| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
бхаавзд̇аб̣б̣анид̣̇д̣̇зсаван̣н̣анаа
Bhāvetabbaniddesavaṇṇanā
25. бхаавзд̇аб̣б̣анид̣̇д̣̇зсз гааяаг̇ад̇аасад̇ийд̇и гааяаг̇ад̇аасад̇исуд̇д̇анд̇з (ма. ни. 3.153 аад̣̇аяо) вуд̇д̇аа аанаабаанажад̇уирияаабат̇акуд̣̇д̣̇агаирияаабат̇ад̣̇вад̇д̇им̣саагааражад̇уд̇хаад̇унавасиват̇игаабадигуула- вавад̇т̇аабагаманасигаарасамбаяуд̇д̇аа яат̇аануруубам̣ руубаж̇жхаанасамбаяуд̇д̇аа жа сад̇и. саа хи д̇зсу гааязсу г̇ад̇аа бавад̇д̇аад̇и гааяаг̇ад̇аад̇и вужжад̇и. саад̇асахаг̇ад̇аад̇и мад̇хурасукавзд̣̇аяид̇асан̇каад̇зна саад̇зна саха згуббаад̣̇аад̣̇ибхаавам̣ г̇ад̇аа. д̇аб̣бхаавз вогин̣н̣з аарамман̣з ниссаяз сам̣садтз д̣̇иссад̇и сахаг̇ад̇асад̣̇д̣̇о бан̃жасу ад̇т̇зсу ж̇инаважанз. ‘‘яааяам̣ д̇ан̣хаа боноб̣бхавигаа нанд̣̇ирааг̇асахаг̇ад̇аа’’д̇и (вибха. 203) зд̇т̇а д̇аб̣бхаавз, нанд̣̇ирааг̇абхууд̇аад̇и ад̇т̇о. ‘‘яаа, бхигкавз, виймам̣саа госаж̇ж̇асахаг̇ад̇аа госаж̇ж̇асамбаяуд̇д̇аа’’д̇и (сам̣. ни. 5.832) зд̇т̇а вогин̣н̣з, анд̇аранд̇араа уббаж̇ж̇амаанзна госаж̇ж̇зна вогин̣н̣аад̇и ад̇т̇о. ‘‘лаабхий ход̇и руубасахаг̇ад̇аанам̣ ваа самаабад̇д̇ийнам̣ аруубасахаг̇ад̇аанам̣ ваа самаабад̇д̇ийна’’нд̇и (бу. ба. 3-8) зд̇т̇а аарамман̣з, руубааруубаарамман̣аананд̇и ад̇т̇о. ‘‘адтигасан̃н̃аасахаг̇ад̇ам̣ сад̇исамб̣ож̇жхан̇г̇ам̣ бхаавзд̇ий’’д̇и (сам̣. ни. 5.238) зд̇т̇а ниссаяз, адтигасан̃н̃ааниссаяам̣ адтигасан̃н̃ам̣ бхаавзд̇ваа бадилад̣̇д̇ханд̇и ад̇т̇о. ‘‘ид̣̇ам̣ сукам̣ имааяа бийд̇ияаа сахаг̇ад̇ам̣ ход̇и сахаж̇аад̇ам̣ самбаяуд̇д̇а’’нд̇и (вибха. 578) зд̇т̇а сам̣садтз, саммиссанд̇и ад̇т̇о. имасмимби бад̣̇з сам̣садто ад̇хиббзд̇о. саад̇асам̣садтаа хи саад̇асахаг̇ад̇аад̇и вуд̇д̇аа. саа хи табзд̇ваа жад̇уд̇т̇ам̣ жхаанам̣ сзсзсу саад̇асахаг̇ад̇аа ход̇и, сад̇иби жа убзгкаасахаг̇ад̇ад̇д̇з язбхуяяавасзна саад̇асахаг̇ад̇аад̇и вуд̇д̇аа, буримаж̇жхаанамуулагад̇д̇аа ваа жад̇уд̇т̇аж̇жхаанасса саад̇асахаг̇ад̇ааяа убзгкаасахаг̇ад̇ааби вуд̇д̇аава ход̇и , убзгкааяа бана санд̇з сукз вуд̇д̇ад̇д̇аа бхаг̇авад̇аа саад̇асахаг̇ад̇аад̇и жад̇уд̇т̇аж̇жхаанасамбаяуд̇д̇ааби вуд̇д̇аава ход̇и.
25. Bhāvetabbaniddese kāyagatāsatīti kāyagatāsatisuttante (ma. ni. 3.153 ādayo) vuttā ānāpānacatuiriyāpathakhuddakairiyāpathadvattiṃsākāracatudhātunavasivathikāpaṭikūla- vavatthāpakamanasikārasampayuttā yathānurūpaṃ rūpajjhānasampayuttā ca sati. Sā hi tesu kāyesu gatā pavattāti kāyagatāti vuccati. Sātasahagatāti madhurasukhavedayitasaṅkhātena sātena saha ekuppādādibhāvaṃ gatā. Tabbhāve vokiṇṇe ārammaṇe nissaye saṃsaṭṭhe dissati sahagatasaddo pañcasu atthesu jinavacane. ‘‘Yāyaṃ taṇhā ponobbhavikā nandirāgasahagatā’’ti (vibha. 203) ettha tabbhāve, nandirāgabhūtāti attho. ‘‘Yā, bhikkhave, vīmaṃsā kosajjasahagatā kosajjasampayuttā’’ti (saṃ. ni. 5.832) ettha vokiṇṇe, antarantarā uppajjamānena kosajjena vokiṇṇāti attho. ‘‘Lābhī hoti rūpasahagatānaṃ vā samāpattīnaṃ arūpasahagatānaṃ vā samāpattīna’’nti (pu. pa. 3-8) ettha ārammaṇe, rūpārūpārammaṇānanti attho. ‘‘Aṭṭhikasaññāsahagataṃ satisambojjhaṅgaṃ bhāvetī’’ti (saṃ. ni. 5.238) ettha nissaye, aṭṭhikasaññānissayaṃ aṭṭhikasaññaṃ bhāvetvā paṭiladdhanti attho. ‘‘Idaṃ sukhaṃ imāya pītiyā sahagataṃ hoti sahajātaṃ sampayutta’’nti (vibha. 578) ettha saṃsaṭṭhe, sammissanti attho. Imasmimpi pade saṃsaṭṭho adhippeto. Sātasaṃsaṭṭhā hi sātasahagatāti vuttā. Sā hi ṭhapetvā catutthaṃ jhānaṃ sesesu sātasahagatā hoti, satipi ca upekkhāsahagatatte yebhuyyavasena sātasahagatāti vuttā, purimajjhānamūlakattā vā catutthajjhānassa sātasahagatāya upekkhāsahagatāpi vuttāva hoti , upekkhāya pana sante sukhe vuttattā bhagavatā sātasahagatāti catutthajjhānasampayuttāpi vuttāva hoti.
самат̇о жа вибассанаа жаад̇и гаамажчанд̣̇аад̣̇аяо бажжанийгад̇хаммз самзд̇и винаасзд̇ийд̇и самат̇о. самаад̇хиссзд̇ам̣ наамам̣. анижжад̇аад̣̇ивасзна вивид̇хзхи аагаарзхи д̇хаммз бассад̇ийд̇и вибассанаа. бан̃н̃ааязд̇ам̣ наамам̣. имз бана д̣̇вз д̣̇асуд̇д̇арабарияааяз буб̣б̣абхааг̇аад̇и вуд̇д̇аа, сан̇г̇ийд̇ибарияааяз жа логияалогуд̇д̇арамиссагаад̇и. д̇аяо самаад̇хийд̇и савид̇агго савижааро самаад̇хи , авид̇агго вижаарамад̇д̇о самаад̇хи, авид̇агго авижааро самаад̇хи. самбаяог̇авасзна вад̇д̇амаанзна саха вид̇аггзна савид̇агго, саха вижаарзна савижааро. со кан̣игасамаад̇хи, вибассанаасамаад̇хи, убажаарасамаад̇хи, батамаж̇жхаанасамаад̇хи. над̇т̇и зд̇асса вид̇аггод̇и авид̇агго. вид̇аггавижаарзсу вижааро мад̇д̇аа барамаа бамаан̣ам̣ зд̇ассаад̇и вижаарамад̇д̇о, вижаарад̇о уд̇д̇ари вид̇аггзна самбаяог̇ам̣ на г̇ажчад̇ийд̇и ад̇т̇о. со бан̃жаганаяз д̣̇уд̇ияаж̇жхаанасамаад̇хи, д̇ад̣̇убхаяавирахид̇о авид̇агго авижааро самаад̇хи. со жад̇угганаяз д̣̇уд̇ияаж̇жхаанаад̣̇и, бан̃жаганаяз д̇ад̇ияаж̇жхаанаад̣̇и руубааважарасамаад̇хи. имз д̇аяоби логияаа зва. сан̇г̇ийд̇ибарияааяз абарзби д̇аяо самаад̇хий вуд̇д̇аа – ‘‘сун̃н̃ад̇о самаад̇хи, анимид̇д̇о самаад̇хи, аббан̣ихид̇о самаад̇хий’’д̇и (д̣̇ий. ни. 3.305). на д̇з ид̇ха ад̇хиббзд̇аа.
Samatho ca vipassanā cāti kāmacchandādayo paccanīkadhamme sameti vināsetīti samatho. Samādhissetaṃ nāmaṃ. Aniccatādivasena vividhehi ākārehi dhamme passatīti vipassanā. Paññāyetaṃ nāmaṃ. Ime pana dve dasuttarapariyāye pubbabhāgāti vuttā, saṅgītipariyāye ca lokiyalokuttaramissakāti. Tayo samādhīti savitakko savicāro samādhi , avitakko vicāramatto samādhi, avitakko avicāro samādhi. Sampayogavasena vattamānena saha vitakkena savitakko, saha vicārena savicāro. So khaṇikasamādhi, vipassanāsamādhi, upacārasamādhi, paṭhamajjhānasamādhi. Natthi etassa vitakkoti avitakko. Vitakkavicāresu vicāro mattā paramā pamāṇaṃ etassāti vicāramatto, vicārato uttari vitakkena sampayogaṃ na gacchatīti attho. So pañcakanaye dutiyajjhānasamādhi, tadubhayavirahito avitakko avicāro samādhi. So catukkanaye dutiyajjhānādi, pañcakanaye tatiyajjhānādi rūpāvacarasamādhi. Ime tayopi lokiyā eva. Saṅgītipariyāye aparepi tayo samādhī vuttā – ‘‘suññato samādhi, animitto samādhi, appaṇihito samādhī’’ti (dī. ni. 3.305). Na te idha adhippetā.
жад̇д̇ааро сад̇ибадтаанаад̇и гааяаанубассанаасад̇ибадтаанам̣, взд̣̇анаанубассанаасад̇ибадтаанам̣, жид̇д̇аанубассанаасад̇ибадтаанам̣, д̇хаммаанубассанаасад̇ибадтаанам̣. буб̣б̣абхааг̇з жуд̣̇д̣̇асавид̇хзна гааяам̣ бариг̇г̇ан̣хад̇о гааяаанубассанаасад̇ибадтаанам̣, нававид̇хзна взд̣̇анам̣ бариг̇г̇ан̣хад̇о взд̣̇анаанубассанаасад̇ибадтаанам̣, сол̣асавид̇хзна жид̇д̇ам̣ бариг̇г̇ан̣хад̇о жид̇д̇аанубассанаасад̇ибадтаанам̣, бан̃жавид̇хзна д̇хаммз бариг̇г̇ан̣хад̇о д̇хаммаанубассанаасад̇ибадтаанам̣ взд̣̇ид̇аб̣б̣ам̣. логуд̇д̇арам̣ бана ид̇ха на ад̇хиббзд̇ам̣. бан̃жан̇г̇иго самаад̇хийд̇и бан̃жа ан̇г̇аани асса санд̇ийд̇и бан̃жан̇г̇иго, жад̇уд̇т̇аж̇жхаанасамаад̇хи. бийд̇ипаран̣ад̇аа, сукапаран̣ад̇аа, жзд̇опаран̣ад̇аа, аалогапаран̣ад̇аа, бажжавзгкан̣анимид̇д̇анд̇и бан̃жа ан̇г̇аани. бийд̇им̣ парамаанаа уббаж̇ж̇ад̇ийд̇и д̣̇вийсу жхаанзсу бан̃н̃аа бийд̇ипаран̣ад̇аа наама. сукам̣ парамаанаа уббаж̇ж̇ад̇ийд̇и д̇ийсу жхаанзсу бан̃н̃аа сукапаран̣ад̇аа наама. барзсам̣ жзд̇о парамаанаа уббаж̇ж̇ад̇ийд̇и жзд̇обарияабан̃н̃аа жзд̇опаран̣ад̇аа наама. аалогам̣ парамаанаа уббаж̇ж̇ад̇ийд̇и д̣̇иб̣б̣ажагкубан̃н̃аа аалогапаран̣ад̇аа наама. бажжавзгкан̣ан̃аан̣ам̣ бажжавзгкан̣анимид̇д̇ам̣ наама. вуд̇д̇амби жзд̇ам̣ –
Cattāro satipaṭṭhānāti kāyānupassanāsatipaṭṭhānaṃ, vedanānupassanāsatipaṭṭhānaṃ, cittānupassanāsatipaṭṭhānaṃ, dhammānupassanāsatipaṭṭhānaṃ. Pubbabhāge cuddasavidhena kāyaṃ pariggaṇhato kāyānupassanāsatipaṭṭhānaṃ, navavidhena vedanaṃ pariggaṇhato vedanānupassanāsatipaṭṭhānaṃ, soḷasavidhena cittaṃ pariggaṇhato cittānupassanāsatipaṭṭhānaṃ, pañcavidhena dhamme pariggaṇhato dhammānupassanāsatipaṭṭhānaṃ veditabbaṃ. Lokuttaraṃ pana idha na adhippetaṃ. Pañcaṅgiko samādhīti pañca aṅgāni assa santīti pañcaṅgiko, catutthajjhānasamādhi. Pītipharaṇatā, sukhapharaṇatā, cetopharaṇatā, ālokapharaṇatā, paccavekkhaṇanimittanti pañca aṅgāni. Pītiṃ pharamānā uppajjatīti dvīsu jhānesu paññā pītipharaṇatā nāma. Sukhaṃ pharamānā uppajjatīti tīsu jhānesu paññā sukhapharaṇatā nāma. Paresaṃ ceto pharamānā uppajjatīti cetopariyapaññā cetopharaṇatā nāma. Ālokaṃ pharamānā uppajjatīti dibbacakkhupaññā ālokapharaṇatā nāma. Paccavekkhaṇañāṇaṃ paccavekkhaṇanimittaṃ nāma. Vuttampi cetaṃ –
‘‘д̣̇вийсу жхаанзсу бан̃н̃аа бийд̇ипаран̣ад̇аа, д̇ийсу жхаанзсу бан̃н̃аа сукапаран̣ад̇аа, баражид̇д̇абан̃н̃аа жзд̇опаран̣ад̇аа, д̣̇иб̣б̣ажагкубан̃н̃аа аалогапаран̣ад̇аа, д̇амхаа д̇амхаа самаад̇химхаа вудтид̇асса бажжавзгкан̣ан̃аан̣ам̣ бажжавзгкан̣анимид̇д̇а’’нд̇и (вибха. 804).
‘‘Dvīsu jhānesu paññā pītipharaṇatā, tīsu jhānesu paññā sukhapharaṇatā, paracittapaññā cetopharaṇatā, dibbacakkhupaññā ālokapharaṇatā, tamhā tamhā samādhimhā vuṭṭhitassa paccavekkhaṇañāṇaṃ paccavekkhaṇanimitta’’nti (vibha. 804).
д̇ан̃хи вудтид̇асамаад̇хисса бавад̇д̇аагаараг̇ахан̣ад̇о нимид̇д̇анд̇и вуд̇д̇ам̣. д̇ад̇т̇а жа бийд̇ипаран̣ад̇аа сукапаран̣ад̇аа д̣̇вз баад̣̇аа вияа, жзд̇опаран̣ад̇аа аалогапаран̣ад̇аа д̣̇вз хад̇т̇аа вияа, абхин̃н̃аабаад̣̇агам̣ жад̇уд̇т̇аж̇жхаанам̣ маж̇жхимагааяо вияа, бажжавзгкан̣анимид̇д̇ам̣ сийсам̣ вияа. ид̇и ааяасмаа д̇хаммасзнаабад̇и саарибуд̇д̇ад̇т̇зро бан̃жан̇г̇игам̣ саммаасамаад̇хим̣ ан̇г̇абажжан̇г̇асамбаннам̣ бурисам̣ вияа гад̇ваа д̣̇ассзси.
Tañhi vuṭṭhitasamādhissa pavattākāragahaṇato nimittanti vuttaṃ. Tattha ca pītipharaṇatā sukhapharaṇatā dve pādā viya, cetopharaṇatā ālokapharaṇatā dve hatthā viya, abhiññāpādakaṃ catutthajjhānaṃ majjhimakāyo viya, paccavekkhaṇanimittaṃ sīsaṃ viya. Iti āyasmā dhammasenāpati sāriputtatthero pañcaṅgikaṃ sammāsamādhiṃ aṅgapaccaṅgasampannaṃ purisaṃ viya katvā dassesi.
ча ануссад̇идтаанаанийд̇и бунаббунам̣ уббаж̇ж̇анад̇о сад̇ияо зва ануссад̇ияо, бавад̇д̇ид̇аб̣б̣адтаанасмим̣язва бавад̇д̇ад̇д̇аа сад̣̇д̇хаабаб̣б̣аж̇ид̇асса гулабуд̇д̇асса ануруубаа сад̇ияод̇иби ануссад̇ияо, ануссад̇ияо зва бийд̇иаад̣̇ийнам̣ таанад̇д̇аа ануссад̇идтаанаани. гад̇амаани ча? б̣уд̣̇д̇хаануссад̇и д̇хаммаануссад̇и сан̇гхаануссад̇и сийлаануссад̇и жааг̇аануссад̇и д̣̇звад̇аануссад̇и (д̣̇ий. ни. 3.327). б̣ож̇жхан̇г̇аад̇и б̣од̇хияаа, б̣од̇хисса ваа ан̇г̇аа. ид̣̇ам̣ вуд̇д̇ам̣ ход̇и – яаа зсаа д̇хаммасаамаг̇г̇ий яааяа логуд̇д̇арамаг̇г̇агкан̣з уббаж̇ж̇амаанааяа лийнуд̣̇д̇хажжабад̇идтаанааяууханагаамасукад̇д̇агиламат̇аануяог̇аужчзд̣̇асассад̇аабхинивзсаад̣̇ийнам̣ анзгзсам̣ убад̣̇д̣̇аваанам̣ бадибагкабхууд̇ааяа сад̇ид̇хаммавижаяавийрияабийд̇ибассад̣̇д̇хисамаад̇хиубзгкаасан̇каад̇ааяа д̇хаммасаамаг̇г̇ияаа арияасааваго б̣уж̇жхад̇ийд̇и гад̇ваа б̣од̇хийд̇и вужжад̇и. б̣уж̇жхад̇ийд̇и гилзсасанд̇аананид̣̇д̣̇ааяа вудтахад̇и, жад̇д̇аари ваа арияасажжаани бадивиж̇жхад̇и, ниб̣б̣аанамзва ваа сажчигарод̇и, д̇ассаа д̇хаммасаамаг̇г̇исан̇каад̇ааяа б̣од̇хияаа ан̇г̇аад̇иби б̣ож̇жхан̇г̇аа жхаанан̇г̇амаг̇г̇ан̇г̇аад̣̇аяо вияа. яо банзса яат̇аавуд̇д̇аббагаарааяа зд̇ааяа д̇хаммасаамаг̇г̇ияаа б̣уж̇жхад̇ийд̇и гад̇ваа арияасааваго б̣од̇хийд̇и вужжад̇и, д̇асса б̣од̇хисса ан̇г̇аад̇иби б̣ож̇жхан̇г̇аа сзнан̇г̇арат̇ан̇г̇аад̣̇аяо вияа. д̇знааху адтагат̇аажарияаа ‘‘б̣уж̇жханагасса буг̇г̇аласса ан̇г̇аад̇и ваа б̣ож̇жхан̇г̇аа’’д̇и. абижа ‘‘б̣ож̇жхан̇г̇аад̇и гзнадтзна б̣ож̇жхан̇г̇аа, б̣од̇хааяа сам̣вад̇д̇анд̇ийд̇и б̣ож̇жхан̇г̇аа’’д̇иаад̣̇инаа (бади. ма. 2.17) наязна б̣ож̇жхан̇г̇адто взд̣̇ид̇аб̣б̣о. арияо адтан̇г̇иго маг̇г̇од̇и д̇ам̣д̇ам̣маг̇г̇аваж̇жхагилзсзхи аарагад̇д̇аа арияабхаавагарад̇д̇аа арияапалабадилаабхагарад̇д̇аа жа арияо. адта ан̇г̇аани ассаад̇и адтан̇г̇иго. сояам̣ жад̇уран̇г̇игаа вияа сзнаа, бан̃жан̇г̇игам̣ вияа жа д̇уурияам̣ ан̇г̇амад̇д̇амзва ход̇и, ан̇г̇авинимуд̇д̇о над̇т̇и. б̣ож̇жхан̇г̇амаг̇г̇ан̇г̇аа логуд̇д̇араа, д̣̇асуд̇д̇арабарияааязна буб̣б̣абхааг̇ааби лаб̣бханд̇и.
Cha anussatiṭṭhānānīti punappunaṃ uppajjanato satiyo eva anussatiyo, pavattitabbaṭṭhānasmiṃyeva pavattattā saddhāpabbajitassa kulaputtassa anurūpā satiyotipi anussatiyo, anussatiyo eva pītiādīnaṃ ṭhānattā anussatiṭṭhānāni. Katamāni cha? Buddhānussati dhammānussati saṅghānussati sīlānussati cāgānussati devatānussati (dī. ni. 3.327). Bojjhaṅgāti bodhiyā, bodhissa vā aṅgā. Idaṃ vuttaṃ hoti – yā esā dhammasāmaggī yāya lokuttaramaggakkhaṇe uppajjamānāya līnuddhaccapatiṭṭhānāyūhanakāmasukhattakilamathānuyogaucchedasassatābhinivesādīnaṃ anekesaṃ upaddavānaṃ paṭipakkhabhūtāya satidhammavicayavīriyapītipassaddhisamādhiupekkhāsaṅkhātāya dhammasāmaggiyā ariyasāvako bujjhatīti katvā bodhīti vuccati. Bujjhatīti kilesasantānaniddāya vuṭṭhahati, cattāri vā ariyasaccāni paṭivijjhati, nibbānameva vā sacchikaroti, tassā dhammasāmaggisaṅkhātāya bodhiyā aṅgātipi bojjhaṅgā jhānaṅgamaggaṅgādayo viya. Yo panesa yathāvuttappakārāya etāya dhammasāmaggiyā bujjhatīti katvā ariyasāvako bodhīti vuccati, tassa bodhissa aṅgātipi bojjhaṅgā senaṅgarathaṅgādayo viya. Tenāhu aṭṭhakathācariyā ‘‘bujjhanakassa puggalassa aṅgāti vā bojjhaṅgā’’ti. Apica ‘‘bojjhaṅgāti kenaṭṭhena bojjhaṅgā, bodhāya saṃvattantīti bojjhaṅgā’’tiādinā (paṭi. ma. 2.17) nayena bojjhaṅgaṭṭho veditabbo. Ariyo aṭṭhaṅgiko maggoti taṃtaṃmaggavajjhakilesehi ārakattā ariyabhāvakarattā ariyaphalapaṭilābhakarattā ca ariyo. Aṭṭha aṅgāni assāti aṭṭhaṅgiko. Soyaṃ caturaṅgikā viya senā, pañcaṅgikaṃ viya ca tūriyaṃ aṅgamattameva hoti, aṅgavinimutto natthi. Bojjhaṅgamaggaṅgā lokuttarā, dasuttarapariyāyena pubbabhāgāpi labbhanti.
нава баарисуд̣̇д̇хибад̇хаанияан̇г̇аанийд̇и сийлависуд̣̇д̇хи баарисуд̣̇д̇хибад̇хаанияан̇г̇ам̣, жид̇д̇ависуд̣̇д̇хи баарисуд̣̇д̇хибад̇хаанияан̇г̇ам̣, д̣̇идтивисуд̣̇д̇хи баарисуд̣̇д̇хибад̇хаанияан̇г̇ам̣, ган̇каавид̇аран̣ависуд̣̇д̇хи баарисуд̣̇д̇хибад̇хаанияан̇г̇ам̣, маг̇г̇аамаг̇г̇ан̃аан̣ад̣̇ассанависуд̣̇д̇хи баарисуд̣̇д̇хибад̇хаанияан̇г̇ам̣, бадибад̣̇аан̃аан̣ад̣̇ассанависуд̣̇д̇хи баарисуд̣̇д̇хибад̇хаанияан̇г̇ам̣, н̃аан̣ад̣̇ассанависуд̣̇д̇хи баарисуд̣̇д̇хибад̇хаанияан̇г̇ам̣, бан̃н̃аа баарисуд̣̇д̇хибад̇хаанияан̇г̇ам̣, вимуд̇д̇и баарисуд̣̇д̇хибад̇хаанияан̇г̇ам̣ (д̣̇ий. ни. 3.359). сийлависуд̣̇д̇хийд̇и висуд̣̇д̇хим̣ баабзд̇ум̣ самад̇т̇ам̣ жад̇убаарисуд̣̇д̇хисийлам̣. д̇ан̃хи д̣̇уссийляамалам̣ висод̇хзд̇и. баарисуд̣̇д̇хибад̇хаанияан̇г̇анд̇и барисуд̣̇д̇хабхаавасса бад̇хаанам̣ уд̇д̇амам̣ ан̇г̇ам̣. жид̇д̇ависуд̣̇д̇хийд̇и вибассанааяа бад̣̇адтаанабхууд̇аа баг̇ун̣аа адта самаабад̇д̇ияо. д̇аа хи гаамажчанд̣̇аад̣̇ижид̇д̇амалам̣ висод̇хзнд̇и. д̣̇идтивисуд̣̇д̇хийд̇и саббажжаяанаамаруубад̣̇ассанам̣. д̇ан̃хи сад̇д̇ад̣̇идтималам̣ висод̇хзд̇и. ган̇каавид̇аран̣ависуд̣̇д̇хийд̇и бажжаяаагааран̃аан̣ам̣. д̇зна хи д̇ийсу ад̣̇д̇хаасу бажжаяавасзна д̇хаммаа бавад̇д̇анд̇ийд̇и бассанд̇о д̇ийсуби ад̣̇д̇хаасу сад̇д̇аган̇каамалам̣ вид̇аранд̇о висуж̇жхад̇и. маг̇г̇аамаг̇г̇ан̃аан̣ад̣̇ассанависуд̣̇д̇хийд̇и уд̣̇аяаб̣б̣аяаанубассанагкан̣з уббаннаа обхаасан̃аан̣абийд̇ибассад̣̇д̇хисукаад̇химогкабаг̇г̇ахаубадтаанаубзгкааниганд̇ийд̇и д̣̇аса вибассанубаггилзсаа, на маг̇г̇о, вийт̇ибадибаннам̣ уд̣̇аяаб̣б̣аяан̃аан̣ам̣ маг̇г̇од̇и звам̣ маг̇г̇аамаг̇г̇з н̃аан̣ам̣ наама. д̇зна хи амаг̇г̇амалам̣ висод̇хзд̇и. бадибад̣̇аан̃аан̣ад̣̇ассанависуд̣̇д̇хийд̇и вийт̇ибадибаннам̣ уд̣̇аяаб̣б̣аяаанубассанаан̃аан̣ам̣ бхан̇г̇аанубассанаан̃аан̣ам̣ бхаяад̇убадтаанаанубассанаан̃аан̣ам̣ аад̣̇ийнаваанубассанаан̃аан̣ам̣ ниб̣б̣ид̣̇аанубассанаан̃аан̣ам̣ мун̃жид̇угамяад̇аан̃аан̣ам̣ бадисан̇каанубассанаан̃аан̣ам̣ сан̇каарубзгкаан̃аан̣ам̣ ануломан̃аан̣анд̇и имаани нава вибассанаан̃аан̣аани. д̇аани хи нижжасан̃н̃аад̣̇ималам̣ висод̇хзнд̇и. н̃аан̣ад̣̇ассанависуд̣̇д̇хийд̇и жад̇уарияамаг̇г̇абан̃н̃аа. саа хи самужчзд̣̇ад̇о сагасагамаг̇г̇аваж̇жхагилзсамалам̣ висод̇хзд̇и. бан̃н̃аад̇и арахад̇д̇апалабан̃н̃аа. вимуд̇д̇ийд̇и арахад̇д̇апалавимуд̇д̇и.
Navapārisuddhipadhāniyaṅgānīti sīlavisuddhi pārisuddhipadhāniyaṅgaṃ, cittavisuddhi pārisuddhipadhāniyaṅgaṃ, diṭṭhivisuddhi pārisuddhipadhāniyaṅgaṃ, kaṅkhāvitaraṇavisuddhi pārisuddhipadhāniyaṅgaṃ, maggāmaggañāṇadassanavisuddhi pārisuddhipadhāniyaṅgaṃ, paṭipadāñāṇadassanavisuddhi pārisuddhipadhāniyaṅgaṃ, ñāṇadassanavisuddhi pārisuddhipadhāniyaṅgaṃ, paññā pārisuddhipadhāniyaṅgaṃ, vimutti pārisuddhipadhāniyaṅgaṃ (dī. ni. 3.359). Sīlavisuddhīti visuddhiṃ pāpetuṃ samatthaṃ catupārisuddhisīlaṃ. Tañhi dussīlyamalaṃ visodheti. Pārisuddhipadhāniyaṅganti parisuddhabhāvassa padhānaṃ uttamaṃ aṅgaṃ. Cittavisuddhīti vipassanāya padaṭṭhānabhūtā paguṇā aṭṭha samāpattiyo. Tā hi kāmacchandādicittamalaṃ visodhenti. Diṭṭhivisuddhīti sappaccayanāmarūpadassanaṃ. Tañhi sattadiṭṭhimalaṃ visodheti. Kaṅkhāvitaraṇavisuddhīti paccayākārañāṇaṃ. Tena hi tīsu addhāsu paccayavasena dhammā pavattantīti passanto tīsupi addhāsu sattakaṅkhāmalaṃ vitaranto visujjhati. Maggāmaggañāṇadassanavisuddhīti udayabbayānupassanakkhaṇe uppannā obhāsañāṇapītipassaddhisukhaadhimokkhapaggahaupaṭṭhānaupekkhānikantīti dasa vipassanupakkilesā, na maggo, vīthipaṭipannaṃ udayabbayañāṇaṃ maggoti evaṃ maggāmagge ñāṇaṃ nāma. Tena hi amaggamalaṃ visodheti. Paṭipadāñāṇadassanavisuddhīti vīthipaṭipannaṃ udayabbayānupassanāñāṇaṃ bhaṅgānupassanāñāṇaṃ bhayatupaṭṭhānānupassanāñāṇaṃ ādīnavānupassanāñāṇaṃ nibbidānupassanāñāṇaṃ muñcitukamyatāñāṇaṃ paṭisaṅkhānupassanāñāṇaṃ saṅkhārupekkhāñāṇaṃ anulomañāṇanti imāni nava vipassanāñāṇāni. Tāni hi niccasaññādimalaṃ visodhenti. Ñāṇadassanavisuddhīti catuariyamaggapaññā. Sā hi samucchedato sakasakamaggavajjhakilesamalaṃ visodheti. Paññāti arahattaphalapaññā. Vimuttīti arahattaphalavimutti.
д̣̇аса гасин̣ааяад̇анаанийд̇и ‘‘бат̇авийгасин̣амзго сан̃ж̇аанаад̇и уд̣̇д̇хам̣ ад̇хо д̇ирияам̣ ад̣̇ваяам̣ аббамаан̣ам̣, аабогасин̣амзго сан̃ж̇аанаад̇и…бз… д̇зж̇огасин̣амзго сан̃ж̇аанаад̇и…бз… вааяогасин̣амзго сан̃ж̇аанаад̇и…бз… нийлагасин̣амзго сан̃ж̇аанаад̇и…бз… бийд̇агасин̣амзго сан̃ж̇аанаад̇и…бз… лохид̇агасин̣амзго сан̃ж̇аанаад̇и…бз… од̣̇аад̇агасин̣амзго сан̃ж̇аанаад̇и…бз… аагаасагасин̣амзго сан̃ж̇аанаад̇и…бз… вин̃н̃аан̣агасин̣амзго сан̃ж̇аанаад̇и уд̣̇д̇хам̣ ад̇хо д̇ирияам̣ ад̣̇ваяам̣ аббамаан̣а’’нд̇и (а. ни. 10.25; д̣̇ий. ни. 3.360) звам̣ вуд̇д̇аани д̣̇аса. зд̇аани хи сагалапаран̣адтзна гасин̣аани, д̇ад̣̇аарамман̣аанам̣ д̇хаммаанам̣ кзд̇д̇адтзна ад̇хидтаанадтзна ваа ааяад̇анаани. уд̣̇д̇ханд̇и убариг̇аг̇анад̇алаабхимукам̣. ад̇ход̇и хздтаабхуумид̇алаабхимукам̣. д̇ирияанд̇и кзд̇д̇аман̣д̣аламива саманд̇аа барижчиннам̣. згажжо хи уд̣̇д̇хамзва гасин̣ам̣ вад̣дхзд̇и згажжо ад̇хо, згажжо саманд̇ад̇о. згоби д̇зна д̇зна ваа гааран̣зна звам̣ басаарзд̇и аалогамива руубад̣̇ассанагаамо. д̇зна вуд̇д̇ам̣ – ‘‘бат̇авийгасин̣амзго сан̃ж̇аанаад̇и уд̣̇д̇хам̣ ад̇хо д̇ирияа’’нд̇и (а. ни. 10.25; д̣̇ий. ни. 3.360). ад̣̇ваяанд̇и ид̣̇ам̣ бана згасса ан̃н̃абхааваанубаг̇аманад̇т̇ам̣ вуд̇д̇ам̣. яат̇аа хи уд̣̇агам̣ бавидтасса саб̣б̣ад̣̇исаасу уд̣̇агамзва ход̇и на ан̃н̃ам̣, звамзва бат̇авийгасин̣ам̣ бат̇авийгасин̣амзва ход̇и, над̇т̇и д̇асса ан̃н̃агасин̣асамбхзд̣̇од̇и. зса наяо саб̣б̣ад̇т̇а. аббамаан̣анд̇и ид̣̇ам̣ д̇асса д̇асса паран̣ааббамаан̣авасзна вуд̇д̇ам̣. д̇ан̃хи манасаа паранд̇о сагаламзва парад̇и, на ‘‘аяамасса аад̣̇и ид̣̇ам̣ маж̇жха’’нд̇и бамаан̣ам̣ г̇ан̣хаад̇ийд̇и. аагаасагасин̣анд̇и гасин̣уг̇гхаадимаагаасо барижчзд̣̇аагаасагасин̣ан̃жа. вин̃н̃аан̣агасин̣анд̇и гасин̣уг̇гхаадимаагаасз бавад̇д̇авин̃н̃аан̣ам̣. д̇ад̇т̇а гасин̣авасзна гасин̣уг̇гхаадимаагаасз, гасин̣уг̇гхаадимаагаасавасзна д̇ад̇т̇а бавад̇д̇авин̃н̃аан̣з уд̣̇д̇хам̣ад̇ход̇ирияад̇аа взд̣̇ид̇аб̣б̣аа, барижчзд̣̇аагаасагасин̣ассаби вад̣дханийяад̇д̇аа д̇асса васзнабийд̇и.
Dasa kasiṇāyatanānīti ‘‘pathavīkasiṇameko sañjānāti uddhaṃ adho tiriyaṃ advayaṃ appamāṇaṃ, āpokasiṇameko sañjānāti…pe… tejokasiṇameko sañjānāti…pe… vāyokasiṇameko sañjānāti…pe… nīlakasiṇameko sañjānāti…pe… pītakasiṇameko sañjānāti…pe… lohitakasiṇameko sañjānāti…pe… odātakasiṇameko sañjānāti…pe… ākāsakasiṇameko sañjānāti…pe… viññāṇakasiṇameko sañjānāti uddhaṃ adho tiriyaṃ advayaṃ appamāṇa’’nti (a. ni. 10.25; dī. ni. 3.360) evaṃ vuttāni dasa. Etāni hi sakalapharaṇaṭṭhena kasiṇāni, tadārammaṇānaṃ dhammānaṃ khettaṭṭhena adhiṭṭhānaṭṭhena vā āyatanāni. Uddhanti uparigaganatalābhimukhaṃ. Adhoti heṭṭhābhūmitalābhimukhaṃ. Tiriyanti khettamaṇḍalamiva samantā paricchinnaṃ. Ekacco hi uddhameva kasiṇaṃ vaḍḍheti ekacco adho, ekacco samantato. Ekopi tena tena vā kāraṇena evaṃ pasāreti ālokamiva rūpadassanakāmo. Tena vuttaṃ – ‘‘pathavīkasiṇameko sañjānāti uddhaṃ adho tiriya’’nti (a. ni. 10.25; dī. ni. 3.360). Advayanti idaṃ pana ekassa aññabhāvānupagamanatthaṃ vuttaṃ. Yathā hi udakaṃ paviṭṭhassa sabbadisāsu udakameva hoti na aññaṃ, evameva pathavīkasiṇaṃ pathavīkasiṇameva hoti, natthi tassa aññakasiṇasambhedoti. Esa nayo sabbattha. Appamāṇanti idaṃ tassa tassa pharaṇaappamāṇavasena vuttaṃ. Tañhi manasā pharanto sakalameva pharati, na ‘‘ayamassa ādi idaṃ majjha’’nti pamāṇaṃ gaṇhātīti. Ākāsakasiṇanti kasiṇugghāṭimākāso paricchedākāsakasiṇañca. Viññāṇakasiṇanti kasiṇugghāṭimākāse pavattaviññāṇaṃ. Tattha kasiṇavasena kasiṇugghāṭimākāse, kasiṇugghāṭimākāsavasena tattha pavattaviññāṇe uddhaṃadhotiriyatā veditabbā, paricchedākāsakasiṇassapi vaḍḍhanīyattā tassa vasenapīti.
26. ид̣̇аани бхааванаабабхзд̣̇ам̣ д̣̇ассзнд̇о д̣̇вз бхааванаад̇иаад̣̇имааха. д̇ад̇т̇а логияаад̇иаад̣̇ийсу лого вужжад̇и луж̇ж̇анабалуж̇ж̇анадтзна ваддам̣, д̇асмим̣ барияаабаннабхаавзна логз нияуд̇д̇аад̇и логияаа, логияаанам̣ д̇хаммаанам̣ бхааванаа логияаа. гин̃жааби д̇хаммаанам̣ бхааванаад̇и вохааравасзна вужжад̇и, д̇зхи бана висум̣ бхааванаа над̇т̇и. д̇з зва хи д̇хаммаа бхаавияамаанаа бхааванаад̇и вужжанд̇и. уд̇д̇ин̣н̣аад̇и уд̇д̇араа, логз абарияаабаннабхаавзна логад̇о уд̇д̇араад̇и логуд̇д̇араа.
26. Idāni bhāvanāpabhedaṃ dassento dve bhāvanātiādimāha. Tattha lokiyātiādīsu loko vuccati lujjanapalujjanaṭṭhena vaṭṭaṃ, tasmiṃ pariyāpannabhāvena loke niyuttāti lokiyā, lokiyānaṃ dhammānaṃ bhāvanā lokiyā. Kiñcāpi dhammānaṃ bhāvanāti vohāravasena vuccati, tehi pana visuṃ bhāvanā natthi. Te eva hi dhammā bhāviyamānā bhāvanāti vuccanti. Uttiṇṇāti uttarā, loke apariyāpannabhāvena lokato uttarāti lokuttarā.
руубабхавасан̇каад̇з руубз аважаранд̇ийд̇и руубааважараа. гусаласад̣̇д̣̇о банзд̇т̇а аарог̇яаанаваж̇ж̇ачзгасукавибаагзсу д̣̇иссад̇и. ‘‘гажжи ну бход̇о гусалам̣? гажжи бход̇о анаамаяа’’нд̇иаад̣̇ийсу (ж̇аа. 1.15.146; 2.20.129) аарог̇яз. ‘‘гад̇амо бана, бханд̇з, гааяасамаажааро гусало? яо ко, махаарааж̇а, гааяасамаажааро анаваж̇ж̇о’’д̇и (ма. ни. 2.361) жа ‘‘буна жабарам̣, бханд̇з, зд̇ад̣̇аануд̇д̇арияам̣, яат̇аа бхаг̇аваа д̇хаммам̣ д̣̇зсзд̇и гусалзсу д̇хаммзсуу’’д̇и (д̣̇ий. ни. 3.145) жа звамаад̣̇ийсу анаваж̇ж̇з. ‘‘д̇ам̣ гим̣ ман̃н̃аси, рааж̇агумаара, гусало д̇вам̣ рат̇асса ан̇г̇абажжан̇г̇аана’’нд̇и? (ма. ни. 2.87) ‘‘гусалаа нажжаг̇ийд̇асса сигкид̇аа жаад̇урид̇т̇ияо’’д̇и (ж̇аа. 2.22.94) жа аад̣̇ийсу чзгз. ‘‘гусалаанам̣ д̇хаммаанам̣ самаад̣̇аанахзд̇у звамид̣̇ам̣ бун̃н̃ам̣ бавад̣дхад̇ий’’д̇и (д̣̇ий. ни. 3.80) ‘‘гусаласса гаммасса гад̇ад̇д̇аа убажид̇ад̇д̇аа’’д̇и (д̇ха. са. 431) жа аад̣̇ийсу сукавибаагз. свааяамид̇ха аарог̇язби анаваж̇ж̇зби сукавибаагзби ваддад̇и. важанад̇т̇о банзд̇т̇а гужчид̇з баабагз д̇хаммз салаяанд̇и жалаяанд̇и гамбзнд̇и вид̣̇д̇хам̣сзнд̇ийд̇и гусалаа, гужчид̇зна ваа аагаарзна саяанд̇и бавад̇д̇анд̇ийд̇и гусаа, д̇з агусаласан̇каад̇з гусз лунанд̇и чинд̣̇анд̇ийд̇и гусалаа, гужчид̇аанам̣ ваа саанад̇о д̇анугаран̣ад̇о гусам̣, н̃аан̣ам̣. д̇зна гусзна лаад̇аб̣б̣аа г̇ахзд̇аб̣б̣аа бавад̇д̇зд̇аб̣б̣аад̇и гусалаа, яат̇аа ваа гусаа убхаяабхааг̇аг̇ад̇ам̣ хад̇т̇аббад̣̇зсам̣ лунанд̇и, звамимзби уббаннаануббаннабхаавзна убхаяабхааг̇аг̇ад̇ам̣ сам̣гилзсабагкам̣ лунанд̇и, д̇асмаа гусаа вияа лунанд̇ийд̇и гусалаа. д̇зсам̣ руубааважарагусалаанам̣ бхааванаа. аруубабхавасан̇каад̇з аруубз аважаранд̇ийд̇и аруубааважараа. д̇збхуумагаваддз барияаабаннаа анд̇ог̇ад̇хаад̇и барияаабаннаа, д̇асмим̣ на барияаабаннаад̇и абарияаабаннаа, логуд̇д̇араа.
Rūpabhavasaṅkhāte rūpe avacarantīti rūpāvacarā. Kusalasaddo panettha ārogyaanavajjachekasukhavipākesu dissati. ‘‘Kacci nu bhoto kusalaṃ? Kacci bhoto anāmaya’’ntiādīsu (jā. 1.15.146; 2.20.129) ārogye. ‘‘Katamo pana, bhante, kāyasamācāro kusalo? Yo kho, mahārāja, kāyasamācāro anavajjo’’ti (ma. ni. 2.361) ca ‘‘puna caparaṃ, bhante, etadānuttariyaṃ, yathā bhagavā dhammaṃ deseti kusalesu dhammesū’’ti (dī. ni. 3.145) ca evamādīsu anavajje. ‘‘Taṃ kiṃ maññasi, rājakumāra, kusalo tvaṃ rathassa aṅgapaccaṅgāna’’nti? (Ma. ni. 2.87) ‘‘kusalā naccagītassa sikkhitā cāturitthiyo’’ti (jā. 2.22.94) ca ādīsu cheke. ‘‘Kusalānaṃ dhammānaṃ samādānahetu evamidaṃ puññaṃ pavaḍḍhatī’’ti (dī. ni. 3.80) ‘‘kusalassa kammassa katattā upacitattā’’ti (dha. sa. 431) ca ādīsu sukhavipāke. Svāyamidha ārogyepi anavajjepi sukhavipākepi vaṭṭati. Vacanattho panettha kucchite pāpake dhamme salayanti calayanti kampenti viddhaṃsentīti kusalā, kucchitena vā ākārena sayanti pavattantīti kusā, te akusalasaṅkhāte kuse lunanti chindantīti kusalā, kucchitānaṃ vā sānato tanukaraṇato kusaṃ, ñāṇaṃ. Tena kusena lātabbā gahetabbā pavattetabbāti kusalā, yathā vā kusā ubhayabhāgagataṃ hatthappadesaṃ lunanti, evamimepi uppannānuppannabhāvena ubhayabhāgagataṃ saṃkilesapakkhaṃ lunanti, tasmā kusā viya lunantīti kusalā. Tesaṃ rūpāvacarakusalānaṃ bhāvanā. Arūpabhavasaṅkhāte arūpe avacarantīti arūpāvacarā. Tebhūmakavaṭṭe pariyāpannā antogadhāti pariyāpannā, tasmiṃ na pariyāpannāti apariyāpannā, lokuttarā.
гаамааважарагусалаанам̣ д̇хаммаанам̣ бхааванаа гасмаа на вуд̇д̇аад̇и жз? аббанааббад̇д̇ааяа зва бхааванааяа абхид̇хаммз бхааванаад̇и ад̇хиббзд̇ад̇д̇аа. вуд̇д̇ан̃хи д̇ад̇т̇а –
Kāmāvacarakusalānaṃ dhammānaṃ bhāvanā kasmā na vuttāti ce? Appanāppattāya eva bhāvanāya abhidhamme bhāvanāti adhippetattā. Vuttañhi tattha –
‘‘яог̇авихид̇зсу ваа гаммааяад̇анзсу яог̇авихид̇зсу ваа сиббааяад̇анзсу яог̇авихид̇зсу ваа виж̇ж̇аадтаанзсу гаммассагад̇ам̣ ваа сажжаануломигам̣ ваа руубам̣ анижжанд̇и ваа, взд̣̇анаа анижжаад̇и ваа, сан̃н̃аа анижжаад̇и ваа, сан̇каараа анижжаад̇и ваа, вин̃н̃аан̣ам̣ анижжанд̇и ваа яам̣ зваруубам̣ ануломигам̣ канд̇им̣ д̣̇идтим̣ ружим̣ муд̣̇им̣ бзгкам̣ д̇хамманиж̇жхаанагканд̇им̣ барад̇о асуд̇ваа бадилабхад̇и, аяам̣ вужжад̇и жинд̇аамаяаа бан̃н̃аа. яог̇авихид̇зсу ваа гаммааяад̇анзсу…бз… д̇хамманиж̇жхаанагканд̇им̣ барад̇о суд̇ваа бадилабхад̇и, аяам̣ вужжад̇и суд̇амаяаа бан̃н̃аа. саб̣б̣ааби самаабаннасса бан̃н̃аа бхааванаамаяаа бан̃н̃аа’’д̇и (вибха. 768).
‘‘Yogavihitesu vā kammāyatanesu yogavihitesu vā sippāyatanesu yogavihitesu vā vijjāṭṭhānesu kammassakataṃ vā saccānulomikaṃ vā rūpaṃ aniccanti vā, vedanā aniccāti vā, saññā aniccāti vā, saṅkhārā aniccāti vā, viññāṇaṃ aniccanti vā yaṃ evarūpaṃ anulomikaṃ khantiṃ diṭṭhiṃ ruciṃ mudiṃ pekkhaṃ dhammanijjhānakkhantiṃ parato asutvā paṭilabhati, ayaṃ vuccati cintāmayā paññā. Yogavihitesu vā kammāyatanesu…pe… dhammanijjhānakkhantiṃ parato sutvā paṭilabhati, ayaṃ vuccati sutamayā paññā. Sabbāpi samāpannassa paññā bhāvanāmayā paññā’’ti (vibha. 768).
саа бана гаамааважарабхааванаа ааваж̇ж̇анабхаван̇г̇абаад̇зхи анд̇арид̇ад̇д̇аа бхааванаад̇и на вуд̇д̇аад̇и взд̣̇ид̇аб̣б̣аа. саб̣б̣зсам̣ бана бун̃н̃аанам̣ д̇ивид̇хабун̃н̃агирияавад̇т̇уунам̣ анд̇ог̇ад̇хад̇д̇аа убажаарасамаад̇хивибассанаасамаад̇хийнам̣ бхааванаамаяабун̃н̃ад̇аа сид̣̇д̇хаа. ид̇ха бана логияабхааванааяа зва сан̇г̇ахид̇аа. руубааруубааважараанам̣ д̇ивид̇хабхаавз хийнаад̇и лаамагаа. хийнуд̇д̇амаанам̣ маж̇жхз бхаваа маж̇жхаа, маж̇жхимаад̇иби баато. бад̇хаанабхаавам̣ нийд̇аад̇и бан̣ийд̇аа, уд̇д̇амаад̇и ад̇т̇о. ааяууханавасзна аяам̣ хийнамаж̇жхимабан̣ийд̇ад̇аа взд̣̇ид̇аб̣б̣аа. яассаа хи ааяууханагкан̣з чанд̣̇о ваа хийно ход̇и вийрияам̣ ваа жид̇д̇ам̣ ваа виймам̣саа ваа, саа хийнаа наама. яассаа д̇з д̇хаммаа маж̇жхимаа, саа маж̇жхимаа наама. яассаа д̇з д̇хаммаа бан̣ийд̇аа, саа бан̣ийд̇аа наама. муд̣̇угзхи ваа инд̣̇риязхи самбаяуд̇д̇аа хийнаа наама, маж̇жхимзхи инд̣̇риязхи самбаяуд̇д̇аа маж̇жхимаа, ад̇химад̇д̇зхи инд̣̇риязхи самбаяуд̇д̇аа бан̣ийд̇аа наама. абарияаабаннааяа хийнамаж̇жхимад̇д̇аабхааваа бан̣ийд̇ад̇аа зва вуд̇д̇аа. саа хи уд̇д̇амадтзна ад̇аббагадтзна жа бан̣ийд̇аа.
Sā pana kāmāvacarabhāvanā āvajjanabhavaṅgapātehi antaritattā bhāvanāti na vuttāti veditabbā. Sabbesaṃ pana puññānaṃ tividhapuññakiriyavatthūnaṃ antogadhattā upacārasamādhivipassanāsamādhīnaṃ bhāvanāmayapuññatā siddhā. Idha pana lokiyabhāvanāya eva saṅgahitā. Rūpārūpāvacarānaṃ tividhabhāve hīnāti lāmakā. Hīnuttamānaṃ majjhe bhavā majjhā, majjhimātipi pāṭho. Padhānabhāvaṃ nītāti paṇītā, uttamāti attho. Āyūhanavasena ayaṃ hīnamajjhimapaṇītatā veditabbā. Yassā hi āyūhanakkhaṇe chando vā hīno hoti vīriyaṃ vā cittaṃ vā vīmaṃsā vā, sā hīnā nāma. Yassā te dhammā majjhimā, sā majjhimā nāma. Yassā te dhammā paṇītā, sā paṇītā nāma. Mudukehi vā indriyehi sampayuttā hīnā nāma, majjhimehi indriyehi sampayuttā majjhimā, adhimattehi indriyehi sampayuttā paṇītā nāma. Apariyāpannāya hīnamajjhimattābhāvā paṇītatā eva vuttā. Sā hi uttamaṭṭhena atappakaṭṭhena ca paṇītā.
27. батамабхааванаажад̇уггз бхаавзд̇ийд̇и згасмим̣язва кан̣з д̇ат̇аа д̇ат̇аа бадивиж̇жханд̇о арияамаг̇г̇ам̣ бхаавзд̇и. д̣̇уд̇ияабхааванаажад̇уггз зсанаабхааванаад̇и аббанаабуб̣б̣абхааг̇з бхааванаа. саа хи аббанам̣ зсанд̇и зд̇ааяаад̇и зсанаад̇и вуд̇д̇аа. бадилаабхабхааванаад̇и аббанаабхааванаа. саа хи д̇ааяа зсанааяа бадилаб̣бхад̇ийд̇и бадилаабход̇и вуд̇д̇аа. згарасаабхааванаад̇и бадилаабхз васийбхаавам̣ бад̇д̇угаамасса баяог̇агаалз бхааванаа. саа хи д̇зна д̇зна бахаанзна д̇зхи д̇зхи гилзсзхи вимуд̇д̇ад̇д̇аа вимуд̇д̇ирасзна згарасаад̇и гад̇ваа згарасаад̇и вуд̇д̇аа. аасзванаабхааванаад̇и бадилаабхз васиббад̇д̇асса яат̇ааружи барибхог̇агаалз бхааванаа. саа хи бхусам̣ сзвийяад̇ийд̇и аасзванаад̇и вуд̇д̇аа. гзжи бана ‘‘аасзванаабхааванаа васийгаммам̣, згарасаабхааванаа саб̣б̣ад̇т̇игаа’’д̇и ван̣н̣аяанд̇и. жад̇уггавибхааг̇з самаад̇хим̣ самаабаж̇ж̇анд̇аананд̇и вад̇д̇амаанасамийбз вад̇д̇амаанаважанам̣. д̇ад̇т̇а ж̇аад̇аад̇и д̇асмим̣ буб̣б̣абхааг̇з ж̇аад̇аа. згарасаа хонд̇ийд̇и аббануббаад̣̇анз самаанагижжаа хонд̇и. самаад̇хим̣ самаабаннаананд̇и аббид̇аббанаанам̣. д̇ад̇т̇а ж̇аад̇аад̇и д̇ассаа аббанааяа ж̇аад̇аа. ан̃н̃аман̃н̃ам̣ наад̇ивад̇д̇анд̇ийд̇и самаббавад̇д̇ияаа ан̃н̃аман̃н̃ам̣ наад̇иггаманд̇и. ад̇химогкадтзна сад̣̇д̇хинд̣̇рияам̣ бхааваяад̇од̇иаад̣̇ийсу згагкан̣зби згзгасса инд̣̇рияасса сагасагагижжагаран̣з д̇ам̣д̇ам̣ниссаяавасзна сагасагагижжагаарагаани сзсааниби инд̣̇рияаани вимуд̇д̇ирасзна згарасаа хонд̇ийд̇и вимуд̇д̇ирасзнзва згарасадтзна бхааванаа. б̣алаб̣ож̇жхан̇г̇амаг̇г̇ан̇г̇зсуби зсзва наяо. згарасаад̇и жа лин̇г̇авибаллаасо гад̇о.
27. Paṭhamabhāvanācatukke bhāvetīti ekasmiṃyeva khaṇe tathā tathā paṭivijjhanto ariyamaggaṃ bhāveti. Dutiyabhāvanācatukke esanābhāvanāti appanāpubbabhāge bhāvanā. Sā hi appanaṃ esanti etāyāti esanāti vuttā. Paṭilābhabhāvanāti appanābhāvanā. Sā hi tāya esanāya paṭilabbhatīti paṭilābhoti vuttā. Ekarasābhāvanāti paṭilābhe vasībhāvaṃ pattukāmassa payogakāle bhāvanā. Sā hi tena tena pahānena tehi tehi kilesehi vimuttattā vimuttirasena ekarasāti katvā ekarasāti vuttā. Āsevanābhāvanāti paṭilābhe vasippattassa yathāruci paribhogakāle bhāvanā. Sā hi bhusaṃ sevīyatīti āsevanāti vuttā. Keci pana ‘‘āsevanābhāvanā vasīkammaṃ, ekarasābhāvanā sabbatthikā’’ti vaṇṇayanti. Catukkavibhāge samādhiṃ samāpajjantānanti vattamānasamīpe vattamānavacanaṃ. Tattha jātāti tasmiṃ pubbabhāge jātā. Ekarasā hontīti appanuppādane samānakiccā honti. Samādhiṃ samāpannānanti appitappanānaṃ. Tattha jātāti tassā appanāya jātā. Aññamaññaṃ nātivattantīti samappavattiyā aññamaññaṃ nātikkamanti. Adhimokkhaṭṭhenasaddhindriyaṃbhāvayatotiādīsu ekakkhaṇepi ekekassa indriyassa sakasakakiccakaraṇe taṃtaṃnissayavasena sakasakakiccakārakāni sesānipi indriyāni vimuttirasena ekarasā hontīti vimuttiraseneva ekarasaṭṭhena bhāvanā. Balabojjhaṅgamaggaṅgesupi eseva nayo. Ekarasāti ca liṅgavipallāso kato.
ид̇ха бхигкууд̇и имасмим̣ саасанз бхигку. сам̣саарз бхаяам̣ игкад̇ийд̇и бхигку. буб̣б̣ан̣хасамаяанд̇иаад̣̇ийсу ажжанд̇асам̣яог̇ад̇т̇з убаяог̇аважанам̣, ад̇т̇ад̇о бана бхуммамзва , д̣̇ивасасса буб̣б̣агаалзд̇и ад̇т̇о. аасзвад̇ийд̇и васиббад̇д̇ам̣ самаад̇хим̣ бхусам̣ сзвад̇и. маж̇жханхигасамаяанд̇и д̣̇ивасасса маж̇жхагаалз. сааяанхасамаяанд̇и д̣̇ивасасса сааяанхагаалз. бурзбхад̇д̇анд̇и д̣̇иваабхад̇д̇ад̇о бурзгаалз. бажчаабхад̇д̇анд̇и д̣̇иваабхад̇д̇ад̇о бажчаагаалз. буримзби яаамзд̇и рад̇д̇ияаа батамз годтаасз. гаал̣зд̇и гаал̣абагкз. ж̇ун̣хзд̇и суггабагкз. буримзби ваяоканд̇хзд̇и батамз ваяогодтаасз, батамаваязд̇и ад̇т̇о. д̇ийсу жа ваязсу вассасад̇ааяугасса бурисасса згзгасмим̣ ваяз жад̇умаасаад̇хигаани д̇зд̇д̇им̣са вассаани хонд̇и.
Idha bhikkhūti imasmiṃ sāsane bhikkhu. Saṃsāre bhayaṃ ikkhatīti bhikkhu. Pubbaṇhasamayantiādīsu accantasaṃyogatthe upayogavacanaṃ, atthato pana bhummameva , divasassa pubbakāleti attho. Āsevatīti vasippattaṃ samādhiṃ bhusaṃ sevati. Majjhanhikasamayanti divasassa majjhakāle. Sāyanhasamayanti divasassa sāyanhakāle. Purebhattanti divābhattato purekāle. Pacchābhattanti divābhattato pacchākāle. Purimepi yāmeti rattiyā paṭhame koṭṭhāse. Kāḷeti kāḷapakkhe. Juṇheti sukkapakkhe. Purimepi vayokhandheti paṭhame vayokoṭṭhāse, paṭhamavayeti attho. Tīsu ca vayesu vassasatāyukassa purisassa ekekasmiṃ vaye catumāsādhikāni tettiṃsa vassāni honti.
28. д̇ад̇ияабхааванаажад̇уггз д̇ад̇т̇а ж̇аад̇аанам̣ д̇хаммаанам̣ анад̇ивад̇д̇анадтзнаад̇и д̇ад̇т̇а нзгкаммаад̣̇ийсу бхааванаависзсзсу ж̇аад̇аанам̣ самаад̇хибан̃н̃аасан̇каад̇аанам̣ яуг̇анад̣̇д̇хад̇хаммаанам̣ ан̃н̃аман̃н̃ам̣ анад̇иггаманабхаавзна. инд̣̇рияаанам̣ згарасадтзнаад̇и д̇ад̇т̇зва сад̣̇д̇хаад̣̇ийнам̣ инд̣̇рияаанам̣ наанаагилзсзхи вимуд̇д̇ад̇д̇аа вимуд̇д̇ирасзна згарасабхаавзна. д̇ад̣̇убаг̇авийрияавааханадтзнаад̇и д̇зсам̣ анад̇ивад̇д̇аназгарасабхааваанам̣ анужчавигасса вийрияасса вааханабхаавзна. аасзванадтзнаад̇и яаа д̇асса д̇асмим̣ самаяз бавад̇д̇аа аасзванаа. д̇ассаа аасзванааяа аасзванабхаавзна.
28. Tatiyabhāvanācatukke tattha jātānaṃ dhammānaṃ anativattanaṭṭhenāti tattha nekkhammādīsu bhāvanāvisesesu jātānaṃ samādhipaññāsaṅkhātānaṃ yuganaddhadhammānaṃ aññamaññaṃ anatikkamanabhāvena. Indriyānaṃ ekarasaṭṭhenāti tattheva saddhādīnaṃ indriyānaṃ nānākilesehi vimuttattā vimuttirasena ekarasabhāvena. Tadupagavīriyavāhanaṭṭhenāti tesaṃ anativattanaekarasabhāvānaṃ anucchavikassa vīriyassa vāhanabhāvena. Āsevanaṭṭhenāti yā tassa tasmiṃ samaye pavattā āsevanā. Tassā āsevanāya āsevanabhāvena.
руубасан̃н̃анд̇и гусалавибаагагирияавасзна бан̃жад̣̇асавид̇хам̣ руубааважараж̇жхаанасан̇каад̇ам̣ руубасан̃н̃ам̣. руубааважараж̇жхаанамби хи руубанд̇и вужжад̇и ‘‘руубий руубаани бассад̇ий’’д̇иаад̣̇ийсу (д̣̇ий. ни. 2.174; а. ни. 8.66; д̇ха. са. 248), д̇асса жхаанасса аарамман̣амби ‘‘б̣ахид̣̇д̇хаа руубаани бассад̇и суван̣н̣ад̣̇уб̣б̣ан̣н̣ааний’’д̇иаад̣̇ийсу (д̣̇ий. ни. 2.173; а. ни. 8.65-66; д̇ха. са. 247, 249). руубааважараж̇жхаанан̃хи сан̃н̃аасийсзна руубз сан̃н̃аад̇и гад̇ваа руубасан̃н̃аад̇и вужжад̇и. бадигхасан̃н̃анд̇и гусалавибаагаа бан̃жа, агусалавибаагаа бан̃жаад̇и звам̣ д̣̇асавид̇хам̣ бадигхасан̃н̃ам̣. д̣̇вибан̃жавин̃н̃аан̣асамбаяуд̇д̇аа хи сан̃н̃аа жагкаад̣̇ийнам̣ вад̇т̇уунам̣ руубаад̣̇ийнам̣ аарамман̣аанан̃жа бадигхаад̇зна уббаннад̇д̇аа бадигхасан̃н̃аад̇и вужжад̇и. руубасан̃н̃аа сад̣̇д̣̇асан̃н̃аа г̇анд̇хасан̃н̃аа расасан̃н̃аа подтаб̣б̣асан̃н̃аад̇иби зд̇иссаа зва наамам̣. наанад̇д̇асан̃н̃анд̇и адта гаамааважарагусаласан̃н̃аа, д̣̇ваад̣̇аса агусаласан̃н̃аа , згаад̣̇аса гаамааважарагусалавибаагасан̃н̃аа, д̣̇вз агусалавибаагасан̃н̃аа, згаад̣̇аса гаамааважарагирияасан̃н̃аад̇и звам̣ жад̇ужад̇д̇аалийсавид̇хам̣ наанад̇д̇асан̃н̃ам̣. саа хи наанад̇д̇з наанаасабхаавз руубасад̣̇д̣̇аад̣̇ибхзд̣̇з г̇ожарз бавад̇д̇аа сан̃н̃аад̇и наанад̇д̇асан̃н̃аа, жад̇ужад̇д̇аалийсабхзд̣̇ад̇о наанад̇д̇аа наанаасабхааваа ан̃н̃аман̃н̃ам̣ асад̣̇исаа сан̃н̃аад̇и ваа наанад̇д̇асан̃н̃аад̇и вужжад̇и. сан̃н̃ааб̣ахугад̇д̇зби ж̇аад̇иг̇г̇ахан̣зна згаважанам̣ гад̇ам̣.
Rūpasaññanti kusalavipākakiriyavasena pañcadasavidhaṃ rūpāvacarajjhānasaṅkhātaṃ rūpasaññaṃ. Rūpāvacarajjhānampi hi rūpanti vuccati ‘‘rūpī rūpāni passatī’’tiādīsu (dī. ni. 2.174; a. ni. 8.66; dha. sa. 248), tassa jhānassa ārammaṇampi ‘‘bahiddhā rūpāni passati suvaṇṇadubbaṇṇānī’’tiādīsu (dī. ni. 2.173; a. ni. 8.65-66; dha. sa. 247, 249). Rūpāvacarajjhānañhi saññāsīsena rūpe saññāti katvā rūpasaññāti vuccati. Paṭighasaññanti kusalavipākā pañca, akusalavipākā pañcāti evaṃ dasavidhaṃ paṭighasaññaṃ. Dvipañcaviññāṇasampayuttā hi saññā cakkhādīnaṃ vatthūnaṃ rūpādīnaṃ ārammaṇānañca paṭighātena uppannattā paṭighasaññāti vuccati. Rūpasaññā saddasaññā gandhasaññā rasasaññā phoṭṭhabbasaññātipi etissā eva nāmaṃ. Nānattasaññanti aṭṭha kāmāvacarakusalasaññā, dvādasa akusalasaññā , ekādasa kāmāvacarakusalavipākasaññā, dve akusalavipākasaññā, ekādasa kāmāvacarakiriyasaññāti evaṃ catucattālīsavidhaṃ nānattasaññaṃ. Sā hi nānatte nānāsabhāve rūpasaddādibhede gocare pavattā saññāti nānattasaññā, catucattālīsabhedato nānattā nānāsabhāvā aññamaññaṃ asadisā saññāti vā nānattasaññāti vuccati. Saññābahukattepi jātiggahaṇena ekavacanaṃ kataṃ.
нижжасан̃н̃анд̇и нижжанд̇и сан̃н̃ам̣ нижжасан̃н̃ам̣. звам̣ сукасан̃н̃ам̣ ад̇д̇асан̃н̃ам̣. нанд̣̇инд̇и саббийд̇игам̣ д̇ан̣хам̣. рааг̇анд̇и ниббийд̇игам̣ д̇ан̣хам̣. самуд̣̇аяанд̇и рааг̇асса самуд̣̇аяам̣. ат̇а ваа бхан̇г̇аанубассанааяа бхан̇г̇ассзва д̣̇ассанад̇о сан̇каараанам̣ уд̣̇аяам̣. аад̣̇аананд̇и ниб̣б̣ад̇д̇анавасзна гилзсаанам̣, ад̣̇осад̣̇ассаавид̇ааяа сан̇кад̇аарамман̣асса ваа аад̣̇аанам̣. гханасан̃н̃анд̇и санд̇ад̇ивасзна гхананд̇и сан̃н̃ам̣. ааяуухананд̇и сан̇каараанам̣ ад̇т̇ааяа баяог̇агаран̣ам̣. д̇хувасан̃н̃анд̇и т̇иранд̇и сан̃н̃ам̣. нимид̇д̇анд̇и нижжанимид̇д̇ам̣. бан̣ид̇хинд̇и сукабад̇т̇анам̣. абхинивзсанд̇и ад̇т̇и ад̇д̇аад̇и абхинивзсам̣. саараад̣̇аанаабхинивзсанд̇и нижжасаарад̇д̇асаараг̇ахан̣аабхинивзсам̣. саммохаабхинивзсанд̇и ‘‘ахосим̣ ну ко ахам̣ ад̇ийд̇амад̣̇д̇хаана’’нд̇иаад̣̇ивасзна (сам̣. ни. 2.20) ‘‘иссарад̇о лого самбход̇ий’’д̇иаад̣̇ивасзна жа саммохаабхинивзсам̣. аалаяаабхинивзсанд̇и аад̣̇ийнаваад̣̇ассанзна аллийяид̇аб̣б̣амид̣̇анд̇и абхинивзсам̣. аббадисан̇канд̇и анубааяаг̇ахан̣ам̣. сан̃н̃ог̇аабхинивзсанд̇и гаамаяог̇аад̣̇игам̣ гилзсаббавад̇д̇им̣.
Niccasaññanti niccanti saññaṃ niccasaññaṃ. Evaṃ sukhasaññaṃ attasaññaṃ. Nandinti sappītikaṃ taṇhaṃ. Rāganti nippītikaṃ taṇhaṃ. Samudayanti rāgassa samudayaṃ. Atha vā bhaṅgānupassanāya bhaṅgasseva dassanato saṅkhārānaṃ udayaṃ. Ādānanti nibbattanavasena kilesānaṃ, adosadassāvitāya saṅkhatārammaṇassa vā ādānaṃ. Ghanasaññanti santativasena ghananti saññaṃ. Āyūhananti saṅkhārānaṃ atthāya payogakaraṇaṃ. Dhuvasaññanti thiranti saññaṃ. Nimittanti niccanimittaṃ. Paṇidhinti sukhapatthanaṃ. Abhinivesanti atthi attāti abhinivesaṃ. Sārādānābhinivesanti niccasārattasāragahaṇābhinivesaṃ. Sammohābhinivesanti ‘‘ahosiṃ nu kho ahaṃ atītamaddhāna’’ntiādivasena (saṃ. ni. 2.20) ‘‘issarato loko sambhotī’’tiādivasena ca sammohābhinivesaṃ. Ālayābhinivesanti ādīnavādassanena allīyitabbamidanti abhinivesaṃ. Appaṭisaṅkhanti anupāyagahaṇaṃ. Saññogābhinivesanti kāmayogādikaṃ kilesappavattiṃ.
д̣̇идтзгадтзд̇и д̣̇идтийхи саха згасмим̣ тид̇аад̇и д̣̇идтзгадтаа. д̇з д̣̇идтзгадтз. гилзсзнд̇и убад̇аабзнд̇и, виб̣аад̇хзнд̇и ваад̇и гилзсаа. д̇з гилзсз. д̣̇увид̇хан̃хи згадтам̣ бахаанзгадтам̣ сахаж̇згадтан̃жа. бахаанзгадтам̣ саггааяад̣̇идтибамукаахи д̇зсадтияаа д̣̇идтийхи саха (бади. ма. адта. 2.1.118) яаава сод̇аабад̇д̇имаг̇г̇зна бахаанаа, д̇аава згасмим̣ буг̇г̇алз тид̇аад̇и ад̇т̇о. ид̣̇амид̇хаад̇хиббзд̇ам̣. д̣̇асасу хи гилзсзсу ид̇ха д̣̇идтигилзсоязва ааг̇ад̇о. сзсзсу бана абааяаг̇аманийяо лобхо д̣̇осо мохо маано вижигижчаа т̇инам̣ уд̣̇д̇хажжам̣ ахиригам̣ анод̇д̇аббанд̇и нава гилзсаа д̣̇идтияаа саха бахаанзгадтаа худ̇ваа сод̇аабад̇д̇имаг̇г̇зна бахийяанд̇и, рааг̇ад̣̇осамохабамукзсу ваа д̣̇ияад̣дхзсу гилзсасахассзсу сод̇аабад̇д̇имаг̇г̇зна д̣̇идтияаа бахийяамаанааяа д̣̇идтияаа саха абааяаг̇аманийяаа саб̣б̣агилзсаа бахаанзгадтавасзна бахийяанд̇и, сахаж̇згадтз д̣̇идтияаа саха згасмим̣ жид̇д̇з тид̇аад̇и ад̇т̇о. сод̇аабад̇д̇имаг̇г̇зна хи д̣̇вийсу д̣̇идтисамбаяуд̇д̇аасан̇кааригажид̇д̇зсу бахийяамаанзсу д̇зхи сахаж̇аад̇о лобхо мохо уд̣̇д̇хажжам̣ ахиригам̣ анод̇д̇аббанд̇и имз гилзсаа сахаж̇згадтавасзна бахийяанд̇и, д̣̇вийсу д̣̇идтисамбаяуд̇д̇асасан̇кааригажид̇д̇зсу бахийяамаанзсу д̇зхи сахаж̇аад̇о лобхо мохо т̇инам̣ уд̣̇д̇хажжам̣ ахиригам̣ анод̇д̇аббанд̇и имз гилзсаа сахаж̇згадтавасзна бахийяанд̇и. ол̣ааригз гилзсзд̇и ол̣ааригабхууд̇з гаамарааг̇аб̣яаабаад̣̇з. анусахаг̇ад̇з гилзсзд̇и сукумабхууд̇з гаамарааг̇аб̣яаабаад̣̇з. саб̣б̣агилзсзд̇и маг̇г̇ад̇д̇аязна бахийнаавасзсз.
Diṭṭhekaṭṭheti diṭṭhīhi saha ekasmiṃ ṭhitāti diṭṭhekaṭṭhā. Te diṭṭhekaṭṭhe. Kilesenti upatāpenti, vibādhenti vāti kilesā. Te kilese. Duvidhañhi ekaṭṭhaṃ pahānekaṭṭhaṃ sahajekaṭṭhañca. Pahānekaṭṭhaṃ sakkāyadiṭṭhipamukhāhi tesaṭṭhiyā diṭṭhīhi saha (paṭi. ma. aṭṭha. 2.1.118) yāva sotāpattimaggena pahānā, tāva ekasmiṃ puggale ṭhitāti attho. Idamidhādhippetaṃ. Dasasu hi kilesesu idha diṭṭhikilesoyeva āgato. Sesesu pana apāyagamanīyo lobho doso moho māno vicikicchā thinaṃ uddhaccaṃ ahirikaṃ anottappanti nava kilesā diṭṭhiyā saha pahānekaṭṭhā hutvā sotāpattimaggena pahīyanti, rāgadosamohapamukhesu vā diyaḍḍhesu kilesasahassesu sotāpattimaggena diṭṭhiyā pahīyamānāya diṭṭhiyā saha apāyagamanīyā sabbakilesā pahānekaṭṭhavasena pahīyanti, sahajekaṭṭhe diṭṭhiyā saha ekasmiṃ citte ṭhitāti attho. Sotāpattimaggena hi dvīsu diṭṭhisampayuttaasaṅkhārikacittesu pahīyamānesu tehi sahajāto lobho moho uddhaccaṃ ahirikaṃ anottappanti ime kilesā sahajekaṭṭhavasena pahīyanti, dvīsu diṭṭhisampayuttasasaṅkhārikacittesu pahīyamānesu tehi sahajāto lobho moho thinaṃ uddhaccaṃ ahirikaṃ anottappanti ime kilesā sahajekaṭṭhavasena pahīyanti. Oḷārike kileseti oḷārikabhūte kāmarāgabyāpāde. Anusahagate kileseti sukhumabhūte kāmarāgabyāpāde. Sabbakileseti maggattayena pahīnāvasese.
вийрияам̣ ваахзд̇ийд̇и яог̇ааважаро вийрияам̣ бавад̇д̇зд̇и. хздтаа зсанаабадилаабхазгарасааасзванаважанаани бхааванаанам̣ висзсад̣̇ассанад̇т̇ам̣ вуд̇д̇аани ‘‘звам̣бхууд̇аа жа бхааванаа’’д̇и. ид̇ха ‘‘д̇ад̇т̇а ж̇аад̇аанам̣ д̇хаммаанам̣ анад̇ивад̇д̇анадтзна инд̣̇рияаанам̣ згарасадтзна д̇ад̣̇убаг̇авийрияавааханадтзна аасзванадтзнаа’’д̇и важанаани бхааванаахзд̇уд̣̇ассанад̇т̇ам̣ вуд̇д̇аани ‘‘иминаа жа иминаа жа хзд̇унаа бхааванаа’’д̇и. хздтаа аасзванаабхааванаад̇и наанаагкан̣авасзна вуд̇д̇аа, ид̇ха аасзванадтзна бхааванаад̇и згагкан̣авасзнаад̇и висзсо. руубам̣ бассанд̇о бхаавзд̇ийд̇иаад̣̇ийсу руубаад̣̇ийни бассид̇аб̣б̣аагаарзна бассанд̇о бхаавзд̇аб̣б̣ам̣ бхааванам̣ бхаавзд̇ийд̇и ад̇т̇о. згарасаа хонд̇ийд̇и вимуд̇д̇ирасзна, гижжарасзна ваа згарасаа хонд̇и. вимуд̇д̇ирасод̇и самбад̇д̇ирасо. гижжасамбад̇д̇иад̇т̇зна расо наама бавужжад̇ийд̇и хи вуд̇д̇анд̇и.
Vīriyaṃ vāhetīti yogāvacaro vīriyaṃ pavatteti. Heṭṭhā esanāpaṭilābhaekarasaāsevanavacanāni bhāvanānaṃ visesadassanatthaṃ vuttāni ‘‘evaṃbhūtā ca bhāvanā’’ti. Idha ‘‘tattha jātānaṃ dhammānaṃ anativattanaṭṭhena indriyānaṃ ekarasaṭṭhena tadupagavīriyavāhanaṭṭhena āsevanaṭṭhenā’’ti vacanāni bhāvanāhetudassanatthaṃ vuttāni ‘‘iminā ca iminā ca hetunā bhāvanā’’ti. Heṭṭhā āsevanābhāvanāti nānākkhaṇavasena vuttā, idha āsevanaṭṭhena bhāvanāti ekakkhaṇavasenāti viseso. Rūpaṃ passanto bhāvetītiādīsu rūpādīni passitabbākārena passanto bhāvetabbaṃ bhāvanaṃ bhāvetīti attho. Ekarasā hontīti vimuttirasena, kiccarasena vā ekarasā honti. Vimuttirasoti sampattiraso. Kiccasampattiatthena raso nāma pavuccatīti hi vuttanti.
бхаавзд̇аб̣б̣анид̣̇д̣̇зсаван̣н̣анаа нидтид̇аа.
Bhāvetabbaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 1. суд̇амаяан̃аан̣анид̣̇д̣̇зсо • 1. Sutamayañāṇaniddeso
