| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪-৫. ভারদ্ৰাজসুত্তাদিৰণ্ণনা
4-5. Bhāradvājasuttādivaṇṇanā
১২৭-১২৮. কামং অঞ্ঞেপি পব্বজিতা যুত্তকালে পিণ্ডং উলমানা চরন্তিযেৰ, অযং পন ওদরিতো, তেনেৰ কারণেন পব্বজিতোতি দস্সেন্তো ‘‘পিণ্ডং উলমানো’’তিআদিমাহ। ঘংসন্তোৰাতি ভূমিযং ঘংসন্তো এৰ পত্তং ঠপেতি। পরিক্খীণন্তি সমন্ততো পরিক্খীণং। নাল়িকো …পে॰… জাতং, অতিরেকপত্তট্ঠপনস্স পটিক্খিত্তত্তা অঞ্ঞং ন গণ্হাতি। ‘‘ইন্দ্রিযভাৰনন্তি চক্খাদিপঞ্চিন্দ্রিযভাৰন’’ন্তি কেচি ৰদন্তি, তথা ৰিপস্সনাভিনিৰেসং কত্ৰা উপরিৰিপস্সনং ৰড্ঢিত্ৰাতি অধিপ্পাযো। অপরে পন ‘‘সদ্ধাপঞ্চমানং ইন্দ্রিযানং ৰসেন ৰিপস্সনাভিনিৰেসং কত্ৰা তেন সুখেন অভিঞ্ঞাপহানানং সম্পাদনৰসেন ইন্দ্রিযং ভাৰেত্ৰা’’তি ৰদন্তি।
127-128. Kāmaṃ aññepi pabbajitā yuttakāle piṇḍaṃ ulamānā carantiyeva, ayaṃ pana odarito, teneva kāraṇena pabbajitoti dassento ‘‘piṇḍaṃ ulamāno’’tiādimāha. Ghaṃsantovāti bhūmiyaṃ ghaṃsanto eva pattaṃ ṭhapeti. Parikkhīṇanti samantato parikkhīṇaṃ. Nāḷiko …pe… jātaṃ, atirekapattaṭṭhapanassa paṭikkhittattā aññaṃ na gaṇhāti. ‘‘Indriyabhāvananti cakkhādipañcindriyabhāvana’’nti keci vadanti, tathā vipassanābhinivesaṃ katvā uparivipassanaṃ vaḍḍhitvāti adhippāyo. Apare pana ‘‘saddhāpañcamānaṃ indriyānaṃ vasena vipassanābhinivesaṃ katvā tena sukhena abhiññāpahānānaṃ sampādanavasena indriyaṃ bhāvetvā’’ti vadanti.
উপসঙ্কমতীতি এত্থ যথা সো রাজা উপসঙ্কমি, তং আগমনতো পট্ঠায দস্সেতুং ‘‘থেরো কিরা’’তিআদি আরদ্ধং। মহাপানং নাম অঞ্ঞং কম্মং অকত্ৰা পানপসুতো হুত্ৰা সত্তাহং তদনুরূপপরিজনস্স সুরাপিৰনং। তেনাহ ‘‘মহাপানং নাম পিৰিত্ৰা’’তি। সালিথুসেহীতি রত্তসালিথুসেহি। ডয্হমানং ৰিয কিপিল্লিকদংসনজাতাহি দুক্খৰেদনাহি। মুখসত্তীহি ৰিজ্ঝিংসু ৰল্লভতায। ইত্থিলোলো হি সো রাজা।
Upasaṅkamatīti ettha yathā so rājā upasaṅkami, taṃ āgamanato paṭṭhāya dassetuṃ ‘‘thero kirā’’tiādi āraddhaṃ. Mahāpānaṃ nāma aññaṃ kammaṃ akatvā pānapasuto hutvā sattāhaṃ tadanurūpaparijanassa surāpivanaṃ. Tenāha ‘‘mahāpānaṃ nāma pivitvā’’ti. Sālithusehīti rattasālithusehi. Ḍayhamānaṃ viya kipillikadaṃsanajātāhi dukkhavedanāhi. Mukhasattīhi vijjhiṃsu vallabhatāya. Itthilolo hi so rājā.
পৰেণিন্তি তেসং সমাদানপৰেণিং ব্রহ্মচরিযপবন্ধং। পটিপাদেন্তীতি সম্পাদেন্তি। গরুকারম্মণন্তি গরুকাতব্বআরম্মণং, অৰীতিক্কমিতব্বারম্মণন্তি অত্থো। অস্সাতি রঞ্ঞো। চিত্তং অনোতরন্তন্তি পসাদৰীথিং অনোতরন্তং অনুপগচ্ছন্তং। ৰিহেঠেতুন্তি ৰিবাধিতুং।
Paveṇinti tesaṃ samādānapaveṇiṃ brahmacariyapabandhaṃ. Paṭipādentīti sampādenti. Garukārammaṇanti garukātabbaārammaṇaṃ, avītikkamitabbārammaṇanti attho. Assāti rañño. Cittaṃ anotarantanti pasādavīthiṃ anotarantaṃ anupagacchantaṃ. Viheṭhetunti vibādhituṃ.
লোভস্স অপরাপরুপ্পত্তিযা বহুৰচনৰসেন ‘‘লোভধম্মা’’তি ৰুত্তং। উপ্পজ্জন্তীতিপি অত্থো যেৰ, যস্মা উপ্পজ্জমানো লোভধম্মো অত্তনো হেতুপচ্চযে পরিগ্গহাপেন্তো জানাপেন্তো ৰিয সহতি পৰত্ততীতি। ইমমেৰ কাযন্তি এত্থ সমূহত্থে এৰ কায-সদ্দো গব্ভাসযাদিট্ঠানেসু উপ্পজ্জনধম্মসমূহৰিসযত্তা, ইতরে পন কাযূপলক্খিততায ‘‘কাযো’’তি ৰেদিতব্বা। উত্তানমেৰ হেট্ঠা ৰুত্তনযত্তা।
Lobhassa aparāparuppattiyā bahuvacanavasena ‘‘lobhadhammā’’ti vuttaṃ. Uppajjantītipi attho yeva, yasmā uppajjamāno lobhadhammo attano hetupaccaye pariggahāpento jānāpento viya sahati pavattatīti. Imameva kāyanti ettha samūhatthe eva kāya-saddo gabbhāsayādiṭṭhānesu uppajjanadhammasamūhavisayattā, itare pana kāyūpalakkhitatāya ‘‘kāyo’’ti veditabbā. Uttānameva heṭṭhā vuttanayattā.
ভারদ্ৰাজসুত্তাদিৰণ্ণনা নিট্ঠিতা।
Bhāradvājasuttādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৪. ভারদ্ৰাজসুত্তং • 4. Bhāradvājasuttaṃ
৫. সোণসুত্তং • 5. Soṇasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪-৫. ভারদ্ৰাজসুত্তাদিৰণ্ণনা • 4-5. Bhāradvājasuttādivaṇṇanā
