| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. பா⁴ரவக்³கோ³
3. Bhāravaggo
1. பா⁴ரஸுத்தவண்ணனா
1. Bhārasuttavaṇṇanā
22. பா⁴ரவக்³க³ஸ்ஸ பட²மே பஞ்சுபாதா³னக்க²ந்தா⁴திஸ்ஸ வசனீயந்தி பஞ்சுபாதா³னக்க²ந்தா⁴ இதி அஸ்ஸ வசனீயங், ஏவங் வத்தப்³ப³ங் ப⁴வெய்யாதி அத்தோ². அயங் வுச்சதி, பி⁴க்க²வே, பா⁴ரோதி யே இமே பஞ்சுபாதா³னக்க²ந்தா⁴, அயங் பா⁴ரோதி வுச்சதி. கேனட்டே²னாதி? பரிஹாரபா⁴ரியட்டே²ன. ஏதேஸஞ்ஹி டா²பனக³மனநிஸீதா³பனநிபஜ்ஜாபனந்ஹாபனமண்ட³னகா²தா³பனபு⁴ஞ்ஜாபனாதி³பரிஹாரோ பா⁴ரியோதி பரிஹாரபா⁴ரியட்டே²ன பா⁴ரோதி வுச்சதி. ஏவங்னாமோதி திஸ்ஸோ த³த்தோதிஆதி³னாமோ. ஏவங்கொ³த்தோதி கண்ஹாயனோ வச்சா²யனோதிஆதி³கொ³த்தோ. இதி வோஹாரமத்தஸித்³த⁴ங் புக்³க³லங் ‘‘பா⁴ரஹாரோ’’தி கத்வா த³ஸ்ஸேதி. புக்³க³லோ ஹி படிஸந்தி⁴க்க²ணேயேவ க²ந்த⁴பா⁴ரங் உக்கி²பித்வா த³ஸபி வஸ்ஸானி வீஸதிபி வஸ்ஸஸதம்பீதி யாவஜீவங் இமங் க²ந்த⁴பா⁴ரங் ந்ஹாபெந்தோ போ⁴ஜெந்தோ முது³ஸம்ப²ஸ்ஸமஞ்சபீடே²ஸு நிஸீதா³பெந்தோ நிபஜ்ஜாபெந்தோ பரிஹரித்வா சுதிக்க²ணே ச²ட்³டெ³த்வா புன படிஸந்தி⁴க்க²ணே அபரங் க²ந்த⁴பா⁴ரங் ஆதி³யதி, தஸ்மா பா⁴ரஹாரோதி ஜாதோ.
22. Bhāravaggassa paṭhame pañcupādānakkhandhātissa vacanīyanti pañcupādānakkhandhā iti assa vacanīyaṃ, evaṃ vattabbaṃ bhaveyyāti attho. Ayaṃ vuccati, bhikkhave, bhāroti ye ime pañcupādānakkhandhā, ayaṃ bhāroti vuccati. Kenaṭṭhenāti? Parihārabhāriyaṭṭhena. Etesañhi ṭhāpanagamananisīdāpananipajjāpananhāpanamaṇḍanakhādāpanabhuñjāpanādiparihāro bhāriyoti parihārabhāriyaṭṭhena bhāroti vuccati. Evaṃnāmoti tisso dattotiādināmo. Evaṃgottoti kaṇhāyano vacchāyanotiādigotto. Iti vohāramattasiddhaṃ puggalaṃ ‘‘bhārahāro’’ti katvā dasseti. Puggalo hi paṭisandhikkhaṇeyeva khandhabhāraṃ ukkhipitvā dasapi vassāni vīsatipi vassasatampīti yāvajīvaṃ imaṃ khandhabhāraṃ nhāpento bhojento mudusamphassamañcapīṭhesu nisīdāpento nipajjāpento pariharitvā cutikkhaṇe chaḍḍetvā puna paṭisandhikkhaṇe aparaṃ khandhabhāraṃ ādiyati, tasmā bhārahāroti jāto.
போனோப⁴விகாதி புனப்³ப⁴வனிப்³ப³த்திகா. நந்தீ³ராக³ஸஹக³தாதி நந்தி³ராகே³ன ஸஹ ஏகத்தமேவ க³தா. தப்³பா⁴வஸஹக³தஞ்ஹி இத⁴ அதி⁴ப்பேதங். தத்ர தத்ராபி⁴னந்தி³னீதி உபபத்திட்டா²னே வா ரூபாதீ³ஸு வா ஆரம்மணேஸு தத்த² தத்த² அபி⁴னந்த³னஸீலாவ. காமதண்ஹாதீ³ஸு பஞ்சகாமகு³ணிகோ ராகோ³ காமதண்ஹா நாம, ரூபாரூபப⁴வராகோ³ ஜா²னநிகந்தி ஸஸ்ஸததி³ட்டி²ஸஹக³தோ ராகோ³தி அயங் ப⁴வதண்ஹா நாம, உச்சே²த³தி³ட்டி²ஸஹக³தோ ராகோ³ விப⁴வதண்ஹா நாம. பா⁴ராதா³னந்தி பா⁴ரக³ஹணங். தண்ஹாய ஹி ஏஸ பா⁴ரங் ஆதி³யதி. அஸேஸவிராக³னிரோதோ⁴திஆதி³ ஸப்³ப³ங் நிப்³பா³னஸ்ஸேவ வேவசனங். தஞ்ஹி ஆக³ம்ம தண்ஹா அஸேஸதோ விரஜ்ஜதி நிருஜ்ஜ²தி சஜியதி படினிஸ்ஸஜ்ஜியதி விமுச்சதி, நத்தி² செத்த² காமாலயோ வா தி³ட்டா²லயோ வாதி நிப்³பா³னங் ஏதானி நாமானி லப⁴தி. ஸமூலங் தண்ஹந்தி தண்ஹாய அவிஜ்ஜா மூலங் நாம. அப்³பு³ய்ஹாதி அரஹத்தமக்³கே³ன தங் ஸமூலகங் உத்³த⁴ரித்வா. நிச்சா²தோ பரினிப்³பு³தோதி நித்தண்ஹோ பரினிப்³பு³தோ நாமாதி வத்துங் வட்டதீதி. பட²மங்.
Ponobhavikāti punabbhavanibbattikā. Nandīrāgasahagatāti nandirāgena saha ekattameva gatā. Tabbhāvasahagatañhi idha adhippetaṃ. Tatra tatrābhinandinīti upapattiṭṭhāne vā rūpādīsu vā ārammaṇesu tattha tattha abhinandanasīlāva. Kāmataṇhādīsu pañcakāmaguṇiko rāgo kāmataṇhā nāma, rūpārūpabhavarāgo jhānanikanti sassatadiṭṭhisahagato rāgoti ayaṃ bhavataṇhā nāma, ucchedadiṭṭhisahagato rāgo vibhavataṇhā nāma. Bhārādānanti bhāragahaṇaṃ. Taṇhāya hi esa bhāraṃ ādiyati. Asesavirāganirodhotiādi sabbaṃ nibbānasseva vevacanaṃ. Tañhi āgamma taṇhā asesato virajjati nirujjhati cajiyati paṭinissajjiyati vimuccati, natthi cettha kāmālayo vā diṭṭhālayo vāti nibbānaṃ etāni nāmāni labhati. Samūlaṃ taṇhanti taṇhāya avijjā mūlaṃ nāma. Abbuyhāti arahattamaggena taṃ samūlakaṃ uddharitvā. Nicchāto parinibbutoti nittaṇho parinibbuto nāmāti vattuṃ vaṭṭatīti. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. பா⁴ரஸுத்தங் • 1. Bhārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. பா⁴ரஸுத்தவண்ணனா • 1. Bhārasuttavaṇṇanā
