| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
ভত্তগ্গৰত্তকথাৰণ্ণনা
Bhattaggavattakathāvaṇṇanā
৩৬৪. মনুস্সানং পরিৰিসনট্ঠানন্তি যত্থ অন্তোৰিহারেপি মনুস্সা সপুত্তদারা আৰসিত্ৰা ভিক্খূ নেত্ৰা ভোজেন্তি। আসনেসু সতীতি নিসীদনট্ঠানেসু সন্তেসু। ইদং, ভন্তে, আসনং উচ্চন্তি আসন্নে সমভূমিভাগে পঞ্ঞত্তং থেরাসনেন সমকং আসনং সন্ধায ৰুত্তং, থেরাসনতো পন উচ্চতরে আপুচ্ছিত্ৰাপি নিসীদিতুং ন ৰট্টতি। যদি তং আসন্নম্পি নীচতরং হোতি, অনাপুচ্ছাপি নিসীদিতুং ৰট্টতি। মহাথেরস্সেৰ আপত্তীতি আসনেন পটিবাহনাপত্তিযা আপত্তি। অৰত্থরিত্ৰাতি পারুতসঙ্ঘাটিং অৰত্থরিত্ৰা, অনুক্খিপিত্ৰাতি অত্থো।
364.Manussānaṃparivisanaṭṭhānanti yattha antovihārepi manussā saputtadārā āvasitvā bhikkhū netvā bhojenti. Āsanesu satīti nisīdanaṭṭhānesu santesu. Idaṃ, bhante, āsanaṃ uccanti āsanne samabhūmibhāge paññattaṃ therāsanena samakaṃ āsanaṃ sandhāya vuttaṃ, therāsanato pana uccatare āpucchitvāpi nisīdituṃ na vaṭṭati. Yadi taṃ āsannampi nīcataraṃ hoti, anāpucchāpi nisīdituṃ vaṭṭati. Mahātherasseva āpattīti āsanena paṭibāhanāpattiyā āpatti. Avattharitvāti pārutasaṅghāṭiṃ avattharitvā, anukkhipitvāti attho.
পাল়িযং ‘‘উভোহি হত্থেহি…পে॰… ওদনো পটিগ্গহেতব্বো’’তি ইদং হত্থতলে ৰা পচ্ছিপিট্ঠিআদিদুস্সণ্ঠিতাধারে ৰা পত্তং ঠপেত্ৰা ওদনস্স গহণকালে পত্তস্স অপতনত্থায ৰুত্তং, সুসজ্জিতে পন আধারে পত্তং ঠপেত্ৰা একেন হত্থেন তং পরামসিত্ৰাপি ওদনং পটিগ্গহেতুং ৰট্টতি এৰ। উভোহি হত্থেহি…পে॰… উদকং পটিগ্গহেতব্বন্তি এত্থাপি এসেৰ নযো।
Pāḷiyaṃ ‘‘ubhohi hatthehi…pe… odano paṭiggahetabbo’’ti idaṃ hatthatale vā pacchipiṭṭhiādidussaṇṭhitādhāre vā pattaṃ ṭhapetvā odanassa gahaṇakāle pattassa apatanatthāya vuttaṃ, susajjite pana ādhāre pattaṃ ṭhapetvā ekena hatthena taṃ parāmasitvāpi odanaṃ paṭiggahetuṃ vaṭṭati eva. Ubhohi hatthehi…pe… udakaṃ paṭiggahetabbanti etthāpi eseva nayo.
হত্থধোৰনউদকন্তি ভোজনাৰসানে উদকং। তেনাহ ‘‘পানীযং পিৰিত্ৰা হত্থা ধোৰিতব্বা’’তি। তেন পরিযোসানে ধোৰনমেৰ পটিক্খিত্তং, ভোজনন্তরে পন পানীযপিৰনাদিনা নযেন হত্থং ধোৰিত্ৰা পুন ভুঞ্জিতুং ৰট্টতীতি দস্সেতি। পোত্থকেসু পন ‘‘পানীযং পিৰিত্ৰা হত্থা ন ধোৰিতব্বা’’তি লিখন্তি, তং পুরিমৰচনেন ন সমেতি পরিযোসানে উদকস্সেৰ ‘‘হত্থধোৰনউদক’’ন্তি ৰুত্তত্তা। সচে মনুস্সা ধোৰথ, ভন্তেতিআদি নিট্ঠিতভত্তং নিসিন্নং থেরং সন্ধায ৰুত্তং। ধুরে দ্ৰারসমীপে।
Hatthadhovanaudakanti bhojanāvasāne udakaṃ. Tenāha ‘‘pānīyaṃ pivitvā hatthā dhovitabbā’’ti. Tena pariyosāne dhovanameva paṭikkhittaṃ, bhojanantare pana pānīyapivanādinā nayena hatthaṃ dhovitvā puna bhuñjituṃ vaṭṭatīti dasseti. Potthakesu pana ‘‘pānīyaṃ pivitvā hatthā na dhovitabbā’’ti likhanti, taṃ purimavacanena na sameti pariyosāne udakasseva ‘‘hatthadhovanaudaka’’nti vuttattā. Sace manussā dhovatha, bhantetiādi niṭṭhitabhattaṃ nisinnaṃ theraṃ sandhāya vuttaṃ. Dhure dvārasamīpe.
ভত্তগ্গৰত্তকথাৰণ্ণনা নিট্ঠিতা।
Bhattaggavattakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ৫. ভত্তগ্গৰত্তকথা • 5. Bhattaggavattakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / ভত্তগ্গৰত্তকথা • Bhattaggavattakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ভত্তগ্গৰত্তকথাৰণ্ণনা • Bhattaggavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অনুমোদনৰত্তকথাৰণ্ণনা • Anumodanavattakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. ভত্তগ্গৰত্তকথা • 5. Bhattaggavattakathā
