| Library / Tipiṭaka / তিপিটক • Tipiṭaka / চূল়ৰগ্গপাল়ি • Cūḷavaggapāḷi |
৫. ভত্তগ্গৰত্তকথা
5. Bhattaggavattakathā
৩৬৩. তেন খো পন সমযেন ছব্বগ্গিযা ভিক্খূ দুন্নিৰত্থা দুপ্পারুতা অনাকপ্পসম্পন্না ভত্তগ্গং গচ্ছন্তি, ৰোক্কম্মপি থেরানং ভিক্খূনং পুরতো পুরতো গচ্ছন্তি, থেরেপি ভিক্খূ অনুপখজ্জ নিসীদন্তি , নৰেপি ভিক্খূ আসনেন পটিবাহন্তি, সঙ্ঘাটিম্পি ওত্থরিত্ৰা অন্তরঘরে নিসীদন্তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ দুন্নিৰত্থা দুপ্পারুতা অনাকপ্পসম্পন্না ভত্তগ্গং গচ্ছিস্সন্তি, ৰোক্কম্মপি থেরানং ভিক্খূনং পুরতো পুরতো গচ্ছিস্সন্তি, থেরেপি ভিক্খূ অনুপখজ্জ নিসীদিস্সন্তি, নৰেপি ভিক্খূ আসনেনপি পটিবাহিস্সন্তি, সঙ্ঘাটিম্পি ওত্থরিত্ৰা অন্তরঘরে নিসীদিস্সন্তী’’তি! অথ খো তে ভিক্খূ ভগৰতো এতমত্থং আরোচেসুং…পে॰… ‘‘সচ্চং কির, ভিক্খৰে, ছব্বগ্গিযা ভিক্খূ দুন্নিৰত্থা দুপ্পারুতা অনাকপ্পসম্পন্না ভত্তগ্গং গচ্ছন্তি, ৰোক্কম্মপি থেরানং ভিক্খূনং পুরতো পুরতো গচ্ছন্তি, থেরেপি ভিক্খূ অনুপখজ্জ নিসীদন্তি, নৰেপি ভিক্খূ আসনেন পটিবাহন্তি, সঙ্ঘাটিম্পি ওত্থরিত্ৰা অন্তরঘরে নিসীদন্তী’’তি? ‘‘সচ্চং ভগৰা’’তি…পে॰… ৰিগরহিত্ৰা…পে॰… ধম্মিং কথং কত্ৰা ভিক্খূ আমন্তেসি –
363. Tena kho pana samayena chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti , navepi bhikkhū āsanena paṭibāhanti, saṅghāṭimpi ottharitvā antaraghare nisīdanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū dunnivatthā duppārutā anākappasampannā bhattaggaṃ gacchissanti, vokkammapi therānaṃ bhikkhūnaṃ purato purato gacchissanti, therepi bhikkhū anupakhajja nisīdissanti, navepi bhikkhū āsanenapi paṭibāhissanti, saṅghāṭimpi ottharitvā antaraghare nisīdissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti, navepi bhikkhū āsanena paṭibāhanti, saṅghāṭimpi ottharitvā antaraghare nisīdantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
৩৬৪. ‘‘তেন হি, ভিক্খৰে, ভিক্খূনং ভত্তগ্গৰত্তং পঞ্ঞপেস্সামি যথা ভিক্খূহি ভত্তগ্গে সম্মা ৰত্তিতব্বং। সচে আরামে কালো আরোচিতো হোতি, তিমণ্ডলং পটিচ্ছাদেন্তেন পরিমণ্ডলং নিৰাসেত্ৰা কাযবন্ধনং বন্ধিত্ৰা সগুণং কত্ৰা সঙ্ঘাটিযো পারুপিত্ৰা গণ্ঠিকং পটিমুঞ্চিত্ৰা ধোৰিত্ৰা পত্তং গহেত্ৰা সাধুকং অতরমানেন গামো পৰিসিতব্বো।
364. ‘‘Tena hi, bhikkhave, bhikkhūnaṃ bhattaggavattaṃ paññapessāmi yathā bhikkhūhi bhattagge sammā vattitabbaṃ. Sace ārāme kālo ārocito hoti, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
‘‘ন ৰোক্কম্ম থেরানং ভিক্খূনং পুরতো পুরতো গন্তব্বং। সুপ্পটিচ্ছন্নেন অন্তরঘরে গন্তব্বং। সুসংৰুতেন অন্তরঘরে গন্তব্বং। ওক্খিত্তচক্খুনা অন্তরঘরে গন্তব্বং। ন উক্খিত্তকায অন্তরঘরে গন্তব্বং। ন উজ্জগ্ঘিকায অন্তরঘরে গন্তব্বং। অপ্পসদ্দেন অন্তরঘরে গন্তব্বং। ন কাযপ্পচালকং অন্তরঘরে গন্তব্বং । ন বাহুপ্পচালকং অন্তরঘরে গন্তব্বং। ন সীসপ্পচালকং অন্তরঘরে গন্তব্বং। ন খম্ভকতেন অন্তরঘরে গন্তব্বং। ন ওগুণ্ঠিতেন অন্তরঘরে গন্তব্বং। ন উক্কুটিকায অন্তরঘরে গন্তব্বং।
‘‘Na vokkamma therānaṃ bhikkhūnaṃ purato purato gantabbaṃ. Suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ . Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘সুপ্পটিচ্ছন্নেন অন্তরঘরে নিসীদিতব্বং। সুসংৰুতেন অন্তরঘরে নিসীদিতব্বং। ওক্খিত্তচক্খুনা অন্তরঘরে নিসীদিতব্বং। ন উক্খিত্তকায অন্তরঘরে নিসীদিতব্বং ন উজ্জগ্ঘিকায অন্তরঘরে নিসীদিতব্বং, অপ্পসদ্দেন অন্তরঘরে নিসীদিতব্ব। ন কাযপ্পচালকং অন্তরঘরে নিসীদিতব্বং। ন বাহুপ্পচালকং অন্তরঘরে নিসীদিতব্বং। ন সীসপ্পচালকং অন্তরঘরে নিসীদিতব্বং। ন খম্ভকতেন অন্তরঘরে নিসীদিতব্বং। ন ওগুণ্ঠিতেন অন্তরঘরে নিসীদিতব্বং। ন পল্লত্থিকায অন্তরঘরে নিসীদিতব্বং। ন থেরে ভিক্খূ অনুপখজ্জ নিসীদিতব্বং। ন নৰা ভিক্খূ আসনেন পটিবাহিতব্বা। ন সঙ্ঘাটিং ওত্থরিত্ৰা অন্তরঘরে নিসীদিতব্বং।
‘‘Suppaṭicchannena antaraghare nisīditabbaṃ. Susaṃvutena antaraghare nisīditabbaṃ. Okkhittacakkhunā antaraghare nisīditabbaṃ. Na ukkhittakāya antaraghare nisīditabbaṃ na ujjagghikāya antaraghare nisīditabbaṃ, appasaddena antaraghare nisīditabba. Na kāyappacālakaṃ antaraghare nisīditabbaṃ. Na bāhuppacālakaṃ antaraghare nisīditabbaṃ. Na sīsappacālakaṃ antaraghare nisīditabbaṃ. Na khambhakatena antaraghare nisīditabbaṃ. Na oguṇṭhitena antaraghare nisīditabbaṃ. Na pallatthikāya antaraghare nisīditabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Na saṅghāṭiṃ ottharitvā antaraghare nisīditabbaṃ.
‘‘উদকে দিয্যমানে উভোহি হত্থেহি পত্তং পটিগ্গহেত্ৰা উদকং পটিগ্গহেতব্বং। নীচং কত্ৰা সাধুকং অপ্পটিঘংসন্তেন পত্তো ধোৰিতব্বো। সচে উদকপ্পটিগ্গাহকো হোতি, নীচং কত্ৰা উদকপ্পটিগ্গহে উদকং আসিঞ্চিতব্বং – মা উদকপ্পটিগ্গাহকো উদকেন ওসিঞ্চি 1, মা সামন্তা ভিক্খূ উদকেন ওসিঞ্চিংসু 2, মা সঙ্ঘাটি উদকেন ওসিঞ্চীতি। সচে উদকপ্পটিগ্গাহকো ন হোতি, নীচং কত্ৰা ছমায উদকং আসিঞ্চিতব্বং – মা সামন্তা ভিক্খূ উদকেন ওসিঞ্চিংসু, মা সঙ্ঘাটি উদকেন ওসিঞ্চীতি।
‘‘Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci 3, mā sāmantā bhikkhū udakena osiñciṃsu 4, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti.
‘‘ওদনে দিয্যমানে উভোহি হত্থেহি পত্তং পটিগ্গহেত্ৰা ওদনো পটিগ্গহেতব্বো, সূপস্স ওকাসো কাতব্বো। সচে হোতি সপ্পি ৰা তেলং ৰা উত্তরিভঙ্গং ৰা, থেরেন ৰত্তব্বো – ‘সব্বেসং সমকং সম্পাদেহী’তি। সক্কচ্চং পিণ্ডপাতো পটিগ্গহেতব্বো। পত্তসঞ্ঞিনা পিণ্ডপাতো পটিগ্গহেতব্বো। সমসূপকো পিণ্ডপাতো পটিগ্গহেতব্বো। সমতিত্তিকো পিণ্ডপাতো পটিগ্গহেতব্বো।
‘‘Odane diyyamāne ubhohi hatthehi pattaṃ paṭiggahetvā odano paṭiggahetabbo, sūpassa okāso kātabbo. Sace hoti sappi vā telaṃ vā uttaribhaṅgaṃ vā, therena vattabbo – ‘sabbesaṃ samakaṃ sampādehī’ti. Sakkaccaṃ piṇḍapāto paṭiggahetabbo. Pattasaññinā piṇḍapāto paṭiggahetabbo. Samasūpako piṇḍapāto paṭiggahetabbo. Samatittiko piṇḍapāto paṭiggahetabbo.
‘‘ন তাৰ থেরেন ভুঞ্জিতব্বং যাৰ ন সব্বেসং ওদনো সম্পত্তো হোতি। সক্কচ্চং পিণ্ডপাতো ভুঞ্জিতব্বো। পত্তসঞ্ঞিনা পিণ্ডপাতো ভুঞ্জিতব্বো। সপদানং পিণ্ডপাতো ভুঞ্জিতব্বো। সমসূপকো পিণ্ডপাতো ভুঞ্জিতব্বো । ন থূপকতো ওমদ্দিত্ৰা পিণ্ডিপাতো ভুঞ্জিতব্বো। ন সূপং ৰা ব্যঞ্জনং ৰা ওদনেন পটিচ্ছাদেতব্বং ভিয্যোকম্যতং উপাদায। ন সূপং ৰা ওদনং ৰা অগিলানেন অত্তনো অত্থায ৰিঞ্ঞাপেত্ৰা ভুঞ্জিতব্বং। ন উজ্ঝানসঞ্ঞিনা পরেসং পত্তো ওলোকেতব্বো। নাতিমহন্তো কবল়ো কাতব্বো। পরিমণ্ডলো আলোপো কাতব্বো। ন অনাহটে কবল়ে মুখদ্ৰারং ৰিৰরিতব্বং। ন ভুঞ্জমানেন সব্বো হত্থো মুখে পক্খিপিতব্বো। ন সকবল়েন মুখেন ব্যাহরিতব্বং। ন পিণ্ডুক্খেপকং ভুঞ্জিতব্বং। ন কবল়াৰচ্ছেদকং ভুঞ্জিতব্বং। ন অৰগণ্ডকারকং ভুঞ্জিতব্বং। ন হত্থনিদ্ধুনকং ভুঞ্জিতব্বং। ন সিত্থাৰকারকং ভুঞ্জিতব্বং। ন জিৰ্হানিচ্ছারকং ভুঞ্জিতব্বং। ন চপুচপুকারকং ভুঞ্জিতব্বং। ন সুরুসুরুকারকং ভুঞ্জিতব্বং। ন হত্থনিল্লেহকং ভুঞ্জিতব্বং। ন পত্তনিল্লেহকং ভুঞ্জিতব্বং। ন ওট্ঠনিল্লেহকং ভুঞ্জিতব্বং।
‘‘Na tāva therena bhuñjitabbaṃ yāva na sabbesaṃ odano sampatto hoti. Sakkaccaṃ piṇḍapāto bhuñjitabbo. Pattasaññinā piṇḍapāto bhuñjitabbo. Sapadānaṃ piṇḍapāto bhuñjitabbo. Samasūpako piṇḍapāto bhuñjitabbo . Na thūpakato omadditvā piṇḍipāto bhuñjitabbo. Na sūpaṃ vā byañjanaṃ vā odanena paṭicchādetabbaṃ bhiyyokamyataṃ upādāya. Na sūpaṃ vā odanaṃ vā agilānena attano atthāya viññāpetvā bhuñjitabbaṃ. Na ujjhānasaññinā paresaṃ patto oloketabbo. Nātimahanto kabaḷo kātabbo. Parimaṇḍalo ālopo kātabbo. Na anāhaṭe kabaḷe mukhadvāraṃ vivaritabbaṃ. Na bhuñjamānena sabbo hattho mukhe pakkhipitabbo. Na sakabaḷena mukhena byāharitabbaṃ. Na piṇḍukkhepakaṃ bhuñjitabbaṃ. Na kabaḷāvacchedakaṃ bhuñjitabbaṃ. Na avagaṇḍakārakaṃ bhuñjitabbaṃ. Na hatthaniddhunakaṃ bhuñjitabbaṃ. Na sitthāvakārakaṃ bhuñjitabbaṃ. Na jivhānicchārakaṃ bhuñjitabbaṃ. Na capucapukārakaṃ bhuñjitabbaṃ. Na surusurukārakaṃ bhuñjitabbaṃ. Na hatthanillehakaṃ bhuñjitabbaṃ. Na pattanillehakaṃ bhuñjitabbaṃ. Na oṭṭhanillehakaṃ bhuñjitabbaṃ.
‘‘ন সামিসেন হত্থেন পানীযথালকো পটিগ্গহেতব্বো। ন তাৰ থেরেন উদকং পটিগ্গহেতব্বং যাৰ ন সব্বেৰ ভুত্তাৰিনো হোন্তি। উদকে দিয্যমানে উভোহি হত্থেহি পত্তং পটিগ্গহেত্ৰা উদকং পটিগ্গহেতব্বং। নীচং কত্ৰা সাধুকং অপ্পটিঘংসন্তেন পত্তো ধোৰিতব্বো। সচে উদকপ্পটিগ্গাহকো হোতি, নীচং কত্ৰা উদকপ্পটিগ্গহে উদকং আসিঞ্চিতব্বং – মা উদকপ্পটিগ্গাহকো উদকেন ওসিঞ্চি, মা সামন্তা ভিক্খূ উদকেন ওসিঞ্চিংসু, মা সঙ্ঘাটি উদকেন ওসিঞ্চীতি। সচে উদকপ্পটিগ্গাহকো ন হোতি, নীচং কত্ৰা ছমায উদকং আসিঞ্চিতব্বং – মা সামন্তা ভিক্খূ উদকেন ওসিঞ্চিংসু, মা সঙ্ঘাটি উদকেন ওসিঞ্চীতি। ন সসিত্থকং পত্তধোৰনং অন্তরঘরে ছড্ডেতব্বং।
‘‘Na sāmisena hatthena pānīyathālako paṭiggahetabbo. Na tāva therena udakaṃ paṭiggahetabbaṃ yāva na sabbeva bhuttāvino honti. Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci, mā sāmantā bhikkhū udakena osiñciṃsu, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti. Na sasitthakaṃ pattadhovanaṃ antaraghare chaḍḍetabbaṃ.
‘‘নিৰত্তন্তেন নৰকেহি ভিক্খূহি পঠমতরং নিৰত্তিতব্বং। পচ্ছা থেরেহি সুপ্পটিচ্ছন্নেন অন্তরঘরে গন্তব্বং। সুসংৰুতেন অন্তরঘরে গন্তব্বং। ওক্খিত্তচক্খুনা অন্তরঘরে গন্তব্বং। ন উক্খিত্তকায অন্তরঘরে গন্তব্বং। ন উজ্জগ্ঘিকায অন্তরঘরে গন্তব্বং। অপ্পসদ্দেন অন্তরঘরে গন্তব্বং। ন কাযপ্পচালকং অন্তরঘরে গন্তব্বং। ন বাহুপ্পচালকং অন্তরঘরে গন্তব্বং । ন সীসপ্পচালকং অন্তরঘরে গন্তব্বং। ন খম্ভকতেন অন্তরঘরে গন্তব্বং। ন ওগুণ্ঠিতেন অন্তরঘরে গন্তব্বং। ন উক্কুটিকায অন্তরঘরে গন্তব্বং। ইদং খো, ভিক্খৰে, ভিক্খূনং ভত্তগ্গৰত্তং যথা ভিক্খূহি ভত্তগ্গে সম্মা ৰত্তিতব্ব’’ন্তি।
‘‘Nivattantena navakehi bhikkhūhi paṭhamataraṃ nivattitabbaṃ. Pacchā therehi suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ . Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ. Idaṃ kho, bhikkhave, bhikkhūnaṃ bhattaggavattaṃ yathā bhikkhūhi bhattagge sammā vattitabba’’nti.
পঠমভাণৰারো নিট্ঠিতো।
Paṭhamabhāṇavāro niṭṭhito.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / ভত্তগ্গৰত্তকথা • Bhattaggavattakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ভত্তগ্গৰত্তকথাৰণ্ণনা • Bhattaggavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অনুমোদনৰত্তকথাৰণ্ণনা • Anumodanavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ভত্তগ্গৰত্তকথাৰণ্ণনা • Bhattaggavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. ভত্তগ্গৰত্তকথা • 5. Bhattaggavattakathā
