| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
3. பே⁴ஸஜ்ஜாதி³கரணவினிச்ச²யகதா²
3. Bhesajjādikaraṇavinicchayakathā
15. ஏவங் பரிக்கா²ரவினிச்ச²யங் கதெ²த்வா இதா³னி பே⁴ஸஜ்ஜகரணபரித்தபடிஸந்தா²ரானங் வினிச்ச²யங் கதே²துங் ‘‘பே⁴ஸஜ்ஜா’’திஆதி³மாஹ. தத்த² பி⁴ஸக்கஸ்ஸ இத³ங் கம்மங் பே⁴ஸஜ்ஜங். கிங் தங்? திகிச்ச²னங் . கரியதே கரணங், பே⁴ஸஜ்ஜஸ்ஸ கரணங் பே⁴ஸஜ்ஜகரணங், வேஜ்ஜகம்மகரணந்தி வுத்தங் ஹோதி. பரிஸமந்ததோ தாயதி ரக்க²தீதி பரித்தங், ஆரக்கா²தி அத்தோ². படிஸந்த²ரணங் படிஸந்தா²ரோ, அத்தனா ஸத்³தி⁴ங் அஞ்ஞேஸங் ஸம்ப³ந்த⁴கரணந்தி அத்தோ². தத்த² யோ வினிச்ச²யோ மாதிகாயங் ‘‘பே⁴ஸஜ்ஜகரணம்பி ச பரித்தங், படிஸந்தா²ரோ’’தி (வி॰ ஸங்க³॰ அட்ட²॰ க³ந்தா²ரம்ப⁴கதா²) மயா வுத்தோ , தஸ்மிங் ஸமபி⁴னிவிட்டே² பே⁴ஸஜ்ஜகரணவினிச்ச²யே. ஸஹத⁴ம்மோ ஏதேஸந்தி ஸஹத⁴ம்மிகா, தேஸங், ஏகஸ்ஸ ஸத்து²னோ ஸாஸனே ஸஹஸிக்க²மானத⁴ம்மானந்தி அத்தோ². அத² வா ஸஹத⁴ம்மே நியுத்தா ஸஹத⁴ம்மிகா, தேஸங், ஸஹத⁴ம்மஸங்கா²தே ஸிக்கா²பதே³ ஸிக்க²மானபா⁴வேன நியுத்தானந்தி அத்தோ². விவட்டனிஸ்ஸிதஸீலாதி³யுத்தபா⁴வேன ஸமத்தா ஸமஸீலஸத்³தா⁴பஞ்ஞானங். ஏதேன து³ஸ்ஸீலானங் பி⁴ன்னலத்³தி⁴கானஞ்ச அகாதும்பி லப்³ப⁴தீதி த³ஸ்ஸேதி.
15. Evaṃ parikkhāravinicchayaṃ kathetvā idāni bhesajjakaraṇaparittapaṭisanthārānaṃ vinicchayaṃ kathetuṃ ‘‘bhesajjā’’tiādimāha. Tattha bhisakkassa idaṃ kammaṃ bhesajjaṃ. Kiṃ taṃ? Tikicchanaṃ . Kariyate karaṇaṃ, bhesajjassa karaṇaṃ bhesajjakaraṇaṃ, vejjakammakaraṇanti vuttaṃ hoti. Parisamantato tāyati rakkhatīti parittaṃ, ārakkhāti attho. Paṭisantharaṇaṃ paṭisanthāro, attanā saddhiṃ aññesaṃ sambandhakaraṇanti attho. Tattha yo vinicchayo mātikāyaṃ ‘‘bhesajjakaraṇampi ca parittaṃ, paṭisanthāro’’ti (vi. saṅga. aṭṭha. ganthārambhakathā) mayā vutto , tasmiṃ samabhiniviṭṭhe bhesajjakaraṇavinicchaye. Sahadhammo etesanti sahadhammikā, tesaṃ, ekassa satthuno sāsane sahasikkhamānadhammānanti attho. Atha vā sahadhamme niyuttā sahadhammikā, tesaṃ, sahadhammasaṅkhāte sikkhāpade sikkhamānabhāvena niyuttānanti attho. Vivaṭṭanissitasīlādiyuttabhāvena samattā samasīlasaddhāpaññānaṃ. Etena dussīlānaṃ bhinnaladdhikānañca akātumpi labbhatīti dasseti.
ஞாதகபவாரிதட்டா²னதோ வாதி அத்தனோ வா தேஸங் வா ஞாதகபவாரிதட்டா²னதோ. ந கரியித்தா²தி அகதா, அயுத்தவஸேன அகதபுப்³பா³ விஞ்ஞத்தி அகதவிஞ்ஞத்தி. வஜிரபு³த்³தி⁴டீகாயங் (வஜிர॰ டீ॰ பாராஜிக 186) பன ‘‘அகதவிஞ்ஞத்தியாதி ந விஞ்ஞத்தியா. ஸா ஹி அனநுஞ்ஞாதத்தா கதாபி அகதா வியாதி அகதவிஞ்ஞத்தி, ‘வதெ³ய்யாத² ப⁴ந்தே யேனத்தோ²’தி ஏவங் அகதட்டா²னே விஞ்ஞத்தி அகதவிஞ்ஞத்தீதி லிகி²த’’ந்தி வுத்தங். ஸாரத்த²தீ³பனியங் (ஸாரத்த²॰ டீ॰ 2.185) ‘‘கி³லானஸ்ஸ அத்தா²ய அப்பவாரிதட்டா²னதோ விஞ்ஞத்தியா அனுஞ்ஞாதத்தா கதாபி அகதா வியாதி அகதவிஞ்ஞத்தி, ‘வத³ ப⁴ந்தே பச்சயேனா’தி ஏவங் அகதபவாரணட்டா²னே ச விஞ்ஞத்தி அகதவிஞ்ஞத்தீ’’தி.
Ñātakapavāritaṭṭhānato vāti attano vā tesaṃ vā ñātakapavāritaṭṭhānato. Na kariyitthāti akatā, ayuttavasena akatapubbā viññatti akataviññatti. Vajirabuddhiṭīkāyaṃ (vajira. ṭī. pārājika 186) pana ‘‘akataviññattiyāti na viññattiyā. Sā hi ananuññātattā katāpi akatā viyāti akataviññatti, ‘vadeyyātha bhante yenattho’ti evaṃ akataṭṭhāne viññatti akataviññattīti likhita’’nti vuttaṃ. Sāratthadīpaniyaṃ (sārattha. ṭī. 2.185) ‘‘gilānassa atthāya appavāritaṭṭhānato viññattiyā anuññātattā katāpi akatā viyāti akataviññatti, ‘vada bhante paccayenā’ti evaṃ akatapavāraṇaṭṭhāne ca viññatti akataviññattī’’ti.
16. படியாதி³யதீதி ஸம்பாதே³தி. அகாதுங் ந வட்டதீதி எத்த² து³க்கடந்தி வத³ந்தி, அயுத்ததாவஸேன பனெத்த² அகரணப்படிக்கே²போ வுத்தோ, ந ஆபத்திவஸேனாதி க³ஹேதப்³ப³ங். ஸப்³ப³ங் பரிகம்மங் அனாமஸந்தேனாதி மாதுகா³மஸரீராதீ³னங் அனாமாஸத்தா வுத்தங். யாவ ஞாதகா ந பஸ்ஸந்தீதி யாவ தஸ்ஸ ஞாதகா ந பஸ்ஸந்தி. ‘‘தித்தி²யபூ⁴தானங் மாதாபிதூனங் ஸஹத்தா² தா³துங் ந வட்டதீ’’தி வஜிரபு³த்³தி⁴டீகாயங் (வஜிர॰ டீ॰ பாராஜிக 186) வுத்தங்.
16.Paṭiyādiyatīti sampādeti. Akātuṃ na vaṭṭatīti ettha dukkaṭanti vadanti, ayuttatāvasena panettha akaraṇappaṭikkhepo vutto, na āpattivasenāti gahetabbaṃ. Sabbaṃparikammaṃ anāmasantenāti mātugāmasarīrādīnaṃ anāmāsattā vuttaṃ. Yāva ñātakā na passantīti yāva tassa ñātakā na passanti. ‘‘Titthiyabhūtānaṃ mātāpitūnaṃ sahatthā dātuṃ na vaṭṭatī’’ti vajirabuddhiṭīkāyaṃ (vajira. ṭī. pārājika 186) vuttaṃ.
17. பிது ப⁴கி³னீ பிதுச்சா². மாது பா⁴தா மாதுலோ. நப்பஹொந்தீதி காதுங் ந ஸக்கொந்தீதி டீகாஸு வுத்தங். ‘‘தேஸங்யேவ ஸந்தகங் பே⁴ஸஜ்ஜங் க³ஹெத்வா கேவலங் யோஜெத்வா தா³தப்³ப³’’ந்தி வத்வா ‘‘ஸசே பன நப்பஹொந்தி யாசந்தி ச, தே³த² நோ ப⁴ந்தே, தும்ஹாகங் படித³ஸ்ஸாமா’’தி வுத்தத்தா பன தேஸங் பே⁴ஸஜ்ஜஸ்ஸ அப்பஹோனகத்தா பே⁴ஸஜ்ஜமேவ யாசந்தீதி அட்ட²கதா²தி⁴ப்பாயோ தி³ஸ்ஸதி, வீமங்ஸிதப்³போ³. ந யாசந்தீதி லஜ்ஜாய ந யாசந்தி, கா³ரவேன வா. ‘‘ஆபோ⁴க³ங் கத்வா’’தி வுத்தத்தா அஞ்ஞதா² தெ³ந்தஸ்ஸ ஆபத்தியேவ. ஸாரத்த²தீ³பனியங் (ஸாரத்த²॰ டீ॰ 2.18) பன ‘‘ஆபோ⁴க³ங் கத்வாதி இத³ங் கத்தப்³ப³கரணத³ஸ்ஸனவஸேன வுத்தங், ஆபோ⁴க³ங் பன அகத்வாபி தா³துங் வட்டதீதி தீஸு க³ண்டி²பதே³ஸு லிகி²த’’ந்தி வுத்தங். போராணடீகாயம்பி ததே³வ க³ஹெத்வா லிகி²தங். விமதிவினோத³னியங் (வி॰ வி॰ டீ॰ 1.185) பன தங் வசனங் படிக்கி²த்தங். வுத்தஞ்ஹி தத்த² கேசி பன ‘‘ஆபோ⁴க³ங் அகத்வாபி தா³துங் வட்டதீதி வத³ந்தி, தங் ந யுத்தங் பே⁴ஸஜ்ஜகரணஸ்ஸ, பாளியங் ‘அனாபத்தி பி⁴க்கு² பாராஜிகஸ்ஸ, ஆபத்தி து³க்கடஸ்ஸா’தி ஏவங் அந்தராபத்தித³ஸ்ஸனவஸேன ஸாமஞ்ஞதோ படிக்கி²த்தத்தா, அட்ட²கதா²யங் அவுத்தப்பகாரேன கரொந்தஸ்ஸ ஸுத்தேனேவ ஆபத்திஸித்³தா⁴தி த³ட்ட²ப்³பா³. தேனேவ அட்ட²கதா²யம்பி ‘தேஸஞ்ஞேவ ஸந்தக’ந்திஆதி³ வுத்த’’ந்தி.
17. Pitu bhaginī pitucchā. Mātu bhātā mātulo. Nappahontīti kātuṃ na sakkontīti ṭīkāsu vuttaṃ. ‘‘Tesaṃyeva santakaṃ bhesajjaṃ gahetvā kevalaṃ yojetvā dātabba’’nti vatvā ‘‘sace pana nappahonti yācanti ca, detha no bhante, tumhākaṃ paṭidassāmā’’ti vuttattā pana tesaṃ bhesajjassa appahonakattā bhesajjameva yācantīti aṭṭhakathādhippāyo dissati, vīmaṃsitabbo. Na yācantīti lajjāya na yācanti, gāravena vā. ‘‘Ābhogaṃ katvā’’ti vuttattā aññathā dentassa āpattiyeva. Sāratthadīpaniyaṃ (sārattha. ṭī. 2.18) pana ‘‘ābhogaṃ katvāti idaṃ kattabbakaraṇadassanavasena vuttaṃ, ābhogaṃ pana akatvāpi dātuṃ vaṭṭatīti tīsu gaṇṭhipadesu likhita’’nti vuttaṃ. Porāṇaṭīkāyampi tadeva gahetvā likhitaṃ. Vimativinodaniyaṃ (vi. vi. ṭī. 1.185) pana taṃ vacanaṃ paṭikkhittaṃ. Vuttañhi tattha keci pana ‘‘ābhogaṃ akatvāpi dātuṃ vaṭṭatīti vadanti, taṃ na yuttaṃ bhesajjakaraṇassa, pāḷiyaṃ ‘anāpatti bhikkhu pārājikassa, āpatti dukkaṭassā’ti evaṃ antarāpattidassanavasena sāmaññato paṭikkhittattā, aṭṭhakathāyaṃ avuttappakārena karontassa sutteneva āpattisiddhāti daṭṭhabbā. Teneva aṭṭhakathāyampi ‘tesaññeva santaka’ntiādi vutta’’nti.
ஏதே த³ஸ ஞாதகே ட²பெத்வாதி தேஸங் புத்தனத்தாத³யோபி தப்படிப³த்³த⁴த்தா ஞாதகா ஏவாதி தேபி எத்தே²வ ஸங்க³ஹிதா. தேன அஞ்ஞேஸந்தி இமினா அஞ்ஞாதகானங் க³ஹணங் வேதி³தப்³ப³ங் . தேனேவாஹ ‘‘ஏதேஸங் புத்தபரம்பராயா’’திஆதி³. குலபரிவட்டாதி குலானங் படிபாடி, குலபரம்பராதி வுத்தங் ஹோதி. பே⁴ஸஜ்ஜங் கரொந்தஸ்ஸாதி யதா²வுத்தவிதி⁴னா கரொந்தஸ்ஸ, ‘‘தாவகாலிகங் த³ஸ்ஸாமீ’’தி ஆபோ⁴க³ங் அகத்வா தெ³ந்தஸ்ஸபி பன அந்தராபத்திது³க்கடங் வினா மிச்சா²ஜீவனங் வா குலதூ³ஸனங் வா ந ஹோதியேவ. தேனாஹ ‘‘வேஜ்ஜகம்மங் வா குலதூ³ஸகாபத்தி வா ந ஹோதீ’’தி. ஞாதகானஞ்ஹி ஸந்தகங் யாசித்வாபி க³ஹேதுங் வட்டதி, தஸ்மா தத்த² குலதூ³ஸனாதி³ ந ஸியா. ஸாரத்த²தீ³பனியம்பி (ஸாரத்த²॰ டீ॰ 2.185) ‘‘மய்ஹங் த³ஸ்ஸந்தி கரிஸ்ஸந்தீதி பச்சாஸாய கரொந்தஸ்ஸபி யாசித்வா க³ஹேதப்³ப³ட்டா²னதாய ஞாதகேஸு வேஜ்ஜகம்மங் வா குலதூ³ஸகாபத்தி வா ந ஹோதீதி வத³ந்தீ’’தி வுத்தங். வஜிரபு³த்³தி⁴டீகாயங் (வஜிர॰ டீ॰ பாராஜிக 186) பன ‘‘வேஜ்ஜகம்மங் வா குலதூ³ஸகாபத்தி வா ந ஹோதீதி வசனதோ யாவ ஸத்தமோ குலபரிவட்டோ, தாவ பே⁴ஸஜ்ஜங் காதுங் வட்டதீதி வத³ந்தீ’’தி எத்தகமேவ வுத்தங். ஸப்³ப³பதே³ஸு வினிச்ச²யோ வேதி³தப்³போ³தி ‘‘சூளமாதுயா’’திஆதீ³ஸு ஸப்³ப³பதே³ஸு சூளமாதுயா ஸாமிகோதிஆதி³னா யோஜெத்வா ஹெட்டா² வுத்தனயேனேவ வினிச்ச²யோ வேதி³தப்³போ³.
Ete dasa ñātake ṭhapetvāti tesaṃ puttanattādayopi tappaṭibaddhattā ñātakā evāti tepi ettheva saṅgahitā. Tena aññesanti iminā aññātakānaṃ gahaṇaṃ veditabbaṃ . Tenevāha ‘‘etesaṃ puttaparamparāyā’’tiādi. Kulaparivaṭṭāti kulānaṃ paṭipāṭi, kulaparamparāti vuttaṃ hoti. Bhesajjaṃ karontassāti yathāvuttavidhinā karontassa, ‘‘tāvakālikaṃ dassāmī’’ti ābhogaṃ akatvā dentassapi pana antarāpattidukkaṭaṃ vinā micchājīvanaṃ vā kuladūsanaṃ vā na hotiyeva. Tenāha ‘‘vejjakammaṃ vā kuladūsakāpatti vā na hotī’’ti. Ñātakānañhi santakaṃ yācitvāpi gahetuṃ vaṭṭati, tasmā tattha kuladūsanādi na siyā. Sāratthadīpaniyampi (sārattha. ṭī. 2.185) ‘‘mayhaṃ dassanti karissantīti paccāsāya karontassapi yācitvā gahetabbaṭṭhānatāya ñātakesu vejjakammaṃ vā kuladūsakāpatti vā na hotīti vadantī’’ti vuttaṃ. Vajirabuddhiṭīkāyaṃ (vajira. ṭī. pārājika 186) pana ‘‘vejjakammaṃ vā kuladūsakāpatti vā na hotīti vacanato yāva sattamo kulaparivaṭṭo, tāva bhesajjaṃ kātuṃ vaṭṭatīti vadantī’’ti ettakameva vuttaṃ. Sabbapadesu vinicchayo veditabboti ‘‘cūḷamātuyā’’tiādīsu sabbapadesu cūḷamātuyā sāmikotiādinā yojetvā heṭṭhā vuttanayeneva vinicchayo veditabbo.
உபஜ்ஜா²யஸ்ஸ ஆஹராமாதி இத³ங் உபஜ்ஜா²யேன மம ஞாதகானங் பே⁴ஸஜ்ஜங் ஆஹரதா²தி ஆணத்தேஹி கத்தப்³ப³விதி⁴த³ஸ்ஸனத்த²ங் வுத்தங். இமினா ச ஸாமணேராதீ³னங் அபச்சாஸாயபி பரஜனஸ்ஸ பே⁴ஸஜ்ஜகரணங் ந வட்டதீதி த³ஸ்ஸேதி. வுத்தனயேனேவ பரியேஸித்வாதி இமினா ‘‘பி⁴க்கா²சாரவத்தேன வா’’திஆதி³னா, ‘‘ஞாதிஸாமணேரேஹி வா’’திஆதி³னா ச வுத்தமத்த²ங் அதிதி³ஸதி. அபச்சாஸீஸந்தேனாதி (வி॰ வி॰ டீ॰ 1.185) ஆக³ந்துகசோராதீ³னங் கரொந்தேனபி மனுஸ்ஸா நாம உபகாரகா ஹொந்தீதி அத்தனோ தேஹி லாப⁴ங் அபத்த²யந்தேன, பச்சாஸாய கரொந்தஸ்ஸ பன வேஜ்ஜகம்மகுலதூ³ஸனாதி³னா தோ³ஸோ ஹோதீதி அதி⁴ப்பாயோ. ஏவஞ்ஹி உபகாரே கதே ஸாஸனஸ்ஸ கு³ணங் ஞத்வா பஸீத³ந்தி, ஸங்க⁴ஸ்ஸ வா உபகாரகா ஹொந்தீதி கரணே பன தோ³ஸோ நத்தி². கேசி பன ‘‘அபச்சாஸீஸந்தேன ஆக³ந்துகாதீ³னங் படிக்கி²த்தபுக்³க³லானம்பி தா³துங் வட்டதீ’’தி வத³ந்தி, தங் ந யுத்தங் கத்தப்³பா³கத்தப்³ப³ட்டா²னவிபா⁴க³ஸ்ஸ நிரத்த²கத்தப்பஸங்க³தோ அபச்சாஸீஸந்தேன ‘‘ஸப்³பே³ஸம்பி தா³துங் காதுஞ்ச வட்டதீ’’தி எத்தகமத்தஸ்ஸேவ வத்தப்³ப³தோ. அபச்சாஸீஸனஞ்ச மிச்சா²ஜீவகுலதூ³ஸனாதி³தோ³ஸனிஸேத⁴னத்த²மேவ வுத்தங் ந பே⁴ஸஜ்ஜகரணஸங்கா²தாய இமிஸ்ஸா அந்தராபத்தியா முச்சனத்த²ங் ஆக³ந்துகசோராதீ³னங் அனுஞ்ஞாதானங் தா³னேனேவ தாய ஆபத்தியா முச்சனதோதி க³ஹேதப்³ப³ங்.
Upajjhāyassa āharāmāti idaṃ upajjhāyena mama ñātakānaṃ bhesajjaṃ āharathāti āṇattehi kattabbavidhidassanatthaṃ vuttaṃ. Iminā ca sāmaṇerādīnaṃ apaccāsāyapi parajanassa bhesajjakaraṇaṃ na vaṭṭatīti dasseti. Vuttanayeneva pariyesitvāti iminā ‘‘bhikkhācāravattena vā’’tiādinā, ‘‘ñātisāmaṇerehi vā’’tiādinā ca vuttamatthaṃ atidisati. Apaccāsīsantenāti (vi. vi. ṭī. 1.185) āgantukacorādīnaṃ karontenapi manussā nāma upakārakā hontīti attano tehi lābhaṃ apatthayantena, paccāsāya karontassa pana vejjakammakuladūsanādinā doso hotīti adhippāyo. Evañhi upakāre kate sāsanassa guṇaṃ ñatvā pasīdanti, saṅghassa vā upakārakā hontīti karaṇe pana doso natthi. Keci pana ‘‘apaccāsīsantena āgantukādīnaṃ paṭikkhittapuggalānampi dātuṃ vaṭṭatī’’ti vadanti, taṃ na yuttaṃ kattabbākattabbaṭṭhānavibhāgassa niratthakattappasaṅgato apaccāsīsantena ‘‘sabbesampi dātuṃ kātuñca vaṭṭatī’’ti ettakamattasseva vattabbato. Apaccāsīsanañca micchājīvakuladūsanādidosanisedhanatthameva vuttaṃ na bhesajjakaraṇasaṅkhātāya imissā antarāpattiyā muccanatthaṃ āgantukacorādīnaṃ anuññātānaṃ dāneneva tāya āpattiyā muccanatoti gahetabbaṃ.
18. தேனேவ அபச்சாஸீஸந்தேனபி அகாதப்³ப³ட்டா²னங் த³ஸ்ஸேதுங் ‘‘ஸத்³த⁴ங் குல’’ந்திஆதி³ வுத்தங். ‘‘பே⁴ஸஜ்ஜங் ஆசிக்க²தா²’’தி வுத்தேபி ‘‘அஞ்ஞமஞ்ஞங் பன கதா² காதப்³பா³’’தி இத³ங் பரியாயத்தா வட்டதி. ஏவங் ஹெட்டா² வுத்தனயேன இத³ஞ்சித³ஞ்ச க³ஹெத்வா கரொந்தீதி இமினா பரியாயேன கதெ²ந்தஸ்ஸபி நேவத்தி² தோ³ஸோதி ஆசரியா. புச்ச²ந்தீதி இமினா தி³ட்ட²தி³ட்ட²ரோகீ³னங் பரியாயேனபி வத்வா விசரணங் அயுத்தந்தி த³ஸ்ஸேதி. புச்சி²தஸ்ஸபி பன பச்சாஸீஸந்தஸ்ஸ பரியாயகதா²பி ந வட்டதீதி வத³ந்தி. ஸமுல்லபேஸீதி அபச்சாஸீஸந்தோ ஏவ அஞ்ஞமஞ்ஞங் கத²ங் ஸமுட்டா²பேஸி. ஆசரியபா⁴கோ³தி வினயாசாரங் அகோபெத்வா பே⁴ஸஜ்ஜாசிக்க²ணேன வேஜ்ஜாசரியபா⁴கோ³ அயந்தி அத்தோ²தி விமதிவினோத³னியங் (வி॰ வி॰ டீ॰ 1.185) வுத்தங்.
18. Teneva apaccāsīsantenapi akātabbaṭṭhānaṃ dassetuṃ ‘‘saddhaṃ kula’’ntiādi vuttaṃ. ‘‘Bhesajjaṃ ācikkhathā’’ti vuttepi ‘‘aññamaññaṃ pana kathā kātabbā’’ti idaṃ pariyāyattā vaṭṭati. Evaṃ heṭṭhā vuttanayena idañcidañca gahetvā karontīti iminā pariyāyena kathentassapi nevatthi dosoti ācariyā. Pucchantīti iminā diṭṭhadiṭṭharogīnaṃ pariyāyenapi vatvā vicaraṇaṃ ayuttanti dasseti. Pucchitassapi pana paccāsīsantassa pariyāyakathāpi na vaṭṭatīti vadanti. Samullapesīti apaccāsīsanto eva aññamaññaṃ kathaṃ samuṭṭhāpesi. Ācariyabhāgoti vinayācāraṃ akopetvā bhesajjācikkhaṇena vejjācariyabhāgo ayanti atthoti vimativinodaniyaṃ (vi. vi. ṭī. 1.185) vuttaṃ.
ஸாரத்த²தீ³பனியங் (ஸாரத்த²॰ டீ॰ 2.185) பன ‘‘வினயலக்க²ணங் அஜானந்தஸ்ஸ அனாசரியஸ்ஸ தத³னுரூபவோஹாராஸம்ப⁴வதோ ஈதி³ஸஸ்ஸ லாப⁴ஸ்ஸ உப்பத்தி நாம நத்தீ²தி ‘ஆசரியபா⁴கோ³ நாம அய’ந்தி வுத்தங். வினயே பகதஞ்ஞுனா ஆசரியேன லபி⁴தப்³ப³பா⁴கோ³ அயந்தி வுத்தங் ஹோதீ’’தி வுத்தங். ‘‘புப்ப²பூஜனத்தா²ய தி³ன்னேபி அகப்பியவோஹாரேன விதா⁴னஸ்ஸ அயுத்தத்தா ‘கப்பியவஸேனா’தி வுத்தங், ‘புப்ப²ங் ஆஹரதா²’திஆதி³னா கப்பியவோஹாரவஸேனாதி அத்தோ²’’தி ஸாரத்த²தீ³பனியங் (ஸாரத்த²॰ டீ॰ 2.185) வுத்தங். விமதிவினோத³னியங் (வி॰ வி॰ டீ॰ 1.185) பன ‘‘புப்ப²பூஜனத்தா²யபி ஸம்படிச்சி²யமானங் ரூபியங் அத்தனோ ஸந்தகத்தப⁴ஜனேன நிஸ்ஸக்³கி³யமேவாதி ஆஹ ‘கப்பியவஸேன கா³ஹாபெத்வா’தி. ‘அம்ஹாகங் ரூபியங் ந வட்டதி, புப்ப²பூஜனத்த²ங் புப்ப²ங் வட்டதீ’திஆதி³னா படிக்கி²பித்வா கப்பியேன கம்மேன கா³ஹாபெத்வாதி அத்தோ²’’தி வுத்தங். வஜிரபு³த்³தி⁴டீகாயங் (வஜிர॰ டீ॰ பாராஜிக 186) பன ‘‘கப்பியவஸேனாதி அம்ஹாகங் புப்ப²ங் ஆனேதா²திஆதி³னா. ‘பூஜங் அகாஸீ’தி வுத்தத்தா ஸயங் க³ஹேதுங் ந வட்டதீதி வத³ந்தீ’’தி எத்தகமேவ வுத்தங். அயமெத்த² பே⁴ஸஜ்ஜகரணவினிச்ச²யகதா²லங்காரோ.
Sāratthadīpaniyaṃ (sārattha. ṭī. 2.185) pana ‘‘vinayalakkhaṇaṃ ajānantassa anācariyassa tadanurūpavohārāsambhavato īdisassa lābhassa uppatti nāma natthīti ‘ācariyabhāgo nāma aya’nti vuttaṃ. Vinaye pakataññunā ācariyena labhitabbabhāgo ayanti vuttaṃ hotī’’ti vuttaṃ. ‘‘Pupphapūjanatthāya dinnepi akappiyavohārena vidhānassa ayuttattā ‘kappiyavasenā’ti vuttaṃ, ‘pupphaṃ āharathā’tiādinā kappiyavohāravasenāti attho’’ti sāratthadīpaniyaṃ (sārattha. ṭī. 2.185) vuttaṃ. Vimativinodaniyaṃ (vi. vi. ṭī. 1.185) pana ‘‘pupphapūjanatthāyapi sampaṭicchiyamānaṃ rūpiyaṃ attano santakattabhajanena nissaggiyamevāti āha ‘kappiyavasena gāhāpetvā’ti. ‘Amhākaṃ rūpiyaṃ na vaṭṭati, pupphapūjanatthaṃ pupphaṃ vaṭṭatī’tiādinā paṭikkhipitvā kappiyena kammena gāhāpetvāti attho’’ti vuttaṃ. Vajirabuddhiṭīkāyaṃ (vajira. ṭī. pārājika 186) pana ‘‘kappiyavasenāti amhākaṃ pupphaṃ ānethātiādinā. ‘Pūjaṃ akāsī’ti vuttattā sayaṃ gahetuṃ na vaṭṭatīti vadantī’’ti ettakameva vuttaṃ. Ayamettha bhesajjakaraṇavinicchayakathālaṅkāro.
19. ஏவங் பே⁴ஸஜ்ஜகரணவினிச்ச²யங் கதெ²த்வா இதா³னி பரித்தகரணவினிச்ச²யங் கதே²துமாஹ ‘‘பரித்தே பனா’’திஆதி³. தத்த² யதி³ ‘‘பரித்தங் கரோதா²’’தி வுத்தே கரொந்தி, பே⁴ஸஜ்ஜகரணங் விய கி³ஹிகம்மங் விய ச ஹோதீதி ‘‘ந காதப்³ப³’’ந்தி வுத்தங். ‘‘பரித்தங் ப⁴ணதா²’’தி வுத்தே பன த⁴ம்மஜ்ஜே²ஸனத்தா அனஜ்ஜி²ட்டே²னபி ப⁴ணிதப்³போ³ த⁴ம்மோ, பகே³வ அஜ்ஜி²ட்டே²னாதி ‘‘காதப்³ப³’’ந்தி வுத்தங், சாலெத்வா ஸுத்தங் பரிமஜ்ஜித்வாதி பரித்தங் கரொந்தேன காதப்³ப³விதி⁴ங் த³ஸ்ஸேதி. சாலெத்வா ஸுத்தங் பரிமஜ்ஜித்வாதி இத³ங் வா ‘‘பரித்தாணங் எத்த² பவேஸேமீ’’தி சித்தேன ஏவங் கதே பரித்தாணா எத்த² பவேஸிதா நாம ஹோதீதி வுத்தங். விஹாரதோ…பே॰… து³க்கடந்தி இத³ங் அஞ்ஞாதகே க³ஹட்டே² ஸந்தா⁴ய வுத்தந்தி வத³ந்தி. பாதே³ஸு உத³கங் ஆகிரித்வாதி இத³ங் தஸ்மிங் தே³ஸே சாரித்தவஸேன வுத்தங். தத்த² ஹி பாளியா நிஸின்னானங் பி⁴க்கூ²னங் பாதே³ஸு ரோக³வூபஸமனாதி³அத்தா²ய உத³கங் ஸிஞ்சித்வா பரித்தங் காதுங் ஸுத்தஞ்ச ட²பெத்வா ‘‘பரித்தங் ப⁴ணதா²’’தி வத்வா க³ச்ச²ந்தி. ஏவஞ்ஹி கரியமானே யதி³ பாதே³ அபனெந்தி, மனுஸ்ஸா தங் ‘‘அவமங்க³ல’’ந்தி மஞ்ஞந்தி ‘‘ரோகோ³ ந வூபஸமெஸ்ஸதீ’’தி. தேனாஹ ‘‘ந பாதா³ அபனேதப்³பா³’’தி.
19. Evaṃ bhesajjakaraṇavinicchayaṃ kathetvā idāni parittakaraṇavinicchayaṃ kathetumāha ‘‘paritte panā’’tiādi. Tattha yadi ‘‘parittaṃ karothā’’ti vutte karonti, bhesajjakaraṇaṃ viya gihikammaṃ viya ca hotīti ‘‘na kātabba’’nti vuttaṃ. ‘‘Parittaṃ bhaṇathā’’ti vutte pana dhammajjhesanattā anajjhiṭṭhenapi bhaṇitabbo dhammo, pageva ajjhiṭṭhenāti ‘‘kātabba’’nti vuttaṃ, cāletvā suttaṃ parimajjitvāti parittaṃ karontena kātabbavidhiṃ dasseti. Cāletvā suttaṃ parimajjitvāti idaṃ vā ‘‘parittāṇaṃ ettha pavesemī’’ti cittena evaṃ kate parittāṇā ettha pavesitā nāma hotīti vuttaṃ. Vihārato…pe… dukkaṭanti idaṃ aññātake gahaṭṭhe sandhāya vuttanti vadanti. Pādesu udakaṃ ākiritvāti idaṃ tasmiṃ dese cārittavasena vuttaṃ. Tattha hi pāḷiyā nisinnānaṃ bhikkhūnaṃ pādesu rogavūpasamanādiatthāya udakaṃ siñcitvā parittaṃ kātuṃ suttañca ṭhapetvā ‘‘parittaṃ bhaṇathā’’ti vatvā gacchanti. Evañhi kariyamāne yadi pāde apanenti, manussā taṃ ‘‘avamaṅgala’’nti maññanti ‘‘rogo na vūpasamessatī’’ti. Tenāha ‘‘na pādā apanetabbā’’ti.
மதஸரீரத³ஸ்ஸனே விய கேவலே ஸுஸானத³ஸ்ஸனேபி இத³ங் ஜாதானங் ஸத்தானங் வயக³மனட்டா²னந்தி மரணஸஞ்ஞா உப்பஜ்ஜதீதி ஆஹ ‘‘ஸீவதி²கத³ஸ்ஸனே…பே॰… மரணஸ்ஸதிங் படிலபி⁴ஸ்ஸாமாதி க³ந்துங் வட்டதீ’’தி. லேஸகப்பங் அகத்வா ஸமுப்பன்னஸுத்³த⁴சித்தேன ‘‘பரிவாரத்தா²ய ஆக³ச்ச²ந்தூ’’தி வுத்தேபி க³ந்துங் வட்டதீதி விமதிவினோத³னியங் (வி॰ வி॰ டீ॰ 1.185) வுத்தங். ஏதேன அஸுப⁴த³ஸ்ஸனந்தி வசனமத்தேன லேஸகப்பங் கத்வா ஏவங் க³தே மதஸ்ஸ ஞாதகா பஸீதி³ஸ்ஸந்தி, தா³னங் த³ஸ்ஸந்தி, மயங் லாப⁴ங் லபி⁴ஸ்ஸாம, உபட்டா²கங் லபி⁴ஸ்ஸாமாதி அஸுத்³த⁴சித்தேன க³ந்துங் ந வட்டதீதி த³ஸ்ஸேதி. கம்மட்டா²னஸீஸேன பன ‘‘மரணஸ்ஸதிங் லபி⁴ஸ்ஸாமா’’திஆதி³னா ஸுத்³த⁴சித்தேன பக்கோஸிதேபி அபக்கோஸிதேபி க³ந்துங் வட்டதீதி தீ³பேதி. தாலபண்ணஸ்ஸ பரித்தலேக²னட்டா²னத்தா பரித்தஸுத்தஸ்ஸ பரித்தகரணஸஞ்ஞாணத்தா தானி தி³ஸ்வா அமனுஸ்ஸா பரித்தஸஞ்ஞாய அபக்கமந்தீதி ஆஹ ‘‘தாலபண்ணங் பன பரித்தஸுத்தங் வா ஹத்தே² வா பாதே³ வா ப³ந்தி⁴தப்³ப³’’ந்தி.
Matasarīradassane viya kevale susānadassanepi idaṃ jātānaṃ sattānaṃ vayagamanaṭṭhānanti maraṇasaññā uppajjatīti āha ‘‘sīvathikadassane…pe… maraṇassatiṃ paṭilabhissāmāti gantuṃ vaṭṭatī’’ti. Lesakappaṃ akatvā samuppannasuddhacittena ‘‘parivāratthāya āgacchantū’’ti vuttepi gantuṃ vaṭṭatīti vimativinodaniyaṃ (vi. vi. ṭī. 1.185) vuttaṃ. Etena asubhadassananti vacanamattena lesakappaṃ katvā evaṃ gate matassa ñātakā pasīdissanti, dānaṃ dassanti, mayaṃ lābhaṃ labhissāma, upaṭṭhākaṃ labhissāmāti asuddhacittena gantuṃ na vaṭṭatīti dasseti. Kammaṭṭhānasīsena pana ‘‘maraṇassatiṃ labhissāmā’’tiādinā suddhacittena pakkositepi apakkositepi gantuṃ vaṭṭatīti dīpeti. Tālapaṇṇassa parittalekhanaṭṭhānattā parittasuttassa parittakaraṇasaññāṇattā tāni disvā amanussā parittasaññāya apakkamantīti āha ‘‘tālapaṇṇaṃ pana parittasuttaṃ vā hatthe vā pāde vā bandhitabba’’nti.
எத்த² ச ஆதி³தோ பட்டா²ய யாவ ‘‘ஆடானாடியபரித்தங் (தீ³॰ நி॰ 3.275 ஆத³யோ) வா ப⁴ணிதப்³ப³’’ந்தி எத்தகோயேவ வினயட்ட²கதா²ப⁴தோ பாளிமுத்தபரித்தகரணவினிச்ச²யோ, ந பன ததோ பரங் வுத்தோ, தஸ்மா ‘‘இத⁴ பனா’’திஆதி³கோ கதா²மக்³கோ³ ஸமந்தபாஸாதி³காயங் நத்தி², தீஸு டீகாஸுபி தங்ஸங்வண்ணனானயோ நத்தி², ததா²பி ஸோ ஸுத்தட்ட²கதா²யங் ஆக³தோவாதி தங் த³ஸ்ஸேதுங் ‘‘இத⁴ பன ஆடானாடியஸுத்தஸ்ஸ பரிகம்மங் வேதி³தப்³ப³’’ந்திஆதி³மாஹ. தத்த² இதா⁴தி ‘‘ஆடானாடியபரித்தங் வா ப⁴ணிதப்³ப³’’ந்தி வசனே. பனாதி விஸேஸத்தே² நிபாதோ. தீ³க⁴னிகாயே பாதி²கவக்³கே³ ஆக³தஸ்ஸ ஆடானாடியபரித்தஸ்ஸ பரிகம்மங் ஏவங் வேதி³தப்³ப³ந்தி யோஜனா. யதி³ பட²மமேவ ந வத்தப்³ப³ங், அத² கிங் காதப்³ப³ந்தி ஆஹ ‘‘மெத்தஸுத்த’’ந்திஆதி³. ஏவஞ்ஹி லத்³தா⁴ஸேவனங் ஹுத்வா அதிஓஜவந்தங் ஹோதி.
Ettha ca ādito paṭṭhāya yāva ‘‘āṭānāṭiyaparittaṃ (dī. ni. 3.275 ādayo) vā bhaṇitabba’’nti ettakoyeva vinayaṭṭhakathābhato pāḷimuttaparittakaraṇavinicchayo, na pana tato paraṃ vutto, tasmā ‘‘idha panā’’tiādiko kathāmaggo samantapāsādikāyaṃ natthi, tīsu ṭīkāsupi taṃsaṃvaṇṇanānayo natthi, tathāpi so suttaṭṭhakathāyaṃ āgatovāti taṃ dassetuṃ ‘‘idha pana āṭānāṭiyasuttassa parikammaṃ veditabba’’ntiādimāha. Tattha idhāti ‘‘āṭānāṭiyaparittaṃ vā bhaṇitabba’’nti vacane. Panāti visesatthe nipāto. Dīghanikāye pāthikavagge āgatassa āṭānāṭiyaparittassa parikammaṃ evaṃ veditabbanti yojanā. Yadi paṭhamameva na vattabbaṃ, atha kiṃ kātabbanti āha ‘‘mettasutta’’ntiādi. Evañhi laddhāsevanaṃ hutvā atiojavantaṃ hoti.
பிட்ட²ங் வா மங்ஸங் வாதி வா-ஸத்³தோ³ அனியமத்தோ², தேன மச்ச²க²ண்ட³பூவக²ஜ்ஜகாத³யோ ஸங்க³ண்ஹாதி. ஓதாரங் லப⁴ந்தீதி அத்தனா பியாயிதகா²த³னீயனிப³த்³த⁴வஸனட்டா²னலாப⁴தாய அவதாரணங் லப⁴ந்தி. ஹரிதூபலித்தந்தி அல்லகோ³மயலித்தங். இத³ஞ்ஹி போராணகசாரித்தங் பூ⁴மிவிஸுத்³த⁴கரணங். பரிஸுத்³த⁴ங்…பே॰… நிஸீதி³தப்³ப³ந்தி இமினா பரித்தகாரகஸ்ஸ பி⁴க்கு²னோ மெத்தாகருணாவஸேன சித்தவிஸுத்³தி⁴பி இச்சி²தப்³பா³தி த³ஸ்ஸேதி. ஏவஞ்ஹி ஸதி உபரி வக்க²மானஉப⁴யதோ ரக்கா²ஸங்விதா⁴னேன ஸமேதி. டீகாயங் (தீ³॰ நி॰ டீ॰ 3.282) பன ‘‘ஸரீரஸுத்³தி⁴பி இச்சி²தப்³பா³தி த³ஸ்ஸேதீ’’தி வுத்தங். ததே³தங் விசாரேதப்³ப³ங். ந ஹி ‘‘காயஸுத்³தி⁴மத்தேன அமனுஸ்ஸானங் பியோ ஹோதீ’’தி வுத்தங், மெத்தாவஸேனேவ பன வுத்தங். வுத்தஞ்ஹேதங் ப⁴க³வதா ‘‘மெத்தாய, பி⁴க்க²வே, சேதோவிமுத்தியா…பே॰… ஏகாத³ஸானிஸங்ஸா பாடிகங்கா². கதமே ஏகாத³ஸ? ஸுக²ங் ஸுபதி, ஸுக²ங் படிபு³ஜ்ஜ²தி, ந பாபகங் ஸுபினங் பஸ்ஸதி, மனுஸ்ஸானங் பியோ ஹோதி, அமனுஸ்ஸானங் பியோ ஹோதீ’’திஆதி³ (அ॰ நி॰ 11.15; பரி॰ 331; மி॰ ப॰ 4.4.6).
Piṭṭhaṃ vā maṃsaṃ vāti vā-saddo aniyamattho, tena macchakhaṇḍapūvakhajjakādayo saṅgaṇhāti. Otāraṃ labhantīti attanā piyāyitakhādanīyanibaddhavasanaṭṭhānalābhatāya avatāraṇaṃ labhanti. Haritūpalittanti allagomayalittaṃ. Idañhi porāṇakacārittaṃ bhūmivisuddhakaraṇaṃ. Parisuddhaṃ…pe… nisīditabbanti iminā parittakārakassa bhikkhuno mettākaruṇāvasena cittavisuddhipi icchitabbāti dasseti. Evañhi sati upari vakkhamānaubhayato rakkhāsaṃvidhānena sameti. Ṭīkāyaṃ (dī. ni. ṭī. 3.282) pana ‘‘sarīrasuddhipi icchitabbāti dassetī’’ti vuttaṃ. Tadetaṃ vicāretabbaṃ. Na hi ‘‘kāyasuddhimattena amanussānaṃ piyo hotī’’ti vuttaṃ, mettāvaseneva pana vuttaṃ. Vuttañhetaṃ bhagavatā ‘‘mettāya, bhikkhave, cetovimuttiyā…pe… ekādasānisaṃsā pāṭikaṅkhā. Katame ekādasa? Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hotī’’tiādi (a. ni. 11.15; pari. 331; mi. pa. 4.4.6).
பரித்தகாரகோ…பே॰… ஸம்பரிவாரிதேனாதி இத³ங் பரித்தகரணோ பா³ஹிரதோ ஆரக்கா²ஸங்விதா⁴னங், ‘‘மெத்த…பே॰… வத்தப்³ப³’’ந்தி அப்³ப⁴ந்தரதோ ஆரக்கா²ஸங்விதா⁴னங், ஏவங் உப⁴யதோ ரக்கா²ஸங்விதா⁴னங் ஹோதி. ஏவஞ்ஹி அமனுஸ்ஸா பரித்தகாரகஸ்ஸ அந்தராயங் காதுங் ந விஸஹந்தி. மங்க³லகதா² வத்தப்³பா³தி அமனுஸ்ஸானங் தோஸனத்தா²ய பண்ணாகாரங் கத்வா மஹாமங்க³லகதா² கதே²தப்³பா³. ஏவங் உபரி வக்க²மானேன ‘‘துய்ஹங் பண்ணாகாரத்தா²ய மஹாமங்க³லகதா² வுத்தா’’தி வசனேன ஸமேதி. டீகாயங் பன ‘‘புப்³பு³பசாரவஸேன வத்தப்³பா³’’தி வுத்தங். ஸப்³ப³ஸன்னிபாதோதி தஸ்மிங் விஹாரே தஸ்மிங் கா³மக்கெ²த்தே ஸப்³பே³ஸங் பி⁴க்கூ²னங் ஸன்னிபாதோ கோ⁴ஸேதப்³போ³ ‘‘சேதியங்க³ணே ஸப்³பே³ஹி ஸன்னிபதிதப்³ப³’’ந்தி. அனாக³ந்துங்னாம ந லப⁴தீதி அமனுஸ்ஸோ பு³த்³தா⁴ணாப⁴யேன ராஜாணாப⁴யேன அனாக³ந்துங் ந லப⁴தி சதுன்னங் மஹாராஜூனங் ஆணாட்டா²னியத்தா. க³ஹிதகாபதே³ஸேன அமனுஸ்ஸோவ புச்சி²தோ ஹோதீதி ‘‘அமனுஸ்ஸக³ஹிதகோ ‘த்வங் கோ நாமோ’தி புச்சி²தப்³போ³’’தி வுத்தங். மாலாக³ந்தா⁴தீ³ஸூதி மாலாக³ந்தா⁴தி³பூஜாஸு. ஆஸனபூஜாயாதி சேதியே பு³த்³தா⁴ஸனபூஜாய. பிண்ட³பாதேதி பி⁴க்கு²ஸங்க⁴ஸ்ஸ பிண்ட³பாததா³னே. ஏவங் வத்து²ப்பதே³ஸேன சேதனா வுத்தா, தஸ்மா பத்திதா³னங் ஸம்ப⁴வதி.
Parittakārako…pe… samparivāritenāti idaṃ parittakaraṇo bāhirato ārakkhāsaṃvidhānaṃ, ‘‘metta…pe… vattabba’’nti abbhantarato ārakkhāsaṃvidhānaṃ, evaṃ ubhayato rakkhāsaṃvidhānaṃ hoti. Evañhi amanussā parittakārakassa antarāyaṃ kātuṃ na visahanti. Maṅgalakathā vattabbāti amanussānaṃ tosanatthāya paṇṇākāraṃ katvā mahāmaṅgalakathā kathetabbā. Evaṃ upari vakkhamānena ‘‘tuyhaṃ paṇṇākāratthāya mahāmaṅgalakathā vuttā’’ti vacanena sameti. Ṭīkāyaṃ pana ‘‘pubbupacāravasena vattabbā’’ti vuttaṃ. Sabbasannipātoti tasmiṃ vihāre tasmiṃ gāmakkhette sabbesaṃ bhikkhūnaṃ sannipāto ghosetabbo ‘‘cetiyaṅgaṇe sabbehi sannipatitabba’’nti. Anāgantuṃnāmana labhatīti amanusso buddhāṇābhayena rājāṇābhayena anāgantuṃ na labhati catunnaṃ mahārājūnaṃ āṇāṭṭhāniyattā. Gahitakāpadesena amanussova pucchito hotīti ‘‘amanussagahitako ‘tvaṃ ko nāmo’ti pucchitabbo’’ti vuttaṃ. Mālāgandhādīsūti mālāgandhādipūjāsu. Āsanapūjāyāti cetiye buddhāsanapūjāya. Piṇḍapāteti bhikkhusaṅghassa piṇḍapātadāne. Evaṃ vatthuppadesena cetanā vuttā, tasmā pattidānaṃ sambhavati.
தே³வதானந்தி யக்க²ஸேனாபதீனங். வுத்தஞ்ஹி ஆடானாடியஸுத்தே (தீ³॰ நி॰ 3.283, 293) ‘‘இமேஸங் யக்கா²னங் மஹாயக்கா²னங் ஸேனாபதீனங் மஹாஸேனாபதீனங் உஜ்ஜா²பேதப்³ப³’’ந்திஆதி³. ஆடாதி த³ப்³பி³முக²ஸகுணா. தே ஆடா நத³ந்தி எத்தா²தி ஆடானாத³ங், தே³வனக³ரங், ஆடானாதே³ கதங் ஆடானாதி³யங், ஸுத்தங். டீகாயங் (தீ³॰ நி॰ டீ॰ 3.282) ‘‘பரித்தங் ப⁴ணிதப்³ப³ந்தி எத்தா²பி ‘மெத்தசித்தங் புரேசாரிகங் கத்வா’தி ச ‘மங்க³லகதா² வத்தப்³பா³’தி ச ‘விஹாரஸ்ஸ உபவனே’தி ச ஏவமாதி³ ஸப்³ப³ங் கி³ஹீனங் பரித்தகரணே வுத்தங் பரிகம்மங் காதப்³ப³மேவா’’தி வுத்தங், ஏவங் ஸதி அட்ட²கதா²யங் (தீ³॰ நி॰ அட்ட²॰ 3.282) ‘‘ஏதங் தாவ கி³ஹீனங் பரிகம்ம’’ந்தி வத்வா ‘‘ஸசே பன பி⁴க்கூ²’’திஆதி³னா விஸேஸத்த²ஜோதகேன பன-ஸத்³தே³ன ஸஹ வுச்சமானங் ‘‘இத³ங் பி⁴க்கூ²னங் பரிகம்ம’’ந்தி வசனங் நிரத்த²கங் விய ஹோதி. அவிஸேஸே ஹி ஸதி பே⁴தோ³ காதப்³போ³ ந ஸியா. பி⁴க்கூ²னஞ்ச யதா²வுத்தாவ பா³ஹிராரக்கா² து³க்கரா ஹோதி, தஸ்மா கி³ஹீனங் பரித்தகரணே வுத்தபரிகம்மே அஸம்பஜ்ஜமானேபி அட்ட²கதா²யங் வுத்தனயேனேவ காதுங் வட்டதீதி நோ மதி.
Devatānanti yakkhasenāpatīnaṃ. Vuttañhi āṭānāṭiyasutte (dī. ni. 3.283, 293) ‘‘imesaṃ yakkhānaṃ mahāyakkhānaṃ senāpatīnaṃ mahāsenāpatīnaṃ ujjhāpetabba’’ntiādi. Āṭāti dabbimukhasakuṇā. Te āṭā nadanti etthāti āṭānādaṃ, devanagaraṃ, āṭānāde kataṃ āṭānādiyaṃ, suttaṃ. Ṭīkāyaṃ (dī. ni. ṭī. 3.282) ‘‘parittaṃ bhaṇitabbanti etthāpi ‘mettacittaṃ purecārikaṃ katvā’ti ca ‘maṅgalakathā vattabbā’ti ca ‘vihārassa upavane’ti ca evamādi sabbaṃ gihīnaṃ parittakaraṇe vuttaṃ parikammaṃ kātabbamevā’’ti vuttaṃ, evaṃ sati aṭṭhakathāyaṃ (dī. ni. aṭṭha. 3.282) ‘‘etaṃ tāva gihīnaṃ parikamma’’nti vatvā ‘‘sace pana bhikkhū’’tiādinā visesatthajotakena pana-saddena saha vuccamānaṃ ‘‘idaṃ bhikkhūnaṃ parikamma’’nti vacanaṃ niratthakaṃ viya hoti. Avisese hi sati bhedo kātabbo na siyā. Bhikkhūnañca yathāvuttāva bāhirārakkhā dukkarā hoti, tasmā gihīnaṃ parittakaraṇe vuttaparikamme asampajjamānepi aṭṭhakathāyaṃ vuttanayeneva kātuṃ vaṭṭatīti no mati.
இத³ங் பன இத⁴ ஆக³தங் ஆடானாடியஸுத்தபரிகம்மங் ஸுத்வா ‘‘இத³ங் ஸுத்தங் அமனுஸ்ஸானங் அமனாபங், ஸஜ்ஜா²யந்தஸ்ஸ பரித்தங் கரொந்தஸ்ஸ அமனுஸ்ஸா அந்தராயங் கரெய்யு’’ந்தி மஞ்ஞமானா போராணா சதூஹி மஹாராஜேஹி ஆரோசிதங் ஸப்³ப³ஞ்ஞுபு³த்³தே⁴ன தே³ஸிதங் மூலபூ⁴தங் தீ³க⁴னிகாயே ஆக³தங் ஆடானாடியஸுத்தங் (தீ³॰ நி॰ 3.275 ஆத³யோ) பஹாய மூலஸுத்ததோ கா³தா²ச²க்கமேவ க³ஹெத்வா அவஸேஸங் ஸப்³ப³ங் ஸுத்தங் ட²பெத்வா அஞ்ஞகா³தா²யோ பக்கி²பித்வா ‘‘ஆடானாடியபரித்த’’ந்தி ட²பேஸுங், தம்பி பரித்தங் அமூலபூ⁴தத்தா ஏகேனாகாரேன தா⁴ரேதுங் அஸக்கொந்தா கேசி ஸங்கி²த்தேன தா⁴ரெந்தி, கேசி வித்தா²ரேன, கேசி ஏகச்சா கா³தா²யோ பக்கி²பந்தி, கேசி நிக்கி²பந்தி, கேசி பி⁴க்கூ² தங்மிஸ்ஸகபரித்தம்பி மங்க³லகரணகாலாதீ³ஸு வத்துமவிஸஹந்தா தங் ட²பெத்வா அஞ்ஞஸுத்தானியேவ ப⁴ணந்தி, ஸப்³ப³மேதங் அயுத்தங் விய தி³ஸ்ஸதி. கஸ்மா? சத்தாரோபி மஹாராஜானோ இமங் ஆடானாடியங் ரக்க²ங் ஸங்வித³ஹமானா பு³த்³த⁴ஸாஸனே அமனுஸ்ஸானங் பஸாதா³ய, சதஸ்ஸன்னங் பரிஸானங் அவிஹேட²னாய ஏவ ஸங்வித³ஹிங்ஸு , ந அஞ்ஞேன காரணேன. வுத்தஞ்ஹி தத்த² ‘‘தத்த² ஸந்தி உளாரா யக்கா²னிவாஸினோ, யே இமஸ்மிங் ப⁴க³வதோ பாவசனே அப்பஸன்னா, தேஸங் பஸாதா³ய உக்³க³ண்ஹாது ப⁴ந்தே ப⁴க³வா ஆடானாடியங் ரக்க²ங் பி⁴க்கூ²னங் பி⁴க்கு²னீனங் உபாஸகானங் உபாஸிகானங் கு³த்தியா ரக்கா²ய அவிஹிங்ஸாய பா²ஸுவிஹாராயா’’தி (தீ³॰ நி॰ 3.276).
Idaṃ pana idha āgataṃ āṭānāṭiyasuttaparikammaṃ sutvā ‘‘idaṃ suttaṃ amanussānaṃ amanāpaṃ, sajjhāyantassa parittaṃ karontassa amanussā antarāyaṃ kareyyu’’nti maññamānā porāṇā catūhi mahārājehi ārocitaṃ sabbaññubuddhena desitaṃ mūlabhūtaṃ dīghanikāye āgataṃ āṭānāṭiyasuttaṃ (dī. ni. 3.275 ādayo) pahāya mūlasuttato gāthāchakkameva gahetvā avasesaṃ sabbaṃ suttaṃ ṭhapetvā aññagāthāyo pakkhipitvā ‘‘āṭānāṭiyaparitta’’nti ṭhapesuṃ, tampi parittaṃ amūlabhūtattā ekenākārena dhāretuṃ asakkontā keci saṃkhittena dhārenti, keci vitthārena, keci ekaccā gāthāyo pakkhipanti, keci nikkhipanti, keci bhikkhū taṃmissakaparittampi maṅgalakaraṇakālādīsu vattumavisahantā taṃ ṭhapetvā aññasuttāniyeva bhaṇanti, sabbametaṃ ayuttaṃ viya dissati. Kasmā? Cattāropi mahārājāno imaṃ āṭānāṭiyaṃ rakkhaṃ saṃvidahamānā buddhasāsane amanussānaṃ pasādāya, catassannaṃ parisānaṃ aviheṭhanāya eva saṃvidahiṃsu , na aññena kāraṇena. Vuttañhi tattha ‘‘tattha santi uḷārā yakkhānivāsino, ye imasmiṃ bhagavato pāvacane appasannā, tesaṃ pasādāya uggaṇhātu bhante bhagavā āṭānāṭiyaṃ rakkhaṃ bhikkhūnaṃ bhikkhunīnaṃ upāsakānaṃ upāsikānaṃ guttiyā rakkhāya avihiṃsāya phāsuvihārāyā’’ti (dī. ni. 3.276).
ஸம்மாஸம்பு³த்³தே⁴னபி இமஸ்ஸ ஸுத்தஸ்ஸ நிக³மனே ‘‘உக்³க³ண்ஹாத² பி⁴க்க²வே ஆடானாடியங் ரக்க²ங், பரியாபுணாத² பி⁴க்க²வே ஆடானாடியங் ரக்க²ங், தா⁴ரேத² பி⁴க்க²வே ஆடானாடியங் ரக்க²ங், அத்த²ஸங்ஹிதா பி⁴க்க²வே ஆடானாடியா ரக்கா² பி⁴க்கூ²னங் பி⁴க்கு²னீனங் உபாஸகானங் உபாஸிகானங் கு³த்தியா ரக்கா²ய அவிஹிங்ஸாய பா²ஸுவிஹாராயா’’தி (தீ³॰ நி॰ 3.295) பி⁴க்கூ²னங் தா⁴ரணங் உய்யோஜிதங் ஆனிஸங்ஸஞ்ச பகாஸிதங். அட்ட²கதா²சரியேஹி ச ‘‘பு³த்³த⁴பா⁴ஸிதே ஏகக்க²ரம்பி ஏகபத³ம்பி அபனேதப்³ப³ங் நாம நத்தீ²’’தி வுத்தங் , தஸ்மா சதூஹி மஹாராஜேஹி ஸங்வித³ஹிதங் ஸம்மாஸம்பு³த்³தே⁴ன ஆஹச்சபா⁴ஸிதங் திஸ்ஸோ ஸங்கீ³தியோ ஆருள்ஹங் பகதிஆடானாடியஸுத்தமேவ தா⁴ரேதுங் ஸஜ்ஜா²யிதுஞ்ச யுத்தங், ந ப⁴க³வதா அபா⁴ஸிதங் திஸ்ஸோ ஸங்கீ³தியோ அனாருள்ஹங் மிஸ்ஸகஸுத்தந்தி. தீ³க⁴னிகாயட்ட²கதா²யங் (தீ³॰ நி॰ அட்ட²॰ 3.282) ஆக³தங் இத³ங் ஆடானாடியபரித்தபரிகம்மங் பன பகதிஸஜ்ஜா²யனவாசனாதி³ங் ஸந்தா⁴ய அட்ட²கதா²சரியேஹி ந வுத்தங், அத² கோ² க³ஹட்ட²ங் வா பப்³ப³ஜிதங் வா அமனுஸ்ஸேஹி க³ஹிதகாலே மோசாபனத்தா²ய லோகியேஹி மந்தங் விய ப⁴ணனங் ஸந்தா⁴ய வுத்தங். வுத்தஞ்ஹி தத்த² ‘‘அமனுஸ்ஸக³ஹிதகோ த்வங் கோ நாமோஸீதி புச்சி²தப்³போ³’’திஆதி³ (தீ³॰ நி॰ அட்ட²॰ 3.282).
Sammāsambuddhenapi imassa suttassa nigamane ‘‘uggaṇhātha bhikkhave āṭānāṭiyaṃ rakkhaṃ, pariyāpuṇātha bhikkhave āṭānāṭiyaṃ rakkhaṃ, dhāretha bhikkhave āṭānāṭiyaṃ rakkhaṃ, atthasaṃhitā bhikkhave āṭānāṭiyā rakkhā bhikkhūnaṃ bhikkhunīnaṃ upāsakānaṃ upāsikānaṃ guttiyā rakkhāya avihiṃsāya phāsuvihārāyā’’ti (dī. ni. 3.295) bhikkhūnaṃ dhāraṇaṃ uyyojitaṃ ānisaṃsañca pakāsitaṃ. Aṭṭhakathācariyehi ca ‘‘buddhabhāsite ekakkharampi ekapadampi apanetabbaṃ nāma natthī’’ti vuttaṃ , tasmā catūhi mahārājehi saṃvidahitaṃ sammāsambuddhena āhaccabhāsitaṃ tisso saṅgītiyo āruḷhaṃ pakatiāṭānāṭiyasuttameva dhāretuṃ sajjhāyituñca yuttaṃ, na bhagavatā abhāsitaṃ tisso saṅgītiyo anāruḷhaṃ missakasuttanti. Dīghanikāyaṭṭhakathāyaṃ (dī. ni. aṭṭha. 3.282) āgataṃ idaṃ āṭānāṭiyaparittaparikammaṃ pana pakatisajjhāyanavācanādiṃ sandhāya aṭṭhakathācariyehi na vuttaṃ, atha kho gahaṭṭhaṃ vā pabbajitaṃ vā amanussehi gahitakāle mocāpanatthāya lokiyehi mantaṃ viya bhaṇanaṃ sandhāya vuttaṃ. Vuttañhi tattha ‘‘amanussagahitako tvaṃ ko nāmosīti pucchitabbo’’tiādi (dī. ni. aṭṭha. 3.282).
ஆடானாடியா ரக்கா² ச நாம ந ஸகலஸுத்தங், அத² கோ² ‘‘விபஸ்ஸிஸ்ஸ ச நமத்தூ²’’தி பத³ங் ஆதி³ங் கத்வா சதுன்னங் மஹாராஜூனங் வஸேன சதுக்க²த்துங் ஆக³தங் ‘‘ஜினங் வந்தா³ம கோ³தம’’ந்தி பத³ங் பரியோஸானங் கத்வா வுத்தஸுத்தேகதே³ஸோயேவ. கத²ங் விஞ்ஞாயதீதி சே? ‘‘அத² கோ² வெஸ்ஸவணோ மஹாராஜா ப⁴க³வதோ அதி⁴வாஸனங் விதி³த்வா இமங் ஆடானாடியங் ரக்க²ங் அபா⁴ஸீ’’தி ஆரபி⁴த்வா யதா²வுத்தஸுத்தேகதே³ஸஸ்ஸ அவஸானே ‘‘அயங் கோ² மாரிஸா ஆடானாடியா ரக்கா²’’தி நிய்யாதிதத்தா. தஸ்மா யதா² நாம ப்³யக்³கா⁴த³யோ அத்தனோ ப⁴க்க²ங் விலும்பந்தானங் ப³லவது³ட்ட²சித்தா ப⁴வந்தி, ஏவங் அத்தனா க³ஹிதமனுஸ்ஸங் மோசாபெந்தானங் அமனுஸ்ஸா பது³ட்ட²சித்தா ஹொந்தி. இதி ததா² மோசாபேதுங் ஆரத்³த⁴காலே பி⁴க்கூ²னங் பரிஸ்ஸயவினோத³னத்த²ங் இமங் ஆடானாடியபரித்தபரிகம்மங் அட்ட²கதா²சரியேஹி வுத்தந்தி த³ட்ட²ப்³ப³ங். அயங் பரித்தகரணவினிச்ச²யகதா²லங்காரோ.
Āṭānāṭiyā rakkhā ca nāma na sakalasuttaṃ, atha kho ‘‘vipassissa ca namatthū’’ti padaṃ ādiṃ katvā catunnaṃ mahārājūnaṃ vasena catukkhattuṃ āgataṃ ‘‘jinaṃ vandāma gotama’’nti padaṃ pariyosānaṃ katvā vuttasuttekadesoyeva. Kathaṃ viññāyatīti ce? ‘‘Atha kho vessavaṇo mahārājā bhagavato adhivāsanaṃ viditvā imaṃ āṭānāṭiyaṃ rakkhaṃ abhāsī’’ti ārabhitvā yathāvuttasuttekadesassa avasāne ‘‘ayaṃ kho mārisā āṭānāṭiyā rakkhā’’ti niyyātitattā. Tasmā yathā nāma byagghādayo attano bhakkhaṃ vilumpantānaṃ balavaduṭṭhacittā bhavanti, evaṃ attanā gahitamanussaṃ mocāpentānaṃ amanussā paduṭṭhacittā honti. Iti tathā mocāpetuṃ āraddhakāle bhikkhūnaṃ parissayavinodanatthaṃ imaṃ āṭānāṭiyaparittaparikammaṃ aṭṭhakathācariyehi vuttanti daṭṭhabbaṃ. Ayaṃ parittakaraṇavinicchayakathālaṅkāro.
20. அனாமட்ட²பிண்ட³பாதோதி (வி॰ வி॰ டீ॰ 1.185) எத்த² அமஸியித்தா²தி ஆமட்டோ², ந ஆமட்டோ² அனாமட்டோ². பிண்ட³ங் பிண்ட³ங் ஹுத்வா பததீதி பிண்ட³பாதோ. அனாமட்டோ² ச ஸோ பிண்ட³பாதோ சாதி ததா², அக்³க³ஹிதஅக்³கோ³, அபரிபு⁴த்தோ பிண்ட³பாதோதி அத்தோ². ஸசேபி கஹாபணக்³க⁴னகோ ஹோதீதி இமினா தா³யகேஹி ப³ஹுப்³யஞ்ஜனேன ஸம்பாதெ³த்வா ஸக்கச்சங் தி³ன்னபா⁴வங் தீ³பேதி. தேன வுத்தங் ‘‘ஸத்³தா⁴தெ³ய்யவினிபாதனங் நத்தீ²’’தி, ஏவங் ஸக்கச்சங் ஸத்³தா⁴ய தி³ன்னங் மஹக்³க⁴போ⁴ஜனம்பி மாதாபிதூனங் த³த்வா ஸத்³தா⁴தெ³ய்யவினிபாதனங் நாம ந ஹோதி, பகே³வ அப்பக்³க⁴போ⁴ஜனேதி அதி⁴ப்பாயோ. மாதாதி³பஞ்சகங்யேவ வத்வா பே⁴ஸஜ்ஜகரணே விய அபரேஸம்பி த³ஸன்னங் தா³துங் வட்டதீதி அவுத்தத்தா அஞ்ஞேஸங் ஞாதகானம்பி பேஸெத்வா தா³துங் ந வட்டதீதி ஸித்³த⁴ங், ‘‘விஹாரங் ஸம்பத்தஸ்ஸ பன யஸ்ஸ கஸ்ஸசி ஆக³ந்துகஸ்ஸ வா’’இச்சாதி³வக்க²மானத்தா விஹாரங் ஸம்பத்தானங் ஞாதகானம்பி ஆக³ந்துகஸாமஞ்ஞேன தா³துங் வட்டதீதி ச. தா²லகேதி ஸங்கி⁴கே கங்ஸாதி³மயே தா²லகே. பத்தோபி எத்த² ஸங்க³ய்ஹதி. ந வட்டதீதி இமினா து³க்கடந்தி த³ஸ்ஸேதி. தா³மரிகசோரஸ்ஸாதி ரஜ்ஜங் பத்தெ²ந்தஸ்ஸ பாகடசோரஸ்ஸ. அதீ³யமானேபி ‘‘ந தெ³ந்தீ’’தி குஜ்ஜ²ந்தீதி ஸம்ப³ந்தோ⁴.
20.Anāmaṭṭhapiṇḍapātoti (vi. vi. ṭī. 1.185) ettha amasiyitthāti āmaṭṭho, na āmaṭṭho anāmaṭṭho. Piṇḍaṃ piṇḍaṃ hutvā patatīti piṇḍapāto. Anāmaṭṭho ca so piṇḍapāto cāti tathā, aggahitaaggo, aparibhutto piṇḍapātoti attho. Sacepi kahāpaṇagghanako hotīti iminā dāyakehi bahubyañjanena sampādetvā sakkaccaṃ dinnabhāvaṃ dīpeti. Tena vuttaṃ ‘‘saddhādeyyavinipātanaṃ natthī’’ti, evaṃ sakkaccaṃ saddhāya dinnaṃ mahagghabhojanampi mātāpitūnaṃ datvā saddhādeyyavinipātanaṃ nāma na hoti, pageva appagghabhojaneti adhippāyo. Mātādipañcakaṃyeva vatvā bhesajjakaraṇe viya aparesampi dasannaṃ dātuṃ vaṭṭatīti avuttattā aññesaṃ ñātakānampi pesetvā dātuṃ na vaṭṭatīti siddhaṃ, ‘‘vihāraṃ sampattassa pana yassa kassaci āgantukassa vā’’iccādivakkhamānattā vihāraṃ sampattānaṃ ñātakānampi āgantukasāmaññena dātuṃ vaṭṭatīti ca. Thālaketi saṅghike kaṃsādimaye thālake. Pattopi ettha saṅgayhati. Na vaṭṭatīti iminā dukkaṭanti dasseti. Dāmarikacorassāti rajjaṃ patthentassa pākaṭacorassa. Adīyamānepi ‘‘na dentī’’ti kujjhantīti sambandho.
ஆமிஸஸ்ஸ த⁴ம்மஸ்ஸ ச அலாபே⁴ன அத்தனோ பரஸ்ஸ ச அந்தரே ஸம்ப⁴வந்தஸ்ஸ சி²த்³த³ஸ்ஸ விவரஸ்ஸ படிஸந்த²ரணங் பித³ஹனங் படிஸந்தா²ரோ. ஸோ பன த⁴ம்மாமிஸவஸேன து³விதோ⁴. தத்த² ஆமிஸபடிஸந்தா²ரங் ஸந்தா⁴ய ‘‘கஸ்ஸ காதப்³போ³, கஸ்ஸ ந காதப்³போ³’’தி வுத்தங். ஆக³ந்துகஸ்ஸ வா…பே॰… காதப்³போ³யேவாதி வுத்தமத்த²ங் பாகடங் காதுங் ‘‘ஆக³ந்துகங் தாவா’’திஆதி³மாஹ. கீ²ணபரிப்³ப³யந்தி இமினா அக³திபா⁴வங் கருணாட்டா²னதஞ்ச த³ஸ்ஸேதி. தேன ச தப்³பி³து⁴ரானங் ஸமித்³தா⁴னங் ஆக³ந்துகத்தேபி தா³துங் ந வட்டதீதி ஸித்³த⁴ங் ஹோதி. ‘‘அபச்சாஸீஸந்தேனா’’தி வத்வா பச்சாஸீஸனப்பகாரங் த³ஸ்ஸேதுங் ‘‘மனுஸ்ஸா நாமா’’திஆதி³ வுத்தங். அனநுஞ்ஞாதானங் பன அபச்சாஸீஸந்தேனபி தா³துங் ந வட்டதி ஸத்³தா⁴தெ³ய்யவினிபாதத்தா, பச்சாஸாய பன ஸதி குலதூ³ஸனம்பி ஹோதி. உப்³பா³ஸெத்வாதி ஸமந்ததோ தியோஜனங் விலும்பந்தே மனுஸ்ஸே பலாபெத்வா. வரபொத்த²கசித்தத்த²ரணந்தி அனேகப்பகாரங் இத்தி²புரிஸாதி³உத்தமரூபவிசித்தங் அத்த²ரணங். அயங் படிஸந்தா²ரவினிச்ச²யகதா²லங்காரோ.
Āmisassa dhammassa ca alābhena attano parassa ca antare sambhavantassa chiddassa vivarassa paṭisantharaṇaṃ pidahanaṃ paṭisanthāro. So pana dhammāmisavasena duvidho. Tattha āmisapaṭisanthāraṃ sandhāya ‘‘kassa kātabbo, kassa na kātabbo’’ti vuttaṃ. Āgantukassa vā…pe… kātabboyevāti vuttamatthaṃ pākaṭaṃ kātuṃ ‘‘āgantukaṃ tāvā’’tiādimāha. Khīṇaparibbayanti iminā agatibhāvaṃ karuṇāṭṭhānatañca dasseti. Tena ca tabbidhurānaṃ samiddhānaṃ āgantukattepi dātuṃ na vaṭṭatīti siddhaṃ hoti. ‘‘Apaccāsīsantenā’’ti vatvā paccāsīsanappakāraṃ dassetuṃ ‘‘manussā nāmā’’tiādi vuttaṃ. Ananuññātānaṃ pana apaccāsīsantenapi dātuṃ na vaṭṭati saddhādeyyavinipātattā, paccāsāya pana sati kuladūsanampi hoti. Ubbāsetvāti samantato tiyojanaṃ vilumpante manusse palāpetvā. Varapotthakacittattharaṇanti anekappakāraṃ itthipurisādiuttamarūpavicittaṃ attharaṇaṃ. Ayaṃ paṭisanthāravinicchayakathālaṅkāro.
இதி வினயஸங்க³ஹஸங்வண்ணனாபூ⁴தே வினயாலங்காரே
Iti vinayasaṅgahasaṃvaṇṇanābhūte vinayālaṅkāre
பே⁴ஸஜ்ஜாதி³வினிச்ச²யகதா²லங்காரோ நாம
Bhesajjādivinicchayakathālaṅkāro nāma
ததியோ பரிச்சே²தோ³.
Tatiyo paricchedo.
