| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ • Mahāvibhaṅga |
੩. ਭੇਸਜ੍ਜਸਿਕ੍ਖਾਪਦਂ
3. Bhesajjasikkhāpadaṃ
੬੧੮. 1 ਤੇਨ ਸਮਯੇਨ ਬੁਦ੍ਧੋ ਭਗવਾ ਸਾવਤ੍ਥਿਯਂ વਿਹਰਤਿ ਜੇਤવਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ। ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਪਿਲਿਨ੍ਦવਚ੍ਛੋ ਰਾਜਗਹੇ ਪਬ੍ਭਾਰਂ ਸੋਧਾਪੇਤਿ ਲੇਣਂ ਕਤ੍ਤੁਕਾਮੋ। ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਪਿਲਿਨ੍ਦવਚ੍ਛੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਆਯਸ੍ਮਨ੍ਤਂ ਪਿਲਿਨ੍ਦવਚ੍ਛਂ ਅਭਿવਾਦੇਤ੍વਾ ਏਕਮਨ੍ਤਂ ਨਿਸੀਦਿ। ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਨ੍ਤਂ ਪਿਲਿਨ੍ਦવਚ੍ਛਂ ਏਤਦવੋਚ – ‘‘ਕਿਂ, ਭਨ੍ਤੇ, ਥੇਰੋ ਕਾਰਾਪੇਤੀ’’ਤਿ? ‘‘ਪਬ੍ਭਾਰਂ ਮਹਾਰਾਜ, ਸੋਧਾਪੇਮਿ ਲੇਣਂ ਕਤ੍ਤੁਕਾਮੋ’’ਤਿ। ‘‘ਅਤ੍ਥੋ, ਭਨ੍ਤੇ, ਅਯ੍ਯਸ੍ਸ ਆਰਾਮਿਕੇਨਾ’’ਤਿ? ‘‘ਨ ਖੋ, ਮਹਾਰਾਜ, ਭਗવਤਾ ਆਰਾਮਿਕੋ ਅਨੁਞ੍ਞਾਤੋ’’ਤਿ। ‘‘ਤੇਨ ਹਿ, ਭਨ੍ਤੇ, ਭਗવਨ੍ਤਂ ਪਟਿਪੁਚ੍ਛਿਤ੍વਾ ਮਮ ਆਰੋਚੇਯ੍ਯਾਥਾ’’ਤਿ। ‘‘ਏવਂ ਮਹਾਰਾਜਾ’’ਤਿ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਚ੍ਚਸ੍ਸੋਸਿ। ਅਥ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ। ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਤਾ ਪਿਲਿਨ੍ਦવਚ੍ਛੇਨ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਆਯਸ੍ਮਨ੍ਤਂ ਪਿਲਿਨ੍ਦવਚ੍ਛਂ ਅਭਿવਾਦੇਤ੍વਾ ਪਦਕ੍ਖਿਣਂ ਕਤ੍વਾ ਪਕ੍ਕਾਮਿ।
618.2 Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā pilindavaccho rājagahe pabbhāraṃ sodhāpeti leṇaṃ kattukāmo. Atha kho rājā māgadho seniyo bimbisāro yenāyasmā pilindavaccho tenupasaṅkami; upasaṅkamitvā āyasmantaṃ pilindavacchaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro āyasmantaṃ pilindavacchaṃ etadavoca – ‘‘kiṃ, bhante, thero kārāpetī’’ti? ‘‘Pabbhāraṃ mahārāja, sodhāpemi leṇaṃ kattukāmo’’ti. ‘‘Attho, bhante, ayyassa ārāmikenā’’ti? ‘‘Na kho, mahārāja, bhagavatā ārāmiko anuññāto’’ti. ‘‘Tena hi, bhante, bhagavantaṃ paṭipucchitvā mama āroceyyāthā’’ti. ‘‘Evaṃ mahārājā’’ti kho āyasmā pilindavaccho rañño māgadhassa seniyassa bimbisārassa paccassosi. Atha kho āyasmā pilindavaccho rājānaṃ māgadhaṃ seniyaṃ bimbisāraṃ dhammiyā kathāya sandassesi samādapesi samuttejesi sampahaṃsesi. Atha kho rājā māgadho seniyo bimbisāro āyasmatā pilindavacchena dhammiyā kathāya sandassito samādapito samuttejito sampahaṃsito uṭṭhāyāsanā āyasmantaṃ pilindavacchaṃ abhivādetvā padakkhiṇaṃ katvā pakkāmi.
੬੧੯. ਅਥ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਭਗવਤੋ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਰਾਜਾ, ਭਨ੍ਤੇ , ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਰਾਮਿਕਂ ਦਾਤੁਕਾਮੋ। ਕਥਂ ਨੁ ਖੋ, ਭਨ੍ਤੇ, ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਅਥ ਖੋ ਭਗવਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖવੇ, ਆਰਾਮਿਕ’’ਨ੍ਤਿ। ਦੁਤਿਯਮ੍ਪਿ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਪਿਲਿਨ੍ਦਿવਚ੍ਛੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਆਯਸ੍ਮਨ੍ਤਂ ਪਿਲਿਨ੍ਦવਚ੍ਛਂ ਅਭਿવਾਦੇਤ੍વਾ ਏਕਮਨ੍ਤਂ ਨਿਸੀਦਿ। ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਨ੍ਤਂ ਪਿਲਿਨ੍ਦવਚ੍ਛਂ ਏਤਦવੋਚ – ‘‘ਅਨੁਞ੍ਞਾਤੋ, ਭਨ੍ਤੇ, ਭਗવਤਾ ਆਰਾਮਿਕੋ’’ਤਿ? ‘‘ਏવਂ, ਮਹਾਰਾਜਾ’’ਤਿ। ‘‘ਤੇਨ ਹਿ, ਭਨ੍ਤੇ, ਅਯ੍ਯਸ੍ਸ ਆਰਾਮਿਕਂ ਦਮ੍ਮੀ’’ਤਿ। ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਤੋ ਪਿਲਿਨ੍ਦવਚ੍ਛਸ੍ਸ ਆਰਾਮਿਕਂ ਪਟਿਸ੍ਸੁਣਿਤ੍વਾ વਿਸ੍ਸਰਿਤ੍વਾ ਚਿਰੇਨ ਸਤਿਂ ਪਟਿਲਭਿਤ੍વਾ ਅਞ੍ਞਤਰਂ ਸਬ੍ਬਤ੍ਥਕਂ ਮਹਾਮਤ੍ਤਂ ਆਮਨ੍ਤੇਸਿ – ‘‘ਯੋ ਮਯਾ, ਭਣੇ, ਅਯ੍ਯਸ੍ਸ ਆਰਾਮਿਕੋ ਪਟਿਸ੍ਸੁਤੋ, ਦਿਨ੍ਨੋ ਸੋ ਆਰਾਮਿਕੋ’’ਤਿ? ‘‘ਨ ਖੋ, ਦੇવ, ਅਯ੍ਯਸ੍ਸ ਆਰਾਮਿਕੋ ਦਿਨ੍ਨੋ’’ਤਿ। ‘‘ਕੀવਚਿਰਂ ਨੁ ਖੋ, ਭਣੇ, ਇਤੋ ਹਿ ਤਂ ਹੋਤੀ’’ਤਿ? ਅਥ ਖੋ ਸੋ ਮਹਾਮਤ੍ਤੋ ਰਤ੍ਤਿਯੋ ਗਣੇਤ੍વਾ 3 ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦવੋਚ – ‘‘ਪਞ੍ਚ, ਦੇવ, ਰਤ੍ਤਿਸਤਾਨੀ’’ਤਿ। ‘‘ਤੇਨ ਹਿ, ਭਣੇ, ਅਯ੍ਯਸ੍ਸ ਪਞ੍ਚ ਆਰਾਮਿਕਸਤਾਨਿ ਦੇਹੀ’’ਤਿ। ‘‘ਏવਂ, ਦੇવਾ’’ਤਿ ਖੋ ਸੋ ਮਹਾਮਤ੍ਤੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਣਿਤ੍વਾ ਆਯਸ੍ਮਤੋ ਪਿਲਿਨ੍ਦવਚ੍ਛਸ੍ਸ ਪਞ੍ਚ ਆਰਾਮਿਕਸਤਾਨਿ ਪਾਦਾਸਿ 4, ਪਾਟਿਯੇਕ੍ਕੋ ਗਾਮੋ ਨਿવਿਸਿ। ਆਰਾਮਿਕਗਾਮਕੋਤਿਪਿ ਨਂ ਆਹਂਸੁ, ਪਿਲਿਨ੍ਦਗਾਮਕੋਤਿਪਿ ਨਂ ਆਹਂਸੁ।
619. Atha kho āyasmā pilindavaccho bhagavato santike dūtaṃ pāhesi – ‘‘rājā, bhante , māgadho seniyo bimbisāro ārāmikaṃ dātukāmo. Kathaṃ nu kho, bhante, mayā paṭipajjitabba’’nti? Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, ārāmika’’nti. Dutiyampi kho rājā māgadho seniyo bimbisāro yenāyasmā pilindivaccho tenupasaṅkami; upasaṅkamitvā āyasmantaṃ pilindavacchaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro āyasmantaṃ pilindavacchaṃ etadavoca – ‘‘anuññāto, bhante, bhagavatā ārāmiko’’ti? ‘‘Evaṃ, mahārājā’’ti. ‘‘Tena hi, bhante, ayyassa ārāmikaṃ dammī’’ti. Atha kho rājā māgadho seniyo bimbisāro āyasmato pilindavacchassa ārāmikaṃ paṭissuṇitvā vissaritvā cirena satiṃ paṭilabhitvā aññataraṃ sabbatthakaṃ mahāmattaṃ āmantesi – ‘‘yo mayā, bhaṇe, ayyassa ārāmiko paṭissuto, dinno so ārāmiko’’ti? ‘‘Na kho, deva, ayyassa ārāmiko dinno’’ti. ‘‘Kīvaciraṃ nu kho, bhaṇe, ito hi taṃ hotī’’ti? Atha kho so mahāmatto rattiyo gaṇetvā 5 rājānaṃ māgadhaṃ seniyaṃ bimbisāraṃ etadavoca – ‘‘pañca, deva, rattisatānī’’ti. ‘‘Tena hi, bhaṇe, ayyassa pañca ārāmikasatāni dehī’’ti. ‘‘Evaṃ, devā’’ti kho so mahāmatto rañño māgadhassa seniyassa bimbisārassa paṭissuṇitvā āyasmato pilindavacchassa pañca ārāmikasatāni pādāsi 6, pāṭiyekko gāmo nivisi. Ārāmikagāmakotipi naṃ āhaṃsu, pilindagāmakotipi naṃ āhaṃsu.
੬੨੦. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਪਿਲਿਨ੍ਦવਚ੍ਛੋ ਤਸ੍ਮਿਂ ਗਾਮਕੇ ਕੁਲੂਪਕੋ ਹੋਤਿ। ਅਥ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਪੁਬ੍ਬਣ੍ਹਸਮਯਂ ਨਿવਾਸੇਤ੍વਾ ਪਤ੍ਤਚੀવਰਂ ਆਦਾਯ ਪਿਲਿਨ੍ਦਗਾਮਕਂ ਪਿਣ੍ਡਾਯ ਪਾવਿਸਿ। ਤੇਨ ਖੋ ਪਨ ਸਮਯੇਨ ਤਸ੍ਮਿਂ ਗਾਮਕੇ ਉਸ੍ਸવੋ ਹੋਤਿ। ਦਾਰਕਾ ਅਲਙ੍ਕਤਾ ਮਾਲਾਕਿਤਾ ਕੀਲ਼ਨ੍ਤਿ। ਅਥ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਪਿਲਿਨ੍ਦਗਾਮਕੇ ਸਪਦਾਨਂ ਪਿਣ੍ਡਾਯ ਚਰਮਾਨੋ ਯੇਨ ਅਞ੍ਞਤਰਸ੍ਸ ਆਰਾਮਿਕਸ੍ਸ ਨਿવੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਪਞ੍ਞਤ੍ਤੇ ਆਸਨੇ ਨਿਸੀਦਿ। ਤੇਨ ਖੋ ਪਨ ਸਮਯੇਨ ਤਸ੍ਸਾ ਆਰਾਮਿਕਿਨਿਯਾ ਧੀਤਾ ਅਞ੍ਞੇ ਦਾਰਕੇ ਅਲਙ੍ਕਤੇ ਮਾਲਾਕਿਤੇ ਪਸ੍ਸਿਤ੍વਾ ਰੋਦਤਿ – ‘‘ਮਾਲਂ ਮੇ ਦੇਥ, ਅਲਙ੍ਕਾਰਂ ਮੇ ਦੇਥਾ’’ਤਿ। ਅਥ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਤਂ ਆਰਾਮਿਕਿਨਿਂ ਏਤਦવੋਚ – ‘‘ਕਿਸ੍ਸਾਯਂ ਦਾਰਿਕਾ ਰੋਦਤੀ’’ਤਿ? ‘‘ਅਯਂ, ਭਨ੍ਤੇ, ਦਾਰਿਕਾ ਅਞ੍ਞੇ ਦਾਰਕੇ ਅਲਙ੍ਕਤੇ ਮਾਲਾਕਿਤੇ ਪਸ੍ਸਿਤ੍વਾ ਰੋਦਤਿ – ‘ਮਾਲਂ ਮੇ ਦੇਥ, ਅਲਙ੍ਕਾਰਂ ਮੇ ਦੇਥਾ’ਤਿ। ਕੁਤੋ ਅਮ੍ਹਾਕਂ ਦੁਗ੍ਗਤਾਨਂ ਮਾਲਾ ਕੁਤੋ, ਅਲਙ੍ਕਾਰੋ’’ਤਿ? ਅਥ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਅਞ੍ਞਤਰਂ ਤਿਣਣ੍ਡੁਪਕਂ ਗਹੇਤ੍વਾ ਤਂ ਆਰਾਮਿਕਿਨਿਂ ਏਤਦવੋਚ – ‘‘ਹਨ੍ਦਿਮਂ ਤਿਣਣ੍ਡੁਪਕਂ ਤਸ੍ਸਾ ਦਾਰਿਕਾਯ ਸੀਸੇ ਪਟਿਮੁਞ੍ਚਾ’’ਤਿ। ਅਥ ਖੋ ਸਾ ਆਰਾਮਿਕਿਨੀ ਤਂ ਤਿਣਣ੍ਡੁਪਕਂ ਗਹੇਤ੍વਾ ਤਸ੍ਸਾ ਦਾਰਿਕਾਯ ਸੀਸੇ ਪਟਿਮੁਞ੍ਚਿ। ਸਾ ਅਹੋਸਿ ਸੁવਣ੍ਣਮਾਲਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ। ਨਤ੍ਥਿ ਤਾਦਿਸਾ ਰਞ੍ਞੋਪਿ ਅਨ੍ਤੇਪੁਰੇ ਸੁવਣ੍ਣਮਾਲਾ। ਮਨੁਸ੍ਸਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਆਰੋਚੇਸੁਂ – ‘‘ਅਮੁਕਸ੍ਸ, ਦੇવ, ਆਰਾਮਿਕਸ੍ਸ ਘਰੇ ਸੁવਣ੍ਣਮਾਲਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ। ਨਤ੍ਥਿ ਤਾਦਿਸਾ ਦੇવਸ੍ਸਾਪਿ ਅਨ੍ਤੇਪੁਰੇ ਸੁવਣ੍ਣਮਾਲਾ। ਕੁਤੋ ਤਸ੍ਸ ਦੁਗ੍ਗਤਸ੍ਸ! ਨਿਸ੍ਸਂਸਯਂ ਚੋਰਿਕਾਯ ਆਭਤਾ’’ਤਿ!! ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤਂ ਆਰਾਮਿਕਕੁਲਂ ਬਨ੍ਧਾਪੇਸਿ। ਦੁਤਿਯਮ੍ਪਿ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਪੁਬ੍ਬਣ੍ਹਸਮਯਂ ਨਿવਾਸੇਤ੍વਾ ਪਤ੍ਤਚੀવਰਂ ਆਦਾਯ ਪਿਲਿਨ੍ਦਗਾਮਕਂ ਪਿਣ੍ਡਾਯ ਪਾવਿਸਿ। ਪਿਲਿਨ੍ਦਗਾਮਕੇ ਸਪਦਾਨਂ ਪਿਣ੍ਡਾਯ ਚਰਮਾਨੋ ਯੇਨ ਤਸ੍ਸ ਆਰਾਮਿਕਸ੍ਸ ਨਿવੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਪਟਿવਿਸ੍ਸਕੇ ਪੁਚ੍ਛਿ – ‘‘ਕਹਂ ਇਮਂ ਆਰਾਮਿਕਕੁਲਂ ਗਤ’’ਨ੍ਤਿ? ‘‘ਏਤਿਸ੍ਸਾ, ਭਨ੍ਤੇ, ਸੁવਣ੍ਣਮਾਲਾਯ ਕਾਰਣਾ ਰਞ੍ਞਾ ਬਨ੍ਧਾਪਿਤ’’ਨ੍ਤਿ।
620. Tena kho pana samayena āyasmā pilindavaccho tasmiṃ gāmake kulūpako hoti. Atha kho āyasmā pilindavaccho pubbaṇhasamayaṃ nivāsetvā pattacīvaraṃ ādāya pilindagāmakaṃ piṇḍāya pāvisi. Tena kho pana samayena tasmiṃ gāmake ussavo hoti. Dārakā alaṅkatā mālākitā kīḷanti. Atha kho āyasmā pilindavaccho pilindagāmake sapadānaṃ piṇḍāya caramāno yena aññatarassa ārāmikassa nivesanaṃ tenupasaṅkami; upasaṅkamitvā paññatte āsane nisīdi. Tena kho pana samayena tassā ārāmikiniyā dhītā aññe dārake alaṅkate mālākite passitvā rodati – ‘‘mālaṃ me detha, alaṅkāraṃ me dethā’’ti. Atha kho āyasmā pilindavaccho taṃ ārāmikiniṃ etadavoca – ‘‘kissāyaṃ dārikā rodatī’’ti? ‘‘Ayaṃ, bhante, dārikā aññe dārake alaṅkate mālākite passitvā rodati – ‘mālaṃ me detha, alaṅkāraṃ me dethā’ti. Kuto amhākaṃ duggatānaṃ mālā kuto, alaṅkāro’’ti? Atha kho āyasmā pilindavaccho aññataraṃ tiṇaṇḍupakaṃ gahetvā taṃ ārāmikiniṃ etadavoca – ‘‘handimaṃ tiṇaṇḍupakaṃ tassā dārikāya sīse paṭimuñcā’’ti. Atha kho sā ārāmikinī taṃ tiṇaṇḍupakaṃ gahetvā tassā dārikāya sīse paṭimuñci. Sā ahosi suvaṇṇamālā abhirūpā dassanīyā pāsādikā. Natthi tādisā raññopi antepure suvaṇṇamālā. Manussā rañño māgadhassa seniyassa bimbisārassa ārocesuṃ – ‘‘amukassa, deva, ārāmikassa ghare suvaṇṇamālā abhirūpā dassanīyā pāsādikā. Natthi tādisā devassāpi antepure suvaṇṇamālā. Kuto tassa duggatassa! Nissaṃsayaṃ corikāya ābhatā’’ti!! Atha kho rājā māgadho seniyo bimbisāro taṃ ārāmikakulaṃ bandhāpesi. Dutiyampi kho āyasmā pilindavaccho pubbaṇhasamayaṃ nivāsetvā pattacīvaraṃ ādāya pilindagāmakaṃ piṇḍāya pāvisi. Pilindagāmake sapadānaṃ piṇḍāya caramāno yena tassa ārāmikassa nivesanaṃ tenupasaṅkami; upasaṅkamitvā paṭivissake pucchi – ‘‘kahaṃ imaṃ ārāmikakulaṃ gata’’nti? ‘‘Etissā, bhante, suvaṇṇamālāya kāraṇā raññā bandhāpita’’nti.
੬੨੧. ਅਥ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਨਿવੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਪਞ੍ਞਤ੍ਤੇ ਆਸਨੇ ਨਿਸੀਦਿ। ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਪਿਲਿਨ੍ਦવਚ੍ਛੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍વਾ ਆਯਸ੍ਮਨ੍ਤਂ ਪਿਲਿਨ੍ਦવਚ੍ਛਂ ਅਭਿવਾਦੇਤ੍વਾ ਏਕਮਨ੍ਤਂ ਨਿਸੀਦਿ। ਏਕਮਨ੍ਤਂ ਨਿਸਿਨ੍ਨਂ ਖੋ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਆਯਸ੍ਮਾ ਪਿਲਿਨ੍ਦવਚ੍ਛੋ ਏਤਦવੋਚ – ‘‘ਕਿਸ੍ਸ, ਮਹਾਰਾਜ, ਆਰਾਮਿਕਕੁਲਂ ਬਨ੍ਧਾਪਿਤ’’ਨ੍ਤਿ? ‘‘ਤਸ੍ਸ, ਭਨ੍ਤੇ, ਆਰਾਮਿਕਸ੍ਸ ਘਰੇ ਸੁવਣ੍ਣਮਾਲਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ। ਨਤ੍ਥਿ ਤਾਦਿਸਾ ਅਮ੍ਹਾਕਮ੍ਪਿ ਅਨ੍ਤੇਪੁਰੇ ਸੁવਣ੍ਣਮਾਲਾ। ਕੁਤੋ ਤਸ੍ਸ ਦੁਗ੍ਗਤਸ੍ਸ! ਨਿਸ੍ਸਂਸਯਂ ਚੋਰਿਕਾਯ ਆਭਤਾ’’ਤਿ!! ਅਥ ਖੋ ਆਯਸ੍ਮਾ ਪਿਲਿਨ੍ਦવਚ੍ਛੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਾਸਾਦਂ ਸੁવਣ੍ਣਨ੍ਤਿ ਅਧਿਮੁਚ੍ਚਿ। ਸੋ ਅਹੋਸਿ ਸਬ੍ਬਸੋવਣ੍ਣਮਯੋ। ‘‘ਇਦਂ ਪਨ ਤੇ, ਮਹਾਰਾਜ, ਤਾવ ਬਹੁਂ ਸੁવਣ੍ਣਂ ਕੁਤੋ’’ਤਿ? ‘‘ਅਞ੍ਞਾਤਂ, ਭਨ੍ਤੇ, ਅਯ੍ਯਸ੍ਸੇવੇਸੋ ਇਦ੍ਧਾਨੁਭਾવੋ’’ਤਿ। ਤਂ ਆਰਾਮਿਕਕੁਲਂ ਮੁਞ੍ਚਾਪੇਸਿ। ਮਨੁਸ੍ਸਾ – ‘‘ਅਯ੍ਯੇਨ ਕਿਰ ਪਿਲਿਨ੍ਦવਚ੍ਛੇਨ ਸਰਾਜਿਕਾਯ ਪਰਿਸਾਯ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸਿਤ’’ਨ੍ਤਿ, ਅਤ੍ਤਮਨਾ ਅਭਿਪ੍ਪਸਨ੍ਨਾ ਆਯਸ੍ਮਤੋ ਪਿਲਿਨ੍ਦવਚ੍ਛਸ੍ਸ ਪਞ੍ਚ ਭੇਸਜ੍ਜਾਨਿ ਅਭਿਹਰਿਂਸੁ, ਸੇਯ੍ਯਥਿਦਂ – ਸਪ੍ਪਿ ਨવਨੀਤਂ ਤੇਲਂ ਮਧੁ ਫਾਣਿਤਂ। ਪਕਤਿਯਾਪਿ ਚ ਆਯਸ੍ਮਾ ਪਿਲਿਨ੍ਦવਚ੍ਛੋ ਲਾਭੀ ਹੋਤਿ ਪਞ੍ਚਨ੍ਨਂ ਭੇਸਜ੍ਜਾਨਂ। ਲਦ੍ਧਂ ਲਦ੍ਧਂ ਪਰਿਸਾਯ વਿਸ੍ਸਜ੍ਜੇਤਿ। ਪਰਿਸਾ ਚਸ੍ਸ ਹੋਤਿ ਬਾਹੁਲ੍ਲਿਕਾ। ਲਦ੍ਧਂ ਲਦ੍ਧਂ ਕੋਲਮ੍ਬੇਪਿ ਘਟੇਪਿ ਪੂਰੇਤ੍વਾ ਪਟਿਸਾਮੇਤਿ, ਪਰਿਸ੍ਸਾવਨਾਨਿਪਿ ਥવਿਕਾਯੋਪਿ ਪੂਰੇਤ੍વਾ વਾਤਪਾਨੇਸੁ ਲਗ੍ਗੇਤਿ। ਤਾਨਿ ਓਲੀਨવਿਲੀਨਾਨਿ ਤਿਟ੍ਠਨ੍ਤਿ। ਉਨ੍ਦੂਰੇਹਿਪਿ વਿਹਾਰਾ ਓਕਿਣ੍ਣવਿਕਿਣ੍ਣਾ ਹੋਨ੍ਤਿ। ਮਨੁਸ੍ਸਾ વਿਹਾਰਚਾਰਿਕਂ ਆਹਿਣ੍ਡਨ੍ਤਾ ਪਸ੍ਸਿਤ੍વਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਅਨ੍ਤੋਕੋਟ੍ਠਾਗਾਰਿਕਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ, ਸੇਯ੍ਯਥਾਪਿ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ’’ਤਿ ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ વਿਪਾਚੇਨ੍ਤਾਨਂ। ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ॰… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ વਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਏવਰੂਪਾਯ ਬਾਹੁਲ੍ਲਾਯ ਚੇਤੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਤੇ ਅਨੇਕਪਰਿਯਾਯੇਨ વਿਗਰਹਿਤ੍વਾ ਭਗવਤੋ ਏਤਮਤ੍ਥਂ ਆਰੋਚੇਸੁਂ…ਪੇ॰… ‘‘ਸਚ੍ਚਂ ਕਿਰ, ਭਿਕ੍ਖવੇ, ਭਿਕ੍ਖੂ ਏવਰੂਪਾਯ ਬਾਹੁਲ੍ਲਾਯ ਚੇਤੇਨ੍ਤੀ’’ਤਿ? ‘‘ਸਚ੍ਚਂ, ਭਗવਾ’’ਤਿ। વਿਗਰਹਿ ਬੁਦ੍ਧੋ ਭਗવਾ…ਪੇ॰… ਕਥਞ੍ਹਿ ਨਾਮ ਤੇ, ਭਿਕ੍ਖવੇ, ਮੋਘਪੁਰਿਸਾ ਏવਰੂਪਾਯ ਬਾਹੁਲ੍ਲਾਯ ਚੇਤੇਸ੍ਸਨ੍ਤਿ! ਨੇਤਂ, ਭਿਕ੍ਖવੇ, ਅਪ੍ਪਸਨ੍ਨਾਨਂ વਾ ਪਸਾਦਾਯ…ਪੇ॰… ਏવਞ੍ਚ ਪਨ, ਭਿਕ੍ਖવੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
621. Atha kho āyasmā pilindavaccho yena rañño māgadhassa seniyassa bimbisārassa nivesanaṃ tenupasaṅkami; upasaṅkamitvā paññatte āsane nisīdi. Atha kho rājā māgadho seniyo bimbisāro yenāyasmā pilindavaccho tenupasaṅkami; upasaṅkamitvā āyasmantaṃ pilindavacchaṃ abhivādetvā ekamantaṃ nisīdi. Ekamantaṃ nisinnaṃ kho rājānaṃ māgadhaṃ seniyaṃ bimbisāraṃ āyasmā pilindavaccho etadavoca – ‘‘kissa, mahārāja, ārāmikakulaṃ bandhāpita’’nti? ‘‘Tassa, bhante, ārāmikassa ghare suvaṇṇamālā abhirūpā dassanīyā pāsādikā. Natthi tādisā amhākampi antepure suvaṇṇamālā. Kuto tassa duggatassa! Nissaṃsayaṃ corikāya ābhatā’’ti!! Atha kho āyasmā pilindavaccho rañño māgadhassa seniyassa bimbisārassa pāsādaṃ suvaṇṇanti adhimucci. So ahosi sabbasovaṇṇamayo. ‘‘Idaṃ pana te, mahārāja, tāva bahuṃ suvaṇṇaṃ kuto’’ti? ‘‘Aññātaṃ, bhante, ayyasseveso iddhānubhāvo’’ti. Taṃ ārāmikakulaṃ muñcāpesi. Manussā – ‘‘ayyena kira pilindavacchena sarājikāya parisāya uttarimanussadhammaṃ iddhipāṭihāriyaṃ dassita’’nti, attamanā abhippasannā āyasmato pilindavacchassa pañca bhesajjāni abhihariṃsu, seyyathidaṃ – sappi navanītaṃ telaṃ madhu phāṇitaṃ. Pakatiyāpi ca āyasmā pilindavaccho lābhī hoti pañcannaṃ bhesajjānaṃ. Laddhaṃ laddhaṃ parisāya vissajjeti. Parisā cassa hoti bāhullikā. Laddhaṃ laddhaṃ kolambepi ghaṭepi pūretvā paṭisāmeti, parissāvanānipi thavikāyopi pūretvā vātapānesu laggeti. Tāni olīnavilīnāni tiṭṭhanti. Undūrehipi vihārā okiṇṇavikiṇṇā honti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘antokoṭṭhāgārikā ime samaṇā sakyaputtiyā, seyyathāpi rājā māgadho seniyo bimbisāro’’ti ! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū evarūpāya bāhullāya cetessantī’’ti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira, bhikkhave, bhikkhū evarūpāya bāhullāya cetentī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā evarūpāya bāhullāya cetessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
੬੨੨. ‘‘ਯਾਨਿ ਖੋ ਪਨ ਤਾਨਿ ਗਿਲਾਨਾਨਂ ਭਿਕ੍ਖੂਨਂ ਪਟਿਸਾਯਨੀਯਾਨਿ ਭੇਸਜ੍ਜਾਨਿ, ਸੇਯ੍ਯਥਿਦਂ – ਸਪ੍ਪਿ ਨવਨੀਤਂ ਤੇਲਂ ਮਧੁ ਫਾਣਿਤਂ, ਤਾਨਿ ਪਟਿਗ੍ਗਹੇਤ੍વਾ ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨਿ। ਤਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ।
622.‘‘Yānikho pana tāni gilānānaṃ bhikkhūnaṃ paṭisāyanīyāni bhesajjāni, seyyathidaṃ – sappi navanītaṃ telaṃ madhu phāṇitaṃ, tāni paṭiggahetvā sattāhaparamaṃ sannidhikārakaṃ paribhuñjitabbāni. Taṃ atikkāmayato nissaggiyaṃ pācittiya’’nti.
੬੨੩. ਯਾਨਿ ਖੋ ਪਨ ਤਾਨਿ ਗਿਲਾਨਾਨਂ ਭਿਕ੍ਖੂਨਂ ਪਟਿਸਾਯਨੀਯਾਨਿ ਭੇਸ੍ਸਜ੍ਜਾਨੀਤਿ ਸਪ੍ਪਿ ਨਾਮ ਗੋਸਪ੍ਪਿ વਾ ਅਜਿਕਾਸਪ੍ਪਿ વਾ ਮਹਿਂਸਸਪ੍ਪਿ 7 વਾ ਯੇਸਂ ਮਂਸਂ ਕਪ੍ਪਤਿ ਤੇਸਂ ਸਪ੍ਪਿ। ਨવਨੀਤਂ ਨਾਮ ਤੇਸਂ ਯੇવ ਨવਨੀਤਂ। ਤੇਲਂ ਨਾਮ ਤਿਲਤੇਲਂ ਸਾਸਪਤੇਲਂ ਮਧੁਕਤੇਲਂ ਏਰਣ੍ਡਤੇਲਂ વਸਾਤੇਲਂ। ਮਧੁ ਨਾਮ ਮਕ੍ਖਿਕਾਮਧੁ। ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤਂ।
623.Yāni kho pana tāni gilānānaṃ bhikkhūnaṃ paṭisāyanīyāni bhessajjānīti sappi nāma gosappi vā ajikāsappi vā mahiṃsasappi 8 vā yesaṃ maṃsaṃ kappati tesaṃ sappi. Navanītaṃ nāma tesaṃ yeva navanītaṃ. Telaṃ nāma tilatelaṃ sāsapatelaṃ madhukatelaṃ eraṇḍatelaṃ vasātelaṃ. Madhu nāma makkhikāmadhu. Phāṇitaṃ nāma ucchumhā nibbattaṃ.
ਤਾਨਿ ਪਟਿਗ੍ਗਹੇਤ੍વਾ ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨੀਤਿ ਸਤ੍ਤਾਹਪਰਮਤਾ ਪਰਿਭੁਞ੍ਜਿਤਬ੍ਬਾਨਿ।
Tāni paṭiggahetvā sattāhaparamaṃ sannidhikārakaṃ paribhuñjitabbānīti sattāhaparamatā paribhuñjitabbāni.
ਤਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਹੋਤੀਤਿ ਅਟ੍ਠਮੇ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਂ ਹੋਤਿ। ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ વਾ ਗਣਸ੍ਸ વਾ ਪੁਗ੍ਗਲਸ੍ਸ વਾ। ਏવਞ੍ਚ ਪਨ, ਭਿਕ੍ਖવੇ, ਨਿਸ੍ਸਜ੍ਜਿਤਬ੍ਬਂ…ਪੇ॰… ਇਦਂ ਮੇ, ਭਨ੍ਤੇ, ਭੇਸਜ੍ਜਂ ਸਤ੍ਤਾਹਾਤਿਕ੍ਕਨ੍ਤਂ ਨਿਸ੍ਸਗ੍ਗਿਯਂ, ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ॰… ਦਦੇਯ੍ਯਾਤਿ…ਪੇ॰… ਦਦੇਯ੍ਯੁਨ੍ਤਿ…ਪੇ॰… ਆਯਸ੍ਮਤੋ ਦਮ੍ਮੀਤਿ।
Taṃ atikkāmayato nissaggiyaṃhotīti aṭṭhame aruṇuggamane nissaggiyaṃ hoti. Nissajjitabbaṃ saṅghassa vā gaṇassa vā puggalassa vā. Evañca pana, bhikkhave, nissajjitabbaṃ…pe… idaṃ me, bhante, bhesajjaṃ sattāhātikkantaṃ nissaggiyaṃ, imāhaṃ saṅghassa nissajjāmīti…pe… dadeyyāti…pe… dadeyyunti…pe… āyasmato dammīti.
੬੨੪. ਸਤ੍ਤਾਹਾਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਸਤ੍ਤਾਹਾਤਿਕ੍ਕਨ੍ਤੇ વੇਮਤਿਕੋ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਸਤ੍ਤਾਹਾਤਿਕ੍ਕਨ੍ਤੇ ਅਨਤਿਕ੍ਕਨ੍ਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਨਧਿਟ੍ਠਿਤੇ ਅਧਿਟ੍ਠਿਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅવਿਸ੍ਸਜ੍ਜਿਤੇ વਿਸ੍ਸਜ੍ਜਿਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਨਟ੍ਠੇ ਨਟ੍ਠਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅવਿਨਟ੍ਠੇ વਿਨਟ੍ਠਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅਦਡ੍ਢੇ ਦਡ੍ਢਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਅવਿਲੁਤ੍ਤੇ વਿਲੁਤ੍ਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ।
624. Sattāhātikkante atikkantasaññī, nissaggiyaṃ pācittiyaṃ. Sattāhātikkante vematiko, nissaggiyaṃ pācittiyaṃ. Sattāhātikkante anatikkantasaññī, nissaggiyaṃ pācittiyaṃ. Anadhiṭṭhite adhiṭṭhitasaññī, nissaggiyaṃ pācittiyaṃ. Avissajjite vissajjitasaññī, nissaggiyaṃ pācittiyaṃ. Anaṭṭhe naṭṭhasaññī, nissaggiyaṃ pācittiyaṃ. Avinaṭṭhe vinaṭṭhasaññī, nissaggiyaṃ pācittiyaṃ. Adaḍḍhe daḍḍhasaññī, nissaggiyaṃ pācittiyaṃ. Avilutte viluttasaññī, nissaggiyaṃ pācittiyaṃ.
ਨਿਸ੍ਸਟ੍ਠਂ ਪਟਿਲਭਿਤ੍વਾ ਨ ਕਾਯਿਕੇਨ ਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ, ਨ ਅਜ੍ਝੋਹਰਿਤਬ੍ਬਂ, ਪਦੀਪੇ વਾ ਕਾਲ਼વਣ੍ਣੇ વਾ ਉਪਨੇਤਬ੍ਬਂ, ਅਞ੍ਞੇਨ ਭਿਕ੍ਖੁਨਾ ਕਾਯਿਕੇਨ ਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ, ਨ ਅਜ੍ਝੋਹਰਿਤਬ੍ਬਂ।
Nissaṭṭhaṃ paṭilabhitvā na kāyikena paribhogena paribhuñjitabbaṃ, na ajjhoharitabbaṃ, padīpe vā kāḷavaṇṇe vā upanetabbaṃ, aññena bhikkhunā kāyikena paribhogena paribhuñjitabbaṃ, na ajjhoharitabbaṃ.
ਸਤ੍ਤਾਹਾਨਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ। ਸਤ੍ਤਾਹਾਨਤਿਕ੍ਕਨ੍ਤੇ વੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ। ਸਤ੍ਤਾਹਾਨਤਿਕ੍ਕਨ੍ਤੇ ਅਨਤਿਕ੍ਕਨ੍ਤਸਞ੍ਞੀ, ਅਨਾਪਤ੍ਤਿ।
Sattāhānatikkante atikkantasaññī, āpatti dukkaṭassa. Sattāhānatikkante vematiko, āpatti dukkaṭassa. Sattāhānatikkante anatikkantasaññī, anāpatti.
੬੨੫. ਅਨਾਪਤ੍ਤਿ ਅਨ੍ਤੋਸਤ੍ਤਾਹਂ ਅਧਿਟ੍ਠੇਤਿ, વਿਸ੍ਸਜ੍ਜੇਤਿ, ਨਸ੍ਸਤਿ, વਿਨਸ੍ਸਤਿ, ਡਯ੍ਹਤਿ, ਅਚ੍ਛਿਨ੍ਦਿਤ੍વਾ ਗਣ੍ਹਨ੍ਤਿ, વਿਸ੍ਸਾਸਂ ਗਣ੍ਹਨ੍ਤਿ, ਅਨੁਪਸਮ੍ਪਨ੍ਨਸ੍ਸ ਚਤ੍ਤੇਨ વਨ੍ਤੇਨ ਮੁਤ੍ਤੇਨ ਅਨਪੇਕ੍ਖੋ ਦਤ੍વਾ ਪਟਿਲਭਿਤ੍વਾ ਪਰਿਭੁਞ੍ਜਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ।
625. Anāpatti antosattāhaṃ adhiṭṭheti, vissajjeti, nassati, vinassati, ḍayhati, acchinditvā gaṇhanti, vissāsaṃ gaṇhanti, anupasampannassa cattena vantena muttena anapekkho datvā paṭilabhitvā paribhuñjati, ummattakassa, ādikammikassāti.
ਭੇਸਜ੍ਜਸਿਕ੍ਖਾਪਦਂ ਨਿਟ੍ਠਿਤਂ ਤਤਿਯਂ।
Bhesajjasikkhāpadaṃ niṭṭhitaṃ tatiyaṃ.
Footnotes:
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā / ੩. ਭੇਸਜ੍ਜਸਿਕ੍ਖਾਪਦવਣ੍ਣਨਾ • 3. Bhesajjasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ੩. ਭੇਸਜ੍ਜਸਿਕ੍ਖਾਪਦવਣ੍ਣਨਾ • 3. Bhesajjasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੩. ਭੇਸਜ੍ਜਸਿਕ੍ਖਾਪਦવਣ੍ਣਨਾ • 3. Bhesajjasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੩. ਭੇਸਜ੍ਜਸਿਕ੍ਖਾਪਦવਣ੍ਣਨਾ • 3. Bhesajjasikkhāpadavaṇṇanā
