| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
5. ப⁴த்தக்³க³வத்தகதா²
5. Bhattaggavattakathā
363. தேன கோ² பன ஸமயேன ச²ப்³ப³க்³கி³யா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா ப⁴த்தக்³க³ங் க³ச்ச²ந்தி, வோக்கம்மபி தே²ரானங் பி⁴க்கூ²னங் புரதோ புரதோ க³ச்ச²ந்தி, தே²ரேபி பி⁴க்கூ² அனுபக²ஜ்ஜ நிஸீத³ந்தி , நவேபி பி⁴க்கூ² ஆஸனேன படிபா³ஹந்தி, ஸங்கா⁴டிம்பி ஒத்த²ரித்வா அந்தரக⁴ரே நிஸீத³ந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா ப⁴த்தக்³க³ங் க³ச்சி²ஸ்ஸந்தி, வோக்கம்மபி தே²ரானங் பி⁴க்கூ²னங் புரதோ புரதோ க³ச்சி²ஸ்ஸந்தி, தே²ரேபி பி⁴க்கூ² அனுபக²ஜ்ஜ நிஸீதி³ஸ்ஸந்தி, நவேபி பி⁴க்கூ² ஆஸனேனபி படிபா³ஹிஸ்ஸந்தி, ஸங்கா⁴டிம்பி ஒத்த²ரித்வா அந்தரக⁴ரே நிஸீதி³ஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கூ² து³ன்னிவத்தா² து³ப்பாருதா அனாகப்பஸம்பன்னா ப⁴த்தக்³க³ங் க³ச்ச²ந்தி, வோக்கம்மபி தே²ரானங் பி⁴க்கூ²னங் புரதோ புரதோ க³ச்ச²ந்தி, தே²ரேபி பி⁴க்கூ² அனுபக²ஜ்ஜ நிஸீத³ந்தி, நவேபி பி⁴க்கூ² ஆஸனேன படிபா³ஹந்தி, ஸங்கா⁴டிம்பி ஒத்த²ரித்வா அந்தரக⁴ரே நிஸீத³ந்தீ’’தி? ‘‘ஸச்சங் ப⁴க³வா’’தி…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி –
363. Tena kho pana samayena chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti , navepi bhikkhū āsanena paṭibāhanti, saṅghāṭimpi ottharitvā antaraghare nisīdanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū dunnivatthā duppārutā anākappasampannā bhattaggaṃ gacchissanti, vokkammapi therānaṃ bhikkhūnaṃ purato purato gacchissanti, therepi bhikkhū anupakhajja nisīdissanti, navepi bhikkhū āsanenapi paṭibāhissanti, saṅghāṭimpi ottharitvā antaraghare nisīdissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti, navepi bhikkhū āsanena paṭibāhanti, saṅghāṭimpi ottharitvā antaraghare nisīdantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
364. ‘‘தேன ஹி, பி⁴க்க²வே, பி⁴க்கூ²னங் ப⁴த்தக்³க³வத்தங் பஞ்ஞபெஸ்ஸாமி யதா² பி⁴க்கூ²ஹி ப⁴த்தக்³கே³ ஸம்மா வத்திதப்³ப³ங். ஸசே ஆராமே காலோ ஆரோசிதோ ஹோதி, திமண்ட³லங் படிச்சா²தெ³ந்தேன பரிமண்ட³லங் நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா க³ண்டி²கங் படிமுஞ்சித்வா தோ⁴வித்வா பத்தங் க³ஹெத்வா ஸாது⁴கங் அதரமானேன கா³மோ பவிஸிதப்³போ³.
364. ‘‘Tena hi, bhikkhave, bhikkhūnaṃ bhattaggavattaṃ paññapessāmi yathā bhikkhūhi bhattagge sammā vattitabbaṃ. Sace ārāme kālo ārocito hoti, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
‘‘ந வோக்கம்ம தே²ரானங் பி⁴க்கூ²னங் புரதோ புரதோ க³ந்தப்³ப³ங். ஸுப்படிச்ச²ன்னேன அந்தரக⁴ரே க³ந்தப்³ப³ங். ஸுஸங்வுதேன அந்தரக⁴ரே க³ந்தப்³ப³ங். ஒக்கி²த்தசக்கு²னா அந்தரக⁴ரே க³ந்தப்³ப³ங். ந உக்கி²த்தகாய அந்தரக⁴ரே க³ந்தப்³ப³ங். ந உஜ்ஜக்³கி⁴காய அந்தரக⁴ரே க³ந்தப்³ப³ங். அப்பஸத்³தே³ன அந்தரக⁴ரே க³ந்தப்³ப³ங். ந காயப்பசாலகங் அந்தரக⁴ரே க³ந்தப்³ப³ங் . ந பா³ஹுப்பசாலகங் அந்தரக⁴ரே க³ந்தப்³ப³ங். ந ஸீஸப்பசாலகங் அந்தரக⁴ரே க³ந்தப்³ப³ங். ந க²ம்ப⁴கதேன அந்தரக⁴ரே க³ந்தப்³ப³ங். ந ஓகு³ண்டி²தேன அந்தரக⁴ரே க³ந்தப்³ப³ங். ந உக்குடிகாய அந்தரக⁴ரே க³ந்தப்³ப³ங்.
‘‘Na vokkamma therānaṃ bhikkhūnaṃ purato purato gantabbaṃ. Suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ . Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘ஸுப்படிச்ச²ன்னேன அந்தரக⁴ரே நிஸீதி³தப்³ப³ங். ஸுஸங்வுதேன அந்தரக⁴ரே நிஸீதி³தப்³ப³ங். ஒக்கி²த்தசக்கு²னா அந்தரக⁴ரே நிஸீதி³தப்³ப³ங். ந உக்கி²த்தகாய அந்தரக⁴ரே நிஸீதி³தப்³ப³ங் ந உஜ்ஜக்³கி⁴காய அந்தரக⁴ரே நிஸீதி³தப்³ப³ங், அப்பஸத்³தே³ன அந்தரக⁴ரே நிஸீதி³தப்³ப³. ந காயப்பசாலகங் அந்தரக⁴ரே நிஸீதி³தப்³ப³ங். ந பா³ஹுப்பசாலகங் அந்தரக⁴ரே நிஸீதி³தப்³ப³ங். ந ஸீஸப்பசாலகங் அந்தரக⁴ரே நிஸீதி³தப்³ப³ங். ந க²ம்ப⁴கதேன அந்தரக⁴ரே நிஸீதி³தப்³ப³ங். ந ஓகு³ண்டி²தேன அந்தரக⁴ரே நிஸீதி³தப்³ப³ங். ந பல்லத்தி²காய அந்தரக⁴ரே நிஸீதி³தப்³ப³ங். ந தே²ரே பி⁴க்கூ² அனுபக²ஜ்ஜ நிஸீதி³தப்³ப³ங். ந நவா பி⁴க்கூ² ஆஸனேன படிபா³ஹிதப்³பா³. ந ஸங்கா⁴டிங் ஒத்த²ரித்வா அந்தரக⁴ரே நிஸீதி³தப்³ப³ங்.
‘‘Suppaṭicchannena antaraghare nisīditabbaṃ. Susaṃvutena antaraghare nisīditabbaṃ. Okkhittacakkhunā antaraghare nisīditabbaṃ. Na ukkhittakāya antaraghare nisīditabbaṃ na ujjagghikāya antaraghare nisīditabbaṃ, appasaddena antaraghare nisīditabba. Na kāyappacālakaṃ antaraghare nisīditabbaṃ. Na bāhuppacālakaṃ antaraghare nisīditabbaṃ. Na sīsappacālakaṃ antaraghare nisīditabbaṃ. Na khambhakatena antaraghare nisīditabbaṃ. Na oguṇṭhitena antaraghare nisīditabbaṃ. Na pallatthikāya antaraghare nisīditabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Na saṅghāṭiṃ ottharitvā antaraghare nisīditabbaṃ.
‘‘உத³கே தி³ய்யமானே உபோ⁴ஹி ஹத்தே²ஹி பத்தங் படிக்³க³ஹெத்வா உத³கங் படிக்³க³ஹேதப்³ப³ங். நீசங் கத்வா ஸாது⁴கங் அப்படிக⁴ங்ஸந்தேன பத்தோ தோ⁴விதப்³போ³. ஸசே உத³கப்படிக்³கா³ஹகோ ஹோதி, நீசங் கத்வா உத³கப்படிக்³க³ஹே உத³கங் ஆஸிஞ்சிதப்³ப³ங் – மா உத³கப்படிக்³கா³ஹகோ உத³கேன ஓஸிஞ்சி 1, மா ஸாமந்தா பி⁴க்கூ² உத³கேன ஓஸிஞ்சிங்ஸு 2, மா ஸங்கா⁴டி உத³கேன ஓஸிஞ்சீதி. ஸசே உத³கப்படிக்³கா³ஹகோ ந ஹோதி, நீசங் கத்வா ச²மாய உத³கங் ஆஸிஞ்சிதப்³ப³ங் – மா ஸாமந்தா பி⁴க்கூ² உத³கேன ஓஸிஞ்சிங்ஸு, மா ஸங்கா⁴டி உத³கேன ஓஸிஞ்சீதி.
‘‘Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci 3, mā sāmantā bhikkhū udakena osiñciṃsu 4, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti.
‘‘ஓத³னே தி³ய்யமானே உபோ⁴ஹி ஹத்தே²ஹி பத்தங் படிக்³க³ஹெத்வா ஓத³னோ படிக்³க³ஹேதப்³போ³, ஸூபஸ்ஸ ஓகாஸோ காதப்³போ³. ஸசே ஹோதி ஸப்பி வா தேலங் வா உத்தரிப⁴ங்க³ங் வா, தே²ரேன வத்தப்³போ³ – ‘ஸப்³பே³ஸங் ஸமகங் ஸம்பாதே³ஹீ’தி. ஸக்கச்சங் பிண்ட³பாதோ படிக்³க³ஹேதப்³போ³. பத்தஸஞ்ஞினா பிண்ட³பாதோ படிக்³க³ஹேதப்³போ³. ஸமஸூபகோ பிண்ட³பாதோ படிக்³க³ஹேதப்³போ³. ஸமதித்திகோ பிண்ட³பாதோ படிக்³க³ஹேதப்³போ³.
‘‘Odane diyyamāne ubhohi hatthehi pattaṃ paṭiggahetvā odano paṭiggahetabbo, sūpassa okāso kātabbo. Sace hoti sappi vā telaṃ vā uttaribhaṅgaṃ vā, therena vattabbo – ‘sabbesaṃ samakaṃ sampādehī’ti. Sakkaccaṃ piṇḍapāto paṭiggahetabbo. Pattasaññinā piṇḍapāto paṭiggahetabbo. Samasūpako piṇḍapāto paṭiggahetabbo. Samatittiko piṇḍapāto paṭiggahetabbo.
‘‘ந தாவ தே²ரேன பு⁴ஞ்ஜிதப்³ப³ங் யாவ ந ஸப்³பே³ஸங் ஓத³னோ ஸம்பத்தோ ஹோதி. ஸக்கச்சங் பிண்ட³பாதோ பு⁴ஞ்ஜிதப்³போ³. பத்தஸஞ்ஞினா பிண்ட³பாதோ பு⁴ஞ்ஜிதப்³போ³. ஸபதா³னங் பிண்ட³பாதோ பு⁴ஞ்ஜிதப்³போ³. ஸமஸூபகோ பிண்ட³பாதோ பு⁴ஞ்ஜிதப்³போ³ . ந தூ²பகதோ ஓமத்³தி³த்வா பிண்டி³பாதோ பு⁴ஞ்ஜிதப்³போ³. ந ஸூபங் வா ப்³யஞ்ஜனங் வா ஓத³னேன படிச்சா²தே³தப்³ப³ங் பி⁴ய்யோகம்யதங் உபாதா³ய. ந ஸூபங் வா ஓத³னங் வா அகி³லானேன அத்தனோ அத்தா²ய விஞ்ஞாபெத்வா பு⁴ஞ்ஜிதப்³ப³ங். ந உஜ்ஜா²னஸஞ்ஞினா பரேஸங் பத்தோ ஓலோகேதப்³போ³. நாதிமஹந்தோ கப³ளோ காதப்³போ³. பரிமண்ட³லோ ஆலோபோ காதப்³போ³. ந அனாஹடே கப³ளே முக²த்³வாரங் விவரிதப்³ப³ங். ந பு⁴ஞ்ஜமானேன ஸப்³போ³ ஹத்தோ² முகே² பக்கி²பிதப்³போ³. ந ஸகப³ளேன முகே²ன ப்³யாஹரிதப்³ப³ங். ந பிண்டு³க்கே²பகங் பு⁴ஞ்ஜிதப்³ப³ங். ந கப³ளாவச்சே²த³கங் பு⁴ஞ்ஜிதப்³ப³ங். ந அவக³ண்ட³காரகங் பு⁴ஞ்ஜிதப்³ப³ங். ந ஹத்த²னித்³து⁴னகங் பு⁴ஞ்ஜிதப்³ப³ங். ந ஸித்தா²வகாரகங் பு⁴ஞ்ஜிதப்³ப³ங். ந ஜிவ்ஹானிச்சா²ரகங் பு⁴ஞ்ஜிதப்³ப³ங். ந சபுசபுகாரகங் பு⁴ஞ்ஜிதப்³ப³ங். ந ஸுருஸுருகாரகங் பு⁴ஞ்ஜிதப்³ப³ங். ந ஹத்த²னில்லேஹகங் பு⁴ஞ்ஜிதப்³ப³ங். ந பத்தனில்லேஹகங் பு⁴ஞ்ஜிதப்³ப³ங். ந ஒட்ட²னில்லேஹகங் பு⁴ஞ்ஜிதப்³ப³ங்.
‘‘Na tāva therena bhuñjitabbaṃ yāva na sabbesaṃ odano sampatto hoti. Sakkaccaṃ piṇḍapāto bhuñjitabbo. Pattasaññinā piṇḍapāto bhuñjitabbo. Sapadānaṃ piṇḍapāto bhuñjitabbo. Samasūpako piṇḍapāto bhuñjitabbo . Na thūpakato omadditvā piṇḍipāto bhuñjitabbo. Na sūpaṃ vā byañjanaṃ vā odanena paṭicchādetabbaṃ bhiyyokamyataṃ upādāya. Na sūpaṃ vā odanaṃ vā agilānena attano atthāya viññāpetvā bhuñjitabbaṃ. Na ujjhānasaññinā paresaṃ patto oloketabbo. Nātimahanto kabaḷo kātabbo. Parimaṇḍalo ālopo kātabbo. Na anāhaṭe kabaḷe mukhadvāraṃ vivaritabbaṃ. Na bhuñjamānena sabbo hattho mukhe pakkhipitabbo. Na sakabaḷena mukhena byāharitabbaṃ. Na piṇḍukkhepakaṃ bhuñjitabbaṃ. Na kabaḷāvacchedakaṃ bhuñjitabbaṃ. Na avagaṇḍakārakaṃ bhuñjitabbaṃ. Na hatthaniddhunakaṃ bhuñjitabbaṃ. Na sitthāvakārakaṃ bhuñjitabbaṃ. Na jivhānicchārakaṃ bhuñjitabbaṃ. Na capucapukārakaṃ bhuñjitabbaṃ. Na surusurukārakaṃ bhuñjitabbaṃ. Na hatthanillehakaṃ bhuñjitabbaṃ. Na pattanillehakaṃ bhuñjitabbaṃ. Na oṭṭhanillehakaṃ bhuñjitabbaṃ.
‘‘ந ஸாமிஸேன ஹத்தே²ன பானீயதா²லகோ படிக்³க³ஹேதப்³போ³. ந தாவ தே²ரேன உத³கங் படிக்³க³ஹேதப்³ப³ங் யாவ ந ஸப்³பே³வ பு⁴த்தாவினோ ஹொந்தி. உத³கே தி³ய்யமானே உபோ⁴ஹி ஹத்தே²ஹி பத்தங் படிக்³க³ஹெத்வா உத³கங் படிக்³க³ஹேதப்³ப³ங். நீசங் கத்வா ஸாது⁴கங் அப்படிக⁴ங்ஸந்தேன பத்தோ தோ⁴விதப்³போ³. ஸசே உத³கப்படிக்³கா³ஹகோ ஹோதி, நீசங் கத்வா உத³கப்படிக்³க³ஹே உத³கங் ஆஸிஞ்சிதப்³ப³ங் – மா உத³கப்படிக்³கா³ஹகோ உத³கேன ஓஸிஞ்சி, மா ஸாமந்தா பி⁴க்கூ² உத³கேன ஓஸிஞ்சிங்ஸு, மா ஸங்கா⁴டி உத³கேன ஓஸிஞ்சீதி. ஸசே உத³கப்படிக்³கா³ஹகோ ந ஹோதி, நீசங் கத்வா ச²மாய உத³கங் ஆஸிஞ்சிதப்³ப³ங் – மா ஸாமந்தா பி⁴க்கூ² உத³கேன ஓஸிஞ்சிங்ஸு, மா ஸங்கா⁴டி உத³கேன ஓஸிஞ்சீதி. ந ஸஸித்த²கங் பத்ததோ⁴வனங் அந்தரக⁴ரே ச²ட்³டே³தப்³ப³ங்.
‘‘Na sāmisena hatthena pānīyathālako paṭiggahetabbo. Na tāva therena udakaṃ paṭiggahetabbaṃ yāva na sabbeva bhuttāvino honti. Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci, mā sāmantā bhikkhū udakena osiñciṃsu, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti. Na sasitthakaṃ pattadhovanaṃ antaraghare chaḍḍetabbaṃ.
‘‘நிவத்தந்தேன நவகேஹி பி⁴க்கூ²ஹி பட²மதரங் நிவத்திதப்³ப³ங். பச்சா² தே²ரேஹி ஸுப்படிச்ச²ன்னேன அந்தரக⁴ரே க³ந்தப்³ப³ங். ஸுஸங்வுதேன அந்தரக⁴ரே க³ந்தப்³ப³ங். ஒக்கி²த்தசக்கு²னா அந்தரக⁴ரே க³ந்தப்³ப³ங். ந உக்கி²த்தகாய அந்தரக⁴ரே க³ந்தப்³ப³ங். ந உஜ்ஜக்³கி⁴காய அந்தரக⁴ரே க³ந்தப்³ப³ங். அப்பஸத்³தே³ன அந்தரக⁴ரே க³ந்தப்³ப³ங். ந காயப்பசாலகங் அந்தரக⁴ரே க³ந்தப்³ப³ங். ந பா³ஹுப்பசாலகங் அந்தரக⁴ரே க³ந்தப்³ப³ங் . ந ஸீஸப்பசாலகங் அந்தரக⁴ரே க³ந்தப்³ப³ங். ந க²ம்ப⁴கதேன அந்தரக⁴ரே க³ந்தப்³ப³ங். ந ஓகு³ண்டி²தேன அந்தரக⁴ரே க³ந்தப்³ப³ங். ந உக்குடிகாய அந்தரக⁴ரே க³ந்தப்³ப³ங். இத³ங் கோ², பி⁴க்க²வே, பி⁴க்கூ²னங் ப⁴த்தக்³க³வத்தங் யதா² பி⁴க்கூ²ஹி ப⁴த்தக்³கே³ ஸம்மா வத்திதப்³ப³’’ந்தி.
‘‘Nivattantena navakehi bhikkhūhi paṭhamataraṃ nivattitabbaṃ. Pacchā therehi suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ . Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ. Idaṃ kho, bhikkhave, bhikkhūnaṃ bhattaggavattaṃ yathā bhikkhūhi bhattagge sammā vattitabba’’nti.
பட²மபா⁴ணவாரோ நிட்டி²தோ.
Paṭhamabhāṇavāro niṭṭhito.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ப⁴த்தக்³க³வத்தகதா² • Bhattaggavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ப⁴த்தக்³க³வத்தகதா²வண்ணனா • Bhattaggavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / அனுமோத³னவத்தகதா²வண்ணனா • Anumodanavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ப⁴த்தக்³க³வத்தகதா²வண்ணனா • Bhattaggavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. ப⁴த்தக்³க³வத்தகதா² • 5. Bhattaggavattakathā
