| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. ভযসুত্তং
2. Bhayasuttaṃ
৬৩. ‘‘তীণিমানি , ভিক্খৰে, অমাতাপুত্তিকানি ভযানীতি অস্সুতৰা পুথুজ্জনো ভাসতি। কতমানি তীণি? হোতি সো, ভিক্খৰে, সমযো যং মহাঅগ্গিডাহো ৰুট্ঠাতি। মহাঅগ্গিডাহে খো পন, ভিক্খৰে, ৰুট্ঠিতে তেন গামাপি ডয্হন্তি নিগমাপি ডয্হন্তি নগরাপি ডয্হন্তি। গামেসুপি ডয্হমানেসু নিগমেসুপি ডয্হমানেসু নগরেসুপি ডয্হমানেসু তত্থ মাতাপি পুত্তং নপ্পটিলভতি, পুত্তোপি মাতরং নপ্পটিলভতি । ইদং, ভিক্খৰে, পঠমং অমাতাপুত্তিকং ভযন্তি অস্সুতৰা পুথুজ্জনো ভাসতি।
63. ‘‘Tīṇimāni , bhikkhave, amātāputtikāni bhayānīti assutavā puthujjano bhāsati. Katamāni tīṇi? Hoti so, bhikkhave, samayo yaṃ mahāaggiḍāho vuṭṭhāti. Mahāaggiḍāhe kho pana, bhikkhave, vuṭṭhite tena gāmāpi ḍayhanti nigamāpi ḍayhanti nagarāpi ḍayhanti. Gāmesupi ḍayhamānesu nigamesupi ḍayhamānesu nagaresupi ḍayhamānesu tattha mātāpi puttaṃ nappaṭilabhati, puttopi mātaraṃ nappaṭilabhati . Idaṃ, bhikkhave, paṭhamaṃ amātāputtikaṃ bhayanti assutavā puthujjano bhāsati.
‘‘পুন চপরং, ভিক্খৰে, হোতি সো সমযো যং মহামেঘো ৰুট্ঠাতি। মহামেঘে খো পন, ভিক্খৰে, ৰুট্ঠিতে মহাউদকৰাহকো সঞ্জাযতি। মহাউদকৰাহকে খো পন, ভিক্খৰে, সঞ্জাযন্তে তেন গামাপি ৰুয্হন্তি নিগমাপি ৰুয্হন্তি নগরাপি ৰুয্হন্তি। গামেসুপি ৰুয্হমানেসু নিগমেসুপি ৰুয্হমানেসু নগরেসুপি ৰুয্হমানেসু তত্থ মাতাপি পুত্তং নপ্পটিলভতি, পুত্তোপি মাতরং নপ্পটিলভতি। ইদং, ভিক্খৰে, দুতিযং অমাতাপুত্তিকং ভযন্তি অস্সুতৰা পুথুজ্জনো ভাসতি।
‘‘Puna caparaṃ, bhikkhave, hoti so samayo yaṃ mahāmegho vuṭṭhāti. Mahāmeghe kho pana, bhikkhave, vuṭṭhite mahāudakavāhako sañjāyati. Mahāudakavāhake kho pana, bhikkhave, sañjāyante tena gāmāpi vuyhanti nigamāpi vuyhanti nagarāpi vuyhanti. Gāmesupi vuyhamānesu nigamesupi vuyhamānesu nagaresupi vuyhamānesu tattha mātāpi puttaṃ nappaṭilabhati, puttopi mātaraṃ nappaṭilabhati. Idaṃ, bhikkhave, dutiyaṃ amātāputtikaṃ bhayanti assutavā puthujjano bhāsati.
‘‘পুন চপরং, ভিক্খৰে, হোতি সো সমযো যং ভযং হোতি অটৰিসঙ্কোপো, চক্কসমারুল়্হা জানপদা পরিযাযন্তি। ভযে খো পন, ভিক্খৰে, সতি অটৰিসঙ্কোপে চক্কসমারুল়্হেসু জানপদেসু পরিযাযন্তেসু তত্থ মাতাপি পুত্তং নপ্পটিলভতি, পুত্তোপি মাতরং নপ্পটিলভতি। ইদং, ভিক্খৰে, ততিযং অমাতাপুত্তিকং ভযন্তি অস্সুতৰা পুথুজ্জনো ভাসতি। ইমানি খো, ভিক্খৰে, তীণি অমাতাপুত্তিকানি ভযানীতি অস্সুতৰা পুথুজ্জনো ভাসতি।
‘‘Puna caparaṃ, bhikkhave, hoti so samayo yaṃ bhayaṃ hoti aṭavisaṅkopo, cakkasamāruḷhā jānapadā pariyāyanti. Bhaye kho pana, bhikkhave, sati aṭavisaṅkope cakkasamāruḷhesu jānapadesu pariyāyantesu tattha mātāpi puttaṃ nappaṭilabhati, puttopi mātaraṃ nappaṭilabhati. Idaṃ, bhikkhave, tatiyaṃ amātāputtikaṃ bhayanti assutavā puthujjano bhāsati. Imāni kho, bhikkhave, tīṇi amātāputtikāni bhayānīti assutavā puthujjano bhāsati.
‘‘তানি খো পনিমানি 1, ভিক্খৰে, তীণি সমাতাপুত্তিকানিযেৰ ভযানি অমাতাপুত্তিকানি ভযানীতি অস্সুতৰা পুথুজ্জনো ভাসতি। কতমানি তীণি? হোতি সো, ভিক্খৰে, সমযো যং মহাঅগ্গিডাহো ৰুট্ঠাতি। মহাঅগ্গিডাহে খো পন, ভিক্খৰে, ৰুট্ঠিতে তেন গামাপি ডয্হন্তি নিগমাপি ডয্হন্তি নগরাপি ডয্হন্তি। গামেসুপি ডয্হমানেসু নিগমেসুপি ডয্হমানেসু নগরেসুপি ডয্হমানেসু হোতি সো সমযো যং কদাচি করহচি মাতাপি পুত্তং পটিলভতি, পুত্তোপি মাতরং পটিলভতি। ইদং, ভিক্খৰে, পঠমং সমাতাপুত্তিকংযেৰ ভযং অমাতাপুত্তিকং ভযন্তি অস্সুতৰা পুথুজ্জনো ভাসতি।
‘‘Tāni kho panimāni 2, bhikkhave, tīṇi samātāputtikāniyeva bhayāni amātāputtikāni bhayānīti assutavā puthujjano bhāsati. Katamāni tīṇi? Hoti so, bhikkhave, samayo yaṃ mahāaggiḍāho vuṭṭhāti. Mahāaggiḍāhe kho pana, bhikkhave, vuṭṭhite tena gāmāpi ḍayhanti nigamāpi ḍayhanti nagarāpi ḍayhanti. Gāmesupi ḍayhamānesu nigamesupi ḍayhamānesu nagaresupi ḍayhamānesu hoti so samayo yaṃ kadāci karahaci mātāpi puttaṃ paṭilabhati, puttopi mātaraṃ paṭilabhati. Idaṃ, bhikkhave, paṭhamaṃ samātāputtikaṃyeva bhayaṃ amātāputtikaṃ bhayanti assutavā puthujjano bhāsati.
‘‘পুন চপরং, ভিক্খৰে, হোতি সো সমযো যং মহামেঘো ৰুট্ঠাতি। মহামেঘে খো পন, ভিক্খৰে, ৰুট্ঠিতে মহাউদকৰাহকো সঞ্জাযতি। মহাউদকৰাহকে খো পন, ভিক্খৰে, সঞ্জাতে তেন গামাপি ৰুয্হন্তি নিগমাপি ৰুয্হন্তি নগরাপি ৰুয্হন্তি। গামেসুপি ৰুয্হমানেসু নিগমেসুপি ৰুয্হমানেসু নগরেসুপি ৰুয্হমানেসু হোতি সো সমযো যং কদাচি করহচি মাতাপি পুত্তং পটিলভতি, পুত্তোপি মাতরং পটিলভতি। ইদং, ভিক্খৰে, দুতিযং সমাতাপুত্তিকংযেৰ ভযং অমাতাপুত্তিকং ভযন্তি অস্সুতৰা পুথুজ্জনো ভাসতি।
‘‘Puna caparaṃ, bhikkhave, hoti so samayo yaṃ mahāmegho vuṭṭhāti. Mahāmeghe kho pana, bhikkhave, vuṭṭhite mahāudakavāhako sañjāyati. Mahāudakavāhake kho pana, bhikkhave, sañjāte tena gāmāpi vuyhanti nigamāpi vuyhanti nagarāpi vuyhanti. Gāmesupi vuyhamānesu nigamesupi vuyhamānesu nagaresupi vuyhamānesu hoti so samayo yaṃ kadāci karahaci mātāpi puttaṃ paṭilabhati, puttopi mātaraṃ paṭilabhati. Idaṃ, bhikkhave, dutiyaṃ samātāputtikaṃyeva bhayaṃ amātāputtikaṃ bhayanti assutavā puthujjano bhāsati.
‘‘পুন চপরং, ভিক্খৰে, হোতি সো সমযো যং ভযং হোতি অটৰিসঙ্কোপো, চক্কসমারুল়্হা জানপদা পরিযাযন্তি। ভযে খো পন, ভিক্খৰে, সতি অটৰিসঙ্কোপে চক্কসমারুল়্হেসু জানপদেসু পরিযাযন্তেসু হোতি সো সমযো যং কদাচি করহচি মাতাপি পুত্তং পটিলভতি, পুত্তোপি মাতরং পটিলভতি। ইদং, ভিক্খৰে, ততিযং সমাতাপুত্তিকংযেৰ ভযং অমাতাপুত্তিকং ভযন্তি অস্সুতৰা পুথুজ্জনো ভাসতি। ‘‘ইমানি খো, ভিক্খৰে, তীণি সমাতাপুত্তিকানিযেৰ ভযানি অমাতাপুত্তিকানি ভযানীতি অস্সুতৰা পুথুজ্জনো ভাসতি’’।
‘‘Puna caparaṃ, bhikkhave, hoti so samayo yaṃ bhayaṃ hoti aṭavisaṅkopo, cakkasamāruḷhā jānapadā pariyāyanti. Bhaye kho pana, bhikkhave, sati aṭavisaṅkope cakkasamāruḷhesu jānapadesu pariyāyantesu hoti so samayo yaṃ kadāci karahaci mātāpi puttaṃ paṭilabhati, puttopi mātaraṃ paṭilabhati. Idaṃ, bhikkhave, tatiyaṃ samātāputtikaṃyeva bhayaṃ amātāputtikaṃ bhayanti assutavā puthujjano bhāsati. ‘‘Imāni kho, bhikkhave, tīṇi samātāputtikāniyeva bhayāni amātāputtikāni bhayānīti assutavā puthujjano bhāsati’’.
‘‘তীণিমানি, ভিক্খৰে, অমাতাপুত্তিকানি ভযানি। কতমানি তীণি? জরাভযং, ব্যাধিভযং, মরণভযন্তি। ন, ভিক্খৰে, মাতা পুত্তং জীরমানং এৰং লভতি – ‘অহং জীরামি, মা মে পুত্তো জীরী’তি; পুত্তো ৰা পন মাতরং জীরমানং ন এৰং লভতি – ‘অহং জীরামি, মা মে মাতা জীরী’’’তি।
‘‘Tīṇimāni, bhikkhave, amātāputtikāni bhayāni. Katamāni tīṇi? Jarābhayaṃ, byādhibhayaṃ, maraṇabhayanti. Na, bhikkhave, mātā puttaṃ jīramānaṃ evaṃ labhati – ‘ahaṃ jīrāmi, mā me putto jīrī’ti; putto vā pana mātaraṃ jīramānaṃ na evaṃ labhati – ‘ahaṃ jīrāmi, mā me mātā jīrī’’’ti.
‘‘ন, ভিক্খৰে, মাতা পুত্তং ব্যাধিযমানং এৰং লভতি – ‘অহং ব্যাধিযামি, মা মে পুত্তো ব্যাধিযী’তি; পুত্তো ৰা পন মাতরং ব্যাধিযমানং ন এৰং লভতি – ‘অহং ব্যাধিযামি, মা মে মাতা ব্যাধিযী’’’তি।
‘‘Na, bhikkhave, mātā puttaṃ byādhiyamānaṃ evaṃ labhati – ‘ahaṃ byādhiyāmi, mā me putto byādhiyī’ti; putto vā pana mātaraṃ byādhiyamānaṃ na evaṃ labhati – ‘ahaṃ byādhiyāmi, mā me mātā byādhiyī’’’ti.
‘‘ন, ভিক্খৰে, মাতা পুত্তং মীযমানং এৰং লভতি – ‘অহং মীযামি, মা মে পুত্তো মীযী’তি; পুত্তো ৰা পন মাতরং মীযমানং ন এৰং লভতি – ‘অহং মীযামি, মা মে মাতা মীযী’তি। ইমানি খো, ভিক্খৰে, তীণি অমাতাপুত্তিকানি ভযানী’’তি।
‘‘Na, bhikkhave, mātā puttaṃ mīyamānaṃ evaṃ labhati – ‘ahaṃ mīyāmi, mā me putto mīyī’ti; putto vā pana mātaraṃ mīyamānaṃ na evaṃ labhati – ‘ahaṃ mīyāmi, mā me mātā mīyī’ti. Imāni kho, bhikkhave, tīṇi amātāputtikāni bhayānī’’ti.
‘‘অত্থি , ভিক্খৰে, মগ্গো অত্থি পটিপদা ইমেসঞ্চ তিণ্ণং সমাতাপুত্তিকানং ভযানং ইমেসঞ্চ তিণ্ণং অমাতাপুত্তিকানং ভযানং পহানায সমতিক্কমায সংৰত্ততি। কতমো চ, ভিক্খৰে, মগ্গো কতমা চ পটিপদা ইমেসঞ্চ তিণ্ণং সমাতাপুত্তিকানং ভযানং ইমেসঞ্চ তিণ্ণং অমাতাপুত্তিকানং ভযানং পহানায সমতিক্কমায সংৰত্ততি? অযমেৰ অরিযো অট্ঠঙ্গিকো মগ্গো, সেয্যথিদং – সম্মাদিট্ঠি, সম্মাসঙ্কপো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি। অযং খো, ভিক্খৰে, মগ্গো অযং পটিপদা ইমেসঞ্চ তিণ্ণং সমাতাপুত্তিকানং ভযানং ইমেসঞ্চ তিণ্ণং অমাতাপুত্তিকানং ভযানং পহানায সমতিক্কমায সংৰত্ততী’’তি। দুতিযং।
‘‘Atthi , bhikkhave, maggo atthi paṭipadā imesañca tiṇṇaṃ samātāputtikānaṃ bhayānaṃ imesañca tiṇṇaṃ amātāputtikānaṃ bhayānaṃ pahānāya samatikkamāya saṃvattati. Katamo ca, bhikkhave, maggo katamā ca paṭipadā imesañca tiṇṇaṃ samātāputtikānaṃ bhayānaṃ imesañca tiṇṇaṃ amātāputtikānaṃ bhayānaṃ pahānāya samatikkamāya saṃvattati? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkapo, sammāvācā, sammākammanto, sammāājīvo, sammāvāyāmo, sammāsati, sammāsamādhi. Ayaṃ kho, bhikkhave, maggo ayaṃ paṭipadā imesañca tiṇṇaṃ samātāputtikānaṃ bhayānaṃ imesañca tiṇṇaṃ amātāputtikānaṃ bhayānaṃ pahānāya samatikkamāya saṃvattatī’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. ভযসুত্তৰণ্ণনা • 2. Bhayasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. ভযসুত্তৰণ্ণনা • 2. Bhayasuttavaṇṇanā
