| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
১১. ভেদানুৰত্তকসিক্খাপদং
11. Bhedānuvattakasikkhāpadaṃ
৪১৭. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন দেৰদত্তো সঙ্ঘভেদায পরক্কমতি চক্কভেদায। ভিক্খূ এৰমাহংসু – ‘‘অধম্মৰাদী দেৰদত্তো, অৰিনযৰাদী দেৰদত্তো। কথঞ্হি নাম দেৰদত্তো সঙ্ঘভেদায পরক্কমিস্সতি চক্কভেদাযা’’তি! এৰং ৰুত্তে কোকালিকো কটমোদকতিস্সকো খণ্ডদেৰিযা পুত্তো সমুদ্দদত্তো তে ভিক্খূ এতদৰোচুং – ‘‘মাযস্মন্তো এৰং অৰচুত্থ। ধম্মৰাদী দেৰদত্তো, ৰিনযৰাদী দেৰদত্তো। অম্হাকঞ্চ দেৰদত্তো ছন্দঞ্চ রুচিঞ্চ আদায ৰোহরতি জানাতি নো ভাসতি অম্হাকংপেতং খমতী’’তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ দেৰদত্তস্স সঙ্ঘভেদায পরক্কমন্তস্স অনুৰত্তকা ভৰিস্সন্তি ৰগ্গৰাদকা’’তি! অথ খো তে ভিক্খূ তে অনুৰত্তকে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে॰… ‘‘সচ্চং কির, ভিক্খৰে, ভিক্খূ দেৰদত্তস্স সঙ্ঘভেদায পরক্কমন্তস্স অনুৰত্তকা হোন্তি ৰগ্গৰাদকা’’তি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… ‘‘কথঞ্হি নাম তে, ভিক্খৰে, মোঘপুরিসা দেৰদত্তস্স সঙ্ঘভেদায পরক্কমন্তস্স অনুৰত্তকা ভৰিস্সন্তি ৰগ্গৰাদকা ! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
417. Tena samayena buddho bhagavā rājagahe viharati veḷuvane kalandakanivāpe. Tena kho pana samayena devadatto saṅghabhedāya parakkamati cakkabhedāya. Bhikkhū evamāhaṃsu – ‘‘adhammavādī devadatto, avinayavādī devadatto. Kathañhi nāma devadatto saṅghabhedāya parakkamissati cakkabhedāyā’’ti! Evaṃ vutte kokāliko kaṭamodakatissako khaṇḍadeviyā putto samuddadatto te bhikkhū etadavocuṃ – ‘‘māyasmanto evaṃ avacuttha. Dhammavādī devadatto, vinayavādī devadatto. Amhākañca devadatto chandañca ruciñca ādāya voharati jānāti no bhāsati amhākaṃpetaṃ khamatī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū devadattassa saṅghabhedāya parakkamantassa anuvattakā bhavissanti vaggavādakā’’ti! Atha kho te bhikkhū te anuvattake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira, bhikkhave, bhikkhū devadattassa saṅghabhedāya parakkamantassa anuvattakā honti vaggavādakā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā devadattassa saṅghabhedāya parakkamantassa anuvattakā bhavissanti vaggavādakā ! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
৪১৮. ‘‘তস্সেৰ খো পন ভিক্খুস্স ভিক্খূ হোন্তি অনুৰত্তকা ৰগ্গৰাদকা একো ৰা দ্ৰে ৰা তযো ৰা। তে এৰং ৰদেয্যুং – ‘মাযস্মন্তো এতং ভিক্খুং কিঞ্চি অৰচুত্থ। ধম্মৰাদী চেসো ভিক্খু, ৰিনযৰাদী চেসো ভিক্খু। অম্হাকঞ্চেসো ভিক্খু ছন্দঞ্চ রুচিঞ্চ আদায ৰোহরতি জানাতি নো ভাসতি অম্হাকম্পেতং খমতী’তি, তে ভিক্খূ ভিক্খূহি এৰমস্সু ৰচনীযা – ‘মাযস্মন্তো এৰং অৰচুত্থ, ন চেসো ভিক্খু ধম্মৰাদী, ন চেসো ভিক্খু ৰিনযৰাদী, মাযস্মন্তানম্পি সঙ্ঘভেদো রুচ্চিত্থ, সমেতাযস্মন্তানং সঙ্ঘেন, সমগ্গো হি সঙ্ঘো সম্মোদমানো অৰিৰদমানো একুদ্দেসো ফাসু ৰিহরতী’তি। এৰঞ্চ তে ভিক্খূ ভিক্খূহি ৰুচ্চমানা তথেৰ পগ্গণ্হেয্যুং, তে ভিক্খূ ভিক্খূহি যাৰততিযং সমনুভাসিতব্বা তস্স পটিনিস্সগ্গায। যাৰততিযঞ্চে সমনুভাসিযমানা তং পটিনিস্সজ্জেয্যুং, ইচ্চেতং কুসলং, নো চে পটিনিস্সজ্জেয্যুং, সঙ্ঘাদিসেসো’’তি।
418.‘‘Tasseva kho pana bhikkhussa bhikkhū honti anuvattakā vaggavādakā eko vā dve vā tayo vā. Te evaṃ vadeyyuṃ – ‘māyasmanto etaṃ bhikkhuṃ kiñci avacuttha. Dhammavādī ceso bhikkhu, vinayavādī ceso bhikkhu. Amhākañceso bhikkhu chandañca ruciñca ādāya voharati jānāti no bhāsati amhākampetaṃ khamatī’ti, te bhikkhū bhikkhūhi evamassu vacanīyā – ‘māyasmanto evaṃ avacuttha, na ceso bhikkhu dhammavādī, na ceso bhikkhu vinayavādī, māyasmantānampi saṅghabhedo ruccittha, sametāyasmantānaṃ saṅghena, samaggo hi saṅgho sammodamāno avivadamāno ekuddeso phāsu viharatī’ti. Evañca te bhikkhū bhikkhūhi vuccamānā tatheva paggaṇheyyuṃ, te bhikkhū bhikkhūhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsiyamānā taṃ paṭinissajjeyyuṃ, iccetaṃ kusalaṃ, no ce paṭinissajjeyyuṃ, saṅghādiseso’’ti.
৪১৯. তস্সেৰ খো পনাতি তস্স সঙ্ঘভেদকস্স ভিক্খুনো।
419.Tasseva kho panāti tassa saṅghabhedakassa bhikkhuno.
ভিক্খূ হোন্তীতি অঞ্ঞে ভিক্খূ হোন্তি।
Bhikkhū hontīti aññe bhikkhū honti.
অনুৰত্তকাতি যংদিট্ঠিকো সো হোতি যংখন্তিকো যংরুচিকো তেপি তংদিট্ঠিকা হোন্তি তংখন্তিকা তংরুচিকা।
Anuvattakāti yaṃdiṭṭhiko so hoti yaṃkhantiko yaṃruciko tepi taṃdiṭṭhikā honti taṃkhantikā taṃrucikā.
ৰগ্গৰাদকাতি তস্স ৰণ্ণায পক্খায ঠিতা হোন্তি।
Vaggavādakāti tassa vaṇṇāya pakkhāya ṭhitā honti.
একো ৰা দ্ৰে ৰা তযো ৰাতি একো ৰা হোতি দ্ৰে ৰা তযো ৰা। তে এৰং ৰদেয্যুং – ‘‘মাযস্মন্তো এতং ভিক্খুং কিঞ্চি অৰচুত্থ, ধম্মৰাদী চেসো ভিক্খু, ৰিনযৰাদী চেসো ভিক্খু, অম্হাকঞ্চেসো ভিক্খু ছন্দঞ্চ রুচিঞ্চ আদায ৰোহরতি জানাতি নো ভাসতি অম্হাকংপেতং খমতী’তি।
Eko vā dve vā tayo vāti eko vā hoti dve vā tayo vā. Te evaṃ vadeyyuṃ – ‘‘māyasmanto etaṃ bhikkhuṃ kiñci avacuttha, dhammavādī ceso bhikkhu, vinayavādī ceso bhikkhu, amhākañceso bhikkhu chandañca ruciñca ādāya voharati jānāti no bhāsati amhākaṃpetaṃ khamatī’ti.
তে ভিক্খূতি যে তে অনুৰত্তকা ভিক্খূ।
Te bhikkhūti ye te anuvattakā bhikkhū.
ভিক্খূহীতি অঞ্ঞেহি ভিক্খূহি।
Bhikkhūhīti aññehi bhikkhūhi.
যে পস্সন্তি যে সুণন্তি তেহি ৰত্তব্বা – ‘‘মাযস্মন্তো এৰং অৰচুত্থ। ন চেসো ভিক্খু ধম্মৰাদী, ন চেসো ভিক্খু ৰিনযৰাদী। মাযস্মন্তানম্পি সঙ্ঘভেদো রুচ্চিত্থ। সমেতাযস্মন্তানং সঙ্ঘেন। সমগ্গো হি সঙ্ঘো সম্মোদমানো অৰিৰদমানো একুদ্দেসো ফাসু ৰিহরতী’’তি। দুতিযম্পি ৰত্তব্বা। ততিযম্পি ৰত্তব্বা। সচে পটিনিস্সজ্জন্তি, ইচ্চেতং কুসলং; নো চে পটিনিস্সজ্জন্তি, আপত্তি দুক্কটস্স। সুত্ৰা ন ৰদন্তি, আপত্তি দুক্কটস্স। তে ভিক্খূ সঙ্ঘমজ্ঝম্পি আকড্ঢিত্ৰা ৰত্তব্বা – ‘‘মাযস্মন্তো এৰং অৰচুত্থ। ন চেসো ভিক্খু ধম্মৰাদী, ন চেসো ভিক্খু ৰিনযৰাদী। মাযস্মন্তানম্পি সঙ্ঘভেদো রুচ্চিত্থ। সমেতাযস্মন্তানং সঙ্ঘেন। সমগ্গো হি সঙ্ঘো সম্মোদমানো অৰিৰদমানো একুদ্দেসো ফাসু ৰিহরতী’’তি। দুতিযম্পি ৰত্তব্বা। ততিযম্পি ৰত্তব্বা। সচে পটিনিস্সজ্জন্তি, ইচ্চেতং কুসলং; নো চে পটিনিস্সজ্জন্তি, আপত্তি দুক্কটস্স। তে ভিক্খূ সমনুভাসিতব্বা। এৰঞ্চ পন, ভিক্খৰে, সমনুভাসিতব্বা। ব্যত্তেন ভিক্খুনা পটিবলেন সঙ্ঘো ঞাপেতব্বো –
Ye passanti ye suṇanti tehi vattabbā – ‘‘māyasmanto evaṃ avacuttha. Na ceso bhikkhu dhammavādī, na ceso bhikkhu vinayavādī. Māyasmantānampi saṅghabhedo ruccittha. Sametāyasmantānaṃ saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbā. Tatiyampi vattabbā. Sace paṭinissajjanti, iccetaṃ kusalaṃ; no ce paṭinissajjanti, āpatti dukkaṭassa. Sutvā na vadanti, āpatti dukkaṭassa. Te bhikkhū saṅghamajjhampi ākaḍḍhitvā vattabbā – ‘‘māyasmanto evaṃ avacuttha. Na ceso bhikkhu dhammavādī, na ceso bhikkhu vinayavādī. Māyasmantānampi saṅghabhedo ruccittha. Sametāyasmantānaṃ saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbā. Tatiyampi vattabbā. Sace paṭinissajjanti, iccetaṃ kusalaṃ; no ce paṭinissajjanti, āpatti dukkaṭassa. Te bhikkhū samanubhāsitabbā. Evañca pana, bhikkhave, samanubhāsitabbā. Byattena bhikkhunā paṭibalena saṅgho ñāpetabbo –
৪২০. ‘‘সুণাতু মে, ভন্তে, সঙ্ঘো। ইত্থন্নামো চ ইত্থনামো চ ভিক্খূ ইত্থন্নামস্স ভিক্খুনো সঙ্ঘভেদায পরক্কমন্তস্স অনুৰত্তকা ৰগ্গৰাদকা । তে তং ৰত্থুং ন পটিনিস্সজ্জন্তি। যদি সঙ্ঘস্স পত্তকল্লং, সঙ্ঘো ইত্থন্নামঞ্চ ইত্থন্নামঞ্চ ভিক্খূ সমনুভাসেয্য তস্স ৰত্থুস্স পটিনিস্সগ্গায। এসা ঞত্তি।
420. ‘‘Suṇātu me, bhante, saṅgho. Itthannāmo ca itthanāmo ca bhikkhū itthannāmassa bhikkhuno saṅghabhedāya parakkamantassa anuvattakā vaggavādakā . Te taṃ vatthuṃ na paṭinissajjanti. Yadi saṅghassa pattakallaṃ, saṅgho itthannāmañca itthannāmañca bhikkhū samanubhāseyya tassa vatthussa paṭinissaggāya. Esā ñatti.
‘‘সুণাতু মে, ভন্তে, সঙ্ঘো। ইত্থন্নামো চ ইত্থন্নামো চ ভিক্খূ ইত্থন্নামস্স ভিক্খুনো সঙ্ঘভেদায পরক্কমন্তস্স অনুৰত্তকা ৰগ্গৰাদকা। তে তং ৰত্থুং ন পটিনিস্সজ্জন্তি। সঙ্ঘো ইত্থন্নামঞ্চ ইত্থন্নামঞ্চ ভিক্খূ সমনুভাসতি তস্স ৰত্থুস্স পটিনিস্সগ্গায। যস্সাযস্মতো খমতি ইত্থন্নামস্স চ ইত্থন্নামস্স চ ভিক্খূনং সমনুভাসনা তস্স ৰত্থুস্স পটিনিস্সগ্গায, সো তুণ্হস্স; যস্স নক্খমতি, সো ভাসেয্য।
‘‘Suṇātu me, bhante, saṅgho. Itthannāmo ca itthannāmo ca bhikkhū itthannāmassa bhikkhuno saṅghabhedāya parakkamantassa anuvattakā vaggavādakā. Te taṃ vatthuṃ na paṭinissajjanti. Saṅgho itthannāmañca itthannāmañca bhikkhū samanubhāsati tassa vatthussa paṭinissaggāya. Yassāyasmato khamati itthannāmassa ca itthannāmassa ca bhikkhūnaṃ samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘দুতিযম্পি এতমত্থং ৰদামি…পে॰… ততিযম্পি এতমত্থং ৰদামি – সুণাতু মে, ভন্তে, সঙ্ঘো। ইত্থন্নামো চ ইত্থন্নামো চ ভিক্খূ ইত্থন্নামস্স ভিক্খুনো সঙ্ঘভেদায পরক্কমন্তস্স অনুৰত্তকা ৰগ্গৰাদকা। তে তং ৰত্থুং ন পটিনিস্সজ্জন্তি। সঙ্ঘো ইত্থন্নামঞ্চ ইত্থন্নামঞ্চ ভিক্খূ সমনুভাসতি তস্স ৰত্থুস্স পটিনিস্সগ্গায। যস্সাযস্মতো খমতি ইত্থন্নামস্স চ ইত্থন্নামস্স চ ভিক্খূনং সমনুভাসনা তস্স ৰত্থুস্স পটিনিস্সগ্গায, সো তুণ্হস্স; যস্স নক্খমতি, সো ভাসেয্য।
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Itthannāmo ca itthannāmo ca bhikkhū itthannāmassa bhikkhuno saṅghabhedāya parakkamantassa anuvattakā vaggavādakā. Te taṃ vatthuṃ na paṭinissajjanti. Saṅgho itthannāmañca itthannāmañca bhikkhū samanubhāsati tassa vatthussa paṭinissaggāya. Yassāyasmato khamati itthannāmassa ca itthannāmassa ca bhikkhūnaṃ samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘সমনুভট্ঠা সঙ্ঘেন ইত্থন্নামো চ ইত্থন্নামো চ ভিক্খূ তস্স ৰত্থুস্স পটিনিস্সগ্গায। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Samanubhaṭṭhā saṅghena itthannāmo ca itthannāmo ca bhikkhū tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
৪২১. ঞত্তিযা দুক্কটং, দ্ৰীহি কম্মৰাচাহি থুল্লচ্চযা, কম্মৰাচাপরিযোসানে আপত্তি সঙ্ঘাদিসেসস্স। সঙ্ঘাদিসেসং অজ্ঝাপজ্জন্তানং ঞত্তিযা দুক্কটং, দ্ৰীহি কম্মৰাচাহি থুল্লচ্চযা পটিপ্পস্সম্ভন্তি। দ্ৰে তযো একতো সমনুভাসিতব্বা, তদুত্তরি ন সমনুভাসিতব্বা।
421. Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantānaṃ ñattiyā dukkaṭaṃ, dvīhi kammavācāhi thullaccayā paṭippassambhanti. Dve tayo ekato samanubhāsitabbā, taduttari na samanubhāsitabbā.
সঙ্ঘাদিসেসোতি…পে॰… তেনপি ৰুচ্চতি ‘‘সঙ্ঘাদিসেসো’’তি।
Saṅghādisesoti…pe… tenapi vuccati ‘‘saṅghādiseso’’ti.
৪২২. ধম্মকম্মে ধম্মকম্মসঞ্ঞী ন পটিনিস্সজ্জন্তি, আপত্তি সঙ্ঘাদিসেসস্স।
422. Dhammakamme dhammakammasaññī na paṭinissajjanti, āpatti saṅghādisesassa.
ধম্মকম্মে ৰেমতিকা ন পটিনিস্সজ্জন্তি, আপত্তি সঙ্ঘাদিসেসস্স।
Dhammakamme vematikā na paṭinissajjanti, āpatti saṅghādisesassa.
ধম্মকম্মে অধম্মকম্মসঞ্ঞী ন পটিনিস্সজ্জন্তি, আপত্তি সঙ্ঘাদিসেসস্স।
Dhammakamme adhammakammasaññī na paṭinissajjanti, āpatti saṅghādisesassa.
অধম্মকম্মে ধম্মকম্মসঞ্ঞী, আপত্তি দুক্কটস্স।
Adhammakamme dhammakammasaññī, āpatti dukkaṭassa.
অধম্মকম্মে ৰেমতিকা, আপত্তি দুক্কটস্স।
Adhammakamme vematikā, āpatti dukkaṭassa.
অধম্মকম্মে অধম্মকম্মসঞ্ঞী, আপত্তি দুক্কটস্স।
Adhammakamme adhammakammasaññī, āpatti dukkaṭassa.
৪২৩. অনাপত্তি অসমনুভাসন্তানং, পটিনিস্সজ্জন্তানং, উম্মত্তকানং, খিত্তচিত্তানং, ৰেদনাট্টানং, আদিকম্মিকানন্তি।
423. Anāpatti asamanubhāsantānaṃ, paṭinissajjantānaṃ, ummattakānaṃ, khittacittānaṃ, vedanāṭṭānaṃ, ādikammikānanti.
ভেদানুৰত্তকসিক্খাপদং নিট্ঠিতং একাদসমং।
Bhedānuvattakasikkhāpadaṃ niṭṭhitaṃ ekādasamaṃ.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১১. দুতিযসঙ্ঘভেদসিক্খাপদৰণ্ণনা • 11. Dutiyasaṅghabhedasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১১. দুতিযসঙ্ঘভেদসিক্খাপদৰণ্ণনা • 11. Dutiyasaṅghabhedasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১১. দুতিযসঙ্ঘভেদসিক্খাপদৰণ্ণনা • 11. Dutiyasaṅghabhedasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১১. দুতিযসঙ্ঘভেদসিক্খাপদৰণ্ণনা • 11. Dutiyasaṅghabhedasikkhāpadavaṇṇanā
