| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
ဘာရဋ္ဌကထာဝဏ္ဏနာ
Bhāraṭṭhakathāvaṇṇanā
၁၀၁. ဘာရဋ္ဌကထာယံ ဘာရဋ္ဌန္တိ မာတိကာပဒသ္သ ဘာရော နာမာတိ ဣဒံ အတ္ထဒသ္သနန္တိ အာဟ ‘‘ဘာရောယေဝ ဘာရဋ္ဌ’’န္တိ။ ပုရိမဂလေတိ ဂလသ္သ ပုရိမဘာဂေ။ ဂလဝာဋကောတိ ဂီဝာယ ဥပရိမဂလဝာဋကော။ ဥရပရိစ္ဆေဒမဇ္ဈေတိ ဥရပရိယန္တသ္သ မဇ္ဈေ။ သာမိကေဟိ အနာဏတ္တောတိ ဣဒံ ယဒိ သာမိကေဟိ ‘‘ဣမံ ဘာရံ နေတ္ဝာ အသုကဋ္ဌာနေ ဒေဟီ’’တိ အာဏတ္တော ဘဝေယ္ယ, တဒာ တေန ဂဟိတဘဏ္ဍံ ဥပနိက္ခိတ္တံ သိယာ, တဉ္စ ထေယ္ယစိတ္တေန သီသာဒိတော ဩရောပေန္တသ္သာပိ အဝဟာရော န သိယာ, သာမိကာနံ ပန ဓုရနိက္ခေပေ ဧဝ သိယာတိ တတော ဥပနိက္ခိတ္တဘဏ္ဍဘာဝတော ဝိယောဇေတုံ ဝုတ္တံ, တေနေဝ ဝက္ခတိ ‘‘တေဟိ ပန အနာဏတ္တတ္တာ ပာရာဇိက’’န္တိ။ ဃံသန္တောတိ သီသတော အနုက္ခိပန္တော, ယဒိ ဥက္ခိပေယ္ယ, ဥက္ခိတ္တမတ္တေ ပာရာဇိကံ, တေနာဟ သီသတော ကေသဂ္ဂမတ္တမ္ပီတိအာဒိ။ ယော စာယန္တိ ယော အယံ ဝိနိစ္ဆယော။
101. Bhāraṭṭhakathāyaṃ bhāraṭṭhanti mātikāpadassa bhāro nāmāti idaṃ atthadassananti āha ‘‘bhāroyeva bhāraṭṭha’’nti. Purimagaleti galassa purimabhāge. Galavāṭakoti gīvāya uparimagalavāṭako. Uraparicchedamajjheti urapariyantassa majjhe. Sāmikehi anāṇattoti idaṃ yadi sāmikehi ‘‘imaṃ bhāraṃ netvā asukaṭṭhāne dehī’’ti āṇatto bhaveyya, tadā tena gahitabhaṇḍaṃ upanikkhittaṃ siyā, tañca theyyacittena sīsādito oropentassāpi avahāro na siyā, sāmikānaṃ pana dhuranikkhepe eva siyāti tato upanikkhittabhaṇḍabhāvato viyojetuṃ vuttaṃ, teneva vakkhati ‘‘tehi pana anāṇattattā pārājika’’nti. Ghaṃsantoti sīsato anukkhipanto, yadi ukkhipeyya, ukkhittamatte pārājikaṃ, tenāha sīsato kesaggamattampītiādi. Yo cāyanti yo ayaṃ vinicchayo.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၂. ဒုတိယပာရာဇိကံ • 2. Dutiyapārājikaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. ဒုတိယပာရာဇိကံ • 2. Dutiyapārājikaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဘာရဋ္ဌကထာဝဏ္ဏနာ • Bhāraṭṭhakathāvaṇṇanā
