| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
7. бхааванаасуд̇д̇аван̣н̣анаа
7. Bhāvanāsuttavaṇṇanā
71. сад̇д̇амз ад̇т̇асса асаад̇хигаа ‘‘бхааванам̣ анануяуд̇д̇ассаа’’д̇и вуд̇д̇ад̇д̇аа. самбхааванад̇т̇зд̇и ‘‘аби наама звам̣ сияаа’’д̇и вигаббанад̇т̇о самбхааванад̇т̇о. зван̃хи логз силидтаважанам̣ ход̇ийд̇и згамзва сан̇кам̣ авад̇ваа абарааяа сан̇кааяа сад̣̇д̇хим̣ важанам̣ логз силидтаважанам̣ ход̇и яат̇аа ‘‘д̣̇вз ваа д̇ийн̣и ваа уд̣̇агапусид̇ааний’’д̇и. саммаа ад̇хисаяид̇аанийд̇и баад̣̇аад̣̇ийхи ад̇д̇анаа нзсам̣ гин̃жи убагхаад̇ам̣ агаронд̇ияаа б̣ахиваад̇аад̣̇ибариссаяабарихаран̣ад̇т̇ам̣ саммад̣̇зва убари саяид̇аани. убариад̇т̇о хзд̇т̇а ад̇хи-сад̣̇д̣̇о. уд̇ум̣ г̇ан̣хаабзнд̇ияаад̇и д̇зсам̣ алласинзхабарияаад̣̇аанад̇т̇ам̣ ад̇д̇ано гааяусмаавасзна уд̇ум̣ г̇ан̣хаабзнд̇ияаа. д̇знааха ‘‘усмийгад̇ааний’’д̇и. саммаа барибхаавид̇аанийд̇и саммад̣̇зва саб̣б̣асо гуггудаваасанааяа ваасид̇аани. д̇знааха ‘‘гуггудаг̇анд̇хам̣ г̇аахаабид̇ааний’’д̇и. зд̇т̇а жа саммаабарисзд̣̇анам̣ гуггудаг̇анд̇хабарибхааванан̃жа саммааад̇хисаяанасаммаабарисзд̣̇ананибпад̇д̇ияаа аанубхааванибпаад̣̇ид̇анд̇и д̣̇адтаб̣б̣ам̣. саммааад̇хисаяанзнзва хи ид̇арад̣̇ваяам̣ иж̇жхад̇и. на хи саммааад̇хисаяанад̇о висум̣ саммаабарисзд̣̇анасса саммаабарибхааванасса жа гааран̣ам̣ ад̇т̇и. д̇зна бана сад̣̇д̇хим̣язва ид̇арзсам̣ д̣̇виннамби иж̇жханад̇о вуд̇д̇ам̣.
71. Sattame atthassa asādhikā ‘‘bhāvanaṃ ananuyuttassā’’ti vuttattā. Sambhāvanattheti ‘‘api nāma evaṃ siyā’’ti vikappanattho sambhāvanattho. Evañhi loke siliṭṭhavacanaṃ hotīti ekameva saṅkhaṃ avatvā aparāya saṅkhāya saddhiṃ vacanaṃ loke siliṭṭhavacanaṃ hoti yathā ‘‘dve vā tīṇi vā udakaphusitānī’’ti. Sammā adhisayitānīti pādādīhi attanā nesaṃ kiñci upaghātaṃ akarontiyā bahivātādiparissayapariharaṇatthaṃ sammadeva upari sayitāni. Upariattho hettha adhi-saddo. Utuṃ gaṇhāpentiyāti tesaṃ allasinehapariyādānatthaṃ attano kāyusmāvasena utuṃ gaṇhāpentiyā. Tenāha ‘‘usmīkatānī’’ti. Sammā paribhāvitānīti sammadeva sabbaso kukkuṭavāsanāya vāsitāni. Tenāha ‘‘kukkuṭagandhaṃ gāhāpitānī’’ti. Ettha ca sammāparisedanaṃ kukkuṭagandhaparibhāvanañca sammāadhisayanasammāparisedananipphattiyā ānubhāvanipphāditanti daṭṭhabbaṃ. Sammāadhisayaneneva hi itaradvayaṃ ijjhati. Na hi sammāadhisayanato visuṃ sammāparisedanassa sammāparibhāvanassa ca kāraṇaṃ atthi. Tena pana saddhiṃyeva itaresaṃ dvinnampi ijjhanato vuttaṃ.
д̇ивид̇хагирияаагаран̣знаад̇и саммааад̇хисаяанаад̣̇ид̇ивид̇хагирияаагаран̣знаад̇и ад̇т̇о. гин̃жааби ‘‘звам̣ ахо вад̇а мз’’д̇иаад̣̇инаа на ижчаа уббаж̇ж̇зяяа гааран̣асса бана самбаад̣̇ид̇ад̇д̇аа, ат̇а ко бхаб̣б̣аава д̇з абхиниб̣бхиж̇ж̇ид̇унд̇и яож̇анаа. гасмаа бхаб̣б̣аад̇и ааха ‘‘д̇з хи яасмаа д̇ааяаа’’д̇иаад̣̇и. саяамбийд̇и ан̣д̣аани. барин̣ааманд̇и барибаагам̣ б̣ахинигкаманаяог̇яад̇ам̣. яат̇аа габааласса д̇ануд̇аа аалогасса анд̇о бан̃н̃ааяамаанасса гааран̣ам̣, д̇ат̇аа габааласса д̇ануд̇ааяа накасикаамукад̇ун̣д̣агаанам̣ карад̇ааяа жа алласинзхабарияаад̣̇аанам̣ гааран̣аважананд̇и д̣̇адтаб̣б̣ам̣. д̇асмаад̇и аалогасса анд̇о бан̃н̃ааяамаанад̇о саяан̃жа барибаагаг̇ад̇ад̇д̇аа.
Tividhakiriyākaraṇenāti sammāadhisayanāditividhakiriyākaraṇenāti attho. Kiñcāpi ‘‘evaṃ aho vata me’’tiādinā na icchā uppajjeyya kāraṇassa pana sampāditattā, atha kho bhabbāva te abhinibbhijjitunti yojanā. Kasmā bhabbāti āha ‘‘te hi yasmā tāyā’’tiādi. Sayampīti aṇḍāni. Pariṇāmanti paripākaṃ bahinikkhamanayogyataṃ. Yathā kapālassa tanutā ālokassa anto paññāyamānassa kāraṇaṃ, tathā kapālassa tanutāya nakhasikhāmukhatuṇḍakānaṃ kharatāya ca allasinehapariyādānaṃ kāraṇavacananti daṭṭhabbaṃ. Tasmāti ālokassa anto paññāyamānato sayañca paripākagatattā.
обаммасамбадибаад̣̇ананд̇и обаммад̇т̇асса убамзяязна саммад̣̇зва бадибаад̣̇анам̣. д̇анд̇и обаммасамбадибаад̣̇анам̣. званд̇и ид̣̇аани вужжамаанаагаарзна. ад̇т̇знаад̇и убамзяяад̇т̇зна сам̣санд̣̇зд̇ваа саха яож̇зд̇ваа. самбаад̣̇анзна самбаяуд̇д̇ад̇хаммавасзна н̃аан̣асса д̇игкабхааво взд̣̇ид̇аб̣б̣о. н̃аан̣асса хи сабхаавад̇о сад̇инзбаггад̇о жа д̇игкабхааво, самаад̇хивасзна карабхааво, сад̣̇д̇хаавасзна виббасаннабхааво. барин̣аамагаалод̇и б̣алававибассанаагаало. вад̣дхигаалод̇и вудтаанаг̇ааминивибассанаагаало. ануломадтаанияаа хи вибассанаа г̇ахид̇аг̇аб̣бхаа наама д̇ад̣̇аа маг̇г̇аг̇аб̣бхасса г̇ахид̇ад̇д̇аа. д̇аж̇ж̇аад̇иганд̇и д̇асса вибассанаануяог̇асса ануруубам̣. сад̇т̇ааби авиж̇ж̇ан̣д̣агосам̣ бахарад̇и, д̣̇зсанааби винзяяасанд̇аанаг̇ад̇ам̣ авиж̇ж̇ан̣д̣агосам̣ бахарад̇и, яат̇аатаанз таад̇ум̣ на д̣̇зд̇и.
Opammasampaṭipādananti opammatthassa upameyyena sammadeva paṭipādanaṃ. Tanti opammasampaṭipādanaṃ. Evanti idāni vuccamānākārena. Atthenāti upameyyatthena saṃsandetvā saha yojetvā. Sampādanena sampayuttadhammavasena ñāṇassa tikkhabhāvo veditabbo. Ñāṇassa hi sabhāvato satinepakkato ca tikkhabhāvo, samādhivasena kharabhāvo, saddhāvasena vippasannabhāvo. Pariṇāmakāloti balavavipassanākālo. Vaḍḍhikāloti vuṭṭhānagāminivipassanākālo. Anulomaṭṭhāniyā hi vipassanā gahitagabbhā nāma tadā maggagabbhassa gahitattā. Tajjātikanti tassa vipassanānuyogassa anurūpaṃ. Satthāpi avijjaṇḍakosaṃ paharati, desanāpi vineyyasantānagataṃ avijjaṇḍakosaṃ paharati, yathāṭhāne ṭhātuṃ na deti.
оламб̣агасан̇каад̇анд̇и оламб̣агасуд̇д̇асан̇каад̇ам̣. ‘‘бала’’нд̇и хи д̇асса суд̇д̇асса наамам̣. жаарзд̇ваа д̣̇ааруно хздтаа д̣̇осаж̇аананад̇т̇ам̣ уссаабзд̇ваа. г̇ан̣д̣ам̣ харад̇ийд̇и балаг̇ан̣д̣од̇и зд̇зна ‘‘балзна г̇ан̣д̣ахааро балаг̇ан̣д̣од̇и бажчимабад̣̇з уд̇д̇арабад̣̇алобзна нид̣̇д̣̇зсо’’д̇и д̣̇ассзд̇и. г̇ахан̣адтаанзд̇и хад̇т̇зна г̇ахзд̇аб̣б̣адтаанз . саммад̣̇зва кибийяанд̇и зд̇зна гааяад̣̇ужжарид̇аад̣̇ийнийд̇и сан̇кзбо, баб̣б̣аж̇ж̇аава сан̇кзбо баб̣б̣аж̇ж̇аасан̇кзбо. д̇зна вибассанам̣ ануяун̃ж̇анд̇асса буг̇г̇аласса аж̇аананд̇ассзва аасаваанам̣ баригкаяо ид̇ха вибассанаанисам̣сод̇и ад̇хиббзд̇о.
Olambakasaṅkhātanti olambakasuttasaṅkhātaṃ. ‘‘Pala’’nti hi tassa suttassa nāmaṃ. Cāretvā dāruno heṭṭhā dosajānanatthaṃ ussāpetvā. Gaṇḍaṃ haratīti palagaṇḍoti etena ‘‘palena gaṇḍahāro palagaṇḍoti pacchimapade uttarapadalopena niddeso’’ti dasseti. Gahaṇaṭṭhāneti hatthena gahetabbaṭṭhāne . Sammadeva khipīyanti etena kāyaduccaritādīnīti saṅkhepo, pabbajjāva saṅkhepo pabbajjāsaṅkhepo. Tena vipassanaṃ anuyuñjantassa puggalassa ajānantasseva āsavānaṃ parikkhayo idha vipassanānisaṃsoti adhippeto.
хзманд̇игзна гааран̣абхууд̇зна, бхуммад̇т̇з ваа зд̇ам̣ гаран̣аважанам̣, хзманд̇игзд̇и ад̇т̇о. бадиббассамбханд̇ийд̇и бадиббассад̣̇д̇хапалаани хонд̇и. д̇знааха ‘‘бууд̇игаани бхаванд̇ий’’д̇и. махаасамуд̣̇д̣̇о вияа саасанам̣ аг̇аад̇хаг̇амбхийрабхаавад̇о. нааваа вияа яог̇ааважаро махогхуд̇д̇арад̇о. барияааяанам̣ вияаад̇и барид̇о абараабарам̣ яааяанам̣ вияа. каж̇ж̇амаанаананд̇и каад̣̇анд̇зна вияа уд̣̇агзна кзбияамаанаб̣анд̇ханаанам̣. д̇анубхаавод̇и барияудтаанабавад̇д̇ияаа асамад̇т̇ад̇ааяа д̣̇уб̣б̣алабхааво. вибассанаан̃аан̣абийд̇ибаамож̇ж̇зхийд̇и вибассанаан̃аан̣асамудтид̇зхи бийд̇ибаамож̇ж̇зхи. огкааяамаанзд̇и вибассанаагаммадтаанз вийт̇иббадибаадияаа огкааяамаанз, бадисан̇каанубассанааяа ваа огкааяамаанз. сан̇каарубзгкааяа багкааяамаанз. д̣̇уб̣б̣алад̇аа д̣̇ийбид̇аа ‘‘аббагасирзнзва сам̣яож̇анаани бадиббассамбханд̇и, бууд̇игаани бхаванд̇ий’’д̇и вуд̇д̇ад̇д̇аа.
Hemantikena kāraṇabhūtena, bhummatthe vā etaṃ karaṇavacanaṃ, hemantiketi attho. Paṭippassambhantīti paṭippassaddhaphalāni honti. Tenāha ‘‘pūtikāni bhavantī’’ti. Mahāsamuddo viya sāsanaṃ agādhagambhīrabhāvato. Nāvā viya yogāvacaro mahoghuttarato. Pariyāyanaṃ viyāti parito aparāparaṃ yāyanaṃ viya. Khajjamānānanti khādantena viya udakena khepiyamānabandhanānaṃ. Tanubhāvoti pariyuṭṭhānapavattiyā asamatthatāya dubbalabhāvo. Vipassanāñāṇapītipāmojjehīti vipassanāñāṇasamuṭṭhitehi pītipāmojjehi. Okkhāyamāneti vipassanākammaṭṭhāne vīthippaṭipāṭiyā okkhāyamāne, paṭisaṅkhānupassanāya vā okkhāyamāne. Saṅkhārupekkhāya pakkhāyamāne. Dubbalatā dīpitā ‘‘appakasireneva saṃyojanāni paṭippassambhanti, pūtikāni bhavantī’’ti vuttattā.
бхааванаасуд̇д̇аван̣н̣анаа нидтид̇аа.
Bhāvanāsuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 7. бхааванаасуд̇д̇ам̣ • 7. Bhāvanāsuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 7. бхааванаасуд̇д̇аван̣н̣анаа • 7. Bhāvanāsuttavaṇṇanā
