| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
13. භවපඤ්‌හාසුත්‌තං
13. Bhavapañhāsuttaṃ
326. ‘‘‘භවො, භවො’ති, ආවුසො සාරිපුත්‌ත, වුච්‌චති. කතමො නු ඛො, ආවුසො, භවො’’ති? ‘‘තයො මෙ, ආවුසො, භවා. කාමභවො, රූපභවො, අරූපභවො – ඉමෙ ඛො, ආවුසො, තයො භවා’’ති. ‘‘අත්‌ථි පනාවුසො, මග්‌ගො අත්‌ථි පටිපදා, එතෙසං භවානං පරිඤ්‌ඤායා’’ති? ‘‘අත්‌ථි ඛො, ආවුසො, මග්‌ගො අත්‌ථි පටිපදා, එතෙසං භවානං පරිඤ්‌ඤායා’’ති. ‘‘කතමො, පනාවුසො, මග්‌ගො කතමා පටිපදා, එතෙසං භවානං පරිඤ්‌ඤායා’’ති? ‘‘අයමෙව ඛො, ආවුසො, අරියො අට්‌ඨඞ්‌ගිකො මග්‌ගො, එතෙසං භවානං පරිඤ්‌ඤාය, සෙය්‍යථිදං – සම්‌මාදිට්‌ඨි සම්‌මාසඞ්‌කප්‌පො සම්‌මාවාචා සම්‌මාකම්‌මන්‌තො සම්‌මාආජීවො සම්‌මාවායාමො සම්‌මාසති සම්‌මාසමාධි. අයං ඛො, ආවුසො, මග්‌ගො අයං පටිපදා, එතෙසං භවානං පරිඤ්‌ඤායා’’ති. ‘‘භද්‌දකො, ආවුසො, මග්‌ගො භද්‌දිකා පටිපදා, එතෙසං භවානං පරිඤ්‌ඤාය. අලඤ්‌ච පනාවුසො සාරිපුත්‌ත, අප්‌පමාදායා’’ති. තෙරසමං.
326. ‘‘‘Bhavo, bhavo’ti, āvuso sāriputta, vuccati. Katamo nu kho, āvuso, bhavo’’ti? ‘‘Tayo me, āvuso, bhavā. Kāmabhavo, rūpabhavo, arūpabhavo – ime kho, āvuso, tayo bhavā’’ti. ‘‘Atthi panāvuso, maggo atthi paṭipadā, etesaṃ bhavānaṃ pariññāyā’’ti? ‘‘Atthi kho, āvuso, maggo atthi paṭipadā, etesaṃ bhavānaṃ pariññāyā’’ti. ‘‘Katamo, panāvuso, maggo katamā paṭipadā, etesaṃ bhavānaṃ pariññāyā’’ti? ‘‘Ayameva kho, āvuso, ariyo aṭṭhaṅgiko maggo, etesaṃ bhavānaṃ pariññāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi. Ayaṃ kho, āvuso, maggo ayaṃ paṭipadā, etesaṃ bhavānaṃ pariññāyā’’ti. ‘‘Bhaddako, āvuso, maggo bhaddikā paṭipadā, etesaṃ bhavānaṃ pariññāya. Alañca panāvuso sāriputta, appamādāyā’’ti. Terasamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3-15. ධම්‌මවාදීපඤ්‌හාසුත්‌තාදිවණ්‌ණනා • 3-15. Dhammavādīpañhāsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3-15. ධම්‌මවාදීපඤ්‌හසුත්‌තාදිවණ්‌ණනා • 3-15. Dhammavādīpañhasuttādivaṇṇanā
