| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4-5. பா⁴ரத்³வாஜஸுத்தாதி³வண்ணனா
4-5. Bhāradvājasuttādivaṇṇanā
127-128. சதுத்தே² பிண்ட³ங் உலமானோ பரியேஸமானோ பப்³ப³ஜிதோதி பிண்டோ³லோ. ஸோ கிர பரிஜிண்ணபோ⁴கோ³ ப்³ராஹ்மணோ அஹோஸி. அத² பி⁴க்கு²ஸங்க⁴ஸ்ஸ லாப⁴ஸக்காரங் தி³ஸ்வா பிண்ட³த்தா²ய நிக்க²மித்வா பப்³ப³ஜிதோ. ஸோ மஹந்தங் கபல்லபத்தங் க³ஹெத்வா சரதி, தேன கபல்லபூரங் யாகு³ங் பிவதி, கபல்லபூரே பூவே கா²த³தி, கபல்லபூரங் ப⁴த்தங் பு⁴ஞ்ஜதி. அத²ஸ்ஸ மஹக்³க⁴ஸபா⁴வங் ஸத்து² ஆரோசயிங்ஸு. ஸத்தா² தஸ்ஸ பத்தத்த²விகங் நானுஜானி. ஹெட்டா²மஞ்சே பத்தங் நிக்குஜ்ஜித்வா ட²பேதி. ஸோ ட²பெந்தோபி க⁴ங்ஸந்தோவ பணாமெத்வா ட²பேதி, க³ண்ஹந்தோபி க⁴ங்ஸந்தோவ ஆகட்³டி⁴த்வா க³ண்ஹாதி. தங் க³ச்ச²ந்தே காலே த⁴ங்ஸனேன பரிக்கீ²ணங் நாளிகோத³னமத்தமேவ க³ண்ஹனகங் ஜாதங். ததோ ஸத்து² ஆரோசேஸுங், அத²ஸ்ஸ ஸத்தா² பத்தத்த²விகங் அனுஜானி. தே²ரோ அபரேன ஸமயேன இந்த்³ரியபா⁴வனங் பா⁴வெத்வா அக்³க³ப²லே அரஹத்தே பதிட்டா²ஸி. இதி ஸோ பிண்ட³த்தா²ய பப்³ப³ஜிதத்தா பிண்டோ³லோ, கொ³த்தேன பன பா⁴ரத்³வாஜோதி உப⁴யங் ஏகதோ கத்வா பிண்டோ³லபா⁴ரத்³வாஜோதி வுச்சதி.
127-128. Catutthe piṇḍaṃ ulamāno pariyesamāno pabbajitoti piṇḍolo. So kira parijiṇṇabhogo brāhmaṇo ahosi. Atha bhikkhusaṅghassa lābhasakkāraṃ disvā piṇḍatthāya nikkhamitvā pabbajito. So mahantaṃ kapallapattaṃ gahetvā carati, tena kapallapūraṃ yāguṃ pivati, kapallapūre pūve khādati, kapallapūraṃ bhattaṃ bhuñjati. Athassa mahagghasabhāvaṃ satthu ārocayiṃsu. Satthā tassa pattatthavikaṃ nānujāni. Heṭṭhāmañce pattaṃ nikkujjitvā ṭhapeti. So ṭhapentopi ghaṃsantova paṇāmetvā ṭhapeti, gaṇhantopi ghaṃsantova ākaḍḍhitvā gaṇhāti. Taṃ gacchante kāle dhaṃsanena parikkhīṇaṃ nāḷikodanamattameva gaṇhanakaṃ jātaṃ. Tato satthu ārocesuṃ, athassa satthā pattatthavikaṃ anujāni. Thero aparena samayena indriyabhāvanaṃ bhāvetvā aggaphale arahatte patiṭṭhāsi. Iti so piṇḍatthāya pabbajitattā piṇḍolo, gottena pana bhāradvājoti ubhayaṃ ekato katvā piṇḍolabhāradvājoti vuccati.
உபஸங்கமீதி உக்³க³துக்³க³தேஹி மஹாஅமச்சேஹி பரிவுதோ உபஸங்கமி. தே²ரோ கிர ஏகதி³வஸங் ஸாவத்தி²யங் பிண்டா³ய சரித்வா கதப⁴த்தகிச்சோ நிதா³க⁴ஸமயே ஸீதடா²னே தி³வாவிஹாரங் நிஸீதி³ஸ்ஸாமீதி ஆகாஸேன க³ந்த்வா க³ங்கா³தீரே உதே³னஸ்ஸ ரஞ்ஞோ உத³பானங் நாம உய்யானங் அத்தி², தத்த² பவிஸித்வா அஞ்ஞதரஸ்மிங் ருக்க²மூலே தி³வாவிஹாரங் நிஸீதி³ ஸீதேன உத³கவாதேன பீ³ஜியமானோ.
Upasaṅkamīti uggatuggatehi mahāamaccehi parivuto upasaṅkami. Thero kira ekadivasaṃ sāvatthiyaṃ piṇḍāya caritvā katabhattakicco nidāghasamaye sītaṭhāne divāvihāraṃ nisīdissāmīti ākāsena gantvā gaṅgātīre udenassa rañño udapānaṃ nāma uyyānaṃ atthi, tattha pavisitvā aññatarasmiṃ rukkhamūle divāvihāraṃ nisīdi sītena udakavātena bījiyamāno.
உதே³னோபி கோ² நாம ராஜா ஸத்தாஹங் மஹாபானங் பிவித்வா ஸத்தமே தி³வஸே உய்யானங் படிஜக்³கா³பெத்வா மஹாஜனபரிவாரோ உய்யானங் க³ந்த்வா மங்க³லஸிலாபட்டே அத்த²தாய ஸெய்யாய நிபஜ்ஜி. தஸ்ஸ ஏகா பரிசாரிகா பாதே³ ஸம்பா³ஹமானா நிஸின்னா. ராஜா கமேன நித்³த³ங் ஓக்கமி. தஸ்மிங் நித்³த³ங் ஓக்கந்தே நாடகித்தி²யோ ‘‘யஸ்ஸத்தா²ய மயங் கீ³தாதீ³னி பயோஜெய்யாம, ஸோ நித்³த³ங் உபக³தோ, ந ச நித்³தா³காலே மஹாஸத்³த³ங் காதுங் வட்டதீ’’தி அத்தனோ அத்தனோ தூரியானி ட²பெத்வா உய்யானங் பக்கந்தா. தா தத்த² தத்த² ப²லாப²லானி கா²த³மானா புப்பா²னி பிளந்த⁴மானா விசரந்தியோ தே²ரங் தி³ஸ்வா ‘‘மா ஸத்³த³ங் கரித்தா²’’தி அஞ்ஞமஞ்ஞங் நிவாரயமானா வந்தி³த்வா நிஸீதி³ங்ஸு. தே²ரோ ‘‘இஸ்ஸா பஹாதப்³பா³, மச்சே²ரங் வினோதே³தப்³ப³’’ந்திஆதி³னா நயேன தாஸங் அனுரூபங் த⁴ம்மகத²ங் கதே²ஸி.
Udenopi kho nāma rājā sattāhaṃ mahāpānaṃ pivitvā sattame divase uyyānaṃ paṭijaggāpetvā mahājanaparivāro uyyānaṃ gantvā maṅgalasilāpaṭṭe atthatāya seyyāya nipajji. Tassa ekā paricārikā pāde sambāhamānā nisinnā. Rājā kamena niddaṃ okkami. Tasmiṃ niddaṃ okkante nāṭakitthiyo ‘‘yassatthāya mayaṃ gītādīni payojeyyāma, so niddaṃ upagato, na ca niddākāle mahāsaddaṃ kātuṃ vaṭṭatī’’ti attano attano tūriyāni ṭhapetvā uyyānaṃ pakkantā. Tā tattha tattha phalāphalāni khādamānā pupphāni piḷandhamānā vicarantiyo theraṃ disvā ‘‘mā saddaṃ karitthā’’ti aññamaññaṃ nivārayamānā vanditvā nisīdiṃsu. Thero ‘‘issā pahātabbā, maccheraṃ vinodetabba’’ntiādinā nayena tāsaṃ anurūpaṃ dhammakathaṃ kathesi.
ஸாபி கோ² ரஞ்ஞோ பாதே³ ஸம்பா³ஹமானா நிஸின்னா இத்தீ² பாதே³ சாலெத்வா ராஜானங் பபோ³தே⁴ஸி. ஸோ ‘‘கஹங் தா க³தா’’தி புச்சி². கிங் தாஸங் தும்ஹேஹி? தா ஏகங் ஸமணங் பரிவாரெத்வா நிஸின்னாதி. ராஜா குத்³தோ⁴ உத்³த⁴னே பக்கி²த்தலோணங் விய தடதடாயமானோ உட்ட²ஹித்வா ‘‘தம்ப³கிபில்லிகாஹி நங் கா²தா³பெஸ்ஸாமீ’’தி க³ச்ச²ந்தோ ஏகஸ்மிங் அஸோகருக்கே² தம்ப³கிபில்லிகானங் புடங் தி³ஸ்வா ஹத்தே²னாகட்³டி⁴த்வா ஸாக²ங் க³ண்ஹிதுங் நாஸக்கி². கிபில்லிகபுடோ சி²ஜ்ஜித்வா ரஞ்ஞோ ஸீஸே பதி, ஸகலஸரீரங் ஸாலிது²ஸேஹி பரிகிண்ணங் விய த³ண்ட³தீ³பிகாஹி ட³ய்ஹமானங் விய ச அஹோஸி. தே²ரோ ரஞ்ஞோ பது³ட்ட²பா⁴வங் ஞத்வா இத்³தி⁴யா ஆகாஸங் பக்க²ந்தி³. தாபி இத்தி²யோ உட்டா²ய ரஞ்ஞோ ஸந்திகங் க³ந்த்வா ஸரீரங் புஞ்ச²ந்தியோ விய பூ⁴மியங் பதிதபதிதா கிபில்லிகாயோ க³ஹெத்வா ஸரீரே கி²பமானா ஸப்³பா³ முக²ஸத்தீஹி விஜ்ஜி²ங்ஸு – ‘‘கிங் நாமேதங், அஞ்ஞே ராஜானோ பப்³ப³ஜிதே தி³ஸ்வா வந்த³ந்தி, பஞ்ஹங் புச்ச²ந்தி, அயங் பன ராஜா கிபில்லிகபுடங் ஸீஸே பி⁴ந்தி³துகாமோ ஜாதோ’’தி.
Sāpi kho rañño pāde sambāhamānā nisinnā itthī pāde cāletvā rājānaṃ pabodhesi. So ‘‘kahaṃ tā gatā’’ti pucchi. Kiṃ tāsaṃ tumhehi? Tā ekaṃ samaṇaṃ parivāretvā nisinnāti. Rājā kuddho uddhane pakkhittaloṇaṃ viya taṭataṭāyamāno uṭṭhahitvā ‘‘tambakipillikāhi naṃ khādāpessāmī’’ti gacchanto ekasmiṃ asokarukkhe tambakipillikānaṃ puṭaṃ disvā hatthenākaḍḍhitvā sākhaṃ gaṇhituṃ nāsakkhi. Kipillikapuṭo chijjitvā rañño sīse pati, sakalasarīraṃ sālithusehi parikiṇṇaṃ viya daṇḍadīpikāhi ḍayhamānaṃ viya ca ahosi. Thero rañño paduṭṭhabhāvaṃ ñatvā iddhiyā ākāsaṃ pakkhandi. Tāpi itthiyo uṭṭhāya rañño santikaṃ gantvā sarīraṃ puñchantiyo viya bhūmiyaṃ patitapatitā kipillikāyo gahetvā sarīre khipamānā sabbā mukhasattīhi vijjhiṃsu – ‘‘kiṃ nāmetaṃ, aññe rājāno pabbajite disvā vandanti, pañhaṃ pucchanti, ayaṃ pana rājā kipillikapuṭaṃ sīse bhinditukāmo jāto’’ti.
ராஜா அத்தனோ அபராத⁴ங் தி³ஸ்வா உய்யானபாலங் பக்கோஸாபெத்வா புச்சி² – ‘‘கிங் ஏஸ பப்³ப³ஜிதோ? அஞ்ஞேஸுபி தி³வஸேஸு இத⁴ ஆக³ச்ச²தீ’’தி? ஆம, தே³வாதி. இத⁴ த்வங் ஆக³ததி³வஸே மய்ஹங் ஆரோசெய்யாஸீதி. தே²ரோபி கதிபாஹேனேவ புன ஆக³ந்த்வா ருக்க²மூலே நிஸீதி³. உய்யானபாலோ தி³ஸ்வா – ‘‘மஹந்தோ மே அயங் பண்ணாகாரோ’’தி வேகே³ன க³ந்த்வா ரஞ்ஞோ ஆரோசேஸி. ராஜா உட்ட²ஹித்வா ஸங்க²பணவாதி³ஸத்³த³ங் நிவாரெத்வா உக்³க³துக்³க³தேஹி அமச்சேஹி ஸத்³தி⁴ங் உய்யானங் அக³மாஸி. தேன வுத்தங் ‘‘உபஸங்கமீ’’தி.
Rājā attano aparādhaṃ disvā uyyānapālaṃ pakkosāpetvā pucchi – ‘‘kiṃ esa pabbajito? Aññesupi divasesu idha āgacchatī’’ti? Āma, devāti. Idha tvaṃ āgatadivase mayhaṃ āroceyyāsīti. Theropi katipāheneva puna āgantvā rukkhamūle nisīdi. Uyyānapālo disvā – ‘‘mahanto me ayaṃ paṇṇākāro’’ti vegena gantvā rañño ārocesi. Rājā uṭṭhahitvā saṅkhapaṇavādisaddaṃ nivāretvā uggatuggatehi amaccehi saddhiṃ uyyānaṃ agamāsi. Tena vuttaṃ ‘‘upasaṅkamī’’ti.
அனிகீளிதாவினோ காமேஸூதி யா காமேஸு காமகீளா, தங் அகீளிதபுப்³பா³, அபரிபு⁴த்தகாமாதி அத்தோ². அத்³தா⁴னஞ்ச ஆபாதெ³ந்தீதி பவேணிங் படிபாதெ³ந்தி, தீ³க⁴ரத்தங் அனுப³ந்தா⁴பெந்தி. மாதுமத்தீஸூதி மாதுபமாணாஸு. லோகஸ்மிஞ்ஹி மாதா ப⁴கி³னீ தீ⁴தாதி இத³ங் திவித⁴ங் க³ருகாரம்மணங் நாம , இதி க³ருகாரம்மணே உபனிப³ந்த⁴ங் சித்தங் விமோசேதுங் ந லப⁴தீதி த³ஸ்ஸெந்தோ ஏவமாஹ. அத²ஸ்ஸ தேன பஞ்ஹேன சித்தங் அனோதரந்தங் தி³ஸ்வா ப⁴க³வதா படிகூலமனஸிகாரவஸேன சித்தூபனிப³ந்த⁴னத்த²ங் வுத்தங் த்³வத்திங்ஸாகாரகம்மட்டா²னங் கதே²ஸி.
Anikīḷitāvino kāmesūti yā kāmesu kāmakīḷā, taṃ akīḷitapubbā, aparibhuttakāmāti attho. Addhānañca āpādentīti paveṇiṃ paṭipādenti, dīgharattaṃ anubandhāpenti. Mātumattīsūti mātupamāṇāsu. Lokasmiñhi mātā bhaginī dhītāti idaṃ tividhaṃ garukārammaṇaṃ nāma , iti garukārammaṇe upanibandhaṃ cittaṃ vimocetuṃ na labhatīti dassento evamāha. Athassa tena pañhena cittaṃ anotarantaṃ disvā bhagavatā paṭikūlamanasikāravasena cittūpanibandhanatthaṃ vuttaṃ dvattiṃsākārakammaṭṭhānaṃ kathesi.
அபா⁴விதகாயாதி அபா⁴விதபஞ்சத்³வாரிககாயா. தேஸங் தங் து³க்கரங் ஹோதீதி தேஸங் தங் அஸுப⁴கம்மட்டா²னங் பா⁴வேதுங் து³க்கரங் ஹோதி. இதிஸ்ஸ இமினாபி சித்தங் அனோதரந்தங் தி³ஸ்வா இந்த்³ரியஸங்வரஸீலங் கதே²ஸி . இந்த்³ரியஸங்வரஸ்மிஞ்ஹி உபனிப³ந்த⁴சித்தங் விஹேடே²துங் ந லப⁴தி. ராஜா தங் ஸுத்வா தத்த² ஓதிண்ணசித்தோ அச்ச²ரியங், போ⁴ பா⁴ரத்³வாஜாதிஆதி³மாஹ.
Abhāvitakāyāti abhāvitapañcadvārikakāyā. Tesaṃ taṃ dukkaraṃ hotīti tesaṃ taṃ asubhakammaṭṭhānaṃ bhāvetuṃ dukkaraṃ hoti. Itissa imināpi cittaṃ anotarantaṃ disvā indriyasaṃvarasīlaṃ kathesi . Indriyasaṃvarasmiñhi upanibandhacittaṃ viheṭhetuṃ na labhati. Rājā taṃ sutvā tattha otiṇṇacitto acchariyaṃ, bho bhāradvājātiādimāha.
அரக்கி²தேனேவ காயேனாதிஆதீ³ஸு ஹத்த²பாதே³ கீளாபெந்தோ கீ³வங் பரிவத்தெந்தோ காயங் ந ரக்க²தி நாம, நானப்பகாரங் து³ட்டு²ல்லங் கதெ²ந்தோ வசனங் ந ரக்க²தி நாம, காமவிதக்காத³யோ விதக்கெந்தோ சித்தங் ந ரக்க²தி நாம. ரக்கி²தேனேவ காயேனாதிஆதீ³ஸு வுத்தவிபரியாயேன அத்தோ² வேதி³தப்³போ³.
Arakkhiteneva kāyenātiādīsu hatthapāde kīḷāpento gīvaṃ parivattento kāyaṃ na rakkhati nāma, nānappakāraṃ duṭṭhullaṃ kathento vacanaṃ na rakkhati nāma, kāmavitakkādayo vitakkento cittaṃ na rakkhati nāma. Rakkhiteneva kāyenātiādīsu vuttavipariyāyena attho veditabbo.
அதிவிய மங் தஸ்மிங் ஸமயே லோப⁴த⁴ம்மா பரிஸஹந்தீதி மங் தஸ்மிங் ஸமயே அதிக்கமித்வா லோபோ⁴ அதி⁴ப⁴வதீதி அத்தோ². உபட்டி²தாய ஸதியாதி காயக³தாய ஸதியா ஸுபட்டி²தாய. ந மங் ததா² தஸ்மிங் ஸமயேதி தஸ்மிங் ஸமயே மங் யதா² புப்³பே³, ந ததா² லோபோ⁴ அதிக்கமித்வா உப்பஜ்ஜதீதி அத்தோ². பரிஸஹந்தீதி பத³ஸ்ஸ உப்பஜ்ஜந்தீதிபி அத்தோ²யேவ. இதி இமஸ்மிங் ஸுத்தே தயோ காயா கதி²தா. கத²ங் ? ‘‘இமமேவ காய’’ந்தி எத்த² ஹி கரஜகாயோ கதி²தோ, ‘‘பா⁴விதகாயோ’’தி எத்த² பஞ்சத்³வாரிககாயோ, ‘‘ரக்கி²தேனேவ காயேனா’’தி எத்த² சோபனகாயோ, காயவிஞ்ஞத்தீதி அத்தோ². பஞ்சமங் உத்தானமேவ.
Ativiya maṃ tasmiṃ samaye lobhadhammā parisahantīti maṃ tasmiṃ samaye atikkamitvā lobho adhibhavatīti attho. Upaṭṭhitāya satiyāti kāyagatāya satiyā supaṭṭhitāya. Na maṃ tathā tasmiṃ samayeti tasmiṃ samaye maṃ yathā pubbe, na tathā lobho atikkamitvā uppajjatīti attho. Parisahantīti padassa uppajjantītipi atthoyeva. Iti imasmiṃ sutte tayo kāyā kathitā. Kathaṃ ? ‘‘Imameva kāya’’nti ettha hi karajakāyo kathito, ‘‘bhāvitakāyo’’ti ettha pañcadvārikakāyo, ‘‘rakkhiteneva kāyenā’’ti ettha copanakāyo, kāyaviññattīti attho. Pañcamaṃ uttānameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
4. பா⁴ரத்³வாஜஸுத்தங் • 4. Bhāradvājasuttaṃ
5. ஸோணஸுத்தங் • 5. Soṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4-5. பா⁴ரத்³வாஜஸுத்தாதி³வண்ணனா • 4-5. Bhāradvājasuttādivaṇṇanā
