| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
3. бхаараваг̇г̇о
3. Bhāravaggo
1. бхаарасуд̇д̇аван̣н̣анаа
1. Bhārasuttavaṇṇanā
22. бхаараваг̇г̇асса батамз бан̃жубаад̣̇аанагканд̇хаад̇исса важанийяанд̇и бан̃жубаад̣̇аанагканд̇хаа ид̇и асса важанийяам̣, звам̣ вад̇д̇аб̣б̣ам̣ бхавзяяаад̇и ад̇т̇о. аяам̣ вужжад̇и, бхигкавз, бхаарод̇и яз имз бан̃жубаад̣̇аанагканд̇хаа, аяам̣ бхаарод̇и вужжад̇и. гзнадтзнаад̇и? барихаарабхаарияадтзна. зд̇зсан̃хи таабанаг̇амананисийд̣̇аабананибаж̇ж̇аабананхаабанаман̣д̣анакаад̣̇аабанабхун̃ж̇аабанаад̣̇ибарихааро бхаарияод̇и барихаарабхаарияадтзна бхаарод̇и вужжад̇и. звам̣наамод̇и д̇иссо д̣̇ад̇д̇од̇иаад̣̇инаамо. звам̣г̇од̇д̇од̇и ган̣хааяано важчааяанод̇иаад̣̇иг̇од̇д̇о. ид̇и вохаарамад̇д̇асид̣̇д̇хам̣ буг̇г̇алам̣ ‘‘бхаарахааро’’д̇и гад̇ваа д̣̇ассзд̇и. буг̇г̇ало хи бадисанд̇хигкан̣зязва канд̇хабхаарам̣ угкибид̇ваа д̣̇асаби вассаани вийсад̇иби вассасад̇амбийд̇и яааваж̇ийвам̣ имам̣ канд̇хабхаарам̣ нхаабзнд̇о бхож̇знд̇о муд̣̇усампассаман̃жабийтзсу нисийд̣̇аабзнд̇о нибаж̇ж̇аабзнд̇о барихарид̇ваа жуд̇игкан̣з чад̣д̣зд̇ваа буна бадисанд̇хигкан̣з абарам̣ канд̇хабхаарам̣ аад̣̇ияад̇и, д̇асмаа бхаарахаарод̇и ж̇аад̇о.
22. Bhāravaggassa paṭhame pañcupādānakkhandhātissa vacanīyanti pañcupādānakkhandhā iti assa vacanīyaṃ, evaṃ vattabbaṃ bhaveyyāti attho. Ayaṃ vuccati, bhikkhave, bhāroti ye ime pañcupādānakkhandhā, ayaṃ bhāroti vuccati. Kenaṭṭhenāti? Parihārabhāriyaṭṭhena. Etesañhi ṭhāpanagamananisīdāpananipajjāpananhāpanamaṇḍanakhādāpanabhuñjāpanādiparihāro bhāriyoti parihārabhāriyaṭṭhena bhāroti vuccati. Evaṃnāmoti tisso dattotiādināmo. Evaṃgottoti kaṇhāyano vacchāyanotiādigotto. Iti vohāramattasiddhaṃ puggalaṃ ‘‘bhārahāro’’ti katvā dasseti. Puggalo hi paṭisandhikkhaṇeyeva khandhabhāraṃ ukkhipitvā dasapi vassāni vīsatipi vassasatampīti yāvajīvaṃ imaṃ khandhabhāraṃ nhāpento bhojento mudusamphassamañcapīṭhesu nisīdāpento nipajjāpento pariharitvā cutikkhaṇe chaḍḍetvā puna paṭisandhikkhaṇe aparaṃ khandhabhāraṃ ādiyati, tasmā bhārahāroti jāto.
бонобхавигаад̇и бунаб̣бхаваниб̣б̣ад̇д̇игаа. нанд̣̇ийрааг̇асахаг̇ад̇аад̇и нанд̣̇ирааг̇зна саха згад̇д̇амзва г̇ад̇аа. д̇аб̣бхаавасахаг̇ад̇ан̃хи ид̇ха ад̇хиббзд̇ам̣. д̇ад̇ра д̇ад̇раабхинанд̣̇инийд̇и убабад̇д̇идтаанз ваа руубаад̣̇ийсу ваа аарамман̣зсу д̇ад̇т̇а д̇ад̇т̇а абхинанд̣̇анасийлаава. гаамад̇ан̣хаад̣̇ийсу бан̃жагаамаг̇ун̣иго рааг̇о гаамад̇ан̣хаа наама, руубааруубабхаварааг̇о жхаананиганд̇и сассад̇ад̣̇идтисахаг̇ад̇о рааг̇од̇и аяам̣ бхавад̇ан̣хаа наама, ужчзд̣̇ад̣̇идтисахаг̇ад̇о рааг̇о вибхавад̇ан̣хаа наама. бхаараад̣̇аананд̇и бхаараг̇ахан̣ам̣. д̇ан̣хааяа хи зса бхаарам̣ аад̣̇ияад̇и. асзсавирааг̇анирод̇ход̇иаад̣̇и саб̣б̣ам̣ ниб̣б̣аанассзва взважанам̣. д̇ан̃хи ааг̇амма д̇ан̣хаа асзсад̇о вираж̇ж̇ад̇и нируж̇жхад̇и жаж̇ияад̇и бадиниссаж̇ж̇ияад̇и вимужжад̇и, над̇т̇и жзд̇т̇а гаамаалаяо ваа д̣̇идтаалаяо ваад̇и ниб̣б̣аанам̣ зд̇аани наамаани лабхад̇и. самуулам̣ д̇ан̣ханд̇и д̇ан̣хааяа авиж̇ж̇аа муулам̣ наама. аб̣б̣уяхаад̇и арахад̇д̇амаг̇г̇зна д̇ам̣ самуулагам̣ уд̣̇д̇харид̇ваа. нижчаад̇о бариниб̣б̣уд̇од̇и нид̇д̇ан̣хо бариниб̣б̣уд̇о наамаад̇и вад̇д̇ум̣ ваддад̇ийд̇и. батамам̣.
Ponobhavikāti punabbhavanibbattikā. Nandīrāgasahagatāti nandirāgena saha ekattameva gatā. Tabbhāvasahagatañhi idha adhippetaṃ. Tatra tatrābhinandinīti upapattiṭṭhāne vā rūpādīsu vā ārammaṇesu tattha tattha abhinandanasīlāva. Kāmataṇhādīsu pañcakāmaguṇiko rāgo kāmataṇhā nāma, rūpārūpabhavarāgo jhānanikanti sassatadiṭṭhisahagato rāgoti ayaṃ bhavataṇhā nāma, ucchedadiṭṭhisahagato rāgo vibhavataṇhā nāma. Bhārādānanti bhāragahaṇaṃ. Taṇhāya hi esa bhāraṃ ādiyati. Asesavirāganirodhotiādi sabbaṃ nibbānasseva vevacanaṃ. Tañhi āgamma taṇhā asesato virajjati nirujjhati cajiyati paṭinissajjiyati vimuccati, natthi cettha kāmālayo vā diṭṭhālayo vāti nibbānaṃ etāni nāmāni labhati. Samūlaṃ taṇhanti taṇhāya avijjā mūlaṃ nāma. Abbuyhāti arahattamaggena taṃ samūlakaṃ uddharitvā. Nicchāto parinibbutoti nittaṇho parinibbuto nāmāti vattuṃ vaṭṭatīti. Paṭhamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 1. бхаарасуд̇д̇ам̣ • 1. Bhārasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 1. бхаарасуд̇д̇аван̣н̣анаа • 1. Bhārasuttavaṇṇanā
