| Library / Tipiṭaka / തിപിടക • Tipiṭaka / ചൂളവഗ്ഗപാളി • Cūḷavaggapāḷi |
൫. ഭത്തഗ്ഗവത്തകഥാ
5. Bhattaggavattakathā
൩൬൩. തേന ഖോ പന സമയേന ഛബ്ബഗ്ഗിയാ ഭിക്ഖൂ ദുന്നിവത്ഥാ ദുപ്പാരുതാ അനാകപ്പസമ്പന്നാ ഭത്തഗ്ഗം ഗച്ഛന്തി, വോക്കമ്മപി ഥേരാനം ഭിക്ഖൂനം പുരതോ പുരതോ ഗച്ഛന്തി, ഥേരേപി ഭിക്ഖൂ അനുപഖജ്ജ നിസീദന്തി , നവേപി ഭിക്ഖൂ ആസനേന പടിബാഹന്തി, സങ്ഘാടിമ്പി ഓത്ഥരിത്വാ അന്തരഘരേ നിസീദന്തി. യേ തേ ഭിക്ഖൂ അപ്പിച്ഛാ…പേ॰… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ ദുന്നിവത്ഥാ ദുപ്പാരുതാ അനാകപ്പസമ്പന്നാ ഭത്തഗ്ഗം ഗച്ഛിസ്സന്തി, വോക്കമ്മപി ഥേരാനം ഭിക്ഖൂനം പുരതോ പുരതോ ഗച്ഛിസ്സന്തി, ഥേരേപി ഭിക്ഖൂ അനുപഖജ്ജ നിസീദിസ്സന്തി, നവേപി ഭിക്ഖൂ ആസനേനപി പടിബാഹിസ്സന്തി, സങ്ഘാടിമ്പി ഓത്ഥരിത്വാ അന്തരഘരേ നിസീദിസ്സന്തീ’’തി! അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും…പേ॰… ‘‘സച്ചം കിര, ഭിക്ഖവേ, ഛബ്ബഗ്ഗിയാ ഭിക്ഖൂ ദുന്നിവത്ഥാ ദുപ്പാരുതാ അനാകപ്പസമ്പന്നാ ഭത്തഗ്ഗം ഗച്ഛന്തി, വോക്കമ്മപി ഥേരാനം ഭിക്ഖൂനം പുരതോ പുരതോ ഗച്ഛന്തി, ഥേരേപി ഭിക്ഖൂ അനുപഖജ്ജ നിസീദന്തി, നവേപി ഭിക്ഖൂ ആസനേന പടിബാഹന്തി, സങ്ഘാടിമ്പി ഓത്ഥരിത്വാ അന്തരഘരേ നിസീദന്തീ’’തി? ‘‘സച്ചം ഭഗവാ’’തി…പേ॰… വിഗരഹിത്വാ…പേ॰… ധമ്മിം കഥം കത്വാ ഭിക്ഖൂ ആമന്തേസി –
363. Tena kho pana samayena chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti , navepi bhikkhū āsanena paṭibāhanti, saṅghāṭimpi ottharitvā antaraghare nisīdanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū dunnivatthā duppārutā anākappasampannā bhattaggaṃ gacchissanti, vokkammapi therānaṃ bhikkhūnaṃ purato purato gacchissanti, therepi bhikkhū anupakhajja nisīdissanti, navepi bhikkhū āsanenapi paṭibāhissanti, saṅghāṭimpi ottharitvā antaraghare nisīdissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, chabbaggiyā bhikkhū dunnivatthā duppārutā anākappasampannā bhattaggaṃ gacchanti, vokkammapi therānaṃ bhikkhūnaṃ purato purato gacchanti, therepi bhikkhū anupakhajja nisīdanti, navepi bhikkhū āsanena paṭibāhanti, saṅghāṭimpi ottharitvā antaraghare nisīdantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
൩൬൪. ‘‘തേന ഹി, ഭിക്ഖവേ, ഭിക്ഖൂനം ഭത്തഗ്ഗവത്തം പഞ്ഞപേസ്സാമി യഥാ ഭിക്ഖൂഹി ഭത്തഗ്ഗേ സമ്മാ വത്തിതബ്ബം. സചേ ആരാമേ കാലോ ആരോചിതോ ഹോതി, തിമണ്ഡലം പടിച്ഛാദേന്തേന പരിമണ്ഡലം നിവാസേത്വാ കായബന്ധനം ബന്ധിത്വാ സഗുണം കത്വാ സങ്ഘാടിയോ പാരുപിത്വാ ഗണ്ഠികം പടിമുഞ്ചിത്വാ ധോവിത്വാ പത്തം ഗഹേത്വാ സാധുകം അതരമാനേന ഗാമോ പവിസിതബ്ബോ.
364. ‘‘Tena hi, bhikkhave, bhikkhūnaṃ bhattaggavattaṃ paññapessāmi yathā bhikkhūhi bhattagge sammā vattitabbaṃ. Sace ārāme kālo ārocito hoti, timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo.
‘‘ന വോക്കമ്മ ഥേരാനം ഭിക്ഖൂനം പുരതോ പുരതോ ഗന്തബ്ബം. സുപ്പടിച്ഛന്നേന അന്തരഘരേ ഗന്തബ്ബം. സുസംവുതേന അന്തരഘരേ ഗന്തബ്ബം. ഓക്ഖിത്തചക്ഖുനാ അന്തരഘരേ ഗന്തബ്ബം. ന ഉക്ഖിത്തകായ അന്തരഘരേ ഗന്തബ്ബം. ന ഉജ്ജഗ്ഘികായ അന്തരഘരേ ഗന്തബ്ബം. അപ്പസദ്ദേന അന്തരഘരേ ഗന്തബ്ബം. ന കായപ്പചാലകം അന്തരഘരേ ഗന്തബ്ബം . ന ബാഹുപ്പചാലകം അന്തരഘരേ ഗന്തബ്ബം. ന സീസപ്പചാലകം അന്തരഘരേ ഗന്തബ്ബം. ന ഖമ്ഭകതേന അന്തരഘരേ ഗന്തബ്ബം. ന ഓഗുണ്ഠിതേന അന്തരഘരേ ഗന്തബ്ബം. ന ഉക്കുടികായ അന്തരഘരേ ഗന്തബ്ബം.
‘‘Na vokkamma therānaṃ bhikkhūnaṃ purato purato gantabbaṃ. Suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ . Na bāhuppacālakaṃ antaraghare gantabbaṃ. Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘സുപ്പടിച്ഛന്നേന അന്തരഘരേ നിസീദിതബ്ബം. സുസംവുതേന അന്തരഘരേ നിസീദിതബ്ബം. ഓക്ഖിത്തചക്ഖുനാ അന്തരഘരേ നിസീദിതബ്ബം. ന ഉക്ഖിത്തകായ അന്തരഘരേ നിസീദിതബ്ബം ന ഉജ്ജഗ്ഘികായ അന്തരഘരേ നിസീദിതബ്ബം, അപ്പസദ്ദേന അന്തരഘരേ നിസീദിതബ്ബ. ന കായപ്പചാലകം അന്തരഘരേ നിസീദിതബ്ബം. ന ബാഹുപ്പചാലകം അന്തരഘരേ നിസീദിതബ്ബം. ന സീസപ്പചാലകം അന്തരഘരേ നിസീദിതബ്ബം. ന ഖമ്ഭകതേന അന്തരഘരേ നിസീദിതബ്ബം. ന ഓഗുണ്ഠിതേന അന്തരഘരേ നിസീദിതബ്ബം. ന പല്ലത്ഥികായ അന്തരഘരേ നിസീദിതബ്ബം. ന ഥേരേ ഭിക്ഖൂ അനുപഖജ്ജ നിസീദിതബ്ബം. ന നവാ ഭിക്ഖൂ ആസനേന പടിബാഹിതബ്ബാ. ന സങ്ഘാടിം ഓത്ഥരിത്വാ അന്തരഘരേ നിസീദിതബ്ബം.
‘‘Suppaṭicchannena antaraghare nisīditabbaṃ. Susaṃvutena antaraghare nisīditabbaṃ. Okkhittacakkhunā antaraghare nisīditabbaṃ. Na ukkhittakāya antaraghare nisīditabbaṃ na ujjagghikāya antaraghare nisīditabbaṃ, appasaddena antaraghare nisīditabba. Na kāyappacālakaṃ antaraghare nisīditabbaṃ. Na bāhuppacālakaṃ antaraghare nisīditabbaṃ. Na sīsappacālakaṃ antaraghare nisīditabbaṃ. Na khambhakatena antaraghare nisīditabbaṃ. Na oguṇṭhitena antaraghare nisīditabbaṃ. Na pallatthikāya antaraghare nisīditabbaṃ. Na there bhikkhū anupakhajja nisīditabbaṃ. Na navā bhikkhū āsanena paṭibāhitabbā. Na saṅghāṭiṃ ottharitvā antaraghare nisīditabbaṃ.
‘‘ഉദകേ ദിയ്യമാനേ ഉഭോഹി ഹത്ഥേഹി പത്തം പടിഗ്ഗഹേത്വാ ഉദകം പടിഗ്ഗഹേതബ്ബം. നീചം കത്വാ സാധുകം അപ്പടിഘംസന്തേന പത്തോ ധോവിതബ്ബോ. സചേ ഉദകപ്പടിഗ്ഗാഹകോ ഹോതി, നീചം കത്വാ ഉദകപ്പടിഗ്ഗഹേ ഉദകം ആസിഞ്ചിതബ്ബം – മാ ഉദകപ്പടിഗ്ഗാഹകോ ഉദകേന ഓസിഞ്ചി 1, മാ സാമന്താ ഭിക്ഖൂ ഉദകേന ഓസിഞ്ചിംസു 2, മാ സങ്ഘാടി ഉദകേന ഓസിഞ്ചീതി. സചേ ഉദകപ്പടിഗ്ഗാഹകോ ന ഹോതി, നീചം കത്വാ ഛമായ ഉദകം ആസിഞ്ചിതബ്ബം – മാ സാമന്താ ഭിക്ഖൂ ഉദകേന ഓസിഞ്ചിംസു, മാ സങ്ഘാടി ഉദകേന ഓസിഞ്ചീതി.
‘‘Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci 3, mā sāmantā bhikkhū udakena osiñciṃsu 4, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti.
‘‘ഓദനേ ദിയ്യമാനേ ഉഭോഹി ഹത്ഥേഹി പത്തം പടിഗ്ഗഹേത്വാ ഓദനോ പടിഗ്ഗഹേതബ്ബോ, സൂപസ്സ ഓകാസോ കാതബ്ബോ. സചേ ഹോതി സപ്പി വാ തേലം വാ ഉത്തരിഭങ്ഗം വാ, ഥേരേന വത്തബ്ബോ – ‘സബ്ബേസം സമകം സമ്പാദേഹീ’തി. സക്കച്ചം പിണ്ഡപാതോ പടിഗ്ഗഹേതബ്ബോ. പത്തസഞ്ഞിനാ പിണ്ഡപാതോ പടിഗ്ഗഹേതബ്ബോ. സമസൂപകോ പിണ്ഡപാതോ പടിഗ്ഗഹേതബ്ബോ. സമതിത്തികോ പിണ്ഡപാതോ പടിഗ്ഗഹേതബ്ബോ.
‘‘Odane diyyamāne ubhohi hatthehi pattaṃ paṭiggahetvā odano paṭiggahetabbo, sūpassa okāso kātabbo. Sace hoti sappi vā telaṃ vā uttaribhaṅgaṃ vā, therena vattabbo – ‘sabbesaṃ samakaṃ sampādehī’ti. Sakkaccaṃ piṇḍapāto paṭiggahetabbo. Pattasaññinā piṇḍapāto paṭiggahetabbo. Samasūpako piṇḍapāto paṭiggahetabbo. Samatittiko piṇḍapāto paṭiggahetabbo.
‘‘ന താവ ഥേരേന ഭുഞ്ജിതബ്ബം യാവ ന സബ്ബേസം ഓദനോ സമ്പത്തോ ഹോതി. സക്കച്ചം പിണ്ഡപാതോ ഭുഞ്ജിതബ്ബോ. പത്തസഞ്ഞിനാ പിണ്ഡപാതോ ഭുഞ്ജിതബ്ബോ. സപദാനം പിണ്ഡപാതോ ഭുഞ്ജിതബ്ബോ. സമസൂപകോ പിണ്ഡപാതോ ഭുഞ്ജിതബ്ബോ . ന ഥൂപകതോ ഓമദ്ദിത്വാ പിണ്ഡിപാതോ ഭുഞ്ജിതബ്ബോ. ന സൂപം വാ ബ്യഞ്ജനം വാ ഓദനേന പടിച്ഛാദേതബ്ബം ഭിയ്യോകമ്യതം ഉപാദായ. ന സൂപം വാ ഓദനം വാ അഗിലാനേന അത്തനോ അത്ഥായ വിഞ്ഞാപേത്വാ ഭുഞ്ജിതബ്ബം. ന ഉജ്ഝാനസഞ്ഞിനാ പരേസം പത്തോ ഓലോകേതബ്ബോ. നാതിമഹന്തോ കബളോ കാതബ്ബോ. പരിമണ്ഡലോ ആലോപോ കാതബ്ബോ. ന അനാഹടേ കബളേ മുഖദ്വാരം വിവരിതബ്ബം. ന ഭുഞ്ജമാനേന സബ്ബോ ഹത്ഥോ മുഖേ പക്ഖിപിതബ്ബോ. ന സകബളേന മുഖേന ബ്യാഹരിതബ്ബം. ന പിണ്ഡുക്ഖേപകം ഭുഞ്ജിതബ്ബം. ന കബളാവച്ഛേദകം ഭുഞ്ജിതബ്ബം. ന അവഗണ്ഡകാരകം ഭുഞ്ജിതബ്ബം. ന ഹത്ഥനിദ്ധുനകം ഭുഞ്ജിതബ്ബം. ന സിത്ഥാവകാരകം ഭുഞ്ജിതബ്ബം. ന ജിവ്ഹാനിച്ഛാരകം ഭുഞ്ജിതബ്ബം. ന ചപുചപുകാരകം ഭുഞ്ജിതബ്ബം. ന സുരുസുരുകാരകം ഭുഞ്ജിതബ്ബം. ന ഹത്ഥനില്ലേഹകം ഭുഞ്ജിതബ്ബം. ന പത്തനില്ലേഹകം ഭുഞ്ജിതബ്ബം. ന ഓട്ഠനില്ലേഹകം ഭുഞ്ജിതബ്ബം.
‘‘Na tāva therena bhuñjitabbaṃ yāva na sabbesaṃ odano sampatto hoti. Sakkaccaṃ piṇḍapāto bhuñjitabbo. Pattasaññinā piṇḍapāto bhuñjitabbo. Sapadānaṃ piṇḍapāto bhuñjitabbo. Samasūpako piṇḍapāto bhuñjitabbo . Na thūpakato omadditvā piṇḍipāto bhuñjitabbo. Na sūpaṃ vā byañjanaṃ vā odanena paṭicchādetabbaṃ bhiyyokamyataṃ upādāya. Na sūpaṃ vā odanaṃ vā agilānena attano atthāya viññāpetvā bhuñjitabbaṃ. Na ujjhānasaññinā paresaṃ patto oloketabbo. Nātimahanto kabaḷo kātabbo. Parimaṇḍalo ālopo kātabbo. Na anāhaṭe kabaḷe mukhadvāraṃ vivaritabbaṃ. Na bhuñjamānena sabbo hattho mukhe pakkhipitabbo. Na sakabaḷena mukhena byāharitabbaṃ. Na piṇḍukkhepakaṃ bhuñjitabbaṃ. Na kabaḷāvacchedakaṃ bhuñjitabbaṃ. Na avagaṇḍakārakaṃ bhuñjitabbaṃ. Na hatthaniddhunakaṃ bhuñjitabbaṃ. Na sitthāvakārakaṃ bhuñjitabbaṃ. Na jivhānicchārakaṃ bhuñjitabbaṃ. Na capucapukārakaṃ bhuñjitabbaṃ. Na surusurukārakaṃ bhuñjitabbaṃ. Na hatthanillehakaṃ bhuñjitabbaṃ. Na pattanillehakaṃ bhuñjitabbaṃ. Na oṭṭhanillehakaṃ bhuñjitabbaṃ.
‘‘ന സാമിസേന ഹത്ഥേന പാനീയഥാലകോ പടിഗ്ഗഹേതബ്ബോ. ന താവ ഥേരേന ഉദകം പടിഗ്ഗഹേതബ്ബം യാവ ന സബ്ബേവ ഭുത്താവിനോ ഹോന്തി. ഉദകേ ദിയ്യമാനേ ഉഭോഹി ഹത്ഥേഹി പത്തം പടിഗ്ഗഹേത്വാ ഉദകം പടിഗ്ഗഹേതബ്ബം. നീചം കത്വാ സാധുകം അപ്പടിഘംസന്തേന പത്തോ ധോവിതബ്ബോ. സചേ ഉദകപ്പടിഗ്ഗാഹകോ ഹോതി, നീചം കത്വാ ഉദകപ്പടിഗ്ഗഹേ ഉദകം ആസിഞ്ചിതബ്ബം – മാ ഉദകപ്പടിഗ്ഗാഹകോ ഉദകേന ഓസിഞ്ചി, മാ സാമന്താ ഭിക്ഖൂ ഉദകേന ഓസിഞ്ചിംസു, മാ സങ്ഘാടി ഉദകേന ഓസിഞ്ചീതി. സചേ ഉദകപ്പടിഗ്ഗാഹകോ ന ഹോതി, നീചം കത്വാ ഛമായ ഉദകം ആസിഞ്ചിതബ്ബം – മാ സാമന്താ ഭിക്ഖൂ ഉദകേന ഓസിഞ്ചിംസു, മാ സങ്ഘാടി ഉദകേന ഓസിഞ്ചീതി. ന സസിത്ഥകം പത്തധോവനം അന്തരഘരേ ഛഡ്ഡേതബ്ബം.
‘‘Na sāmisena hatthena pānīyathālako paṭiggahetabbo. Na tāva therena udakaṃ paṭiggahetabbaṃ yāva na sabbeva bhuttāvino honti. Udake diyyamāne ubhohi hatthehi pattaṃ paṭiggahetvā udakaṃ paṭiggahetabbaṃ. Nīcaṃ katvā sādhukaṃ appaṭighaṃsantena patto dhovitabbo. Sace udakappaṭiggāhako hoti, nīcaṃ katvā udakappaṭiggahe udakaṃ āsiñcitabbaṃ – mā udakappaṭiggāhako udakena osiñci, mā sāmantā bhikkhū udakena osiñciṃsu, mā saṅghāṭi udakena osiñcīti. Sace udakappaṭiggāhako na hoti, nīcaṃ katvā chamāya udakaṃ āsiñcitabbaṃ – mā sāmantā bhikkhū udakena osiñciṃsu, mā saṅghāṭi udakena osiñcīti. Na sasitthakaṃ pattadhovanaṃ antaraghare chaḍḍetabbaṃ.
‘‘നിവത്തന്തേന നവകേഹി ഭിക്ഖൂഹി പഠമതരം നിവത്തിതബ്ബം. പച്ഛാ ഥേരേഹി സുപ്പടിച്ഛന്നേന അന്തരഘരേ ഗന്തബ്ബം. സുസംവുതേന അന്തരഘരേ ഗന്തബ്ബം. ഓക്ഖിത്തചക്ഖുനാ അന്തരഘരേ ഗന്തബ്ബം. ന ഉക്ഖിത്തകായ അന്തരഘരേ ഗന്തബ്ബം. ന ഉജ്ജഗ്ഘികായ അന്തരഘരേ ഗന്തബ്ബം. അപ്പസദ്ദേന അന്തരഘരേ ഗന്തബ്ബം. ന കായപ്പചാലകം അന്തരഘരേ ഗന്തബ്ബം. ന ബാഹുപ്പചാലകം അന്തരഘരേ ഗന്തബ്ബം . ന സീസപ്പചാലകം അന്തരഘരേ ഗന്തബ്ബം. ന ഖമ്ഭകതേന അന്തരഘരേ ഗന്തബ്ബം. ന ഓഗുണ്ഠിതേന അന്തരഘരേ ഗന്തബ്ബം. ന ഉക്കുടികായ അന്തരഘരേ ഗന്തബ്ബം. ഇദം ഖോ, ഭിക്ഖവേ, ഭിക്ഖൂനം ഭത്തഗ്ഗവത്തം യഥാ ഭിക്ഖൂഹി ഭത്തഗ്ഗേ സമ്മാ വത്തിതബ്ബ’’ന്തി.
‘‘Nivattantena navakehi bhikkhūhi paṭhamataraṃ nivattitabbaṃ. Pacchā therehi suppaṭicchannena antaraghare gantabbaṃ. Susaṃvutena antaraghare gantabbaṃ. Okkhittacakkhunā antaraghare gantabbaṃ. Na ukkhittakāya antaraghare gantabbaṃ. Na ujjagghikāya antaraghare gantabbaṃ. Appasaddena antaraghare gantabbaṃ. Na kāyappacālakaṃ antaraghare gantabbaṃ. Na bāhuppacālakaṃ antaraghare gantabbaṃ . Na sīsappacālakaṃ antaraghare gantabbaṃ. Na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ. Idaṃ kho, bhikkhave, bhikkhūnaṃ bhattaggavattaṃ yathā bhikkhūhi bhattagge sammā vattitabba’’nti.
പഠമഭാണവാരോ നിട്ഠിതോ.
Paṭhamabhāṇavāro niṭṭhito.
Footnotes:
Related texts:
അട്ഠകഥാ • Aṭṭhakathā / വിനയപിടക (അട്ഠകഥാ) • Vinayapiṭaka (aṭṭhakathā) / ചൂളവഗ്ഗ-അട്ഠകഥാ • Cūḷavagga-aṭṭhakathā / ഭത്തഗ്ഗവത്തകഥാ • Bhattaggavattakathā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / സാരത്ഥദീപനീ-ടീകാ • Sāratthadīpanī-ṭīkā / ഭത്തഗ്ഗവത്തകഥാവണ്ണനാ • Bhattaggavattakathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വജിരബുദ്ധി-ടീകാ • Vajirabuddhi-ṭīkā / അനുമോദനവത്തകഥാവണ്ണനാ • Anumodanavattakathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വിമതിവിനോദനീ-ടീകാ • Vimativinodanī-ṭīkā / ഭത്തഗ്ഗവത്തകഥാവണ്ണനാ • Bhattaggavattakathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / ൫. ഭത്തഗ്ഗവത്തകഥാ • 5. Bhattaggavattakathā
