| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
36. பே⁴ஸஜ்ஜனித்³தே³ஸவண்ணனா
36. Bhesajjaniddesavaṇṇanā
274-5. ஸஹத⁴ம்மினங் லப்³ப⁴ங் பே⁴ஸஜ்ஜகரணந்தி ஸம்ப³ந்தோ⁴. ந கேவலங் பஞ்சன்னங் ஸஹத⁴ம்மிகானங்யேவ பி⁴க்கா²சரியவிஞ்ஞத்திஸகேஹி பே⁴ஸஜ்ஜகரணங் லப்³ப⁴தி, அத² கோ² அபரேஸம்பி பஞ்சன்னங் லப்³ப⁴தி, தே த³ஸ்ஸெந்தோ ‘‘பிதூன’’ந்திஆதி³மாஹ. பிதூனந்தி மாதாபிதூனந்தி அத்தோ². யே மாதாபிதரோ ஜக்³க³ந்தி உபட்ட²ஹந்தி, தே தது³பட்டா²கா நாம. பி⁴க்கு²ங் ஏவ நிஸ்ஸாய ஜீவந்தோ பி⁴க்கு²னிஸ்ஸிதகோ நாம. பப்³ப³ஜ்ஜாபெக்கோ² ‘‘ப⁴ண்டூ³’’தி வுச்சதி.
274-5. Sahadhamminaṃ labbhaṃ bhesajjakaraṇanti sambandho. Na kevalaṃ pañcannaṃ sahadhammikānaṃyeva bhikkhācariyaviññattisakehi bhesajjakaraṇaṃ labbhati, atha kho aparesampi pañcannaṃ labbhati, te dassento ‘‘pitūna’’ntiādimāha. Pitūnanti mātāpitūnanti attho. Ye mātāpitaro jagganti upaṭṭhahanti, te tadupaṭṭhākā nāma. Bhikkhuṃ eva nissāya jīvanto bhikkhunissitako nāma. Pabbajjāpekkho ‘‘bhaṇḍū’’ti vuccati.
276. அபரேஸம்பி த³ஸன்னங் காதுங் வட்டதி, தே த³ஸ்ஸேதுங் ‘‘மஹாசூளபிதா’’திஆதி³மாஹ. எத்த² (பாரா॰ அட்ட²॰ 2.185-187) பன மஹாபிதா சூளபிதா மஹாமாதா சூளமாதா மஹாபா⁴தா சூளபா⁴தா மஹாப⁴கி³னீ சூளப⁴கி³னீதி இமேஹி அட்ட²ஹி ஆதி³-ஸத்³தே³ன பிதுப⁴கி³னிஞ்ச மாதுபா⁴திகஞ்ச க³ஹெத்வா த³ஸ. ஏதேஸங் பன ஸகேன பே⁴ஸஜ்ஜேன காதப்³ப³ங். அத்தனியே ச அஸதீதி பாட²ஸேஸோ.
276. Aparesampi dasannaṃ kātuṃ vaṭṭati, te dassetuṃ ‘‘mahācūḷapitā’’tiādimāha. Ettha (pārā. aṭṭha. 2.185-187) pana mahāpitā cūḷapitā mahāmātā cūḷamātā mahābhātā cūḷabhātā mahābhaginī cūḷabhaginīti imehi aṭṭhahi ādi-saddena pitubhaginiñca mātubhātikañca gahetvā dasa. Etesaṃ pana sakena bhesajjena kātabbaṃ. Attaniye ca asatīti pāṭhaseso.
277. ந கேவலஞ்ச ஏதேஸங் த³ஸன்னங், இமேஹி ஸம்ப³ந்தா⁴னங் புத்தனத்தாதீ³னங் யாவஸத்தமா குலபரிவட்டா காதுங் வட்டதீதி த³ஸ்ஸனத்த²ங் ‘‘குலதூ³ஸனா’’திஆதி³மாஹ. அஞ்ஞோபி (பாரா॰ அட்ட²॰ 2.285-287) யோ ஆக³ந்துகோ வா சோரோ வா யுத்³த⁴பராஜிதோ வா இஸ்ஸரோ ஞாதகேஹி பரிச்சத்தோ வா க³மியமனுஸ்ஸோ வா கி³லானோ ஹுத்வா விஹாரங் பவிஸதி, ஸப்³பே³ஸம்பி அபச்சாஸீஸந்தேன பே⁴ஸஜ்ஜங் காதப்³ப³ங்.
277. Na kevalañca etesaṃ dasannaṃ, imehi sambandhānaṃ puttanattādīnaṃ yāvasattamā kulaparivaṭṭā kātuṃ vaṭṭatīti dassanatthaṃ ‘‘kuladūsanā’’tiādimāha. Aññopi (pārā. aṭṭha. 2.285-287) yo āgantuko vā coro vā yuddhaparājito vā issaro ñātakehi pariccatto vā gamiyamanusso vā gilāno hutvā vihāraṃ pavisati, sabbesampi apaccāsīsantena bhesajjaṃ kātabbaṃ.
278. மாதா (பாரா॰ அட்ட²॰ 2.185-187) பிதா தது³பட்டா²கோ பி⁴க்கு²னிஸ்ஸிதகோ பண்டு³பலாஸோ வெய்யாவச்சகரோதி இமேஸங் ச²ன்னங் அனாமட்ட²பிண்ட³பாதோ அவாரிதோதி அத்தோ². கிஞ்ச பி⁴ய்யோ – தா³மரிகசோரஸ்ஸ ச இஸ்ஸரியஸ்ஸ ச தா³துமவாரிதோதி அத்தோ².
278. Mātā (pārā. aṭṭha. 2.185-187) pitā tadupaṭṭhāko bhikkhunissitako paṇḍupalāso veyyāvaccakaroti imesaṃ channaṃ anāmaṭṭhapiṇḍapāto avāritoti attho. Kiñca bhiyyo – dāmarikacorassa ca issariyassa ca dātumavāritoti attho.
279. தேஸந்தி (பாரா॰ அட்ட²॰ 2.185-187) க³ஹட்டா²னங். ஸாஸனோக³த⁴ந்தி ரதனபரித்தஆடானாடியபரித்தாதி³பரித்தங் ப⁴ணிதப்³ப³ந்தி அத்தோ².
279.Tesanti (pārā. aṭṭha. 2.185-187) gahaṭṭhānaṃ. Sāsanogadhanti ratanaparittaāṭānāṭiyaparittādiparittaṃ bhaṇitabbanti attho.
280. ‘‘ஆக³ந்த்வா (பாரா॰ அட்ட²॰ 2.185-187) ஸீலங் தே³து, த⁴ம்மஞ்ச பரித்தஞ்ச பா⁴ஸதூ’’தி கேனசி பேஸிதோதி ஸம்ப³ந்தோ⁴. தா³துங் வத்துந்தி ஸீலங் தா³துங், த⁴ம்மஞ்ச பரித்தஞ்ச வத்துங் லப்³ப⁴தீதி அத்தோ². பே⁴ஸஜ்ஜவினிச்ச²யோ.
280. ‘‘Āgantvā (pārā. aṭṭha. 2.185-187) sīlaṃ detu, dhammañca parittañca bhāsatū’’ti kenaci pesitoti sambandho. Dātuṃ vattunti sīlaṃ dātuṃ, dhammañca parittañca vattuṃ labbhatīti attho. Bhesajjavinicchayo.
பே⁴ஸஜ்ஜனித்³தே³ஸவண்ணனா நிட்டி²தா.
Bhesajjaniddesavaṇṇanā niṭṭhitā.
