| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੧੦. ਭਰਿਯਾਸੁਤ੍ਤવਣ੍ਣਨਾ
10. Bhariyāsuttavaṇṇanā
੬੩. ਦਸਮੇ ਕੇવਟ੍ਟਾ ਮਞ੍ਞੇ ਮਚ੍ਛવਿਲੋਪੇਤਿ ਕੇવਟ੍ਟਾਨਂ ਮਚ੍ਛਪਚ੍ਛਿਂ ਓਤਾਰੇਤ੍વਾ ਠਿਤਟ੍ਠਾਨੇ ਜਾਲੇ વਾ ਉਦਕਤੋ ਉਕ੍ਖਿਤ੍ਤਮਤ੍ਤੇ ਮਚ੍ਛਗ੍ਗਾਹਕਾਨਂ ਮਹਾਸਦ੍ਦੋ ਹੋਤਿ, ਤਂ ਸਨ੍ਧਾਯੇਤਂ વੁਤ੍ਤਂ। ਸੁਜਾਤਾਤਿ વਿਸਾਖਾਯ ਕਨਿਟ੍ਠਾ। ਸਾ ਨੇવ ਸਸ੍ਸੁਂ ਆਦਿਯਤੀਤਿ ਸਸ੍ਸੁਯਾ ਕਤ੍ਤਬ੍ਬવਤ੍ਤਂ ਨਾਮ ਅਤ੍ਥਿ, ਤਂ ਨ ਕਰੋਤਿ, ਸਸ੍ਸੂਤਿਪਿ ਨਂ ਨ ਗਣੇਤਿ। ਨ ਸਸੁਰਂ ਆਦਿਯਤੀਤਿ વਚਨਂ ਨ ਗਣ੍ਹਾਤਿ। ਏવਂ ਅਨਾਦਰਤਾਯਪਿ ਅਗ੍ਗਹਣੇਨਪਿ ਨ ਆਦਿਯਤਿ ਨਾਮ। ਸੇਸੇਸੁਪਿ ਏਸੇવ ਨਯੋ। ਏવਂ ਅਨਾਥਪਿਣ੍ਡਿਕੋ ਸੁਣਿਸਾਯ ਆਚਾਰਂ ਗਹੇਤ੍વਾ ਸਤ੍ਥੁ ਪੁਰਤੋ ਨਿਸੀਦਿ। ਸਾਪਿ ਸੁਜਾਤਾ ‘‘ਕਿਂ ਨੁ ਖੋ ਅਯਂ ਸੇਟ੍ਠਿ ਦਸਬਲਸ੍ਸ ਸਨ੍ਤਿਕੇ ਮਯ੍ਹਂ ਗੁਣਂ ਕਥੇਸ੍ਸਤਿ ਉਦਾਹੁ ਅਗੁਣ’’ਨ੍ਤਿ ਗਨ੍ਤ੍વਾ ਅવਿਦੂਰੇ ਸਦ੍ਦਂ ਸੁਣਨ੍ਤੀ ਅਟ੍ਠਾਸਿ। ਅਥ ਨਂ ਸਤ੍ਥਾ ਏਹਿ ਸੁਜਾਤੇਤਿ ਆਮਨ੍ਤੇਸਿ।
63. Dasame kevaṭṭā maññe macchavilopeti kevaṭṭānaṃ macchapacchiṃ otāretvā ṭhitaṭṭhāne jāle vā udakato ukkhittamatte macchaggāhakānaṃ mahāsaddo hoti, taṃ sandhāyetaṃ vuttaṃ. Sujātāti visākhāya kaniṭṭhā. Sā neva sassuṃ ādiyatīti sassuyā kattabbavattaṃ nāma atthi, taṃ na karoti, sassūtipi naṃ na gaṇeti. Na sasuraṃ ādiyatīti vacanaṃ na gaṇhāti. Evaṃ anādaratāyapi aggahaṇenapi na ādiyati nāma. Sesesupi eseva nayo. Evaṃ anāthapiṇḍiko suṇisāya ācāraṃ gahetvā satthu purato nisīdi. Sāpi sujātā ‘‘kiṃ nu kho ayaṃ seṭṭhi dasabalassa santike mayhaṃ guṇaṃ kathessati udāhu aguṇa’’nti gantvā avidūre saddaṃ suṇantī aṭṭhāsi. Atha naṃ satthā ehi sujāteti āmantesi.
ਅਹਿਤਾਨੁਕਮ੍ਪਿਨੀਤਿ ਨ ਹਿਤਾਨੁਕਮ੍ਪਿਨੀ। ਅਞ੍ਞੇਸੂਤਿ ਪਰਪੁਰਿਸੇਸੁ। ਅਤਿਮਞ੍ਞਤੇਤਿ ਓਮਾਨਾਤਿ ਮਾਨવਸੇਨ ਅਤਿਮਞ੍ਞਤਿ। ਧਨੇਨ ਕੀਤਸ੍ਸਾਤਿ ਧਨੇਨ ਕੀਤਾ ਅਸ੍ਸ। વਧਾਯ ਉਸ੍ਸੁਕਾ વਧਿਤੁਂ ਉਸ੍ਸੁਕ੍ਕਮਾਪਨ੍ਨਾ। ਯਂ ਇਤ੍ਥਿਯਾ વਿਨ੍ਦਤਿ ਸਾਮਿਕੋ ਧਨਨ੍ਤਿ ਇਤ੍ਥਿਯਾ ਸਾਮਿਕੋ ਯਂ ਧਨਂ ਲਭਤਿ। ਅਪ੍ਪਮ੍ਪਿ ਤਸ੍ਸ ਅਪਹਾਤੁਮਿਚ੍ਛਤੀਤਿ ਥੋਕਤੋਪਿ ਅਸ੍ਸ ਹਰਿਤੁਂ ਇਚ੍ਛਤਿ, ਉਦ੍ਧਨੇ ਆਰੋਪਿਤਉਕ੍ਖਲਿਯਂ ਪਕ੍ਖਿਪਿਤਬ੍ਬਤਣ੍ਡੁਲਤੋਪਿ ਥੋਕਂ ਹਰਿਤੁਮੇવ વਾਯਮਤਿ। ਅਲਸਾਤਿ ਨਿਸਿਨ੍ਨਟ੍ਠਾਨੇ ਨਿਸਿਨ੍ਨਾવ ਠਿਤਟ੍ਠਾਨੇ ਠਿਤਾવ ਹੋਤਿ। ਫਰੁਸਾਤਿ ਖਰਾ। ਦੁਰੁਤ੍ਤવਾਦਿਨੀਤਿ ਦੁਬ੍ਭਾਸਿਤਭਾਸਿਨੀ, ਕਕ੍ਖਲ਼ਂ વਾਲ਼ਕਥਮੇવ ਕਥੇਤਿ। ਉਟ੍ਠਾਯਕਾਨਂ ਅਭਿਭੁਯ੍ਯ વਤ੍ਤਤੀਤਿ ਏਤ੍ਥ ਉਟ੍ਠਾਯਕਾਨਨ੍ਤਿ ਬਹੁવਚਨવਸੇਨ વਿਰਿਯੁਟ੍ਠਾਨਸਮ੍ਪਨ੍ਨੋ ਸਾਮਿਕੋ વੁਤ੍ਤੋ, ਤਸ੍ਸ ਤਂ ਉਟ੍ਠਾਨਸਮ੍ਪਤ੍ਤਿਂ ਅਭਿਭવਿਤ੍વਾ ਹੇਟ੍ਠਾ ਕਤ੍વਾ વਤ੍ਤਤਿ। ਪਮੋਦਤੀਤਿ ਆਮੋਦਿਤਪਮੋਦਿਤਾ ਹੋਤਿ । ਕੋਲੇਯ੍ਯਕਾਤਿ ਕੁਲਸਮ੍ਪਨ੍ਨਾ। ਪਤਿਬ੍ਬਤਾਤਿ ਪਤਿਦੇવਤਾ। વਧਦਣ੍ਡਤਜ੍ਜਿਤਾਤਿ ਦਣ੍ਡਕਂ ਗਹੇਤ੍વਾ વਧੇਨ ਤਜ੍ਜਿਤਾ, ‘‘ਘਾਤੇਸ੍ਸਾਮਿ ਨ’’ਨ੍ਤਿ વੁਤ੍ਤਾ। ਦਾਸੀਸਮਨ੍ਤਿ ਸਾਮਿਕਸ੍ਸ વਤ੍ਤਪੂਰਿਕਾ ਦਾਸੀਤਿ ਮਂ ਭਗવਾ ਧਾਰੇਤੂਤਿ વਤ੍વਾ ਸਰਣੇਸੁ ਪਤਿਟ੍ਠਾਸਿ।
Ahitānukampinīti na hitānukampinī. Aññesūti parapurisesu. Atimaññateti omānāti mānavasena atimaññati. Dhanena kītassāti dhanena kītā assa. Vadhāya ussukā vadhituṃ ussukkamāpannā. Yaṃ itthiyā vindati sāmiko dhananti itthiyā sāmiko yaṃ dhanaṃ labhati. Appampi tassa apahātumicchatīti thokatopi assa harituṃ icchati, uddhane āropitaukkhaliyaṃ pakkhipitabbataṇḍulatopi thokaṃ haritumeva vāyamati. Alasāti nisinnaṭṭhāne nisinnāva ṭhitaṭṭhāne ṭhitāva hoti. Pharusāti kharā. Duruttavādinīti dubbhāsitabhāsinī, kakkhaḷaṃ vāḷakathameva katheti. Uṭṭhāyakānaṃ abhibhuyya vattatīti ettha uṭṭhāyakānanti bahuvacanavasena viriyuṭṭhānasampanno sāmiko vutto, tassa taṃ uṭṭhānasampattiṃ abhibhavitvā heṭṭhā katvā vattati. Pamodatīti āmoditapamoditā hoti . Koleyyakāti kulasampannā. Patibbatāti patidevatā. Vadhadaṇḍatajjitāti daṇḍakaṃ gahetvā vadhena tajjitā, ‘‘ghātessāmi na’’nti vuttā. Dāsīsamanti sāmikassa vattapūrikā dāsīti maṃ bhagavā dhāretūti vatvā saraṇesu patiṭṭhāsi.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧੦. ਭਰਿਯਾਸੁਤ੍ਤਂ • 10. Bhariyāsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧੦. ਭਰਿਯਾਸੁਤ੍ਤવਣ੍ਣਨਾ • 10. Bhariyāsuttavaṇṇanā
