| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
១០. ភរិយាសុត្តវណ្ណនា
10. Bhariyāsuttavaṇṇanā
៦៣. ទសមេ ឧច្ចាសទ្ទា មហាសទ្ទា ឧទ្ធំ ឧគ្គតត្តា ឧច្ចំ បត្ថដត្តា មហន្តំ អវិនិព្ភោគំ វិនិភុញ្ជិត្វា គហេតុំ អសក្កុណេយ្យំ សទ្ទំ ករោន្តា វទន្តិ។ វចីឃោសោបិ ហិ ពហូហិ ឯកជ្ឈំ បវត្តិតោ អត្ថតោ ច សទ្ទតោ ច ទុរវពោធោ កេវលំ មហានិគ្ឃោសោ ឯវ ហុត្វា សោតបថមាគច្ឆតិ។ មច្ឆវិលោបេតិ មច្ឆេ វិលុម្បិត្វា វិយ គហណេ, មច្ឆានំ វា វិលុម្បនេ។ កេវដ្ដានញ្ហិ មច្ឆបច្ឆិដ្ឋបិតដ្ឋានេ មហាជនោ សន្និបតិត្វា ‘‘ឥធ អញ្ញំ ឯកំ មច្ឆំ ទេហិ, ឯកំ មច្ឆផាលំ ទេហិ, ឯតស្ស តេ មហា ទិន្នោ, មយ្ហំ ខុទ្ទកោ’’តិ ឯវំ ឧច្ចាសទ្ទមហាសទ្ទំ ករោន្តិ។ តំ សន្ធាយេតំ វុត្តំ ‘‘កេវដ្ដានំ មច្ឆបច្ឆិំ ឱតារេត្វា ឋិតដ្ឋានេ’’តិ។ មច្ឆគ្គហណត្ថំ ជាលេ បក្ខិត្តេបិ តស្មិំ ឋានេ កេវដ្ដា ចេវ អញ្ញេ ច ‘‘បវិដ្ឋោ ន បវិដ្ឋោ , គហិតោ ន គហិតោ’’តិ មហាសទ្ទំ ករោន្តិ។ តំ សន្ធាយេតំ វុត្តំ ‘‘ជាលេ វា…បេ.… មហាសទ្ទោ ហោតី’’តិ។ កត្តព្ពវត្តន្តិ បាទបរិកម្មាទិកត្តព្ពកិច្ចំ។ ខរាតិ ចិត្តេន វាចាយ ច កក្ខឡា។ សេសមេត្ថ ឧត្តានមេវ។
63. Dasame uccāsaddā mahāsaddā uddhaṃ uggatattā uccaṃ patthaṭattā mahantaṃ avinibbhogaṃ vinibhuñjitvā gahetuṃ asakkuṇeyyaṃ saddaṃ karontā vadanti. Vacīghosopi hi bahūhi ekajjhaṃ pavattito atthato ca saddato ca duravabodho kevalaṃ mahānigghoso eva hutvā sotapathamāgacchati. Macchavilopeti macche vilumpitvā viya gahaṇe, macchānaṃ vā vilumpane. Kevaṭṭānañhi macchapacchiṭṭhapitaṭṭhāne mahājano sannipatitvā ‘‘idha aññaṃ ekaṃ macchaṃ dehi, ekaṃ macchaphālaṃ dehi, etassa te mahā dinno, mayhaṃ khuddako’’ti evaṃ uccāsaddamahāsaddaṃ karonti. Taṃ sandhāyetaṃ vuttaṃ ‘‘kevaṭṭānaṃ macchapacchiṃ otāretvā ṭhitaṭṭhāne’’ti. Macchaggahaṇatthaṃ jāle pakkhittepi tasmiṃ ṭhāne kevaṭṭā ceva aññe ca ‘‘paviṭṭho na paviṭṭho , gahito na gahito’’ti mahāsaddaṃ karonti. Taṃ sandhāyetaṃ vuttaṃ ‘‘jāle vā…pe… mahāsaddo hotī’’ti. Kattabbavattanti pādaparikammādikattabbakiccaṃ. Kharāti cittena vācāya ca kakkhaḷā. Sesamettha uttānameva.
ភរិយាសុត្តវណ្ណនា និដ្ឋិតា។
Bhariyāsuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. ភរិយាសុត្តំ • 10. Bhariyāsuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១០. ភរិយាសុត្តវណ្ណនា • 10. Bhariyāsuttavaṇṇanā
