| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. ப⁴யஸுத்தவண்ணனா
2. Bhayasuttavaṇṇanā
63. து³தியே அமாதாபுத்திகானீதி மாதா ச புத்தோ ச மாதாபுத்தங், பரித்தாதுங் ஸமத்த²பா⁴வேன நத்தி² எத்த² மாதாபுத்தந்தி அமாதாபுத்திகானி. யந்தி யஸ்மிங் ஸமயே. தத்த² மாதாபி புத்தங் நப்படிலப⁴தீதி தஸ்மிங் அக்³கி³ப⁴யே உப்பன்னே மாதாபி புத்தங் பஸ்ஸிதுங் ந லப⁴தி, புத்தோபி மாதரங் பஸ்ஸிதுங் ந லப⁴தீதி அத்தோ². ப⁴யங் ஹோதீதி சித்துத்ராஸப⁴யங் ஹோதி. அடவிஸங்கோபோதி அடவியா ஸங்கோபோ. அடவீதி செத்த² அடவிவாஸினோ சோரா வேதி³தப்³பா³. யதா³ ஹி தே அடவிதோ ஜனபத³ங் ஓதரித்வா கா³மனிக³மராஜதா⁴னியோ பஹரித்வா விலும்பந்தி, ததா³ அடவிஸங்கோபோ நாம ஹோதி, தங் ஸந்தா⁴யேதங் வுத்தங். சக்கஸமாரூள்ஹாதி எத்த² இரியாபத²சக்கம்பி வட்டதி யானசக்கம்பி. ப⁴யஸ்மிங் ஹி ஸம்பத்தே யேஸங் யானகானி அத்தி², தே அத்தனோ பரிக்கா²ரப⁴ண்ட³ங் தேஸு ஆரோபெத்வா பலாயந்தி. யேஸங் நத்தி² , தே காஜேன வா ஆதா³ய ஸீஸேன வா உக்கி²பித்வா பலாயந்தியேவ. தே சக்கஸமாரூள்ஹா நாம ஹொந்தி. பரியாயந்தீதி இதோ சிதோ ச க³ச்ச²ந்தி. கதா³சீதி கிஸ்மிஞ்சிதே³வ காலே. கரஹசீதி தஸ்ஸேவ வேவசனங். மாதாபி புத்தங் படிலப⁴தீதி ஆக³ச்ச²ந்தங் வா க³ச்ச²ந்தங் வா ஏகஸ்மிங் டா²னே நிலீனங் வா பஸ்ஸிதுங் லப⁴தி. உத³கவாஹகோதி நதீ³பூரோ. மாதாபி புத்தங் படிலப⁴தீதி குல்லே வா உளும்பே வா மத்திகாபா⁴ஜனே வா தா³ருக்க²ண்டே³ வா லக்³க³ங் வுய்ஹமானங் பஸ்ஸிதுங் படிலப⁴தி, ஸொத்தி²னா வா புன உத்தரித்வா கா³மே வா அரஞ்ஞே வா டி²தங் பஸ்ஸிதுங் லப⁴தீதி.
63. Dutiye amātāputtikānīti mātā ca putto ca mātāputtaṃ, parittātuṃ samatthabhāvena natthi ettha mātāputtanti amātāputtikāni. Yanti yasmiṃ samaye. Tattha mātāpi puttaṃ nappaṭilabhatīti tasmiṃ aggibhaye uppanne mātāpi puttaṃ passituṃ na labhati, puttopi mātaraṃ passituṃ na labhatīti attho. Bhayaṃ hotīti cittutrāsabhayaṃ hoti. Aṭavisaṅkopoti aṭaviyā saṅkopo. Aṭavīti cettha aṭavivāsino corā veditabbā. Yadā hi te aṭavito janapadaṃ otaritvā gāmanigamarājadhāniyo paharitvā vilumpanti, tadā aṭavisaṅkopo nāma hoti, taṃ sandhāyetaṃ vuttaṃ. Cakkasamārūḷhāti ettha iriyāpathacakkampi vaṭṭati yānacakkampi. Bhayasmiṃ hi sampatte yesaṃ yānakāni atthi, te attano parikkhārabhaṇḍaṃ tesu āropetvā palāyanti. Yesaṃ natthi , te kājena vā ādāya sīsena vā ukkhipitvā palāyantiyeva. Te cakkasamārūḷhā nāma honti. Pariyāyantīti ito cito ca gacchanti. Kadācīti kismiñcideva kāle. Karahacīti tasseva vevacanaṃ. Mātāpi puttaṃ paṭilabhatīti āgacchantaṃ vā gacchantaṃ vā ekasmiṃ ṭhāne nilīnaṃ vā passituṃ labhati. Udakavāhakoti nadīpūro. Mātāpi puttaṃ paṭilabhatīti kulle vā uḷumpe vā mattikābhājane vā dārukkhaṇḍe vā laggaṃ vuyhamānaṃ passituṃ paṭilabhati, sotthinā vā puna uttaritvā gāme vā araññe vā ṭhitaṃ passituṃ labhatīti.
ஏவங் பரியாயதோ அமாதாபுத்திகானி ப⁴யானி த³ஸ்ஸெத்வா இதா³னி நிப்பரியாயேன த³ஸ்ஸெந்தோ தீணிமானீதிஆதி³மாஹ. தத்த² ஜராப⁴யந்தி ஜரங் படிச்ச உப்பஜ்ஜனகப⁴யங். இதரேஸுபி ஏஸேவ நயோ. வுத்தம்பி சேதங் – ‘‘ஜரங் படிச்ச உப்பஜ்ஜதி ப⁴யங் ப⁴யானகங் ச²ம்பி⁴தத்தங் லோமஹங்ஸோ சேதஸோ உத்ராஸோ. ப்³யாதி⁴ங் படிச்ச, மரணங் படிச்ச உப்பஜ்ஜதி ப⁴யங் ப⁴யானகங் ச²ம்பி⁴தத்தங் லோமஹங்ஸோ சேதஸோ உத்ராஸோ’’தி (விப⁴॰ 921). ஸேஸங் ஸப்³ப³த்த² உத்தானமேவாதி.
Evaṃ pariyāyato amātāputtikāni bhayāni dassetvā idāni nippariyāyena dassento tīṇimānītiādimāha. Tattha jarābhayanti jaraṃ paṭicca uppajjanakabhayaṃ. Itaresupi eseva nayo. Vuttampi cetaṃ – ‘‘jaraṃ paṭicca uppajjati bhayaṃ bhayānakaṃ chambhitattaṃ lomahaṃso cetaso utrāso. Byādhiṃ paṭicca, maraṇaṃ paṭicca uppajjati bhayaṃ bhayānakaṃ chambhitattaṃ lomahaṃso cetaso utrāso’’ti (vibha. 921). Sesaṃ sabbattha uttānamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ப⁴யஸுத்தங் • 2. Bhayasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. ப⁴யஸுத்தவண்ணனா • 2. Bhayasuttavaṇṇanā
