| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
১১. ভেদানুৰত্তকসিক্খাপদৰণ্ণনা
11. Bhedānuvattakasikkhāpadavaṇṇanā
তস্সেৰাতি ভেদায পরক্কমন্তস্সেৰ। খোতি নিপাতমত্তং। পনাতি ৰিসেসে নিপাতো। যং ৰচনং সমগ্গেপি ৰগ্গে অৰযৰভূতে করোতি ভিন্দতি, তং কলহকারকৰচনং ইধ ‘‘ৰগ্গ’’ন্তি ৰুচ্চতীতি আহ ‘‘ৰগ্গং অসামগ্গিপক্খিযৰচনং ৰদন্তী’’তি। অসামগ্গিপক্খে ভৰা অসামগ্গিপক্খিযা, কলহকারকা, তেসং ৰচনং অসামগ্গিপক্খিযৰচনং, অসামগ্গিপক্খে ৰা ভৰং ৰচনং অসামগ্গিপক্খিযৰচনং। ‘‘ন হি সঙ্ঘো সঙ্ঘস্স কম্মং করোতী’’তি ইদং নিগ্গহৰসেন কত্তব্বং কম্মং সন্ধায ৰুত্তং, উব্বাহিকাদিকম্মং পন বহূনম্পি কাতুং ৰট্টতিযেৰ। ধম্মৰাদীতি ভূতৰাদী। ৰিনযৰাদীতি ৰূপসমৰাদী। জানাতি নোতি এত্থাপি ‘‘ছন্দঞ্চ রুচিঞ্চা’’তি ইদং আনেত্ৰা সম্বন্ধিতব্বং। তেনাহ ‘‘অম্হাকং ছন্দাদীনি জানাতী’’তি। ভাসতীতি এত্থ ‘‘নো’’তি ইদং ৰিভত্তিৰিপরিণামেন যুজ্জতি। তেনাহ ‘‘এৰং করোমাতি অম্হেহি সদ্ধিং ভাসতী’’তি। ‘‘এত’’ন্তি ইমিনা তস্স কম্মং পচ্চামট্ঠন্তি আহ ‘‘যং সো করোতী’’তিআদি। সোতি সঙ্ঘভেদায পরক্কমন্তো। সমেতাযস্মন্তানন্তি এত্থ ‘‘চিত্ত’’ন্তি অজ্ঝাহরিতব্বন্তি আহ ‘‘আযস্মন্তানং চিত্ত’’ন্তি। ৰুত্তসদিসাযেৰাতি এত্থ যং ৰত্তব্বং, তং হেট্ঠা অঞ্ঞভাগিযসিক্খাপদট্ঠকথায ৰণ্ণনাযং (কঙ্খা॰ অট্ঠ॰ অঞ্ঞভাগিযসিক্খাপদৰণ্ণনা) ৰুত্তমেৰ।
Tassevāti bhedāya parakkamantasseva. Khoti nipātamattaṃ. Panāti visese nipāto. Yaṃ vacanaṃ samaggepi vagge avayavabhūte karoti bhindati, taṃ kalahakārakavacanaṃ idha ‘‘vagga’’nti vuccatīti āha ‘‘vaggaṃ asāmaggipakkhiyavacanaṃ vadantī’’ti. Asāmaggipakkhe bhavā asāmaggipakkhiyā, kalahakārakā, tesaṃ vacanaṃ asāmaggipakkhiyavacanaṃ, asāmaggipakkhe vā bhavaṃ vacanaṃ asāmaggipakkhiyavacanaṃ. ‘‘Na hi saṅgho saṅghassa kammaṃ karotī’’ti idaṃ niggahavasena kattabbaṃ kammaṃ sandhāya vuttaṃ, ubbāhikādikammaṃ pana bahūnampi kātuṃ vaṭṭatiyeva. Dhammavādīti bhūtavādī. Vinayavādīti vūpasamavādī. Jānāti noti etthāpi ‘‘chandañca ruciñcā’’ti idaṃ ānetvā sambandhitabbaṃ. Tenāha ‘‘amhākaṃ chandādīni jānātī’’ti. Bhāsatīti ettha ‘‘no’’ti idaṃ vibhattivipariṇāmena yujjati. Tenāha ‘‘evaṃ karomāti amhehi saddhiṃ bhāsatī’’ti. ‘‘Eta’’nti iminā tassa kammaṃ paccāmaṭṭhanti āha ‘‘yaṃ so karotī’’tiādi. Soti saṅghabhedāya parakkamanto. Sametāyasmantānanti ettha ‘‘citta’’nti ajjhāharitabbanti āha ‘‘āyasmantānaṃ citta’’nti. Vuttasadisāyevāti ettha yaṃ vattabbaṃ, taṃ heṭṭhā aññabhāgiyasikkhāpadaṭṭhakathāya vaṇṇanāyaṃ (kaṅkhā. aṭṭha. aññabhāgiyasikkhāpadavaṇṇanā) vuttameva.
ভেদানুৰত্তকসিক্খাপদৰণ্ণনা নিট্ঠিতা।
Bhedānuvattakasikkhāpadavaṇṇanā niṭṭhitā.
