| Library / Tipiṭaka / ཏིཔིཊཀ • Tipiṭaka / ཝིནཡཱལངྐཱར-ཊཱིཀཱ • Vinayālaṅkāra-ṭīkā |
༣. བྷེསཛྫཱདིཀརཎཝིནིཙྪཡཀཐཱ
3. Bhesajjādikaraṇavinicchayakathā
༡༥. ཨེཝཾ པརིཀྑཱརཝིནིཙྪཡཾ ཀཐེཏྭཱ ཨིདཱནི བྷེསཛྫཀརཎཔརིཏྟཔཊིསནྠཱརཱནཾ ཝིནིཙྪཡཾ ཀཐེཏུཾ ‘‘བྷེསཛྫཱ’’ཏིཨཱདིམཱཧ། ཏཏྠ བྷིསཀྐསྶ ཨིདཾ ཀམྨཾ བྷེསཛྫཾ། ཀིཾ ཏཾ? ཏིཀིཙྪནཾ ། ཀརིཡཏེ ཀརཎཾ, བྷེསཛྫསྶ ཀརཎཾ བྷེསཛྫཀརཎཾ, ཝེཛྫཀམྨཀརཎནྟི ཝུཏྟཾ ཧོཏི། པརིསམནྟཏོ ཏཱཡཏི རཀྑཏཱིཏི པརིཏྟཾ, ཨཱརཀྑཱཏི ཨཏྠོ། པཊིསནྠརཎཾ པཊིསནྠཱརོ, ཨཏྟནཱ སདྡྷིཾ ཨཉྙེསཾ སམྦནྡྷཀརཎནྟི ཨཏྠོ། ཏཏྠ ཡོ ཝིནིཙྪཡོ མཱཏིཀཱཡཾ ‘‘བྷེསཛྫཀརཎམྤི ཙ པརིཏྟཾ, པཊིསནྠཱརོ’’ཏི (ཝི॰ སངྒ॰ ཨཊྛ॰ གནྠཱརམྦྷཀཐཱ) མཡཱ ཝུཏྟོ , ཏསྨིཾ སམབྷིནིཝིཊྛེ བྷེསཛྫཀརཎཝིནིཙྪཡེ། སཧདྷམྨོ ཨེཏེསནྟི སཧདྷམྨིཀཱ, ཏེསཾ, ཨེཀསྶ སཏྠུནོ སཱསནེ སཧསིཀྑམཱནདྷམྨཱནནྟི ཨཏྠོ། ཨཐ ཝཱ སཧདྷམྨེ ནིཡུཏྟཱ སཧདྷམྨིཀཱ, ཏེསཾ, སཧདྷམྨསངྑཱཏེ སིཀྑཱཔདེ སིཀྑམཱནབྷཱཝེན ནིཡུཏྟཱནནྟི ཨཏྠོ། ཝིཝཊྚནིསྶིཏསཱིལཱདིཡུཏྟབྷཱཝེན སམཏྟཱ སམསཱིལསདྡྷཱཔཉྙཱནཾ། ཨེཏེན དུསྶཱིལཱནཾ བྷིནྣལདྡྷིཀཱནཉྩ ཨཀཱཏུམྤི ལབྦྷཏཱིཏི དསྶེཏི།
15. Evaṃ parikkhāravinicchayaṃ kathetvā idāni bhesajjakaraṇaparittapaṭisanthārānaṃ vinicchayaṃ kathetuṃ ‘‘bhesajjā’’tiādimāha. Tattha bhisakkassa idaṃ kammaṃ bhesajjaṃ. Kiṃ taṃ? Tikicchanaṃ . Kariyate karaṇaṃ, bhesajjassa karaṇaṃ bhesajjakaraṇaṃ, vejjakammakaraṇanti vuttaṃ hoti. Parisamantato tāyati rakkhatīti parittaṃ, ārakkhāti attho. Paṭisantharaṇaṃ paṭisanthāro, attanā saddhiṃ aññesaṃ sambandhakaraṇanti attho. Tattha yo vinicchayo mātikāyaṃ ‘‘bhesajjakaraṇampi ca parittaṃ, paṭisanthāro’’ti (vi. saṅga. aṭṭha. ganthārambhakathā) mayā vutto , tasmiṃ samabhiniviṭṭhe bhesajjakaraṇavinicchaye. Sahadhammo etesanti sahadhammikā, tesaṃ, ekassa satthuno sāsane sahasikkhamānadhammānanti attho. Atha vā sahadhamme niyuttā sahadhammikā, tesaṃ, sahadhammasaṅkhāte sikkhāpade sikkhamānabhāvena niyuttānanti attho. Vivaṭṭanissitasīlādiyuttabhāvena samattā samasīlasaddhāpaññānaṃ. Etena dussīlānaṃ bhinnaladdhikānañca akātumpi labbhatīti dasseti.
ཉཱཏཀཔཝཱརིཏཊྛཱནཏོ ཝཱཏི ཨཏྟནོ ཝཱ ཏེསཾ ཝཱ ཉཱཏཀཔཝཱརིཏཊྛཱནཏོ། ན ཀརིཡིཏྠཱཏི ཨཀཏཱ, ཨཡུཏྟཝསེན ཨཀཏཔུབྦཱ ཝིཉྙཏྟི ཨཀཏཝིཉྙཏྟི། ཝཛིརབུདྡྷིཊཱིཀཱཡཾ (ཝཛིར॰ ཊཱི॰ པཱརཱཛིཀ ༡༨༦) པན ‘‘ཨཀཏཝིཉྙཏྟིཡཱཏི ན ཝིཉྙཏྟིཡཱ། སཱ ཧི ཨནནུཉྙཱཏཏྟཱ ཀཏཱཔི ཨཀཏཱ ཝིཡཱཏི ཨཀཏཝིཉྙཏྟི, ‘ཝདེཡྻཱཐ བྷནྟེ ཡེནཏྠོ’ཏི ཨེཝཾ ཨཀཏཊྛཱནེ ཝིཉྙཏྟི ཨཀཏཝིཉྙཏྟཱིཏི ལིཁིཏ’’ནྟི ཝུཏྟཾ། སཱརཏྠདཱིཔནིཡཾ (སཱརཏྠ॰ ཊཱི॰ ༢.༡༨༥) ‘‘གིལཱནསྶ ཨཏྠཱཡ ཨཔྤཝཱརིཏཊྛཱནཏོ ཝིཉྙཏྟིཡཱ ཨནུཉྙཱཏཏྟཱ ཀཏཱཔི ཨཀཏཱ ཝིཡཱཏི ཨཀཏཝིཉྙཏྟི, ‘ཝད བྷནྟེ པཙྩཡེནཱ’ཏི ཨེཝཾ ཨཀཏཔཝཱརཎཊྛཱནེ ཙ ཝིཉྙཏྟི ཨཀཏཝིཉྙཏྟཱི’’ཏི།
Ñātakapavāritaṭṭhānato vāti attano vā tesaṃ vā ñātakapavāritaṭṭhānato. Na kariyitthāti akatā, ayuttavasena akatapubbā viññatti akataviññatti. Vajirabuddhiṭīkāyaṃ (vajira. ṭī. pārājika 186) pana ‘‘akataviññattiyāti na viññattiyā. Sā hi ananuññātattā katāpi akatā viyāti akataviññatti, ‘vadeyyātha bhante yenattho’ti evaṃ akataṭṭhāne viññatti akataviññattīti likhita’’nti vuttaṃ. Sāratthadīpaniyaṃ (sārattha. ṭī. 2.185) ‘‘gilānassa atthāya appavāritaṭṭhānato viññattiyā anuññātattā katāpi akatā viyāti akataviññatti, ‘vada bhante paccayenā’ti evaṃ akatapavāraṇaṭṭhāne ca viññatti akataviññattī’’ti.
༡༦. པཊིཡཱདིཡཏཱིཏི སམྤཱདེཏི། ཨཀཱཏུཾ ན ཝཊྚཏཱིཏི ཨེཏྠ དུཀྐཊནྟི ཝདནྟི, ཨཡུཏྟཏཱཝསེན པནེཏྠ ཨཀརཎཔྤཊིཀྑེཔོ ཝུཏྟོ, ན ཨཱཔཏྟིཝསེནཱཏི གཧེཏབྦཾ། སབྦཾ པརིཀམྨཾ ཨནཱམསནྟེནཱཏི མཱཏུགཱམསརཱིརཱདཱིནཾ ཨནཱམཱསཏྟཱ ཝུཏྟཾ། ཡཱཝ ཉཱཏཀཱ ན པསྶནྟཱིཏི ཡཱཝ ཏསྶ ཉཱཏཀཱ ན པསྶནྟི། ‘‘ཏིཏྠིཡབྷཱུཏཱནཾ མཱཏཱཔིཏཱུནཾ སཧཏྠཱ དཱཏུཾ ན ཝཊྚཏཱི’’ཏི ཝཛིརབུདྡྷིཊཱིཀཱཡཾ (ཝཛིར॰ ཊཱི॰ པཱརཱཛིཀ ༡༨༦) ཝུཏྟཾ།
16.Paṭiyādiyatīti sampādeti. Akātuṃ na vaṭṭatīti ettha dukkaṭanti vadanti, ayuttatāvasena panettha akaraṇappaṭikkhepo vutto, na āpattivasenāti gahetabbaṃ. Sabbaṃparikammaṃ anāmasantenāti mātugāmasarīrādīnaṃ anāmāsattā vuttaṃ. Yāva ñātakā na passantīti yāva tassa ñātakā na passanti. ‘‘Titthiyabhūtānaṃ mātāpitūnaṃ sahatthā dātuṃ na vaṭṭatī’’ti vajirabuddhiṭīkāyaṃ (vajira. ṭī. pārājika 186) vuttaṃ.
༡༧. པིཏུ བྷགིནཱི པིཏུཙྪཱ། མཱཏུ བྷཱཏཱ མཱཏུལོ། ནཔྤཧོནྟཱིཏི ཀཱཏུཾ ན སཀྐོནྟཱིཏི ཊཱིཀཱསུ ཝུཏྟཾ། ‘‘ཏེསཾཡེཝ སནྟཀཾ བྷེསཛྫཾ གཧེཏྭཱ ཀེཝལཾ ཡོཛེཏྭཱ དཱཏབྦ’’ནྟི ཝཏྭཱ ‘‘སཙེ པན ནཔྤཧོནྟི ཡཱཙནྟི ཙ, དེཐ ནོ བྷནྟེ, ཏུམྷཱཀཾ པཊིདསྶཱམཱ’’ཏི ཝུཏྟཏྟཱ པན ཏེསཾ བྷེསཛྫསྶ ཨཔྤཧོནཀཏྟཱ བྷེསཛྫམེཝ ཡཱཙནྟཱིཏི ཨཊྛཀཐཱདྷིཔྤཱཡོ དིསྶཏི, ཝཱིམཾསིཏབྦོ། ན ཡཱཙནྟཱིཏི ལཛྫཱཡ ན ཡཱཙནྟི, གཱརཝེན ཝཱ། ‘‘ཨཱབྷོགཾ ཀཏྭཱ’’ཏི ཝུཏྟཏྟཱ ཨཉྙཐཱ དེནྟསྶ ཨཱཔཏྟིཡེཝ། སཱརཏྠདཱིཔནིཡཾ (སཱརཏྠ॰ ཊཱི॰ ༢.༡༨) པན ‘‘ཨཱབྷོགཾ ཀཏྭཱཏི ཨིདཾ ཀཏྟབྦཀརཎདསྶནཝསེན ཝུཏྟཾ, ཨཱབྷོགཾ པན ཨཀཏྭཱཔི དཱཏུཾ ཝཊྚཏཱིཏི ཏཱིསུ གཎྛིཔདེསུ ལིཁིཏ’’ནྟི ཝུཏྟཾ། པོརཱཎཊཱིཀཱཡམྤི ཏདེཝ གཧེཏྭཱ ལིཁིཏཾ། ཝིམཏིཝིནོདནིཡཾ (ཝི॰ ཝི॰ ཊཱི॰ ༡.༡༨༥) པན ཏཾ ཝཙནཾ པཊིཀྑིཏྟཾ། ཝུཏྟཉྷི ཏཏྠ ཀེཙི པན ‘‘ཨཱབྷོགཾ ཨཀཏྭཱཔི དཱཏུཾ ཝཊྚཏཱིཏི ཝདནྟི, ཏཾ ན ཡུཏྟཾ བྷེསཛྫཀརཎསྶ, པཱལི༹ཡཾ ‘ཨནཱཔཏྟི བྷིཀྑུ པཱརཱཛིཀསྶ, ཨཱཔཏྟི དུཀྐཊསྶཱ’ཏི ཨེཝཾ ཨནྟརཱཔཏྟིདསྶནཝསེན སཱམཉྙཏོ པཊིཀྑིཏྟཏྟཱ, ཨཊྛཀཐཱཡཾ ཨཝུཏྟཔྤཀཱརེན ཀརོནྟསྶ སུཏྟེནེཝ ཨཱཔཏྟིསིདྡྷཱཏི དཊྛབྦཱ། ཏེནེཝ ཨཊྛཀཐཱཡམྤི ‘ཏེསཉྙེཝ སནྟཀ’ནྟིཨཱདི ཝུཏྟ’’ནྟི།
17. Pitu bhaginī pitucchā. Mātu bhātā mātulo. Nappahontīti kātuṃ na sakkontīti ṭīkāsu vuttaṃ. ‘‘Tesaṃyeva santakaṃ bhesajjaṃ gahetvā kevalaṃ yojetvā dātabba’’nti vatvā ‘‘sace pana nappahonti yācanti ca, detha no bhante, tumhākaṃ paṭidassāmā’’ti vuttattā pana tesaṃ bhesajjassa appahonakattā bhesajjameva yācantīti aṭṭhakathādhippāyo dissati, vīmaṃsitabbo. Na yācantīti lajjāya na yācanti, gāravena vā. ‘‘Ābhogaṃ katvā’’ti vuttattā aññathā dentassa āpattiyeva. Sāratthadīpaniyaṃ (sārattha. ṭī. 2.18) pana ‘‘ābhogaṃ katvāti idaṃ kattabbakaraṇadassanavasena vuttaṃ, ābhogaṃ pana akatvāpi dātuṃ vaṭṭatīti tīsu gaṇṭhipadesu likhita’’nti vuttaṃ. Porāṇaṭīkāyampi tadeva gahetvā likhitaṃ. Vimativinodaniyaṃ (vi. vi. ṭī. 1.185) pana taṃ vacanaṃ paṭikkhittaṃ. Vuttañhi tattha keci pana ‘‘ābhogaṃ akatvāpi dātuṃ vaṭṭatīti vadanti, taṃ na yuttaṃ bhesajjakaraṇassa, pāḷiyaṃ ‘anāpatti bhikkhu pārājikassa, āpatti dukkaṭassā’ti evaṃ antarāpattidassanavasena sāmaññato paṭikkhittattā, aṭṭhakathāyaṃ avuttappakārena karontassa sutteneva āpattisiddhāti daṭṭhabbā. Teneva aṭṭhakathāyampi ‘tesaññeva santaka’ntiādi vutta’’nti.
ཨེཏེ དས ཉཱཏཀེ ཋཔེཏྭཱཏི ཏེསཾ པུཏྟནཏྟཱདཡོཔི ཏཔྤཊིབདྡྷཏྟཱ ཉཱཏཀཱ ཨེཝཱཏི ཏེཔི ཨེཏྠེཝ སངྒཧིཏཱ། ཏེན ཨཉྙེསནྟི ཨིམིནཱ ཨཉྙཱཏཀཱནཾ གཧཎཾ ཝེདིཏབྦཾ ། ཏེནེཝཱཧ ‘‘ཨེཏེསཾ པུཏྟཔརམྤརཱཡཱ’’ཏིཨཱདི། ཀུལཔརིཝཊྚཱཏི ཀུལཱནཾ པཊིཔཱཊི, ཀུལཔརམྤརཱཏི ཝུཏྟཾ ཧོཏི། བྷེསཛྫཾ ཀརོནྟསྶཱཏི ཡཐཱཝུཏྟཝིདྷིནཱ ཀརོནྟསྶ, ‘‘ཏཱཝཀཱལིཀཾ དསྶཱམཱི’’ཏི ཨཱབྷོགཾ ཨཀཏྭཱ དེནྟསྶཔི པན ཨནྟརཱཔཏྟིདུཀྐཊཾ ཝིནཱ མིཙྪཱཛཱིཝནཾ ཝཱ ཀུལདཱུསནཾ ཝཱ ན ཧོཏིཡེཝ། ཏེནཱཧ ‘‘ཝེཛྫཀམྨཾ ཝཱ ཀུལདཱུསཀཱཔཏྟི ཝཱ ན ཧོཏཱི’’ཏི། ཉཱཏཀཱནཉྷི སནྟཀཾ ཡཱཙིཏྭཱཔི གཧེཏུཾ ཝཊྚཏི, ཏསྨཱ ཏཏྠ ཀུལདཱུསནཱདི ན སིཡཱ། སཱརཏྠདཱིཔནིཡམྤི (སཱརཏྠ॰ ཊཱི॰ ༢.༡༨༥) ‘‘མཡ྄ཧཾ དསྶནྟི ཀརིསྶནྟཱིཏི པཙྩཱསཱཡ ཀརོནྟསྶཔི ཡཱཙིཏྭཱ གཧེཏབྦཊྛཱནཏཱཡ ཉཱཏཀེསུ ཝེཛྫཀམྨཾ ཝཱ ཀུལདཱུསཀཱཔཏྟི ཝཱ ན ཧོཏཱིཏི ཝདནྟཱི’’ཏི ཝུཏྟཾ། ཝཛིརབུདྡྷིཊཱིཀཱཡཾ (ཝཛིར॰ ཊཱི॰ པཱརཱཛིཀ ༡༨༦) པན ‘‘ཝེཛྫཀམྨཾ ཝཱ ཀུལདཱུསཀཱཔཏྟི ཝཱ ན ཧོཏཱིཏི ཝཙནཏོ ཡཱཝ སཏྟམོ ཀུལཔརིཝཊྚོ, ཏཱཝ བྷེསཛྫཾ ཀཱཏུཾ ཝཊྚཏཱིཏི ཝདནྟཱི’’ཏི ཨེཏྟཀམེཝ ཝུཏྟཾ། སབྦཔདེསུ ཝིནིཙྪཡོ ཝེདིཏབྦོཏི ‘‘ཙཱུལ༹མཱཏུཡཱ’’ཏིཨཱདཱིསུ སབྦཔདེསུ ཙཱུལ༹མཱཏུཡཱ སཱམིཀོཏིཨཱདིནཱ ཡོཛེཏྭཱ ཧེཊྛཱ ཝུཏྟནཡེནེཝ ཝིནིཙྪཡོ ཝེདིཏབྦོ།
Ete dasa ñātake ṭhapetvāti tesaṃ puttanattādayopi tappaṭibaddhattā ñātakā evāti tepi ettheva saṅgahitā. Tena aññesanti iminā aññātakānaṃ gahaṇaṃ veditabbaṃ . Tenevāha ‘‘etesaṃ puttaparamparāyā’’tiādi. Kulaparivaṭṭāti kulānaṃ paṭipāṭi, kulaparamparāti vuttaṃ hoti. Bhesajjaṃ karontassāti yathāvuttavidhinā karontassa, ‘‘tāvakālikaṃ dassāmī’’ti ābhogaṃ akatvā dentassapi pana antarāpattidukkaṭaṃ vinā micchājīvanaṃ vā kuladūsanaṃ vā na hotiyeva. Tenāha ‘‘vejjakammaṃ vā kuladūsakāpatti vā na hotī’’ti. Ñātakānañhi santakaṃ yācitvāpi gahetuṃ vaṭṭati, tasmā tattha kuladūsanādi na siyā. Sāratthadīpaniyampi (sārattha. ṭī. 2.185) ‘‘mayhaṃ dassanti karissantīti paccāsāya karontassapi yācitvā gahetabbaṭṭhānatāya ñātakesu vejjakammaṃ vā kuladūsakāpatti vā na hotīti vadantī’’ti vuttaṃ. Vajirabuddhiṭīkāyaṃ (vajira. ṭī. pārājika 186) pana ‘‘vejjakammaṃ vā kuladūsakāpatti vā na hotīti vacanato yāva sattamo kulaparivaṭṭo, tāva bhesajjaṃ kātuṃ vaṭṭatīti vadantī’’ti ettakameva vuttaṃ. Sabbapadesu vinicchayo veditabboti ‘‘cūḷamātuyā’’tiādīsu sabbapadesu cūḷamātuyā sāmikotiādinā yojetvā heṭṭhā vuttanayeneva vinicchayo veditabbo.
ཨུཔཛ྄ཛྷཱཡསྶ ཨཱཧརཱམཱཏི ཨིདཾ ཨུཔཛ྄ཛྷཱཡེན མམ ཉཱཏཀཱནཾ བྷེསཛྫཾ ཨཱཧརཐཱཏི ཨཱཎཏྟེཧི ཀཏྟབྦཝིདྷིདསྶནཏྠཾ ཝུཏྟཾ། ཨིམིནཱ ཙ སཱམཎེརཱདཱིནཾ ཨཔཙྩཱསཱཡཔི པརཛནསྶ བྷེསཛྫཀརཎཾ ན ཝཊྚཏཱིཏི དསྶེཏི། ཝུཏྟནཡེནེཝ པརིཡེསིཏྭཱཏི ཨིམིནཱ ‘‘བྷིཀྑཱཙཱརཝཏྟེན ཝཱ’’ཏིཨཱདིནཱ, ‘‘ཉཱཏིསཱམཎེརེཧི ཝཱ’’ཏིཨཱདིནཱ ཙ ཝུཏྟམཏྠཾ ཨཏིདིསཏི། ཨཔཙྩཱསཱིསནྟེནཱཏི (ཝི॰ ཝི॰ ཊཱི॰ ༡.༡༨༥) ཨཱགནྟུཀཙོརཱདཱིནཾ ཀརོནྟེནཔི མནུསྶཱ ནཱམ ཨུཔཀཱརཀཱ ཧོནྟཱིཏི ཨཏྟནོ ཏེཧི ལཱབྷཾ ཨཔཏྠཡནྟེན, པཙྩཱསཱཡ ཀརོནྟསྶ པན ཝེཛྫཀམྨཀུལདཱུསནཱདིནཱ དོསོ ཧོཏཱིཏི ཨདྷིཔྤཱཡོ། ཨེཝཉྷི ཨུཔཀཱརེ ཀཏེ སཱསནསྶ གུཎཾ ཉཏྭཱ པསཱིདནྟི, སངྒྷསྶ ཝཱ ཨུཔཀཱརཀཱ ཧོནྟཱིཏི ཀརཎེ པན དོསོ ནཏྠི། ཀེཙི པན ‘‘ཨཔཙྩཱསཱིསནྟེན ཨཱགནྟུཀཱདཱིནཾ པཊིཀྑིཏྟཔུགྒལཱནམྤི དཱཏུཾ ཝཊྚཏཱི’’ཏི ཝདནྟི, ཏཾ ན ཡུཏྟཾ ཀཏྟབྦཱཀཏྟབྦཊྛཱནཝིབྷཱགསྶ ནིརཏྠཀཏྟཔྤསངྒཏོ ཨཔཙྩཱསཱིསནྟེན ‘‘སབྦེསམྤི དཱཏུཾ ཀཱཏུཉྩ ཝཊྚཏཱི’’ཏི ཨེཏྟཀམཏྟསྶེཝ ཝཏྟབྦཏོ། ཨཔཙྩཱསཱིསནཉྩ མིཙྪཱཛཱིཝཀུལདཱུསནཱདིདོསནིསེདྷནཏྠམེཝ ཝུཏྟཾ ན བྷེསཛྫཀརཎསངྑཱཏཱཡ ཨིམིསྶཱ ཨནྟརཱཔཏྟིཡཱ མུཙྩནཏྠཾ ཨཱགནྟུཀཙོརཱདཱིནཾ ཨནུཉྙཱཏཱནཾ དཱནེནེཝ ཏཱཡ ཨཱཔཏྟིཡཱ མུཙྩནཏོཏི གཧེཏབྦཾ།
Upajjhāyassa āharāmāti idaṃ upajjhāyena mama ñātakānaṃ bhesajjaṃ āharathāti āṇattehi kattabbavidhidassanatthaṃ vuttaṃ. Iminā ca sāmaṇerādīnaṃ apaccāsāyapi parajanassa bhesajjakaraṇaṃ na vaṭṭatīti dasseti. Vuttanayeneva pariyesitvāti iminā ‘‘bhikkhācāravattena vā’’tiādinā, ‘‘ñātisāmaṇerehi vā’’tiādinā ca vuttamatthaṃ atidisati. Apaccāsīsantenāti (vi. vi. ṭī. 1.185) āgantukacorādīnaṃ karontenapi manussā nāma upakārakā hontīti attano tehi lābhaṃ apatthayantena, paccāsāya karontassa pana vejjakammakuladūsanādinā doso hotīti adhippāyo. Evañhi upakāre kate sāsanassa guṇaṃ ñatvā pasīdanti, saṅghassa vā upakārakā hontīti karaṇe pana doso natthi. Keci pana ‘‘apaccāsīsantena āgantukādīnaṃ paṭikkhittapuggalānampi dātuṃ vaṭṭatī’’ti vadanti, taṃ na yuttaṃ kattabbākattabbaṭṭhānavibhāgassa niratthakattappasaṅgato apaccāsīsantena ‘‘sabbesampi dātuṃ kātuñca vaṭṭatī’’ti ettakamattasseva vattabbato. Apaccāsīsanañca micchājīvakuladūsanādidosanisedhanatthameva vuttaṃ na bhesajjakaraṇasaṅkhātāya imissā antarāpattiyā muccanatthaṃ āgantukacorādīnaṃ anuññātānaṃ dāneneva tāya āpattiyā muccanatoti gahetabbaṃ.
༡༨. ཏེནེཝ ཨཔཙྩཱསཱིསནྟེནཔི ཨཀཱཏབྦཊྛཱནཾ དསྶེཏུཾ ‘‘སདྡྷཾ ཀུལ’’ནྟིཨཱདི ཝུཏྟཾ། ‘‘བྷེསཛྫཾ ཨཱཙིཀྑཐཱ’’ཏི ཝུཏྟེཔི ‘‘ཨཉྙམཉྙཾ པན ཀཐཱ ཀཱཏབྦཱ’’ཏི ཨིདཾ པརིཡཱཡཏྟཱ ཝཊྚཏི། ཨེཝཾ ཧེཊྛཱ ཝུཏྟནཡེན ཨིདཉྩིདཉྩ གཧེཏྭཱ ཀརོནྟཱིཏི ཨིམིནཱ པརིཡཱཡེན ཀཐེནྟསྶཔི ནེཝཏྠི དོསོཏི ཨཱཙརིཡཱ། པུཙྪནྟཱིཏི ཨིམིནཱ དིཊྛདིཊྛརོགཱིནཾ པརིཡཱཡེནཔི ཝཏྭཱ ཝིཙརཎཾ ཨཡུཏྟནྟི དསྶེཏི། པུཙྪིཏསྶཔི པན པཙྩཱསཱིསནྟསྶ པརིཡཱཡཀཐཱཔི ན ཝཊྚཏཱིཏི ཝདནྟི། སམུལླཔེསཱིཏི ཨཔཙྩཱསཱིསནྟོ ཨེཝ ཨཉྙམཉྙཾ ཀཐཾ སམུཊྛཱཔེསི། ཨཱཙརིཡབྷཱགོཏི ཝིནཡཱཙཱརཾ ཨཀོཔེཏྭཱ བྷེསཛྫཱཙིཀྑཎེན ཝེཛྫཱཙརིཡབྷཱགོ ཨཡནྟི ཨཏྠོཏི ཝིམཏིཝིནོདནིཡཾ (ཝི॰ ཝི॰ ཊཱི॰ ༡.༡༨༥) ཝུཏྟཾ།
18. Teneva apaccāsīsantenapi akātabbaṭṭhānaṃ dassetuṃ ‘‘saddhaṃ kula’’ntiādi vuttaṃ. ‘‘Bhesajjaṃ ācikkhathā’’ti vuttepi ‘‘aññamaññaṃ pana kathā kātabbā’’ti idaṃ pariyāyattā vaṭṭati. Evaṃ heṭṭhā vuttanayena idañcidañca gahetvā karontīti iminā pariyāyena kathentassapi nevatthi dosoti ācariyā. Pucchantīti iminā diṭṭhadiṭṭharogīnaṃ pariyāyenapi vatvā vicaraṇaṃ ayuttanti dasseti. Pucchitassapi pana paccāsīsantassa pariyāyakathāpi na vaṭṭatīti vadanti. Samullapesīti apaccāsīsanto eva aññamaññaṃ kathaṃ samuṭṭhāpesi. Ācariyabhāgoti vinayācāraṃ akopetvā bhesajjācikkhaṇena vejjācariyabhāgo ayanti atthoti vimativinodaniyaṃ (vi. vi. ṭī. 1.185) vuttaṃ.
སཱརཏྠདཱིཔནིཡཾ (སཱརཏྠ॰ ཊཱི॰ ༢.༡༨༥) པན ‘‘ཝིནཡལཀྑཎཾ ཨཛཱནནྟསྶ ཨནཱཙརིཡསྶ ཏདནུརཱུཔཝོཧཱརཱསམྦྷཝཏོ ཨཱིདིསསྶ ལཱབྷསྶ ཨུཔྤཏྟི ནཱམ ནཏྠཱིཏི ‘ཨཱཙརིཡབྷཱགོ ནཱམ ཨཡ’ནྟི ཝུཏྟཾ། ཝིནཡེ པཀཏཉྙུནཱ ཨཱཙརིཡེན ལབྷིཏབྦབྷཱགོ ཨཡནྟི ཝུཏྟཾ ཧོཏཱི’’ཏི ཝུཏྟཾ། ‘‘པུཔྥཔཱུཛནཏྠཱཡ དིནྣེཔི ཨཀཔྤིཡཝོཧཱརེན ཝིདྷཱནསྶ ཨཡུཏྟཏྟཱ ‘ཀཔྤིཡཝསེནཱ’ཏི ཝུཏྟཾ, ‘པུཔྥཾ ཨཱཧརཐཱ’ཏིཨཱདིནཱ ཀཔྤིཡཝོཧཱརཝསེནཱཏི ཨཏྠོ’’ཏི སཱརཏྠདཱིཔནིཡཾ (སཱརཏྠ॰ ཊཱི॰ ༢.༡༨༥) ཝུཏྟཾ། ཝིམཏིཝིནོདནིཡཾ (ཝི॰ ཝི॰ ཊཱི॰ ༡.༡༨༥) པན ‘‘པུཔྥཔཱུཛནཏྠཱཡཔི སམྤཊིཙྪིཡམཱནཾ རཱུཔིཡཾ ཨཏྟནོ སནྟཀཏྟབྷཛནེན ནིསྶགྒིཡམེཝཱཏི ཨཱཧ ‘ཀཔྤིཡཝསེན གཱཧཱཔེཏྭཱ’ཏི། ‘ཨམྷཱཀཾ རཱུཔིཡཾ ན ཝཊྚཏི, པུཔྥཔཱུཛནཏྠཾ པུཔྥཾ ཝཊྚཏཱི’ཏིཨཱདིནཱ པཊིཀྑིཔིཏྭཱ ཀཔྤིཡེན ཀམྨེན གཱཧཱཔེཏྭཱཏི ཨཏྠོ’’ཏི ཝུཏྟཾ། ཝཛིརབུདྡྷིཊཱིཀཱཡཾ (ཝཛིར॰ ཊཱི॰ པཱརཱཛིཀ ༡༨༦) པན ‘‘ཀཔྤིཡཝསེནཱཏི ཨམྷཱཀཾ པུཔྥཾ ཨཱནེཐཱཏིཨཱདིནཱ། ‘པཱུཛཾ ཨཀཱསཱི’ཏི ཝུཏྟཏྟཱ སཡཾ གཧེཏུཾ ན ཝཊྚཏཱིཏི ཝདནྟཱི’’ཏི ཨེཏྟཀམེཝ ཝུཏྟཾ། ཨཡམེཏྠ བྷེསཛྫཀརཎཝིནིཙྪཡཀཐཱལངྐཱརོ།
Sāratthadīpaniyaṃ (sārattha. ṭī. 2.185) pana ‘‘vinayalakkhaṇaṃ ajānantassa anācariyassa tadanurūpavohārāsambhavato īdisassa lābhassa uppatti nāma natthīti ‘ācariyabhāgo nāma aya’nti vuttaṃ. Vinaye pakataññunā ācariyena labhitabbabhāgo ayanti vuttaṃ hotī’’ti vuttaṃ. ‘‘Pupphapūjanatthāya dinnepi akappiyavohārena vidhānassa ayuttattā ‘kappiyavasenā’ti vuttaṃ, ‘pupphaṃ āharathā’tiādinā kappiyavohāravasenāti attho’’ti sāratthadīpaniyaṃ (sārattha. ṭī. 2.185) vuttaṃ. Vimativinodaniyaṃ (vi. vi. ṭī. 1.185) pana ‘‘pupphapūjanatthāyapi sampaṭicchiyamānaṃ rūpiyaṃ attano santakattabhajanena nissaggiyamevāti āha ‘kappiyavasena gāhāpetvā’ti. ‘Amhākaṃ rūpiyaṃ na vaṭṭati, pupphapūjanatthaṃ pupphaṃ vaṭṭatī’tiādinā paṭikkhipitvā kappiyena kammena gāhāpetvāti attho’’ti vuttaṃ. Vajirabuddhiṭīkāyaṃ (vajira. ṭī. pārājika 186) pana ‘‘kappiyavasenāti amhākaṃ pupphaṃ ānethātiādinā. ‘Pūjaṃ akāsī’ti vuttattā sayaṃ gahetuṃ na vaṭṭatīti vadantī’’ti ettakameva vuttaṃ. Ayamettha bhesajjakaraṇavinicchayakathālaṅkāro.
༡༩. ཨེཝཾ བྷེསཛྫཀརཎཝིནིཙྪཡཾ ཀཐེཏྭཱ ཨིདཱནི པརིཏྟཀརཎཝིནིཙྪཡཾ ཀཐེཏུམཱཧ ‘‘པརིཏྟེ པནཱ’’ཏིཨཱདི། ཏཏྠ ཡདི ‘‘པརིཏྟཾ ཀརོཐཱ’’ཏི ཝུཏྟེ ཀརོནྟི, བྷེསཛྫཀརཎཾ ཝིཡ གིཧིཀམྨཾ ཝིཡ ཙ ཧོཏཱིཏི ‘‘ན ཀཱཏབྦ’’ནྟི ཝུཏྟཾ། ‘‘པརིཏྟཾ བྷཎཐཱ’’ཏི ཝུཏྟེ པན དྷམྨཛ྄ཛྷེསནཏྟཱ ཨནཛ྄ཛྷིཊྛེནཔི བྷཎིཏབྦོ དྷམྨོ, པགེཝ ཨཛ྄ཛྷིཊྛེནཱཏི ‘‘ཀཱཏབྦ’’ནྟི ཝུཏྟཾ, ཙཱལེཏྭཱ སུཏྟཾ པརིམཛྫིཏྭཱཏི པརིཏྟཾ ཀརོནྟེན ཀཱཏབྦཝིདྷིཾ དསྶེཏི། ཙཱལེཏྭཱ སུཏྟཾ པརིམཛྫིཏྭཱཏི ཨིདཾ ཝཱ ‘‘པརིཏྟཱཎཾ ཨེཏྠ པཝེསེམཱི’’ཏི ཙིཏྟེན ཨེཝཾ ཀཏེ པརིཏྟཱཎཱ ཨེཏྠ པཝེསིཏཱ ནཱམ ཧོཏཱིཏི ཝུཏྟཾ། ཝིཧཱརཏོ…པེ॰… དུཀྐཊནྟི ཨིདཾ ཨཉྙཱཏཀེ གཧཊྛེ སནྡྷཱཡ ཝུཏྟནྟི ཝདནྟི། པཱདེསུ ཨུདཀཾ ཨཱཀིརིཏྭཱཏི ཨིདཾ ཏསྨིཾ དེསེ ཙཱརིཏྟཝསེན ཝུཏྟཾ། ཏཏྠ ཧི པཱལི༹ཡཱ ནིསིནྣཱནཾ བྷིཀྑཱུནཾ པཱདེསུ རོགཝཱུཔསམནཱདིཨཏྠཱཡ ཨུདཀཾ སིཉྩིཏྭཱ པརིཏྟཾ ཀཱཏུཾ སུཏྟཉྩ ཋཔེཏྭཱ ‘‘པརིཏྟཾ བྷཎཐཱ’’ཏི ཝཏྭཱ གཙྪནྟི། ཨེཝཉྷི ཀརིཡམཱནེ ཡདི པཱདེ ཨཔནེནྟི, མནུསྶཱ ཏཾ ‘‘ཨཝམངྒལ’’ནྟི མཉྙནྟི ‘‘རོགོ ན ཝཱུཔསམེསྶཏཱི’’ཏི། ཏེནཱཧ ‘‘ན པཱདཱ ཨཔནེཏབྦཱ’’ཏི།
19. Evaṃ bhesajjakaraṇavinicchayaṃ kathetvā idāni parittakaraṇavinicchayaṃ kathetumāha ‘‘paritte panā’’tiādi. Tattha yadi ‘‘parittaṃ karothā’’ti vutte karonti, bhesajjakaraṇaṃ viya gihikammaṃ viya ca hotīti ‘‘na kātabba’’nti vuttaṃ. ‘‘Parittaṃ bhaṇathā’’ti vutte pana dhammajjhesanattā anajjhiṭṭhenapi bhaṇitabbo dhammo, pageva ajjhiṭṭhenāti ‘‘kātabba’’nti vuttaṃ, cāletvā suttaṃ parimajjitvāti parittaṃ karontena kātabbavidhiṃ dasseti. Cāletvā suttaṃ parimajjitvāti idaṃ vā ‘‘parittāṇaṃ ettha pavesemī’’ti cittena evaṃ kate parittāṇā ettha pavesitā nāma hotīti vuttaṃ. Vihārato…pe… dukkaṭanti idaṃ aññātake gahaṭṭhe sandhāya vuttanti vadanti. Pādesu udakaṃ ākiritvāti idaṃ tasmiṃ dese cārittavasena vuttaṃ. Tattha hi pāḷiyā nisinnānaṃ bhikkhūnaṃ pādesu rogavūpasamanādiatthāya udakaṃ siñcitvā parittaṃ kātuṃ suttañca ṭhapetvā ‘‘parittaṃ bhaṇathā’’ti vatvā gacchanti. Evañhi kariyamāne yadi pāde apanenti, manussā taṃ ‘‘avamaṅgala’’nti maññanti ‘‘rogo na vūpasamessatī’’ti. Tenāha ‘‘na pādā apanetabbā’’ti.
མཏསརཱིརདསྶནེ ཝིཡ ཀེཝལེ སུསཱནདསྶནེཔི ཨིདཾ ཛཱཏཱནཾ སཏྟཱནཾ ཝཡགམནཊྛཱནནྟི མརཎསཉྙཱ ཨུཔྤཛྫཏཱིཏི ཨཱཧ ‘‘སཱིཝཐིཀདསྶནེ…པེ॰… མརཎསྶཏིཾ པཊིལབྷིསྶཱམཱཏི གནྟུཾ ཝཊྚཏཱི’’ཏི། ལེསཀཔྤཾ ཨཀཏྭཱ སམུཔྤནྣསུདྡྷཙིཏྟེན ‘‘པརིཝཱརཏྠཱཡ ཨཱགཙྪནྟཱུ’’ཏི ཝུཏྟེཔི གནྟུཾ ཝཊྚཏཱིཏི ཝིམཏིཝིནོདནིཡཾ (ཝི॰ ཝི॰ ཊཱི॰ ༡.༡༨༥) ཝུཏྟཾ། ཨེཏེན ཨསུབྷདསྶནནྟི ཝཙནམཏྟེན ལེསཀཔྤཾ ཀཏྭཱ ཨེཝཾ གཏེ མཏསྶ ཉཱཏཀཱ པསཱིདིསྶནྟི, དཱནཾ དསྶནྟི, མཡཾ ལཱབྷཾ ལབྷིསྶཱམ, ཨུཔཊྛཱཀཾ ལབྷིསྶཱམཱཏི ཨསུདྡྷཙིཏྟེན གནྟུཾ ན ཝཊྚཏཱིཏི དསྶེཏི། ཀམྨཊྛཱནསཱིསེན པན ‘‘མརཎསྶཏིཾ ལབྷིསྶཱམཱ’’ཏིཨཱདིནཱ སུདྡྷཙིཏྟེན པཀྐོསིཏེཔི ཨཔཀྐོསིཏེཔི གནྟུཾ ཝཊྚཏཱིཏི དཱིཔེཏི། ཏཱལཔཎྞསྶ པརིཏྟལེཁནཊྛཱནཏྟཱ པརིཏྟསུཏྟསྶ པརིཏྟཀརཎསཉྙཱཎཏྟཱ ཏཱནི དིསྭཱ ཨམནུསྶཱ པརིཏྟསཉྙཱཡ ཨཔཀྐམནྟཱིཏི ཨཱཧ ‘‘ཏཱལཔཎྞཾ པན པརིཏྟསུཏྟཾ ཝཱ ཧཏྠེ ཝཱ པཱདེ ཝཱ བནྡྷིཏབྦ’’ནྟི།
Matasarīradassane viya kevale susānadassanepi idaṃ jātānaṃ sattānaṃ vayagamanaṭṭhānanti maraṇasaññā uppajjatīti āha ‘‘sīvathikadassane…pe… maraṇassatiṃ paṭilabhissāmāti gantuṃ vaṭṭatī’’ti. Lesakappaṃ akatvā samuppannasuddhacittena ‘‘parivāratthāya āgacchantū’’ti vuttepi gantuṃ vaṭṭatīti vimativinodaniyaṃ (vi. vi. ṭī. 1.185) vuttaṃ. Etena asubhadassananti vacanamattena lesakappaṃ katvā evaṃ gate matassa ñātakā pasīdissanti, dānaṃ dassanti, mayaṃ lābhaṃ labhissāma, upaṭṭhākaṃ labhissāmāti asuddhacittena gantuṃ na vaṭṭatīti dasseti. Kammaṭṭhānasīsena pana ‘‘maraṇassatiṃ labhissāmā’’tiādinā suddhacittena pakkositepi apakkositepi gantuṃ vaṭṭatīti dīpeti. Tālapaṇṇassa parittalekhanaṭṭhānattā parittasuttassa parittakaraṇasaññāṇattā tāni disvā amanussā parittasaññāya apakkamantīti āha ‘‘tālapaṇṇaṃ pana parittasuttaṃ vā hatthe vā pāde vā bandhitabba’’nti.
ཨེཏྠ ཙ ཨཱདིཏོ པཊྛཱཡ ཡཱཝ ‘‘ཨཱཊཱནཱཊིཡཔརིཏྟཾ (དཱི॰ ནི॰ ༣.༢༧༥ ཨཱདཡོ) ཝཱ བྷཎིཏབྦ’’ནྟི ཨེཏྟཀོཡེཝ ཝིནཡཊྛཀཐཱབྷཏོ པཱལི༹མུཏྟཔརིཏྟཀརཎཝིནིཙྪཡོ, ན པན ཏཏོ པརཾ ཝུཏྟོ, ཏསྨཱ ‘‘ཨིདྷ པནཱ’’ཏིཨཱདིཀོ ཀཐཱམགྒོ སམནྟཔཱསཱདིཀཱཡཾ ནཏྠི, ཏཱིསུ ཊཱིཀཱསུཔི ཏཾསཾཝཎྞནཱནཡོ ནཏྠི, ཏཐཱཔི སོ སུཏྟཊྛཀཐཱཡཾ ཨཱགཏོཝཱཏི ཏཾ དསྶེཏུཾ ‘‘ཨིདྷ པན ཨཱཊཱནཱཊིཡསུཏྟསྶ པརིཀམྨཾ ཝེདིཏབྦ’’ནྟིཨཱདིམཱཧ། ཏཏྠ ཨིདྷཱཏི ‘‘ཨཱཊཱནཱཊིཡཔརིཏྟཾ ཝཱ བྷཎིཏབྦ’’ནྟི ཝཙནེ། པནཱཏི ཝིསེསཏྠེ ནིཔཱཏོ། དཱིགྷནིཀཱཡེ པཱཐིཀཝགྒེ ཨཱགཏསྶ ཨཱཊཱནཱཊིཡཔརིཏྟསྶ པརིཀམྨཾ ཨེཝཾ ཝེདིཏབྦནྟི ཡོཛནཱ། ཡདི པཋམམེཝ ན ཝཏྟབྦཾ, ཨཐ ཀིཾ ཀཱཏབྦནྟི ཨཱཧ ‘‘མེཏྟསུཏྟ’’ནྟིཨཱདི། ཨེཝཉྷི ལདྡྷཱསེཝནཾ ཧུཏྭཱ ཨཏིཨོཛཝནྟཾ ཧོཏི།
Ettha ca ādito paṭṭhāya yāva ‘‘āṭānāṭiyaparittaṃ (dī. ni. 3.275 ādayo) vā bhaṇitabba’’nti ettakoyeva vinayaṭṭhakathābhato pāḷimuttaparittakaraṇavinicchayo, na pana tato paraṃ vutto, tasmā ‘‘idha panā’’tiādiko kathāmaggo samantapāsādikāyaṃ natthi, tīsu ṭīkāsupi taṃsaṃvaṇṇanānayo natthi, tathāpi so suttaṭṭhakathāyaṃ āgatovāti taṃ dassetuṃ ‘‘idha pana āṭānāṭiyasuttassa parikammaṃ veditabba’’ntiādimāha. Tattha idhāti ‘‘āṭānāṭiyaparittaṃ vā bhaṇitabba’’nti vacane. Panāti visesatthe nipāto. Dīghanikāye pāthikavagge āgatassa āṭānāṭiyaparittassa parikammaṃ evaṃ veditabbanti yojanā. Yadi paṭhamameva na vattabbaṃ, atha kiṃ kātabbanti āha ‘‘mettasutta’’ntiādi. Evañhi laddhāsevanaṃ hutvā atiojavantaṃ hoti.
པིཊྛཾ ཝཱ མཾསཾ ཝཱཏི ཝཱ-སདྡོ ཨནིཡམཏྠོ, ཏེན མཙྪཁཎྜཔཱུཝཁཛྫཀཱདཡོ སངྒཎྷཱཏི། ཨོཏཱརཾ ལབྷནྟཱིཏི ཨཏྟནཱ པིཡཱཡིཏཁཱདནཱིཡནིབདྡྷཝསནཊྛཱནལཱབྷཏཱཡ ཨཝཏཱརཎཾ ལབྷནྟི། ཧརིཏཱུཔལིཏྟནྟི ཨལླགོམཡལིཏྟཾ། ཨིདཉྷི པོརཱཎཀཙཱརིཏྟཾ བྷཱུམིཝིསུདྡྷཀརཎཾ། པརིསུདྡྷཾ…པེ॰… ནིསཱིདིཏབྦནྟི ཨིམིནཱ པརིཏྟཀཱརཀསྶ བྷིཀྑུནོ མེཏྟཱཀརུཎཱཝསེན ཙིཏྟཝིསུདྡྷིཔི ཨིཙྪིཏབྦཱཏི དསྶེཏི། ཨེཝཉྷི སཏི ཨུཔརི ཝཀྑམཱནཨུབྷཡཏོ རཀྑཱསཾཝིདྷཱནེན སམེཏི། ཊཱིཀཱཡཾ (དཱི॰ ནི॰ ཊཱི॰ ༣.༢༨༢) པན ‘‘སརཱིརསུདྡྷིཔི ཨིཙྪིཏབྦཱཏི དསྶེཏཱི’’ཏི ཝུཏྟཾ། ཏདེཏཾ ཝིཙཱརེཏབྦཾ། ན ཧི ‘‘ཀཱཡསུདྡྷིམཏྟེན ཨམནུསྶཱནཾ པིཡོ ཧོཏཱི’’ཏི ཝུཏྟཾ, མེཏྟཱཝསེནེཝ པན ཝུཏྟཾ། ཝུཏྟཉྷེཏཾ བྷགཝཏཱ ‘‘མེཏྟཱཡ, བྷིཀྑཝེ, ཙེཏོཝིམུཏྟིཡཱ…པེ॰… ཨེཀཱདསཱནིསཾསཱ པཱཊིཀངྑཱ། ཀཏམེ ཨེཀཱདས? སུཁཾ སུཔཏི, སུཁཾ པཊིབུཛ྄ཛྷཏི, ན པཱཔཀཾ སུཔིནཾ པསྶཏི, མནུསྶཱནཾ པིཡོ ཧོཏི, ཨམནུསྶཱནཾ པིཡོ ཧོཏཱི’’ཏིཨཱདི (ཨ॰ ནི॰ ༡༡.༡༥; པརི॰ ༣༣༡; མི॰ པ॰ ༤.༤.༦)།
Piṭṭhaṃ vā maṃsaṃ vāti vā-saddo aniyamattho, tena macchakhaṇḍapūvakhajjakādayo saṅgaṇhāti. Otāraṃ labhantīti attanā piyāyitakhādanīyanibaddhavasanaṭṭhānalābhatāya avatāraṇaṃ labhanti. Haritūpalittanti allagomayalittaṃ. Idañhi porāṇakacārittaṃ bhūmivisuddhakaraṇaṃ. Parisuddhaṃ…pe… nisīditabbanti iminā parittakārakassa bhikkhuno mettākaruṇāvasena cittavisuddhipi icchitabbāti dasseti. Evañhi sati upari vakkhamānaubhayato rakkhāsaṃvidhānena sameti. Ṭīkāyaṃ (dī. ni. ṭī. 3.282) pana ‘‘sarīrasuddhipi icchitabbāti dassetī’’ti vuttaṃ. Tadetaṃ vicāretabbaṃ. Na hi ‘‘kāyasuddhimattena amanussānaṃ piyo hotī’’ti vuttaṃ, mettāvaseneva pana vuttaṃ. Vuttañhetaṃ bhagavatā ‘‘mettāya, bhikkhave, cetovimuttiyā…pe… ekādasānisaṃsā pāṭikaṅkhā. Katame ekādasa? Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hotī’’tiādi (a. ni. 11.15; pari. 331; mi. pa. 4.4.6).
པརིཏྟཀཱརཀོ…པེ॰… སམྤརིཝཱརིཏེནཱཏི ཨིདཾ པརིཏྟཀརཎོ བཱཧིརཏོ ཨཱརཀྑཱསཾཝིདྷཱནཾ, ‘‘མེཏྟ…པེ॰… ཝཏྟབྦ’’ནྟི ཨབྦྷནྟརཏོ ཨཱརཀྑཱསཾཝིདྷཱནཾ, ཨེཝཾ ཨུབྷཡཏོ རཀྑཱསཾཝིདྷཱནཾ ཧོཏི། ཨེཝཉྷི ཨམནུསྶཱ པརིཏྟཀཱརཀསྶ ཨནྟརཱཡཾ ཀཱཏུཾ ན ཝིསཧནྟི། མངྒལཀཐཱ ཝཏྟབྦཱཏི ཨམནུསྶཱནཾ ཏོསནཏྠཱཡ པཎྞཱཀཱརཾ ཀཏྭཱ མཧཱམངྒལཀཐཱ ཀཐེཏབྦཱ། ཨེཝཾ ཨུཔརི ཝཀྑམཱནེན ‘‘ཏུཡ྄ཧཾ པཎྞཱཀཱརཏྠཱཡ མཧཱམངྒལཀཐཱ ཝུཏྟཱ’’ཏི ཝཙནེན སམེཏི། ཊཱིཀཱཡཾ པན ‘‘པུབྦུཔཙཱརཝསེན ཝཏྟབྦཱ’’ཏི ཝུཏྟཾ། སབྦསནྣིཔཱཏོཏི ཏསྨིཾ ཝིཧཱརེ ཏསྨིཾ གཱམཀྑེཏྟེ སབྦེསཾ བྷིཀྑཱུནཾ སནྣིཔཱཏོ གྷོསེཏབྦོ ‘‘ཙེཏིཡངྒཎེ སབྦེཧི སནྣིཔཏིཏབྦ’’ནྟི། ཨནཱགནྟུཾནཱམ ན ལབྷཏཱིཏི ཨམནུསྶོ བུདྡྷཱཎཱབྷཡེན རཱཛཱཎཱབྷཡེན ཨནཱགནྟུཾ ན ལབྷཏི ཙཏུནྣཾ མཧཱརཱཛཱུནཾ ཨཱཎཱཊྛཱནིཡཏྟཱ། གཧིཏཀཱཔདེསེན ཨམནུསྶོཝ པུཙྪིཏོ ཧོཏཱིཏི ‘‘ཨམནུསྶགཧིཏཀོ ‘ཏྭཾ ཀོ ནཱམོ’ཏི པུཙྪིཏབྦོ’’ཏི ཝུཏྟཾ། མཱལཱགནྡྷཱདཱིསཱུཏི མཱལཱགནྡྷཱདིཔཱུཛཱསུ། ཨཱསནཔཱུཛཱཡཱཏི ཙེཏིཡེ བུདྡྷཱསནཔཱུཛཱཡ། པིཎྜཔཱཏེཏི བྷིཀྑུསངྒྷསྶ པིཎྜཔཱཏདཱནེ། ཨེཝཾ ཝཏྠུཔྤདེསེན ཙེཏནཱ ཝུཏྟཱ, ཏསྨཱ པཏྟིདཱནཾ སམྦྷཝཏི།
Parittakārako…pe… samparivāritenāti idaṃ parittakaraṇo bāhirato ārakkhāsaṃvidhānaṃ, ‘‘metta…pe… vattabba’’nti abbhantarato ārakkhāsaṃvidhānaṃ, evaṃ ubhayato rakkhāsaṃvidhānaṃ hoti. Evañhi amanussā parittakārakassa antarāyaṃ kātuṃ na visahanti. Maṅgalakathā vattabbāti amanussānaṃ tosanatthāya paṇṇākāraṃ katvā mahāmaṅgalakathā kathetabbā. Evaṃ upari vakkhamānena ‘‘tuyhaṃ paṇṇākāratthāya mahāmaṅgalakathā vuttā’’ti vacanena sameti. Ṭīkāyaṃ pana ‘‘pubbupacāravasena vattabbā’’ti vuttaṃ. Sabbasannipātoti tasmiṃ vihāre tasmiṃ gāmakkhette sabbesaṃ bhikkhūnaṃ sannipāto ghosetabbo ‘‘cetiyaṅgaṇe sabbehi sannipatitabba’’nti. Anāgantuṃnāmana labhatīti amanusso buddhāṇābhayena rājāṇābhayena anāgantuṃ na labhati catunnaṃ mahārājūnaṃ āṇāṭṭhāniyattā. Gahitakāpadesena amanussova pucchito hotīti ‘‘amanussagahitako ‘tvaṃ ko nāmo’ti pucchitabbo’’ti vuttaṃ. Mālāgandhādīsūti mālāgandhādipūjāsu. Āsanapūjāyāti cetiye buddhāsanapūjāya. Piṇḍapāteti bhikkhusaṅghassa piṇḍapātadāne. Evaṃ vatthuppadesena cetanā vuttā, tasmā pattidānaṃ sambhavati.
དེཝཏཱནནྟི ཡཀྑསེནཱཔཏཱིནཾ། ཝུཏྟཉྷི ཨཱཊཱནཱཊིཡསུཏྟེ (དཱི॰ ནི॰ ༣.༢༨༣, ༢༩༣) ‘‘ཨིམེསཾ ཡཀྑཱནཾ མཧཱཡཀྑཱནཾ སེནཱཔཏཱིནཾ མཧཱསེནཱཔཏཱིནཾ ཨུཛ྄ཛྷཱཔེཏབྦ’’ནྟིཨཱདི། ཨཱཊཱཏི དབྦིམུཁསཀུཎཱ། ཏེ ཨཱཊཱ ནདནྟི ཨེཏྠཱཏི ཨཱཊཱནཱདཾ, དེཝནགརཾ, ཨཱཊཱནཱདེ ཀཏཾ ཨཱཊཱནཱདིཡཾ, སུཏྟཾ། ཊཱིཀཱཡཾ (དཱི॰ ནི॰ ཊཱི॰ ༣.༢༨༢) ‘‘པརིཏྟཾ བྷཎིཏབྦནྟི ཨེཏྠཱཔི ‘མེཏྟཙིཏྟཾ པུརེཙཱརིཀཾ ཀཏྭཱ’ཏི ཙ ‘མངྒལཀཐཱ ཝཏྟབྦཱ’ཏི ཙ ‘ཝིཧཱརསྶ ཨུཔཝནེ’ཏི ཙ ཨེཝམཱདི སབྦཾ གིཧཱིནཾ པརིཏྟཀརཎེ ཝུཏྟཾ པརིཀམྨཾ ཀཱཏབྦམེཝཱ’’ཏི ཝུཏྟཾ, ཨེཝཾ སཏི ཨཊྛཀཐཱཡཾ (དཱི॰ ནི॰ ཨཊྛ॰ ༣.༢༨༢) ‘‘ཨེཏཾ ཏཱཝ གིཧཱིནཾ པརིཀམྨ’’ནྟི ཝཏྭཱ ‘‘སཙེ པན བྷིཀྑཱུ’’ཏིཨཱདིནཱ ཝིསེསཏྠཛོཏཀེན པན-སདྡེན སཧ ཝུཙྩམཱནཾ ‘‘ཨིདཾ བྷིཀྑཱུནཾ པརིཀམྨ’’ནྟི ཝཙནཾ ནིརཏྠཀཾ ཝིཡ ཧོཏི། ཨཝིསེསེ ཧི སཏི བྷེདོ ཀཱཏབྦོ ན སིཡཱ། བྷིཀྑཱུནཉྩ ཡཐཱཝུཏྟཱཝ བཱཧིརཱརཀྑཱ དུཀྐརཱ ཧོཏི, ཏསྨཱ གིཧཱིནཾ པརིཏྟཀརཎེ ཝུཏྟཔརིཀམྨེ ཨསམྤཛྫམཱནེཔི ཨཊྛཀཐཱཡཾ ཝུཏྟནཡེནེཝ ཀཱཏུཾ ཝཊྚཏཱིཏི ནོ མཏི།
Devatānanti yakkhasenāpatīnaṃ. Vuttañhi āṭānāṭiyasutte (dī. ni. 3.283, 293) ‘‘imesaṃ yakkhānaṃ mahāyakkhānaṃ senāpatīnaṃ mahāsenāpatīnaṃ ujjhāpetabba’’ntiādi. Āṭāti dabbimukhasakuṇā. Te āṭā nadanti etthāti āṭānādaṃ, devanagaraṃ, āṭānāde kataṃ āṭānādiyaṃ, suttaṃ. Ṭīkāyaṃ (dī. ni. ṭī. 3.282) ‘‘parittaṃ bhaṇitabbanti etthāpi ‘mettacittaṃ purecārikaṃ katvā’ti ca ‘maṅgalakathā vattabbā’ti ca ‘vihārassa upavane’ti ca evamādi sabbaṃ gihīnaṃ parittakaraṇe vuttaṃ parikammaṃ kātabbamevā’’ti vuttaṃ, evaṃ sati aṭṭhakathāyaṃ (dī. ni. aṭṭha. 3.282) ‘‘etaṃ tāva gihīnaṃ parikamma’’nti vatvā ‘‘sace pana bhikkhū’’tiādinā visesatthajotakena pana-saddena saha vuccamānaṃ ‘‘idaṃ bhikkhūnaṃ parikamma’’nti vacanaṃ niratthakaṃ viya hoti. Avisese hi sati bhedo kātabbo na siyā. Bhikkhūnañca yathāvuttāva bāhirārakkhā dukkarā hoti, tasmā gihīnaṃ parittakaraṇe vuttaparikamme asampajjamānepi aṭṭhakathāyaṃ vuttanayeneva kātuṃ vaṭṭatīti no mati.
ཨིདཾ པན ཨིདྷ ཨཱགཏཾ ཨཱཊཱནཱཊིཡསུཏྟཔརིཀམྨཾ སུཏྭཱ ‘‘ཨིདཾ སུཏྟཾ ཨམནུསྶཱནཾ ཨམནཱཔཾ, སཛ྄ཛྷཱཡནྟསྶ པརིཏྟཾ ཀརོནྟསྶ ཨམནུསྶཱ ཨནྟརཱཡཾ ཀརེཡྻུ’’ནྟི མཉྙམཱནཱ པོརཱཎཱ ཙཏཱུཧི མཧཱརཱཛེཧི ཨཱརོཙིཏཾ སབྦཉྙུབུདྡྷེན དེསིཏཾ མཱུལབྷཱུཏཾ དཱིགྷནིཀཱཡེ ཨཱགཏཾ ཨཱཊཱནཱཊིཡསུཏྟཾ (དཱི॰ ནི॰ ༣.༢༧༥ ཨཱདཡོ) པཧཱཡ མཱུལསུཏྟཏོ གཱཐཱཚཀྐམེཝ གཧེཏྭཱ ཨཝསེསཾ སབྦཾ སུཏྟཾ ཋཔེཏྭཱ ཨཉྙགཱཐཱཡོ པཀྑིཔིཏྭཱ ‘‘ཨཱཊཱནཱཊིཡཔརིཏྟ’’ནྟི ཋཔེསུཾ, ཏམྤི པརིཏྟཾ ཨམཱུལབྷཱུཏཏྟཱ ཨེཀེནཱཀཱརེན དྷཱརེཏུཾ ཨསཀྐོནྟཱ ཀེཙི སཾཁིཏྟེན དྷཱརེནྟི, ཀེཙི ཝིཏྠཱརེན, ཀེཙི ཨེཀཙྩཱ གཱཐཱཡོ པཀྑིཔནྟི, ཀེཙི ནིཀྑིཔནྟི, ཀེཙི བྷིཀྑཱུ ཏཾམིསྶཀཔརིཏྟམྤི མངྒལཀརཎཀཱལཱདཱིསུ ཝཏྟུམཝིསཧནྟཱ ཏཾ ཋཔེཏྭཱ ཨཉྙསུཏྟཱནིཡེཝ བྷཎནྟི, སབྦམེཏཾ ཨཡུཏྟཾ ཝིཡ དིསྶཏི། ཀསྨཱ? ཙཏྟཱརོཔི མཧཱརཱཛཱནོ ཨིམཾ ཨཱཊཱནཱཊིཡཾ རཀྑཾ སཾཝིདཧམཱནཱ བུདྡྷསཱསནེ ཨམནུསྶཱནཾ པསཱདཱཡ, ཙཏསྶནྣཾ པརིསཱནཾ ཨཝིཧེཋནཱཡ ཨེཝ སཾཝིདཧིཾསུ , ན ཨཉྙེན ཀཱརཎེན། ཝུཏྟཉྷི ཏཏྠ ‘‘ཏཏྠ སནྟི ཨུལཱ༹རཱ ཡཀྑཱནིཝཱསིནོ, ཡེ ཨིམསྨིཾ བྷགཝཏོ པཱཝཙནེ ཨཔྤསནྣཱ, ཏེསཾ པསཱདཱཡ ཨུགྒཎྷཱཏུ བྷནྟེ བྷགཝཱ ཨཱཊཱནཱཊིཡཾ རཀྑཾ བྷིཀྑཱུནཾ བྷིཀྑུནཱིནཾ ཨུཔཱསཀཱནཾ ཨུཔཱསིཀཱནཾ གུཏྟིཡཱ རཀྑཱཡ ཨཝིཧིཾསཱཡ ཕཱསུཝིཧཱརཱཡཱ’’ཏི (དཱི॰ ནི॰ ༣.༢༧༦)།
Idaṃ pana idha āgataṃ āṭānāṭiyasuttaparikammaṃ sutvā ‘‘idaṃ suttaṃ amanussānaṃ amanāpaṃ, sajjhāyantassa parittaṃ karontassa amanussā antarāyaṃ kareyyu’’nti maññamānā porāṇā catūhi mahārājehi ārocitaṃ sabbaññubuddhena desitaṃ mūlabhūtaṃ dīghanikāye āgataṃ āṭānāṭiyasuttaṃ (dī. ni. 3.275 ādayo) pahāya mūlasuttato gāthāchakkameva gahetvā avasesaṃ sabbaṃ suttaṃ ṭhapetvā aññagāthāyo pakkhipitvā ‘‘āṭānāṭiyaparitta’’nti ṭhapesuṃ, tampi parittaṃ amūlabhūtattā ekenākārena dhāretuṃ asakkontā keci saṃkhittena dhārenti, keci vitthārena, keci ekaccā gāthāyo pakkhipanti, keci nikkhipanti, keci bhikkhū taṃmissakaparittampi maṅgalakaraṇakālādīsu vattumavisahantā taṃ ṭhapetvā aññasuttāniyeva bhaṇanti, sabbametaṃ ayuttaṃ viya dissati. Kasmā? Cattāropi mahārājāno imaṃ āṭānāṭiyaṃ rakkhaṃ saṃvidahamānā buddhasāsane amanussānaṃ pasādāya, catassannaṃ parisānaṃ aviheṭhanāya eva saṃvidahiṃsu , na aññena kāraṇena. Vuttañhi tattha ‘‘tattha santi uḷārā yakkhānivāsino, ye imasmiṃ bhagavato pāvacane appasannā, tesaṃ pasādāya uggaṇhātu bhante bhagavā āṭānāṭiyaṃ rakkhaṃ bhikkhūnaṃ bhikkhunīnaṃ upāsakānaṃ upāsikānaṃ guttiyā rakkhāya avihiṃsāya phāsuvihārāyā’’ti (dī. ni. 3.276).
སམྨཱསམྦུདྡྷེནཔི ཨིམསྶ སུཏྟསྶ ནིགམནེ ‘‘ཨུགྒཎྷཱཐ བྷིཀྑཝེ ཨཱཊཱནཱཊིཡཾ རཀྑཾ, པརིཡཱཔུཎཱཐ བྷིཀྑཝེ ཨཱཊཱནཱཊིཡཾ རཀྑཾ, དྷཱརེཐ བྷིཀྑཝེ ཨཱཊཱནཱཊིཡཾ རཀྑཾ, ཨཏྠསཾཧིཏཱ བྷིཀྑཝེ ཨཱཊཱནཱཊིཡཱ རཀྑཱ བྷིཀྑཱུནཾ བྷིཀྑུནཱིནཾ ཨུཔཱསཀཱནཾ ཨུཔཱསིཀཱནཾ གུཏྟིཡཱ རཀྑཱཡ ཨཝིཧིཾསཱཡ ཕཱསུཝིཧཱརཱཡཱ’’ཏི (དཱི॰ ནི॰ ༣.༢༩༥) བྷིཀྑཱུནཾ དྷཱརཎཾ ཨུཡྻོཛིཏཾ ཨཱནིསཾསཉྩ པཀཱསིཏཾ། ཨཊྛཀཐཱཙརིཡེཧི ཙ ‘‘བུདྡྷབྷཱསིཏེ ཨེཀཀྑརམྤི ཨེཀཔདམྤི ཨཔནེཏབྦཾ ནཱམ ནཏྠཱི’’ཏི ཝུཏྟཾ , ཏསྨཱ ཙཏཱུཧི མཧཱརཱཛེཧི སཾཝིདཧིཏཾ སམྨཱསམྦུདྡྷེན ཨཱཧཙྩབྷཱསིཏཾ ཏིསྶོ སངྒཱིཏིཡོ ཨཱརུལ༹ྷཾ པཀཏིཨཱཊཱནཱཊིཡསུཏྟམེཝ དྷཱརེཏུཾ སཛ྄ཛྷཱཡིཏུཉྩ ཡུཏྟཾ, ན བྷགཝཏཱ ཨབྷཱསིཏཾ ཏིསྶོ སངྒཱིཏིཡོ ཨནཱརུལ༹ྷཾ མིསྶཀསུཏྟནྟི། དཱིགྷནིཀཱཡཊྛཀཐཱཡཾ (དཱི॰ ནི॰ ཨཊྛ॰ ༣.༢༨༢) ཨཱགཏཾ ཨིདཾ ཨཱཊཱནཱཊིཡཔརིཏྟཔརིཀམྨཾ པན པཀཏིསཛ྄ཛྷཱཡནཝཱཙནཱདིཾ སནྡྷཱཡ ཨཊྛཀཐཱཙརིཡེཧི ན ཝུཏྟཾ, ཨཐ ཁོ གཧཊྛཾ ཝཱ པབྦཛིཏཾ ཝཱ ཨམནུསྶེཧི གཧིཏཀཱལེ མོཙཱཔནཏྠཱཡ ལོཀིཡེཧི མནྟཾ ཝིཡ བྷཎནཾ སནྡྷཱཡ ཝུཏྟཾ། ཝུཏྟཉྷི ཏཏྠ ‘‘ཨམནུསྶགཧིཏཀོ ཏྭཾ ཀོ ནཱམོསཱིཏི པུཙྪིཏབྦོ’’ཏིཨཱདི (དཱི॰ ནི॰ ཨཊྛ॰ ༣.༢༨༢)།
Sammāsambuddhenapi imassa suttassa nigamane ‘‘uggaṇhātha bhikkhave āṭānāṭiyaṃ rakkhaṃ, pariyāpuṇātha bhikkhave āṭānāṭiyaṃ rakkhaṃ, dhāretha bhikkhave āṭānāṭiyaṃ rakkhaṃ, atthasaṃhitā bhikkhave āṭānāṭiyā rakkhā bhikkhūnaṃ bhikkhunīnaṃ upāsakānaṃ upāsikānaṃ guttiyā rakkhāya avihiṃsāya phāsuvihārāyā’’ti (dī. ni. 3.295) bhikkhūnaṃ dhāraṇaṃ uyyojitaṃ ānisaṃsañca pakāsitaṃ. Aṭṭhakathācariyehi ca ‘‘buddhabhāsite ekakkharampi ekapadampi apanetabbaṃ nāma natthī’’ti vuttaṃ , tasmā catūhi mahārājehi saṃvidahitaṃ sammāsambuddhena āhaccabhāsitaṃ tisso saṅgītiyo āruḷhaṃ pakatiāṭānāṭiyasuttameva dhāretuṃ sajjhāyituñca yuttaṃ, na bhagavatā abhāsitaṃ tisso saṅgītiyo anāruḷhaṃ missakasuttanti. Dīghanikāyaṭṭhakathāyaṃ (dī. ni. aṭṭha. 3.282) āgataṃ idaṃ āṭānāṭiyaparittaparikammaṃ pana pakatisajjhāyanavācanādiṃ sandhāya aṭṭhakathācariyehi na vuttaṃ, atha kho gahaṭṭhaṃ vā pabbajitaṃ vā amanussehi gahitakāle mocāpanatthāya lokiyehi mantaṃ viya bhaṇanaṃ sandhāya vuttaṃ. Vuttañhi tattha ‘‘amanussagahitako tvaṃ ko nāmosīti pucchitabbo’’tiādi (dī. ni. aṭṭha. 3.282).
ཨཱཊཱནཱཊིཡཱ རཀྑཱ ཙ ནཱམ ན སཀལསུཏྟཾ, ཨཐ ཁོ ‘‘ཝིཔསྶིསྶ ཙ ནམཏྠཱུ’’ཏི པདཾ ཨཱདིཾ ཀཏྭཱ ཙཏུནྣཾ མཧཱརཱཛཱུནཾ ཝསེན ཙཏུཀྑཏྟུཾ ཨཱགཏཾ ‘‘ཛིནཾ ཝནྡཱམ གོཏམ’’ནྟི པདཾ པརིཡོསཱནཾ ཀཏྭཱ ཝུཏྟསུཏྟེཀདེསོཡེཝ། ཀཐཾ ཝིཉྙཱཡཏཱིཏི ཙེ? ‘‘ཨཐ ཁོ ཝེསྶཝཎོ མཧཱརཱཛཱ བྷགཝཏོ ཨདྷིཝཱསནཾ ཝིདིཏྭཱ ཨིམཾ ཨཱཊཱནཱཊིཡཾ རཀྑཾ ཨབྷཱསཱི’’ཏི ཨཱརབྷིཏྭཱ ཡཐཱཝུཏྟསུཏྟེཀདེསསྶ ཨཝསཱནེ ‘‘ཨཡཾ ཁོ མཱརིསཱ ཨཱཊཱནཱཊིཡཱ རཀྑཱ’’ཏི ནིཡྻཱཏིཏཏྟཱ། ཏསྨཱ ཡཐཱ ནཱམ བྱགྒྷཱདཡོ ཨཏྟནོ བྷཀྑཾ ཝིལུམྤནྟཱནཾ བལཝདུཊྛཙིཏྟཱ བྷཝནྟི, ཨེཝཾ ཨཏྟནཱ གཧིཏམནུསྶཾ མོཙཱཔེནྟཱནཾ ཨམནུསྶཱ པདུཊྛཙིཏྟཱ ཧོནྟི། ཨིཏི ཏཐཱ མོཙཱཔེཏུཾ ཨཱརདྡྷཀཱལེ བྷིཀྑཱུནཾ པརིསྶཡཝིནོདནཏྠཾ ཨིམཾ ཨཱཊཱནཱཊིཡཔརིཏྟཔརིཀམྨཾ ཨཊྛཀཐཱཙརིཡེཧི ཝུཏྟནྟི དཊྛབྦཾ། ཨཡཾ པརིཏྟཀརཎཝིནིཙྪཡཀཐཱལངྐཱརོ།
Āṭānāṭiyā rakkhā ca nāma na sakalasuttaṃ, atha kho ‘‘vipassissa ca namatthū’’ti padaṃ ādiṃ katvā catunnaṃ mahārājūnaṃ vasena catukkhattuṃ āgataṃ ‘‘jinaṃ vandāma gotama’’nti padaṃ pariyosānaṃ katvā vuttasuttekadesoyeva. Kathaṃ viññāyatīti ce? ‘‘Atha kho vessavaṇo mahārājā bhagavato adhivāsanaṃ viditvā imaṃ āṭānāṭiyaṃ rakkhaṃ abhāsī’’ti ārabhitvā yathāvuttasuttekadesassa avasāne ‘‘ayaṃ kho mārisā āṭānāṭiyā rakkhā’’ti niyyātitattā. Tasmā yathā nāma byagghādayo attano bhakkhaṃ vilumpantānaṃ balavaduṭṭhacittā bhavanti, evaṃ attanā gahitamanussaṃ mocāpentānaṃ amanussā paduṭṭhacittā honti. Iti tathā mocāpetuṃ āraddhakāle bhikkhūnaṃ parissayavinodanatthaṃ imaṃ āṭānāṭiyaparittaparikammaṃ aṭṭhakathācariyehi vuttanti daṭṭhabbaṃ. Ayaṃ parittakaraṇavinicchayakathālaṅkāro.
༢༠. ཨནཱམཊྛཔིཎྜཔཱཏོཏི (ཝི॰ ཝི॰ ཊཱི॰ ༡.༡༨༥) ཨེཏྠ ཨམསིཡིཏྠཱཏི ཨཱམཊྛོ, ན ཨཱམཊྛོ ཨནཱམཊྛོ། པིཎྜཾ པིཎྜཾ ཧུཏྭཱ པཏཏཱིཏི པིཎྜཔཱཏོ། ཨནཱམཊྛོ ཙ སོ པིཎྜཔཱཏོ ཙཱཏི ཏཐཱ, ཨགྒཧིཏཨགྒོ, ཨཔརིབྷུཏྟོ པིཎྜཔཱཏོཏི ཨཏྠོ། སཙེཔི ཀཧཱཔཎགྒྷནཀོ ཧོཏཱིཏི ཨིམིནཱ དཱཡཀེཧི བཧུབྱཉྫནེན སམྤཱདེཏྭཱ སཀྐཙྩཾ དིནྣབྷཱཝཾ དཱིཔེཏི། ཏེན ཝུཏྟཾ ‘‘སདྡྷཱདེཡྻཝིནིཔཱཏནཾ ནཏྠཱི’’ཏི, ཨེཝཾ སཀྐཙྩཾ སདྡྷཱཡ དིནྣཾ མཧགྒྷབྷོཛནམྤི མཱཏཱཔིཏཱུནཾ དཏྭཱ སདྡྷཱདེཡྻཝིནིཔཱཏནཾ ནཱམ ན ཧོཏི, པགེཝ ཨཔྤགྒྷབྷོཛནེཏི ཨདྷིཔྤཱཡོ། མཱཏཱདིཔཉྩཀཾཡེཝ ཝཏྭཱ བྷེསཛྫཀརཎེ ཝིཡ ཨཔརེསམྤི དསནྣཾ དཱཏུཾ ཝཊྚཏཱིཏི ཨཝུཏྟཏྟཱ ཨཉྙེསཾ ཉཱཏཀཱནམྤི པེསེཏྭཱ དཱཏུཾ ན ཝཊྚཏཱིཏི སིདྡྷཾ, ‘‘ཝིཧཱརཾ སམྤཏྟསྶ པན ཡསྶ ཀསྶཙི ཨཱགནྟུཀསྶ ཝཱ’’ཨིཙྩཱདིཝཀྑམཱནཏྟཱ ཝིཧཱརཾ སམྤཏྟཱནཾ ཉཱཏཀཱནམྤི ཨཱགནྟུཀསཱམཉྙེན དཱཏུཾ ཝཊྚཏཱིཏི ཙ། ཐཱལཀེཏི སངྒྷིཀེ ཀཾསཱདིམཡེ ཐཱལཀེ། པཏྟོཔི ཨེཏྠ སངྒཡ྄ཧཏི། ན ཝཊྚཏཱིཏི ཨིམིནཱ དུཀྐཊནྟི དསྶེཏི། དཱམརིཀཙོརསྶཱཏི རཛྫཾ པཏྠེནྟསྶ པཱཀཊཙོརསྶ། ཨདཱིཡམཱནེཔི ‘‘ན དེནྟཱི’’ཏི ཀུཛ྄ཛྷནྟཱིཏི སམྦནྡྷོ།
20.Anāmaṭṭhapiṇḍapātoti (vi. vi. ṭī. 1.185) ettha amasiyitthāti āmaṭṭho, na āmaṭṭho anāmaṭṭho. Piṇḍaṃ piṇḍaṃ hutvā patatīti piṇḍapāto. Anāmaṭṭho ca so piṇḍapāto cāti tathā, aggahitaaggo, aparibhutto piṇḍapātoti attho. Sacepi kahāpaṇagghanako hotīti iminā dāyakehi bahubyañjanena sampādetvā sakkaccaṃ dinnabhāvaṃ dīpeti. Tena vuttaṃ ‘‘saddhādeyyavinipātanaṃ natthī’’ti, evaṃ sakkaccaṃ saddhāya dinnaṃ mahagghabhojanampi mātāpitūnaṃ datvā saddhādeyyavinipātanaṃ nāma na hoti, pageva appagghabhojaneti adhippāyo. Mātādipañcakaṃyeva vatvā bhesajjakaraṇe viya aparesampi dasannaṃ dātuṃ vaṭṭatīti avuttattā aññesaṃ ñātakānampi pesetvā dātuṃ na vaṭṭatīti siddhaṃ, ‘‘vihāraṃ sampattassa pana yassa kassaci āgantukassa vā’’iccādivakkhamānattā vihāraṃ sampattānaṃ ñātakānampi āgantukasāmaññena dātuṃ vaṭṭatīti ca. Thālaketi saṅghike kaṃsādimaye thālake. Pattopi ettha saṅgayhati. Na vaṭṭatīti iminā dukkaṭanti dasseti. Dāmarikacorassāti rajjaṃ patthentassa pākaṭacorassa. Adīyamānepi ‘‘na dentī’’ti kujjhantīti sambandho.
ཨཱམིསསྶ དྷམྨསྶ ཙ ཨལཱབྷེན ཨཏྟནོ པརསྶ ཙ ཨནྟརེ སམྦྷཝནྟསྶ ཚིདྡསྶ ཝིཝརསྶ པཊིསནྠརཎཾ པིདཧནཾ པཊིསནྠཱརོ། སོ པན དྷམྨཱམིསཝསེན དུཝིདྷོ། ཏཏྠ ཨཱམིསཔཊིསནྠཱརཾ སནྡྷཱཡ ‘‘ཀསྶ ཀཱཏབྦོ, ཀསྶ ན ཀཱཏབྦོ’’ཏི ཝུཏྟཾ། ཨཱགནྟུཀསྶ ཝཱ…པེ॰… ཀཱཏབྦོཡེཝཱཏི ཝུཏྟམཏྠཾ པཱཀཊཾ ཀཱཏུཾ ‘‘ཨཱགནྟུཀཾ ཏཱཝཱ’’ཏིཨཱདིམཱཧ། ཁཱིཎཔརིབྦཡནྟི ཨིམིནཱ ཨགཏིབྷཱཝཾ ཀརུཎཱཊྛཱནཏཉྩ དསྶེཏི། ཏེན ཙ ཏབྦིདྷུརཱནཾ སམིདྡྷཱནཾ ཨཱགནྟུཀཏྟེཔི དཱཏུཾ ན ཝཊྚཏཱིཏི སིདྡྷཾ ཧོཏི། ‘‘ཨཔཙྩཱསཱིསནྟེནཱ’’ཏི ཝཏྭཱ པཙྩཱསཱིསནཔྤཀཱརཾ དསྶེཏུཾ ‘‘མནུསྶཱ ནཱམཱ’’ཏིཨཱདི ཝུཏྟཾ། ཨནནུཉྙཱཏཱནཾ པན ཨཔཙྩཱསཱིསནྟེནཔི དཱཏུཾ ན ཝཊྚཏི སདྡྷཱདེཡྻཝིནིཔཱཏཏྟཱ, པཙྩཱསཱཡ པན སཏི ཀུལདཱུསནམྤི ཧོཏི། ཨུབྦཱསེཏྭཱཏི སམནྟཏོ ཏིཡོཛནཾ ཝིལུམྤནྟེ མནུསྶེ པལཱཔེཏྭཱ། ཝརཔོཏྠཀཙིཏྟཏྠརཎནྟི ཨནེཀཔྤཀཱརཾ ཨིཏྠིཔུརིསཱདིཨུཏྟམརཱུཔཝིཙིཏྟཾ ཨཏྠརཎཾ། ཨཡཾ པཊིསནྠཱརཝིནིཙྪཡཀཐཱལངྐཱརོ།
Āmisassa dhammassa ca alābhena attano parassa ca antare sambhavantassa chiddassa vivarassa paṭisantharaṇaṃ pidahanaṃ paṭisanthāro. So pana dhammāmisavasena duvidho. Tattha āmisapaṭisanthāraṃ sandhāya ‘‘kassa kātabbo, kassa na kātabbo’’ti vuttaṃ. Āgantukassa vā…pe… kātabboyevāti vuttamatthaṃ pākaṭaṃ kātuṃ ‘‘āgantukaṃ tāvā’’tiādimāha. Khīṇaparibbayanti iminā agatibhāvaṃ karuṇāṭṭhānatañca dasseti. Tena ca tabbidhurānaṃ samiddhānaṃ āgantukattepi dātuṃ na vaṭṭatīti siddhaṃ hoti. ‘‘Apaccāsīsantenā’’ti vatvā paccāsīsanappakāraṃ dassetuṃ ‘‘manussā nāmā’’tiādi vuttaṃ. Ananuññātānaṃ pana apaccāsīsantenapi dātuṃ na vaṭṭati saddhādeyyavinipātattā, paccāsāya pana sati kuladūsanampi hoti. Ubbāsetvāti samantato tiyojanaṃ vilumpante manusse palāpetvā. Varapotthakacittattharaṇanti anekappakāraṃ itthipurisādiuttamarūpavicittaṃ attharaṇaṃ. Ayaṃ paṭisanthāravinicchayakathālaṅkāro.
ཨིཏི ཝིནཡསངྒཧསཾཝཎྞནཱབྷཱུཏེ ཝིནཡཱལངྐཱརེ
Iti vinayasaṅgahasaṃvaṇṇanābhūte vinayālaṅkāre
བྷེསཛྫཱདིཝིནིཙྪཡཀཐཱལངྐཱརོ ནཱམ
Bhesajjādivinicchayakathālaṅkāro nāma
ཏཏིཡོ པརིཙྪེདོ།
Tatiyo paricchedo.
