| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
၅. ဘတ္တဂ္ဂဝတ္တကထာ
5. Bhattaggavattakathā
၃၆၃. တေန ခော ပန သမယေန ဆဗ္ဗဂ္ဂိယာ ဘိက္ခူ ဒုန္နိဝတ္ထာ ဒုပ္ပာရုတာ အနာကပ္ပသမ္ပန္နာ ဘတ္တဂ္ဂံ ဂစ္ဆန္တိ, ဝောက္ကမ္မပိ ထေရာနံ ဘိက္ခူနံ ပုရတော ပုရတော ဂစ္ဆန္တိ, ထေရေပိ ဘိက္ခူ အနုပခဇ္ဇ နိသီဒန္တိ , နဝေပိ ဘိက္ခူ အာသနေန ပဋိဗာဟန္တိ, သင္ဃာဋိမ္ပိ ဩတ္ထရိတ္ဝာ အန္တရဃရေ နိသီဒန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ ဒုန္နိဝတ္ထာ ဒုပ္ပာရုတာ အနာကပ္ပသမ္ပန္နာ ဘတ္တဂ္ဂံ ဂစ္ဆိသ္သန္တိ, ဝောက္ကမ္မပိ ထေရာနံ ဘိက္ခူနံ ပုရတော ပုရတော ဂစ္ဆိသ္သန္တိ, ထေရေပိ ဘိက္ခူ အနုပခဇ္ဇ နိသီဒိသ္သန္တိ, နဝေပိ ဘိက္ခူ အာသနေနပိ ပဋိဗာဟိသ္သန္တိ, သင္ဃာဋိမ္ပိ ဩတ္ထရိတ္ဝာ အန္တရဃရေ နိသီဒိသ္သန္တီ’’တိ! အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, ဆဗ္ဗဂ္ဂိယာ ဘိက္ခူ ဒုန္နိဝတ္ထာ ဒုပ္ပာရုတာ အနာကပ္ပသမ္ပန္နာ ဘတ္တဂ္ဂံ ဂစ္ဆန္တိ, ဝောက္ကမ္မပိ ထေရာနံ ဘိက္ခူနံ ပုရတော ပုရတော ဂစ္ဆန္တိ, ထေရေပိ ဘိက္ခူ အနုပခဇ္ဇ နိသီဒန္တိ, နဝေပိ ဘိက္ခူ အာသနေန ပဋိဗာဟန္တိ, သင္ဃာဋိမ္ပိ ဩတ္ထရိတ္ဝာ အန္တရဃရေ နိသီဒန္တီ’’တိ? ‘‘သစ္စံ ဘဂဝာ’’တိ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ –
363. Tena kho pana samayena chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti , navepi bhikkhū āsanena paṭibāhanti, saṅghāṭimpi ottharitvā antaraghare nisīdanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū dunnivatthā duppārutā anākappasampannā bhattaggaṃ gacchissanti, vokkammapi therānaṃ bhikkhūnaṃ purato purato gacchissanti, therepi bhikkhū anupakhajja nisīdissanti, navepi bhikkhū āsanenapi paṭibāhissanti, saṅghāṭimpi ottharitvā antaraghare nisīdissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti, navepi bhikkhū āsanena paṭibāhanti, saṅghāṭimpi ottharitvā antaraghare nisīdantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
၃၆၄. ‘‘တေန ဟိ, ဘိက္ခဝေ, ဘိက္ခူနံ ဘတ္တဂ္ဂဝတ္တံ ပညပေသ္သာမိ ယထာ ဘိက္ခူဟိ ဘတ္တဂ္ဂေ သမ္မာ ဝတ္တိတဗ္ဗံ။ သစေ အာရာမေ ကာလော အာရောစိတော ဟောတိ, တိမဏ္ဍလံ ပဋိစ္ဆာဒေန္တေန ပရိမဏ္ဍလံ နိဝာသေတ္ဝာ ကာယဗန္ဓနံ ဗန္ဓိတ္ဝာ သဂုဏံ ကတ္ဝာ သင္ဃာဋိယော ပာရုပိတ္ဝာ ဂဏ္ဌိကံ ပဋိမုဉ္စိတ္ဝာ ဓောဝိတ္ဝာ ပတ္တံ ဂဟေတ္ဝာ သာဓုကံ အတရမာနေန ဂာမော ပဝိသိတဗ္ဗော။
364. ‘‘Tena hi, bhikkhave, bhikkhūnaṃ bhattaggavattaṃ paññapessāmi yathā bhikkhūhi bhattagge sammā vattitabbaṃ. Sace ārāme kālo ārocito hoti, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
‘‘န ဝောက္ကမ္မ ထေရာနံ ဘိက္ခူနံ ပုရတော ပုရတော ဂန္တဗ္ဗံ။ သုပ္ပဋိစ္ဆန္နေန အန္တရဃရေ ဂန္တဗ္ဗံ။ သုသံဝုတေန အန္တရဃရေ ဂန္တဗ္ဗံ။ ဩက္ခိတ္တစက္ခုနာ အန္တရဃရေ ဂန္တဗ္ဗံ။ န ဥက္ခိတ္တကာယ အန္တရဃရေ ဂန္တဗ္ဗံ။ န ဥဇ္ဇဂ္ဃိကာယ အန္တရဃရေ ဂန္တဗ္ဗံ။ အပ္ပသဒ္ဒေန အန္တရဃရေ ဂန္တဗ္ဗံ။ န ကာယပ္ပစာလကံ အန္တရဃရေ ဂန္တဗ္ဗံ ။ န ဗာဟုပ္ပစာလကံ အန္တရဃရေ ဂန္တဗ္ဗံ။ န သီသပ္ပစာလကံ အန္တရဃရေ ဂန္တဗ္ဗံ။ န ခမ္ဘကတေန အန္တရဃရေ ဂန္တဗ္ဗံ။ န ဩဂုဏ္ဌိတေန အန္တရဃရေ ဂန္တဗ္ဗံ။ န ဥက္ကုဋိကာယ အန္တရဃရေ ဂန္တဗ္ဗံ။
‘‘Na vokkamma therānaṃ bhikkhūnaṃ purato purato gantabbaṃ. Suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ . Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘သုပ္ပဋိစ္ဆန္နေန အန္တရဃရေ နိသီဒိတဗ္ဗံ။ သုသံဝုတေန အန္တရဃရေ နိသီဒိတဗ္ဗံ။ ဩက္ခိတ္တစက္ခုနာ အန္တရဃရေ နိသီဒိတဗ္ဗံ။ န ဥက္ခိတ္တကာယ အန္တရဃရေ နိသီဒိတဗ္ဗံ န ဥဇ္ဇဂ္ဃိကာယ အန္တရဃရေ နိသီဒိတဗ္ဗံ, အပ္ပသဒ္ဒေန အန္တရဃရေ နိသီဒိတဗ္ဗ။ န ကာယပ္ပစာလကံ အန္တရဃရေ နိသီဒိတဗ္ဗံ။ န ဗာဟုပ္ပစာလကံ အန္တရဃရေ နိသီဒိတဗ္ဗံ။ န သီသပ္ပစာလကံ အန္တရဃရေ နိသီဒိတဗ္ဗံ။ န ခမ္ဘကတေန အန္တရဃရေ နိသီဒိတဗ္ဗံ။ န ဩဂုဏ္ဌိတေန အန္တရဃရေ နိသီဒိတဗ္ဗံ။ န ပလ္လတ္ထိကာယ အန္တရဃရေ နိသီဒိတဗ္ဗံ။ န ထေရေ ဘိက္ခူ အနုပခဇ္ဇ နိသီဒိတဗ္ဗံ။ န နဝာ ဘိက္ခူ အာသနေန ပဋိဗာဟိတဗ္ဗာ။ န သင္ဃာဋိံ ဩတ္ထရိတ္ဝာ အန္တရဃရေ နိသီဒိတဗ္ဗံ။
‘‘Suppaṭicchannena antaraghare nisīditabbaṃ. Susaṃvutena antaraghare nisīditabbaṃ. Okkhittacakkhunā antaraghare nisīditabbaṃ. Na ukkhittakāya antaraghare nisīditabbaṃ na ujjagghikāya antaraghare nisīditabbaṃ, appasaddena antaraghare nisīditabba. Na kāyappacālakaṃ antaraghare nisīditabbaṃ. Na bāhuppacālakaṃ antaraghare nisīditabbaṃ. Na sīsappacālakaṃ antaraghare nisīditabbaṃ. Na khambhakatena antaraghare nisīditabbaṃ. Na oguṇṭhitena antaraghare nisīditabbaṃ. Na pallatthikāya antaraghare nisīditabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Na saṅghāṭiṃ ottharitvā antaraghare nisīditabbaṃ.
‘‘ဥဒကေ ဒိယ္ယမာနေ ဥဘောဟိ ဟတ္ထေဟိ ပတ္တံ ပဋိဂ္ဂဟေတ္ဝာ ဥဒကံ ပဋိဂ္ဂဟေတဗ္ဗံ။ နီစံ ကတ္ဝာ သာဓုကံ အပ္ပဋိဃံသန္တေန ပတ္တော ဓောဝိတဗ္ဗော။ သစေ ဥဒကပ္ပဋိဂ္ဂာဟကော ဟောတိ, နီစံ ကတ္ဝာ ဥဒကပ္ပဋိဂ္ဂဟေ ဥဒကံ အာသိဉ္စိတဗ္ဗံ – မာ ဥဒကပ္ပဋိဂ္ဂာဟကော ဥဒကေန ဩသိဉ္စိ 1, မာ သာမန္တာ ဘိက္ခူ ဥဒကေန ဩသိဉ္စိံသု 2, မာ သင္ဃာဋိ ဥဒကေန ဩသိဉ္စီတိ။ သစေ ဥဒကပ္ပဋိဂ္ဂာဟကော န ဟောတိ, နီစံ ကတ္ဝာ ဆမာယ ဥဒကံ အာသိဉ္စိတဗ္ဗံ – မာ သာမန္တာ ဘိက္ခူ ဥဒကေန ဩသိဉ္စိံသု, မာ သင္ဃာဋိ ဥဒကေန ဩသိဉ္စီတိ။
‘‘Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci 3, mā sāmantā bhikkhū udakena osiñciṃsu 4, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti.
‘‘ဩဒနေ ဒိယ္ယမာနေ ဥဘောဟိ ဟတ္ထေဟိ ပတ္တံ ပဋိဂ္ဂဟေတ္ဝာ ဩဒနော ပဋိဂ္ဂဟေတဗ္ဗော, သူပသ္သ ဩကာသော ကာတဗ္ဗော။ သစေ ဟောတိ သပ္ပိ ဝာ တေလံ ဝာ ဥတ္တရိဘင္ဂံ ဝာ, ထေရေန ဝတ္တဗ္ဗော – ‘သဗ္ဗေသံ သမကံ သမ္ပာဒေဟီ’တိ။ သက္ကစ္စံ ပိဏ္ဍပာတော ပဋိဂ္ဂဟေတဗ္ဗော။ ပတ္တသညိနာ ပိဏ္ဍပာတော ပဋိဂ္ဂဟေတဗ္ဗော။ သမသူပကော ပိဏ္ဍပာတော ပဋိဂ္ဂဟေတဗ္ဗော။ သမတိတ္တိကော ပိဏ္ဍပာတော ပဋိဂ္ဂဟေတဗ္ဗော။
‘‘Odane diyyamāne ubhohi hatthehi pattaṃ paṭiggahetvā odano paṭiggahetabbo, sūpassa okāso kātabbo. Sace hoti sappi vā telaṃ vā uttaribhaṅgaṃ vā, therena vattabbo – ‘sabbesaṃ samakaṃ sampādehī’ti. Sakkaccaṃ piṇḍapāto paṭiggahetabbo. Pattasaññinā piṇḍapāto paṭiggahetabbo. Samasūpako piṇḍapāto paṭiggahetabbo. Samatittiko piṇḍapāto paṭiggahetabbo.
‘‘န တာဝ ထေရေန ဘုဉ္ဇိတဗ္ဗံ ယာဝ န သဗ္ဗေသံ ဩဒနော သမ္ပတ္တော ဟောတိ။ သက္ကစ္စံ ပိဏ္ဍပာတော ဘုဉ္ဇိတဗ္ဗော။ ပတ္တသညိနာ ပိဏ္ဍပာတော ဘုဉ္ဇိတဗ္ဗော။ သပဒာနံ ပိဏ္ဍပာတော ဘုဉ္ဇိတဗ္ဗော။ သမသူပကော ပိဏ္ဍပာတော ဘုဉ္ဇိတဗ္ဗော ။ န ထူပကတော ဩမဒ္ဒိတ္ဝာ ပိဏ္ဍိပာတော ဘုဉ္ဇိတဗ္ဗော။ န သူပံ ဝာ ဗ္ယဉ္ဇနံ ဝာ ဩဒနေန ပဋိစ္ဆာဒေတဗ္ဗံ ဘိယ္ယောကမ္ယတံ ဥပာဒာယ။ န သူပံ ဝာ ဩဒနံ ဝာ အဂိလာနေန အတ္တနော အတ္ထာယ ဝိညာပေတ္ဝာ ဘုဉ္ဇိတဗ္ဗံ။ န ဥဇ္ဈာနသညိနာ ပရေသံ ပတ္တော ဩလောကေတဗ္ဗော။ နာတိမဟန္တော ကဗဠော ကာတဗ္ဗော။ ပရိမဏ္ဍလော အာလောပော ကာတဗ္ဗော။ န အနာဟဋေ ကဗဠေ မုခဒ္ဝာရံ ဝိဝရိတဗ္ဗံ။ န ဘုဉ္ဇမာနေန သဗ္ဗော ဟတ္ထော မုခေ ပက္ခိပိတဗ္ဗော။ န သကဗဠေန မုခေန ဗ္ယာဟရိတဗ္ဗံ။ န ပိဏ္ဍုက္ခေပကံ ဘုဉ္ဇိတဗ္ဗံ။ န ကဗဠာဝစ္ဆေဒကံ ဘုဉ္ဇိတဗ္ဗံ။ န အဝဂဏ္ဍကာရကံ ဘုဉ္ဇိတဗ္ဗံ။ န ဟတ္ထနိဒ္ဓုနကံ ဘုဉ္ဇိတဗ္ဗံ။ န သိတ္ထာဝကာရကံ ဘုဉ္ဇိတဗ္ဗံ။ န ဇိဝ္ဟာနိစ္ဆာရကံ ဘုဉ္ဇိတဗ္ဗံ။ န စပုစပုကာရကံ ဘုဉ္ဇိတဗ္ဗံ။ န သုရုသုရုကာရကံ ဘုဉ္ဇိတဗ္ဗံ။ န ဟတ္ထနိလ္လေဟကံ ဘုဉ္ဇိတဗ္ဗံ။ န ပတ္တနိလ္လေဟကံ ဘုဉ္ဇိတဗ္ဗံ။ န ဩဋ္ဌနိလ္လေဟကံ ဘုဉ္ဇိတဗ္ဗံ။
‘‘Na tāva therena bhuñjitabbaṃ yāva na sabbesaṃ odano sampatto hoti. Sakkaccaṃ piṇḍapāto bhuñjitabbo. Pattasaññinā piṇḍapāto bhuñjitabbo. Sapadānaṃ piṇḍapāto bhuñjitabbo. Samasūpako piṇḍapāto bhuñjitabbo . Na thūpakato omadditvā piṇḍipāto bhuñjitabbo. Na sūpaṃ vā byañjanaṃ vā odanena paṭicchādetabbaṃ bhiyyokamyataṃ upādāya. Na sūpaṃ vā odanaṃ vā agilānena attano atthāya viññāpetvā bhuñjitabbaṃ. Na ujjhānasaññinā paresaṃ patto oloketabbo. Nātimahanto kabaḷo kātabbo. Parimaṇḍalo ālopo kātabbo. Na anāhaṭe kabaḷe mukhadvāraṃ vivaritabbaṃ. Na bhuñjamānena sabbo hattho mukhe pakkhipitabbo. Na sakabaḷena mukhena byāharitabbaṃ. Na piṇḍukkhepakaṃ bhuñjitabbaṃ. Na kabaḷāvacchedakaṃ bhuñjitabbaṃ. Na avagaṇḍakārakaṃ bhuñjitabbaṃ. Na hatthaniddhunakaṃ bhuñjitabbaṃ. Na sitthāvakārakaṃ bhuñjitabbaṃ. Na jivhānicchārakaṃ bhuñjitabbaṃ. Na capucapukārakaṃ bhuñjitabbaṃ. Na surusurukārakaṃ bhuñjitabbaṃ. Na hatthanillehakaṃ bhuñjitabbaṃ. Na pattanillehakaṃ bhuñjitabbaṃ. Na oṭṭhanillehakaṃ bhuñjitabbaṃ.
‘‘န သာမိသေန ဟတ္ထေန ပာနီယထာလကော ပဋိဂ္ဂဟေတဗ္ဗော။ န တာဝ ထေရေန ဥဒကံ ပဋိဂ္ဂဟေတဗ္ဗံ ယာဝ န သဗ္ဗေဝ ဘုတ္တာဝိနော ဟောန္တိ။ ဥဒကေ ဒိယ္ယမာနေ ဥဘောဟိ ဟတ္ထေဟိ ပတ္တံ ပဋိဂ္ဂဟေတ္ဝာ ဥဒကံ ပဋိဂ္ဂဟေတဗ္ဗံ။ နီစံ ကတ္ဝာ သာဓုကံ အပ္ပဋိဃံသန္တေန ပတ္တော ဓောဝိတဗ္ဗော။ သစေ ဥဒကပ္ပဋိဂ္ဂာဟကော ဟောတိ, နီစံ ကတ္ဝာ ဥဒကပ္ပဋိဂ္ဂဟေ ဥဒကံ အာသိဉ္စိတဗ္ဗံ – မာ ဥဒကပ္ပဋိဂ္ဂာဟကော ဥဒကေန ဩသိဉ္စိ, မာ သာမန္တာ ဘိက္ခူ ဥဒကေန ဩသိဉ္စိံသု, မာ သင္ဃာဋိ ဥဒကေန ဩသိဉ္စီတိ။ သစေ ဥဒကပ္ပဋိဂ္ဂာဟကော န ဟောတိ, နီစံ ကတ္ဝာ ဆမာယ ဥဒကံ အာသိဉ္စိတဗ္ဗံ – မာ သာမန္တာ ဘိက္ခူ ဥဒကေန ဩသိဉ္စိံသု, မာ သင္ဃာဋိ ဥဒကေန ဩသိဉ္စီတိ။ န သသိတ္ထကံ ပတ္တဓောဝနံ အန္တရဃရေ ဆဍ္ဍေတဗ္ဗံ။
‘‘Na sāmisena hatthena pānīyathālako paṭiggahetabbo. Na tāva therena udakaṃ paṭiggahetabbaṃ yāva na sabbeva bhuttāvino honti. Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci, mā sāmantā bhikkhū udakena osiñciṃsu, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti. Na sasitthakaṃ pattadhovanaṃ antaraghare chaḍḍetabbaṃ.
‘‘နိဝတ္တန္တေန နဝကေဟိ ဘိက္ခူဟိ ပဌမတရံ နိဝတ္တိတဗ္ဗံ။ ပစ္ဆာ ထေရေဟိ သုပ္ပဋိစ္ဆန္နေန အန္တရဃရေ ဂန္တဗ္ဗံ။ သုသံဝုတေန အန္တရဃရေ ဂန္တဗ္ဗံ။ ဩက္ခိတ္တစက္ခုနာ အန္တရဃရေ ဂန္တဗ္ဗံ။ န ဥက္ခိတ္တကာယ အန္တရဃရေ ဂန္တဗ္ဗံ။ န ဥဇ္ဇဂ္ဃိကာယ အန္တရဃရေ ဂန္တဗ္ဗံ။ အပ္ပသဒ္ဒေန အန္တရဃရေ ဂန္တဗ္ဗံ။ န ကာယပ္ပစာလကံ အန္တရဃရေ ဂန္တဗ္ဗံ။ န ဗာဟုပ္ပစာလကံ အန္တရဃရေ ဂန္တဗ္ဗံ ။ န သီသပ္ပစာလကံ အန္တရဃရေ ဂန္တဗ္ဗံ။ န ခမ္ဘကတေန အန္တရဃရေ ဂန္တဗ္ဗံ။ န ဩဂုဏ္ဌိတေန အန္တရဃရေ ဂန္တဗ္ဗံ။ န ဥက္ကုဋိကာယ အန္တရဃရေ ဂန္တဗ္ဗံ။ ဣဒံ ခော, ဘိက္ခဝေ, ဘိက္ခူနံ ဘတ္တဂ္ဂဝတ္တံ ယထာ ဘိက္ခူဟိ ဘတ္တဂ္ဂေ သမ္မာ ဝတ္တိတဗ္ဗ’’န္တိ။
‘‘Nivattantena navakehi bhikkhūhi paṭhamataraṃ nivattitabbaṃ. Pacchā therehi suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ . Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ. Idaṃ kho, bhikkhave, bhikkhūnaṃ bhattaggavattaṃ yathā bhikkhūhi bhattagge sammā vattitabba’’nti.
ပဌမဘာဏဝာရော နိဋ္ဌိတော။
Paṭhamabhāṇavāro niṭṭhito.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / ဘတ္တဂ္ဂဝတ္တကထာ • Bhattaggavattakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဘတ္တဂ္ဂဝတ္တကထာဝဏ္ဏနာ • Bhattaggavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အနုမောဒနဝတ္တကထာဝဏ္ဏနာ • Anumodanavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဘတ္တဂ္ဂဝတ္တကထာဝဏ္ဏနာ • Bhattaggavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၅. ဘတ္တဂ္ဂဝတ္တကထာ • 5. Bhattaggavattakathā
