๑. ภารสุตฺตํ

1. Bhārasuttaṃ

๒๒. สาวตฺถิยํ … ตตฺร โข … ‘‘ภารญฺจ โว, ภิกฺขเว, เทเสสฺสามิ ภารหารญฺจ ภาราทานญฺจ ภารนิเกฺขปนญฺจฯ ตํ สุณาถฯ กตโม จ, ภิกฺขเว, ภาโร? ปญฺจุปาทานกฺขนฺธา ติสฺส วจนียํฯ กตเม ปญฺจ? รูปุปาทานกฺขโนฺธ, เวทนุปาทานกฺขโนฺธ, สญฺญุปาทานกฺขโนฺธ, สงฺขารุปาทานกฺขโนฺธ, วิญฺญาณุปาทานกฺขโนฺธ; อยํ วุจฺจติ, ภิกฺขเว, ภาโร’’ฯ

22. Sāvatthiyaṃ … tatra kho … ‘‘bhārañca vo, bhikkhave, desessāmi bhārahārañca bhārādānañca bhāranikkhepanañca. Taṃ suṇātha. Katamo ca, bhikkhave, bhāro? Pañcupādānakkhandhā tissa vacanīyaṃ. Katame pañca? Rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho; ayaṃ vuccati, bhikkhave, bhāro’’.

‘‘กตโม จ, ภิกฺขเว, ภารหาโร ? ปุคฺคโล ติสฺส วจนียํฯ ยฺวายํ อายสฺมา เอวํนาโม เอวํโคโตฺต; อยํ วุจฺจติ, ภิกฺขเว, ภารหาโรฯ

‘‘Katamo ca, bhikkhave, bhārahāro ? Puggalo tissa vacanīyaṃ. Yvāyaṃ āyasmā evaṃnāmo evaṃgotto; ayaṃ vuccati, bhikkhave, bhārahāro.

‘‘กตมญฺจ , ภิกฺขเว, ภาราทานํ? ยายํ ตณฺหา โปโนภวิกา ¹ นนฺทีราคสหคตา ² ตตฺรตตฺราภินนฺทินี, เสยฺยถิทํ – กามตณฺหา, ภวตณฺหา, วิภวตณฺหาฯ อิทํ วุจฺจติ, ภิกฺขเว, ภาราทานํฯ

‘‘Katamañca , bhikkhave, bhārādānaṃ? Yāyaṃ taṇhā ponobhavikā ³ nandīrāgasahagatā ⁴ tatratatrābhinandinī, seyyathidaṃ – kāmataṇhā, bhavataṇhā, vibhavataṇhā. Idaṃ vuccati, bhikkhave, bhārādānaṃ.

‘‘กตมญฺจ, ภิกฺขเว, ภารนิเกฺขปนํ? โย ตสฺสาเยว ตณฺหาย อเสสวิราคนิโรโธ จาโค ปฎินิสฺสโคฺค มุตฺติ อนาลโยฯ อิทํ วุจฺจติ, ภิกฺขเว, ภารนิเกฺขปน’’นฺติฯ

‘‘Katamañca, bhikkhave, bhāranikkhepanaṃ? Yo tassāyeva taṇhāya asesavirāganirodho cāgo paṭinissaggo mutti anālayo. Idaṃ vuccati, bhikkhave, bhāranikkhepana’’nti.

อิทมโวจ ภควาฯ อิทํ วตฺวาน ⁵ สุคโต อถาปรํ เอตทโวจ สตฺถา –

Idamavoca bhagavā. Idaṃ vatvāna ⁶ sugato athāparaṃ etadavoca satthā –

‘‘ภารา หเว ปญฺจกฺขนฺธา, ภารหาโร จ ปุคฺคโล;

‘‘Bhārā have pañcakkhandhā, bhārahāro ca puggalo;

ภาราทานํ ทุขํ โลเก, ภารนิเกฺขปนํ สุขํฯ

Bhārādānaṃ dukhaṃ loke, bhāranikkhepanaṃ sukhaṃ.

‘‘นิกฺขิปิตฺวา ครุํ ภารํ, อญฺญํ ภารํ อนาทิย;

‘‘Nikkhipitvā garuṃ bhāraṃ, aññaṃ bhāraṃ anādiya;

สมูลํ ตณฺหมพฺพุยฺห ⁷, นิจฺฉาโต ปรินิพฺพุโต’’ติฯ ปฐมํ;

Samūlaṃ taṇhamabbuyha ⁸, nicchāto parinibbuto’’ti. paṭhamaṃ;

Next: ๒. ปริญฺญสุตฺตํ • 2. Pariññasuttaṃ

Footnotes:

1. โปโนพฺภวิกา (สฺยา. กํ. ก.)

2. นนฺทิราคสหคตา (สพฺพตฺถ)

3. ponobbhavikā (syā. kaṃ. ka.)

4. nandirāgasahagatā (sabbattha)

5. วตฺวา (สี.) เอวมีทิเสสุ ฐาเนสุ

6. vatvā (sī.) evamīdisesu ṭhānesu

7. ตณฺหมพฺภุยฺห (ปี. ก.)

8. taṇhamabbhuyha (pī. ka.)

Related texts:

อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑. ภารสุตฺตวณฺณนา • 1. Bhārasuttavaṇṇanā

ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๑. ภารสุตฺตวณฺณนา • 1. Bhārasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact