| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༣. བྷེསཛྫསིཀྑཱཔདཾ
3. Bhesajjasikkhāpadaṃ
༦༡༨. 1 ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཱཡསྨཱ པིལིནྡཝཙྪོ རཱཛགཧེ པབྦྷཱརཾ སོདྷཱཔེཏི ལེཎཾ ཀཏྟུཀཱམོ། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཡེནཱཡསྨཱ པིལིནྡཝཙྪོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ པིལིནྡཝཙྪཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ རཱཛཱ མཱགདྷོ སེནིཡོ བིམྦིསཱརོ ཨཱཡསྨནྟཾ པིལིནྡཝཙྪཾ ཨེཏདཝོཙ – ‘‘ཀིཾ, བྷནྟེ, ཐེརོ ཀཱརཱཔེཏཱི’’ཏི? ‘‘པབྦྷཱརཾ མཧཱརཱཛ, སོདྷཱཔེམི ལེཎཾ ཀཏྟུཀཱམོ’’ཏི། ‘‘ཨཏྠོ, བྷནྟེ, ཨཡྻསྶ ཨཱརཱམིཀེནཱ’’ཏི? ‘‘ན ཁོ, མཧཱརཱཛ, བྷགཝཏཱ ཨཱརཱམིཀོ ཨནུཉྙཱཏོ’’ཏི། ‘‘ཏེན ཧི, བྷནྟེ, བྷགཝནྟཾ པཊིཔུཙྪིཏྭཱ མམ ཨཱརོཙེཡྻཱཐཱ’’ཏི། ‘‘ཨེཝཾ མཧཱརཱཛཱ’’ཏི ཁོ ཨཱཡསྨཱ པིལིནྡཝཙྪོ རཉྙོ མཱགདྷསྶ སེནིཡསྶ བིམྦིསཱརསྶ པཙྩསྶོསི། ཨཐ ཁོ ཨཱཡསྨཱ པིལིནྡཝཙྪོ རཱཛཱནཾ མཱགདྷཾ སེནིཡཾ བིམྦིསཱརཾ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཨཱཡསྨཏཱ པིལིནྡཝཙྪེན དྷམྨིཡཱ ཀཐཱཡ སནྡསྶིཏོ སམཱདཔིཏོ སམུཏྟེཛིཏོ སམྤཧཾསིཏོ ཨུཊྛཱཡཱསནཱ ཨཱཡསྨནྟཾ པིལིནྡཝཙྪཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི།
618.2 Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā pilindavaccho rājagahe pabbhāraṃ sodhāpeti leṇaṃ kattukāmo. Atha kho rājā māgadho seniyo bimbisāro yenāyasmā pilindavaccho tenupasaṅkami; upasaṅkamitvā āyasmantaṃ pilindavacchaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro āyasmantaṃ pilindavacchaṃ etadavoca – ‘‘kiṃ, bhante, thero kārāpetī’’ti? ‘‘Pabbhāraṃ mahārāja, sodhāpemi leṇaṃ kattukāmo’’ti. ‘‘Attho, bhante, ayyassa ārāmikenā’’ti? ‘‘Na kho, mahārāja, bhagavatā ārāmiko anuññāto’’ti. ‘‘Tena hi, bhante, bhagavantaṃ paṭipucchitvā mama āroceyyāthā’’ti. ‘‘Evaṃ mahārājā’’ti kho āyasmā pilindavaccho rañño māgadhassa seniyassa bimbisārassa paccassosi. Atha kho āyasmā pilindavaccho rājānaṃ māgadhaṃ seniyaṃ bimbisāraṃ dhammiyā kathāya sandassesi samādapesi samuttejesi sampahaṃsesi. Atha kho rājā māgadho seniyo bimbisāro āyasmatā pilindavacchena dhammiyā kathāya sandassito samādapito samuttejito sampahaṃsito uṭṭhāyāsanā āyasmantaṃ pilindavacchaṃ abhivādetvā padakkhiṇaṃ katvā pakkāmi.
༦༡༩. ཨཐ ཁོ ཨཱཡསྨཱ པིལིནྡཝཙྪོ བྷགཝཏོ སནྟིཀེ དཱུཏཾ པཱཧེསི – ‘‘རཱཛཱ, བྷནྟེ , མཱགདྷོ སེནིཡོ བིམྦིསཱརོ ཨཱརཱམིཀཾ དཱཏུཀཱམོ། ཀཐཾ ནུ ཁོ, བྷནྟེ, མཡཱ པཊིཔཛྫིཏབྦ’’ནྟི? ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཨཱརཱམིཀ’’ནྟི། དུཏིཡམྤི ཁོ རཱཛཱ མཱགདྷོ སེནིཡོ བིམྦིསཱརོ ཡེནཱཡསྨཱ པིལིནྡིཝཙྪོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ པིལིནྡཝཙྪཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ རཱཛཱ མཱགདྷོ སེནིཡོ བིམྦིསཱརོ ཨཱཡསྨནྟཾ པིལིནྡཝཙྪཾ ཨེཏདཝོཙ – ‘‘ཨནུཉྙཱཏོ, བྷནྟེ, བྷགཝཏཱ ཨཱརཱམིཀོ’’ཏི? ‘‘ཨེཝཾ, མཧཱརཱཛཱ’’ཏི། ‘‘ཏེན ཧི, བྷནྟེ, ཨཡྻསྶ ཨཱརཱམིཀཾ དམྨཱི’’ཏི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཨཱཡསྨཏོ པིལིནྡཝཙྪསྶ ཨཱརཱམིཀཾ པཊིསྶུཎིཏྭཱ ཝིསྶརིཏྭཱ ཙིརེན སཏིཾ པཊིལབྷིཏྭཱ ཨཉྙཏརཾ སབྦཏྠཀཾ མཧཱམཏྟཾ ཨཱམནྟེསི – ‘‘ཡོ མཡཱ, བྷཎེ, ཨཡྻསྶ ཨཱརཱམིཀོ པཊིསྶུཏོ, དིནྣོ སོ ཨཱརཱམིཀོ’’ཏི? ‘‘ན ཁོ, དེཝ, ཨཡྻསྶ ཨཱརཱམིཀོ དིནྣོ’’ཏི། ‘‘ཀཱིཝཙིརཾ ནུ ཁོ, བྷཎེ, ཨིཏོ ཧི ཏཾ ཧོཏཱི’’ཏི? ཨཐ ཁོ སོ མཧཱམཏྟོ རཏྟིཡོ གཎེཏྭཱ 3 རཱཛཱནཾ མཱགདྷཾ སེནིཡཾ བིམྦིསཱརཾ ཨེཏདཝོཙ – ‘‘པཉྩ, དེཝ, རཏྟིསཏཱནཱི’’ཏི། ‘‘ཏེན ཧི, བྷཎེ, ཨཡྻསྶ པཉྩ ཨཱརཱམིཀསཏཱནི དེཧཱི’’ཏི། ‘‘ཨེཝཾ, དེཝཱ’’ཏི ཁོ སོ མཧཱམཏྟོ རཉྙོ མཱགདྷསྶ སེནིཡསྶ བིམྦིསཱརསྶ པཊིསྶུཎིཏྭཱ ཨཱཡསྨཏོ པིལིནྡཝཙྪསྶ པཉྩ ཨཱརཱམིཀསཏཱནི པཱདཱསི 4, པཱཊིཡེཀྐོ གཱམོ ནིཝིསི། ཨཱརཱམིཀགཱམཀོཏིཔི ནཾ ཨཱཧཾསུ, པིལིནྡགཱམཀོཏིཔི ནཾ ཨཱཧཾསུ།
619. Atha kho āyasmā pilindavaccho bhagavato santike dūtaṃ pāhesi – ‘‘rājā, bhante , māgadho seniyo bimbisāro ārāmikaṃ dātukāmo. Kathaṃ nu kho, bhante, mayā paṭipajjitabba’’nti? Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, ārāmika’’nti. Dutiyampi kho rājā māgadho seniyo bimbisāro yenāyasmā pilindivaccho tenupasaṅkami; upasaṅkamitvā āyasmantaṃ pilindavacchaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro āyasmantaṃ pilindavacchaṃ etadavoca – ‘‘anuññāto, bhante, bhagavatā ārāmiko’’ti? ‘‘Evaṃ, mahārājā’’ti. ‘‘Tena hi, bhante, ayyassa ārāmikaṃ dammī’’ti. Atha kho rājā māgadho seniyo bimbisāro āyasmato pilindavacchassa ārāmikaṃ paṭissuṇitvā vissaritvā cirena satiṃ paṭilabhitvā aññataraṃ sabbatthakaṃ mahāmattaṃ āmantesi – ‘‘yo mayā, bhaṇe, ayyassa ārāmiko paṭissuto, dinno so ārāmiko’’ti? ‘‘Na kho, deva, ayyassa ārāmiko dinno’’ti. ‘‘Kīvaciraṃ nu kho, bhaṇe, ito hi taṃ hotī’’ti? Atha kho so mahāmatto rattiyo gaṇetvā 5 rājānaṃ māgadhaṃ seniyaṃ bimbisāraṃ etadavoca – ‘‘pañca, deva, rattisatānī’’ti. ‘‘Tena hi, bhaṇe, ayyassa pañca ārāmikasatāni dehī’’ti. ‘‘Evaṃ, devā’’ti kho so mahāmatto rañño māgadhassa seniyassa bimbisārassa paṭissuṇitvā āyasmato pilindavacchassa pañca ārāmikasatāni pādāsi 6, pāṭiyekko gāmo nivisi. Ārāmikagāmakotipi naṃ āhaṃsu, pilindagāmakotipi naṃ āhaṃsu.
༦༢༠. ཏེན ཁོ པན སམཡེན ཨཱཡསྨཱ པིལིནྡཝཙྪོ ཏསྨིཾ གཱམཀེ ཀུལཱུཔཀོ ཧོཏི། ཨཐ ཁོ ཨཱཡསྨཱ པིལིནྡཝཙྪོ པུབྦཎྷསམཡཾ ནིཝཱསེཏྭཱ པཏྟཙཱིཝརཾ ཨཱདཱཡ པིལིནྡགཱམཀཾ པིཎྜཱཡ པཱཝིསི། ཏེན ཁོ པན སམཡེན ཏསྨིཾ གཱམཀེ ཨུསྶཝོ ཧོཏི། དཱརཀཱ ཨལངྐཏཱ མཱལཱཀིཏཱ ཀཱིལ༹ནྟི། ཨཐ ཁོ ཨཱཡསྨཱ པིལིནྡཝཙྪོ པིལིནྡགཱམཀེ སཔདཱནཾ པིཎྜཱཡ ཙརམཱནོ ཡེན ཨཉྙཏརསྶ ཨཱརཱམིཀསྶ ནིཝེསནཾ ཏེནུཔསངྐམི; ཨུཔསངྐམིཏྭཱ པཉྙཏྟེ ཨཱསནེ ནིསཱིདི། ཏེན ཁོ པན སམཡེན ཏསྶཱ ཨཱརཱམིཀིནིཡཱ དྷཱིཏཱ ཨཉྙེ དཱརཀེ ཨལངྐཏེ མཱལཱཀིཏེ པསྶིཏྭཱ རོདཏི – ‘‘མཱལཾ མེ དེཐ, ཨལངྐཱརཾ མེ དེཐཱ’’ཏི། ཨཐ ཁོ ཨཱཡསྨཱ པིལིནྡཝཙྪོ ཏཾ ཨཱརཱམིཀིནིཾ ཨེཏདཝོཙ – ‘‘ཀིསྶཱཡཾ དཱརིཀཱ རོདཏཱི’’ཏི? ‘‘ཨཡཾ, བྷནྟེ, དཱརིཀཱ ཨཉྙེ དཱརཀེ ཨལངྐཏེ མཱལཱཀིཏེ པསྶིཏྭཱ རོདཏི – ‘མཱལཾ མེ དེཐ, ཨལངྐཱརཾ མེ དེཐཱ’ཏི། ཀུཏོ ཨམྷཱཀཾ དུགྒཏཱནཾ མཱལཱ ཀུཏོ, ཨལངྐཱརོ’’ཏི? ཨཐ ཁོ ཨཱཡསྨཱ པིལིནྡཝཙྪོ ཨཉྙཏརཾ ཏིཎཎྜུཔཀཾ གཧེཏྭཱ ཏཾ ཨཱརཱམིཀིནིཾ ཨེཏདཝོཙ – ‘‘ཧནྡིམཾ ཏིཎཎྜུཔཀཾ ཏསྶཱ དཱརིཀཱཡ སཱིསེ པཊིམུཉྩཱ’’ཏི། ཨཐ ཁོ སཱ ཨཱརཱམིཀིནཱི ཏཾ ཏིཎཎྜུཔཀཾ གཧེཏྭཱ ཏསྶཱ དཱརིཀཱཡ སཱིསེ པཊིམུཉྩི། སཱ ཨཧོསི སུཝཎྞམཱལཱ ཨབྷིརཱུཔཱ དསྶནཱིཡཱ པཱསཱདིཀཱ། ནཏྠི ཏཱདིསཱ རཉྙོཔི ཨནྟེཔུརེ སུཝཎྞམཱལཱ། མནུསྶཱ རཉྙོ མཱགདྷསྶ སེནིཡསྶ བིམྦིསཱརསྶ ཨཱརོཙེསུཾ – ‘‘ཨམུཀསྶ, དེཝ, ཨཱརཱམིཀསྶ གྷརེ སུཝཎྞམཱལཱ ཨབྷིརཱུཔཱ དསྶནཱིཡཱ པཱསཱདིཀཱ། ནཏྠི ཏཱདིསཱ དེཝསྶཱཔི ཨནྟེཔུརེ སུཝཎྞམཱལཱ། ཀུཏོ ཏསྶ དུགྒཏསྶ! ནིསྶཾསཡཾ ཙོརིཀཱཡ ཨཱབྷཏཱ’’ཏི!! ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཏཾ ཨཱརཱམིཀཀུལཾ བནྡྷཱཔེསི། དུཏིཡམྤི ཁོ ཨཱཡསྨཱ པིལིནྡཝཙྪོ པུབྦཎྷསམཡཾ ནིཝཱསེཏྭཱ པཏྟཙཱིཝརཾ ཨཱདཱཡ པིལིནྡགཱམཀཾ པིཎྜཱཡ པཱཝིསི། པིལིནྡགཱམཀེ སཔདཱནཾ པིཎྜཱཡ ཙརམཱནོ ཡེན ཏསྶ ཨཱརཱམིཀསྶ ནིཝེསནཾ ཏེནུཔསངྐམི; ཨུཔསངྐམིཏྭཱ པཊིཝིསྶཀེ པུཙྪི – ‘‘ཀཧཾ ཨིམཾ ཨཱརཱམིཀཀུལཾ གཏ’’ནྟི? ‘‘ཨེཏིསྶཱ, བྷནྟེ, སུཝཎྞམཱལཱཡ ཀཱརཎཱ རཉྙཱ བནྡྷཱཔིཏ’’ནྟི།
620. Tena kho pana samayena āyasmā pilindavaccho tasmiṃ gāmake kulūpako hoti. Atha kho āyasmā pilindavaccho pubbaṇhasamayaṃ nivāsetvā pattacīvaraṃ ādāya pilindagāmakaṃ piṇḍāya pāvisi. Tena kho pana samayena tasmiṃ gāmake ussavo hoti. Dārakā alaṅkatā mālākitā kīḷanti. Atha kho āyasmā pilindavaccho pilindagāmake sapadānaṃ piṇḍāya caramāno yena aññatarassa ārāmikassa nivesanaṃ tenupasaṅkami; upasaṅkamitvā paññatte āsane nisīdi. Tena kho pana samayena tassā ārāmikiniyā dhītā aññe dārake alaṅkate mālākite passitvā rodati – ‘‘mālaṃ me detha, alaṅkāraṃ me dethā’’ti. Atha kho āyasmā pilindavaccho taṃ ārāmikiniṃ etadavoca – ‘‘kissāyaṃ dārikā rodatī’’ti? ‘‘Ayaṃ, bhante, dārikā aññe dārake alaṅkate mālākite passitvā rodati – ‘mālaṃ me detha, alaṅkāraṃ me dethā’ti. Kuto amhākaṃ duggatānaṃ mālā kuto, alaṅkāro’’ti? Atha kho āyasmā pilindavaccho aññataraṃ tiṇaṇḍupakaṃ gahetvā taṃ ārāmikiniṃ etadavoca – ‘‘handimaṃ tiṇaṇḍupakaṃ tassā dārikāya sīse paṭimuñcā’’ti. Atha kho sā ārāmikinī taṃ tiṇaṇḍupakaṃ gahetvā tassā dārikāya sīse paṭimuñci. Sā ahosi suvaṇṇamālā abhirūpā dassanīyā pāsādikā. Natthi tādisā raññopi antepure suvaṇṇamālā. Manussā rañño māgadhassa seniyassa bimbisārassa ārocesuṃ – ‘‘amukassa, deva, ārāmikassa ghare suvaṇṇamālā abhirūpā dassanīyā pāsādikā. Natthi tādisā devassāpi antepure suvaṇṇamālā. Kuto tassa duggatassa! Nissaṃsayaṃ corikāya ābhatā’’ti!! Atha kho rājā māgadho seniyo bimbisāro taṃ ārāmikakulaṃ bandhāpesi. Dutiyampi kho āyasmā pilindavaccho pubbaṇhasamayaṃ nivāsetvā pattacīvaraṃ ādāya pilindagāmakaṃ piṇḍāya pāvisi. Pilindagāmake sapadānaṃ piṇḍāya caramāno yena tassa ārāmikassa nivesanaṃ tenupasaṅkami; upasaṅkamitvā paṭivissake pucchi – ‘‘kahaṃ imaṃ ārāmikakulaṃ gata’’nti? ‘‘Etissā, bhante, suvaṇṇamālāya kāraṇā raññā bandhāpita’’nti.
༦༢༡. ཨཐ ཁོ ཨཱཡསྨཱ པིལིནྡཝཙྪོ ཡེན རཉྙོ མཱགདྷསྶ སེནིཡསྶ བིམྦིསཱརསྶ ནིཝེསནཾ ཏེནུཔསངྐམི; ཨུཔསངྐམིཏྭཱ པཉྙཏྟེ ཨཱསནེ ནིསཱིདི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཡེནཱཡསྨཱ པིལིནྡཝཙྪོ ཏེནུཔསངྐམི; ཨུཔསངྐམིཏྭཱ ཨཱཡསྨནྟཾ པིལིནྡཝཙྪཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ རཱཛཱནཾ མཱགདྷཾ སེནིཡཾ བིམྦིསཱརཾ ཨཱཡསྨཱ པིལིནྡཝཙྪོ ཨེཏདཝོཙ – ‘‘ཀིསྶ, མཧཱརཱཛ, ཨཱརཱམིཀཀུལཾ བནྡྷཱཔིཏ’’ནྟི? ‘‘ཏསྶ, བྷནྟེ, ཨཱརཱམིཀསྶ གྷརེ སུཝཎྞམཱལཱ ཨབྷིརཱུཔཱ དསྶནཱིཡཱ པཱསཱདིཀཱ། ནཏྠི ཏཱདིསཱ ཨམྷཱཀམྤི ཨནྟེཔུརེ སུཝཎྞམཱལཱ། ཀུཏོ ཏསྶ དུགྒཏསྶ! ནིསྶཾསཡཾ ཙོརིཀཱཡ ཨཱབྷཏཱ’’ཏི!! ཨཐ ཁོ ཨཱཡསྨཱ པིལིནྡཝཙྪོ རཉྙོ མཱགདྷསྶ སེནིཡསྶ བིམྦིསཱརསྶ པཱསཱདཾ སུཝཎྞནྟི ཨདྷིམུཙྩི། སོ ཨཧོསི སབྦསོཝཎྞམཡོ། ‘‘ཨིདཾ པན ཏེ, མཧཱརཱཛ, ཏཱཝ བཧུཾ སུཝཎྞཾ ཀུཏོ’’ཏི? ‘‘ཨཉྙཱཏཾ, བྷནྟེ, ཨཡྻསྶེཝེསོ ཨིདྡྷཱནུབྷཱཝོ’’ཏི། ཏཾ ཨཱརཱམིཀཀུལཾ མུཉྩཱཔེསི། མནུསྶཱ – ‘‘ཨཡྻེན ཀིར པིལིནྡཝཙྪེན སརཱཛིཀཱཡ པརིསཱཡ ཨུཏྟརིམནུསྶདྷམྨཾ ཨིདྡྷིཔཱཊིཧཱརིཡཾ དསྶིཏ’’ནྟི, ཨཏྟམནཱ ཨབྷིཔྤསནྣཱ ཨཱཡསྨཏོ པིལིནྡཝཙྪསྶ པཉྩ བྷེསཛྫཱནི ཨབྷིཧརིཾསུ, སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏཾ། པཀཏིཡཱཔི ཙ ཨཱཡསྨཱ པིལིནྡཝཙྪོ ལཱབྷཱི ཧོཏི པཉྩནྣཾ བྷེསཛྫཱནཾ། ལདྡྷཾ ལདྡྷཾ པརིསཱཡ ཝིསྶཛྫེཏི། པརིསཱ ཙསྶ ཧོཏི བཱཧུལླིཀཱ། ལདྡྷཾ ལདྡྷཾ ཀོལམྦེཔི གྷཊེཔི པཱུརེཏྭཱ པཊིསཱམེཏི, པརིསྶཱཝནཱནིཔི ཐཝིཀཱཡོཔི པཱུརེཏྭཱ ཝཱཏཔཱནེསུ ལགྒེཏི། ཏཱནི ཨོལཱིནཝིལཱིནཱནི ཏིཊྛནྟི། ཨུནྡཱུརེཧིཔི ཝིཧཱརཱ ཨོཀིཎྞཝིཀིཎྞཱ ཧོནྟི། མནུསྶཱ ཝིཧཱརཙཱརིཀཾ ཨཱཧིཎྜནྟཱ པསྶིཏྭཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཨནྟོཀོཊྛཱགཱརིཀཱ ཨིམེ སམཎཱ སཀྱཔུཏྟིཡཱ, སེཡྻཐཱཔི རཱཛཱ མཱགདྷོ སེནིཡོ བིམྦིསཱརོ’’ཏི ! ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑཱུ ཨེཝརཱུཔཱཡ བཱཧུལླཱཡ ཙེཏེསྶནྟཱི’’ཏི! ཨཐ ཁོ ཏེ བྷིཀྑཱུ ཏེ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར, བྷིཀྑཝེ, བྷིཀྑཱུ ཨེཝརཱུཔཱཡ བཱཧུལླཱཡ ཙེཏེནྟཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏེ, བྷིཀྑཝེ, མོགྷཔུརིསཱ ཨེཝརཱུཔཱཡ བཱཧུལླཱཡ ཙེཏེསྶནྟི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
621. Atha kho āyasmā pilindavaccho yena rañño māgadhassa seniyassa bimbisārassa nivesanaṃ tenupasaṅkami; upasaṅkamitvā paññatte āsane nisīdi. Atha kho rājā māgadho seniyo bimbisāro yenāyasmā pilindavaccho tenupasaṅkami; upasaṅkamitvā āyasmantaṃ pilindavacchaṃ abhivādetvā ekamantaṃ nisīdi. Ekamantaṃ nisinnaṃ kho rājānaṃ māgadhaṃ seniyaṃ bimbisāraṃ āyasmā pilindavaccho etadavoca – ‘‘kissa, mahārāja, ārāmikakulaṃ bandhāpita’’nti? ‘‘Tassa, bhante, ārāmikassa ghare suvaṇṇamālā abhirūpā dassanīyā pāsādikā. Natthi tādisā amhākampi antepure suvaṇṇamālā. Kuto tassa duggatassa! Nissaṃsayaṃ corikāya ābhatā’’ti!! Atha kho āyasmā pilindavaccho rañño māgadhassa seniyassa bimbisārassa pāsādaṃ suvaṇṇanti adhimucci. So ahosi sabbasovaṇṇamayo. ‘‘Idaṃ pana te, mahārāja, tāva bahuṃ suvaṇṇaṃ kuto’’ti? ‘‘Aññātaṃ, bhante, ayyasseveso iddhānubhāvo’’ti. Taṃ ārāmikakulaṃ muñcāpesi. Manussā – ‘‘ayyena kira pilindavacchena sarājikāya parisāya uttarimanussadhammaṃ iddhipāṭihāriyaṃ dassita’’nti, attamanā abhippasannā āyasmato pilindavacchassa pañca bhesajjāni abhihariṃsu, seyyathidaṃ – sappi navanītaṃ telaṃ madhu phāṇitaṃ. Pakatiyāpi ca āyasmā pilindavaccho lābhī hoti pañcannaṃ bhesajjānaṃ. Laddhaṃ laddhaṃ parisāya vissajjeti. Parisā cassa hoti bāhullikā. Laddhaṃ laddhaṃ kolambepi ghaṭepi pūretvā paṭisāmeti, parissāvanānipi thavikāyopi pūretvā vātapānesu laggeti. Tāni olīnavilīnāni tiṭṭhanti. Undūrehipi vihārā okiṇṇavikiṇṇā honti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘antokoṭṭhāgārikā ime samaṇā sakyaputtiyā, seyyathāpi rājā māgadho seniyo bimbisāro’’ti ! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū evarūpāya bāhullāya cetessantī’’ti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira, bhikkhave, bhikkhū evarūpāya bāhullāya cetentī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā evarūpāya bāhullāya cetessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༦༢༢. ‘‘ཡཱནི ཁོ པན ཏཱནི གིལཱནཱནཾ བྷིཀྑཱུནཾ པཊིསཱཡནཱིཡཱནི བྷེསཛྫཱནི, སེཡྻཐིདཾ – སཔྤི ནཝནཱིཏཾ ཏེལཾ མདྷུ ཕཱཎིཏཾ, ཏཱནི པཊིགྒཧེཏྭཱ སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནི། ཏཾ ཨཏིཀྐཱམཡཏོ ནིསྶགྒིཡཾ པཱཙིཏྟིཡ’’ནྟི།
622.‘‘Yānikho pana tāni gilānānaṃ bhikkhūnaṃ paṭisāyanīyāni bhesajjāni, seyyathidaṃ – sappi navanītaṃ telaṃ madhu phāṇitaṃ, tāni paṭiggahetvā sattāhaparamaṃ sannidhikārakaṃ paribhuñjitabbāni. Taṃ atikkāmayato nissaggiyaṃ pācittiya’’nti.
༦༢༣. ཡཱནི ཁོ པན ཏཱནི གིལཱནཱནཾ བྷིཀྑཱུནཾ པཊིསཱཡནཱིཡཱནི བྷེསྶཛྫཱནཱིཏི སཔྤི ནཱམ གོསཔྤི ཝཱ ཨཛིཀཱསཔྤི ཝཱ མཧིཾསསཔྤི 7 ཝཱ ཡེསཾ མཾསཾ ཀཔྤཏི ཏེསཾ སཔྤི། ནཝནཱིཏཾ ནཱམ ཏེསཾ ཡེཝ ནཝནཱིཏཾ། ཏེལཾ ནཱམ ཏིལཏེལཾ སཱསཔཏེལཾ མདྷུཀཏེལཾ ཨེརཎྜཏེལཾ ཝསཱཏེལཾ། མདྷུ ནཱམ མཀྑིཀཱམདྷུ། ཕཱཎིཏཾ ནཱམ ཨུཙྪུམྷཱ ནིབྦཏྟཾ།
623.Yāni kho pana tāni gilānānaṃ bhikkhūnaṃ paṭisāyanīyāni bhessajjānīti sappi nāma gosappi vā ajikāsappi vā mahiṃsasappi 8 vā yesaṃ maṃsaṃ kappati tesaṃ sappi. Navanītaṃ nāma tesaṃ yeva navanītaṃ. Telaṃ nāma tilatelaṃ sāsapatelaṃ madhukatelaṃ eraṇḍatelaṃ vasātelaṃ. Madhu nāma makkhikāmadhu. Phāṇitaṃ nāma ucchumhā nibbattaṃ.
ཏཱནི པཊིགྒཧེཏྭཱ སཏྟཱཧཔརམཾ སནྣིདྷིཀཱརཀཾ པརིབྷུཉྫིཏབྦཱནཱིཏི སཏྟཱཧཔརམཏཱ པརིབྷུཉྫིཏབྦཱནི།
Tāni paṭiggahetvā sattāhaparamaṃ sannidhikārakaṃ paribhuñjitabbānīti sattāhaparamatā paribhuñjitabbāni.
ཏཾ ཨཏིཀྐཱམཡཏོ ནིསྶགྒིཡཾ ཧོཏཱིཏི ཨཊྛམེ ཨརུཎུགྒམནེ ནིསྶགྒིཡཾ ཧོཏི། ནིསྶཛྫིཏབྦཾ སངྒྷསྶ ཝཱ གཎསྶ ཝཱ པུགྒལསྶ ཝཱ། ཨེཝཉྩ པན, བྷིཀྑཝེ, ནིསྶཛྫིཏབྦཾ…པེ॰… ཨིདཾ མེ, བྷནྟེ, བྷེསཛྫཾ སཏྟཱཧཱཏིཀྐནྟཾ ནིསྶགྒིཡཾ, ཨིམཱཧཾ སངྒྷསྶ ནིསྶཛྫཱམཱིཏི…པེ॰… དདེཡྻཱཏི…པེ॰… དདེཡྻུནྟི…པེ॰… ཨཱཡསྨཏོ དམྨཱིཏི།
Taṃ atikkāmayato nissaggiyaṃhotīti aṭṭhame aruṇuggamane nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, bhesajjaṃ sattāhātikkantaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
༦༢༤. སཏྟཱཧཱཏིཀྐནྟེ ཨཏིཀྐནྟསཉྙཱི, ནིསྶགྒིཡཾ པཱཙིཏྟིཡཾ། སཏྟཱཧཱཏིཀྐནྟེ ཝེམཏིཀོ, ནིསྶགྒིཡཾ པཱཙིཏྟིཡཾ། སཏྟཱཧཱཏིཀྐནྟེ ཨནཏིཀྐནྟསཉྙཱི, ནིསྶགྒིཡཾ པཱཙིཏྟིཡཾ། ཨནདྷིཊྛིཏེ ཨདྷིཊྛིཏསཉྙཱི, ནིསྶགྒིཡཾ པཱཙིཏྟིཡཾ། ཨཝིསྶཛྫིཏེ ཝིསྶཛྫིཏསཉྙཱི, ནིསྶགྒིཡཾ པཱཙིཏྟིཡཾ། ཨནཊྛེ ནཊྛསཉྙཱི, ནིསྶགྒིཡཾ པཱཙིཏྟིཡཾ། ཨཝིནཊྛེ ཝིནཊྛསཉྙཱི, ནིསྶགྒིཡཾ པཱཙིཏྟིཡཾ། ཨདཌྜྷེ དཌྜྷསཉྙཱི, ནིསྶགྒིཡཾ པཱཙིཏྟིཡཾ། ཨཝིལུཏྟེ ཝིལུཏྟསཉྙཱི, ནིསྶགྒིཡཾ པཱཙིཏྟིཡཾ།
624. Sattāhātikkante atikkantasaññī, nissaggiyaṃ pācittiyaṃ. Sattāhātikkante vematiko, nissaggiyaṃ pācittiyaṃ. Sattāhātikkante anatikkantasaññī, nissaggiyaṃ pācittiyaṃ. Anadhiṭṭhite adhiṭṭhitasaññī, nissaggiyaṃ pācittiyaṃ. Avissajjite vissajjitasaññī, nissaggiyaṃ pācittiyaṃ. Anaṭṭhe naṭṭhasaññī, nissaggiyaṃ pācittiyaṃ. Avinaṭṭhe vinaṭṭhasaññī, nissaggiyaṃ pācittiyaṃ. Adaḍḍhe daḍḍhasaññī, nissaggiyaṃ pācittiyaṃ. Avilutte viluttasaññī, nissaggiyaṃ pācittiyaṃ.
ནིསྶཊྛཾ པཊིལབྷིཏྭཱ ན ཀཱཡིཀེན པརིབྷོགེན པརིབྷུཉྫིཏབྦཾ, ན ཨཛ྄ཛྷོཧརིཏབྦཾ, པདཱིཔེ ཝཱ ཀཱལ༹ཝཎྞེ ཝཱ ཨུཔནེཏབྦཾ, ཨཉྙེན བྷིཀྑུནཱ ཀཱཡིཀེན པརིབྷོགེན པརིབྷུཉྫིཏབྦཾ, ན ཨཛ྄ཛྷོཧརིཏབྦཾ།
Nissaṭṭhaṃ paṭilabhitvā na kāyikena paribhogena paribhuñjitabbaṃ, na ajjhoharitabbaṃ, padīpe vā kāḷavaṇṇe vā upanetabbaṃ, aññena bhikkhunā kāyikena paribhogena paribhuñjitabbaṃ, na ajjhoharitabbaṃ.
སཏྟཱཧཱནཏིཀྐནྟེ ཨཏིཀྐནྟསཉྙཱི, ཨཱཔཏྟི དུཀྐཊསྶ། སཏྟཱཧཱནཏིཀྐནྟེ ཝེམཏིཀོ, ཨཱཔཏྟི དུཀྐཊསྶ། སཏྟཱཧཱནཏིཀྐནྟེ ཨནཏིཀྐནྟསཉྙཱི, ཨནཱཔཏྟི།
Sattāhānatikkante atikkantasaññī, āpatti dukkaṭassa. Sattāhānatikkante vematiko, āpatti dukkaṭassa. Sattāhānatikkante anatikkantasaññī, anāpatti.
༦༢༥. ཨནཱཔཏྟི ཨནྟོསཏྟཱཧཾ ཨདྷིཊྛེཏི, ཝིསྶཛྫེཏི, ནསྶཏི, ཝིནསྶཏི, ཌཡ྄ཧཏི, ཨཙྪིནྡིཏྭཱ གཎྷནྟི, ཝིསྶཱསཾ གཎྷནྟི, ཨནུཔསམྤནྣསྶ ཙཏྟེན ཝནྟེན མུཏྟེན ཨནཔེཀྑོ དཏྭཱ པཊིལབྷིཏྭཱ པརིབྷུཉྫཏི, ཨུམྨཏྟཀསྶ, ཨཱདིཀམྨིཀསྶཱཏི།
625. Anāpatti antosattāhaṃ adhiṭṭheti, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, anupasampannassa cattena vantena muttena anapekkho datvā paṭilabhitvā paribhuñjati, ummattakassa, ādikammikassāti.
བྷེསཛྫསིཀྑཱཔདཾ ནིཊྛིཏཾ ཏཏིཡཾ།
Bhesajjasikkhāpadaṃ niṭṭhitaṃ tatiyaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༣. བྷེསཛྫསིཀྑཱཔདཝཎྞནཱ • 3. Bhesajjasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༣. བྷེསཛྫསིཀྑཱཔདཝཎྞནཱ • 3. Bhesajjasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༣. བྷེསཛྫསིཀྑཱཔདཝཎྞནཱ • 3. Bhesajjasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༣. བྷེསཛྫསིཀྑཱཔདཝཎྞནཱ • 3. Bhesajjasikkhāpadavaṇṇanā
