| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
නමො තස්‌ස භගවතො අරහතො සම්‌මාසම්‌බුද්‌ධස්‌ස
Namo tassa bhagavato arahato sammāsambuddhassa
අඞ්‌ගුත්‌තරනිකායො
Aṅguttaranikāyo
තිකනිපාතපාළි
Tikanipātapāḷi
1. පඨමපණ්‌ණාසකං
1. Paṭhamapaṇṇāsakaṃ
1. බාලවග්‌ගො
1. Bālavaggo
1. භයසුත්‌තං
1. Bhayasuttaṃ
1. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ 1’’ති තෙ භික්‌ඛූ භගවතො පච්‌චස්‌සොසුං. භගවා එතදවොච –
1. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante 2’’ti te bhikkhū bhagavato paccassosuṃ. Bhagavā etadavoca –
‘‘යානි කානිචි, භික්‌ඛවෙ, භයානි උප්‌පජ්‌ජන්‌ති සබ්‌බානි තානි බාලතො උප්‌පජ්‌ජන්‌ති, නො පණ්‌ඩිතතො. යෙ කෙචි උපද්‌දවා උප්‌පජ්‌ජන්‌ති සබ්‌බෙ තෙ බාලතො උප්‌පජ්‌ජන්‌ති, නො පණ්‌ඩිතතො. යෙ කෙචි උපසග්‌ගා උප්‌පජ්‌ජන්‌ති සබ්‌බෙ තෙ බාලතො උප්‌පජ්‌ජන්‌ති, නො පණ්‌ඩිතතො. සෙය්‍යථාපි, භික්‌ඛවෙ, නළාගාරා වා තිණාගාරා වා 3 අග්‌ගි මුත්‌තො 4 කූටාගාරානිපි ඩහති උල්‌ලිත්‌තාවලිත්‌තානි නිවාතානි ඵුසිතග්‌ගළානි පිහිතවාතපානානි; එවමෙවං ඛො, භික්‌ඛවෙ, යානි කානිචි භයානි උප්‌පජ්‌ජන්‌ති සබ්‌බානි තානි බාලතො උප්‌පජ්‌ජන්‌ති, නො පණ්‌ඩිතතො. යෙ කෙචි උපද්‌දවා උප්‌පජ්‌ජන්‌ති සබ්‌බෙ තෙ බාලතො උප්‌පජ්‌ජන්‌ති, නො පණ්‌ඩිතතො. යෙ කෙචි උපසග්‌ගා උප්‌පජ්‌ජන්‌ති සබ්‌බෙ තෙ බාලතො උප්‌පජ්‌ජන්‌ති, නො පණ්‌ඩිතතො.
‘‘Yāni kānici, bhikkhave, bhayāni uppajjanti sabbāni tāni bālato uppajjanti, no paṇḍitato. Ye keci upaddavā uppajjanti sabbe te bālato uppajjanti, no paṇḍitato. Ye keci upasaggā uppajjanti sabbe te bālato uppajjanti, no paṇḍitato. Seyyathāpi, bhikkhave, naḷāgārā vā tiṇāgārā vā 5 aggi mutto 6 kūṭāgārānipi ḍahati ullittāvalittāni nivātāni phusitaggaḷāni pihitavātapānāni; evamevaṃ kho, bhikkhave, yāni kānici bhayāni uppajjanti sabbāni tāni bālato uppajjanti, no paṇḍitato. Ye keci upaddavā uppajjanti sabbe te bālato uppajjanti, no paṇḍitato. Ye keci upasaggā uppajjanti sabbe te bālato uppajjanti, no paṇḍitato.
‘‘ඉති ඛො, භික්‌ඛවෙ, සප්‌පටිභයො බාලො, අප්‌පටිභයො පණ්‌ඩිතො. සඋපද්‌දවො බාලො, අනුපද්‌දවො පණ්‌ඩිතො. සඋපසග්‌ගො බාලො, අනුපසග්‌ගො පණ්‌ඩිතො. නත්‌ථි, භික්‌ඛවෙ, පණ්‌ඩිතතො භයං, නත්‌ථි පණ්‌ඩිතතො උපද්‌දවො, නත්‌ථි පණ්‌ඩිතතො උපසග්‌ගො.
‘‘Iti kho, bhikkhave, sappaṭibhayo bālo, appaṭibhayo paṇḍito. Saupaddavo bālo, anupaddavo paṇḍito. Saupasaggo bālo, anupasaggo paṇḍito. Natthi, bhikkhave, paṇḍitato bhayaṃ, natthi paṇḍitato upaddavo, natthi paṇḍitato upasaggo.
‘‘තස්‌මාතිහ, භික්‌ඛවෙ, එවං සික්‌ඛිතබ්‌බං – ‘යෙහි තීහි ධම්‌මෙහි සමන්‌නාගතො බාලො වෙදිතබ්‌බො තෙ තයො ධම්‌මෙ අභිනිවජ්‌ජෙත්‌වා, යෙහි තීහි ධම්‌මෙහි සමන්‌නාගතො පණ්‌ඩිතො වෙදිතබ්‌බො තෙ තයො ධම්‌මෙ සමාදාය වත්‌තිස්‌සාමා’ති. එවඤ්‌හි වො, භික්‌ඛවෙ, සික්‌ඛිතබ්‌බ’’න්‌ති. පඨමං.
‘‘Tasmātiha, bhikkhave, evaṃ sikkhitabbaṃ – ‘yehi tīhi dhammehi samannāgato bālo veditabbo te tayo dhamme abhinivajjetvā, yehi tīhi dhammehi samannāgato paṇḍito veditabbo te tayo dhamme samādāya vattissāmā’ti. Evañhi vo, bhikkhave, sikkhitabba’’nti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1. භයසුත්‌තවණ්‌ණනා • 1. Bhayasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1. භයසුත්‌තවණ්‌ණනා • 1. Bhayasuttavaṇṇanā
