| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
11. பி⁴க்க²தா³யிவக்³கோ³
11. Bhikkhadāyivaggo
1. பி⁴க்கா²தா³யகத்தே²ரஅபதா³னவண்ணனா
1. Bhikkhādāyakattheraapadānavaṇṇanā
ஸுவண்ணவண்ணங் ஸம்பு³த்³த⁴ந்திஆதி³கங் ஆயஸ்மதோ பி⁴க்கா²தா³யகத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய விப⁴வஸம்பன்னோ ஸத்³தா⁴ஜாதோ விஹாரதோ நிக்க²மித்வா பிண்டா³ய சரமானங் ஸித்³த⁴த்த²ங் ப⁴க³வந்தங் தி³ஸ்வா பஸன்னமானஸோ ஆஹாரமதா³ஸி. ப⁴க³வா தங் படிக்³க³ஹெத்வா அனுமோத³னங் வத்வா பக்காமி. ஸோ தேனேவ குஸலேன யாவதாயுகங் ட²த்வா ஆயுபரியோஸானே தே³வலோகே நிப்³ப³த்தோ தத்த² ச² காமாவசரஸம்பத்தியோ அனுப⁴வித்வா மனுஸ்ஸேஸு ச மனுஸ்ஸஸம்பத்திமனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴மன்வாய ஸத்³தா⁴ஜாதோ பப்³ப³ஜித்வா நசிரஸ்ஸேவ அரஹா அஹோஸி.
Suvaṇṇavaṇṇaṃsambuddhantiādikaṃ āyasmato bhikkhādāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhimanvāya vibhavasampanno saddhājāto vihārato nikkhamitvā piṇḍāya caramānaṃ siddhatthaṃ bhagavantaṃ disvā pasannamānaso āhāramadāsi. Bhagavā taṃ paṭiggahetvā anumodanaṃ vatvā pakkāmi. So teneva kusalena yāvatāyukaṃ ṭhatvā āyupariyosāne devaloke nibbatto tattha cha kāmāvacarasampattiyo anubhavitvā manussesu ca manussasampattimanubhavitvā imasmiṃ buddhuppāde kulagehe nibbatto vuddhimanvāya saddhājāto pabbajitvā nacirasseva arahā ahosi.
1. ஸோ அபரபா⁴கே³ அத்தனோ புப்³ப³கம்மங் அனுஸ்ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸுவண்ணவண்ணங் ஸம்பு³த்³த⁴ந்திஆதி³மாஹ. தங் ஸப்³ப³ங் ஹெட்டா² வுத்தனயமேவ. பவரா அபி⁴னிக்க²ந்தந்தி பகாரேன வரிதப்³ப³ங் பத்தே²தப்³ப³ந்தி பவரங், ரம்மபூ⁴ததோ விவேகபூ⁴ததோ ஸகவிஹாரதோ அபி⁴ விஸேஸேன நிக்க²ந்தந்தி அத்தோ². வானா நிப்³பா³னமாக³தந்தி வானங் வுச்சதி தண்ஹா, ததோ நிக்க²ந்தத்தா நிப்³பா³னங், வானநாமங் தண்ஹங் பதா⁴னங் கத்வா ஸப்³ப³கிலேஸே பஹாய நிப்³பா³னங் பத்தந்தி அத்தோ².
1. So aparabhāge attano pubbakammaṃ anussaritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ sabbaṃ heṭṭhā vuttanayameva. Pavarā abhinikkhantanti pakārena varitabbaṃ patthetabbanti pavaraṃ, rammabhūtato vivekabhūtato sakavihārato abhi visesena nikkhantanti attho. Vānā nibbānamāgatanti vānaṃ vuccati taṇhā, tato nikkhantattā nibbānaṃ, vānanāmaṃ taṇhaṃ padhānaṃ katvā sabbakilese pahāya nibbānaṃ pattanti attho.
2. கடச்சு²பி⁴க்க²ங் த³த்வானாதி கரதலேன க³ஹேதப்³பா³ த³ப்³பி³ கடச்சு², பி⁴க்கீ²யதி ஆயாசீயதீதி பி⁴க்கா², அபி⁴ விஸேஸேன கா²தி³தப்³பா³ ப⁴க்கி²தப்³பா³தி வா பி⁴க்கா², கடச்சு²னா க³ஹேதப்³பா³ பி⁴க்கா² கடச்சு²பி⁴க்கா², த³ப்³பி³யா ப⁴த்தங் த³த்வாதி அத்தோ². ஸேஸங் ஸப்³ப³த்த² உத்தானத்த²மேவாதி.
2.Kaṭacchubhikkhaṃ datvānāti karatalena gahetabbā dabbi kaṭacchu, bhikkhīyati āyācīyatīti bhikkhā, abhi visesena khāditabbā bhakkhitabbāti vā bhikkhā, kaṭacchunā gahetabbā bhikkhā kaṭacchubhikkhā, dabbiyā bhattaṃ datvāti attho. Sesaṃ sabbattha uttānatthamevāti.
பி⁴க்கா²தா³யகத்தே²ரஅபதா³னவண்ணனா ஸமத்தா.
Bhikkhādāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. பி⁴க்க²தா³யகத்தே²ரஅபதா³னங் • 1. Bhikkhadāyakattheraapadānaṃ
