| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
11. பே⁴தா³னுவத்தகஸிக்கா²பத³ங்
11. Bhedānuvattakasikkhāpadaṃ
417. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன தே³வத³த்தோ ஸங்க⁴பே⁴தா³ய பரக்கமதி சக்கபே⁴தா³ய. பி⁴க்கூ² ஏவமாஹங்ஸு – ‘‘அத⁴ம்மவாதீ³ தே³வத³த்தோ, அவினயவாதீ³ தே³வத³த்தோ. கத²ஞ்ஹி நாம தே³வத³த்தோ ஸங்க⁴பே⁴தா³ய பரக்கமிஸ்ஸதி சக்கபே⁴தா³யா’’தி! ஏவங் வுத்தே கோகாலிகோ கடமோத³கதிஸ்ஸகோ க²ண்ட³தே³வியா புத்தோ ஸமுத்³த³த³த்தோ தே பி⁴க்கூ² ஏதத³வோசுங் – ‘‘மாயஸ்மந்தோ ஏவங் அவசுத்த². த⁴ம்மவாதீ³ தே³வத³த்தோ, வினயவாதீ³ தே³வத³த்தோ. அம்ஹாகஞ்ச தே³வத³த்தோ ச²ந்த³ஞ்ச ருசிஞ்ச ஆதா³ய வோஹரதி ஜானாதி நோ பா⁴ஸதி அம்ஹாகங்பேதங் க²மதீ’’தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கூ² தே³வத³த்தஸ்ஸ ஸங்க⁴பே⁴தா³ய பரக்கமந்தஸ்ஸ அனுவத்தகா ப⁴விஸ்ஸந்தி வக்³க³வாத³கா’’தி! அத² கோ² தே பி⁴க்கூ² தே அனுவத்தகே பி⁴க்கூ² அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, பி⁴க்கூ² தே³வத³த்தஸ்ஸ ஸங்க⁴பே⁴தா³ய பரக்கமந்தஸ்ஸ அனுவத்தகா ஹொந்தி வக்³க³வாத³கா’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… ‘‘கத²ஞ்ஹி நாம தே, பி⁴க்க²வே, மோக⁴புரிஸா தே³வத³த்தஸ்ஸ ஸங்க⁴பே⁴தா³ய பரக்கமந்தஸ்ஸ அனுவத்தகா ப⁴விஸ்ஸந்தி வக்³க³வாத³கா ! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
417. Tena samayena buddho bhagavā rājagahe viharati veḷuvane kalandakanivāpe. Tena kho pana samayena devadatto saṅghabhedāya parakkamati cakkabhedāya. Bhikkhū evamāhaṃsu – ‘‘adhammavādī devadatto, avinayavādī devadatto. Kathañhi nāma devadatto saṅghabhedāya parakkamissati cakkabhedāyā’’ti! Evaṃ vutte kokāliko kaṭamodakatissako khaṇḍadeviyā putto samuddadatto te bhikkhū etadavocuṃ – ‘‘māyasmanto evaṃ avacuttha. Dhammavādī devadatto, vinayavādī devadatto. Amhākañca devadatto chandañca ruciñca ādāya voharati jānāti no bhāsati amhākaṃpetaṃ khamatī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū devadattassa saṅghabhedāya parakkamantassa anuvattakā bhavissanti vaggavādakā’’ti! Atha kho te bhikkhū te anuvattake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira, bhikkhave, bhikkhū devadattassa saṅghabhedāya parakkamantassa anuvattakā honti vaggavādakā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā devadattassa saṅghabhedāya parakkamantassa anuvattakā bhavissanti vaggavādakā ! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
418. ‘‘தஸ்ஸேவ கோ² பன பி⁴க்கு²ஸ்ஸ பி⁴க்கூ² ஹொந்தி அனுவத்தகா வக்³க³வாத³கா ஏகோ வா த்³வே வா தயோ வா. தே ஏவங் வதெ³ய்யுங் – ‘மாயஸ்மந்தோ ஏதங் பி⁴க்கு²ங் கிஞ்சி அவசுத்த². த⁴ம்மவாதீ³ சேஸோ பி⁴க்கு², வினயவாதீ³ சேஸோ பி⁴க்கு². அம்ஹாகஞ்சேஸோ பி⁴க்கு² ச²ந்த³ஞ்ச ருசிஞ்ச ஆதா³ய வோஹரதி ஜானாதி நோ பா⁴ஸதி அம்ஹாகம்பேதங் க²மதீ’தி, தே பி⁴க்கூ² பி⁴க்கூ²ஹி ஏவமஸ்ஸு வசனீயா – ‘மாயஸ்மந்தோ ஏவங் அவசுத்த², ந சேஸோ பி⁴க்கு² த⁴ம்மவாதீ³, ந சேஸோ பி⁴க்கு² வினயவாதீ³, மாயஸ்மந்தானம்பி ஸங்க⁴பே⁴தோ³ ருச்சித்த², ஸமேதாயஸ்மந்தானங் ஸங்கே⁴ன, ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’தி. ஏவஞ்ச தே பி⁴க்கூ² பி⁴க்கூ²ஹி வுச்சமானா ததே²வ பக்³க³ண்ஹெய்யுங், தே பி⁴க்கூ² பி⁴க்கூ²ஹி யாவததியங் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய. யாவததியஞ்சே ஸமனுபா⁴ஸியமானா தங் படினிஸ்ஸஜ்ஜெய்யுங், இச்சேதங் குஸலங், நோ சே படினிஸ்ஸஜ்ஜெய்யுங், ஸங்கா⁴தி³ஸேஸோ’’தி.
418.‘‘Tasseva kho pana bhikkhussa bhikkhū honti anuvattakā vaggavādakā eko vā dve vā tayo vā. Te evaṃ vadeyyuṃ – ‘māyasmanto etaṃ bhikkhuṃ kiñci avacuttha. Dhammavādī ceso bhikkhu, vinayavādī ceso bhikkhu. Amhākañceso bhikkhu chandañca ruciñca ādāya voharati jānāti no bhāsati amhākampetaṃ khamatī’ti, te bhikkhū bhikkhūhi evamassu vacanīyā – ‘māyasmanto evaṃ avacuttha, na ceso bhikkhu dhammavādī, na ceso bhikkhu vinayavādī, māyasmantānampi saṅghabhedo ruccittha, sametāyasmantānaṃ saṅghena, samaggo hi saṅgho sammodamāno avivadamāno ekuddeso phāsu viharatī’ti. Evañca te bhikkhū bhikkhūhi vuccamānā tatheva paggaṇheyyuṃ, te bhikkhū bhikkhūhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsiyamānā taṃ paṭinissajjeyyuṃ, iccetaṃ kusalaṃ, no ce paṭinissajjeyyuṃ, saṅghādiseso’’ti.
419. தஸ்ஸேவ கோ² பனாதி தஸ்ஸ ஸங்க⁴பே⁴த³கஸ்ஸ பி⁴க்கு²னோ.
419.Tasseva kho panāti tassa saṅghabhedakassa bhikkhuno.
பி⁴க்கூ² ஹொந்தீதி அஞ்ஞே பி⁴க்கூ² ஹொந்தி.
Bhikkhū hontīti aññe bhikkhū honti.
அனுவத்தகாதி யங்தி³ட்டி²கோ ஸோ ஹோதி யங்க²ந்திகோ யங்ருசிகோ தேபி தங்தி³ட்டி²கா ஹொந்தி தங்க²ந்திகா தங்ருசிகா.
Anuvattakāti yaṃdiṭṭhiko so hoti yaṃkhantiko yaṃruciko tepi taṃdiṭṭhikā honti taṃkhantikā taṃrucikā.
வக்³க³வாத³காதி தஸ்ஸ வண்ணாய பக்கா²ய டி²தா ஹொந்தி.
Vaggavādakāti tassa vaṇṇāya pakkhāya ṭhitā honti.
ஏகோ வா த்³வே வா தயோ வாதி ஏகோ வா ஹோதி த்³வே வா தயோ வா. தே ஏவங் வதெ³ய்யுங் – ‘‘மாயஸ்மந்தோ ஏதங் பி⁴க்கு²ங் கிஞ்சி அவசுத்த², த⁴ம்மவாதீ³ சேஸோ பி⁴க்கு², வினயவாதீ³ சேஸோ பி⁴க்கு², அம்ஹாகஞ்சேஸோ பி⁴க்கு² ச²ந்த³ஞ்ச ருசிஞ்ச ஆதா³ய வோஹரதி ஜானாதி நோ பா⁴ஸதி அம்ஹாகங்பேதங் க²மதீ’தி.
Eko vā dve vā tayo vāti eko vā hoti dve vā tayo vā. Te evaṃ vadeyyuṃ – ‘‘māyasmanto etaṃ bhikkhuṃ kiñci avacuttha, dhammavādī ceso bhikkhu, vinayavādī ceso bhikkhu, amhākañceso bhikkhu chandañca ruciñca ādāya voharati jānāti no bhāsati amhākaṃpetaṃ khamatī’ti.
தே பி⁴க்கூ²தி யே தே அனுவத்தகா பி⁴க்கூ².
Te bhikkhūti ye te anuvattakā bhikkhū.
பி⁴க்கூ²ஹீதி அஞ்ஞேஹி பி⁴க்கூ²ஹி.
Bhikkhūhīti aññehi bhikkhūhi.
யே பஸ்ஸந்தி யே ஸுணந்தி தேஹி வத்தப்³பா³ – ‘‘மாயஸ்மந்தோ ஏவங் அவசுத்த². ந சேஸோ பி⁴க்கு² த⁴ம்மவாதீ³, ந சேஸோ பி⁴க்கு² வினயவாதீ³. மாயஸ்மந்தானம்பி ஸங்க⁴பே⁴தோ³ ருச்சித்த². ஸமேதாயஸ்மந்தானங் ஸங்கே⁴ன. ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜந்தி, இச்சேதங் குஸலங்; நோ சே படினிஸ்ஸஜ்ஜந்தி, ஆபத்தி து³க்கடஸ்ஸ. ஸுத்வா ந வத³ந்தி, ஆபத்தி து³க்கடஸ்ஸ. தே பி⁴க்கூ² ஸங்க⁴மஜ்ஜ²ம்பி ஆகட்³டி⁴த்வா வத்தப்³பா³ – ‘‘மாயஸ்மந்தோ ஏவங் அவசுத்த². ந சேஸோ பி⁴க்கு² த⁴ம்மவாதீ³, ந சேஸோ பி⁴க்கு² வினயவாதீ³. மாயஸ்மந்தானம்பி ஸங்க⁴பே⁴தோ³ ருச்சித்த². ஸமேதாயஸ்மந்தானங் ஸங்கே⁴ன. ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’’தி. து³தியம்பி வத்தப்³பா³. ததியம்பி வத்தப்³பா³. ஸசே படினிஸ்ஸஜ்ஜந்தி, இச்சேதங் குஸலங்; நோ சே படினிஸ்ஸஜ்ஜந்தி, ஆபத்தி து³க்கடஸ்ஸ. தே பி⁴க்கூ² ஸமனுபா⁴ஸிதப்³பா³. ஏவஞ்ச பன, பி⁴க்க²வே, ஸமனுபா⁴ஸிதப்³பா³. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Ye passanti ye suṇanti tehi vattabbā – ‘‘māyasmanto evaṃ avacuttha. Na ceso bhikkhu dhammavādī, na ceso bhikkhu vinayavādī. Māyasmantānampi saṅghabhedo ruccittha. Sametāyasmantānaṃ saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbā. Tatiyampi vattabbā. Sace paṭinissajjanti, iccetaṃ kusalaṃ; no ce paṭinissajjanti, āpatti dukkaṭassa. Sutvā na vadanti, āpatti dukkaṭassa. Te bhikkhū saṅghamajjhampi ākaḍḍhitvā vattabbā – ‘‘māyasmanto evaṃ avacuttha. Na ceso bhikkhu dhammavādī, na ceso bhikkhu vinayavādī. Māyasmantānampi saṅghabhedo ruccittha. Sametāyasmantānaṃ saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbā. Tatiyampi vattabbā. Sace paṭinissajjanti, iccetaṃ kusalaṃ; no ce paṭinissajjanti, āpatti dukkaṭassa. Te bhikkhū samanubhāsitabbā. Evañca pana, bhikkhave, samanubhāsitabbā. Byattena bhikkhunā paṭibalena saṅgho ñāpetabbo –
420. ‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ ச இத்த²னாமோ ச பி⁴க்கூ² இத்த²ன்னாமஸ்ஸ பி⁴க்கு²னோ ஸங்க⁴பே⁴தா³ய பரக்கமந்தஸ்ஸ அனுவத்தகா வக்³க³வாத³கா . தே தங் வத்து²ங் ந படினிஸ்ஸஜ்ஜந்தி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கூ² ஸமனுபா⁴ஸெய்ய தஸ்ஸ வத்து²ஸ்ஸ படினிஸ்ஸக்³கா³ய. ஏஸா ஞத்தி.
420. ‘‘Suṇātu me, bhante, saṅgho. Itthannāmo ca itthanāmo ca bhikkhū itthannāmassa bhikkhuno saṅghabhedāya parakkamantassa anuvattakā vaggavādakā . Te taṃ vatthuṃ na paṭinissajjanti. Yadi saṅghassa pattakallaṃ, saṅgho itthannāmañca itthannāmañca bhikkhū samanubhāseyya tassa vatthussa paṭinissaggāya. Esā ñatti.
‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ ச இத்த²ன்னாமோ ச பி⁴க்கூ² இத்த²ன்னாமஸ்ஸ பி⁴க்கு²னோ ஸங்க⁴பே⁴தா³ய பரக்கமந்தஸ்ஸ அனுவத்தகா வக்³க³வாத³கா. தே தங் வத்து²ங் ந படினிஸ்ஸஜ்ஜந்தி. ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கூ² ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸாயஸ்மதோ க²மதி இத்த²ன்னாமஸ்ஸ ச இத்த²ன்னாமஸ்ஸ ச பி⁴க்கூ²னங் ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Itthannāmo ca itthannāmo ca bhikkhū itthannāmassa bhikkhuno saṅghabhedāya parakkamantassa anuvattakā vaggavādakā. Te taṃ vatthuṃ na paṭinissajjanti. Saṅgho itthannāmañca itthannāmañca bhikkhū samanubhāsati tassa vatthussa paṭinissaggāya. Yassāyasmato khamati itthannāmassa ca itthannāmassa ca bhikkhūnaṃ samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி…பே॰… ததியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴. இத்த²ன்னாமோ ச இத்த²ன்னாமோ ச பி⁴க்கூ² இத்த²ன்னாமஸ்ஸ பி⁴க்கு²னோ ஸங்க⁴பே⁴தா³ய பரக்கமந்தஸ்ஸ அனுவத்தகா வக்³க³வாத³கா. தே தங் வத்து²ங் ந படினிஸ்ஸஜ்ஜந்தி. ஸங்கோ⁴ இத்த²ன்னாமஞ்ச இத்த²ன்னாமஞ்ச பி⁴க்கூ² ஸமனுபா⁴ஸதி தஸ்ஸ வத்து²ஸ்ஸ படினிஸ்ஸக்³கா³ய. யஸ்ஸாயஸ்மதோ க²மதி இத்த²ன்னாமஸ்ஸ ச இத்த²ன்னாமஸ்ஸ ச பி⁴க்கூ²னங் ஸமனுபா⁴ஸனா தஸ்ஸ வத்து²ஸ்ஸ படினிஸ்ஸக்³கா³ய, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Itthannāmo ca itthannāmo ca bhikkhū itthannāmassa bhikkhuno saṅghabhedāya parakkamantassa anuvattakā vaggavādakā. Te taṃ vatthuṃ na paṭinissajjanti. Saṅgho itthannāmañca itthannāmañca bhikkhū samanubhāsati tassa vatthussa paṭinissaggāya. Yassāyasmato khamati itthannāmassa ca itthannāmassa ca bhikkhūnaṃ samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘ஸமனுப⁴ட்டா² ஸங்கே⁴ன இத்த²ன்னாமோ ச இத்த²ன்னாமோ ச பி⁴க்கூ² தஸ்ஸ வத்து²ஸ்ஸ படினிஸ்ஸக்³கா³ய. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Samanubhaṭṭhā saṅghena itthannāmo ca itthannāmo ca bhikkhū tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
421. ஞத்தியா து³க்கடங், த்³வீஹி கம்மவாசாஹி து²ல்லச்சயா, கம்மவாசாபரியோஸானே ஆபத்தி ஸங்கா⁴தி³ஸேஸஸ்ஸ. ஸங்கா⁴தி³ஸேஸங் அஜ்ஜா²பஜ்ஜந்தானங் ஞத்தியா து³க்கடங், த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தி. த்³வே தயோ ஏகதோ ஸமனுபா⁴ஸிதப்³பா³, தது³த்தரி ந ஸமனுபா⁴ஸிதப்³பா³.
421. Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantānaṃ ñattiyā dukkaṭaṃ, dvīhi kammavācāhi thullaccayā paṭippassambhanti. Dve tayo ekato samanubhāsitabbā, taduttari na samanubhāsitabbā.
ஸங்கா⁴தி³ஸேஸோதி…பே॰… தேனபி வுச்சதி ‘‘ஸங்கா⁴தி³ஸேஸோ’’தி.
Saṅghādisesoti…pe… tenapi vuccati ‘‘saṅghādiseso’’ti.
422. த⁴ம்மகம்மே த⁴ம்மகம்மஸஞ்ஞீ ந படினிஸ்ஸஜ்ஜந்தி, ஆபத்தி ஸங்கா⁴தி³ஸேஸஸ்ஸ.
422. Dhammakamme dhammakammasaññī na paṭinissajjanti, āpatti saṅghādisesassa.
த⁴ம்மகம்மே வேமதிகா ந படினிஸ்ஸஜ்ஜந்தி, ஆபத்தி ஸங்கா⁴தி³ஸேஸஸ்ஸ.
Dhammakamme vematikā na paṭinissajjanti, āpatti saṅghādisesassa.
த⁴ம்மகம்மே அத⁴ம்மகம்மஸஞ்ஞீ ந படினிஸ்ஸஜ்ஜந்தி, ஆபத்தி ஸங்கா⁴தி³ஸேஸஸ்ஸ.
Dhammakamme adhammakammasaññī na paṭinissajjanti, āpatti saṅghādisesassa.
அத⁴ம்மகம்மே த⁴ம்மகம்மஸஞ்ஞீ, ஆபத்தி து³க்கடஸ்ஸ.
Adhammakamme dhammakammasaññī, āpatti dukkaṭassa.
அத⁴ம்மகம்மே வேமதிகா, ஆபத்தி து³க்கடஸ்ஸ.
Adhammakamme vematikā, āpatti dukkaṭassa.
அத⁴ம்மகம்மே அத⁴ம்மகம்மஸஞ்ஞீ, ஆபத்தி து³க்கடஸ்ஸ.
Adhammakamme adhammakammasaññī, āpatti dukkaṭassa.
423. அனாபத்தி அஸமனுபா⁴ஸந்தானங், படினிஸ்ஸஜ்ஜந்தானங், உம்மத்தகானங், கி²த்தசித்தானங், வேத³னாட்டானங், ஆதி³கம்மிகானந்தி.
423. Anāpatti asamanubhāsantānaṃ, paṭinissajjantānaṃ, ummattakānaṃ, khittacittānaṃ, vedanāṭṭānaṃ, ādikammikānanti.
பே⁴தா³னுவத்தகஸிக்கா²பத³ங் நிட்டி²தங் ஏகாத³ஸமங்.
Bhedānuvattakasikkhāpadaṃ niṭṭhitaṃ ekādasamaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 11. து³தியஸங்க⁴பே⁴த³ஸிக்கா²பத³வண்ணனா • 11. Dutiyasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 11. து³தியஸங்க⁴பே⁴த³ஸிக்கா²பத³வண்ணனா • 11. Dutiyasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 11. து³தியஸங்க⁴பே⁴த³ஸிக்கா²பத³வண்ணனா • 11. Dutiyasaṅghabhedasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 11. து³தியஸங்க⁴பே⁴த³ஸிக்கா²பத³வண்ணனா • 11. Dutiyasaṅghabhedasikkhāpadavaṇṇanā
