| Library / Tipiṭaka / တိပိဋက • Tipiṭaka / ကင္ခာဝိတရဏီ-ပုရာဏ-ဋီကာ • Kaṅkhāvitaraṇī-purāṇa-ṭīkā |
၃. ဘေသဇ္ဇသိက္ခာပဒဝဏ္ဏနာ
3. Bhesajjasikkhāpadavaṇṇanā
‘‘ပဋိသာယနီယာနိ ပဋိဂ္ဂဟေတ္ဝာ’’တိ ဝဒန္တေန ပာဒမက္ခနာဒီနံ အတ္ထာယ ပဋိဂ္ဂဟေတ္ဝာ ဌပေတုံ ဝဋ္ဋတီတိ ဒီပိတန္တိ လိခိတံ။ ‘‘ယေသံ မံသံ ကပ္ပတီ’’တိ ဝစနေန ယေသံ မံသံ န ကပ္ပတိ, တေသံ သပ္ပိအာဒိ န ကပ္ပတီတိ ဝဒန္တာ အဇာနိတ္ဝာ ဝဒန္တိ။ ယေသဉ္ဟိ မံသံ ကပ္ပတိ, တေသံ သပ္ပီတိအာဒိ သတ္တာဟကာလိကနိသ္သဂ္ဂိယဝတ္ထုပရိစ္ဆေဒဒသ္သနတ္ထံ ဝုတ္တံ။ တထာ ပဏီတဘောဇနသိက္ခာပဒေ ယေသံ မံသံ ကပ္ပတိ, တေသံယေဝ ခီရာဒိ ပဏီတဘောဇနံ, နေတရန္တိ ဒသ္သေတုံ ဝုတ္တန္တိ။ မဓု နာမ မဓုကရိဘမရမက္ခိကာနံ အာသယေသု နိယ္ယာသသဒိသံ မဟာမဓု ဟောတိ, တံ ယာဝဇီဝိကန္တိ စ လိခိတံ။
‘‘Paṭisāyanīyāni paṭiggahetvā’’ti vadantena pādamakkhanādīnaṃ atthāya paṭiggahetvā ṭhapetuṃ vaṭṭatīti dīpitanti likhitaṃ. ‘‘Yesaṃ maṃsaṃ kappatī’’ti vacanena yesaṃ maṃsaṃ na kappati, tesaṃ sappiādi na kappatīti vadantā ajānitvā vadanti. Yesañhi maṃsaṃ kappati, tesaṃ sappītiādi sattāhakālikanissaggiyavatthuparicchedadassanatthaṃ vuttaṃ. Tathā paṇītabhojanasikkhāpade yesaṃ maṃsaṃ kappati, tesaṃyeva khīrādi paṇītabhojanaṃ, netaranti dassetuṃ vuttanti. Madhu nāma madhukaribhamaramakkhikānaṃ āsayesu niyyāsasadisaṃ mahāmadhu hoti, taṃ yāvajīvikanti ca likhitaṃ.
ဘေသဇ္ဇသိက္ခာပဒဝဏ္ဏနာ နိဋ္ဌိတာ။
Bhesajjasikkhāpadavaṇṇanā niṭṭhitā.
ပတ္တဝဂ္ဂော တတိယော။
Pattavaggo tatiyo.
နိသ္သဂ္ဂိယပာစိတ္တိယဝဏ္ဏနာ နိဋ္ဌိတာ။
Nissaggiyapācittiyavaṇṇanā niṭṭhitā.
