| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
3. பே⁴ஸஜ்ஜாதி³கரணவினிச்ச²யகதா²
3. Bhesajjādikaraṇavinicchayakathā
15. பே⁴ஸஜ்ஜகரணபரித்தபடிஸந்தா²ரேஸு பன பே⁴ஸஜ்ஜகரணே தாவ அயங் வினிச்ச²யோ (பாரா॰ அட்ட²॰ 2.185-7) – ஆக³தாக³தஸ்ஸ பரஜனஸ்ஸ பே⁴ஸஜ்ஜங் ந காதப்³ப³ங், கரொந்தோ து³க்கடங் ஆபஜ்ஜதி. பஞ்சன்னங் பன ஸஹத⁴ம்மிகானங் காதப்³ப³ங் பி⁴க்கு²ஸ்ஸ பி⁴க்கு²னியா ஸிக்க²மானாய ஸாமணேரஸ்ஸ ஸாமணேரியாதி. ஸமஸீலஸத்³தா⁴பஞ்ஞானஞ்ஹி ஏதேஸங் தீஸு ஸிக்கா²ஸு யுத்தானங் பே⁴ஸஜ்ஜங் அகாதுங் ந லப்³ப⁴தி. கரொந்தேன ச ஸசே தேஸங் அத்தி², தேஸங் ஸந்தகங் க³ஹெத்வா யோஜெத்வா தா³தப்³ப³ங், ஸசே நத்தி², அத்தனோ ஸந்தகங் காதப்³ப³ங். ஸசே அத்தனோபி நத்தி², பி⁴க்கா²சாரவத்தேன வா ஞாதகபவாரிதட்டா²னதோ வா பரியேஸிதப்³ப³ங், அலப⁴ந்தேன கி³லானஸ்ஸ அத்தா²ய அகதவிஞ்ஞத்தியாபி ஆஹரித்வா காதப்³ப³ங்.
15.Bhesajjakaraṇaparittapaṭisanthāresu pana bhesajjakaraṇe tāva ayaṃ vinicchayo (pārā. aṭṭha. 2.185-7) – āgatāgatassa parajanassa bhesajjaṃ na kātabbaṃ, karonto dukkaṭaṃ āpajjati. Pañcannaṃ pana sahadhammikānaṃ kātabbaṃ bhikkhussa bhikkhuniyā sikkhamānāya sāmaṇerassa sāmaṇeriyāti. Samasīlasaddhāpaññānañhi etesaṃ tīsu sikkhāsu yuttānaṃ bhesajjaṃ akātuṃ na labbhati. Karontena ca sace tesaṃ atthi, tesaṃ santakaṃ gahetvā yojetvā dātabbaṃ, sace natthi, attano santakaṃ kātabbaṃ. Sace attanopi natthi, bhikkhācāravattena vā ñātakapavāritaṭṭhānato vā pariyesitabbaṃ, alabhantena gilānassa atthāya akataviññattiyāpi āharitvā kātabbaṃ.
16. அபரேஸம்பி பஞ்சன்னங் காதுங் வட்டதி மாது பிது தது³பட்டா²கானங் அத்தனோ வெய்யாவச்சகரஸ்ஸ பண்டு³பலாஸஸ்ஸ சாதி. பண்டு³பலாஸோ நாம யோ பப்³ப³ஜ்ஜாபெக்கோ² யாவ பத்தசீவரங் படியாதி³யதி, தாவ விஹாரே வஸதி. தேஸு ஸசே மாதாபிதரோ இஸ்ஸரா ஹொந்தி ந பச்சாஸீஸந்தி, அகாதுங் வட்டதி. ஸசே பன ரஜ்ஜேபி டி²தா பச்சாஸீஸந்தி, அகாதுங் ந வட்டதி. பே⁴ஸஜ்ஜங் பச்சாஸீஸந்தானங் பே⁴ஸஜ்ஜங் தா³தப்³ப³ங், யோஜேதுங் அஜானந்தானங் யோஜெத்வா தா³தப்³ப³ங். ஸப்³பே³ஸங் அத்தா²ய ஸஹத⁴ம்மிகேஸு வுத்தனயேனேவ பரியேஸிதப்³ப³ங். ஸசே பன மாதரங் விஹாரங் ஆனெத்வா ஜக்³க³தி, ஸப்³ப³ங் பரிகம்மங் அனாமஸந்தேன காதப்³ப³ங், கா²த³னீயபோ⁴ஜனீயங் ஸஹத்தா² தா³தப்³ப³ங். பிதா பன யதா² ஸாமணேரோ, ஏவங் ஸஹத்தே²ன ந்ஹாபனஸம்பா³ஹனாதீ³னி கத்வா உபட்டா²தப்³போ³. யே ச மாதாபிதரோ உபட்ட²ஹந்தி படிஜக்³க³ந்தி, தேஸம்பி ஏவமேவ காதப்³ப³ங். வெய்யாவச்சகரோ நாம யோ வேதனங் க³ஹெத்வா அரஞ்ஞே தா³ரூனி வா சி²ந்த³தி, அஞ்ஞங் வா கிஞ்சி கம்மங் கரோதி, தஸ்ஸ ரோகே³ உப்பன்னே யாவ ஞாதகா ந பஸ்ஸந்தி, தாவ பே⁴ஸஜ்ஜங் காதப்³ப³ங். யோ பன பி⁴க்கு²னிஸ்ஸிதகோவ ஹுத்வா ஸப்³ப³கம்மானி கரோதி, தஸ்ஸ பே⁴ஸஜ்ஜங் காதப்³ப³மேவ. பண்டு³பலாஸேபி ஸாமணேரே விய படிபஜ்ஜிதப்³ப³ங்.
16. Aparesampi pañcannaṃ kātuṃ vaṭṭati mātu pitu tadupaṭṭhākānaṃ attano veyyāvaccakarassa paṇḍupalāsassa cāti. Paṇḍupalāso nāma yo pabbajjāpekkho yāva pattacīvaraṃ paṭiyādiyati, tāva vihāre vasati. Tesu sace mātāpitaro issarā honti na paccāsīsanti, akātuṃ vaṭṭati. Sace pana rajjepi ṭhitā paccāsīsanti, akātuṃ na vaṭṭati. Bhesajjaṃ paccāsīsantānaṃ bhesajjaṃ dātabbaṃ, yojetuṃ ajānantānaṃ yojetvā dātabbaṃ. Sabbesaṃ atthāya sahadhammikesu vuttanayeneva pariyesitabbaṃ. Sace pana mātaraṃ vihāraṃ ānetvā jaggati, sabbaṃ parikammaṃ anāmasantena kātabbaṃ, khādanīyabhojanīyaṃ sahatthā dātabbaṃ. Pitā pana yathā sāmaṇero, evaṃ sahatthena nhāpanasambāhanādīni katvā upaṭṭhātabbo. Ye ca mātāpitaro upaṭṭhahanti paṭijagganti, tesampi evameva kātabbaṃ. Veyyāvaccakaro nāma yo vetanaṃ gahetvā araññe dārūni vā chindati, aññaṃ vā kiñci kammaṃ karoti, tassa roge uppanne yāva ñātakā na passanti, tāva bhesajjaṃ kātabbaṃ. Yo pana bhikkhunissitakova hutvā sabbakammāni karoti, tassa bhesajjaṃ kātabbameva. Paṇḍupalāsepi sāmaṇere viya paṭipajjitabbaṃ.
17. அபரேஸம்பி த³ஸன்னங் காதுங் வட்டதி ஜெட்ட²பா⁴து கனிட்ட²பா⁴து ஜெட்ட²ப⁴கி³னியா கனிட்ட²ப⁴கி³னியா சூளமாதுயா மஹாமாதுயா சூளபிதுனோ மஹாபிதுனோ பிதுச்சா²ய மாதுலஸ்ஸாதி. தேஸங் பன ஸப்³பே³ஸம்பி கரொந்தேன தேஸங்யேவ ஸந்தகங் பே⁴ஸஜ்ஜங் க³ஹெத்வா கேவலங் யோஜெத்வா தா³தப்³ப³ங். ஸசே பன நப்பஹொந்தி யாசந்தி ச ‘‘தே³த² நோ, ப⁴ந்தே, தும்ஹாகங் படித³ஸ்ஸாமா’’தி, தாவகாலிகங் தா³தப்³ப³ங். ஸசேபி ந யாசந்தி, ‘‘அம்ஹாகங் பே⁴ஸஜ்ஜங் அத்தி², தாவகாலிகங் க³ண்ஹதா²’’தி வத்வா வா ‘‘யதா³ தேஸங் ப⁴விஸ்ஸதி, ததா³ த³ஸ்ஸந்தீ’’தி ஆபோ⁴க³ங் வா கத்வா தா³தப்³ப³ங். ஸசே படிதெ³ந்தி, க³ஹேதப்³ப³ங். நோ சே தெ³ந்தி, ந சோதே³தப்³பா³. ஏதே த³ஸ ஞாதகே ட²பெத்வா அஞ்ஞேஸங் ந காதப்³ப³ங்.
17. Aparesampi dasannaṃ kātuṃ vaṭṭati jeṭṭhabhātu kaniṭṭhabhātu jeṭṭhabhaginiyā kaniṭṭhabhaginiyā cūḷamātuyā mahāmātuyā cūḷapituno mahāpituno pitucchāya mātulassāti. Tesaṃ pana sabbesampi karontena tesaṃyeva santakaṃ bhesajjaṃ gahetvā kevalaṃ yojetvā dātabbaṃ. Sace pana nappahonti yācanti ca ‘‘detha no, bhante, tumhākaṃ paṭidassāmā’’ti, tāvakālikaṃ dātabbaṃ. Sacepi na yācanti, ‘‘amhākaṃ bhesajjaṃ atthi, tāvakālikaṃ gaṇhathā’’ti vatvā vā ‘‘yadā tesaṃ bhavissati, tadā dassantī’’ti ābhogaṃ vā katvā dātabbaṃ. Sace paṭidenti, gahetabbaṃ. No ce denti, na codetabbā. Ete dasa ñātake ṭhapetvā aññesaṃ na kātabbaṃ.
ஏதேஸங் புத்தபரம்பராய பன யாவ ஸத்தமா குலபரிவட்டா, தாவ சத்தாரோ பச்சயே ஆஹராபெந்தஸ்ஸ அகதவிஞ்ஞத்தி வா பே⁴ஸஜ்ஜங் கரொந்தஸ்ஸ வேஜ்ஜகம்மங் வா குலதூ³ஸகாபத்தி வா ந ஹோதி. ஸசே பா⁴து ஜாயா, ப⁴கி³னியா ஸாமிகோ வா கி³லானோ ஹோதி, ஞாதகா சே, தேஸம்பி வட்டதி. அஞ்ஞாதகா சே, பா⁴து ச ப⁴கி³னியா ச கத்வா தா³தப்³ப³ங் ‘‘தும்ஹாகங் ஜக்³க³னட்டா²னே தே³தா²’’தி. அத² வா தேஸங் புத்தானங் கத்வா தா³தப்³ப³ங் ‘‘தும்ஹாகங் மாதாபிதூனங் தே³தா²’’தி. ஏதேனுபாயேன ஸப்³ப³பதே³ஸு வினிச்ச²யோ வேதி³தப்³போ³.
Etesaṃ puttaparamparāya pana yāva sattamā kulaparivaṭṭā, tāva cattāro paccaye āharāpentassa akataviññatti vā bhesajjaṃ karontassa vejjakammaṃ vā kuladūsakāpatti vā na hoti. Sace bhātu jāyā, bhaginiyā sāmiko vā gilāno hoti, ñātakā ce, tesampi vaṭṭati. Aññātakā ce, bhātu ca bhaginiyā ca katvā dātabbaṃ ‘‘tumhākaṃ jagganaṭṭhāne dethā’’ti. Atha vā tesaṃ puttānaṃ katvā dātabbaṃ ‘‘tumhākaṃ mātāpitūnaṃ dethā’’ti. Etenupāyena sabbapadesu vinicchayo veditabbo.
தேஸங் அத்தா²ய ச ஸாமணேரேஹி அரஞ்ஞதோ பே⁴ஸஜ்ஜங் ஆஹராபெந்தேன ஞாதிஸாமணேரேஹி வா ஆஹராபேதப்³ப³ங், அஞ்ஞாதகேஹி அத்தனோ அத்தா²ய வா ஆஹராபெத்வா தா³தப்³ப³ங். தேஹிபி ‘‘உபஜ்ஜா²யஸ்ஸ ஆஹராமா’’தி வத்தஸீஸேன ஆஹரிதப்³ப³ங். உபஜ்ஜா²யஸ்ஸ மாதாபிதரோ கி³லானா விஹாரங் ஆக³ச்ச²ந்தி, உபஜ்ஜா²யோ ச தி³ஸாபக்கந்தோ ஹோதி, ஸத்³தி⁴விஹாரிகேன உபஜ்ஜா²யஸ்ஸ ஸந்தகங் பே⁴ஸஜ்ஜங் தா³தப்³ப³ங். நோ சே அத்தி², அத்தனோ பே⁴ஸஜ்ஜங் உபஜ்ஜா²யஸ்ஸ பரிச்சஜித்வா தா³தப்³ப³ங். அத்தனோபி அஸந்தே வுத்தனயேனேவ பரியேஸித்வா உபஜ்ஜா²யஸ்ஸ ஸந்தகங் கத்வா தா³தப்³ப³ங். உபஜ்ஜா²யேனபி ஸத்³தி⁴விஹாரிகஸ்ஸ மாதாபிதூஸு ஏவமேவ படிபஜ்ஜிதப்³ப³ங். ஏஸேவ நயோ ஆசரியந்தேவாஸிகேஸுபி. அஞ்ஞோபி யோ ஆக³ந்துகோ வா சோரோ வா யுத்³த⁴பராஜிதோ இஸ்ஸரோ வா ஞாதகேஹி பரிச்சத்தோ கபணோ வா க³மியமனுஸ்ஸோ வா கி³லானோ ஹுத்வா விஹாரங் பவிஸதி, ஸப்³பே³ஸங் அபச்சாஸீஸந்தேன பே⁴ஸஜ்ஜங் காதப்³ப³ங்.
Tesaṃ atthāya ca sāmaṇerehi araññato bhesajjaṃ āharāpentena ñātisāmaṇerehi vā āharāpetabbaṃ, aññātakehi attano atthāya vā āharāpetvā dātabbaṃ. Tehipi ‘‘upajjhāyassa āharāmā’’ti vattasīsena āharitabbaṃ. Upajjhāyassa mātāpitaro gilānā vihāraṃ āgacchanti, upajjhāyo ca disāpakkanto hoti, saddhivihārikena upajjhāyassa santakaṃ bhesajjaṃ dātabbaṃ. No ce atthi, attano bhesajjaṃ upajjhāyassa pariccajitvā dātabbaṃ. Attanopi asante vuttanayeneva pariyesitvā upajjhāyassa santakaṃ katvā dātabbaṃ. Upajjhāyenapi saddhivihārikassa mātāpitūsu evameva paṭipajjitabbaṃ. Eseva nayo ācariyantevāsikesupi. Aññopi yo āgantuko vā coro vā yuddhaparājito issaro vā ñātakehi pariccatto kapaṇo vā gamiyamanusso vā gilāno hutvā vihāraṃ pavisati, sabbesaṃ apaccāsīsantena bhesajjaṃ kātabbaṃ.
18. ஸத்³த⁴ங் குலங் ஹோதி சதூஹி பச்சயேஹி உபட்டா²யகங் பி⁴க்கு²ஸங்க⁴ஸ்ஸ மாதாபிதுட்டா²னியங், தத்ர சே கோசி கி³லானோ ஹோதி, தஸ்ஸத்தா²ய விஸ்ஸாஸேன ‘‘பே⁴ஸஜ்ஜங் கத்வா ப⁴ந்தே தே³தா²’’தி வத³ந்தி, நேவ தா³தப்³ப³ங் ந காதப்³ப³ங். அத² பன கப்பியங் ஞத்வா ஏவங் புச்ச²ந்தி ‘‘ப⁴ந்தே, அஸுகஸ்ஸ நாம ரோக³ஸ்ஸ கிங் பே⁴ஸஜ்ஜங் கரொந்தீ’’தி, ‘‘இத³ஞ்சித³ஞ்ச க³ஹெத்வா கரொந்தீ’’தி வத்துங் வட்டதி. ‘‘ப⁴ந்தே, மய்ஹங் மாதா கி³லானா, பே⁴ஸஜ்ஜங் தாவ ஆசிக்க²தா²’’தி ஏவங் புச்சி²தே பன ந ஆசிக்கி²தப்³ப³ங், அஞ்ஞமஞ்ஞங் பன கதா² காதப்³பா³ ‘‘ஆவுஸோ, அஸுகஸ்ஸ நாம பி⁴க்கு²னோ இமஸ்மிங் ரோகே³ கிங் பே⁴ஸஜ்ஜங் கரிங்ஸூ’’தி. இத³ஞ்சித³ஞ்ச பே⁴ஸஜ்ஜங் ப⁴ந்தேதி. தங் ஸுத்வா இதரோ மாது பே⁴ஸஜ்ஜங் கரோதி, வட்டதி. மஹாபது³மத்தே²ரோ கிர வஸப⁴ரஞ்ஞோபி தே³வியா ரோகே³ உப்பன்னே ஏகாய இத்தி²யா ஆக³ந்த்வா புச்சி²தோ ‘‘ந ஜானாமீ’’தி அவத்வா ஏவமேவ பி⁴க்கூ²ஹி ஸத்³தி⁴ங் ஸமுல்லபேஸி. தங் ஸுத்வா தஸ்ஸா பே⁴ஸஜ்ஜமகங்ஸு. வூபஸந்தே ச ரோகே³ திசீவரேன தீஹி ச கஹாபணஸதேஹி ஸத்³தி⁴ங் பே⁴ஸஜ்ஜசங்கோடகங் பூரெத்வா ஆஹரித்வா தே²ரஸ்ஸ பாத³மூலே ட²பெத்வா ‘‘ப⁴ந்தே, புப்ப²பூஜங் கரோதா²’’தி ஆஹங்ஸு. தே²ரோ ‘‘ஆசரியபா⁴கோ³ நாம அய’’ந்தி கப்பியவஸேன கா³ஹாபெத்வா புப்ப²பூஜமகாஸி. ஏவங் தாவ பே⁴ஸஜ்ஜே படிபஜ்ஜிதப்³ப³ங்.
18. Saddhaṃ kulaṃ hoti catūhi paccayehi upaṭṭhāyakaṃ bhikkhusaṅghassa mātāpituṭṭhāniyaṃ, tatra ce koci gilāno hoti, tassatthāya vissāsena ‘‘bhesajjaṃ katvā bhante dethā’’ti vadanti, neva dātabbaṃ na kātabbaṃ. Atha pana kappiyaṃ ñatvā evaṃ pucchanti ‘‘bhante, asukassa nāma rogassa kiṃ bhesajjaṃ karontī’’ti, ‘‘idañcidañca gahetvā karontī’’ti vattuṃ vaṭṭati. ‘‘Bhante, mayhaṃ mātā gilānā, bhesajjaṃ tāva ācikkhathā’’ti evaṃ pucchite pana na ācikkhitabbaṃ, aññamaññaṃ pana kathā kātabbā ‘‘āvuso, asukassa nāma bhikkhuno imasmiṃ roge kiṃ bhesajjaṃ kariṃsū’’ti. Idañcidañca bhesajjaṃ bhanteti. Taṃ sutvā itaro mātu bhesajjaṃ karoti, vaṭṭati. Mahāpadumatthero kira vasabharaññopi deviyā roge uppanne ekāya itthiyā āgantvā pucchito ‘‘na jānāmī’’ti avatvā evameva bhikkhūhi saddhiṃ samullapesi. Taṃ sutvā tassā bhesajjamakaṃsu. Vūpasante ca roge ticīvarena tīhi ca kahāpaṇasatehi saddhiṃ bhesajjacaṅkoṭakaṃ pūretvā āharitvā therassa pādamūle ṭhapetvā ‘‘bhante, pupphapūjaṃ karothā’’ti āhaṃsu. Thero ‘‘ācariyabhāgo nāma aya’’nti kappiyavasena gāhāpetvā pupphapūjamakāsi. Evaṃ tāva bhesajje paṭipajjitabbaṃ.
19. பரித்தே பன ‘‘கி³லானஸ்ஸ பரித்தங் கரோத², ப⁴ந்தே’’தி வுத்தே ந காதப்³ப³ங், ‘‘பரித்தங் ப⁴ணதா²’’தி வுத்தே பன ப⁴ணிதப்³ப³ங். ஸசேபிஸ்ஸ ஏவங் ஹோதி ‘‘மனுஸ்ஸா நாம ந ஜானந்தி, அகரியமானே விப்படிஸாரினோ ப⁴விஸ்ஸந்தீ’’தி, காதப்³ப³ங். ‘‘பரித்தோத³கங் பரித்தஸுத்தங் கத்வா தே³தா²’’தி வுத்தே பன தேஸங்யேவ உத³கங் ஹத்தே²ன சாலெத்வா ஸுத்தங் பரிமஜ்ஜித்வா தா³தப்³ப³ங். ஸசே விஹாரதோ உத³கங் அத்தனோ ஸந்தகங் வா ஸுத்தங் தே³தி, து³க்கடங். மனுஸ்ஸா உத³கஞ்ச ஸுத்தஞ்ச க³ஹெத்வா நிஸீதி³த்வா ‘‘பரித்தங் ப⁴ணதா²’’தி வத³ந்தி, காதப்³ப³ங். நோ சே ஜானந்தி, ஆசிக்கி²தப்³ப³ங். பி⁴க்கூ²னங் நிஸின்னானங் பாதே³ஸு உத³கங் ஆகிரித்வா ஸுத்தஞ்ச ட²பெத்வா க³ச்ச²ந்தி ‘‘பரித்தங் கரோத², பரித்தங் ப⁴ணதா²’’தி, ந பாதா³ அபனேதப்³பா³. மனுஸ்ஸா ஹி விப்படிஸாரினோ ஹொந்தி. அந்தோகா³மேபி கி³லானஸ்ஸ அத்தா²ய விஹாரங் பேஸெந்தி ‘‘பரித்தங் ப⁴ணந்தூ’’தி, ப⁴ணிதப்³ப³ங். அந்தோகா³மே ராஜகே³ஹாதீ³ஸு ரோகே³ வா உபத்³த³வே வா உப்பன்னே பக்கோஸாபெத்வா ப⁴ணாபெந்தி, ஆடானாடியஸுத்தாதீ³னி ப⁴ணிதப்³பா³னி. ‘‘ஆக³ந்த்வா கி³லானஸ்ஸ ஸிக்கா²பதா³னி தெ³ந்து, த⁴ம்மங் கதெ²ந்து, ராஜந்தேபுரே வா அமச்சகே³ஹே வா ஆக³ந்த்வா ஸிக்கா²பதா³னி தெ³ந்து, த⁴ம்மங் கதெ²ந்தூ’’தி பேஸிதேபி க³ந்த்வா ஸிக்கா²பதா³னி தா³தப்³பா³னி, த⁴ம்மோ கதே²தப்³போ³. ‘‘மதானங் பரிவாரத்த²ங் ஆக³ச்ச²ந்தூ’’தி பக்கோஸந்தி, ந க³ந்தப்³ப³ங். ‘‘ஸீவதி²கத³ஸ்ஸனே அஸுப⁴த³ஸ்ஸனே ச மரணஸ்ஸதிங் படிலபி⁴ஸ்ஸாமா’’தி கம்மட்டா²னஸீஸேன க³ந்துங் வட்டதி. ‘‘பஹாரேதி³ன்னே மதேபி அமரணாதி⁴ப்பாயஸ்ஸ அனாபத்தி வுத்தா’’தி ந எத்தகேனேவ அமனுஸ்ஸக³ஹிதஸ்ஸ பஹாரோ தா³தப்³போ³ , தாலபண்ணங் பன பரித்தஸுத்தங் வா ஹத்தே² வா பாதே³ வா ப³ந்தி⁴தப்³ப³ங், ரதனஸுத்தாதீ³னி பரித்தானி ப⁴ணிதப்³பா³னி, ‘‘மா ஸீலவந்தங் பி⁴க்கு²ங் விஹேடே²ஹீ’’தி த⁴ம்மகதா² காதப்³பா³, ஆடானாடியபரித்தங் வா ப⁴ணிதப்³ப³ங்.
19.Paritte pana ‘‘gilānassa parittaṃ karotha, bhante’’ti vutte na kātabbaṃ, ‘‘parittaṃ bhaṇathā’’ti vutte pana bhaṇitabbaṃ. Sacepissa evaṃ hoti ‘‘manussā nāma na jānanti, akariyamāne vippaṭisārino bhavissantī’’ti, kātabbaṃ. ‘‘Parittodakaṃ parittasuttaṃ katvā dethā’’ti vutte pana tesaṃyeva udakaṃ hatthena cāletvā suttaṃ parimajjitvā dātabbaṃ. Sace vihārato udakaṃ attano santakaṃ vā suttaṃ deti, dukkaṭaṃ. Manussā udakañca suttañca gahetvā nisīditvā ‘‘parittaṃ bhaṇathā’’ti vadanti, kātabbaṃ. No ce jānanti, ācikkhitabbaṃ. Bhikkhūnaṃ nisinnānaṃ pādesu udakaṃ ākiritvā suttañca ṭhapetvā gacchanti ‘‘parittaṃ karotha, parittaṃ bhaṇathā’’ti, na pādā apanetabbā. Manussā hi vippaṭisārino honti. Antogāmepi gilānassa atthāya vihāraṃ pesenti ‘‘parittaṃ bhaṇantū’’ti, bhaṇitabbaṃ. Antogāme rājagehādīsu roge vā upaddave vā uppanne pakkosāpetvā bhaṇāpenti, āṭānāṭiyasuttādīni bhaṇitabbāni. ‘‘Āgantvā gilānassa sikkhāpadāni dentu, dhammaṃ kathentu, rājantepure vā amaccagehe vā āgantvā sikkhāpadāni dentu, dhammaṃ kathentū’’ti pesitepi gantvā sikkhāpadāni dātabbāni, dhammo kathetabbo. ‘‘Matānaṃ parivāratthaṃ āgacchantū’’ti pakkosanti, na gantabbaṃ. ‘‘Sīvathikadassane asubhadassane ca maraṇassatiṃ paṭilabhissāmā’’ti kammaṭṭhānasīsena gantuṃ vaṭṭati. ‘‘Pahāredinne matepi amaraṇādhippāyassa anāpatti vuttā’’ti na ettakeneva amanussagahitassa pahāro dātabbo , tālapaṇṇaṃ pana parittasuttaṃ vā hatthe vā pāde vā bandhitabbaṃ, ratanasuttādīni parittāni bhaṇitabbāni, ‘‘mā sīlavantaṃ bhikkhuṃ viheṭhehī’’ti dhammakathā kātabbā, āṭānāṭiyaparittaṃ vā bhaṇitabbaṃ.
இத⁴ பன ஆடானாடியபரித்தஸ்ஸ பரிகம்மங் வேதி³தப்³ப³ங் (தீ³॰ நி॰ அட்ட²॰ 3.282). பட²மமேவ ஹி ஆடானாடியஸுத்தங் ந ப⁴ணிதப்³ப³ங், மெத்தஸுத்தங் (கு²॰ பா॰ 9.1 ஆத³யோ; ஸு॰ நி॰ 143 ஆத³யோ) த⁴ஜக்³க³ஸுத்தங் (ஸங்॰ நி॰ 1.249) ரதனஸுத்தந்தி (கு²॰ பா॰ 6.1 ஆத³யோ; ஸு॰ நி॰ 224 ஆத³யோ) இமானி ஸத்தாஹங் ப⁴ணிதப்³பா³னி. ஸசே முஞ்சதி, ஸுந்த³ரங். நோ சே முஞ்சதி, ஆடானாடியஸுத்தங் ப⁴ணிதப்³ப³ங். தங் ப⁴ணந்தேன ச பி⁴க்கு²னா பிட்ட²ங் வா மங்ஸங் வா ந கா²தி³தப்³ப³ங், ஸுஸானே ந வஸிதப்³ப³ங். கஸ்மா? அமனுஸ்ஸா ஓதாரங் லப⁴ந்தி. பரித்தகரணட்டா²னங் ஹரிதூபலித்தங் காரெத்வா தத்த² பரிஸுத்³த⁴ங் ஆஸனங் பஞ்ஞபெத்வா நிஸீதி³தப்³ப³ங். பரித்தகாரகோ பி⁴க்கு² விஹாரதோ க⁴ரங் நெந்தேஹி ப²லகாவுதே⁴ஹி பரிவாரெத்வா நேதப்³போ³. அப்³போ⁴காஸே நிஸீதி³த்வா ந வத்தப்³ப³ங், த்³வாரவாதபானானி பித³ஹித்வா நிஸின்னேன ஆவுத⁴ஹத்தே²ஹி ஸம்பரிவாரிதேன மெத்தசித்தங் புரேசாரிகங் கத்வா வத்தப்³ப³ங், பட²மங் ஸிக்கா²பதா³னி கா³ஹாபெத்வா ஸீலே பதிட்டி²தஸ்ஸ பரித்தங் காதப்³ப³ங். ஏவம்பி மோசேதுங் அஸக்கொந்தேன விஹாரங் நெத்வா சேதியங்க³ணே நிபஜ்ஜாபெத்வா ஆஸனபூஜங் காரெத்வா தீ³பே ஜாலாபெத்வா சேதியங்க³ணங் ஸம்மஜ்ஜித்வா மங்க³லகதா² வத்தப்³பா³, ஸப்³ப³ஸன்னிபாதோ கோ⁴ஸேதப்³போ³, விஹாரஸ்ஸ உபவனே ஜெட்ட²கருக்கோ² நாம ஹோதி, தத்த² ‘‘பி⁴க்கு²ஸங்கோ⁴ தும்ஹாகங் ஆக³மனங் பதிமானேதீ’’தி பஹிணிதப்³ப³ங். ஸப்³ப³ஸன்னிபாதட்டா²னே அனாக³ந்துங் நாம ந லப⁴தி, ததோ அமனுஸ்ஸக³ஹிதகோ ‘‘த்வங் கோனாமோஸீ’’தி புச்சி²தப்³போ³, நாமே கதி²தே நாமேனேவ ஆலபிதப்³போ³, ‘‘இத்த²ன்னாம துய்ஹங் மாலாக³ந்தா⁴தீ³ஸு பத்தி, ஆஸனபூஜாயங் பத்தி, பிண்ட³பாதே பத்தி, பி⁴க்கு²ஸங்கே⁴ன துய்ஹங் பண்ணாகாரத்தா²ய மஹாமங்க³லகதா² வுத்தா, பி⁴க்கு²ஸங்கே⁴ கா³ரவேன ஏதங் முஞ்சாஹீ’’தி மோசேதப்³போ³. ஸசே ந முஞ்சதி, தே³வதானங் ஆரோசேதப்³ப³ங் ‘‘தும்ஹே ஜானாத², அயங் அமனுஸ்ஸோ அம்ஹாகங் வசனங் ந கரோதி, மயங் பு³த்³த⁴ஆணங் கரிஸ்ஸாமா’’தி பரித்தங் காதப்³ப³ங். ஏதங் தாவ கி³ஹீனங் பரிகம்மங். ஸசே பன பி⁴க்கு² அமனுஸ்ஸேன க³ஹிதோ ஹோதி, ஆஸனானி தோ⁴வித்வா ஸப்³ப³ஸன்னிபாதங் கோ⁴ஸாபெத்வா க³ந்த⁴மாலாதீ³ஸு பத்திங் த³த்வா பரித்தங் ப⁴ணிதப்³ப³ங், இத³ங் பி⁴க்கூ²னங் பரிகம்மங். ஏவங் பரித்தே படிபஜ்ஜிதப்³ப³ங்.
Idha pana āṭānāṭiyaparittassa parikammaṃ veditabbaṃ (dī. ni. aṭṭha. 3.282). Paṭhamameva hi āṭānāṭiyasuttaṃ na bhaṇitabbaṃ, mettasuttaṃ (khu. pā. 9.1 ādayo; su. ni. 143 ādayo) dhajaggasuttaṃ (saṃ. ni. 1.249) ratanasuttanti (khu. pā. 6.1 ādayo; su. ni. 224 ādayo) imāni sattāhaṃ bhaṇitabbāni. Sace muñcati, sundaraṃ. No ce muñcati, āṭānāṭiyasuttaṃ bhaṇitabbaṃ. Taṃ bhaṇantena ca bhikkhunā piṭṭhaṃ vā maṃsaṃ vā na khāditabbaṃ, susāne na vasitabbaṃ. Kasmā? Amanussā otāraṃ labhanti. Parittakaraṇaṭṭhānaṃ haritūpalittaṃ kāretvā tattha parisuddhaṃ āsanaṃ paññapetvā nisīditabbaṃ. Parittakārako bhikkhu vihārato gharaṃ nentehi phalakāvudhehi parivāretvā netabbo. Abbhokāse nisīditvā na vattabbaṃ, dvāravātapānāni pidahitvā nisinnena āvudhahatthehi samparivāritena mettacittaṃ purecārikaṃ katvā vattabbaṃ, paṭhamaṃ sikkhāpadāni gāhāpetvā sīle patiṭṭhitassa parittaṃ kātabbaṃ. Evampi mocetuṃ asakkontena vihāraṃ netvā cetiyaṅgaṇe nipajjāpetvā āsanapūjaṃ kāretvā dīpe jālāpetvā cetiyaṅgaṇaṃ sammajjitvā maṅgalakathā vattabbā, sabbasannipāto ghosetabbo, vihārassa upavane jeṭṭhakarukkho nāma hoti, tattha ‘‘bhikkhusaṅgho tumhākaṃ āgamanaṃ patimānetī’’ti pahiṇitabbaṃ. Sabbasannipātaṭṭhāne anāgantuṃ nāma na labhati, tato amanussagahitako ‘‘tvaṃ konāmosī’’ti pucchitabbo, nāme kathite nāmeneva ālapitabbo, ‘‘itthannāma tuyhaṃ mālāgandhādīsu patti, āsanapūjāyaṃ patti, piṇḍapāte patti, bhikkhusaṅghena tuyhaṃ paṇṇākāratthāya mahāmaṅgalakathā vuttā, bhikkhusaṅghe gāravena etaṃ muñcāhī’’ti mocetabbo. Sace na muñcati, devatānaṃ ārocetabbaṃ ‘‘tumhe jānātha, ayaṃ amanusso amhākaṃ vacanaṃ na karoti, mayaṃ buddhaāṇaṃ karissāmā’’ti parittaṃ kātabbaṃ. Etaṃ tāva gihīnaṃ parikammaṃ. Sace pana bhikkhu amanussena gahito hoti, āsanāni dhovitvā sabbasannipātaṃ ghosāpetvā gandhamālādīsu pattiṃ datvā parittaṃ bhaṇitabbaṃ, idaṃ bhikkhūnaṃ parikammaṃ. Evaṃ paritte paṭipajjitabbaṃ.
20. படிஸந்தா²ரே பன அயங் வினிச்ச²யோ (பாரா॰ அட்ட²॰ 2.185-7) – அனாமட்ட²பிண்ட³பாதோ கஸ்ஸ தா³தப்³போ³, கஸ்ஸ ந தா³தப்³போ³? மாதாபிதூனங் தாவ தா³தப்³போ³. ஸசேபி கஹாபணக்³க⁴னகோ ஹோதி, ஸத்³தா⁴தெ³ய்யவினிபாதனங் நத்தி². மாதாபிதுஉபட்டா²கானங் வெய்யாவச்சகரஸ்ஸ பண்டு³பலாஸஸ்ஸ சாதி ஏதேஸம்பி தா³தப்³போ³. தத்த² பண்டு³பலாஸஸ்ஸ தா²லகே பக்கி²பித்வாபி தா³துங் வட்டதி, தங் ட²பெத்வா அஞ்ஞேஸங் அகா³ரிகானங் மாதாபிதூனம்பி ந வட்டதி. பப்³ப³ஜிதபரிபோ⁴கோ³ ஹி அகா³ரிகானங் சேதியட்டா²னியோ. அபிச அனாமட்ட²பிண்ட³பாதோ² நாமேஸ ஸம்பத்தஸ்ஸ தா³மரிகசோரஸ்ஸபி இஸ்ஸரியஸ்ஸபி தா³தப்³போ³. கஸ்மா? தே ஹி அதீ³யமானேபி ‘‘ந தெ³ந்தீ’’தி ஆமஸித்வா தீ³யமானேபி ‘‘உச்சி²ட்ட²கங் தெ³ந்தீ’’தி குஜ்ஜ²ந்தி, குத்³தா⁴ ஜீவிதாபி வோரோபெந்தி, ஸாஸனஸ்ஸபி அந்தராயங் கரொந்தி. ரஜ்ஜங் பத்த²யமானஸ்ஸ விசரதோ சோரனாக³ஸ்ஸ வத்து² செத்த² கதே²தப்³ப³ங். ஏவங் அனாமட்ட²பிண்ட³பாதே படிபஜ்ஜிதப்³ப³ங்.
20.Paṭisanthāre pana ayaṃ vinicchayo (pārā. aṭṭha. 2.185-7) – anāmaṭṭhapiṇḍapāto kassa dātabbo, kassa na dātabbo? Mātāpitūnaṃ tāva dātabbo. Sacepi kahāpaṇagghanako hoti, saddhādeyyavinipātanaṃ natthi. Mātāpituupaṭṭhākānaṃ veyyāvaccakarassa paṇḍupalāsassa cāti etesampi dātabbo. Tattha paṇḍupalāsassa thālake pakkhipitvāpi dātuṃ vaṭṭati, taṃ ṭhapetvā aññesaṃ agārikānaṃ mātāpitūnampi na vaṭṭati. Pabbajitaparibhogo hi agārikānaṃ cetiyaṭṭhāniyo. Apica anāmaṭṭhapiṇḍapātho nāmesa sampattassa dāmarikacorassapi issariyassapi dātabbo. Kasmā? Te hi adīyamānepi ‘‘na dentī’’ti āmasitvā dīyamānepi ‘‘ucchiṭṭhakaṃ dentī’’ti kujjhanti, kuddhā jīvitāpi voropenti, sāsanassapi antarāyaṃ karonti. Rajjaṃ patthayamānassa vicarato coranāgassa vatthu cettha kathetabbaṃ. Evaṃ anāmaṭṭhapiṇḍapāte paṭipajjitabbaṃ.
படிஸந்தா²ரோ ச நாமாயங் கஸ்ஸ காதப்³போ³, கஸ்ஸ ந காதப்³போ³? படிஸந்தா²ரோ நாம விஹாரங் ஸம்பத்தஸ்ஸ யஸ்ஸ கஸ்ஸசி ஆக³ந்துகஸ்ஸ வா த³லித்³த³ஸ்ஸ வா சோரஸ்ஸ வா இஸ்ஸரஸ்ஸ வா காதப்³போ³யேவ. கத²ங்? ஆக³ந்துகங் தாவ கீ²ணபரிப்³ப³யங் விஹாரங் ஸம்பத்தங் தி³ஸ்வா ‘‘பானீயங் பிவா’’தி தா³தப்³ப³ங், பாத³மக்க²னதேலங் தா³தப்³ப³ங், காலே ஆக³தஸ்ஸ யாகு³ப⁴த்தங், விகாலே ஆக³தஸ்ஸ ஸசே தண்டு³லா அத்தி², தண்டு³லா தா³தப்³பா³. அவேலாய ஸம்பத்தோபி ‘‘க³ச்சா²ஹீ’’தி ந வத்தப்³போ³, ஸயனட்டா²னங் தா³தப்³ப³ங். ஸப்³ப³ங் அபச்சாஸீயந்தேனேவ காதப்³ப³ங். ‘‘மனுஸ்ஸா நாம சதுபச்சயதா³யகா, ஏவங் ஸங்க³ஹே கரியமானே புனப்புனங் பஸீதி³த்வா உபகாரங் கரிஸ்ஸந்தீ’’தி சித்தங் ந உப்பாதே³தப்³ப³ங். சோரானங் பன ஸங்கி⁴கம்பி தா³தப்³ப³ங். படிஸந்தா²ரானிஸங்ஸதீ³பனத்த²ஞ்ச சோரனாக³வத்து², பா⁴தரா ஸத்³தி⁴ங் ஜம்பு³தீ³பக³தஸ்ஸ மஹானாக³ரஞ்ஞோ வத்து², பிதுராஜஸ்ஸ ரஜ்ஜே சதுன்னங் அமச்சானங் வத்து², அப⁴யசோரவத்தூ²தி ஏவமாதீ³னி ப³ஹூனி வத்தூ²னி மஹாஅட்ட²கதா²யங் வித்தா²ரதோ வுத்தானி.
Paṭisanthāro ca nāmāyaṃ kassa kātabbo, kassa na kātabbo? Paṭisanthāro nāma vihāraṃ sampattassa yassa kassaci āgantukassa vā daliddassa vā corassa vā issarassa vā kātabboyeva. Kathaṃ? Āgantukaṃ tāva khīṇaparibbayaṃ vihāraṃ sampattaṃ disvā ‘‘pānīyaṃ pivā’’ti dātabbaṃ, pādamakkhanatelaṃ dātabbaṃ, kāle āgatassa yāgubhattaṃ, vikāle āgatassa sace taṇḍulā atthi, taṇḍulā dātabbā. Avelāya sampattopi ‘‘gacchāhī’’ti na vattabbo, sayanaṭṭhānaṃ dātabbaṃ. Sabbaṃ apaccāsīyanteneva kātabbaṃ. ‘‘Manussā nāma catupaccayadāyakā, evaṃ saṅgahe kariyamāne punappunaṃ pasīditvā upakāraṃ karissantī’’ti cittaṃ na uppādetabbaṃ. Corānaṃ pana saṅghikampi dātabbaṃ. Paṭisanthārānisaṃsadīpanatthañca coranāgavatthu, bhātarā saddhiṃ jambudīpagatassa mahānāgarañño vatthu, piturājassa rajje catunnaṃ amaccānaṃ vatthu, abhayacoravatthūti evamādīni bahūni vatthūni mahāaṭṭhakathāyaṃ vitthārato vuttāni.
தத்ராயங் ஏகவத்து²தீ³பனா – ஸீஹளதீ³பே கிர அப⁴யோ நாம சோரோ பஞ்சஸதபரிவாரோ ஏகஸ்மிங் டா²னே க²ந்தா⁴வாரங் ப³ந்தி⁴த்வா ஸமந்தா தியோஜனங் உப்³பா³ஸெத்வா வஸதி. அனுராத⁴புரவாஸினோ கத³ம்ப³னதி³ங் ந உத்தரந்தி, சேதியகி³ரிமக்³கே³ ஜனஸஞ்சாரோ உபச்சி²ன்னோ. அதே²கதி³வஸங் சோரோ ‘‘சேதியகி³ரிங் விலும்பிஸ்ஸாமீ’’தி அக³மாஸி. ஆராமிகா தி³ஸ்வா தீ³க⁴பா⁴ணகஅப⁴யத்தே²ரஸ்ஸ ஆரோசேஸுங். தே²ரோ ‘‘ஸப்பிபா²ணிதாதீ³னி அத்தீ²’’தி புச்சி². ‘‘அத்தி², ப⁴ந்தே’’தி. ‘‘சோரானங் தே³த²’’. ‘‘தண்டு³லா அத்தீ²’’தி. ‘‘அத்தி², ப⁴ந்தே, ஸங்க⁴ஸ்ஸத்தா²ய ஆஹடா தண்டு³லா ச பக்கஸாகஞ்ச கோ³ரஸோ சா’’தி. ‘‘ப⁴த்தங் ஸம்பாதெ³த்வா சோரானங் தே³தா²’’தி. ஆராமிகா ததா² கரிங்ஸு. சோரா ப⁴த்தங் பு⁴ஞ்ஜித்வா ‘‘கேனாயங் படிஸந்தா²ரோ கதோ’’தி புச்சி²ங்ஸு. ‘‘அம்ஹாகங் அய்யேன அப⁴யத்தே²ரேனா’’தி. சோரா தே²ரஸ்ஸ ஸந்திகங் க³ந்த்வா வந்தி³த்வா ஆஹங்ஸு ‘‘மயங் ‘ஸங்க⁴ஸ்ஸ ச சேதியஸ்ஸ ச ஸந்தகங் அச்சி²ந்தி³த்வா க³ஹெஸ்ஸாமா’தி ஆக³தா, தும்ஹாகங் பன இமினா படிஸந்தா²ரேன மயங் பஸன்னா, அஜ்ஜ பட்டா²ய விஹாரே த⁴ம்மிகாரக்கா² அம்ஹாகங் ஆயத்தா ஹோது, நாக³ரா ஆக³ந்த்வா தா³னங் தெ³ந்து, சேதியங் வந்த³ந்தூ’’தி. ததோ பட்டா²ய ச நாக³ரே தா³னங் தா³துங் ஆக³ச்ச²ந்தே நதீ³தீரேயேவ பச்சுக்³க³ந்த்வா ரக்க²ந்தா விஹாரங் நெந்தி, விஹாரேபி தா³னங் தெ³ந்தானங் ரக்க²ங் கத்வா திட்ட²ந்தி. தேபி பி⁴க்கூ²னங் பு⁴த்தாவஸேஸங் சோரானங் தெ³ந்தி. க³மனகாலேபி தே சோரா நதீ³தீரங் பாபெத்வா நிவத்தந்தி.
Tatrāyaṃ ekavatthudīpanā – sīhaḷadīpe kira abhayo nāma coro pañcasataparivāro ekasmiṃ ṭhāne khandhāvāraṃ bandhitvā samantā tiyojanaṃ ubbāsetvā vasati. Anurādhapuravāsino kadambanadiṃ na uttaranti, cetiyagirimagge janasañcāro upacchinno. Athekadivasaṃ coro ‘‘cetiyagiriṃ vilumpissāmī’’ti agamāsi. Ārāmikā disvā dīghabhāṇakaabhayattherassa ārocesuṃ. Thero ‘‘sappiphāṇitādīni atthī’’ti pucchi. ‘‘Atthi, bhante’’ti. ‘‘Corānaṃ detha’’. ‘‘Taṇḍulā atthī’’ti. ‘‘Atthi, bhante, saṅghassatthāya āhaṭā taṇḍulā ca pakkasākañca goraso cā’’ti. ‘‘Bhattaṃ sampādetvā corānaṃ dethā’’ti. Ārāmikā tathā kariṃsu. Corā bhattaṃ bhuñjitvā ‘‘kenāyaṃ paṭisanthāro kato’’ti pucchiṃsu. ‘‘Amhākaṃ ayyena abhayattherenā’’ti. Corā therassa santikaṃ gantvā vanditvā āhaṃsu ‘‘mayaṃ ‘saṅghassa ca cetiyassa ca santakaṃ acchinditvā gahessāmā’ti āgatā, tumhākaṃ pana iminā paṭisanthārena mayaṃ pasannā, ajja paṭṭhāya vihāre dhammikārakkhā amhākaṃ āyattā hotu, nāgarā āgantvā dānaṃ dentu, cetiyaṃ vandantū’’ti. Tato paṭṭhāya ca nāgare dānaṃ dātuṃ āgacchante nadītīreyeva paccuggantvā rakkhantā vihāraṃ nenti, vihārepi dānaṃ dentānaṃ rakkhaṃ katvā tiṭṭhanti. Tepi bhikkhūnaṃ bhuttāvasesaṃ corānaṃ denti. Gamanakālepi te corā nadītīraṃ pāpetvā nivattanti.
அதே²கதி³வஸங் பி⁴க்கு²ஸங்கே⁴ கீ²யனககதா² உப்பன்னா ‘‘தே²ரோ இஸ்ஸரவதாய ஸங்க⁴ஸந்தகங் சோரானங் அதா³ஸீ’’தி. தே²ரோ ஸன்னிபாதங் காராபெத்வா ஆஹ ‘‘சோரா ‘ஸங்க⁴ஸ்ஸ பகதிவட்டஞ்ச சேதியஸந்தகஞ்ச அச்சி²ந்தி³த்வா க³ண்ஹிஸ்ஸாமா’தி ஆக³மிங்ஸு, அத² தேஸங் மயா ‘ஏதங் ந ஹரிஸ்ஸந்தீ’தி எத்தகோ நாம படிஸந்தா²ரோ கதோ, தங் ஸப்³ப³ம்பி ஏகதோ ஸம்பிண்டெ³த்வா அக்³கா⁴பேத², தேன காரணேன அவிலுத்தங் ப⁴ண்ட³ங் ஏகதோ ஸம்பிண்டெ³த்வா அக்³கா⁴பேதா²’’தி. ததோ ஸப்³ப³ம்பி தே²ரேன தி³ன்னகங் சேதியக⁴ரே ஏகங் வரபொத்த²கசித்தத்த²ரணங் ந அக்³க⁴தி. ததோ ஆஹங்ஸு ‘‘தே²ரேன கதோ படிஸந்தா²ரோ ஸுகதோ, சோதே³துங் வா ஸாரேதுங் வா ந லப்³ப⁴தி, கீ³வா வா அவஹாரோ வா நத்தீ²’’தி. ஏவங் மஹானிஸங்ஸோ படிஸந்தா²ரோதி ஸல்லக்கெ²த்வா கத்தப்³போ³ பண்டி³தேன பி⁴க்கு²னாதி.
Athekadivasaṃ bhikkhusaṅghe khīyanakakathā uppannā ‘‘thero issaravatāya saṅghasantakaṃ corānaṃ adāsī’’ti. Thero sannipātaṃ kārāpetvā āha ‘‘corā ‘saṅghassa pakativaṭṭañca cetiyasantakañca acchinditvā gaṇhissāmā’ti āgamiṃsu, atha tesaṃ mayā ‘etaṃ na harissantī’ti ettako nāma paṭisanthāro kato, taṃ sabbampi ekato sampiṇḍetvā agghāpetha, tena kāraṇena aviluttaṃ bhaṇḍaṃ ekato sampiṇḍetvā agghāpethā’’ti. Tato sabbampi therena dinnakaṃ cetiyaghare ekaṃ varapotthakacittattharaṇaṃ na agghati. Tato āhaṃsu ‘‘therena kato paṭisanthāro sukato, codetuṃ vā sāretuṃ vā na labbhati, gīvā vā avahāro vā natthī’’ti. Evaṃ mahānisaṃso paṭisanthāroti sallakkhetvā kattabbo paṇḍitena bhikkhunāti.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
பே⁴ஸஜ்ஜாதி³கரணவினிச்ச²யகதா² ஸமத்தா.
Bhesajjādikaraṇavinicchayakathā samattā.
