| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
༥. བྷཏྟགྒཝཏྟཀཐཱ
5. Bhattaggavattakathā
༣༦༣. ཏེན ཁོ པན སམཡེན ཚབྦགྒིཡཱ བྷིཀྑཱུ དུནྣིཝཏྠཱ དུཔྤཱརུཏཱ ཨནཱཀཔྤསམྤནྣཱ བྷཏྟགྒཾ གཙྪནྟི, ཝོཀྐམྨཔི ཐེརཱནཾ བྷིཀྑཱུནཾ པུརཏོ པུརཏོ གཙྪནྟི, ཐེརེཔི བྷིཀྑཱུ ཨནུཔཁཛྫ ནིསཱིདནྟི , ནཝེཔི བྷིཀྑཱུ ཨཱསནེན པཊིབཱཧནྟི, སངྒྷཱཊིམྤི ཨོཏྠརིཏྭཱ ཨནྟརགྷརེ ནིསཱིདནྟི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ དུནྣིཝཏྠཱ དུཔྤཱརུཏཱ ཨནཱཀཔྤསམྤནྣཱ བྷཏྟགྒཾ གཙྪིསྶནྟི, ཝོཀྐམྨཔི ཐེརཱནཾ བྷིཀྑཱུནཾ པུརཏོ པུརཏོ གཙྪིསྶནྟི, ཐེརེཔི བྷིཀྑཱུ ཨནུཔཁཛྫ ནིསཱིདིསྶནྟི, ནཝེཔི བྷིཀྑཱུ ཨཱསནེནཔི པཊིབཱཧིསྶནྟི, སངྒྷཱཊིམྤི ཨོཏྠརིཏྭཱ ཨནྟརགྷརེ ནིསཱིདིསྶནྟཱི’’ཏི! ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར, བྷིཀྑཝེ, ཚབྦགྒིཡཱ བྷིཀྑཱུ དུནྣིཝཏྠཱ དུཔྤཱརུཏཱ ཨནཱཀཔྤསམྤནྣཱ བྷཏྟགྒཾ གཙྪནྟི, ཝོཀྐམྨཔི ཐེརཱནཾ བྷིཀྑཱུནཾ པུརཏོ པུརཏོ གཙྪནྟི, ཐེརེཔི བྷིཀྑཱུ ཨནུཔཁཛྫ ནིསཱིདནྟི, ནཝེཔི བྷིཀྑཱུ ཨཱསནེན པཊིབཱཧནྟི, སངྒྷཱཊིམྤི ཨོཏྠརིཏྭཱ ཨནྟརགྷརེ ནིསཱིདནྟཱི’’ཏི? ‘‘སཙྩཾ བྷགཝཱ’’ཏི…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི –
363. Tena kho pana samayena chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti , navepi bhikkhū āsanena paṭibāhanti, saṅghāṭimpi ottharitvā antaraghare nisīdanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū dunnivatthā duppārutā anākappasampannā bhattaggaṃ gacchissanti, vokkammapi therānaṃ bhikkhūnaṃ purato purato gacchissanti, therepi bhikkhū anupakhajja nisīdissanti, navepi bhikkhū āsanenapi paṭibāhissanti, saṅghāṭimpi ottharitvā antaraghare nisīdissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti, navepi bhikkhū āsanena paṭibāhanti, saṅghāṭimpi ottharitvā antaraghare nisīdantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
༣༦༤. ‘‘ཏེན ཧི, བྷིཀྑཝེ, བྷིཀྑཱུནཾ བྷཏྟགྒཝཏྟཾ པཉྙཔེསྶཱམི ཡཐཱ བྷིཀྑཱུཧི བྷཏྟགྒེ སམྨཱ ཝཏྟིཏབྦཾ། སཙེ ཨཱརཱམེ ཀཱལོ ཨཱརོཙིཏོ ཧོཏི, ཏིམཎྜལཾ པཊིཙྪཱདེནྟེན པརིམཎྜལཾ ནིཝཱསེཏྭཱ ཀཱཡབནྡྷནཾ བནྡྷིཏྭཱ སགུཎཾ ཀཏྭཱ སངྒྷཱཊིཡོ པཱརུཔིཏྭཱ གཎྛིཀཾ པཊིམུཉྩིཏྭཱ དྷོཝིཏྭཱ པཏྟཾ གཧེཏྭཱ སཱདྷུཀཾ ཨཏརམཱནེན གཱམོ པཝིསིཏབྦོ།
364. ‘‘Tena hi, bhikkhave, bhikkhūnaṃ bhattaggavattaṃ paññapessāmi yathā bhikkhūhi bhattagge sammā vattitabbaṃ. Sace ārāme kālo ārocito hoti, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
‘‘ན ཝོཀྐམྨ ཐེརཱནཾ བྷིཀྑཱུནཾ པུརཏོ པུརཏོ གནྟབྦཾ། སུཔྤཊིཙྪནྣེན ཨནྟརགྷརེ གནྟབྦཾ། སུསཾཝུཏེན ཨནྟརགྷརེ གནྟབྦཾ། ཨོཀྑིཏྟཙཀྑུནཱ ཨནྟརགྷརེ གནྟབྦཾ། ན ཨུཀྑིཏྟཀཱཡ ཨནྟརགྷརེ གནྟབྦཾ། ན ཨུཛྫགྒྷིཀཱཡ ཨནྟརགྷརེ གནྟབྦཾ། ཨཔྤསདྡེན ཨནྟརགྷརེ གནྟབྦཾ། ན ཀཱཡཔྤཙཱལཀཾ ཨནྟརགྷརེ གནྟབྦཾ ། ན བཱཧུཔྤཙཱལཀཾ ཨནྟརགྷརེ གནྟབྦཾ། ན སཱིསཔྤཙཱལཀཾ ཨནྟརགྷརེ གནྟབྦཾ། ན ཁམྦྷཀཏེན ཨནྟརགྷརེ གནྟབྦཾ། ན ཨོགུཎྛིཏེན ཨནྟརགྷརེ གནྟབྦཾ། ན ཨུཀྐུཊིཀཱཡ ཨནྟརགྷརེ གནྟབྦཾ།
‘‘Na vokkamma therānaṃ bhikkhūnaṃ purato purato gantabbaṃ. Suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ . Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘སུཔྤཊིཙྪནྣེན ཨནྟརགྷརེ ནིསཱིདིཏབྦཾ། སུསཾཝུཏེན ཨནྟརགྷརེ ནིསཱིདིཏབྦཾ། ཨོཀྑིཏྟཙཀྑུནཱ ཨནྟརགྷརེ ནིསཱིདིཏབྦཾ། ན ཨུཀྑིཏྟཀཱཡ ཨནྟརགྷརེ ནིསཱིདིཏབྦཾ ན ཨུཛྫགྒྷིཀཱཡ ཨནྟརགྷརེ ནིསཱིདིཏབྦཾ, ཨཔྤསདྡེན ཨནྟརགྷརེ ནིསཱིདིཏབྦ། ན ཀཱཡཔྤཙཱལཀཾ ཨནྟརགྷརེ ནིསཱིདིཏབྦཾ། ན བཱཧུཔྤཙཱལཀཾ ཨནྟརགྷརེ ནིསཱིདིཏབྦཾ། ན སཱིསཔྤཙཱལཀཾ ཨནྟརགྷརེ ནིསཱིདིཏབྦཾ། ན ཁམྦྷཀཏེན ཨནྟརགྷརེ ནིསཱིདིཏབྦཾ། ན ཨོགུཎྛིཏེན ཨནྟརགྷརེ ནིསཱིདིཏབྦཾ། ན པལླཏྠིཀཱཡ ཨནྟརགྷརེ ནིསཱིདིཏབྦཾ། ན ཐེརེ བྷིཀྑཱུ ཨནུཔཁཛྫ ནིསཱིདིཏབྦཾ། ན ནཝཱ བྷིཀྑཱུ ཨཱསནེན པཊིབཱཧིཏབྦཱ། ན སངྒྷཱཊིཾ ཨོཏྠརིཏྭཱ ཨནྟརགྷརེ ནིསཱིདིཏབྦཾ།
‘‘Suppaṭicchannena antaraghare nisīditabbaṃ. Susaṃvutena antaraghare nisīditabbaṃ. Okkhittacakkhunā antaraghare nisīditabbaṃ. Na ukkhittakāya antaraghare nisīditabbaṃ na ujjagghikāya antaraghare nisīditabbaṃ, appasaddena antaraghare nisīditabba. Na kāyappacālakaṃ antaraghare nisīditabbaṃ. Na bāhuppacālakaṃ antaraghare nisīditabbaṃ. Na sīsappacālakaṃ antaraghare nisīditabbaṃ. Na khambhakatena antaraghare nisīditabbaṃ. Na oguṇṭhitena antaraghare nisīditabbaṃ. Na pallatthikāya antaraghare nisīditabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Na saṅghāṭiṃ ottharitvā antaraghare nisīditabbaṃ.
‘‘ཨུདཀེ དིཡྻམཱནེ ཨུབྷོཧི ཧཏྠེཧི པཏྟཾ པཊིགྒཧེཏྭཱ ཨུདཀཾ པཊིགྒཧེཏབྦཾ། ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན པཏྟོ དྷོཝིཏབྦོ། སཙེ ཨུདཀཔྤཊིགྒཱཧཀོ ཧོཏི, ནཱིཙཾ ཀཏྭཱ ཨུདཀཔྤཊིགྒཧེ ཨུདཀཾ ཨཱསིཉྩིཏབྦཾ – མཱ ཨུདཀཔྤཊིགྒཱཧཀོ ཨུདཀེན ཨོསིཉྩི 1, མཱ སཱམནྟཱ བྷིཀྑཱུ ཨུདཀེན ཨོསིཉྩིཾསུ 2, མཱ སངྒྷཱཊི ཨུདཀེན ཨོསིཉྩཱིཏི། སཙེ ཨུདཀཔྤཊིགྒཱཧཀོ ན ཧོཏི, ནཱིཙཾ ཀཏྭཱ ཚམཱཡ ཨུདཀཾ ཨཱསིཉྩིཏབྦཾ – མཱ སཱམནྟཱ བྷིཀྑཱུ ཨུདཀེན ཨོསིཉྩིཾསུ, མཱ སངྒྷཱཊི ཨུདཀེན ཨོསིཉྩཱིཏི།
‘‘Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci 3, mā sāmantā bhikkhū udakena osiñciṃsu 4, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti.
‘‘ཨོདནེ དིཡྻམཱནེ ཨུབྷོཧི ཧཏྠེཧི པཏྟཾ པཊིགྒཧེཏྭཱ ཨོདནོ པཊིགྒཧེཏབྦོ, སཱུཔསྶ ཨོཀཱསོ ཀཱཏབྦོ། སཙེ ཧོཏི སཔྤི ཝཱ ཏེལཾ ཝཱ ཨུཏྟརིབྷངྒཾ ཝཱ, ཐེརེན ཝཏྟབྦོ – ‘སབྦེསཾ སམཀཾ སམྤཱདེཧཱི’ཏི། སཀྐཙྩཾ པིཎྜཔཱཏོ པཊིགྒཧེཏབྦོ། པཏྟསཉྙིནཱ པིཎྜཔཱཏོ པཊིགྒཧེཏབྦོ། སམསཱུཔཀོ པིཎྜཔཱཏོ པཊིགྒཧེཏབྦོ། སམཏིཏྟིཀོ པིཎྜཔཱཏོ པཊིགྒཧེཏབྦོ།
‘‘Odane diyyamāne ubhohi hatthehi pattaṃ paṭiggahetvā odano paṭiggahetabbo, sūpassa okāso kātabbo. Sace hoti sappi vā telaṃ vā uttaribhaṅgaṃ vā, therena vattabbo – ‘sabbesaṃ samakaṃ sampādehī’ti. Sakkaccaṃ piṇḍapāto paṭiggahetabbo. Pattasaññinā piṇḍapāto paṭiggahetabbo. Samasūpako piṇḍapāto paṭiggahetabbo. Samatittiko piṇḍapāto paṭiggahetabbo.
‘‘ན ཏཱཝ ཐེརེན བྷུཉྫིཏབྦཾ ཡཱཝ ན སབྦེསཾ ཨོདནོ སམྤཏྟོ ཧོཏི། སཀྐཙྩཾ པིཎྜཔཱཏོ བྷུཉྫིཏབྦོ། པཏྟསཉྙིནཱ པིཎྜཔཱཏོ བྷུཉྫིཏབྦོ། སཔདཱནཾ པིཎྜཔཱཏོ བྷུཉྫིཏབྦོ། སམསཱུཔཀོ པིཎྜཔཱཏོ བྷུཉྫིཏབྦོ ། ན ཐཱུཔཀཏོ ཨོམདྡིཏྭཱ པིཎྜིཔཱཏོ བྷུཉྫིཏབྦོ། ན སཱུཔཾ ཝཱ བྱཉྫནཾ ཝཱ ཨོདནེན པཊིཙྪཱདེཏབྦཾ བྷིཡྻོཀམྱཏཾ ཨུཔཱདཱཡ། ན སཱུཔཾ ཝཱ ཨོདནཾ ཝཱ ཨགིལཱནེན ཨཏྟནོ ཨཏྠཱཡ ཝིཉྙཱཔེཏྭཱ བྷུཉྫིཏབྦཾ། ན ཨུཛ྄ཛྷཱནསཉྙིནཱ པརེསཾ པཏྟོ ཨོལོཀེཏབྦོ། ནཱཏིམཧནྟོ ཀབལོ༹ ཀཱཏབྦོ། པརིམཎྜལོ ཨཱལོཔོ ཀཱཏབྦོ། ན ཨནཱཧཊེ ཀབལེ༹ མུཁདྭཱརཾ ཝིཝརིཏབྦཾ། ན བྷུཉྫམཱནེན སབྦོ ཧཏྠོ མུཁེ པཀྑིཔིཏབྦོ། ན སཀབལེ༹ན མུཁེན བྱཱཧརིཏབྦཾ། ན པིཎྜུཀྑེཔཀཾ བྷུཉྫིཏབྦཾ། ན ཀབལཱ༹ཝཙྪེདཀཾ བྷུཉྫིཏབྦཾ། ན ཨཝགཎྜཀཱརཀཾ བྷུཉྫིཏབྦཾ། ན ཧཏྠནིདྡྷུནཀཾ བྷུཉྫིཏབྦཾ། ན སིཏྠཱཝཀཱརཀཾ བྷུཉྫིཏབྦཾ། ན ཛིཝ྄ཧཱནིཙྪཱརཀཾ བྷུཉྫིཏབྦཾ། ན ཙཔུཙཔུཀཱརཀཾ བྷུཉྫིཏབྦཾ། ན སུརུསུརུཀཱརཀཾ བྷུཉྫིཏབྦཾ། ན ཧཏྠནིལླེཧཀཾ བྷུཉྫིཏབྦཾ། ན པཏྟནིལླེཧཀཾ བྷུཉྫིཏབྦཾ། ན ཨོཊྛནིལླེཧཀཾ བྷུཉྫིཏབྦཾ།
‘‘Na tāva therena bhuñjitabbaṃ yāva na sabbesaṃ odano sampatto hoti. Sakkaccaṃ piṇḍapāto bhuñjitabbo. Pattasaññinā piṇḍapāto bhuñjitabbo. Sapadānaṃ piṇḍapāto bhuñjitabbo. Samasūpako piṇḍapāto bhuñjitabbo . Na thūpakato omadditvā piṇḍipāto bhuñjitabbo. Na sūpaṃ vā byañjanaṃ vā odanena paṭicchādetabbaṃ bhiyyokamyataṃ upādāya. Na sūpaṃ vā odanaṃ vā agilānena attano atthāya viññāpetvā bhuñjitabbaṃ. Na ujjhānasaññinā paresaṃ patto oloketabbo. Nātimahanto kabaḷo kātabbo. Parimaṇḍalo ālopo kātabbo. Na anāhaṭe kabaḷe mukhadvāraṃ vivaritabbaṃ. Na bhuñjamānena sabbo hattho mukhe pakkhipitabbo. Na sakabaḷena mukhena byāharitabbaṃ. Na piṇḍukkhepakaṃ bhuñjitabbaṃ. Na kabaḷāvacchedakaṃ bhuñjitabbaṃ. Na avagaṇḍakārakaṃ bhuñjitabbaṃ. Na hatthaniddhunakaṃ bhuñjitabbaṃ. Na sitthāvakārakaṃ bhuñjitabbaṃ. Na jivhānicchārakaṃ bhuñjitabbaṃ. Na capucapukārakaṃ bhuñjitabbaṃ. Na surusurukārakaṃ bhuñjitabbaṃ. Na hatthanillehakaṃ bhuñjitabbaṃ. Na pattanillehakaṃ bhuñjitabbaṃ. Na oṭṭhanillehakaṃ bhuñjitabbaṃ.
‘‘ན སཱམིསེན ཧཏྠེན པཱནཱིཡཐཱལཀོ པཊིགྒཧེཏབྦོ། ན ཏཱཝ ཐེརེན ཨུདཀཾ པཊིགྒཧེཏབྦཾ ཡཱཝ ན སབྦེཝ བྷུཏྟཱཝིནོ ཧོནྟི། ཨུདཀེ དིཡྻམཱནེ ཨུབྷོཧི ཧཏྠེཧི པཏྟཾ པཊིགྒཧེཏྭཱ ཨུདཀཾ པཊིགྒཧེཏབྦཾ། ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན པཏྟོ དྷོཝིཏབྦོ། སཙེ ཨུདཀཔྤཊིགྒཱཧཀོ ཧོཏི, ནཱིཙཾ ཀཏྭཱ ཨུདཀཔྤཊིགྒཧེ ཨུདཀཾ ཨཱསིཉྩིཏབྦཾ – མཱ ཨུདཀཔྤཊིགྒཱཧཀོ ཨུདཀེན ཨོསིཉྩི, མཱ སཱམནྟཱ བྷིཀྑཱུ ཨུདཀེན ཨོསིཉྩིཾསུ, མཱ སངྒྷཱཊི ཨུདཀེན ཨོསིཉྩཱིཏི། སཙེ ཨུདཀཔྤཊིགྒཱཧཀོ ན ཧོཏི, ནཱིཙཾ ཀཏྭཱ ཚམཱཡ ཨུདཀཾ ཨཱསིཉྩིཏབྦཾ – མཱ སཱམནྟཱ བྷིཀྑཱུ ཨུདཀེན ཨོསིཉྩིཾསུ, མཱ སངྒྷཱཊི ཨུདཀེན ཨོསིཉྩཱིཏི། ན སསིཏྠཀཾ པཏྟདྷོཝནཾ ཨནྟརགྷརེ ཚཌྜེཏབྦཾ།
‘‘Na sāmisena hatthena pānīyathālako paṭiggahetabbo. Na tāva therena udakaṃ paṭiggahetabbaṃ yāva na sabbeva bhuttāvino honti. Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci, mā sāmantā bhikkhū udakena osiñciṃsu, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti. Na sasitthakaṃ pattadhovanaṃ antaraghare chaḍḍetabbaṃ.
‘‘ནིཝཏྟནྟེན ནཝཀེཧི བྷིཀྑཱུཧི པཋམཏརཾ ནིཝཏྟིཏབྦཾ། པཙྪཱ ཐེརེཧི སུཔྤཊིཙྪནྣེན ཨནྟརགྷརེ གནྟབྦཾ། སུསཾཝུཏེན ཨནྟརགྷརེ གནྟབྦཾ། ཨོཀྑིཏྟཙཀྑུནཱ ཨནྟརགྷརེ གནྟབྦཾ། ན ཨུཀྑིཏྟཀཱཡ ཨནྟརགྷརེ གནྟབྦཾ། ན ཨུཛྫགྒྷིཀཱཡ ཨནྟརགྷརེ གནྟབྦཾ། ཨཔྤསདྡེན ཨནྟརགྷརེ གནྟབྦཾ། ན ཀཱཡཔྤཙཱལཀཾ ཨནྟརགྷརེ གནྟབྦཾ། ན བཱཧུཔྤཙཱལཀཾ ཨནྟརགྷརེ གནྟབྦཾ ། ན སཱིསཔྤཙཱལཀཾ ཨནྟརགྷརེ གནྟབྦཾ། ན ཁམྦྷཀཏེན ཨནྟརགྷརེ གནྟབྦཾ། ན ཨོགུཎྛིཏེན ཨནྟརགྷརེ གནྟབྦཾ། ན ཨུཀྐུཊིཀཱཡ ཨནྟརགྷརེ གནྟབྦཾ། ཨིདཾ ཁོ, བྷིཀྑཝེ, བྷིཀྑཱུནཾ བྷཏྟགྒཝཏྟཾ ཡཐཱ བྷིཀྑཱུཧི བྷཏྟགྒེ སམྨཱ ཝཏྟིཏབྦ’’ནྟི།
‘‘Nivattantena navakehi bhikkhūhi paṭhamataraṃ nivattitabbaṃ. Pacchā therehi suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ . Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ. Idaṃ kho, bhikkhave, bhikkhūnaṃ bhattaggavattaṃ yathā bhikkhūhi bhattagge sammā vattitabba’’nti.
པཋམབྷཱཎཝཱརོ ནིཊྛིཏོ།
Paṭhamabhāṇavāro niṭṭhito.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / བྷཏྟགྒཝཏྟཀཐཱ • Bhattaggavattakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / བྷཏྟགྒཝཏྟཀཐཱཝཎྞནཱ • Bhattaggavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨནུམོདནཝཏྟཀཐཱཝཎྞནཱ • Anumodanavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / བྷཏྟགྒཝཏྟཀཐཱཝཎྞནཱ • Bhattaggavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༥. བྷཏྟགྒཝཏྟཀཐཱ • 5. Bhattaggavattakathā
