| Library / Tipiṭaka / තිපිටක • Tipiṭaka / මහාවිභඞ්‌ග • Mahāvibhaṅga |
11. භෙදානුවත්‌තකසික්‌ඛාපදං
11. Bhedānuvattakasikkhāpadaṃ
417. තෙන සමයෙන බුද්‌ධො භගවා රාජගහෙ විහරති වෙළුවනෙ කලන්‌දකනිවාපෙ. තෙන ඛො පන සමයෙන දෙවදත්‌තො සඞ්‌ඝභෙදාය පරක්‌කමති චක්‌කභෙදාය. භික්‌ඛූ එවමාහංසු – ‘‘අධම්‌මවාදී දෙවදත්‌තො, අවිනයවාදී දෙවදත්‌තො. කථඤ්‌හි නාම දෙවදත්‌තො සඞ්‌ඝභෙදාය පරක්‌කමිස්‌සති චක්‌කභෙදායා’’ති! එවං වුත්‌තෙ කොකාලිකො කටමොදකතිස්‌සකො ඛණ්‌ඩදෙවියා පුත්‌තො සමුද්‌දදත්‌තො තෙ භික්‌ඛූ එතදවොචුං – ‘‘මායස්‌මන්‌තො එවං අවචුත්‌ථ. ධම්‌මවාදී දෙවදත්‌තො, විනයවාදී දෙවදත්‌තො. අම්‌හාකඤ්‌ච දෙවදත්‌තො ඡන්‌දඤ්‌ච රුචිඤ්‌ච ආදාය වොහරති ජානාති නො භාසති අම්‌හාකංපෙතං ඛමතී’’ති. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛූ දෙවදත්‌තස්‌ස සඞ්‌ඝභෙදාය පරක්‌කමන්‌තස්‌ස අනුවත්‌තකා භවිස්‌සන්‌ති වග්‌ගවාදකා’’ති! අථ ඛො තෙ භික්‌ඛූ තෙ අනුවත්‌තකෙ භික්‌ඛූ අනෙකපරියායෙන විගරහිත්‌වා භගවතො එතමත්‌ථං ආරොචෙසුං…පෙ.… ‘‘සච්‌චං කිර, භික්‌ඛවෙ, භික්‌ඛූ දෙවදත්‌තස්‌ස සඞ්‌ඝභෙදාය පරක්‌කමන්‌තස්‌ස අනුවත්‌තකා හොන්‌ති වග්‌ගවාදකා’’ති? ‘‘සච්‌චං, භගවා’’ති. විගරහි බුද්‌ධො භගවා…පෙ.… ‘‘කථඤ්‌හි නාම තෙ, භික්‌ඛවෙ, මොඝපුරිසා දෙවදත්‌තස්‌ස සඞ්‌ඝභෙදාය පරක්‌කමන්‌තස්‌ස අනුවත්‌තකා භවිස්‌සන්‌ති වග්‌ගවාදකා ! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, ඉමං සික්‌ඛාපදං උද්‌දිසෙය්‍යාථ –
417. Tena samayena buddho bhagavā rājagahe viharati veḷuvane kalandakanivāpe. Tena kho pana samayena devadatto saṅghabhedāya parakkamati cakkabhedāya. Bhikkhū evamāhaṃsu – ‘‘adhammavādī devadatto, avinayavādī devadatto. Kathañhi nāma devadatto saṅghabhedāya parakkamissati cakkabhedāyā’’ti! Evaṃ vutte kokāliko kaṭamodakatissako khaṇḍadeviyā putto samuddadatto te bhikkhū etadavocuṃ – ‘‘māyasmanto evaṃ avacuttha. Dhammavādī devadatto, vinayavādī devadatto. Amhākañca devadatto chandañca ruciñca ādāya voharati jānāti no bhāsati amhākaṃpetaṃ khamatī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū devadattassa saṅghabhedāya parakkamantassa anuvattakā bhavissanti vaggavādakā’’ti! Atha kho te bhikkhū te anuvattake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira, bhikkhave, bhikkhū devadattassa saṅghabhedāya parakkamantassa anuvattakā honti vaggavādakā’’ti? ‘‘Saccaṃ, bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā devadattassa saṅghabhedāya parakkamantassa anuvattakā bhavissanti vaggavādakā ! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
418. ‘‘තස්‌සෙව ඛො පන භික්‌ඛුස්‌ස භික්‌ඛූ හොන්‌ති අනුවත්‌තකා වග්‌ගවාදකා එකො වා ද්‌වෙ වා තයො වා. තෙ එවං වදෙය්‍යුං – ‘මායස්‌මන්‌තො එතං භික්‌ඛුං කිඤ්‌චි අවචුත්‌ථ. ධම්‌මවාදී චෙසො භික්‌ඛු, විනයවාදී චෙසො භික්‌ඛු. අම්‌හාකඤ්‌චෙසො භික්‌ඛු ඡන්‌දඤ්‌ච රුචිඤ්‌ච ආදාය වොහරති ජානාති නො භාසති අම්‌හාකම්‌පෙතං ඛමතී’ති, තෙ භික්‌ඛූ භික්‌ඛූහි එවමස්‌සු වචනීයා – ‘මායස්‌මන්‌තො එවං අවචුත්‌ථ, න චෙසො භික්‌ඛු ධම්‌මවාදී, න චෙසො භික්‌ඛු විනයවාදී, මායස්‌මන්‌තානම්‌පි සඞ්‌ඝභෙදො රුච්‌චිත්‌ථ, සමෙතායස්‌මන්‌තානං සඞ්‌ඝෙන, සමග්‌ගො හි සඞ්‌ඝො සම්‌මොදමානො අවිවදමානො එකුද්‌දෙසො ඵාසු විහරතී’ති. එවඤ්‌ච තෙ භික්‌ඛූ භික්‌ඛූහි වුච්‌චමානා තථෙව පග්‌ගණ්‌හෙය්‍යුං, තෙ භික්‌ඛූ භික්‌ඛූහි යාවතතියං සමනුභාසිතබ්‌බා තස්‌ස පටිනිස්‌සග්‌ගාය. යාවතතියඤ්‌චෙ සමනුභාසියමානා තං පටිනිස්‌සජ්‌ජෙය්‍යුං, ඉච්‌චෙතං කුසලං, නො චෙ පටිනිස්‌සජ්‌ජෙය්‍යුං, සඞ්‌ඝාදිසෙසො’’ති.
418.‘‘Tasseva kho pana bhikkhussa bhikkhū honti anuvattakā vaggavādakā eko vā dve vā tayo vā. Te evaṃ vadeyyuṃ – ‘māyasmanto etaṃ bhikkhuṃ kiñci avacuttha. Dhammavādī ceso bhikkhu, vinayavādī ceso bhikkhu. Amhākañceso bhikkhu chandañca ruciñca ādāya voharati jānāti no bhāsati amhākampetaṃ khamatī’ti, te bhikkhū bhikkhūhi evamassu vacanīyā – ‘māyasmanto evaṃ avacuttha, na ceso bhikkhu dhammavādī, na ceso bhikkhu vinayavādī, māyasmantānampi saṅghabhedo ruccittha, sametāyasmantānaṃ saṅghena, samaggo hi saṅgho sammodamāno avivadamāno ekuddeso phāsu viharatī’ti. Evañca te bhikkhū bhikkhūhi vuccamānā tatheva paggaṇheyyuṃ, te bhikkhū bhikkhūhi yāvatatiyaṃ samanubhāsitabbā tassa paṭinissaggāya. Yāvatatiyañce samanubhāsiyamānā taṃ paṭinissajjeyyuṃ, iccetaṃ kusalaṃ, no ce paṭinissajjeyyuṃ, saṅghādiseso’’ti.
419. තස්‌සෙව ඛො පනාති තස්‌ස සඞ්‌ඝභෙදකස්‌ස භික්‌ඛුනො.
419.Tasseva kho panāti tassa saṅghabhedakassa bhikkhuno.
භික්‌ඛූ හොන්‌තීති අඤ්‌ඤෙ භික්‌ඛූ හොන්‌ති.
Bhikkhū hontīti aññe bhikkhū honti.
අනුවත්‌තකාති යංදිට්‌ඨිකො සො හොති යංඛන්‌තිකො යංරුචිකො තෙපි තංදිට්‌ඨිකා හොන්‌ති තංඛන්‌තිකා තංරුචිකා.
Anuvattakāti yaṃdiṭṭhiko so hoti yaṃkhantiko yaṃruciko tepi taṃdiṭṭhikā honti taṃkhantikā taṃrucikā.
වග්‌ගවාදකාති තස්‌ස වණ්‌ණාය පක්‌ඛාය ඨිතා හොන්‌ති.
Vaggavādakāti tassa vaṇṇāya pakkhāya ṭhitā honti.
එකො වා ද්‌වෙ වා තයො වාති එකො වා හොති ද්‌වෙ වා තයො වා. තෙ එවං වදෙය්‍යුං – ‘‘මායස්‌මන්‌තො එතං භික්‌ඛුං කිඤ්‌චි අවචුත්‌ථ, ධම්‌මවාදී චෙසො භික්‌ඛු, විනයවාදී චෙසො භික්‌ඛු, අම්‌හාකඤ්‌චෙසො භික්‌ඛු ඡන්‌දඤ්‌ච රුචිඤ්‌ච ආදාය වොහරති ජානාති නො භාසති අම්‌හාකංපෙතං ඛමතී’ති.
Eko vā dve vā tayo vāti eko vā hoti dve vā tayo vā. Te evaṃ vadeyyuṃ – ‘‘māyasmanto etaṃ bhikkhuṃ kiñci avacuttha, dhammavādī ceso bhikkhu, vinayavādī ceso bhikkhu, amhākañceso bhikkhu chandañca ruciñca ādāya voharati jānāti no bhāsati amhākaṃpetaṃ khamatī’ti.
තෙ භික්‌ඛූති යෙ තෙ අනුවත්‌තකා භික්‌ඛූ.
Te bhikkhūti ye te anuvattakā bhikkhū.
භික්‌ඛූහීති අඤ්‌ඤෙහි භික්‌ඛූහි.
Bhikkhūhīti aññehi bhikkhūhi.
යෙ පස්‌සන්‌ති යෙ සුණන්‌ති තෙහි වත්‌තබ්‌බා – ‘‘මායස්‌මන්‌තො එවං අවචුත්‌ථ. න චෙසො භික්‌ඛු ධම්‌මවාදී, න චෙසො භික්‌ඛු විනයවාදී. මායස්‌මන්‌තානම්‌පි සඞ්‌ඝභෙදො රුච්‌චිත්‌ථ. සමෙතායස්‌මන්‌තානං සඞ්‌ඝෙන. සමග්‌ගො හි සඞ්‌ඝො සම්‌මොදමානො අවිවදමානො එකුද්‌දෙසො ඵාසු විහරතී’’ති. දුතියම්‌පි වත්‌තබ්‌බා. තතියම්‌පි වත්‌තබ්‌බා. සචෙ පටිනිස්‌සජ්‌ජන්‌ති, ඉච්‌චෙතං කුසලං; නො චෙ පටිනිස්‌සජ්‌ජන්‌ති, ආපත්‌ති දුක්‌කටස්‌ස. සුත්‌වා න වදන්‌ති, ආපත්‌ති දුක්‌කටස්‌ස. තෙ භික්‌ඛූ සඞ්‌ඝමජ්‌ඣම්‌පි ආකඩ්‌ඪිත්‌වා වත්‌තබ්‌බා – ‘‘මායස්‌මන්‌තො එවං අවචුත්‌ථ. න චෙසො භික්‌ඛු ධම්‌මවාදී, න චෙසො භික්‌ඛු විනයවාදී. මායස්‌මන්‌තානම්‌පි සඞ්‌ඝභෙදො රුච්‌චිත්‌ථ. සමෙතායස්‌මන්‌තානං සඞ්‌ඝෙන. සමග්‌ගො හි සඞ්‌ඝො සම්‌මොදමානො අවිවදමානො එකුද්‌දෙසො ඵාසු විහරතී’’ති. දුතියම්‌පි වත්‌තබ්‌බා. තතියම්‌පි වත්‌තබ්‌බා. සචෙ පටිනිස්‌සජ්‌ජන්‌ති, ඉච්‌චෙතං කුසලං; නො චෙ පටිනිස්‌සජ්‌ජන්‌ති, ආපත්‌ති දුක්‌කටස්‌ස. තෙ භික්‌ඛූ සමනුභාසිතබ්‌බා. එවඤ්‌ච පන, භික්‌ඛවෙ, සමනුභාසිතබ්‌බා. බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
Ye passanti ye suṇanti tehi vattabbā – ‘‘māyasmanto evaṃ avacuttha. Na ceso bhikkhu dhammavādī, na ceso bhikkhu vinayavādī. Māyasmantānampi saṅghabhedo ruccittha. Sametāyasmantānaṃ saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbā. Tatiyampi vattabbā. Sace paṭinissajjanti, iccetaṃ kusalaṃ; no ce paṭinissajjanti, āpatti dukkaṭassa. Sutvā na vadanti, āpatti dukkaṭassa. Te bhikkhū saṅghamajjhampi ākaḍḍhitvā vattabbā – ‘‘māyasmanto evaṃ avacuttha. Na ceso bhikkhu dhammavādī, na ceso bhikkhu vinayavādī. Māyasmantānampi saṅghabhedo ruccittha. Sametāyasmantānaṃ saṅghena. Samaggo hi saṅgho sammodamāno avivadamāno ekuddeso phāsu viharatī’’ti. Dutiyampi vattabbā. Tatiyampi vattabbā. Sace paṭinissajjanti, iccetaṃ kusalaṃ; no ce paṭinissajjanti, āpatti dukkaṭassa. Te bhikkhū samanubhāsitabbā. Evañca pana, bhikkhave, samanubhāsitabbā. Byattena bhikkhunā paṭibalena saṅgho ñāpetabbo –
420. ‘‘සුණාතු මෙ, භන්‌තෙ, සඞ්‌ඝො. ඉත්‌ථන්‌නාමො ච ඉත්‌ථනාමො ච භික්‌ඛූ ඉත්‌ථන්‌නාමස්‌ස භික්‌ඛුනො සඞ්‌ඝභෙදාය පරක්‌කමන්‌තස්‌ස අනුවත්‌තකා වග්‌ගවාදකා . තෙ තං වත්‌ථුං න පටිනිස්‌සජ්‌ජන්‌ති. යදි සඞ්‌ඝස්‌ස පත්‌තකල්‌ලං, සඞ්‌ඝො ඉත්‌ථන්‌නාමඤ්‌ච ඉත්‌ථන්‌නාමඤ්‌ච භික්‌ඛූ සමනුභාසෙය්‍ය තස්‌ස වත්‌ථුස්‌ස පටිනිස්‌සග්‌ගාය. එසා ඤත්‌ති.
420. ‘‘Suṇātu me, bhante, saṅgho. Itthannāmo ca itthanāmo ca bhikkhū itthannāmassa bhikkhuno saṅghabhedāya parakkamantassa anuvattakā vaggavādakā . Te taṃ vatthuṃ na paṭinissajjanti. Yadi saṅghassa pattakallaṃ, saṅgho itthannāmañca itthannāmañca bhikkhū samanubhāseyya tassa vatthussa paṭinissaggāya. Esā ñatti.
‘‘සුණාතු මෙ, භන්‌තෙ, සඞ්‌ඝො. ඉත්‌ථන්‌නාමො ච ඉත්‌ථන්‌නාමො ච භික්‌ඛූ ඉත්‌ථන්‌නාමස්‌ස භික්‌ඛුනො සඞ්‌ඝභෙදාය පරක්‌කමන්‌තස්‌ස අනුවත්‌තකා වග්‌ගවාදකා. තෙ තං වත්‌ථුං න පටිනිස්‌සජ්‌ජන්‌ති. සඞ්‌ඝො ඉත්‌ථන්‌නාමඤ්‌ච ඉත්‌ථන්‌නාමඤ්‌ච භික්‌ඛූ සමනුභාසති තස්‌ස වත්‌ථුස්‌ස පටිනිස්‌සග්‌ගාය. යස්‌සායස්‌මතො ඛමති ඉත්‌ථන්‌නාමස්‌ස ච ඉත්‌ථන්‌නාමස්‌ස ච භික්‌ඛූනං සමනුභාසනා තස්‌ස වත්‌ථුස්‌ස පටිනිස්‌සග්‌ගාය, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Suṇātu me, bhante, saṅgho. Itthannāmo ca itthannāmo ca bhikkhū itthannāmassa bhikkhuno saṅghabhedāya parakkamantassa anuvattakā vaggavādakā. Te taṃ vatthuṃ na paṭinissajjanti. Saṅgho itthannāmañca itthannāmañca bhikkhū samanubhāsati tassa vatthussa paṭinissaggāya. Yassāyasmato khamati itthannāmassa ca itthannāmassa ca bhikkhūnaṃ samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘දුතියම්‌පි එතමත්‌ථං වදාමි…පෙ.… තතියම්‌පි එතමත්‌ථං වදාමි – සුණාතු මෙ, භන්‌තෙ, සඞ්‌ඝො. ඉත්‌ථන්‌නාමො ච ඉත්‌ථන්‌නාමො ච භික්‌ඛූ ඉත්‌ථන්‌නාමස්‌ස භික්‌ඛුනො සඞ්‌ඝභෙදාය පරක්‌කමන්‌තස්‌ස අනුවත්‌තකා වග්‌ගවාදකා. තෙ තං වත්‌ථුං න පටිනිස්‌සජ්‌ජන්‌ති. සඞ්‌ඝො ඉත්‌ථන්‌නාමඤ්‌ච ඉත්‌ථන්‌නාමඤ්‌ච භික්‌ඛූ සමනුභාසති තස්‌ස වත්‌ථුස්‌ස පටිනිස්‌සග්‌ගාය. යස්‌සායස්‌මතො ඛමති ඉත්‌ථන්‌නාමස්‌ස ච ඉත්‌ථන්‌නාමස්‌ස ච භික්‌ඛූනං සමනුභාසනා තස්‌ස වත්‌ථුස්‌ස පටිනිස්‌සග්‌ගාය, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Itthannāmo ca itthannāmo ca bhikkhū itthannāmassa bhikkhuno saṅghabhedāya parakkamantassa anuvattakā vaggavādakā. Te taṃ vatthuṃ na paṭinissajjanti. Saṅgho itthannāmañca itthannāmañca bhikkhū samanubhāsati tassa vatthussa paṭinissaggāya. Yassāyasmato khamati itthannāmassa ca itthannāmassa ca bhikkhūnaṃ samanubhāsanā tassa vatthussa paṭinissaggāya, so tuṇhassa; yassa nakkhamati, so bhāseyya.
‘‘සමනුභට්‌ඨා සඞ්‌ඝෙන ඉත්‌ථන්‌නාමො ච ඉත්‌ථන්‌නාමො ච භික්‌ඛූ තස්‌ස වත්‌ථුස්‌ස පටිනිස්‌සග්‌ගාය. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Samanubhaṭṭhā saṅghena itthannāmo ca itthannāmo ca bhikkhū tassa vatthussa paṭinissaggāya. Khamati saṅghassa, tasmā tuṇhī, evametaṃ dhārayāmī’’ti.
421. ඤත්‌තියා දුක්‌කටං, ද්‌වීහි කම්‌මවාචාහි ථුල්‌ලච්‌චයා, කම්‌මවාචාපරියොසානෙ ආපත්‌ති සඞ්‌ඝාදිසෙසස්‌ස. සඞ්‌ඝාදිසෙසං අජ්‌ඣාපජ්‌ජන්‌තානං ඤත්‌තියා දුක්‌කටං, ද්‌වීහි කම්‌මවාචාහි ථුල්‌ලච්‌චයා පටිප්‌පස්‌සම්‌භන්‌ති. ද්‌වෙ තයො එකතො සමනුභාසිතබ්‌බා, තදුත්‌තරි න සමනුභාසිතබ්‌බා.
421. Ñattiyā dukkaṭaṃ, dvīhi kammavācāhi thullaccayā, kammavācāpariyosāne āpatti saṅghādisesassa. Saṅghādisesaṃ ajjhāpajjantānaṃ ñattiyā dukkaṭaṃ, dvīhi kammavācāhi thullaccayā paṭippassambhanti. Dve tayo ekato samanubhāsitabbā, taduttari na samanubhāsitabbā.
සඞ්‌ඝාදිසෙසොති…පෙ.… තෙනපි වුච්‌චති ‘‘සඞ්‌ඝාදිසෙසො’’ති.
Saṅghādisesoti…pe… tenapi vuccati ‘‘saṅghādiseso’’ti.
422. ධම්‌මකම්‌මෙ ධම්‌මකම්‌මසඤ්‌ඤී න පටිනිස්‌සජ්‌ජන්‌ති, ආපත්‌ති සඞ්‌ඝාදිසෙසස්‌ස.
422. Dhammakamme dhammakammasaññī na paṭinissajjanti, āpatti saṅghādisesassa.
ධම්‌මකම්‌මෙ වෙමතිකා න පටිනිස්‌සජ්‌ජන්‌ති, ආපත්‌ති සඞ්‌ඝාදිසෙසස්‌ස.
Dhammakamme vematikā na paṭinissajjanti, āpatti saṅghādisesassa.
ධම්‌මකම්‌මෙ අධම්‌මකම්‌මසඤ්‌ඤී න පටිනිස්‌සජ්‌ජන්‌ති, ආපත්‌ති සඞ්‌ඝාදිසෙසස්‌ස.
Dhammakamme adhammakammasaññī na paṭinissajjanti, āpatti saṅghādisesassa.
අධම්‌මකම්‌මෙ ධම්‌මකම්‌මසඤ්‌ඤී, ආපත්‌ති දුක්‌කටස්‌ස.
Adhammakamme dhammakammasaññī, āpatti dukkaṭassa.
අධම්‌මකම්‌මෙ වෙමතිකා, ආපත්‌ති දුක්‌කටස්‌ස.
Adhammakamme vematikā, āpatti dukkaṭassa.
අධම්‌මකම්‌මෙ අධම්‌මකම්‌මසඤ්‌ඤී, ආපත්‌ති දුක්‌කටස්‌ස.
Adhammakamme adhammakammasaññī, āpatti dukkaṭassa.
423. අනාපත්‌ති අසමනුභාසන්‌තානං, පටිනිස්‌සජ්‌ජන්‌තානං, උම්‌මත්‌තකානං, ඛිත්‌තචිත්‌තානං, වෙදනාට්‌ටානං, ආදිකම්‌මිකානන්‌ති.
423. Anāpatti asamanubhāsantānaṃ, paṭinissajjantānaṃ, ummattakānaṃ, khittacittānaṃ, vedanāṭṭānaṃ, ādikammikānanti.
භෙදානුවත්‌තකසික්‌ඛාපදං නිට්‌ඨිතං එකාදසමං.
Bhedānuvattakasikkhāpadaṃ niṭṭhitaṃ ekādasamaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 11. දුතියසඞ්‌ඝභෙදසික්‌ඛාපදවණ්‌ණනා • 11. Dutiyasaṅghabhedasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 11. දුතියසඞ්‌ඝභෙදසික්‌ඛාපදවණ්‌ණනා • 11. Dutiyasaṅghabhedasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 11. දුතියසඞ්‌ඝභෙදසික්‌ඛාපදවණ්‌ණනා • 11. Dutiyasaṅghabhedasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 11. දුතියසඞ්‌ඝභෙදසික්‌ඛාපදවණ්‌ණනා • 11. Dutiyasaṅghabhedasikkhāpadavaṇṇanā
