| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೫. ಭತ್ತಗ್ಗವತ್ತಕಥಾ
5. Bhattaggavattakathā
೩೬೪. ಭತ್ತಗ್ಗವತ್ತೇತಿ ಭತ್ತಂ ಗಣ್ಹನ್ತಿ ಏತ್ಥಾತಿ ಭತ್ತಗ್ಗಂ, ಪರಿವಿಸನಟ್ಠಾನಂ। ತಸ್ಮಿಂ ಕತ್ತಬ್ಬಂ ವತ್ತಂ ಭತ್ತಗ್ಗವತ್ತಂ, ತಸ್ಮಿಂ ಭತ್ತಗ್ಗವತ್ತೇ ಏವಂ ವಿನಿಚ್ಛಯೋ ವೇದಿತಬ್ಬೋತಿ ಯೋಜನಾ। ಮನುಸ್ಸಾನಂ ಪರಿವಿಸನಟ್ಠಾನಂ ನಾಮ ಯತ್ಥ ಮನುಸ್ಸಾ ಸಪುತ್ತದಾರಾ ಆವಸಿತ್ವಾ ಭಿಕ್ಖೂಭೋಜೇನ್ತಿ। ‘‘ಅತಿಅಲ್ಲೀಯಿತ್ವಾ’’ತಿ ಇಮಿನಾ ಅನುಪಖಜ್ಜಾತಿ ಏತ್ಥ ಖದಧಾತುಸ್ಸ ಹಿಂಸನಂ ನಾಮ ಅತಿಅಲ್ಲೀಯನನ್ತಿ ದಸ್ಸೇತಿ। ಆಸನೇಸು ಸತೀತಿ ಆಸನೇಸು ಸನ್ತೇಸು। ನಿಸೀದನ್ತಸ್ಸ ನವಕಸ್ಸಾತಿ ಸಮ್ಬನ್ಧೋ। ಆಪಜ್ಜತೀತಿ ಆಪತ್ತಿಂ ಆಪಜ್ಜತಿ। ಆಪುಚ್ಛಿತೇ ಅನನುಜಾನನ್ತೋ ಥೇರೋ ಆಪಜ್ಜತೀತಿ ಯೋಜನಾ। ಸಙ್ಘಾಟಿನ್ತಿ ಪಾರುತಸಙ್ಘಾಟಿಂ।
364.Bhattaggavatteti bhattaṃ gaṇhanti etthāti bhattaggaṃ, parivisanaṭṭhānaṃ. Tasmiṃ kattabbaṃ vattaṃ bhattaggavattaṃ, tasmiṃ bhattaggavatte evaṃ vinicchayo veditabboti yojanā. Manussānaṃ parivisanaṭṭhānaṃ nāma yattha manussā saputtadārā āvasitvā bhikkhūbhojenti. ‘‘Atiallīyitvā’’ti iminā anupakhajjāti ettha khadadhātussa hiṃsanaṃ nāma atiallīyananti dasseti. Āsanesu satīti āsanesu santesu. Nisīdantassa navakassāti sambandho. Āpajjatīti āpattiṃ āpajjati. Āpucchite ananujānanto thero āpajjatīti yojanā. Saṅghāṭinti pārutasaṅghāṭiṃ.
ಪತ್ತಧೋವನಉದಕನ್ತಿ ಭುಞ್ಜನತ್ಥಾಯ ಪತ್ತಾನಂ ಧೋವನಉದಕಂ। ಗಹೇತಬ್ಬನ್ತಿ ಹತ್ಥೇನ ಗಹೇತಬ್ಬಂ।
Pattadhovanaudakanti bhuñjanatthāya pattānaṃ dhovanaudakaṃ. Gahetabbanti hatthena gahetabbaṃ.
ಯಥಾ ಗಣ್ಹಿಯಮಾನೇತಿ ಯೋಜನಾ। ಮತ್ತಾಯಾತಿ ಪಮಾಣಾಯ। ಸಬ್ಬಿಆದೀಸು ಏವಾತಿ ಏವಸದ್ದೋ ಅಜ್ಝಾಹರಿತಬ್ಬೋ। ಸಬ್ಬಿಆದೀಸೂತಿ ಸಬ್ಬಿತೇಲಉತ್ತರಿಭಙ್ಗೇಸು, ನಿದ್ಧಾರಣೇ ಭುಮ್ಮಂ। ಯನ್ತಿ ಸಬ್ಬಿಆದಿಕಂ। ಅಪ್ಪಹೋತೀತಿ ಸಬ್ಬೇಸಂ ಭಿಕ್ಖೂನಂ ನಪ್ಪಹೋತಿ। ತನ್ತಿ ಸಬ್ಬಿಆದಿಕಂ, ಸಮ್ಪಾದೇಹೀತಿ ಸಮ್ಬನ್ಧೋ। ತಾದಿಸಂ ಸಬ್ಬಿಆದಿಕನ್ತಿ ಸಮ್ಬನ್ಧೋ।
Yathā gaṇhiyamāneti yojanā. Mattāyāti pamāṇāya. Sabbiādīsu evāti evasaddo ajjhāharitabbo. Sabbiādīsūti sabbitelauttaribhaṅgesu, niddhāraṇe bhummaṃ. Yanti sabbiādikaṃ. Appahotīti sabbesaṃ bhikkhūnaṃ nappahoti. Tanti sabbiādikaṃ, sampādehīti sambandho. Tādisaṃ sabbiādikanti sambandho.
ಯಂ ಭತ್ತಗ್ಗನ್ತಿ ಯೋಜನಾ। ಹತ್ಥಧೋವನಉದಕನ್ತಿ ಭುತ್ತಾವೀನಂ ಹತ್ಥಸ್ಸ ಧೋವನಉದಕಂ। ಅನ್ತರಾತಿ ಭೋಜನಸ್ಸ ಮಜ್ಝೇ। ಪಿಪಾಸಿತೇನಾತಿ ಪಿವಿತುಂ ಇಚ್ಛನ್ತೇನ। ಗಲೇತಿ ಕಣ್ಠೇ।
Yaṃ bhattagganti yojanā. Hatthadhovanaudakanti bhuttāvīnaṃ hatthassa dhovanaudakaṃ. Antarāti bhojanassa majjhe. Pipāsitenāti pivituṃ icchantena. Galeti kaṇṭhe.
ನಿವತ್ತನ್ತೇನಾತಿ ಏತ್ಥ ಕಸ್ಮಾ ಠಾನಾ ನಿವತ್ತನ್ತೇನಾತಿ ಆಹ ‘‘ಭತ್ತಗ್ಗತೋ’’ತಿ। ಕಥಂ ಕೇನಾಕಾರೇನ ನಿವತ್ತಿತಬ್ಬನ್ತಿ ಯೋಜನಾ। ಕಸ್ಮಾ ನವಕೇಹಿ ಭಿಕ್ಖೂಹಿ ಪಠಮತರಂ ನಿವತ್ತಿತಬ್ಬನ್ತಿ ಆಹ ‘‘ಸಮ್ಬಾಧೇಸು ಹೀ’’ತಿಆದಿ। ನಿಕ್ಖಮನೋಕಾಸೋತಿ ಪಠಮತರಂ ನಿಕ್ಖನ್ತೋಕಾಸೋ। ಪಟಿಪಾಟಿಯಾತಿ ವುಡ್ಢಪಟಿಪಾಟಿಯಾ। ಧುರೇತಿ ಗೇಹದ್ವಾರಸ್ಸ ಸಮೀಪೇ। ಧುರಸದ್ದೋ ಹಿ ಇಧ ಸಮೀಪವಾಚಕೋ। ನವಕಾ ಅನ್ತೋಗೇಹೇ ಚೇ ನಿಸಿನ್ನಾ ಹೋನ್ತೀತಿ ಯೋಜನಾ। ಅನ್ತರೇನಾತಿ ಭಿಕ್ಖೂನಂ ವಿವರೇನ, ಮಜ್ಝೇನ ವಾ। ವಿರಳಾಯಾತಿ ತನುಕಾಯ।
Nivattantenāti ettha kasmā ṭhānā nivattantenāti āha ‘‘bhattaggato’’ti. Kathaṃ kenākārena nivattitabbanti yojanā. Kasmā navakehi bhikkhūhi paṭhamataraṃ nivattitabbanti āha ‘‘sambādhesu hī’’tiādi. Nikkhamanokāsoti paṭhamataraṃ nikkhantokāso. Paṭipāṭiyāti vuḍḍhapaṭipāṭiyā. Dhureti gehadvārassa samīpe. Dhurasaddo hi idha samīpavācako. Navakā antogehe ce nisinnā hontīti yojanā. Antarenāti bhikkhūnaṃ vivarena, majjhena vā. Viraḷāyāti tanukāya.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ೫. ಭತ್ತಗ್ಗವತ್ತಕಥಾ • 5. Bhattaggavattakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಭತ್ತಗ್ಗವತ್ತಕಥಾ • Bhattaggavattakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಭತ್ತಗ್ಗವತ್ತಕಥಾವಣ್ಣನಾ • Bhattaggavattakathāvaṇṇanā
