| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೪-೫. ಭಾರದ್ವಾಜಸುತ್ತಾದಿವಣ್ಣನಾ
4-5. Bhāradvājasuttādivaṇṇanā
೧೨೭-೧೨೮. ಕಾಮಂ ಅಞ್ಞೇಪಿ ಪಬ್ಬಜಿತಾ ಯುತ್ತಕಾಲೇ ಪಿಣ್ಡಂ ಉಲಮಾನಾ ಚರನ್ತಿಯೇವ, ಅಯಂ ಪನ ಓದರಿತೋ, ತೇನೇವ ಕಾರಣೇನ ಪಬ್ಬಜಿತೋತಿ ದಸ್ಸೇನ್ತೋ ‘‘ಪಿಣ್ಡಂ ಉಲಮಾನೋ’’ತಿಆದಿಮಾಹ। ಘಂಸನ್ತೋವಾತಿ ಭೂಮಿಯಂ ಘಂಸನ್ತೋ ಏವ ಪತ್ತಂ ಠಪೇತಿ। ಪರಿಕ್ಖೀಣನ್ತಿ ಸಮನ್ತತೋ ಪರಿಕ್ಖೀಣಂ। ನಾಳಿಕೋ …ಪೇ॰… ಜಾತಂ, ಅತಿರೇಕಪತ್ತಟ್ಠಪನಸ್ಸ ಪಟಿಕ್ಖಿತ್ತತ್ತಾ ಅಞ್ಞಂ ನ ಗಣ್ಹಾತಿ। ‘‘ಇನ್ದ್ರಿಯಭಾವನನ್ತಿ ಚಕ್ಖಾದಿಪಞ್ಚಿನ್ದ್ರಿಯಭಾವನ’’ನ್ತಿ ಕೇಚಿ ವದನ್ತಿ, ತಥಾ ವಿಪಸ್ಸನಾಭಿನಿವೇಸಂ ಕತ್ವಾ ಉಪರಿವಿಪಸ್ಸನಂ ವಡ್ಢಿತ್ವಾತಿ ಅಧಿಪ್ಪಾಯೋ। ಅಪರೇ ಪನ ‘‘ಸದ್ಧಾಪಞ್ಚಮಾನಂ ಇನ್ದ್ರಿಯಾನಂ ವಸೇನ ವಿಪಸ್ಸನಾಭಿನಿವೇಸಂ ಕತ್ವಾ ತೇನ ಸುಖೇನ ಅಭಿಞ್ಞಾಪಹಾನಾನಂ ಸಮ್ಪಾದನವಸೇನ ಇನ್ದ್ರಿಯಂ ಭಾವೇತ್ವಾ’’ತಿ ವದನ್ತಿ।
127-128. Kāmaṃ aññepi pabbajitā yuttakāle piṇḍaṃ ulamānā carantiyeva, ayaṃ pana odarito, teneva kāraṇena pabbajitoti dassento ‘‘piṇḍaṃ ulamāno’’tiādimāha. Ghaṃsantovāti bhūmiyaṃ ghaṃsanto eva pattaṃ ṭhapeti. Parikkhīṇanti samantato parikkhīṇaṃ. Nāḷiko …pe… jātaṃ, atirekapattaṭṭhapanassa paṭikkhittattā aññaṃ na gaṇhāti. ‘‘Indriyabhāvananti cakkhādipañcindriyabhāvana’’nti keci vadanti, tathā vipassanābhinivesaṃ katvā uparivipassanaṃ vaḍḍhitvāti adhippāyo. Apare pana ‘‘saddhāpañcamānaṃ indriyānaṃ vasena vipassanābhinivesaṃ katvā tena sukhena abhiññāpahānānaṃ sampādanavasena indriyaṃ bhāvetvā’’ti vadanti.
ಉಪಸಙ್ಕಮತೀತಿ ಏತ್ಥ ಯಥಾ ಸೋ ರಾಜಾ ಉಪಸಙ್ಕಮಿ, ತಂ ಆಗಮನತೋ ಪಟ್ಠಾಯ ದಸ್ಸೇತುಂ ‘‘ಥೇರೋ ಕಿರಾ’’ತಿಆದಿ ಆರದ್ಧಂ। ಮಹಾಪಾನಂ ನಾಮ ಅಞ್ಞಂ ಕಮ್ಮಂ ಅಕತ್ವಾ ಪಾನಪಸುತೋ ಹುತ್ವಾ ಸತ್ತಾಹಂ ತದನುರೂಪಪರಿಜನಸ್ಸ ಸುರಾಪಿವನಂ। ತೇನಾಹ ‘‘ಮಹಾಪಾನಂ ನಾಮ ಪಿವಿತ್ವಾ’’ತಿ। ಸಾಲಿಥುಸೇಹೀತಿ ರತ್ತಸಾಲಿಥುಸೇಹಿ। ಡಯ್ಹಮಾನಂ ವಿಯ ಕಿಪಿಲ್ಲಿಕದಂಸನಜಾತಾಹಿ ದುಕ್ಖವೇದನಾಹಿ। ಮುಖಸತ್ತೀಹಿ ವಿಜ್ಝಿಂಸು ವಲ್ಲಭತಾಯ। ಇತ್ಥಿಲೋಲೋ ಹಿ ಸೋ ರಾಜಾ।
Upasaṅkamatīti ettha yathā so rājā upasaṅkami, taṃ āgamanato paṭṭhāya dassetuṃ ‘‘thero kirā’’tiādi āraddhaṃ. Mahāpānaṃ nāma aññaṃ kammaṃ akatvā pānapasuto hutvā sattāhaṃ tadanurūpaparijanassa surāpivanaṃ. Tenāha ‘‘mahāpānaṃ nāma pivitvā’’ti. Sālithusehīti rattasālithusehi. Ḍayhamānaṃ viya kipillikadaṃsanajātāhi dukkhavedanāhi. Mukhasattīhi vijjhiṃsu vallabhatāya. Itthilolo hi so rājā.
ಪವೇಣಿನ್ತಿ ತೇಸಂ ಸಮಾದಾನಪವೇಣಿಂ ಬ್ರಹ್ಮಚರಿಯಪಬನ್ಧಂ। ಪಟಿಪಾದೇನ್ತೀತಿ ಸಮ್ಪಾದೇನ್ತಿ। ಗರುಕಾರಮ್ಮಣನ್ತಿ ಗರುಕಾತಬ್ಬಆರಮ್ಮಣಂ, ಅವೀತಿಕ್ಕಮಿತಬ್ಬಾರಮ್ಮಣನ್ತಿ ಅತ್ಥೋ। ಅಸ್ಸಾತಿ ರಞ್ಞೋ। ಚಿತ್ತಂ ಅನೋತರನ್ತನ್ತಿ ಪಸಾದವೀಥಿಂ ಅನೋತರನ್ತಂ ಅನುಪಗಚ್ಛನ್ತಂ। ವಿಹೇಠೇತುನ್ತಿ ವಿಬಾಧಿತುಂ।
Paveṇinti tesaṃ samādānapaveṇiṃ brahmacariyapabandhaṃ. Paṭipādentīti sampādenti. Garukārammaṇanti garukātabbaārammaṇaṃ, avītikkamitabbārammaṇanti attho. Assāti rañño. Cittaṃ anotarantanti pasādavīthiṃ anotarantaṃ anupagacchantaṃ. Viheṭhetunti vibādhituṃ.
ಲೋಭಸ್ಸ ಅಪರಾಪರುಪ್ಪತ್ತಿಯಾ ಬಹುವಚನವಸೇನ ‘‘ಲೋಭಧಮ್ಮಾ’’ತಿ ವುತ್ತಂ। ಉಪ್ಪಜ್ಜನ್ತೀತಿಪಿ ಅತ್ಥೋ ಯೇವ, ಯಸ್ಮಾ ಉಪ್ಪಜ್ಜಮಾನೋ ಲೋಭಧಮ್ಮೋ ಅತ್ತನೋ ಹೇತುಪಚ್ಚಯೇ ಪರಿಗ್ಗಹಾಪೇನ್ತೋ ಜಾನಾಪೇನ್ತೋ ವಿಯ ಸಹತಿ ಪವತ್ತತೀತಿ। ಇಮಮೇವ ಕಾಯನ್ತಿ ಏತ್ಥ ಸಮೂಹತ್ಥೇ ಏವ ಕಾಯ-ಸದ್ದೋ ಗಬ್ಭಾಸಯಾದಿಟ್ಠಾನೇಸು ಉಪ್ಪಜ್ಜನಧಮ್ಮಸಮೂಹವಿಸಯತ್ತಾ, ಇತರೇ ಪನ ಕಾಯೂಪಲಕ್ಖಿತತಾಯ ‘‘ಕಾಯೋ’’ತಿ ವೇದಿತಬ್ಬಾ। ಉತ್ತಾನಮೇವ ಹೇಟ್ಠಾ ವುತ್ತನಯತ್ತಾ।
Lobhassa aparāparuppattiyā bahuvacanavasena ‘‘lobhadhammā’’ti vuttaṃ. Uppajjantītipi attho yeva, yasmā uppajjamāno lobhadhammo attano hetupaccaye pariggahāpento jānāpento viya sahati pavattatīti. Imameva kāyanti ettha samūhatthe eva kāya-saddo gabbhāsayādiṭṭhānesu uppajjanadhammasamūhavisayattā, itare pana kāyūpalakkhitatāya ‘‘kāyo’’ti veditabbā. Uttānameva heṭṭhā vuttanayattā.
ಭಾರದ್ವಾಜಸುತ್ತಾದಿವಣ್ಣನಾ ನಿಟ್ಠಿತಾ।
Bhāradvājasuttādivaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya
೪. ಭಾರದ್ವಾಜಸುತ್ತಂ • 4. Bhāradvājasuttaṃ
೫. ಸೋಣಸುತ್ತಂ • 5. Soṇasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೪-೫. ಭಾರದ್ವಾಜಸುತ್ತಾದಿವಣ್ಣನಾ • 4-5. Bhāradvājasuttādivaṇṇanā
