḍaṃ vā sayanabhaṇḍaṃ vā paṭisāmetvā dethā’’ti vadanti, chandenapi bhayenapi na kātabbameva, guttaṭṭhānaṃ pana dassetuṃ vaṭṭati, balakkārena pātetvā gatesu ca paṭisāmetuṃ.
сажз (баараа. адта. 1.111) ад̇д̇ано хад̇т̇з бадисааманад̇т̇ааяа табид̇ам̣ бхан̣д̣ам̣ саамигзна ‘‘д̣̇зхи мз бхан̣д̣а’’нд̇и яаажид̇о ад̣̇аад̇угаамо ‘‘наахам̣ г̇ан̣хаамий’’д̇и бхан̣ад̇и, самбаж̇аанамусааваад̣̇зби ад̣̇иннаад̣̇аанасса баяог̇ад̇д̇аа д̣̇уггадам̣. ‘‘гим̣ д̇умхз бхан̣ат̇а, нзвид̣̇ам̣ маяхам̣ ануруубам̣, на д̇умхаага’’нд̇иаад̣̇ийни вад̣̇анд̇ассаби д̣̇уггадамзва. ‘‘рахо маяаа зд̇асса хад̇т̇з табид̇ам̣, на ан̃н̃о гожи ж̇аанаад̇и, д̣̇ассад̇и ну ко мз, но’’д̇и саамиго вимад̇им̣ уббаад̣̇зд̇и, бхигкусса т̇уллажжаяам̣. д̇асса парусаад̣̇ибхаавам̣ д̣̇исваа саамиго ‘‘на маяхам̣ д̣̇ассад̇ий’’д̇и д̇хурам̣ нигкибад̇и, д̇ад̇ра сажааяам̣ бхигку ‘‘гиламзд̇ваа нам̣ д̣̇ассаамий’’д̇и д̣̇аанз сауссаахо, рагкад̇и д̇аава. сажзби со д̣̇аанз нируссаахо, бхан̣д̣асаамиго бана г̇ахан̣з сауссаахо, рагкад̇иязва. яад̣̇и бана д̇асмим̣ д̣̇аанз нируссаахо бхан̣д̣асаамиго ‘‘на маяхам̣ д̣̇ассад̇ий’’д̇и д̇хурам̣ нигкибад̇и, звам̣ убхиннам̣ д̇хуранигкзбзна бхигкуно баарааж̇игам̣. яад̣̇иби мукзна ‘‘д̣̇ассаамий’’д̇и вад̣̇ад̇и, жид̇д̇зна бана ад̣̇аад̇угаамо, звамби саамигасса д̇хуранигкзбз баарааж̇игам̣. д̇ам̣ бана сан̇г̇обанад̇т̇ааяа ад̇д̇ано хад̇т̇з барзхи табид̇ам̣ бхан̣д̣ам̣ аг̇уд̇д̇ад̣̇зсад̇о таанаа жаавзд̇ваа г̇уд̇д̇адтаанз табанад̇т̇ааяа харад̇о анаабад̇д̇и. т̇зяяажид̇д̇знаби таанаа жаавзнд̇асса авахааро над̇т̇и. гасмаа? ад̇д̇ано хад̇т̇з нигкид̇д̇ад̇д̇аа, бхан̣д̣ад̣̇зяяам̣ бана ход̇и. т̇зяяажид̇д̇зна барибхун̃ж̇ад̇оби зсзва наяо.
Sace (pārā. aṭṭha. 1.111) attano hatthe paṭisāmanatthāya ṭhapitaṃ bhaṇḍaṃ sāmikena ‘‘dehi me bhaṇḍa’’nti yācito adātukāmo ‘‘nāhaṃ gaṇhāmī’’ti bhaṇati, sampajānamusāvādepi adinnādānassa payogattā dukkaṭaṃ. ‘‘Kiṃ tumhe bhaṇatha, nevidaṃ mayhaṃ anurūpaṃ, na tumhāka’’ntiādīni vadantassapi dukkaṭameva. ‘‘Raho mayā etassa hatthe ṭhapitaṃ, na añño koci jānāti, dassati nu kho me, no’’ti sāmiko vimatiṃ uppādeti, bhikkhussa thullaccayaṃ. Tassa pharusādibhāvaṃ disvā sāmiko ‘‘na mayhaṃ dassatī’’ti dhuraṃ nikkhipati, tatra sacāyaṃ bhikkhu ‘‘kilametvā naṃ dassāmī’’ti dāne saussāho, rakkhati tāva. Sacepi so dāne nirussāho, bhaṇḍasāmiko pana gahaṇe saussāho, rakkhatiyeva. Yadi pana tasmiṃ dāne nirussāho bhaṇḍasāmiko ‘‘na mayhaṃ dassatī’’ti dhuraṃ nikkhipati, evaṃ ubhinnaṃ dhuranikkhepena bhikkhuno pārājikaṃ. Yadipi mukhena ‘‘dassāmī’’ti vadati, cittena pana adātukāmo, evampi sāmikassa dhuranikkhepe pārājikaṃ. Taṃ pana saṅgopanatthāya attano hatthe parehi ṭhapitaṃ bhaṇḍaṃ aguttadesato ṭhānā cāvetvā guttaṭṭhāne ṭhapanatthāya harato anāpatti. Theyyacittenapi ṭhānā cāventassa avahāro natthi. Kasmā? Attano hatthe nikkhittattā, bhaṇḍadeyyaṃ pana hoti. Theyyacittena paribhuñjatopi eseva nayo.
54. бан̃жаннам̣ сахад̇хаммигаанам̣ санд̇агам̣ бана яам̣ гин̃жи баригкаарам̣ бадисаамзд̇ум̣ ваддад̇и. сажз ааг̇анд̇уго бхигку ааваасигаанам̣ жийварагаммам̣ гаронд̇аанам̣ самийбз бад̇д̇ажийварам̣ табзд̇ваа ‘‘зд̇з сан̇г̇обзссанд̇ий’’д̇и ман̃н̃амаано нахааяид̇ум̣ ваа ан̃н̃ад̇ра ваа г̇ажчад̇и, сажз д̇ам̣ ааваасигаа сан̇г̇обзнд̇и, ижжзд̇ам̣ гусалам̣. но жз, надтз г̇ийваа на ход̇и. сажзби со ‘‘ид̣̇ам̣, бханд̇з, табзт̇аа’’д̇и вад̇ваа г̇ажчад̇и, ид̇арз жа гижжабасуд̇ад̇д̇аа на ж̇аананд̇и, зсзва наяо. ат̇ааби д̇з ‘‘ид̣̇ам̣, бханд̇з, табзт̇аа’’д̇и вуд̇д̇аа ‘‘маяам̣ б̣яаавадаа’’д̇и бадигкибанд̇и, ид̇аро жа ‘‘авассам̣ табзссанд̇ий’’д̇и анаад̣̇ияид̇ваа г̇ажчад̇и, зсзва наяо. сажз бана д̇з д̇зна яаажид̇аа ваа аяаажид̇аа ваа ‘‘маяам̣ табзссаама, д̇вам̣ г̇ажчаа’’д̇и вад̣̇анд̇и, д̇ам̣ сан̇г̇обид̇аб̣б̣ам̣. но жз сан̇г̇обзнд̇и, надтз г̇ийваа. гасмаа? самбадижчид̇ад̇д̇аа.
54. Pañcannaṃ sahadhammikānaṃ santakaṃ pana yaṃ kiñci parikkhāraṃ paṭisāmetuṃ vaṭṭati. Sace āgantuko bhikkhu āvāsikānaṃ cīvarakammaṃ karontānaṃ samīpe pattacīvaraṃ ṭhapetvā ‘‘ete saṅgopessantī’’ti maññamāno nahāyituṃ vā aññatra vā gacchati, sace taṃ āvāsikā saṅgopenti, iccetaṃ kusalaṃ. No ce, naṭṭhe gīvā na hoti. Sacepi so ‘‘idaṃ, bhante, ṭhapethā’’ti vatvā gacchati, itare ca kiccapasutattā na jānanti, eseva nayo. Athāpi te ‘‘idaṃ, bhante, ṭhapethā’’ti vuttā ‘‘mayaṃ byāvaṭā’’ti paṭikkhipanti, itaro ca ‘‘avassaṃ ṭhapessantī’’ti anādiyitvā gacchati, eseva nayo. Sace pana te tena yācitā vā ayācitā vā ‘‘mayaṃ ṭhapessāma, tvaṃ gacchā’’ti vadanti, taṃ saṅgopitabbaṃ. No ce saṅgopenti, naṭṭhe gīvā. Kasmā? Sampaṭicchitattā.
яо бхигку бхан̣д̣ааг̇аариго худ̇ваа бажжуусасамаяз зва бхигкуунам̣ бад̇д̇ажийвараани хздтаабаасаад̣̇ам̣ оробзд̇ваа д̣̇ваарам̣ абид̣̇ахид̇ваа д̇зсамби анаарожзд̇ваава д̣̇уурз бхигкаажаарам̣ г̇ажчад̇и, д̇аани жз жораа харанд̇и, д̇ассзва г̇ийваа. яо бана бхигку бхигкуухи ‘‘оробзт̇а, бханд̇з, бад̇д̇ажийвараани, гаало салаагаг̇г̇ахан̣ассаа’’д̇и вуд̇д̇о ‘‘самааг̇ад̇аад̇т̇аа’’д̇и бужчид̇ваа ‘‘аама самааг̇ад̇аамхаа’’д̇и вуд̇д̇з бад̇д̇ажийвараани нийхарид̇ваа нигкибид̇ваа бхан̣д̣ааг̇аарад̣̇ваарам̣ б̣анд̇хид̇ваа ‘‘д̇умхз бад̇д̇ажийвараани г̇ахзд̇ваа хздтаабаасаад̣̇ад̣̇ваарам̣ бадиж̇аг̇г̇ид̇ваа г̇ажчзяяаат̇аа’’д̇и вад̇ваа г̇ажчад̇и. д̇ад̇ра жзго аласаж̇аад̇иго бхигку бхигкуусу г̇ад̇зсу бажчаа агкийни бун̃чанд̇о удтахид̇ваа уд̣̇агадтаанам̣ мукад̇хованад̇т̇ам̣ г̇ажчад̇и, д̇ам̣ кан̣ам̣ д̣̇исваа жораа д̇асса бад̇д̇ажийварам̣ харанд̇и, сухадам̣, бхан̣д̣ааг̇ааригасса г̇ийваа на ход̇и.
Yo bhikkhu bhaṇḍāgāriko hutvā paccūsasamaye eva bhikkhūnaṃ pattacīvarāni heṭṭhāpāsādaṃ oropetvā dvāraṃ apidahitvā tesampi anārocetvāva dūre bhikkhācāraṃ gacchati, tāni ce corā haranti, tasseva gīvā. Yo pana bhikkhu bhikkhūhi ‘‘oropetha, bhante, pattacīvarāni, kālo salākaggahaṇassā’’ti vutto ‘‘samāgatātthā’’ti pucchitvā ‘‘āma samāgatāmhā’’ti vutte pattacīvarāni nīharitvā nikkhipitvā bhaṇḍāgāradvāraṃ bandhitvā ‘‘tumhe pattacīvarāni gahetvā heṭṭhāpāsādadvāraṃ paṭijaggitvā gaccheyyāthā’’ti vatvā gacchati. Tatra ceko alasajātiko bhikkhu bhikkhūsu gatesu pacchā akkhīni puñchanto uṭṭhahitvā udakaṭṭhānaṃ mukhadhovanatthaṃ gacchati, taṃ khaṇaṃ disvā corā tassa pattacīvaraṃ haranti, suhaṭaṃ, bhaṇḍāgārikassa gīvā na hoti.
сажзби гожи бхан̣д̣ааг̇ааригасса анаарожзд̇ваава бхан̣д̣ааг̇аарз ад̇д̇ано баригкаарам̣ табзд̇и, д̇асмимби надтз бхан̣д̣ааг̇ааригасса г̇ийваа на ход̇и. сажз бана бхан̣д̣ааг̇аариго д̇ам̣ д̣̇исваа ‘‘адтаанз табид̇а’’нд̇и г̇ахзд̇ваа табзд̇и, надтз д̇ассзва г̇ийваа. сажзби табид̇абхигкунаа ‘‘маяаа, бханд̇з, ийд̣̇исо наама баригкааро табид̇о, убад̇хаарзяяаат̇аа’’д̇и вуд̇д̇о ‘‘саад̇хуу’’д̇и самбадижчад̇и, д̣̇уннигкид̇д̇ам̣ ваа ман̃н̃амаано ан̃н̃асмим̣ таанз табзд̇и, надтз д̇ассзва г̇ийваа. ‘‘наахам̣ ж̇аанаамий’’д̇и бадигкибанд̇асса бана над̇т̇и г̇ийваа. яоби д̇асса бассанд̇ассзва табзд̇и, бхан̣д̣ааг̇аариган̃жа на самбадижчаабзд̇и, надтам̣ сунадтамзва. сажз бана нам̣ бхан̣д̣ааг̇аариго ан̃н̃ад̇ра табзд̇и, надтз г̇ийваа . сажз бхан̣д̣ааг̇аарам̣ суг̇уд̇д̇ам̣, саб̣б̣о сан̇гхасса жзд̇ияасса жа баригкааро д̇ад̇т̇зва табийяад̇и, бхан̣д̣ааг̇аариго жа б̣аало аб̣яад̇д̇о д̣̇ваарам̣ виварид̇ваа д̇хаммагат̇ам̣ ваа сод̇ум̣ ан̃н̃ам̣ ваа гин̃жи гаад̇ум̣ гад̇т̇ажи г̇ажчад̇и, д̇ам̣ кан̣ам̣ д̣̇исваа яад̇д̇агам̣ жораа харанд̇и, саб̣б̣ам̣ д̇асса г̇ийваа. бхан̣д̣ааг̇аарад̇о нигкамид̇ваа б̣ахи жан̇гаманд̇асса ваа д̣̇ваарам̣ виварид̇ваа сарийрам̣ уд̇ум̣ г̇аахаабзнд̇асса ваа д̇ад̇т̇зва саман̣ад̇хаммаануяог̇зна нисиннасса ваа д̇ад̇т̇зва нисийд̣̇ид̇ваа гзнажи гаммзна б̣яаавадасса ваа ужжаарабассаавабийл̣ид̇ассаби сад̇о д̇ад̇т̇зва убажаарз виж̇ж̇амаанз б̣ахи г̇ажчад̇о ваа ан̃н̃зна ваа гзнажи аагаарзна бамад̇д̇асса сад̇о д̣̇ваарам̣ виварид̇ваа ваа вивадамзва бависид̇ваа ваа санд̇хим̣ чинд̣̇ид̇ваа ваа яад̇д̇агам̣ д̇асса бамаад̣̇абажжаяаа жораа харанд̇и, саб̣б̣ам̣ д̇ассзва г̇ийваа. ‘‘ун̣хасамаяз бана ваад̇абаанам̣ виварид̇ваа нибаж̇ж̇ид̇ум̣ ваддад̇ий’’д̇и вад̣̇анд̇и. ужжаарабийл̣ид̇асса бана д̇асмим̣ убажаарз асад̇и ан̃н̃ад̇т̇а г̇ажчанд̇асса г̇илаанабагкз тид̇ад̇д̇аа ависаяо, д̇асмаа г̇ийваа на ход̇и.
Sacepi koci bhaṇḍāgārikassa anārocetvāva bhaṇḍāgāre attano parikkhāraṃ ṭhapeti, tasmimpi naṭṭhe bhaṇḍāgārikassa gīvā na hoti. Sace pana bhaṇḍāgāriko taṃ disvā ‘‘aṭṭhāne ṭhapita’’nti gahetvā ṭhapeti, naṭṭhe tasseva gīvā. Sacepi ṭhapitabhikkhunā ‘‘mayā, bhante, īdiso nāma parikkhāro ṭhapito, upadhāreyyāthā’’ti vutto ‘‘sādhū’’ti sampaṭicchati, dunnikkhittaṃ vā maññamāno aññasmiṃ ṭhāne ṭhapeti, naṭṭhe tasseva gīvā. ‘‘Nāhaṃ jānāmī’’ti paṭikkhipantassa pana natthi gīvā. Yopi tassa passantasseva ṭhapeti, bhaṇḍāgārikañca na sampaṭicchāpeti, naṭṭhaṃ sunaṭṭhameva. Sace pana naṃ bhaṇḍāgāriko aññatra ṭhapeti, naṭṭhe gīvā . Sace bhaṇḍāgāraṃ suguttaṃ, sabbo saṅghassa cetiyassa ca parikkhāro tattheva ṭhapīyati, bhaṇḍāgāriko ca bālo abyatto dvāraṃ vivaritvā dhammakathaṃ vā sotuṃ aññaṃ vā kiñci kātuṃ katthaci gacchati, taṃ khaṇaṃ disvā yattakaṃ corā haranti, sabbaṃ tassa gīvā. Bhaṇḍāgārato nikkhamitvā bahi caṅkamantassa vā dvāraṃ vivaritvā sarīraṃ utuṃ gāhāpentassa vā tattheva samaṇadhammānuyogena nisinnassa vā tattheva nisīditvā kenaci kammena byāvaṭassa vā uccārapassāvapīḷitassapi sato tattheva upacāre vijjamāne bahi gacchato vā aññena vā kenaci ākārena pamattassa sato dvāraṃ vivaritvā vā vivaṭameva pavisitvā vā sandhiṃ chinditvā vā yattakaṃ tassa pamādapaccayā corā haranti, sabbaṃ tasseva gīvā. ‘‘Uṇhasamaye pana vātapānaṃ vivaritvā nipajjituṃ vaṭṭatī’’ti vadanti. Uccārapīḷitassa pana tasmiṃ upacāre asati aññattha gacchantassa gilānapakkhe ṭhitattā avisayo, tasmā gīvā na hoti.
55. яо бана анд̇о ун̣хабийл̣ид̇о д̣̇ваарам̣ суг̇уд̇д̇ам̣ гад̇ваа б̣ахи нигкамад̇и, жораа д̇ам̣ г̇ахзд̇ваа ‘‘д̣̇ваарам̣ вивараа’’д̇и вад̣̇анд̇и, яаавад̇ад̇ияам̣ на виварид̇аб̣б̣ам̣. яад̣̇и бана д̇з жораа ‘‘сажз на вивараси, д̇ан̃жа маарзссаама, д̣̇вааран̃жа бхинд̣̇ид̇ваа баригкаарам̣ хариссаамаа’’д̇и парасуаад̣̇ийни угкибанд̇и, ‘‘маяи жа мад̇з сан̇гхасса жа сзнаасанз винадтз г̇ун̣о над̇т̇ий’’д̇и виварид̇ум̣ ваддад̇и. ид̇хааби ‘‘ависаяад̇д̇аа г̇ийваа над̇т̇ий’’д̇и вад̣̇анд̇и. сажз гожи ааг̇анд̇уго гун̃жигам̣ ваа д̣̇зд̇и, д̣̇ваарам̣ ваа виварад̇и, яад̇д̇агам̣ жораа харанд̇и, саб̣б̣ам̣ д̇асса г̇ийваа. сан̇гхзна бхан̣д̣ааг̇аарам̣ г̇уд̇д̇ад̇т̇ааяа суужияанд̇аган̃жа гун̃жигамуд̣̇д̣̇игаа жа яож̇зд̇ваа д̣̇иннаа ход̇и, бхан̣д̣ааг̇аариго гхадигамад̇д̇ам̣ д̣̇ад̇ваа нибаж̇ж̇ад̇и, жораа виварид̇ваа баригкаарам̣ харанд̇и, д̇ассзва г̇ийваа. суужияанд̇аган̃жа гун̃жигамуд̣̇д̣̇иган̃жа яож̇зд̇ваа нибаннам̣ банзд̇ам̣ сажз жораа ааг̇анд̇ваа ‘‘д̣̇ваарам̣ вивараахий’’д̇и вад̣̇анд̇и, д̇ад̇т̇а буриманаязнзва бадибаж̇ж̇ид̇аб̣б̣ам̣. звам̣ суг̇уд̇д̇ам̣ гад̇ваа нибаннз бана сажз бхид̇д̇им̣ ваа чад̣̇анам̣ ваа бхинд̣̇ид̇ваа уман̇г̇зна ваа бависид̇ваа харанд̇и, на д̇асса г̇ийваа.
55. Yo pana anto uṇhapīḷito dvāraṃ suguttaṃ katvā bahi nikkhamati, corā taṃ gahetvā ‘‘dvāraṃ vivarā’’ti vadanti, yāvatatiyaṃ na vivaritabbaṃ. Yadi pana te corā ‘‘sace na vivarasi, tañca māressāma, dvārañca bhinditvā parikkhāraṃ harissāmā’’ti pharasuādīni ukkhipanti, ‘‘mayi ca mate saṅghassa ca senāsane vinaṭṭhe guṇo natthī’’ti vivarituṃ vaṭṭati. Idhāpi ‘‘avisayattā gīvā natthī’’ti vadanti. Sace koci āgantuko kuñcikaṃ vā deti, dvāraṃ vā vivarati, yattakaṃ corā haranti, sabbaṃ tassa gīvā. Saṅghena bhaṇḍāgāraṃ guttatthāya sūciyantakañca kuñcikamuddikā ca yojetvā dinnā hoti, bhaṇḍāgāriko ghaṭikamattaṃ datvā nipajjati, corā vivaritvā parikkhāraṃ haranti, tasseva gīvā. Sūciyantakañca kuñcikamuddikañca yojetvā nipannaṃ panetaṃ sace corā āgantvā ‘‘dvāraṃ vivarāhī’’ti vadanti, tattha purimanayeneva paṭipajjitabbaṃ. Evaṃ suguttaṃ katvā nipanne pana sace bhittiṃ vā chadanaṃ vā bhinditvā umaṅgena vā pavisitvā haranti, na tassa gīvā.
сажз бхан̣д̣ааг̇аарз ан̃н̃зби т̇зраа васанд̇и, вивадз д̣̇ваарз ад̇д̇ано ад̇д̇ано баригкаарам̣ г̇ахзд̇ваа г̇ажчанд̇и, бхан̣д̣ааг̇аариго д̇зсу г̇ад̇зсу д̣̇ваарам̣ на ж̇аг̇г̇ад̇и, сажз д̇ад̇т̇а гин̃жи авахарийяад̇и, бхан̣д̣ааг̇ааригасса иссаравад̇ааяа бхан̣д̣ааг̇ааригассзва г̇ийваа, т̇зрзхи бана сахааязхи бхавид̇аб̣б̣ам̣. аяан̃хи саамийжи. яад̣̇и бхан̣д̣ааг̇аариго ‘‘д̇умхз б̣ахи тад̇ваа д̇умхаагам̣ баригкаарам̣ г̇ан̣хат̇а , маа бависид̇т̇аа’’д̇и вад̣̇ад̇и, д̇зсан̃жа зго лоламахаат̇зро сааман̣зрзхи жзва убадтаагзхи жа сад̣̇д̇хим̣ бхан̣д̣ааг̇аарам̣ бависид̇ваа нисийд̣̇ад̇и жзва нибаж̇ж̇ад̇и жа, яад̇д̇агам̣ бхан̣д̣ам̣ нассад̇и, саб̣б̣ам̣ д̇асса г̇ийваа, бхан̣д̣ааг̇ааригзна бана авасзсат̇зрзхи жа сахааязхи бхавид̇аб̣б̣ам̣. ат̇а бхан̣д̣ааг̇ааригова лоласааман̣зрз жа убадтаагз жа г̇ахзд̇ваа бхан̣д̣ааг̇аарз нисийд̣̇ад̇и жзва нибаж̇ж̇ад̇и жа, яад̇д̇агам̣ нассад̇и, саб̣б̣ам̣ д̇ассзва г̇ийваа. д̇асмаа бхан̣д̣ааг̇ааригзнзва д̇ад̇т̇а васид̇аб̣б̣ам̣, авасзсзхи аббзва ругкамуулз васид̇аб̣б̣ам̣, на жа бхан̣д̣ааг̇аарзд̇и.
Sace bhaṇḍāgāre aññepi therā vasanti, vivaṭe dvāre attano attano parikkhāraṃ gahetvā gacchanti, bhaṇḍāgāriko tesu gatesu dvāraṃ na jaggati, sace tattha kiñci avaharīyati, bhaṇḍāgārikassa issaravatāya bhaṇḍāgārikasseva gīvā, therehi pana sahāyehi bhavitabbaṃ. Ayañhi sāmīci. Yadi bhaṇḍāgāriko ‘‘tumhe bahi ṭhatvā tumhākaṃ parikkhāraṃ gaṇhatha , mā pavisitthā’’ti vadati, tesañca eko lolamahāthero sāmaṇerehi ceva upaṭṭhākehi ca saddhiṃ bhaṇḍāgāraṃ pavisitvā nisīdati ceva nipajjati ca, yattakaṃ bhaṇḍaṃ nassati, sabbaṃ tassa gīvā, bhaṇḍāgārikena pana avasesatherehi ca sahāyehi bhavitabbaṃ. Atha bhaṇḍāgārikova lolasāmaṇere ca upaṭṭhāke ca gahetvā bhaṇḍāgāre nisīdati ceva nipajjati ca, yattakaṃ nassati, sabbaṃ tasseva gīvā. Tasmā bhaṇḍāgārikeneva tattha vasitabbaṃ, avasesehi appeva rukkhamūle vasitabbaṃ, na ca bhaṇḍāgāreti.
56. яз бана ад̇д̇ано ад̇д̇ано сабхааг̇абхигкуунам̣ васанаг̇аб̣бхзсу баригкаарам̣ табзнд̇и, баригкаарз надтз язхи табид̇о, д̇зсам̣язва г̇ийваа, ид̇арзхи бана сахааязхи бхавид̇аб̣б̣ам̣. яад̣̇и бана сан̇гхо бхан̣д̣ааг̇ааригасса вихаарзязва яааг̇убхад̇д̇ам̣ д̣̇аабзд̇и, со жа бхигкаажаарад̇т̇ааяа г̇аамам̣ г̇ажчад̇и, надтам̣ д̇ассзва г̇ийваа. бхигкаажаарам̣ бависанд̇зхи ад̇ирзгажийварам̣ рагкан̣ад̇т̇ааяа табид̇авихааравааригассаби яааг̇убхад̇д̇ам̣ ваа ниваабам̣ ваа лабхамаанассзва бхигкаажаарам̣ г̇ажчад̇о яам̣ д̇ад̇т̇а нассад̇и, саб̣б̣ам̣ г̇ийваа. на гзвалан̃жа зд̇д̇агамзва, бхан̣д̣ааг̇ааригасса вияа яам̣ д̇асса бамаад̣̇абажжаяаа нассад̇и, саб̣б̣ам̣ г̇ийваа.
56. Ye pana attano attano sabhāgabhikkhūnaṃ vasanagabbhesu parikkhāraṃ ṭhapenti, parikkhāre naṭṭhe yehi ṭhapito, tesaṃyeva gīvā, itarehi pana sahāyehi bhavitabbaṃ. Yadi pana saṅgho bhaṇḍāgārikassa vihāreyeva yāgubhattaṃ dāpeti, so ca bhikkhācāratthāya gāmaṃ gacchati, naṭṭhaṃ tasseva gīvā. Bhikkhācāraṃ pavisantehi atirekacīvaraṃ rakkhaṇatthāya ṭhapitavihāravārikassapi yāgubhattaṃ vā nivāpaṃ vā labhamānasseva bhikkhācāraṃ gacchato yaṃ tattha nassati, sabbaṃ gīvā. Na kevalañca ettakameva, bhaṇḍāgārikassa viya yaṃ tassa pamādapaccayā nassati, sabbaṃ gīvā.
сажз вихааро махаа ход̇и, ан̃н̃ам̣ бад̣̇зсам̣ рагкид̇ум̣ г̇ажчанд̇асса ан̃н̃асмим̣ бад̣̇зсз нигкид̇д̇ам̣ харанд̇и, ависаяад̇д̇аа г̇ийваа на ход̇и. ийд̣̇исз бана вихаарз взмаж̇жхз саб̣б̣зсам̣ осаран̣адтаанз баригкаарз табзд̇ваа нисийд̣̇ид̇аб̣б̣ам̣, вихааравааригаа ваа д̣̇вз д̇аяо табзд̇аб̣б̣аа. сажз д̇зсамби аббамад̇д̇аанам̣ ид̇о жид̇о жа рагкад̇ам̣язва гин̃жи нассад̇и, г̇ийваа на ход̇и. вихааравааригз б̣анд̇хид̇ваа харид̇абхан̣д̣амби жораанам̣ бадибат̇ам̣ г̇ад̇зсу ан̃н̃зна маг̇г̇зна харид̇абхан̣д̣амби на д̇зсам̣ г̇ийваа. сажз вихааравааригаанам̣ вихаарз д̣̇аад̇аб̣б̣ам̣ яааг̇убхад̇д̇ам̣ ваа ниваабо ваа на ход̇и, д̇зхи бад̇д̇аб̣б̣алаабхад̇о ад̇ирзгаа д̣̇вз д̇иссо яааг̇усалаагаа д̇зсам̣ бахонагабхад̇д̇асалаагаа жа табзд̇ум̣ ваддад̇и, ниб̣ад̣̇д̇хам̣ гад̇ваа бана на табзд̇аб̣б̣аа. мануссаа хи виббадисаарино хонд̇и ‘‘вихааравааригааязва амхаагам̣ бхад̇д̇ам̣ бхун̃ж̇анд̇ий’’д̇и, д̇асмаа баривад̇д̇зд̇ваа баривад̇д̇зд̇ваа табзд̇аб̣б̣аа. сажз д̇зсам̣ сабхааг̇аа салаагабхад̇д̇аад̣̇ийни аахарид̇ваа д̣̇знд̇и, ижжзд̇ам̣ гусалам̣ . но жз д̣̇знд̇и, ваарам̣ г̇аахаабзд̇ваа нийхараабзд̇аб̣б̣аани. сажз вихаараваариго д̣̇вз д̇иссо яааг̇усалаагаа жа жад̇д̇аари бан̃жа салаагабхад̇д̇аани жа лабхамаано бхигкаажаарам̣ г̇ажчад̇и, бхан̣д̣ааг̇ааригасса вияа саб̣б̣ам̣ надтам̣ г̇ийваа ход̇и. сажз сан̇гхасса вихаарабаалаанам̣ д̣̇аад̇аб̣б̣ам̣ бхад̇д̇ам̣ ваа ниваабо ваа над̇т̇и, бхигкуу вихаараваарам̣ г̇ахзд̇ваа ад̇д̇ано ад̇д̇ано ниссид̇агз вихаарам̣ ж̇аг̇г̇аабзнд̇и, самбад̇д̇аваарам̣ аг̇г̇ахзд̇ум̣ на лабхад̇и. яат̇аа ан̃н̃з бхигкуу гаронд̇и, д̇ат̇зва гаад̇аб̣б̣ам̣. бхигкуухи бана асахааяасса ваа ад̣̇уд̇ияасса ваа яасса сабхааг̇о бхигку бхад̇д̇ам̣ аанзд̇ваа д̣̇аад̇аа над̇т̇и, зваруубасса вааро на баабзд̇аб̣б̣о.
Sace vihāro mahā hoti, aññaṃ padesaṃ rakkhituṃ gacchantassa aññasmiṃ padese nikkhittaṃ haranti, avisayattā gīvā na hoti. Īdise pana vihāre vemajjhe sabbesaṃ osaraṇaṭṭhāne parikkhāre ṭhapetvā nisīditabbaṃ, vihāravārikā vā dve tayo ṭhapetabbā. Sace tesampi appamattānaṃ ito cito ca rakkhataṃyeva kiñci nassati, gīvā na hoti. Vihāravārike bandhitvā haritabhaṇḍampi corānaṃ paṭipathaṃ gatesu aññena maggena haritabhaṇḍampi na tesaṃ gīvā. Sace vihāravārikānaṃ vihāre dātabbaṃ yāgubhattaṃ vā nivāpo vā na hoti, tehi pattabbalābhato atirekā dve tisso yāgusalākā tesaṃ pahonakabhattasalākā ca ṭhapetuṃ vaṭṭati, nibaddhaṃ katvā pana na ṭhapetabbā. Manussā hi vippaṭisārino honti ‘‘vihāravārikāyeva amhākaṃ bhattaṃ bhuñjantī’’ti, tasmā parivattetvā parivattetvā ṭhapetabbā. Sace tesaṃ sabhāgā salākabhattādīni āharitvā denti, iccetaṃ kusalaṃ . No ce denti, vāraṃ gāhāpetvā nīharāpetabbāni. Sace vihāravāriko dve tisso yāgusalākā ca cattāri pañca salākabhattāni ca labhamāno bhikkhācāraṃ gacchati, bhaṇḍāgārikassa viya sabbaṃ naṭṭhaṃ gīvā hoti. Sace saṅghassa vihārapālānaṃ dātabbaṃ bhattaṃ vā nivāpo vā natthi, bhikkhū vihāravāraṃ gahetvā attano attano nissitake vihāraṃ jaggāpenti, sampattavāraṃ aggahetuṃ na labhati. Yathā aññe bhikkhū karonti, tatheva kātabbaṃ. Bhikkhūhi pana asahāyassa vā adutiyassa vā yassa sabhāgo bhikkhu bhattaṃ ānetvā dātā natthi, evarūpassa vāro na pāpetabbo.
яамби баагаваддад̇т̇ааяа вихаарз табзнд̇и, д̇ам̣ г̇ахзд̇ваа убаж̇ийванд̇зна таад̇аб̣б̣ам̣. яо д̇ам̣ на убаж̇ийвад̇и, со ваарам̣ на г̇аахаабзд̇аб̣б̣о. палаапалад̇т̇ааяаби вихаарз бхигкум̣ табзнд̇и, ж̇аг̇г̇ид̇ваа г̇обзд̇ваа палаваарзна бхааж̇зд̇ваа каад̣̇анд̇и. яо д̇аани каад̣̇ад̇и, д̇зна таад̇аб̣б̣ам̣, анубаж̇ийванд̇о на г̇аахаабзд̇аб̣б̣о. сзнаасанаман̃жабийтабажжад̇т̇аран̣арагкан̣ад̇т̇ааяаби табзнд̇и, ааваасз васанд̇зна таад̇аб̣б̣ам̣, аб̣бхогаасиго бана ругкамуулиго ваа на г̇аахаабзд̇аб̣б̣о. зго наваго ход̇и, б̣ахуссуд̇о бана б̣ахуунам̣ д̇хаммам̣ ваажзд̇и, барибужчам̣ д̣̇зд̇и, баал̣им̣ ван̣н̣зд̇и, д̇хаммагат̇ам̣ гат̇зд̇и, сан̇гхасса бхаарам̣ нид̇т̇арад̇и, аяам̣ лаабхам̣ барибхун̃ж̇анд̇оби ааваасз васанд̇оби ваарам̣ на г̇аахаабзд̇аб̣б̣о. ‘‘бурисависзсо наама н̃аад̇аб̣б̣о’’д̇и вад̣̇анд̇и. убосат̇ааг̇аарабадимаагхараж̇аг̇г̇анагасса бана д̣̇иг̇ун̣ам̣ яааг̇убхад̇д̇ам̣, д̣̇звасигам̣ д̇ан̣д̣уланаал̣и, сам̣важчарз д̇ижийварам̣ д̣̇асавийсаг̇гханагам̣ габбияабхан̣д̣ан̃жа д̣̇аад̇аб̣б̣ам̣. сажз бана д̇асса д̇ам̣ лабхамаанассзва бамаад̣̇зна д̇ад̇т̇а гин̃жи нассад̇и, саб̣б̣ам̣ г̇ийваа. б̣анд̇хид̇ваа б̣алаггаарзна ажчиннам̣, на г̇ийваа. д̇ад̇т̇а жзд̇ияасса ваа сан̇гхасса ваа санд̇агзна жзд̇ияасса санд̇агам̣ рагкаабзд̇ум̣ ваддад̇и, жзд̇ияасса санд̇агзна сан̇гхасса санд̇агам̣ рагкаабзд̇ум̣ на ваддад̇и. яам̣ бана жзд̇ияасса санд̇агзна сад̣̇д̇хим̣ сан̇гхасса санд̇агам̣ табид̇ам̣ ход̇и, д̇ам̣ жзд̇ияасанд̇агз рагкаабид̇з рагкид̇амзва ход̇ийд̇и звам̣ ваддад̇и. багкаваарзна убосат̇ааг̇аараад̣̇ийни рагкад̇оби бамаад̣̇авасзна надтам̣ г̇ийвааязваад̇и.
Yampi pākavaṭṭatthāya vihāre ṭhapenti, taṃ gahetvā upajīvantena ṭhātabbaṃ. Yo taṃ na upajīvati, so vāraṃ na gāhāpetabbo. Phalāphalatthāyapi vihāre bhikkhuṃ ṭhapenti, jaggitvā gopetvā phalavārena bhājetvā khādanti. Yo tāni khādati, tena ṭhātabbaṃ, anupajīvanto na gāhāpetabbo. Senāsanamañcapīṭhapaccattharaṇarakkhaṇatthāyapi ṭhapenti, āvāse vasantena ṭhātabbaṃ, abbhokāsiko pana rukkhamūliko vā na gāhāpetabbo. Eko navako hoti, bahussuto pana bahūnaṃ dhammaṃ vāceti, paripucchaṃ deti, pāḷiṃ vaṇṇeti, dhammakathaṃ katheti, saṅghassa bhāraṃ nittharati, ayaṃ lābhaṃ paribhuñjantopi āvāse vasantopi vāraṃ na gāhāpetabbo. ‘‘Purisaviseso nāma ñātabbo’’ti vadanti. Uposathāgārapaṭimāgharajagganakassa pana diguṇaṃ yāgubhattaṃ, devasikaṃ taṇḍulanāḷi, saṃvacchare ticīvaraṃ dasavīsagghanakaṃ kappiyabhaṇḍañca dātabbaṃ. Sace pana tassa taṃ labhamānasseva pamādena tattha kiñci nassati, sabbaṃ gīvā. Bandhitvā balakkārena acchinnaṃ, na gīvā. Tattha cetiyassa vā saṅghassa vā santakena cetiyassa santakaṃ rakkhāpetuṃ vaṭṭati, cetiyassa santakena saṅghassa santakaṃ rakkhāpetuṃ na vaṭṭati. Yaṃ pana cetiyassa santakena saddhiṃ saṅghassa santakaṃ ṭhapitaṃ hoti, taṃ cetiyasantake rakkhāpite rakkhitameva hotīti evaṃ vaṭṭati. Pakkhavārena uposathāgārādīni rakkhatopi pamādavasena naṭṭhaṃ gīvāyevāti.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
бхан̣д̣абадисааманавинижчаяагат̇аа самад̇д̇аа.
Bhaṇḍapaṭisāmanavinicchayakathā samattā.
