| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
5. භත්‌තග්‌ගවත්‌තකථා
5. Bhattaggavattakathā
363. තෙන ඛො පන සමයෙන ඡබ්‌බග්‌ගියා භික්‌ඛූ දුන්‌නිවත්‌ථා දුප්‌පාරුතා අනාකප්‌පසම්‌පන්‌නා භත්‌තග්‌ගං ගච්‌ඡන්‌ති, වොක්‌කම්‌මපි ථෙරානං භික්‌ඛූනං පුරතො පුරතො ගච්‌ඡන්‌ති, ථෙරෙපි භික්‌ඛූ අනුපඛජ්‌ජ නිසීදන්‌ති , නවෙපි භික්‌ඛූ ආසනෙන පටිබාහන්‌ති, සඞ්‌ඝාටිම්‌පි ඔත්‌ථරිත්‌වා අන්‌තරඝරෙ නිසීදන්‌ති. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛූ දුන්‌නිවත්‌ථා දුප්‌පාරුතා අනාකප්‌පසම්‌පන්‌නා භත්‌තග්‌ගං ගච්‌ඡිස්‌සන්‌ති, වොක්‌කම්‌මපි ථෙරානං භික්‌ඛූනං පුරතො පුරතො ගච්‌ඡිස්‌සන්‌ති, ථෙරෙපි භික්‌ඛූ අනුපඛජ්‌ජ නිසීදිස්‌සන්‌ති, නවෙපි භික්‌ඛූ ආසනෙනපි පටිබාහිස්‌සන්‌ති, සඞ්‌ඝාටිම්‌පි ඔත්‌ථරිත්‌වා අන්‌තරඝරෙ නිසීදිස්‌සන්‌තී’’ති! අථ ඛො තෙ භික්‌ඛූ භගවතො එතමත්‌ථං ආරොචෙසුං…පෙ.… ‘‘සච්‌චං කිර, භික්‌ඛවෙ, ඡබ්‌බග්‌ගියා භික්‌ඛූ දුන්‌නිවත්‌ථා දුප්‌පාරුතා අනාකප්‌පසම්‌පන්‌නා භත්‌තග්‌ගං ගච්‌ඡන්‌ති, වොක්‌කම්‌මපි ථෙරානං භික්‌ඛූනං පුරතො පුරතො ගච්‌ඡන්‌ති, ථෙරෙපි භික්‌ඛූ අනුපඛජ්‌ජ නිසීදන්‌ති, නවෙපි භික්‌ඛූ ආසනෙන පටිබාහන්‌ති, සඞ්‌ඝාටිම්‌පි ඔත්‌ථරිත්‌වා අන්‌තරඝරෙ නිසීදන්‌තී’’ති? ‘‘සච්‌චං භගවා’’ති…පෙ.… විගරහිත්‌වා…පෙ.… ධම්‌මිං කථං කත්‌වා භික්‌ඛූ ආමන්‌තෙසි –
363. Tena kho pana samayena chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti , navepi bhikkhū āsanena paṭibāhanti, saṅghāṭimpi ottharitvā antaraghare nisīdanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū dunnivatthā duppārutā anākappasampannā bhattaggaṃ gacchissanti, vokkammapi therānaṃ bhikkhūnaṃ purato purato gacchissanti, therepi bhikkhū anupakhajja nisīdissanti, navepi bhikkhū āsanenapi paṭibāhissanti, saṅghāṭimpi ottharitvā antaraghare nisīdissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti, navepi bhikkhū āsanena paṭibāhanti, saṅghāṭimpi ottharitvā antaraghare nisīdantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
364. ‘‘තෙන හි, භික්‌ඛවෙ, භික්‌ඛූනං භත්‌තග්‌ගවත්‌තං පඤ්‌ඤපෙස්‌සාමි යථා භික්‌ඛූහි භත්‌තග්‌ගෙ සම්‌මා වත්‌තිතබ්‌බං. සචෙ ආරාමෙ කාලො ආරොචිතො හොති, තිමණ්‌ඩලං පටිච්‌ඡාදෙන්‌තෙන පරිමණ්‌ඩලං නිවාසෙත්‌වා කායබන්‌ධනං බන්‌ධිත්‌වා සගුණං කත්‌වා සඞ්‌ඝාටියො පාරුපිත්‌වා ගණ්‌ඨිකං පටිමුඤ්‌චිත්‌වා ධොවිත්‌වා පත්‌තං ගහෙත්‌වා සාධුකං අතරමානෙන ගාමො පවිසිතබ්‌බො.
364. ‘‘Tena hi, bhikkhave, bhikkhūnaṃ bhattaggavattaṃ paññapessāmi yathā bhikkhūhi bhattagge sammā vattitabbaṃ. Sace ārāme kālo ārocito hoti, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
‘‘න වොක්‌කම්‌ම ථෙරානං භික්‌ඛූනං පුරතො පුරතො ගන්‌තබ්‌බං. සුප්‌පටිච්‌ඡන්‌නෙන අන්‌තරඝරෙ ගන්‌තබ්‌බං. සුසංවුතෙන අන්‌තරඝරෙ ගන්‌තබ්‌බං. ඔක්‌ඛිත්‌තචක්‌ඛුනා අන්‌තරඝරෙ ගන්‌තබ්‌බං. න උක්‌ඛිත්‌තකාය අන්‌තරඝරෙ ගන්‌තබ්‌බං. න උජ්‌ජග්‌ඝිකාය අන්‌තරඝරෙ ගන්‌තබ්‌බං. අප්‌පසද්‌දෙන අන්‌තරඝරෙ ගන්‌තබ්‌බං. න කායප්‌පචාලකං අන්‌තරඝරෙ ගන්‌තබ්‌බං . න බාහුප්‌පචාලකං අන්‌තරඝරෙ ගන්‌තබ්‌බං. න සීසප්‌පචාලකං අන්‌තරඝරෙ ගන්‌තබ්‌බං. න ඛම්‌භකතෙන අන්‌තරඝරෙ ගන්‌තබ්‌බං. න ඔගුණ්‌ඨිතෙන අන්‌තරඝරෙ ගන්‌තබ්‌බං. න උක්‌කුටිකාය අන්‌තරඝරෙ ගන්‌තබ්‌බං.
‘‘Na vokkamma therānaṃ bhikkhūnaṃ purato purato gantabbaṃ. Suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ . Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘සුප්‌පටිච්‌ඡන්‌නෙන අන්‌තරඝරෙ නිසීදිතබ්‌බං. සුසංවුතෙන අන්‌තරඝරෙ නිසීදිතබ්‌බං. ඔක්‌ඛිත්‌තචක්‌ඛුනා අන්‌තරඝරෙ නිසීදිතබ්‌බං. න උක්‌ඛිත්‌තකාය අන්‌තරඝරෙ නිසීදිතබ්‌බං න උජ්‌ජග්‌ඝිකාය අන්‌තරඝරෙ නිසීදිතබ්‌බං, අප්‌පසද්‌දෙන අන්‌තරඝරෙ නිසීදිතබ්‌බ. න කායප්‌පචාලකං අන්‌තරඝරෙ නිසීදිතබ්‌බං. න බාහුප්‌පචාලකං අන්‌තරඝරෙ නිසීදිතබ්‌බං. න සීසප්‌පචාලකං අන්‌තරඝරෙ නිසීදිතබ්‌බං. න ඛම්‌භකතෙන අන්‌තරඝරෙ නිසීදිතබ්‌බං. න ඔගුණ්‌ඨිතෙන අන්‌තරඝරෙ නිසීදිතබ්‌බං. න පල්‌ලත්‌ථිකාය අන්‌තරඝරෙ නිසීදිතබ්‌බං. න ථෙරෙ භික්‌ඛූ අනුපඛජ්‌ජ නිසීදිතබ්‌බං. න නවා භික්‌ඛූ ආසනෙන පටිබාහිතබ්‌බා. න සඞ්‌ඝාටිං ඔත්‌ථරිත්‌වා අන්‌තරඝරෙ නිසීදිතබ්‌බං.
‘‘Suppaṭicchannena antaraghare nisīditabbaṃ. Susaṃvutena antaraghare nisīditabbaṃ. Okkhittacakkhunā antaraghare nisīditabbaṃ. Na ukkhittakāya antaraghare nisīditabbaṃ na ujjagghikāya antaraghare nisīditabbaṃ, appasaddena antaraghare nisīditabba. Na kāyappacālakaṃ antaraghare nisīditabbaṃ. Na bāhuppacālakaṃ antaraghare nisīditabbaṃ. Na sīsappacālakaṃ antaraghare nisīditabbaṃ. Na khambhakatena antaraghare nisīditabbaṃ. Na oguṇṭhitena antaraghare nisīditabbaṃ. Na pallatthikāya antaraghare nisīditabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Na saṅghāṭiṃ ottharitvā antaraghare nisīditabbaṃ.
‘‘උදකෙ දිය්‍යමානෙ උභොහි හත්‌ථෙහි පත්‌තං පටිග්‌ගහෙත්‌වා උදකං පටිග්‌ගහෙතබ්‌බං. නීචං කත්‌වා සාධුකං අප්‌පටිඝංසන්‌තෙන පත්‌තො ධොවිතබ්‌බො. සචෙ උදකප්‌පටිග්‌ගාහකො හොති, නීචං කත්‌වා උදකප්‌පටිග්‌ගහෙ උදකං ආසිඤ්‌චිතබ්‌බං – මා උදකප්‌පටිග්‌ගාහකො උදකෙන ඔසිඤ්‌චි 1, මා සාමන්‌තා භික්‌ඛූ උදකෙන ඔසිඤ්‌චිංසු 2, මා සඞ්‌ඝාටි උදකෙන ඔසිඤ්‌චීති. සචෙ උදකප්‌පටිග්‌ගාහකො න හොති, නීචං කත්‌වා ඡමාය උදකං ආසිඤ්‌චිතබ්‌බං – මා සාමන්‌තා භික්‌ඛූ උදකෙන ඔසිඤ්‌චිංසු, මා සඞ්‌ඝාටි උදකෙන ඔසිඤ්‌චීති.
‘‘Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci 3, mā sāmantā bhikkhū udakena osiñciṃsu 4, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti.
‘‘ඔදනෙ දිය්‍යමානෙ උභොහි හත්‌ථෙහි පත්‌තං පටිග්‌ගහෙත්‌වා ඔදනො පටිග්‌ගහෙතබ්‌බො, සූපස්‌ස ඔකාසො කාතබ්‌බො. සචෙ හොති සප්‌පි වා තෙලං වා උත්‌තරිභඞ්‌ගං වා, ථෙරෙන වත්‌තබ්‌බො – ‘සබ්‌බෙසං සමකං සම්‌පාදෙහී’ති. සක්‌කච්‌චං පිණ්‌ඩපාතො පටිග්‌ගහෙතබ්‌බො. පත්‌තසඤ්‌ඤිනා පිණ්‌ඩපාතො පටිග්‌ගහෙතබ්‌බො. සමසූපකො පිණ්‌ඩපාතො පටිග්‌ගහෙතබ්‌බො. සමතිත්‌තිකො පිණ්‌ඩපාතො පටිග්‌ගහෙතබ්‌බො.
‘‘Odane diyyamāne ubhohi hatthehi pattaṃ paṭiggahetvā odano paṭiggahetabbo, sūpassa okāso kātabbo. Sace hoti sappi vā telaṃ vā uttaribhaṅgaṃ vā, therena vattabbo – ‘sabbesaṃ samakaṃ sampādehī’ti. Sakkaccaṃ piṇḍapāto paṭiggahetabbo. Pattasaññinā piṇḍapāto paṭiggahetabbo. Samasūpako piṇḍapāto paṭiggahetabbo. Samatittiko piṇḍapāto paṭiggahetabbo.
‘‘න තාව ථෙරෙන භුඤ්‌ජිතබ්‌බං යාව න සබ්‌බෙසං ඔදනො සම්‌පත්‌තො හොති. සක්‌කච්‌චං පිණ්‌ඩපාතො භුඤ්‌ජිතබ්‌බො. පත්‌තසඤ්‌ඤිනා පිණ්‌ඩපාතො භුඤ්‌ජිතබ්‌බො. සපදානං පිණ්‌ඩපාතො භුඤ්‌ජිතබ්‌බො. සමසූපකො පිණ්‌ඩපාතො භුඤ්‌ජිතබ්‌බො . න ථූපකතො ඔමද්‌දිත්‌වා පිණ්‌ඩිපාතො භුඤ්‌ජිතබ්‌බො. න සූපං වා බ්‍යඤ්‌ජනං වා ඔදනෙන පටිච්‌ඡාදෙතබ්‌බං භිය්‍යොකම්‍යතං උපාදාය. න සූපං වා ඔදනං වා අගිලානෙන අත්‌තනො අත්‌ථාය විඤ්‌ඤාපෙත්‌වා භුඤ්‌ජිතබ්‌බං. න උජ්‌ඣානසඤ්‌ඤිනා පරෙසං පත්‌තො ඔලොකෙතබ්‌බො. නාතිමහන්‌තො කබළො කාතබ්‌බො. පරිමණ්‌ඩලො ආලොපො කාතබ්‌බො. න අනාහටෙ කබළෙ මුඛද්‌වාරං විවරිතබ්‌බං. න භුඤ්‌ජමානෙන සබ්‌බො හත්‌ථො මුඛෙ පක්‌ඛිපිතබ්‌බො. න සකබළෙන මුඛෙන බ්‍යාහරිතබ්‌බං. න පිණ්‌ඩුක්‌ඛෙපකං භුඤ්‌ජිතබ්‌බං. න කබළාවච්‌ඡෙදකං භුඤ්‌ජිතබ්‌බං. න අවගණ්‌ඩකාරකං භුඤ්‌ජිතබ්‌බං. න හත්‌ථනිද්‌ධුනකං භුඤ්‌ජිතබ්‌බං. න සිත්‌ථාවකාරකං භුඤ්‌ජිතබ්‌බං. න ජිව්‌හානිච්‌ඡාරකං භුඤ්‌ජිතබ්‌බං. න චපුචපුකාරකං භුඤ්‌ජිතබ්‌බං. න සුරුසුරුකාරකං භුඤ්‌ජිතබ්‌බං. න හත්‌ථනිල්‌ලෙහකං භුඤ්‌ජිතබ්‌බං. න පත්‌තනිල්‌ලෙහකං භුඤ්‌ජිතබ්‌බං. න ඔට්‌ඨනිල්‌ලෙහකං භුඤ්‌ජිතබ්‌බං.
‘‘Na tāva therena bhuñjitabbaṃ yāva na sabbesaṃ odano sampatto hoti. Sakkaccaṃ piṇḍapāto bhuñjitabbo. Pattasaññinā piṇḍapāto bhuñjitabbo. Sapadānaṃ piṇḍapāto bhuñjitabbo. Samasūpako piṇḍapāto bhuñjitabbo . Na thūpakato omadditvā piṇḍipāto bhuñjitabbo. Na sūpaṃ vā byañjanaṃ vā odanena paṭicchādetabbaṃ bhiyyokamyataṃ upādāya. Na sūpaṃ vā odanaṃ vā agilānena attano atthāya viññāpetvā bhuñjitabbaṃ. Na ujjhānasaññinā paresaṃ patto oloketabbo. Nātimahanto kabaḷo kātabbo. Parimaṇḍalo ālopo kātabbo. Na anāhaṭe kabaḷe mukhadvāraṃ vivaritabbaṃ. Na bhuñjamānena sabbo hattho mukhe pakkhipitabbo. Na sakabaḷena mukhena byāharitabbaṃ. Na piṇḍukkhepakaṃ bhuñjitabbaṃ. Na kabaḷāvacchedakaṃ bhuñjitabbaṃ. Na avagaṇḍakārakaṃ bhuñjitabbaṃ. Na hatthaniddhunakaṃ bhuñjitabbaṃ. Na sitthāvakārakaṃ bhuñjitabbaṃ. Na jivhānicchārakaṃ bhuñjitabbaṃ. Na capucapukārakaṃ bhuñjitabbaṃ. Na surusurukārakaṃ bhuñjitabbaṃ. Na hatthanillehakaṃ bhuñjitabbaṃ. Na pattanillehakaṃ bhuñjitabbaṃ. Na oṭṭhanillehakaṃ bhuñjitabbaṃ.
‘‘න සාමිසෙන හත්‌ථෙන පානීයථාලකො පටිග්‌ගහෙතබ්‌බො. න තාව ථෙරෙන උදකං පටිග්‌ගහෙතබ්‌බං යාව න සබ්‌බෙව භුත්‌තාවිනො හොන්‌ති. උදකෙ දිය්‍යමානෙ උභොහි හත්‌ථෙහි පත්‌තං පටිග්‌ගහෙත්‌වා උදකං පටිග්‌ගහෙතබ්‌බං. නීචං කත්‌වා සාධුකං අප්‌පටිඝංසන්‌තෙන පත්‌තො ධොවිතබ්‌බො. සචෙ උදකප්‌පටිග්‌ගාහකො හොති, නීචං කත්‌වා උදකප්‌පටිග්‌ගහෙ උදකං ආසිඤ්‌චිතබ්‌බං – මා උදකප්‌පටිග්‌ගාහකො උදකෙන ඔසිඤ්‌චි, මා සාමන්‌තා භික්‌ඛූ උදකෙන ඔසිඤ්‌චිංසු, මා සඞ්‌ඝාටි උදකෙන ඔසිඤ්‌චීති. සචෙ උදකප්‌පටිග්‌ගාහකො න හොති, නීචං කත්‌වා ඡමාය උදකං ආසිඤ්‌චිතබ්‌බං – මා සාමන්‌තා භික්‌ඛූ උදකෙන ඔසිඤ්‌චිංසු, මා සඞ්‌ඝාටි උදකෙන ඔසිඤ්‌චීති. න සසිත්‌ථකං පත්‌තධොවනං අන්‌තරඝරෙ ඡඩ්‌ඩෙතබ්‌බං.
‘‘Na sāmisena hatthena pānīyathālako paṭiggahetabbo. Na tāva therena udakaṃ paṭiggahetabbaṃ yāva na sabbeva bhuttāvino honti. Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci, mā sāmantā bhikkhū udakena osiñciṃsu, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti. Na sasitthakaṃ pattadhovanaṃ antaraghare chaḍḍetabbaṃ.
‘‘නිවත්‌තන්‌තෙන නවකෙහි භික්‌ඛූහි පඨමතරං නිවත්‌තිතබ්‌බං. පච්‌ඡා ථෙරෙහි සුප්‌පටිච්‌ඡන්‌නෙන අන්‌තරඝරෙ ගන්‌තබ්‌බං. සුසංවුතෙන අන්‌තරඝරෙ ගන්‌තබ්‌බං. ඔක්‌ඛිත්‌තචක්‌ඛුනා අන්‌තරඝරෙ ගන්‌තබ්‌බං. න උක්‌ඛිත්‌තකාය අන්‌තරඝරෙ ගන්‌තබ්‌බං. න උජ්‌ජග්‌ඝිකාය අන්‌තරඝරෙ ගන්‌තබ්‌බං. අප්‌පසද්‌දෙන අන්‌තරඝරෙ ගන්‌තබ්‌බං. න කායප්‌පචාලකං අන්‌තරඝරෙ ගන්‌තබ්‌බං. න බාහුප්‌පචාලකං අන්‌තරඝරෙ ගන්‌තබ්‌බං . න සීසප්‌පචාලකං අන්‌තරඝරෙ ගන්‌තබ්‌බං. න ඛම්‌භකතෙන අන්‌තරඝරෙ ගන්‌තබ්‌බං. න ඔගුණ්‌ඨිතෙන අන්‌තරඝරෙ ගන්‌තබ්‌බං. න උක්‌කුටිකාය අන්‌තරඝරෙ ගන්‌තබ්‌බං. ඉදං ඛො, භික්‌ඛවෙ, භික්‌ඛූනං භත්‌තග්‌ගවත්‌තං යථා භික්‌ඛූහි භත්‌තග්‌ගෙ සම්‌මා වත්‌තිතබ්‌බ’’න්‌ති.
‘‘Nivattantena navakehi bhikkhūhi paṭhamataraṃ nivattitabbaṃ. Pacchā therehi suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ . Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ. Idaṃ kho, bhikkhave, bhikkhūnaṃ bhattaggavattaṃ yathā bhikkhūhi bhattagge sammā vattitabba’’nti.
පඨමභාණවාරො නිට්‌ඨිතො.
Paṭhamabhāṇavāro niṭṭhito.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / භත්‌තග්‌ගවත්‌තකථා • Bhattaggavattakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / භත්‌තග්‌ගවත්‌තකථාවණ්‌ණනා • Bhattaggavattakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අනුමොදනවත්‌තකථාවණ්‌ණනා • Anumodanavattakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / භත්‌තග්‌ගවත්‌තකථාවණ්‌ණනා • Bhattaggavattakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 5. භත්‌තග්‌ගවත්‌තකථා • 5. Bhattaggavattakathā
