| Library / Tipiṭaka / திபிடக • Tipiṭaka / மஹாவிப⁴ங்க³ • Mahāvibhaṅga |
3. பே⁴ஸஜ்ஜஸிக்கா²பத³ங்
3. Bhesajjasikkhāpadaṃ
618. 1 தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா பிலிந்த³வச்சோ² ராஜக³ஹே பப்³பா⁴ரங் ஸோதா⁴பேதி லேணங் கத்துகாமோ. அத² கோ² ராஜா மாக³தோ⁴ ஸேனியோ பி³ம்பி³ஸாரோ யேனாயஸ்மா பிலிந்த³வச்சோ² தேனுபஸங்கமி; உபஸங்கமித்வா ஆயஸ்மந்தங் பிலிந்த³வச்ச²ங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மந்தங் பிலிந்த³வச்ச²ங் ஏதத³வோச – ‘‘கிங், ப⁴ந்தே, தே²ரோ காராபேதீ’’தி? ‘‘பப்³பா⁴ரங் மஹாராஜ, ஸோதா⁴பேமி லேணங் கத்துகாமோ’’தி. ‘‘அத்தோ², ப⁴ந்தே, அய்யஸ்ஸ ஆராமிகேனா’’தி? ‘‘ந கோ², மஹாராஜ, ப⁴க³வதா ஆராமிகோ அனுஞ்ஞாதோ’’தி. ‘‘தேன ஹி, ப⁴ந்தே, ப⁴க³வந்தங் படிபுச்சி²த்வா மம ஆரோசெய்யாதா²’’தி. ‘‘ஏவங் மஹாராஜா’’தி கோ² ஆயஸ்மா பிலிந்த³வச்சோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பச்சஸ்ஸோஸி. அத² கோ² ஆயஸ்மா பிலிந்த³வச்சோ² ராஜானங் மாக³த⁴ங் ஸேனியங் பி³ம்பி³ஸாரங் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மதா பிலிந்த³வச்சே²ன த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ உட்டா²யாஸனா ஆயஸ்மந்தங் பிலிந்த³வச்ச²ங் அபி⁴வாதெ³த்வா பத³க்கி²ணங் கத்வா பக்காமி.
618.2 Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā pilindavaccho rājagahe pabbhāraṃ sodhāpeti leṇaṃ kattukāmo. Atha kho rājā māgadho seniyo bimbisāro yenāyasmā pilindavaccho tenupasaṅkami; upasaṅkamitvā āyasmantaṃ pilindavacchaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro āyasmantaṃ pilindavacchaṃ etadavoca – ‘‘kiṃ, bhante, thero kārāpetī’’ti? ‘‘Pabbhāraṃ mahārāja, sodhāpemi leṇaṃ kattukāmo’’ti. ‘‘Attho, bhante, ayyassa ārāmikenā’’ti? ‘‘Na kho, mahārāja, bhagavatā ārāmiko anuññāto’’ti. ‘‘Tena hi, bhante, bhagavantaṃ paṭipucchitvā mama āroceyyāthā’’ti. ‘‘Evaṃ mahārājā’’ti kho āyasmā pilindavaccho rañño māgadhassa seniyassa bimbisārassa paccassosi. Atha kho āyasmā pilindavaccho rājānaṃ māgadhaṃ seniyaṃ bimbisāraṃ dhammiyā kathāya sandassesi samādapesi samuttejesi sampahaṃsesi. Atha kho rājā māgadho seniyo bimbisāro āyasmatā pilindavacchena dhammiyā kathāya sandassito samādapito samuttejito sampahaṃsito uṭṭhāyāsanā āyasmantaṃ pilindavacchaṃ abhivādetvā padakkhiṇaṃ katvā pakkāmi.
619. அத² கோ² ஆயஸ்மா பிலிந்த³வச்சோ² ப⁴க³வதோ ஸந்திகே தூ³தங் பாஹேஸி – ‘‘ராஜா, ப⁴ந்தே , மாக³தோ⁴ ஸேனியோ பி³ம்பி³ஸாரோ ஆராமிகங் தா³துகாமோ. கத²ங் நு கோ², ப⁴ந்தே, மயா படிபஜ்ஜிதப்³ப³’’ந்தி? அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஆராமிக’’ந்தி. து³தியம்பி கோ² ராஜா மாக³தோ⁴ ஸேனியோ பி³ம்பி³ஸாரோ யேனாயஸ்மா பிலிந்தி³வச்சோ² தேனுபஸங்கமி; உபஸங்கமித்வா ஆயஸ்மந்தங் பிலிந்த³வச்ச²ங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மந்தங் பிலிந்த³வச்ச²ங் ஏதத³வோச – ‘‘அனுஞ்ஞாதோ, ப⁴ந்தே, ப⁴க³வதா ஆராமிகோ’’தி? ‘‘ஏவங், மஹாராஜா’’தி. ‘‘தேன ஹி, ப⁴ந்தே, அய்யஸ்ஸ ஆராமிகங் த³ம்மீ’’தி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ஆயஸ்மதோ பிலிந்த³வச்ச²ஸ்ஸ ஆராமிகங் படிஸ்ஸுணித்வா விஸ்ஸரித்வா சிரேன ஸதிங் படிலபி⁴த்வா அஞ்ஞதரங் ஸப்³ப³த்த²கங் மஹாமத்தங் ஆமந்தேஸி – ‘‘யோ மயா, ப⁴ணே, அய்யஸ்ஸ ஆராமிகோ படிஸ்ஸுதோ, தி³ன்னோ ஸோ ஆராமிகோ’’தி? ‘‘ந கோ², தே³வ, அய்யஸ்ஸ ஆராமிகோ தி³ன்னோ’’தி. ‘‘கீவசிரங் நு கோ², ப⁴ணே, இதோ ஹி தங் ஹோதீ’’தி? அத² கோ² ஸோ மஹாமத்தோ ரத்தியோ க³ணெத்வா 3 ராஜானங் மாக³த⁴ங் ஸேனியங் பி³ம்பி³ஸாரங் ஏதத³வோச – ‘‘பஞ்ச, தே³வ, ரத்திஸதானீ’’தி. ‘‘தேன ஹி, ப⁴ணே, அய்யஸ்ஸ பஞ்ச ஆராமிகஸதானி தே³ஹீ’’தி. ‘‘ஏவங், தே³வா’’தி கோ² ஸோ மஹாமத்தோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ படிஸ்ஸுணித்வா ஆயஸ்மதோ பிலிந்த³வச்ச²ஸ்ஸ பஞ்ச ஆராமிகஸதானி பாதா³ஸி 4, பாடியேக்கோ கா³மோ நிவிஸி. ஆராமிககா³மகோதிபி நங் ஆஹங்ஸு, பிலிந்த³கா³மகோதிபி நங் ஆஹங்ஸு.
619. Atha kho āyasmā pilindavaccho bhagavato santike dūtaṃ pāhesi – ‘‘rājā, bhante , māgadho seniyo bimbisāro ārāmikaṃ dātukāmo. Kathaṃ nu kho, bhante, mayā paṭipajjitabba’’nti? Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, ārāmika’’nti. Dutiyampi kho rājā māgadho seniyo bimbisāro yenāyasmā pilindivaccho tenupasaṅkami; upasaṅkamitvā āyasmantaṃ pilindavacchaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro āyasmantaṃ pilindavacchaṃ etadavoca – ‘‘anuññāto, bhante, bhagavatā ārāmiko’’ti? ‘‘Evaṃ, mahārājā’’ti. ‘‘Tena hi, bhante, ayyassa ārāmikaṃ dammī’’ti. Atha kho rājā māgadho seniyo bimbisāro āyasmato pilindavacchassa ārāmikaṃ paṭissuṇitvā vissaritvā cirena satiṃ paṭilabhitvā aññataraṃ sabbatthakaṃ mahāmattaṃ āmantesi – ‘‘yo mayā, bhaṇe, ayyassa ārāmiko paṭissuto, dinno so ārāmiko’’ti? ‘‘Na kho, deva, ayyassa ārāmiko dinno’’ti. ‘‘Kīvaciraṃ nu kho, bhaṇe, ito hi taṃ hotī’’ti? Atha kho so mahāmatto rattiyo gaṇetvā 5 rājānaṃ māgadhaṃ seniyaṃ bimbisāraṃ etadavoca – ‘‘pañca, deva, rattisatānī’’ti. ‘‘Tena hi, bhaṇe, ayyassa pañca ārāmikasatāni dehī’’ti. ‘‘Evaṃ, devā’’ti kho so mahāmatto rañño māgadhassa seniyassa bimbisārassa paṭissuṇitvā āyasmato pilindavacchassa pañca ārāmikasatāni pādāsi 6, pāṭiyekko gāmo nivisi. Ārāmikagāmakotipi naṃ āhaṃsu, pilindagāmakotipi naṃ āhaṃsu.
620. தேன கோ² பன ஸமயேன ஆயஸ்மா பிலிந்த³வச்சோ² தஸ்மிங் கா³மகே குலூபகோ ஹோதி. அத² கோ² ஆயஸ்மா பிலிந்த³வச்சோ² புப்³ப³ண்ஹஸமயங் நிவாஸெத்வா பத்தசீவரங் ஆதா³ய பிலிந்த³கா³மகங் பிண்டா³ய பாவிஸி. தேன கோ² பன ஸமயேன தஸ்மிங் கா³மகே உஸ்ஸவோ ஹோதி. தா³ரகா அலங்கதா மாலாகிதா கீளந்தி. அத² கோ² ஆயஸ்மா பிலிந்த³வச்சோ² பிலிந்த³கா³மகே ஸபதா³னங் பிண்டா³ய சரமானோ யேன அஞ்ஞதரஸ்ஸ ஆராமிகஸ்ஸ நிவேஸனங் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. தேன கோ² பன ஸமயேன தஸ்ஸா ஆராமிகினியா தீ⁴தா அஞ்ஞே தா³ரகே அலங்கதே மாலாகிதே பஸ்ஸித்வா ரோத³தி – ‘‘மாலங் மே தே³த², அலங்காரங் மே தே³தா²’’தி. அத² கோ² ஆயஸ்மா பிலிந்த³வச்சோ² தங் ஆராமிகினிங் ஏதத³வோச – ‘‘கிஸ்ஸாயங் தா³ரிகா ரோத³தீ’’தி? ‘‘அயங், ப⁴ந்தே, தா³ரிகா அஞ்ஞே தா³ரகே அலங்கதே மாலாகிதே பஸ்ஸித்வா ரோத³தி – ‘மாலங் மே தே³த², அலங்காரங் மே தே³தா²’தி. குதோ அம்ஹாகங் து³க்³க³தானங் மாலா குதோ, அலங்காரோ’’தி? அத² கோ² ஆயஸ்மா பிலிந்த³வச்சோ² அஞ்ஞதரங் திணண்டு³பகங் க³ஹெத்வா தங் ஆராமிகினிங் ஏதத³வோச – ‘‘ஹந்தி³மங் திணண்டு³பகங் தஸ்ஸா தா³ரிகாய ஸீஸே படிமுஞ்சா’’தி. அத² கோ² ஸா ஆராமிகினீ தங் திணண்டு³பகங் க³ஹெத்வா தஸ்ஸா தா³ரிகாய ஸீஸே படிமுஞ்சி. ஸா அஹோஸி ஸுவண்ணமாலா அபி⁴ரூபா த³ஸ்ஸனீயா பாஸாதி³கா. நத்தி² தாதி³ஸா ரஞ்ஞோபி அந்தேபுரே ஸுவண்ணமாலா. மனுஸ்ஸா ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஆரோசேஸுங் – ‘‘அமுகஸ்ஸ, தே³வ, ஆராமிகஸ்ஸ க⁴ரே ஸுவண்ணமாலா அபி⁴ரூபா த³ஸ்ஸனீயா பாஸாதி³கா. நத்தி² தாதி³ஸா தே³வஸ்ஸாபி அந்தேபுரே ஸுவண்ணமாலா. குதோ தஸ்ஸ து³க்³க³தஸ்ஸ! நிஸ்ஸங்ஸயங் சோரிகாய ஆப⁴தா’’தி!! அத² கோ² ராஜா மாக³தோ⁴ ஸேனியோ பி³ம்பி³ஸாரோ தங் ஆராமிககுலங் ப³ந்தா⁴பேஸி. து³தியம்பி கோ² ஆயஸ்மா பிலிந்த³வச்சோ² புப்³ப³ண்ஹஸமயங் நிவாஸெத்வா பத்தசீவரங் ஆதா³ய பிலிந்த³கா³மகங் பிண்டா³ய பாவிஸி. பிலிந்த³கா³மகே ஸபதா³னங் பிண்டா³ய சரமானோ யேன தஸ்ஸ ஆராமிகஸ்ஸ நிவேஸனங் தேனுபஸங்கமி; உபஸங்கமித்வா படிவிஸ்ஸகே புச்சி² – ‘‘கஹங் இமங் ஆராமிககுலங் க³த’’ந்தி? ‘‘ஏதிஸ்ஸா, ப⁴ந்தே, ஸுவண்ணமாலாய காரணா ரஞ்ஞா ப³ந்தா⁴பித’’ந்தி.
620. Tena kho pana samayena āyasmā pilindavaccho tasmiṃ gāmake kulūpako hoti. Atha kho āyasmā pilindavaccho pubbaṇhasamayaṃ nivāsetvā pattacīvaraṃ ādāya pilindagāmakaṃ piṇḍāya pāvisi. Tena kho pana samayena tasmiṃ gāmake ussavo hoti. Dārakā alaṅkatā mālākitā kīḷanti. Atha kho āyasmā pilindavaccho pilindagāmake sapadānaṃ piṇḍāya caramāno yena aññatarassa ārāmikassa nivesanaṃ tenupasaṅkami; upasaṅkamitvā paññatte āsane nisīdi. Tena kho pana samayena tassā ārāmikiniyā dhītā aññe dārake alaṅkate mālākite passitvā rodati – ‘‘mālaṃ me detha, alaṅkāraṃ me dethā’’ti. Atha kho āyasmā pilindavaccho taṃ ārāmikiniṃ etadavoca – ‘‘kissāyaṃ dārikā rodatī’’ti? ‘‘Ayaṃ, bhante, dārikā aññe dārake alaṅkate mālākite passitvā rodati – ‘mālaṃ me detha, alaṅkāraṃ me dethā’ti. Kuto amhākaṃ duggatānaṃ mālā kuto, alaṅkāro’’ti? Atha kho āyasmā pilindavaccho aññataraṃ tiṇaṇḍupakaṃ gahetvā taṃ ārāmikiniṃ etadavoca – ‘‘handimaṃ tiṇaṇḍupakaṃ tassā dārikāya sīse paṭimuñcā’’ti. Atha kho sā ārāmikinī taṃ tiṇaṇḍupakaṃ gahetvā tassā dārikāya sīse paṭimuñci. Sā ahosi suvaṇṇamālā abhirūpā dassanīyā pāsādikā. Natthi tādisā raññopi antepure suvaṇṇamālā. Manussā rañño māgadhassa seniyassa bimbisārassa ārocesuṃ – ‘‘amukassa, deva, ārāmikassa ghare suvaṇṇamālā abhirūpā dassanīyā pāsādikā. Natthi tādisā devassāpi antepure suvaṇṇamālā. Kuto tassa duggatassa! Nissaṃsayaṃ corikāya ābhatā’’ti!! Atha kho rājā māgadho seniyo bimbisāro taṃ ārāmikakulaṃ bandhāpesi. Dutiyampi kho āyasmā pilindavaccho pubbaṇhasamayaṃ nivāsetvā pattacīvaraṃ ādāya pilindagāmakaṃ piṇḍāya pāvisi. Pilindagāmake sapadānaṃ piṇḍāya caramāno yena tassa ārāmikassa nivesanaṃ tenupasaṅkami; upasaṅkamitvā paṭivissake pucchi – ‘‘kahaṃ imaṃ ārāmikakulaṃ gata’’nti? ‘‘Etissā, bhante, suvaṇṇamālāya kāraṇā raññā bandhāpita’’nti.
621. அத² கோ² ஆயஸ்மா பிலிந்த³வச்சோ² யேன ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ நிவேஸனங் தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ராஜா மாக³தோ⁴ ஸேனியோ பி³ம்பி³ஸாரோ யேனாயஸ்மா பிலிந்த³வச்சோ² தேனுபஸங்கமி; உபஸங்கமித்வா ஆயஸ்மந்தங் பிலிந்த³வச்ச²ங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ராஜானங் மாக³த⁴ங் ஸேனியங் பி³ம்பி³ஸாரங் ஆயஸ்மா பிலிந்த³வச்சோ² ஏதத³வோச – ‘‘கிஸ்ஸ, மஹாராஜ, ஆராமிககுலங் ப³ந்தா⁴பித’’ந்தி? ‘‘தஸ்ஸ, ப⁴ந்தே, ஆராமிகஸ்ஸ க⁴ரே ஸுவண்ணமாலா அபி⁴ரூபா த³ஸ்ஸனீயா பாஸாதி³கா. நத்தி² தாதி³ஸா அம்ஹாகம்பி அந்தேபுரே ஸுவண்ணமாலா. குதோ தஸ்ஸ து³க்³க³தஸ்ஸ! நிஸ்ஸங்ஸயங் சோரிகாய ஆப⁴தா’’தி!! அத² கோ² ஆயஸ்மா பிலிந்த³வச்சோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ பாஸாத³ங் ஸுவண்ணந்தி அதி⁴முச்சி. ஸோ அஹோஸி ஸப்³ப³ஸோவண்ணமயோ. ‘‘இத³ங் பன தே, மஹாராஜ, தாவ ப³ஹுங் ஸுவண்ணங் குதோ’’தி? ‘‘அஞ்ஞாதங், ப⁴ந்தே, அய்யஸ்ஸேவேஸோ இத்³தா⁴னுபா⁴வோ’’தி. தங் ஆராமிககுலங் முஞ்சாபேஸி. மனுஸ்ஸா – ‘‘அய்யேன கிர பிலிந்த³வச்சே²ன ஸராஜிகாய பரிஸாய உத்தரிமனுஸ்ஸத⁴ம்மங் இத்³தி⁴பாடிஹாரியங் த³ஸ்ஸித’’ந்தி, அத்தமனா அபி⁴ப்பஸன்னா ஆயஸ்மதோ பிலிந்த³வச்ச²ஸ்ஸ பஞ்ச பே⁴ஸஜ்ஜானி அபி⁴ஹரிங்ஸு, ஸெய்யதி²த³ங் – ஸப்பி நவனீதங் தேலங் மது⁴ பா²ணிதங். பகதியாபி ச ஆயஸ்மா பிலிந்த³வச்சோ² லாபீ⁴ ஹோதி பஞ்சன்னங் பே⁴ஸஜ்ஜானங். லத்³த⁴ங் லத்³த⁴ங் பரிஸாய விஸ்ஸஜ்ஜேதி. பரிஸா சஸ்ஸ ஹோதி பா³ஹுல்லிகா. லத்³த⁴ங் லத்³த⁴ங் கோலம்பே³பி க⁴டேபி பூரெத்வா படிஸாமேதி, பரிஸ்ஸாவனானிபி த²விகாயோபி பூரெத்வா வாதபானேஸு லக்³கே³தி. தானி ஓலீனவிலீனானி திட்ட²ந்தி. உந்தூ³ரேஹிபி விஹாரா ஓகிண்ணவிகிண்ணா ஹொந்தி. மனுஸ்ஸா விஹாரசாரிகங் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசெந்தி – ‘‘அந்தோகொட்டா²கா³ரிகா இமே ஸமணா ஸக்யபுத்தியா, ஸெய்யதா²பி ராஜா மாக³தோ⁴ ஸேனியோ பி³ம்பி³ஸாரோ’’தி ! அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கூ² ஏவரூபாய பா³ஹுல்லாய சேதெஸ்ஸந்தீ’’தி! அத² கோ² தே பி⁴க்கூ² தே அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, பி⁴க்கூ² ஏவரூபாய பா³ஹுல்லாய சேதெந்தீ’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம தே, பி⁴க்க²வே, மோக⁴புரிஸா ஏவரூபாய பா³ஹுல்லாய சேதெஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –
621. Atha kho āyasmā pilindavaccho yena rañño māgadhassa seniyassa bimbisārassa nivesanaṃ tenupasaṅkami; upasaṅkamitvā paññatte āsane nisīdi. Atha kho rājā māgadho seniyo bimbisāro yenāyasmā pilindavaccho tenupasaṅkami; upasaṅkamitvā āyasmantaṃ pilindavacchaṃ abhivādetvā ekamantaṃ nisīdi. Ekamantaṃ nisinnaṃ kho rājānaṃ māgadhaṃ seniyaṃ bimbisāraṃ āyasmā pilindavaccho etadavoca – ‘‘kissa, mahārāja, ārāmikakulaṃ bandhāpita’’nti? ‘‘Tassa, bhante, ārāmikassa ghare suvaṇṇamālā abhirūpā dassanīyā pāsādikā. Natthi tādisā amhākampi antepure suvaṇṇamālā. Kuto tassa duggatassa! Nissaṃsayaṃ corikāya ābhatā’’ti!! Atha kho āyasmā pilindavaccho rañño māgadhassa seniyassa bimbisārassa pāsādaṃ suvaṇṇanti adhimucci. So ahosi sabbasovaṇṇamayo. ‘‘Idaṃ pana te, mahārāja, tāva bahuṃ suvaṇṇaṃ kuto’’ti? ‘‘Aññātaṃ, bhante, ayyasseveso iddhānubhāvo’’ti. Taṃ ārāmikakulaṃ muñcāpesi. Manussā – ‘‘ayyena kira pilindavacchena sarājikāya parisāya uttarimanussadhammaṃ iddhipāṭihāriyaṃ dassita’’nti, attamanā abhippasannā āyasmato pilindavacchassa pañca bhesajjāni abhihariṃsu, seyyathidaṃ – sappi navanītaṃ telaṃ madhu phāṇitaṃ. Pakatiyāpi ca āyasmā pilindavaccho lābhī hoti pañcannaṃ bhesajjānaṃ. Laddhaṃ laddhaṃ parisāya vissajjeti. Parisā cassa hoti bāhullikā. Laddhaṃ laddhaṃ kolambepi ghaṭepi pūretvā paṭisāmeti, parissāvanānipi thavikāyopi pūretvā vātapānesu laggeti. Tāni olīnavilīnāni tiṭṭhanti. Undūrehipi vihārā okiṇṇavikiṇṇā honti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘antokoṭṭhāgārikā ime samaṇā sakyaputtiyā, seyyathāpi rājā māgadho seniyo bimbisāro’’ti ! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū evarūpāya bāhullāya cetessantī’’ti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira, bhikkhave, bhikkhū evarūpāya bāhullāya cetentī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā evarūpāya bāhullāya cetessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
622. ‘‘யானி கோ² பன தானி கி³லானானங் பி⁴க்கூ²னங் படிஸாயனீயானி பே⁴ஸஜ்ஜானி, ஸெய்யதி²த³ங் – ஸப்பி நவனீதங் தேலங் மது⁴ பா²ணிதங், தானி படிக்³க³ஹெத்வா ஸத்தாஹபரமங் ஸன்னிதி⁴காரகங் பரிபு⁴ஞ்ஜிதப்³பா³னி. தங் அதிக்காமயதோ நிஸ்ஸக்³கி³யங் பாசித்திய’’ந்தி.
622.‘‘Yānikho pana tāni gilānānaṃ bhikkhūnaṃ paṭisāyanīyāni bhesajjāni, seyyathidaṃ – sappi navanītaṃ telaṃ madhu phāṇitaṃ, tāni paṭiggahetvā sattāhaparamaṃ sannidhikārakaṃ paribhuñjitabbāni. Taṃ atikkāmayato nissaggiyaṃ pācittiya’’nti.
623. யானி கோ² பன தானி கி³லானானங் பி⁴க்கூ²னங் படிஸாயனீயானி பெ⁴ஸ்ஸஜ்ஜானீதி ஸப்பி நாம கோ³ஸப்பி வா அஜிகாஸப்பி வா மஹிங்ஸஸப்பி 7 வா யேஸங் மங்ஸங் கப்பதி தேஸங் ஸப்பி. நவனீதங் நாம தேஸங் யேவ நவனீதங். தேலங் நாம திலதேலங் ஸாஸபதேலங் மது⁴கதேலங் ஏரண்ட³தேலங் வஸாதேலங். மது⁴ நாம மக்கி²காமது⁴. பா²ணிதங் நாம உச்சு²ம்ஹா நிப்³ப³த்தங்.
623.Yāni kho pana tāni gilānānaṃ bhikkhūnaṃ paṭisāyanīyāni bhessajjānīti sappi nāma gosappi vā ajikāsappi vā mahiṃsasappi 8 vā yesaṃ maṃsaṃ kappati tesaṃ sappi. Navanītaṃ nāma tesaṃ yeva navanītaṃ. Telaṃ nāma tilatelaṃ sāsapatelaṃ madhukatelaṃ eraṇḍatelaṃ vasātelaṃ. Madhu nāma makkhikāmadhu. Phāṇitaṃ nāma ucchumhā nibbattaṃ.
தானி படிக்³க³ஹெத்வா ஸத்தாஹபரமங் ஸன்னிதி⁴காரகங் பரிபு⁴ஞ்ஜிதப்³பா³னீதி ஸத்தாஹபரமதா பரிபு⁴ஞ்ஜிதப்³பா³னி.
Tāni paṭiggahetvā sattāhaparamaṃ sannidhikārakaṃ paribhuñjitabbānīti sattāhaparamatā paribhuñjitabbāni.
தங் அதிக்காமயதோ நிஸ்ஸக்³கி³யங் ஹோதீதி அட்ட²மே அருணுக்³க³மனே நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… இத³ங் மே, ப⁴ந்தே, பே⁴ஸஜ்ஜங் ஸத்தாஹாதிக்கந்தங் நிஸ்ஸக்³கி³யங், இமாஹங் ஸங்க⁴ஸ்ஸ நிஸ்ஸஜ்ஜாமீதி…பே॰… த³தெ³ய்யாதி…பே॰… த³தெ³ய்யுந்தி…பே॰… ஆயஸ்மதோ த³ம்மீதி.
Taṃ atikkāmayato nissaggiyaṃhotīti aṭṭhame aruṇuggamane nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, bhesajjaṃ sattāhātikkantaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
624. ஸத்தாஹாதிக்கந்தே அதிக்கந்தஸஞ்ஞீ, நிஸ்ஸக்³கி³யங் பாசித்தியங். ஸத்தாஹாதிக்கந்தே வேமதிகோ, நிஸ்ஸக்³கி³யங் பாசித்தியங். ஸத்தாஹாதிக்கந்தே அனதிக்கந்தஸஞ்ஞீ, நிஸ்ஸக்³கி³யங் பாசித்தியங். அனதி⁴ட்டி²தே அதி⁴ட்டி²தஸஞ்ஞீ, நிஸ்ஸக்³கி³யங் பாசித்தியங். அவிஸ்ஸஜ்ஜிதே விஸ்ஸஜ்ஜிதஸஞ்ஞீ, நிஸ்ஸக்³கி³யங் பாசித்தியங். அனட்டே² நட்ட²ஸஞ்ஞீ, நிஸ்ஸக்³கி³யங் பாசித்தியங். அவினட்டே² வினட்ட²ஸஞ்ஞீ, நிஸ்ஸக்³கி³யங் பாசித்தியங். அத³ட்³டே⁴ த³ட்³ட⁴ஸஞ்ஞீ, நிஸ்ஸக்³கி³யங் பாசித்தியங். அவிலுத்தே விலுத்தஸஞ்ஞீ, நிஸ்ஸக்³கி³யங் பாசித்தியங்.
624. Sattāhātikkante atikkantasaññī, nissaggiyaṃ pācittiyaṃ. Sattāhātikkante vematiko, nissaggiyaṃ pācittiyaṃ. Sattāhātikkante anatikkantasaññī, nissaggiyaṃ pācittiyaṃ. Anadhiṭṭhite adhiṭṭhitasaññī, nissaggiyaṃ pācittiyaṃ. Avissajjite vissajjitasaññī, nissaggiyaṃ pācittiyaṃ. Anaṭṭhe naṭṭhasaññī, nissaggiyaṃ pācittiyaṃ. Avinaṭṭhe vinaṭṭhasaññī, nissaggiyaṃ pācittiyaṃ. Adaḍḍhe daḍḍhasaññī, nissaggiyaṃ pācittiyaṃ. Avilutte viluttasaññī, nissaggiyaṃ pācittiyaṃ.
நிஸ்ஸட்ட²ங் படிலபி⁴த்வா ந காயிகேன பரிபோ⁴கே³ன பரிபு⁴ஞ்ஜிதப்³ப³ங், ந அஜ்ஜோ²ஹரிதப்³ப³ங், பதீ³பே வா காளவண்ணே வா உபனேதப்³ப³ங், அஞ்ஞேன பி⁴க்கு²னா காயிகேன பரிபோ⁴கே³ன பரிபு⁴ஞ்ஜிதப்³ப³ங், ந அஜ்ஜோ²ஹரிதப்³ப³ங்.
Nissaṭṭhaṃ paṭilabhitvā na kāyikena paribhogena paribhuñjitabbaṃ, na ajjhoharitabbaṃ, padīpe vā kāḷavaṇṇe vā upanetabbaṃ, aññena bhikkhunā kāyikena paribhogena paribhuñjitabbaṃ, na ajjhoharitabbaṃ.
ஸத்தாஹானதிக்கந்தே அதிக்கந்தஸஞ்ஞீ, ஆபத்தி து³க்கடஸ்ஸ. ஸத்தாஹானதிக்கந்தே வேமதிகோ, ஆபத்தி து³க்கடஸ்ஸ. ஸத்தாஹானதிக்கந்தே அனதிக்கந்தஸஞ்ஞீ, அனாபத்தி.
Sattāhānatikkante atikkantasaññī, āpatti dukkaṭassa. Sattāhānatikkante vematiko, āpatti dukkaṭassa. Sattāhānatikkante anatikkantasaññī, anāpatti.
625. அனாபத்தி அந்தோஸத்தாஹங் அதி⁴ட்டே²தி, விஸ்ஸஜ்ஜேதி, நஸ்ஸதி, வினஸ்ஸதி, ட³ய்ஹதி, அச்சி²ந்தி³த்வா க³ண்ஹந்தி, விஸ்ஸாஸங் க³ண்ஹந்தி, அனுபஸம்பன்னஸ்ஸ சத்தேன வந்தேன முத்தேன அனபெக்கோ² த³த்வா படிலபி⁴த்வா பரிபு⁴ஞ்ஜதி, உம்மத்தகஸ்ஸ, ஆதி³கம்மிகஸ்ஸாதி.
625. Anāpatti antosattāhaṃ adhiṭṭheti, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, anupasampannassa cattena vantena muttena anapekkho datvā paṭilabhitvā paribhuñjati, ummattakassa, ādikammikassāti.
பே⁴ஸஜ்ஜஸிக்கா²பத³ங் நிட்டி²தங் ததியங்.
Bhesajjasikkhāpadaṃ niṭṭhitaṃ tatiyaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. பே⁴ஸஜ்ஜஸிக்கா²பத³வண்ணனா • 3. Bhesajjasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. பே⁴ஸஜ்ஜஸிக்கா²பத³வண்ணனா • 3. Bhesajjasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. பே⁴ஸஜ்ஜஸிக்கா²பத³வண்ணனா • 3. Bhesajjasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. பே⁴ஸஜ்ஜஸிக்கா²பத³வண்ணனா • 3. Bhesajjasikkhāpadavaṇṇanā
