| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ಭತ್ತಗ್ಗವತ್ತಕಥಾವಣ್ಣನಾ
Bhattaggavattakathāvaṇṇanā
೩೬೪. ಮನುಸ್ಸಾನಂ ಪರಿವಿಸನಟ್ಠಾನನ್ತಿ ಯತ್ಥ ಅನ್ತೋವಿಹಾರೇಪಿ ಮನುಸ್ಸಾ ಸಪುತ್ತದಾರಾ ಆವಸಿತ್ವಾ ಭಿಕ್ಖೂ ನೇತ್ವಾ ಭೋಜೇನ್ತಿ। ಆಸನೇಸು ಸತೀತಿ ನಿಸೀದನಟ್ಠಾನೇಸು ಸನ್ತೇಸು। ಇದಂ, ಭನ್ತೇ, ಆಸನಂ ಉಚ್ಚನ್ತಿ ಆಸನ್ನೇ ಸಮಭೂಮಿಭಾಗೇ ಪಞ್ಞತ್ತಂ ಥೇರಾಸನೇನ ಸಮಕಂ ಆಸನಂ ಸನ್ಧಾಯ ವುತ್ತಂ, ಥೇರಾಸನತೋ ಪನ ಉಚ್ಚತರೇ ಆಪುಚ್ಛಿತ್ವಾಪಿ ನಿಸೀದಿತುಂ ನ ವಟ್ಟತಿ। ಯದಿ ತಂ ಆಸನ್ನಮ್ಪಿ ನೀಚತರಂ ಹೋತಿ, ಅನಾಪುಚ್ಛಾಪಿ ನಿಸೀದಿತುಂ ವಟ್ಟತಿ। ಮಹಾಥೇರಸ್ಸೇವ ಆಪತ್ತೀತಿ ಆಸನೇನ ಪಟಿಬಾಹನಾಪತ್ತಿಯಾ ಆಪತ್ತಿ। ಅವತ್ಥರಿತ್ವಾತಿ ಪಾರುತಸಙ್ಘಾಟಿಂ ಅವತ್ಥರಿತ್ವಾ, ಅನುಕ್ಖಿಪಿತ್ವಾತಿ ಅತ್ಥೋ।
364.Manussānaṃparivisanaṭṭhānanti yattha antovihārepi manussā saputtadārā āvasitvā bhikkhū netvā bhojenti. Āsanesu satīti nisīdanaṭṭhānesu santesu. Idaṃ, bhante, āsanaṃ uccanti āsanne samabhūmibhāge paññattaṃ therāsanena samakaṃ āsanaṃ sandhāya vuttaṃ, therāsanato pana uccatare āpucchitvāpi nisīdituṃ na vaṭṭati. Yadi taṃ āsannampi nīcataraṃ hoti, anāpucchāpi nisīdituṃ vaṭṭati. Mahātherasseva āpattīti āsanena paṭibāhanāpattiyā āpatti. Avattharitvāti pārutasaṅghāṭiṃ avattharitvā, anukkhipitvāti attho.
ಪಾಳಿಯಂ ‘‘ಉಭೋಹಿ ಹತ್ಥೇಹಿ…ಪೇ॰… ಓದನೋ ಪಟಿಗ್ಗಹೇತಬ್ಬೋ’’ತಿ ಇದಂ ಹತ್ಥತಲೇ ವಾ ಪಚ್ಛಿಪಿಟ್ಠಿಆದಿದುಸ್ಸಣ್ಠಿತಾಧಾರೇ ವಾ ಪತ್ತಂ ಠಪೇತ್ವಾ ಓದನಸ್ಸ ಗಹಣಕಾಲೇ ಪತ್ತಸ್ಸ ಅಪತನತ್ಥಾಯ ವುತ್ತಂ, ಸುಸಜ್ಜಿತೇ ಪನ ಆಧಾರೇ ಪತ್ತಂ ಠಪೇತ್ವಾ ಏಕೇನ ಹತ್ಥೇನ ತಂ ಪರಾಮಸಿತ್ವಾಪಿ ಓದನಂ ಪಟಿಗ್ಗಹೇತುಂ ವಟ್ಟತಿ ಏವ। ಉಭೋಹಿ ಹತ್ಥೇಹಿ…ಪೇ॰… ಉದಕಂ ಪಟಿಗ್ಗಹೇತಬ್ಬನ್ತಿ ಏತ್ಥಾಪಿ ಏಸೇವ ನಯೋ।
Pāḷiyaṃ ‘‘ubhohi hatthehi…pe… odano paṭiggahetabbo’’ti idaṃ hatthatale vā pacchipiṭṭhiādidussaṇṭhitādhāre vā pattaṃ ṭhapetvā odanassa gahaṇakāle pattassa apatanatthāya vuttaṃ, susajjite pana ādhāre pattaṃ ṭhapetvā ekena hatthena taṃ parāmasitvāpi odanaṃ paṭiggahetuṃ vaṭṭati eva. Ubhohi hatthehi…pe… udakaṃ paṭiggahetabbanti etthāpi eseva nayo.
ಹತ್ಥಧೋವನಉದಕನ್ತಿ ಭೋಜನಾವಸಾನೇ ಉದಕಂ। ತೇನಾಹ ‘‘ಪಾನೀಯಂ ಪಿವಿತ್ವಾ ಹತ್ಥಾ ಧೋವಿತಬ್ಬಾ’’ತಿ। ತೇನ ಪರಿಯೋಸಾನೇ ಧೋವನಮೇವ ಪಟಿಕ್ಖಿತ್ತಂ, ಭೋಜನನ್ತರೇ ಪನ ಪಾನೀಯಪಿವನಾದಿನಾ ನಯೇನ ಹತ್ಥಂ ಧೋವಿತ್ವಾ ಪುನ ಭುಞ್ಜಿತುಂ ವಟ್ಟತೀತಿ ದಸ್ಸೇತಿ। ಪೋತ್ಥಕೇಸು ಪನ ‘‘ಪಾನೀಯಂ ಪಿವಿತ್ವಾ ಹತ್ಥಾ ನ ಧೋವಿತಬ್ಬಾ’’ತಿ ಲಿಖನ್ತಿ, ತಂ ಪುರಿಮವಚನೇನ ನ ಸಮೇತಿ ಪರಿಯೋಸಾನೇ ಉದಕಸ್ಸೇವ ‘‘ಹತ್ಥಧೋವನಉದಕ’’ನ್ತಿ ವುತ್ತತ್ತಾ। ಸಚೇ ಮನುಸ್ಸಾ ಧೋವಥ, ಭನ್ತೇತಿಆದಿ ನಿಟ್ಠಿತಭತ್ತಂ ನಿಸಿನ್ನಂ ಥೇರಂ ಸನ್ಧಾಯ ವುತ್ತಂ। ಧುರೇ ದ್ವಾರಸಮೀಪೇ।
Hatthadhovanaudakanti bhojanāvasāne udakaṃ. Tenāha ‘‘pānīyaṃ pivitvā hatthā dhovitabbā’’ti. Tena pariyosāne dhovanameva paṭikkhittaṃ, bhojanantare pana pānīyapivanādinā nayena hatthaṃ dhovitvā puna bhuñjituṃ vaṭṭatīti dasseti. Potthakesu pana ‘‘pānīyaṃ pivitvā hatthā na dhovitabbā’’ti likhanti, taṃ purimavacanena na sameti pariyosāne udakasseva ‘‘hatthadhovanaudaka’’nti vuttattā. Sace manussā dhovatha, bhantetiādi niṭṭhitabhattaṃ nisinnaṃ theraṃ sandhāya vuttaṃ. Dhure dvārasamīpe.
ಭತ್ತಗ್ಗವತ್ತಕಥಾವಣ್ಣನಾ ನಿಟ್ಠಿತಾ।
Bhattaggavattakathāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ೫. ಭತ್ತಗ್ಗವತ್ತಕಥಾ • 5. Bhattaggavattakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ಭತ್ತಗ್ಗವತ್ತಕಥಾ • Bhattaggavattakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಭತ್ತಗ್ಗವತ್ತಕಥಾವಣ್ಣನಾ • Bhattaggavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅನುಮೋದನವತ್ತಕಥಾವಣ್ಣನಾ • Anumodanavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೫. ಭತ್ತಗ್ಗವತ್ತಕಥಾ • 5. Bhattaggavattakathā
