| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੩. ਭਾਰવਗ੍ਗੋ
3. Bhāravaggo
੧. ਭਾਰਸੁਤ੍ਤવਣ੍ਣਨਾ
1. Bhārasuttavaṇṇanā
੨੨. ਉਪਾਦਾਨਾਨਂ ਆਰਮ੍ਮਣਭੂਤਾ ਖਨ੍ਧਾ ਉਪਾਦਾਨਕ੍ਖਨ੍ਧਾ। ਪਰਿਹਾਰਭਾਰਿਯਟ੍ਠੇਨਾਤਿ ਪਰਿਹਾਰਸ੍ਸ ਭਾਰਿਯਭਾવੇਨ ਗਰੁਤਰਭਾવੇਨ। વੁਤ੍ਤਮੇવ ਅਤ੍ਥਂ ਪਾਕਟਂ ਕਾਤੁਂ ‘‘ਏਤੇਸਞ੍ਹੀ’’ਤਿਆਦਿਮਾਹ। ਤਤ੍ਥ ਯਸ੍ਮਾ ਏਤਾਨਿ ਠਾਨਗਮਨਾਦੀਨਿ ਰੂਪਾਰੂਪਧਮ੍ਮਾਨਂ ਪਙ੍ਗੁਲਜਚ੍ਚਨ੍ਧਾਨਂ વਿਯ ਅਞ੍ਞਮਞ੍ਞੂਪਸ੍ਸਯવਸੇਨ ਇਜ੍ਝਨ੍ਤਿ, ਨ ਪਚ੍ਚੇਕਂ, ਤਸ੍ਮਾ ‘‘ਏਤੇਸ’’ਨ੍ਤਿ ਅવਿਸੇਸવਚਨਂ ਕਤਂ। ਪੁਗ੍ਗਲਨ੍ਤਿ ਖਨ੍ਧਸਨ੍ਤਾਨਂ વਦਤਿ। ਖਨ੍ਧਸਨ੍ਤਾਨੋ ਹਿ ਅવਿਚ੍ਛੇਦੇਨ ਪવਤ੍ਤਮਾਨੋ ਯਾવ ਪਰਿਨਿਬ੍ਬਾਨਾ ਖਨ੍ਧਭਾਰਂ વਹਨ੍ਤੋ વਿਯ ਲੋਕੇ ਖਾਯਤਿ ਤਬ੍ਬਿਨਿਮੁਤ੍ਤਸ੍ਸ ਸਤ੍ਤਸ੍ਸ ਅਭਾવਤੋ। ਤੇਨਾਹ ‘‘ਪੁਗ੍ਗਲੋ’’ਤਿਆਦਿ। ਭਾਰਹਾਰੋਤਿ ਜਾਤੋਤਿ ਭਾਰਹਾਰੋ ਨਾਮ ਜਾਤੋ।
22. Upādānānaṃ ārammaṇabhūtā khandhā upādānakkhandhā. Parihārabhāriyaṭṭhenāti parihārassa bhāriyabhāvena garutarabhāvena. Vuttameva atthaṃ pākaṭaṃ kātuṃ ‘‘etesañhī’’tiādimāha. Tattha yasmā etāni ṭhānagamanādīni rūpārūpadhammānaṃ paṅgulajaccandhānaṃ viya aññamaññūpassayavasena ijjhanti, na paccekaṃ, tasmā ‘‘etesa’’nti avisesavacanaṃ kataṃ. Puggalanti khandhasantānaṃ vadati. Khandhasantāno hi avicchedena pavattamāno yāva parinibbānā khandhabhāraṃ vahanto viya loke khāyati tabbinimuttassa sattassa abhāvato. Tenāha ‘‘puggalo’’tiādi. Bhārahāroti jātoti bhārahāro nāma jāto.
ਪੁਨਬ੍ਭવਕਰਣਂ ਪੁਨਬ੍ਭવੋ, ਤਂ ਫਲਂ ਅਰਹਤਿ, ਤਤ੍ਥ ਨਿਯੁਤ੍ਤਾਤਿ વਾ ਪੋਨੋਭવਿਕਾ। ਤਬ੍ਭਾવਸਹਗਤਂ ਯਥਾ ‘‘ਸਨਿਦਸ੍ਸਨਾ ਧਮ੍ਮਾ’’ਤਿ, ਨ ਸਂਸਟ੍ਠਸਹਗਤਂ, ਨਾਪਿ ਆਰਮ੍ਮਣਸਹਗਤਂ। ‘‘ਤਤ੍ਰ ਤਤ੍ਰਾ’’ਤਿ ਯਂ ਯਂ ਉਪ੍ਪਤ੍ਤਿਟ੍ਠਾਨਂ, ਰੂਪਾਦਿਆਰਮ੍ਮਣਂ વਾ ਪਤ੍વਾ ਤਤ੍ਰਤਤ੍ਰਾਭਿਨਨ੍ਦਿਨੀ। ਤੇਨਾਹ ‘‘ਉਪਪਤ੍ਤਿਟ੍ਠਾਨੇ વਾ’’ਤਿਆਦਿ। ਪਞ੍ਚਕਾਮਗੁਣਿਕੋਤਿ ਪਞ੍ਚਕਾਮਗੁਣਾਰਮ੍ਮਣੋ। ਰੂਪਾਰੂਪੂਪਪਤ੍ਤਿਭવੇ ਰਾਗੋ ਰੂਪਾਰੂਪਭવਰਾਗੋ। ਝਾਨਨਿਕਨ੍ਤਿ ਝਾਨਸਙ੍ਖਾਤੇ ਕਮ੍ਮਭવੇ ਰਾਗੋ। ਸਸ੍ਸਤਾਦਿਟ੍ਠੀਤਿ ਭવਦਿਟ੍ਠਿ, ਤਂਸਹਗਤੋ ਰਾਗੋ। ਅਯਨ੍ਤਿ ਰਾਗੋ ਭવਤਣ੍ਹਾ ਨਾਮ। ਉਚ੍ਛੇਦਦਿਟ੍ਠਿ વਿਭવਦਿਟ੍ਠਿ ਨਾਮ, ਤਂਸਹਗਤੋ ਛਨ੍ਦਰਾਗੋ વਿਭવਤਣ੍ਹਾ ਨਾਮ। ਏਸ ਪੁਗ੍ਗਲੋ ਖਨ੍ਧਭਾਰਂ ਆਦਿਯਤਿ ਤਣ੍ਹਾવਸੇਨ ਪਟਿਸਨ੍ਧਿਗ੍ਗਹਣਤੋ। ‘‘ਅਸੇਸਮੇਤ੍ਥ ਤਣ੍ਹਾ વਿਰਜ੍ਜਤਿ ਪਲੁਜ੍ਜਤਿ ਨਿਰੁਜ੍ਝਤਿ ਪਹੀਯਤੀ’’ਤਿਆਦਿਨਾ ਸਬ੍ਬਪਦਾਨਿ ਨਿਬ੍ਬਾਨવਸੇਨੇવ વੇਦਿਤਬ੍ਬਾਨੀਤਿ ਆਹ ‘‘ਸਬ੍ਬਂ ਨਿਬ੍ਬਾਨਸ੍ਸੇવ વੇવਚਨ’’ਨ੍ਤਿ।
Punabbhavakaraṇaṃ punabbhavo, taṃ phalaṃ arahati, tattha niyuttāti vā ponobhavikā. Tabbhāvasahagataṃ yathā ‘‘sanidassanā dhammā’’ti, na saṃsaṭṭhasahagataṃ, nāpi ārammaṇasahagataṃ. ‘‘Tatra tatrā’’ti yaṃ yaṃ uppattiṭṭhānaṃ, rūpādiārammaṇaṃ vā patvā tatratatrābhinandinī. Tenāha ‘‘upapattiṭṭhāne vā’’tiādi. Pañcakāmaguṇikoti pañcakāmaguṇārammaṇo. Rūpārūpūpapattibhave rāgo rūpārūpabhavarāgo. Jhānanikanti jhānasaṅkhāte kammabhave rāgo. Sassatādiṭṭhīti bhavadiṭṭhi, taṃsahagato rāgo. Ayanti rāgo bhavataṇhā nāma. Ucchedadiṭṭhi vibhavadiṭṭhi nāma, taṃsahagato chandarāgo vibhavataṇhā nāma. Esa puggalo khandhabhāraṃ ādiyati taṇhāvasena paṭisandhiggahaṇato. ‘‘Asesamettha taṇhā virajjati palujjati nirujjhati pahīyatī’’tiādinā sabbapadāni nibbānavaseneva veditabbānīti āha ‘‘sabbaṃ nibbānasseva vevacana’’nti.
ਭਾਰਸੁਤ੍ਤવਣ੍ਣਨਾ ਨਿਟ੍ਠਿਤਾ।
Bhārasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧. ਭਾਰਸੁਤ੍ਤਂ • 1. Bhārasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੧. ਭਾਰਸੁਤ੍ਤવਣ੍ਣਨਾ • 1. Bhārasuttavaṇṇanā
