| Library / Tipiṭaka / तिपिटक • Tipiṭaka / कङ्खावितरणी-पुराण-टीका • Kaṅkhāvitaraṇī-purāṇa-ṭīkā |
३. भेसज्जसिक्खापदवण्णना
3. Bhesajjasikkhāpadavaṇṇanā
‘‘पटिसायनीयानि पटिग्गहेत्वा’’ति वदन्तेन पादमक्खनादीनं अत्थाय पटिग्गहेत्वा ठपेतुं वट्टतीति दीपितन्ति लिखितं। ‘‘येसं मंसं कप्पती’’ति वचनेन येसं मंसं न कप्पति, तेसं सप्पिआदि न कप्पतीति वदन्ता अजानित्वा वदन्ति। येसञ्हि मंसं कप्पति, तेसं सप्पीतिआदि सत्ताहकालिकनिस्सग्गियवत्थुपरिच्छेददस्सनत्थं वुत्तं। तथा पणीतभोजनसिक्खापदे येसं मंसं कप्पति, तेसंयेव खीरादि पणीतभोजनं, नेतरन्ति दस्सेतुं वुत्तन्ति। मधु नाम मधुकरिभमरमक्खिकानं आसयेसु निय्याससदिसं महामधु होति, तं यावजीविकन्ति च लिखितं।
‘‘Paṭisāyanīyāni paṭiggahetvā’’ti vadantena pādamakkhanādīnaṃ atthāya paṭiggahetvā ṭhapetuṃ vaṭṭatīti dīpitanti likhitaṃ. ‘‘Yesaṃ maṃsaṃ kappatī’’ti vacanena yesaṃ maṃsaṃ na kappati, tesaṃ sappiādi na kappatīti vadantā ajānitvā vadanti. Yesañhi maṃsaṃ kappati, tesaṃ sappītiādi sattāhakālikanissaggiyavatthuparicchedadassanatthaṃ vuttaṃ. Tathā paṇītabhojanasikkhāpade yesaṃ maṃsaṃ kappati, tesaṃyeva khīrādi paṇītabhojanaṃ, netaranti dassetuṃ vuttanti. Madhu nāma madhukaribhamaramakkhikānaṃ āsayesu niyyāsasadisaṃ mahāmadhu hoti, taṃ yāvajīvikanti ca likhitaṃ.
भेसज्जसिक्खापदवण्णना निट्ठिता।
Bhesajjasikkhāpadavaṇṇanā niṭṭhitā.
पत्तवग्गो ततियो।
Pattavaggo tatiyo.
निस्सग्गियपाचित्तियवण्णना निट्ठिता।
Nissaggiyapācittiyavaṇṇanā niṭṭhitā.
