| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩. ভারৰগ্গো
3. Bhāravaggo
১. ভারসুত্তৰণ্ণনা
1. Bhārasuttavaṇṇanā
২২. ভারৰগ্গস্স পঠমে পঞ্চুপাদানক্খন্ধাতিস্স ৰচনীযন্তি পঞ্চুপাদানক্খন্ধা ইতি অস্স ৰচনীযং, এৰং ৰত্তব্বং ভৰেয্যাতি অত্থো। অযং ৰুচ্চতি, ভিক্খৰে, ভারোতি যে ইমে পঞ্চুপাদানক্খন্ধা, অযং ভারোতি ৰুচ্চতি। কেনট্ঠেনাতি? পরিহারভারিযট্ঠেন। এতেসঞ্হি ঠাপনগমননিসীদাপননিপজ্জাপনন্হাপনমণ্ডনখাদাপনভুঞ্জাপনাদিপরিহারো ভারিযোতি পরিহারভারিযট্ঠেন ভারোতি ৰুচ্চতি। এৰংনামোতি তিস্সো দত্তোতিআদিনামো। এৰংগোত্তোতি কণ্হাযনো ৰচ্ছাযনোতিআদিগোত্তো। ইতি ৰোহারমত্তসিদ্ধং পুগ্গলং ‘‘ভারহারো’’তি কত্ৰা দস্সেতি। পুগ্গলো হি পটিসন্ধিক্খণেযেৰ খন্ধভারং উক্খিপিত্ৰা দসপি ৰস্সানি ৰীসতিপি ৰস্সসতম্পীতি যাৰজীৰং ইমং খন্ধভারং ন্হাপেন্তো ভোজেন্তো মুদুসম্ফস্সমঞ্চপীঠেসু নিসীদাপেন্তো নিপজ্জাপেন্তো পরিহরিত্ৰা চুতিক্খণে ছড্ডেত্ৰা পুন পটিসন্ধিক্খণে অপরং খন্ধভারং আদিযতি, তস্মা ভারহারোতি জাতো।
22. Bhāravaggassa paṭhame pañcupādānakkhandhātissa vacanīyanti pañcupādānakkhandhā iti assa vacanīyaṃ, evaṃ vattabbaṃ bhaveyyāti attho. Ayaṃ vuccati, bhikkhave, bhāroti ye ime pañcupādānakkhandhā, ayaṃ bhāroti vuccati. Kenaṭṭhenāti? Parihārabhāriyaṭṭhena. Etesañhi ṭhāpanagamananisīdāpananipajjāpananhāpanamaṇḍanakhādāpanabhuñjāpanādiparihāro bhāriyoti parihārabhāriyaṭṭhena bhāroti vuccati. Evaṃnāmoti tisso dattotiādināmo. Evaṃgottoti kaṇhāyano vacchāyanotiādigotto. Iti vohāramattasiddhaṃ puggalaṃ ‘‘bhārahāro’’ti katvā dasseti. Puggalo hi paṭisandhikkhaṇeyeva khandhabhāraṃ ukkhipitvā dasapi vassāni vīsatipi vassasatampīti yāvajīvaṃ imaṃ khandhabhāraṃ nhāpento bhojento mudusamphassamañcapīṭhesu nisīdāpento nipajjāpento pariharitvā cutikkhaṇe chaḍḍetvā puna paṭisandhikkhaṇe aparaṃ khandhabhāraṃ ādiyati, tasmā bhārahāroti jāto.
পোনোভৰিকাতি পুনব্ভৰনিব্বত্তিকা। নন্দীরাগসহগতাতি নন্দিরাগেন সহ একত্তমেৰ গতা। তব্ভাৰসহগতঞ্হি ইধ অধিপ্পেতং। তত্র তত্রাভিনন্দিনীতি উপপত্তিট্ঠানে ৰা রূপাদীসু ৰা আরম্মণেসু তত্থ তত্থ অভিনন্দনসীলাৰ। কামতণ্হাদীসু পঞ্চকামগুণিকো রাগো কামতণ্হা নাম, রূপারূপভৰরাগো ঝাননিকন্তি সস্সতদিট্ঠিসহগতো রাগোতি অযং ভৰতণ্হা নাম, উচ্ছেদদিট্ঠিসহগতো রাগো ৰিভৰতণ্হা নাম। ভারাদানন্তি ভারগহণং। তণ্হায হি এস ভারং আদিযতি। অসেসৰিরাগনিরোধোতিআদি সব্বং নিব্বানস্সেৰ ৰেৰচনং। তঞ্হি আগম্ম তণ্হা অসেসতো ৰিরজ্জতি নিরুজ্ঝতি চজিযতি পটিনিস্সজ্জিযতি ৰিমুচ্চতি, নত্থি চেত্থ কামালযো ৰা দিট্ঠালযো ৰাতি নিব্বানং এতানি নামানি লভতি। সমূলং তণ্হন্তি তণ্হায অৰিজ্জা মূলং নাম। অব্বুয্হাতি অরহত্তমগ্গেন তং সমূলকং উদ্ধরিত্ৰা। নিচ্ছাতো পরিনিব্বুতোতি নিত্তণ্হো পরিনিব্বুতো নামাতি ৰত্তুং ৰট্টতীতি। পঠমং।
Ponobhavikāti punabbhavanibbattikā. Nandīrāgasahagatāti nandirāgena saha ekattameva gatā. Tabbhāvasahagatañhi idha adhippetaṃ. Tatra tatrābhinandinīti upapattiṭṭhāne vā rūpādīsu vā ārammaṇesu tattha tattha abhinandanasīlāva. Kāmataṇhādīsu pañcakāmaguṇiko rāgo kāmataṇhā nāma, rūpārūpabhavarāgo jhānanikanti sassatadiṭṭhisahagato rāgoti ayaṃ bhavataṇhā nāma, ucchedadiṭṭhisahagato rāgo vibhavataṇhā nāma. Bhārādānanti bhāragahaṇaṃ. Taṇhāya hi esa bhāraṃ ādiyati. Asesavirāganirodhotiādi sabbaṃ nibbānasseva vevacanaṃ. Tañhi āgamma taṇhā asesato virajjati nirujjhati cajiyati paṭinissajjiyati vimuccati, natthi cettha kāmālayo vā diṭṭhālayo vāti nibbānaṃ etāni nāmāni labhati. Samūlaṃ taṇhanti taṇhāya avijjā mūlaṃ nāma. Abbuyhāti arahattamaggena taṃ samūlakaṃ uddharitvā. Nicchāto parinibbutoti nittaṇho parinibbuto nāmāti vattuṃ vaṭṭatīti. Paṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. ভারসুত্তং • 1. Bhārasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. ভারসুত্তৰণ্ণনা • 1. Bhārasuttavaṇṇanā
