| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
3. бхзсаж̇ж̇аад̣̇игаран̣авинижчаяагат̇аа
3. Bhesajjādikaraṇavinicchayakathā
15. бхзсаж̇ж̇агаран̣абарид̇д̇абадисант̇аарзсу бана бхзсаж̇ж̇агаран̣з д̇аава аяам̣ винижчаяо (баараа. адта. 2.185-7) – ааг̇ад̇ааг̇ад̇асса бараж̇анасса бхзсаж̇ж̇ам̣ на гаад̇аб̣б̣ам̣, гаронд̇о д̣̇уггадам̣ аабаж̇ж̇ад̇и. бан̃жаннам̣ бана сахад̇хаммигаанам̣ гаад̇аб̣б̣ам̣ бхигкусса бхигкунияаа сигкамаанааяа сааман̣зрасса сааман̣зрияаад̇и. самасийласад̣̇д̇хаабан̃н̃аанан̃хи зд̇зсам̣ д̇ийсу сигкаасу яуд̇д̇аанам̣ бхзсаж̇ж̇ам̣ агаад̇ум̣ на лаб̣бхад̇и. гаронд̇зна жа сажз д̇зсам̣ ад̇т̇и, д̇зсам̣ санд̇агам̣ г̇ахзд̇ваа яож̇зд̇ваа д̣̇аад̇аб̣б̣ам̣, сажз над̇т̇и, ад̇д̇ано санд̇агам̣ гаад̇аб̣б̣ам̣. сажз ад̇д̇аноби над̇т̇и, бхигкаажааравад̇д̇зна ваа н̃аад̇агабаваарид̇адтаанад̇о ваа бариязсид̇аб̣б̣ам̣, алабханд̇зна г̇илаанасса ад̇т̇ааяа агад̇авин̃н̃ад̇д̇ияааби аахарид̇ваа гаад̇аб̣б̣ам̣.
15.Bhesajjakaraṇaparittapaṭisanthāresu pana bhesajjakaraṇe tāva ayaṃ vinicchayo (pārā. aṭṭha. 2.185-7) – āgatāgatassa parajanassa bhesajjaṃ na kātabbaṃ, karonto dukkaṭaṃ āpajjati. Pañcannaṃ pana sahadhammikānaṃ kātabbaṃ bhikkhussa bhikkhuniyā sikkhamānāya sāmaṇerassa sāmaṇeriyāti. Samasīlasaddhāpaññānañhi etesaṃ tīsu sikkhāsu yuttānaṃ bhesajjaṃ akātuṃ na labbhati. Karontena ca sace tesaṃ atthi, tesaṃ santakaṃ gahetvā yojetvā dātabbaṃ, sace natthi, attano santakaṃ kātabbaṃ. Sace attanopi natthi, bhikkhācāravattena vā ñātakapavāritaṭṭhānato vā pariyesitabbaṃ, alabhantena gilānassa atthāya akataviññattiyāpi āharitvā kātabbaṃ.
16. абарзсамби бан̃жаннам̣ гаад̇ум̣ ваддад̇и маад̇у бид̇у д̇ад̣̇убадтаагаанам̣ ад̇д̇ано взяяааважжагарасса бан̣д̣убалаасасса жаад̇и. бан̣д̣убалаасо наама яо баб̣б̣аж̇ж̇аабзгко яаава бад̇д̇ажийварам̣ бадияаад̣̇ияад̇и, д̇аава вихаарз васад̇и. д̇зсу сажз маад̇аабид̇аро иссараа хонд̇и на бажжаасийсанд̇и, агаад̇ум̣ ваддад̇и. сажз бана раж̇ж̇зби тид̇аа бажжаасийсанд̇и, агаад̇ум̣ на ваддад̇и. бхзсаж̇ж̇ам̣ бажжаасийсанд̇аанам̣ бхзсаж̇ж̇ам̣ д̣̇аад̇аб̣б̣ам̣, яож̇зд̇ум̣ аж̇аананд̇аанам̣ яож̇зд̇ваа д̣̇аад̇аб̣б̣ам̣. саб̣б̣зсам̣ ад̇т̇ааяа сахад̇хаммигзсу вуд̇д̇анаязнзва бариязсид̇аб̣б̣ам̣. сажз бана маад̇арам̣ вихаарам̣ аанзд̇ваа ж̇аг̇г̇ад̇и, саб̣б̣ам̣ баригаммам̣ анаамасанд̇зна гаад̇аб̣б̣ам̣, каад̣̇анийяабхож̇анийяам̣ сахад̇т̇аа д̣̇аад̇аб̣б̣ам̣. бид̇аа бана яат̇аа сааман̣зро, звам̣ сахад̇т̇зна нхаабанасамб̣ааханаад̣̇ийни гад̇ваа убадтаад̇аб̣б̣о. яз жа маад̇аабид̇аро убадтаханд̇и бадиж̇аг̇г̇анд̇и, д̇зсамби звамзва гаад̇аб̣б̣ам̣. взяяааважжагаро наама яо взд̇анам̣ г̇ахзд̇ваа аран̃н̃з д̣̇аарууни ваа чинд̣̇ад̇и, ан̃н̃ам̣ ваа гин̃жи гаммам̣ гарод̇и, д̇асса рог̇з уббаннз яаава н̃аад̇агаа на бассанд̇и, д̇аава бхзсаж̇ж̇ам̣ гаад̇аб̣б̣ам̣. яо бана бхигкуниссид̇агова худ̇ваа саб̣б̣агаммаани гарод̇и, д̇асса бхзсаж̇ж̇ам̣ гаад̇аб̣б̣амзва. бан̣д̣убалаасзби сааман̣зрз вияа бадибаж̇ж̇ид̇аб̣б̣ам̣.
16. Aparesampi pañcannaṃ kātuṃ vaṭṭati mātu pitu tadupaṭṭhākānaṃ attano veyyāvaccakarassa paṇḍupalāsassa cāti. Paṇḍupalāso nāma yo pabbajjāpekkho yāva pattacīvaraṃ paṭiyādiyati, tāva vihāre vasati. Tesu sace mātāpitaro issarā honti na paccāsīsanti, akātuṃ vaṭṭati. Sace pana rajjepi ṭhitā paccāsīsanti, akātuṃ na vaṭṭati. Bhesajjaṃ paccāsīsantānaṃ bhesajjaṃ dātabbaṃ, yojetuṃ ajānantānaṃ yojetvā dātabbaṃ. Sabbesaṃ atthāya sahadhammikesu vuttanayeneva pariyesitabbaṃ. Sace pana mātaraṃ vihāraṃ ānetvā jaggati, sabbaṃ parikammaṃ anāmasantena kātabbaṃ, khādanīyabhojanīyaṃ sahatthā dātabbaṃ. Pitā pana yathā sāmaṇero, evaṃ sahatthena nhāpanasambāhanādīni katvā upaṭṭhātabbo. Ye ca mātāpitaro upaṭṭhahanti paṭijagganti, tesampi evameva kātabbaṃ. Veyyāvaccakaro nāma yo vetanaṃ gahetvā araññe dārūni vā chindati, aññaṃ vā kiñci kammaṃ karoti, tassa roge uppanne yāva ñātakā na passanti, tāva bhesajjaṃ kātabbaṃ. Yo pana bhikkhunissitakova hutvā sabbakammāni karoti, tassa bhesajjaṃ kātabbameva. Paṇḍupalāsepi sāmaṇere viya paṭipajjitabbaṃ.
17. абарзсамби д̣̇асаннам̣ гаад̇ум̣ ваддад̇и ж̇здтабхаад̇у ганидтабхаад̇у ж̇здтабхаг̇инияаа ганидтабхаг̇инияаа жуул̣амаад̇уяаа махаамаад̇уяаа жуул̣абид̇уно махаабид̇уно бид̇ужчааяа маад̇улассаад̇и. д̇зсам̣ бана саб̣б̣зсамби гаронд̇зна д̇зсам̣язва санд̇агам̣ бхзсаж̇ж̇ам̣ г̇ахзд̇ваа гзвалам̣ яож̇зд̇ваа д̣̇аад̇аб̣б̣ам̣. сажз бана наббахонд̇и яаажанд̇и жа ‘‘д̣̇зт̇а но, бханд̇з, д̇умхаагам̣ бадид̣̇ассаамаа’’д̇и, д̇аавагаалигам̣ д̣̇аад̇аб̣б̣ам̣. сажзби на яаажанд̇и, ‘‘амхаагам̣ бхзсаж̇ж̇ам̣ ад̇т̇и, д̇аавагаалигам̣ г̇ан̣хат̇аа’’д̇и вад̇ваа ваа ‘‘яад̣̇аа д̇зсам̣ бхависсад̇и, д̇ад̣̇аа д̣̇ассанд̇ий’’д̇и аабхог̇ам̣ ваа гад̇ваа д̣̇аад̇аб̣б̣ам̣. сажз бадид̣̇знд̇и, г̇ахзд̇аб̣б̣ам̣. но жз д̣̇знд̇и, на жод̣̇зд̇аб̣б̣аа. зд̇з д̣̇аса н̃аад̇агз табзд̇ваа ан̃н̃зсам̣ на гаад̇аб̣б̣ам̣.
17. Aparesampi dasannaṃ kātuṃ vaṭṭati jeṭṭhabhātu kaniṭṭhabhātu jeṭṭhabhaginiyā kaniṭṭhabhaginiyā cūḷamātuyā mahāmātuyā cūḷapituno mahāpituno pitucchāya mātulassāti. Tesaṃ pana sabbesampi karontena tesaṃyeva santakaṃ bhesajjaṃ gahetvā kevalaṃ yojetvā dātabbaṃ. Sace pana nappahonti yācanti ca ‘‘detha no, bhante, tumhākaṃ paṭidassāmā’’ti, tāvakālikaṃ dātabbaṃ. Sacepi na yācanti, ‘‘amhākaṃ bhesajjaṃ atthi, tāvakālikaṃ gaṇhathā’’ti vatvā vā ‘‘yadā tesaṃ bhavissati, tadā dassantī’’ti ābhogaṃ vā katvā dātabbaṃ. Sace paṭidenti, gahetabbaṃ. No ce denti, na codetabbā. Ete dasa ñātake ṭhapetvā aññesaṃ na kātabbaṃ.
зд̇зсам̣ буд̇д̇абарамбарааяа бана яаава сад̇д̇амаа гулабариваддаа, д̇аава жад̇д̇ааро бажжаяз аахараабзнд̇асса агад̇авин̃н̃ад̇д̇и ваа бхзсаж̇ж̇ам̣ гаронд̇асса взж̇ж̇агаммам̣ ваа гулад̣̇уусагаабад̇д̇и ваа на ход̇и. сажз бхаад̇у ж̇ааяаа, бхаг̇инияаа саамиго ваа г̇илаано ход̇и, н̃аад̇агаа жз, д̇зсамби ваддад̇и. ан̃н̃аад̇агаа жз, бхаад̇у жа бхаг̇инияаа жа гад̇ваа д̣̇аад̇аб̣б̣ам̣ ‘‘д̇умхаагам̣ ж̇аг̇г̇анадтаанз д̣̇зт̇аа’’д̇и. ат̇а ваа д̇зсам̣ буд̇д̇аанам̣ гад̇ваа д̣̇аад̇аб̣б̣ам̣ ‘‘д̇умхаагам̣ маад̇аабид̇уунам̣ д̣̇зт̇аа’’д̇и. зд̇знубааязна саб̣б̣абад̣̇зсу винижчаяо взд̣̇ид̇аб̣б̣о.
Etesaṃ puttaparamparāya pana yāva sattamā kulaparivaṭṭā, tāva cattāro paccaye āharāpentassa akataviññatti vā bhesajjaṃ karontassa vejjakammaṃ vā kuladūsakāpatti vā na hoti. Sace bhātu jāyā, bhaginiyā sāmiko vā gilāno hoti, ñātakā ce, tesampi vaṭṭati. Aññātakā ce, bhātu ca bhaginiyā ca katvā dātabbaṃ ‘‘tumhākaṃ jagganaṭṭhāne dethā’’ti. Atha vā tesaṃ puttānaṃ katvā dātabbaṃ ‘‘tumhākaṃ mātāpitūnaṃ dethā’’ti. Etenupāyena sabbapadesu vinicchayo veditabbo.
д̇зсам̣ ад̇т̇ааяа жа сааман̣зрзхи аран̃н̃ад̇о бхзсаж̇ж̇ам̣ аахараабзнд̇зна н̃аад̇исааман̣зрзхи ваа аахараабзд̇аб̣б̣ам̣, ан̃н̃аад̇агзхи ад̇д̇ано ад̇т̇ааяа ваа аахараабзд̇ваа д̣̇аад̇аб̣б̣ам̣. д̇зхиби ‘‘убаж̇жхааяасса аахараамаа’’д̇и вад̇д̇асийсзна аахарид̇аб̣б̣ам̣. убаж̇жхааяасса маад̇аабид̇аро г̇илаанаа вихаарам̣ ааг̇ажчанд̇и, убаж̇жхааяо жа д̣̇исаабагганд̇о ход̇и, сад̣̇д̇хивихааригзна убаж̇жхааяасса санд̇агам̣ бхзсаж̇ж̇ам̣ д̣̇аад̇аб̣б̣ам̣. но жз ад̇т̇и, ад̇д̇ано бхзсаж̇ж̇ам̣ убаж̇жхааяасса барижжаж̇ид̇ваа д̣̇аад̇аб̣б̣ам̣. ад̇д̇аноби асанд̇з вуд̇д̇анаязнзва бариязсид̇ваа убаж̇жхааяасса санд̇агам̣ гад̇ваа д̣̇аад̇аб̣б̣ам̣. убаж̇жхааязнаби сад̣̇д̇хивихааригасса маад̇аабид̇уусу звамзва бадибаж̇ж̇ид̇аб̣б̣ам̣. зсзва наяо аажарияанд̇зваасигзсуби. ан̃н̃оби яо ааг̇анд̇уго ваа жоро ваа яуд̣̇д̇хабарааж̇ид̇о иссаро ваа н̃аад̇агзхи барижжад̇д̇о габан̣о ваа г̇амияамануссо ваа г̇илаано худ̇ваа вихаарам̣ бависад̇и, саб̣б̣зсам̣ абажжаасийсанд̇зна бхзсаж̇ж̇ам̣ гаад̇аб̣б̣ам̣.
Tesaṃ atthāya ca sāmaṇerehi araññato bhesajjaṃ āharāpentena ñātisāmaṇerehi vā āharāpetabbaṃ, aññātakehi attano atthāya vā āharāpetvā dātabbaṃ. Tehipi ‘‘upajjhāyassa āharāmā’’ti vattasīsena āharitabbaṃ. Upajjhāyassa mātāpitaro gilānā vihāraṃ āgacchanti, upajjhāyo ca disāpakkanto hoti, saddhivihārikena upajjhāyassa santakaṃ bhesajjaṃ dātabbaṃ. No ce atthi, attano bhesajjaṃ upajjhāyassa pariccajitvā dātabbaṃ. Attanopi asante vuttanayeneva pariyesitvā upajjhāyassa santakaṃ katvā dātabbaṃ. Upajjhāyenapi saddhivihārikassa mātāpitūsu evameva paṭipajjitabbaṃ. Eseva nayo ācariyantevāsikesupi. Aññopi yo āgantuko vā coro vā yuddhaparājito issaro vā ñātakehi pariccatto kapaṇo vā gamiyamanusso vā gilāno hutvā vihāraṃ pavisati, sabbesaṃ apaccāsīsantena bhesajjaṃ kātabbaṃ.
18. сад̣̇д̇хам̣ гулам̣ ход̇и жад̇уухи бажжаязхи убадтааяагам̣ бхигкусан̇гхасса маад̇аабид̇удтаанияам̣, д̇ад̇ра жз гожи г̇илаано ход̇и, д̇ассад̇т̇ааяа виссаасзна ‘‘бхзсаж̇ж̇ам̣ гад̇ваа бханд̇з д̣̇зт̇аа’’д̇и вад̣̇анд̇и, нзва д̣̇аад̇аб̣б̣ам̣ на гаад̇аб̣б̣ам̣. ат̇а бана габбияам̣ н̃ад̇ваа звам̣ бужчанд̇и ‘‘бханд̇з, асугасса наама рог̇асса гим̣ бхзсаж̇ж̇ам̣ гаронд̇ий’’д̇и, ‘‘ид̣̇ан̃жид̣̇ан̃жа г̇ахзд̇ваа гаронд̇ий’’д̇и вад̇д̇ум̣ ваддад̇и. ‘‘бханд̇з, маяхам̣ маад̇аа г̇илаанаа, бхзсаж̇ж̇ам̣ д̇аава аажигкат̇аа’’д̇и звам̣ бужчид̇з бана на аажигкид̇аб̣б̣ам̣, ан̃н̃аман̃н̃ам̣ бана гат̇аа гаад̇аб̣б̣аа ‘‘аавусо, асугасса наама бхигкуно имасмим̣ рог̇з гим̣ бхзсаж̇ж̇ам̣ гарим̣суу’’д̇и. ид̣̇ан̃жид̣̇ан̃жа бхзсаж̇ж̇ам̣ бханд̇зд̇и. д̇ам̣ суд̇ваа ид̇аро маад̇у бхзсаж̇ж̇ам̣ гарод̇и, ваддад̇и. махаабад̣̇умад̇т̇зро гира васабхаран̃н̃оби д̣̇звияаа рог̇з уббаннз згааяа ид̇т̇ияаа ааг̇анд̇ваа бужчид̇о ‘‘на ж̇аанаамий’’д̇и авад̇ваа звамзва бхигкуухи сад̣̇д̇хим̣ самуллабзси. д̇ам̣ суд̇ваа д̇ассаа бхзсаж̇ж̇амагам̣су. вуубасанд̇з жа рог̇з д̇ижийварзна д̇ийхи жа гахаабан̣асад̇зхи сад̣̇д̇хим̣ бхзсаж̇ж̇ажан̇годагам̣ буурзд̇ваа аахарид̇ваа т̇зрасса баад̣̇амуулз табзд̇ваа ‘‘бханд̇з, бубпабууж̇ам̣ гарот̇аа’’д̇и аахам̣су. т̇зро ‘‘аажарияабхааг̇о наама аяа’’нд̇и габбияавасзна г̇аахаабзд̇ваа бубпабууж̇амагааси. звам̣ д̇аава бхзсаж̇ж̇з бадибаж̇ж̇ид̇аб̣б̣ам̣.
18. Saddhaṃ kulaṃ hoti catūhi paccayehi upaṭṭhāyakaṃ bhikkhusaṅghassa mātāpituṭṭhāniyaṃ, tatra ce koci gilāno hoti, tassatthāya vissāsena ‘‘bhesajjaṃ katvā bhante dethā’’ti vadanti, neva dātabbaṃ na kātabbaṃ. Atha pana kappiyaṃ ñatvā evaṃ pucchanti ‘‘bhante, asukassa nāma rogassa kiṃ bhesajjaṃ karontī’’ti, ‘‘idañcidañca gahetvā karontī’’ti vattuṃ vaṭṭati. ‘‘Bhante, mayhaṃ mātā gilānā, bhesajjaṃ tāva ācikkhathā’’ti evaṃ pucchite pana na ācikkhitabbaṃ, aññamaññaṃ pana kathā kātabbā ‘‘āvuso, asukassa nāma bhikkhuno imasmiṃ roge kiṃ bhesajjaṃ kariṃsū’’ti. Idañcidañca bhesajjaṃ bhanteti. Taṃ sutvā itaro mātu bhesajjaṃ karoti, vaṭṭati. Mahāpadumatthero kira vasabharaññopi deviyā roge uppanne ekāya itthiyā āgantvā pucchito ‘‘na jānāmī’’ti avatvā evameva bhikkhūhi saddhiṃ samullapesi. Taṃ sutvā tassā bhesajjamakaṃsu. Vūpasante ca roge ticīvarena tīhi ca kahāpaṇasatehi saddhiṃ bhesajjacaṅkoṭakaṃ pūretvā āharitvā therassa pādamūle ṭhapetvā ‘‘bhante, pupphapūjaṃ karothā’’ti āhaṃsu. Thero ‘‘ācariyabhāgo nāma aya’’nti kappiyavasena gāhāpetvā pupphapūjamakāsi. Evaṃ tāva bhesajje paṭipajjitabbaṃ.
19. барид̇д̇з бана ‘‘г̇илаанасса барид̇д̇ам̣ гарот̇а, бханд̇з’’д̇и вуд̇д̇з на гаад̇аб̣б̣ам̣, ‘‘барид̇д̇ам̣ бхан̣ат̇аа’’д̇и вуд̇д̇з бана бхан̣ид̇аб̣б̣ам̣. сажзбисса звам̣ ход̇и ‘‘мануссаа наама на ж̇аананд̇и, агарияамаанз виббадисаарино бхависсанд̇ий’’д̇и, гаад̇аб̣б̣ам̣. ‘‘барид̇д̇од̣̇агам̣ барид̇д̇асуд̇д̇ам̣ гад̇ваа д̣̇зт̇аа’’д̇и вуд̇д̇з бана д̇зсам̣язва уд̣̇агам̣ хад̇т̇зна жаалзд̇ваа суд̇д̇ам̣ баримаж̇ж̇ид̇ваа д̣̇аад̇аб̣б̣ам̣. сажз вихаарад̇о уд̣̇агам̣ ад̇д̇ано санд̇агам̣ ваа суд̇д̇ам̣ д̣̇зд̇и, д̣̇уггадам̣. мануссаа уд̣̇аган̃жа суд̇д̇ан̃жа г̇ахзд̇ваа нисийд̣̇ид̇ваа ‘‘барид̇д̇ам̣ бхан̣ат̇аа’’д̇и вад̣̇анд̇и, гаад̇аб̣б̣ам̣. но жз ж̇аананд̇и, аажигкид̇аб̣б̣ам̣. бхигкуунам̣ нисиннаанам̣ баад̣̇зсу уд̣̇агам̣ аагирид̇ваа суд̇д̇ан̃жа табзд̇ваа г̇ажчанд̇и ‘‘барид̇д̇ам̣ гарот̇а, барид̇д̇ам̣ бхан̣ат̇аа’’д̇и, на баад̣̇аа абанзд̇аб̣б̣аа. мануссаа хи виббадисаарино хонд̇и. анд̇ог̇аамзби г̇илаанасса ад̇т̇ааяа вихаарам̣ бзсзнд̇и ‘‘барид̇д̇ам̣ бхан̣анд̇уу’’д̇и, бхан̣ид̇аб̣б̣ам̣. анд̇ог̇аамз рааж̇аг̇зхаад̣̇ийсу рог̇з ваа убад̣̇д̣̇авз ваа уббаннз баггосаабзд̇ваа бхан̣аабзнд̇и, аадаанаадияасуд̇д̇аад̣̇ийни бхан̣ид̇аб̣б̣аани. ‘‘ааг̇анд̇ваа г̇илаанасса сигкаабад̣̇аани д̣̇знд̇у, д̇хаммам̣ гат̇знд̇у, рааж̇анд̇збурз ваа амажжаг̇зхз ваа ааг̇анд̇ваа сигкаабад̣̇аани д̣̇знд̇у, д̇хаммам̣ гат̇знд̇уу’’д̇и бзсид̇зби г̇анд̇ваа сигкаабад̣̇аани д̣̇аад̇аб̣б̣аани, д̇хаммо гат̇зд̇аб̣б̣о. ‘‘мад̇аанам̣ бариваарад̇т̇ам̣ ааг̇ажчанд̇уу’’д̇и баггосанд̇и, на г̇анд̇аб̣б̣ам̣. ‘‘сийват̇игад̣̇ассанз асубхад̣̇ассанз жа маран̣ассад̇им̣ бадилабхиссаамаа’’д̇и гаммадтаанасийсзна г̇анд̇ум̣ ваддад̇и. ‘‘бахаарзд̣̇иннз мад̇зби амаран̣аад̇хиббааяасса анаабад̇д̇и вуд̇д̇аа’’д̇и на зд̇д̇агзнзва амануссаг̇ахид̇асса бахааро д̣̇аад̇аб̣б̣о , д̇аалабан̣н̣ам̣ бана барид̇д̇асуд̇д̇ам̣ ваа хад̇т̇з ваа баад̣̇з ваа б̣анд̇хид̇аб̣б̣ам̣, рад̇анасуд̇д̇аад̣̇ийни барид̇д̇аани бхан̣ид̇аб̣б̣аани, ‘‘маа сийлаванд̇ам̣ бхигкум̣ вихзтзхий’’д̇и д̇хаммагат̇аа гаад̇аб̣б̣аа, аадаанаадияабарид̇д̇ам̣ ваа бхан̣ид̇аб̣б̣ам̣.
19.Paritte pana ‘‘gilānassa parittaṃ karotha, bhante’’ti vutte na kātabbaṃ, ‘‘parittaṃ bhaṇathā’’ti vutte pana bhaṇitabbaṃ. Sacepissa evaṃ hoti ‘‘manussā nāma na jānanti, akariyamāne vippaṭisārino bhavissantī’’ti, kātabbaṃ. ‘‘Parittodakaṃ parittasuttaṃ katvā dethā’’ti vutte pana tesaṃyeva udakaṃ hatthena cāletvā suttaṃ parimajjitvā dātabbaṃ. Sace vihārato udakaṃ attano santakaṃ vā suttaṃ deti, dukkaṭaṃ. Manussā udakañca suttañca gahetvā nisīditvā ‘‘parittaṃ bhaṇathā’’ti vadanti, kātabbaṃ. No ce jānanti, ācikkhitabbaṃ. Bhikkhūnaṃ nisinnānaṃ pādesu udakaṃ ākiritvā suttañca ṭhapetvā gacchanti ‘‘parittaṃ karotha, parittaṃ bhaṇathā’’ti, na pādā apanetabbā. Manussā hi vippaṭisārino honti. Antogāmepi gilānassa atthāya vihāraṃ pesenti ‘‘parittaṃ bhaṇantū’’ti, bhaṇitabbaṃ. Antogāme rājagehādīsu roge vā upaddave vā uppanne pakkosāpetvā bhaṇāpenti, āṭānāṭiyasuttādīni bhaṇitabbāni. ‘‘Āgantvā gilānassa sikkhāpadāni dentu, dhammaṃ kathentu, rājantepure vā amaccagehe vā āgantvā sikkhāpadāni dentu, dhammaṃ kathentū’’ti pesitepi gantvā sikkhāpadāni dātabbāni, dhammo kathetabbo. ‘‘Matānaṃ parivāratthaṃ āgacchantū’’ti pakkosanti, na gantabbaṃ. ‘‘Sīvathikadassane asubhadassane ca maraṇassatiṃ paṭilabhissāmā’’ti kammaṭṭhānasīsena gantuṃ vaṭṭati. ‘‘Pahāredinne matepi amaraṇādhippāyassa anāpatti vuttā’’ti na ettakeneva amanussagahitassa pahāro dātabbo , tālapaṇṇaṃ pana parittasuttaṃ vā hatthe vā pāde vā bandhitabbaṃ, ratanasuttādīni parittāni bhaṇitabbāni, ‘‘mā sīlavantaṃ bhikkhuṃ viheṭhehī’’ti dhammakathā kātabbā, āṭānāṭiyaparittaṃ vā bhaṇitabbaṃ.
ид̇ха бана аадаанаадияабарид̇д̇асса баригаммам̣ взд̣̇ид̇аб̣б̣ам̣ (д̣̇ий. ни. адта. 3.282). батамамзва хи аадаанаадияасуд̇д̇ам̣ на бхан̣ид̇аб̣б̣ам̣, мзд̇д̇асуд̇д̇ам̣ (ку. баа. 9.1 аад̣̇аяо; су. ни. 143 аад̣̇аяо) д̇хаж̇аг̇г̇асуд̇д̇ам̣ (сам̣. ни. 1.249) рад̇анасуд̇д̇анд̇и (ку. баа. 6.1 аад̣̇аяо; су. ни. 224 аад̣̇аяо) имаани сад̇д̇аахам̣ бхан̣ид̇аб̣б̣аани. сажз мун̃жад̇и, сунд̣̇арам̣. но жз мун̃жад̇и, аадаанаадияасуд̇д̇ам̣ бхан̣ид̇аб̣б̣ам̣. д̇ам̣ бхан̣анд̇зна жа бхигкунаа бидтам̣ ваа мам̣сам̣ ваа на каад̣̇ид̇аб̣б̣ам̣, сусаанз на васид̇аб̣б̣ам̣. гасмаа? амануссаа од̇аарам̣ лабханд̇и. барид̇д̇агаран̣адтаанам̣ харид̇уубалид̇д̇ам̣ гаарзд̇ваа д̇ад̇т̇а барисуд̣̇д̇хам̣ аасанам̣ бан̃н̃абзд̇ваа нисийд̣̇ид̇аб̣б̣ам̣. барид̇д̇агаараго бхигку вихаарад̇о гхарам̣ нзнд̇зхи палагаавуд̇хзхи бариваарзд̇ваа нзд̇аб̣б̣о. аб̣бхогаасз нисийд̣̇ид̇ваа на вад̇д̇аб̣б̣ам̣, д̣̇ваараваад̇абаанаани бид̣̇ахид̇ваа нисиннзна аавуд̇хахад̇т̇зхи самбариваарид̇зна мзд̇д̇ажид̇д̇ам̣ бурзжааригам̣ гад̇ваа вад̇д̇аб̣б̣ам̣, батамам̣ сигкаабад̣̇аани г̇аахаабзд̇ваа сийлз бад̇идтид̇асса барид̇д̇ам̣ гаад̇аб̣б̣ам̣. звамби можзд̇ум̣ асаггонд̇зна вихаарам̣ нзд̇ваа жзд̇ияан̇г̇ан̣з нибаж̇ж̇аабзд̇ваа аасанабууж̇ам̣ гаарзд̇ваа д̣̇ийбз ж̇аалаабзд̇ваа жзд̇ияан̇г̇ан̣ам̣ саммаж̇ж̇ид̇ваа ман̇г̇алагат̇аа вад̇д̇аб̣б̣аа, саб̣б̣асаннибаад̇о гхосзд̇аб̣б̣о, вихаарасса убаванз ж̇здтагаругко наама ход̇и, д̇ад̇т̇а ‘‘бхигкусан̇гхо д̇умхаагам̣ ааг̇аманам̣ бад̇имаанзд̇ий’’д̇и бахин̣ид̇аб̣б̣ам̣. саб̣б̣асаннибаад̇адтаанз анааг̇анд̇ум̣ наама на лабхад̇и, д̇ад̇о амануссаг̇ахид̇аго ‘‘д̇вам̣ гонаамосий’’д̇и бужчид̇аб̣б̣о, наамз гат̇ид̇з наамзнзва аалабид̇аб̣б̣о, ‘‘ид̇т̇аннаама д̇уяхам̣ маалааг̇анд̇хаад̣̇ийсу бад̇д̇и, аасанабууж̇ааяам̣ бад̇д̇и, бин̣д̣абаад̇з бад̇д̇и, бхигкусан̇гхзна д̇уяхам̣ бан̣н̣аагаарад̇т̇ааяа махааман̇г̇алагат̇аа вуд̇д̇аа, бхигкусан̇гхз г̇ааравзна зд̇ам̣ мун̃жаахий’’д̇и можзд̇аб̣б̣о. сажз на мун̃жад̇и, д̣̇звад̇аанам̣ аарожзд̇аб̣б̣ам̣ ‘‘д̇умхз ж̇аанаат̇а, аяам̣ амануссо амхаагам̣ важанам̣ на гарод̇и, маяам̣ б̣уд̣̇д̇хааан̣ам̣ гариссаамаа’’д̇и барид̇д̇ам̣ гаад̇аб̣б̣ам̣. зд̇ам̣ д̇аава г̇ихийнам̣ баригаммам̣. сажз бана бхигку амануссзна г̇ахид̇о ход̇и, аасанаани д̇ховид̇ваа саб̣б̣асаннибаад̇ам̣ гхосаабзд̇ваа г̇анд̇хамаалаад̣̇ийсу бад̇д̇им̣ д̣̇ад̇ваа барид̇д̇ам̣ бхан̣ид̇аб̣б̣ам̣, ид̣̇ам̣ бхигкуунам̣ баригаммам̣. звам̣ барид̇д̇з бадибаж̇ж̇ид̇аб̣б̣ам̣.
Idha pana āṭānāṭiyaparittassa parikammaṃ veditabbaṃ (dī. ni. aṭṭha. 3.282). Paṭhamameva hi āṭānāṭiyasuttaṃ na bhaṇitabbaṃ, mettasuttaṃ (khu. pā. 9.1 ādayo; su. ni. 143 ādayo) dhajaggasuttaṃ (saṃ. ni. 1.249) ratanasuttanti (khu. pā. 6.1 ādayo; su. ni. 224 ādayo) imāni sattāhaṃ bhaṇitabbāni. Sace muñcati, sundaraṃ. No ce muñcati, āṭānāṭiyasuttaṃ bhaṇitabbaṃ. Taṃ bhaṇantena ca bhikkhunā piṭṭhaṃ vā maṃsaṃ vā na khāditabbaṃ, susāne na vasitabbaṃ. Kasmā? Amanussā otāraṃ labhanti. Parittakaraṇaṭṭhānaṃ haritūpalittaṃ kāretvā tattha parisuddhaṃ āsanaṃ paññapetvā nisīditabbaṃ. Parittakārako bhikkhu vihārato gharaṃ nentehi phalakāvudhehi parivāretvā netabbo. Abbhokāse nisīditvā na vattabbaṃ, dvāravātapānāni pidahitvā nisinnena āvudhahatthehi samparivāritena mettacittaṃ purecārikaṃ katvā vattabbaṃ, paṭhamaṃ sikkhāpadāni gāhāpetvā sīle patiṭṭhitassa parittaṃ kātabbaṃ. Evampi mocetuṃ asakkontena vihāraṃ netvā cetiyaṅgaṇe nipajjāpetvā āsanapūjaṃ kāretvā dīpe jālāpetvā cetiyaṅgaṇaṃ sammajjitvā maṅgalakathā vattabbā, sabbasannipāto ghosetabbo, vihārassa upavane jeṭṭhakarukkho nāma hoti, tattha ‘‘bhikkhusaṅgho tumhākaṃ āgamanaṃ patimānetī’’ti pahiṇitabbaṃ. Sabbasannipātaṭṭhāne anāgantuṃ nāma na labhati, tato amanussagahitako ‘‘tvaṃ konāmosī’’ti pucchitabbo, nāme kathite nāmeneva ālapitabbo, ‘‘itthannāma tuyhaṃ mālāgandhādīsu patti, āsanapūjāyaṃ patti, piṇḍapāte patti, bhikkhusaṅghena tuyhaṃ paṇṇākāratthāya mahāmaṅgalakathā vuttā, bhikkhusaṅghe gāravena etaṃ muñcāhī’’ti mocetabbo. Sace na muñcati, devatānaṃ ārocetabbaṃ ‘‘tumhe jānātha, ayaṃ amanusso amhākaṃ vacanaṃ na karoti, mayaṃ buddhaāṇaṃ karissāmā’’ti parittaṃ kātabbaṃ. Etaṃ tāva gihīnaṃ parikammaṃ. Sace pana bhikkhu amanussena gahito hoti, āsanāni dhovitvā sabbasannipātaṃ ghosāpetvā gandhamālādīsu pattiṃ datvā parittaṃ bhaṇitabbaṃ, idaṃ bhikkhūnaṃ parikammaṃ. Evaṃ paritte paṭipajjitabbaṃ.
20. бадисант̇аарз бана аяам̣ винижчаяо (баараа. адта. 2.185-7) – анаамадтабин̣д̣абаад̇о гасса д̣̇аад̇аб̣б̣о, гасса на д̣̇аад̇аб̣б̣о? маад̇аабид̇уунам̣ д̇аава д̣̇аад̇аб̣б̣о. сажзби гахаабан̣аг̇гханаго ход̇и, сад̣̇д̇хаад̣̇зяяавинибаад̇анам̣ над̇т̇и. маад̇аабид̇уубадтаагаанам̣ взяяааважжагарасса бан̣д̣убалаасасса жаад̇и зд̇зсамби д̣̇аад̇аб̣б̣о. д̇ад̇т̇а бан̣д̣убалаасасса т̇аалагз багкибид̇вааби д̣̇аад̇ум̣ ваддад̇и, д̇ам̣ табзд̇ваа ан̃н̃зсам̣ аг̇ааригаанам̣ маад̇аабид̇уунамби на ваддад̇и. баб̣б̣аж̇ид̇абарибхог̇о хи аг̇ааригаанам̣ жзд̇ияадтаанияо. абижа анаамадтабин̣д̣абаат̇о наамзса самбад̇д̇асса д̣̇аамаригажорассаби иссарияассаби д̣̇аад̇аб̣б̣о. гасмаа? д̇з хи ад̣̇ийяамаанзби ‘‘на д̣̇знд̇ий’’д̇и аамасид̇ваа д̣̇ийяамаанзби ‘‘ужчидтагам̣ д̣̇знд̇ий’’д̇и гуж̇жханд̇и, гуд̣̇д̇хаа ж̇ийвид̇ааби воробзнд̇и, саасанассаби анд̇арааяам̣ гаронд̇и. раж̇ж̇ам̣ бад̇т̇аяамаанасса вижарад̇о жоранааг̇асса вад̇т̇у жзд̇т̇а гат̇зд̇аб̣б̣ам̣. звам̣ анаамадтабин̣д̣абаад̇з бадибаж̇ж̇ид̇аб̣б̣ам̣.
20.Paṭisanthāre pana ayaṃ vinicchayo (pārā. aṭṭha. 2.185-7) – anāmaṭṭhapiṇḍapāto kassa dātabbo, kassa na dātabbo? Mātāpitūnaṃ tāva dātabbo. Sacepi kahāpaṇagghanako hoti, saddhādeyyavinipātanaṃ natthi. Mātāpituupaṭṭhākānaṃ veyyāvaccakarassa paṇḍupalāsassa cāti etesampi dātabbo. Tattha paṇḍupalāsassa thālake pakkhipitvāpi dātuṃ vaṭṭati, taṃ ṭhapetvā aññesaṃ agārikānaṃ mātāpitūnampi na vaṭṭati. Pabbajitaparibhogo hi agārikānaṃ cetiyaṭṭhāniyo. Apica anāmaṭṭhapiṇḍapātho nāmesa sampattassa dāmarikacorassapi issariyassapi dātabbo. Kasmā? Te hi adīyamānepi ‘‘na dentī’’ti āmasitvā dīyamānepi ‘‘ucchiṭṭhakaṃ dentī’’ti kujjhanti, kuddhā jīvitāpi voropenti, sāsanassapi antarāyaṃ karonti. Rajjaṃ patthayamānassa vicarato coranāgassa vatthu cettha kathetabbaṃ. Evaṃ anāmaṭṭhapiṇḍapāte paṭipajjitabbaṃ.
бадисант̇ааро жа наамааяам̣ гасса гаад̇аб̣б̣о, гасса на гаад̇аб̣б̣о? бадисант̇ааро наама вихаарам̣ самбад̇д̇асса яасса гассажи ааг̇анд̇угасса ваа д̣̇алид̣̇д̣̇асса ваа жорасса ваа иссарасса ваа гаад̇аб̣б̣оязва. гат̇ам̣? ааг̇анд̇угам̣ д̇аава кийн̣абариб̣б̣аяам̣ вихаарам̣ самбад̇д̇ам̣ д̣̇исваа ‘‘баанийяам̣ биваа’’д̇и д̣̇аад̇аб̣б̣ам̣, баад̣̇амагканад̇злам̣ д̣̇аад̇аб̣б̣ам̣, гаалз ааг̇ад̇асса яааг̇убхад̇д̇ам̣, вигаалз ааг̇ад̇асса сажз д̇ан̣д̣улаа ад̇т̇и, д̇ан̣д̣улаа д̣̇аад̇аб̣б̣аа. авзлааяа самбад̇д̇оби ‘‘г̇ажчаахий’’д̇и на вад̇д̇аб̣б̣о, саяанадтаанам̣ д̣̇аад̇аб̣б̣ам̣. саб̣б̣ам̣ абажжаасийяанд̇знзва гаад̇аб̣б̣ам̣. ‘‘мануссаа наама жад̇убажжаяад̣̇ааяагаа, звам̣ сан̇г̇ахз гарияамаанз бунаббунам̣ басийд̣̇ид̇ваа убагаарам̣ гариссанд̇ий’’д̇и жид̇д̇ам̣ на уббаад̣̇зд̇аб̣б̣ам̣. жораанам̣ бана сан̇гхигамби д̣̇аад̇аб̣б̣ам̣. бадисант̇аараанисам̣сад̣̇ийбанад̇т̇ан̃жа жоранааг̇авад̇т̇у, бхаад̇араа сад̣̇д̇хим̣ ж̇амб̣уд̣̇ийбаг̇ад̇асса махаанааг̇аран̃н̃о вад̇т̇у, бид̇урааж̇асса раж̇ж̇з жад̇уннам̣ амажжаанам̣ вад̇т̇у, абхаяажоравад̇т̇ууд̇и звамаад̣̇ийни б̣ахууни вад̇т̇ууни махааадтагат̇ааяам̣ вид̇т̇аарад̇о вуд̇д̇аани.
Paṭisanthāro ca nāmāyaṃ kassa kātabbo, kassa na kātabbo? Paṭisanthāro nāma vihāraṃ sampattassa yassa kassaci āgantukassa vā daliddassa vā corassa vā issarassa vā kātabboyeva. Kathaṃ? Āgantukaṃ tāva khīṇaparibbayaṃ vihāraṃ sampattaṃ disvā ‘‘pānīyaṃ pivā’’ti dātabbaṃ, pādamakkhanatelaṃ dātabbaṃ, kāle āgatassa yāgubhattaṃ, vikāle āgatassa sace taṇḍulā atthi, taṇḍulā dātabbā. Avelāya sampattopi ‘‘gacchāhī’’ti na vattabbo, sayanaṭṭhānaṃ dātabbaṃ. Sabbaṃ apaccāsīyanteneva kātabbaṃ. ‘‘Manussā nāma catupaccayadāyakā, evaṃ saṅgahe kariyamāne punappunaṃ pasīditvā upakāraṃ karissantī’’ti cittaṃ na uppādetabbaṃ. Corānaṃ pana saṅghikampi dātabbaṃ. Paṭisanthārānisaṃsadīpanatthañca coranāgavatthu, bhātarā saddhiṃ jambudīpagatassa mahānāgarañño vatthu, piturājassa rajje catunnaṃ amaccānaṃ vatthu, abhayacoravatthūti evamādīni bahūni vatthūni mahāaṭṭhakathāyaṃ vitthārato vuttāni.
д̇ад̇рааяам̣ згавад̇т̇уд̣̇ийбанаа – сийхал̣ад̣̇ийбз гира абхаяо наама жоро бан̃жасад̇абаривааро згасмим̣ таанз канд̇хааваарам̣ б̣анд̇хид̇ваа саманд̇аа д̇ияож̇анам̣ уб̣б̣аасзд̇ваа васад̇и. анураад̇хабураваасино гад̣̇амб̣анад̣̇им̣ на уд̇д̇аранд̇и, жзд̇ияаг̇иримаг̇г̇з ж̇анасан̃жааро убажчинно. ат̇згад̣̇ивасам̣ жоро ‘‘жзд̇ияаг̇ирим̣ вилумбиссаамий’’д̇и аг̇амааси. аараамигаа д̣̇исваа д̣̇ийгхабхаан̣агаабхаяад̇т̇зрасса аарожзсум̣. т̇зро ‘‘саббипаан̣ид̇аад̣̇ийни ад̇т̇ий’’д̇и бужчи. ‘‘ад̇т̇и, бханд̇з’’д̇и. ‘‘жораанам̣ д̣̇зт̇а’’. ‘‘д̇ан̣д̣улаа ад̇т̇ий’’д̇и. ‘‘ад̇т̇и, бханд̇з, сан̇гхассад̇т̇ааяа аахадаа д̇ан̣д̣улаа жа баггасааган̃жа г̇орасо жаа’’д̇и. ‘‘бхад̇д̇ам̣ самбаад̣̇зд̇ваа жораанам̣ д̣̇зт̇аа’’д̇и. аараамигаа д̇ат̇аа гарим̣су. жораа бхад̇д̇ам̣ бхун̃ж̇ид̇ваа ‘‘гзнааяам̣ бадисант̇ааро гад̇о’’д̇и бужчим̣су. ‘‘амхаагам̣ аяязна абхаяад̇т̇зрзнаа’’д̇и. жораа т̇зрасса санд̇игам̣ г̇анд̇ваа ванд̣̇ид̇ваа аахам̣су ‘‘маяам̣ ‘сан̇гхасса жа жзд̇ияасса жа санд̇агам̣ ажчинд̣̇ид̇ваа г̇ахзссаамаа’д̇и ааг̇ад̇аа, д̇умхаагам̣ бана иминаа бадисант̇аарзна маяам̣ басаннаа, аж̇ж̇а бадтааяа вихаарз д̇хаммигаарагкаа амхаагам̣ ааяад̇д̇аа ход̇у, нааг̇араа ааг̇анд̇ваа д̣̇аанам̣ д̣̇знд̇у, жзд̇ияам̣ ванд̣̇анд̇уу’’д̇и. д̇ад̇о бадтааяа жа нааг̇арз д̣̇аанам̣ д̣̇аад̇ум̣ ааг̇ажчанд̇з над̣̇ийд̇ийрзязва бажжуг̇г̇анд̇ваа рагканд̇аа вихаарам̣ нзнд̇и, вихаарзби д̣̇аанам̣ д̣̇знд̇аанам̣ рагкам̣ гад̇ваа д̇идтанд̇и. д̇зби бхигкуунам̣ бхуд̇д̇аавасзсам̣ жораанам̣ д̣̇знд̇и. г̇аманагаалзби д̇з жораа над̣̇ийд̇ийрам̣ баабзд̇ваа нивад̇д̇анд̇и.
Tatrāyaṃ ekavatthudīpanā – sīhaḷadīpe kira abhayo nāma coro pañcasataparivāro ekasmiṃ ṭhāne khandhāvāraṃ bandhitvā samantā tiyojanaṃ ubbāsetvā vasati. Anurādhapuravāsino kadambanadiṃ na uttaranti, cetiyagirimagge janasañcāro upacchinno. Athekadivasaṃ coro ‘‘cetiyagiriṃ vilumpissāmī’’ti agamāsi. Ārāmikā disvā dīghabhāṇakaabhayattherassa ārocesuṃ. Thero ‘‘sappiphāṇitādīni atthī’’ti pucchi. ‘‘Atthi, bhante’’ti. ‘‘Corānaṃ detha’’. ‘‘Taṇḍulā atthī’’ti. ‘‘Atthi, bhante, saṅghassatthāya āhaṭā taṇḍulā ca pakkasākañca goraso cā’’ti. ‘‘Bhattaṃ sampādetvā corānaṃ dethā’’ti. Ārāmikā tathā kariṃsu. Corā bhattaṃ bhuñjitvā ‘‘kenāyaṃ paṭisanthāro kato’’ti pucchiṃsu. ‘‘Amhākaṃ ayyena abhayattherenā’’ti. Corā therassa santikaṃ gantvā vanditvā āhaṃsu ‘‘mayaṃ ‘saṅghassa ca cetiyassa ca santakaṃ acchinditvā gahessāmā’ti āgatā, tumhākaṃ pana iminā paṭisanthārena mayaṃ pasannā, ajja paṭṭhāya vihāre dhammikārakkhā amhākaṃ āyattā hotu, nāgarā āgantvā dānaṃ dentu, cetiyaṃ vandantū’’ti. Tato paṭṭhāya ca nāgare dānaṃ dātuṃ āgacchante nadītīreyeva paccuggantvā rakkhantā vihāraṃ nenti, vihārepi dānaṃ dentānaṃ rakkhaṃ katvā tiṭṭhanti. Tepi bhikkhūnaṃ bhuttāvasesaṃ corānaṃ denti. Gamanakālepi te corā nadītīraṃ pāpetvā nivattanti.
ат̇згад̣̇ивасам̣ бхигкусан̇гхз кийяанагагат̇аа уббаннаа ‘‘т̇зро иссаравад̇ааяа сан̇гхасанд̇агам̣ жораанам̣ ад̣̇аасий’’д̇и. т̇зро саннибаад̇ам̣ гаараабзд̇ваа ааха ‘‘жораа ‘сан̇гхасса багад̇иваддан̃жа жзд̇ияасанд̇аган̃жа ажчинд̣̇ид̇ваа г̇ан̣хиссаамаа’д̇и ааг̇амим̣су, ат̇а д̇зсам̣ маяаа ‘зд̇ам̣ на хариссанд̇ий’д̇и зд̇д̇аго наама бадисант̇ааро гад̇о, д̇ам̣ саб̣б̣амби згад̇о самбин̣д̣зд̇ваа аг̇гхаабзт̇а, д̇зна гааран̣зна авилуд̇д̇ам̣ бхан̣д̣ам̣ згад̇о самбин̣д̣зд̇ваа аг̇гхаабзт̇аа’’д̇и. д̇ад̇о саб̣б̣амби т̇зрзна д̣̇иннагам̣ жзд̇ияагхарз згам̣ варабод̇т̇агажид̇д̇ад̇т̇аран̣ам̣ на аг̇гхад̇и. д̇ад̇о аахам̣су ‘‘т̇зрзна гад̇о бадисант̇ааро сугад̇о, жод̣̇зд̇ум̣ ваа саарзд̇ум̣ ваа на лаб̣бхад̇и, г̇ийваа ваа авахааро ваа над̇т̇ий’’д̇и. звам̣ махаанисам̣со бадисант̇аарод̇и саллагкзд̇ваа гад̇д̇аб̣б̣о бан̣д̣ид̇зна бхигкунаад̇и.
Athekadivasaṃ bhikkhusaṅghe khīyanakakathā uppannā ‘‘thero issaravatāya saṅghasantakaṃ corānaṃ adāsī’’ti. Thero sannipātaṃ kārāpetvā āha ‘‘corā ‘saṅghassa pakativaṭṭañca cetiyasantakañca acchinditvā gaṇhissāmā’ti āgamiṃsu, atha tesaṃ mayā ‘etaṃ na harissantī’ti ettako nāma paṭisanthāro kato, taṃ sabbampi ekato sampiṇḍetvā agghāpetha, tena kāraṇena aviluttaṃ bhaṇḍaṃ ekato sampiṇḍetvā agghāpethā’’ti. Tato sabbampi therena dinnakaṃ cetiyaghare ekaṃ varapotthakacittattharaṇaṃ na agghati. Tato āhaṃsu ‘‘therena kato paṭisanthāro sukato, codetuṃ vā sāretuṃ vā na labbhati, gīvā vā avahāro vā natthī’’ti. Evaṃ mahānisaṃso paṭisanthāroti sallakkhetvā kattabbo paṇḍitena bhikkhunāti.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
бхзсаж̇ж̇аад̣̇игаран̣авинижчаяагат̇аа самад̇д̇аа.
Bhesajjādikaraṇavinicchayakathā samattā.
