| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
அங்கு³த்தரனிகாயே
Aṅguttaranikāye
திகனிபாத-அட்ட²கதா²
Tikanipāta-aṭṭhakathā
1. பட²மபண்ணாஸகங்
1. Paṭhamapaṇṇāsakaṃ
1. பா³லவக்³கோ³
1. Bālavaggo
1. ப⁴யஸுத்தவண்ணனா
1. Bhayasuttavaṇṇanā
1. திகனிபாதஸ்ஸ பட²மே ப⁴யானீதிஆதீ³ஸு ப⁴யந்தி சித்துத்ராஸோ. உபத்³த³வோதி அனேகக்³க³தாகாரோ. உபஸக்³கோ³தி உபஸட்டா²காரோ தத்த² தத்த² லக்³க³னாகாரோ.
1. Tikanipātassa paṭhame bhayānītiādīsu bhayanti cittutrāso. Upaddavoti anekaggatākāro. Upasaggoti upasaṭṭhākāro tattha tattha lagganākāro.
தேஸங் ஏவங் நானத்தங் வேதி³தப்³ப³ங் – பப்³ப³தவிஸமனிஸ்ஸிதா சோரா ஜனபத³வாஸீனங் பேஸெந்தி – ‘‘மயங் அஸுகதி³வஸே நாம தும்ஹாகங் கா³மங் பஹரிஸ்ஸாமா’’தி. தே தங் பவத்திங் ஸுதகாலதோ பட்டா²ய ப⁴யங் ஸந்தாஸங் ஆபஜ்ஜந்தி. அயங் சித்துத்ராஸோ நாம. ‘‘யதா² நோ தே சோரா குபிதா அனத்த²ம்பி ஆவஹெய்யு’’ந்தி ஹத்த²ஸாரங் க³ஹெத்வா த்³விபத³சதுப்பதே³ஹி ஸத்³தி⁴ங் அரஞ்ஞங் பவிஸித்வா தத்த² தத்த² பூ⁴மியங் நிபஜ்ஜந்தி ட³ங்ஸமகஸாதீ³ஹி க²ஜ்ஜமானா, கு³ம்ப³ந்தரானி பவிஸந்தா கா²ணுகண்டகே மத்³த³ந்தி. தேஸங் ஏவங் விசரந்தானங் விக்கி²த்தபா⁴வோ அனேகக்³க³தாகாரோ நாம. ததோ சோரேஸு யதா²வுத்தே தி³வஸே அனாக³ச்ச²ந்தேஸு ‘‘துச்ச²கஸாஸனங் ப⁴விஸ்ஸதி, கா³மங் பவிஸிஸ்ஸாமா’’தி ஸபரிக்கா²ரா கா³மங் பவிஸந்தி. அத² தேஸங் பவிட்ட²பா⁴வங் ஞத்வா கா³மங் பரிவாரெத்வா த்³வாரே அக்³கி³ங் த³த்வா மனுஸ்ஸே கா⁴தெத்வா சோரா ஸப்³ப³ங் விப⁴வங் விலும்பித்வா க³ச்ச²ந்தி. தேஸு கா⁴திதாவஸேஸா அக்³கி³ங் நிப்³பா³பெத்வா கொட்ட²கச்சா²யாபி⁴த்திச்சா²யாதீ³ஸு தத்த² தத்த² லக்³கி³த்வா நிஸீத³ந்தி நட்ட²ங் அனுஸோசமானா. அயங் உபஸட்டா²காரோ லக்³க³னாகாரோ நாம.
Tesaṃ evaṃ nānattaṃ veditabbaṃ – pabbatavisamanissitā corā janapadavāsīnaṃ pesenti – ‘‘mayaṃ asukadivase nāma tumhākaṃ gāmaṃ paharissāmā’’ti. Te taṃ pavattiṃ sutakālato paṭṭhāya bhayaṃ santāsaṃ āpajjanti. Ayaṃ cittutrāso nāma. ‘‘Yathā no te corā kupitā anatthampi āvaheyyu’’nti hatthasāraṃ gahetvā dvipadacatuppadehi saddhiṃ araññaṃ pavisitvā tattha tattha bhūmiyaṃ nipajjanti ḍaṃsamakasādīhi khajjamānā, gumbantarāni pavisantā khāṇukaṇṭake maddanti. Tesaṃ evaṃ vicarantānaṃ vikkhittabhāvo anekaggatākāro nāma. Tato coresu yathāvutte divase anāgacchantesu ‘‘tucchakasāsanaṃ bhavissati, gāmaṃ pavisissāmā’’ti saparikkhārā gāmaṃ pavisanti. Atha tesaṃ paviṭṭhabhāvaṃ ñatvā gāmaṃ parivāretvā dvāre aggiṃ datvā manusse ghātetvā corā sabbaṃ vibhavaṃ vilumpitvā gacchanti. Tesu ghātitāvasesā aggiṃ nibbāpetvā koṭṭhakacchāyābhitticchāyādīsu tattha tattha laggitvā nisīdanti naṭṭhaṃ anusocamānā. Ayaṃ upasaṭṭhākāro lagganākāro nāma.
நளாகா³ராதி நளேஹி ச²ன்னபடிச்ச²ன்னஅகா³ரா. ஸேஸஸம்பா⁴ரா பனெத்த² ருக்க²மயா ஹொந்தி. திணாகா³ரேபி ஏஸேவ நயோ. கூடாகா³ரானீதி கூடஸங்க³ஹிதானி அகா³ரானி. உல்லித்தாவலித்தானீதி அந்தோ ச ப³ஹி ச லித்தானி. நிவாதானீதி நிவாரிதவாதப்பவேஸானி. பு²ஸிதக்³க³ளானீதி சே²கேஹி வட்³ட⁴கீஹி கதத்தா பிட்ட²ஸங்கா⁴டம்ஹி ஸுட்டு² பு²ஸிதகவாடானி. பிஹிதவாதபானானீதி யுத்தவாதபானானி. இமினா பத³த்³வயேன கவாடவாதபானானங் நிச்சபிஹிததங் அகதெ²த்வா ஸம்பத்தியேவ கதி²தா. இச்சி²திச்சி²தக்க²ணே பன தானி பிதீ⁴யந்தி ச விவரீயந்தி ச.
Naḷāgārāti naḷehi channapaṭicchannaagārā. Sesasambhārā panettha rukkhamayā honti. Tiṇāgārepi eseva nayo. Kūṭāgārānīti kūṭasaṅgahitāni agārāni. Ullittāvalittānīti anto ca bahi ca littāni. Nivātānīti nivāritavātappavesāni. Phusitaggaḷānīti chekehi vaḍḍhakīhi katattā piṭṭhasaṅghāṭamhi suṭṭhu phusitakavāṭāni. Pihitavātapānānīti yuttavātapānāni. Iminā padadvayena kavāṭavātapānānaṃ niccapihitataṃ akathetvā sampattiyeva kathitā. Icchiticchitakkhaṇe pana tāni pidhīyanti ca vivarīyanti ca.
பா³லதோ உப்பஜ்ஜந்தீதி பா³லமேவ நிஸ்ஸாய உப்பஜ்ஜந்தி. பா³லோ ஹி அபண்டி³தபுரிஸோ ரஜ்ஜங் வா ஓபரஜ்ஜங் வா அஞ்ஞங் வா பன மஹந்தங் டா²னங் பத்தெ²ந்தோ கதிபயே அத்தனா ஸதி³ஸே வித⁴வபுத்தே மஹாது⁴த்தே க³ஹெத்வா ‘‘ஏத² அஹங் தும்ஹே இஸ்ஸரே கரிஸ்ஸாமீ’’தி பப்³ப³தக³ஹனாதீ³னி நிஸ்ஸாய அந்தமந்தே கா³மே பஹரந்தோ தா³மரிகபா⁴வங் ஜானாபெத்வா அனுபுப்³பே³ன நிக³மேபி ஜனபதே³பி பஹரதி. மனுஸ்ஸா கே³ஹானி ச²ட்³டெ³த்வா கே²மட்டா²னங் பத்த²யமானா பக்கமந்தி. தே நிஸ்ஸாய வஸந்தா பி⁴க்கூ²பி பி⁴க்கு²னியோபி அத்தனோ அத்தனோ வஸனட்டா²னானி பஹாய பக்கமந்தி. க³தக³தட்டா²னே பி⁴க்கா²பி ஸேனாஸனம்பி து³ல்லப⁴ங் ஹோதி. ஏவங் சதுன்னம்பி பரிஸானங் ப⁴யங் ஆக³தமேவ ஹோதி. பப்³ப³ஜ்ஜிதேஸுபி த்³வே பா³லா பி⁴க்கூ² அஞ்ஞமஞ்ஞங் விவாத³ங் பட்ட²பெத்வா சோத³னங் ஆரப⁴ந்தி. இதி கோஸம்பி³வாஸிகானங் விய மஹாகலஹோ உப்பஜ்ஜதி. சதுன்னங் பரிஸானங் ப⁴யங் ஆக³தமேவ ஹோதீதி ஏவங் யானி கானிசி ப⁴யானி உப்பஜ்ஜந்தி, ஸப்³பா³னி தானி பா³லதோ உப்பஜ்ஜந்தீதி யதா²னுஸந்தி⁴னா தே³ஸனங் நிட்ட²பேஸி.
Bālato uppajjantīti bālameva nissāya uppajjanti. Bālo hi apaṇḍitapuriso rajjaṃ vā oparajjaṃ vā aññaṃ vā pana mahantaṃ ṭhānaṃ patthento katipaye attanā sadise vidhavaputte mahādhutte gahetvā ‘‘etha ahaṃ tumhe issare karissāmī’’ti pabbatagahanādīni nissāya antamante gāme paharanto dāmarikabhāvaṃ jānāpetvā anupubbena nigamepi janapadepi paharati. Manussā gehāni chaḍḍetvā khemaṭṭhānaṃ patthayamānā pakkamanti. Te nissāya vasantā bhikkhūpi bhikkhuniyopi attano attano vasanaṭṭhānāni pahāya pakkamanti. Gatagataṭṭhāne bhikkhāpi senāsanampi dullabhaṃ hoti. Evaṃ catunnampi parisānaṃ bhayaṃ āgatameva hoti. Pabbajjitesupi dve bālā bhikkhū aññamaññaṃ vivādaṃ paṭṭhapetvā codanaṃ ārabhanti. Iti kosambivāsikānaṃ viya mahākalaho uppajjati. Catunnaṃ parisānaṃ bhayaṃ āgatameva hotīti evaṃ yāni kānici bhayāni uppajjanti, sabbāni tāni bālato uppajjantīti yathānusandhinā desanaṃ niṭṭhapesi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. ப⁴யஸுத்தங் • 1. Bhayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. ப⁴யஸுத்தவண்ணனா • 1. Bhayasuttavaṇṇanā
