| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
11. භික්‌ඛදායිවග්‌ගො
11. Bhikkhadāyivaggo
1. භික්‌ඛාදායකත්‌ථෙරඅපදානවණ්‌ණනා
1. Bhikkhādāyakattheraapadānavaṇṇanā
සුවණ්‌ණවණ්‌ණං සම්‌බුද්‌ධන්‌තිආදිකං ආයස්‌මතො භික්‌ඛාදායකත්‌ථෙරස්‌ස අපදානං. අයම්‌පි පුරිමජිනවරෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො සිද්‌ධත්‌ථස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො වුද්‌ධිමන්‌වාය විභවසම්‌පන්‌නො සද්‌ධාජාතො විහාරතො නික්‌ඛමිත්‌වා පිණ්‌ඩාය චරමානං සිද්‌ධත්‌ථං භගවන්‌තං දිස්‌වා පසන්‌නමානසො ආහාරමදාසි. භගවා තං පටිග්‌ගහෙත්‌වා අනුමොදනං වත්‌වා පක්‌කාමි. සො තෙනෙව කුසලෙන යාවතායුකං ඨත්‌වා ආයුපරියොසානෙ දෙවලොකෙ නිබ්‌බත්‌තො තත්‌ථ ඡ කාමාවචරසම්‌පත්‌තියො අනුභවිත්‌වා මනුස්‌සෙසු ච මනුස්‌සසම්‌පත්‌තිමනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො වුද්‌ධිමන්‌වාය සද්‌ධාජාතො පබ්‌බජිත්‌වා නචිරස්‌සෙව අරහා අහොසි.
Suvaṇṇavaṇṇaṃsambuddhantiādikaṃ āyasmato bhikkhādāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhimanvāya vibhavasampanno saddhājāto vihārato nikkhamitvā piṇḍāya caramānaṃ siddhatthaṃ bhagavantaṃ disvā pasannamānaso āhāramadāsi. Bhagavā taṃ paṭiggahetvā anumodanaṃ vatvā pakkāmi. So teneva kusalena yāvatāyukaṃ ṭhatvā āyupariyosāne devaloke nibbatto tattha cha kāmāvacarasampattiyo anubhavitvā manussesu ca manussasampattimanubhavitvā imasmiṃ buddhuppāde kulagehe nibbatto vuddhimanvāya saddhājāto pabbajitvā nacirasseva arahā ahosi.
1. සො අපරභාගෙ අත්‌තනො පුබ්‌බකම්‌මං අනුස්‌සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො සුවණ්‌ණවණ්‌ණං සම්‌බුද්‌ධන්‌තිආදිමාහ. තං සබ්‌බං හෙට්‌ඨා වුත්‌තනයමෙව. පවරා අභිනික්‌ඛන්‌තන්‌ති පකාරෙන වරිතබ්‌බං පත්‌ථෙතබ්‌බන්‌ති පවරං, රම්‌මභූතතො විවෙකභූතතො සකවිහාරතො අභි විසෙසෙන නික්‌ඛන්‌තන්‌ති අත්‌ථො. වානා නිබ්‌බානමාගතන්‌ති වානං වුච්‌චති තණ්‌හා, තතො නික්‌ඛන්‌තත්‌තා නිබ්‌බානං, වානනාමං තණ්‌හං පධානං කත්‌වා සබ්‌බකිලෙසෙ පහාය නිබ්‌බානං පත්‌තන්‌ති අත්‌ථො.
1. So aparabhāge attano pubbakammaṃ anussaritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ sabbaṃ heṭṭhā vuttanayameva. Pavarā abhinikkhantanti pakārena varitabbaṃ patthetabbanti pavaraṃ, rammabhūtato vivekabhūtato sakavihārato abhi visesena nikkhantanti attho. Vānā nibbānamāgatanti vānaṃ vuccati taṇhā, tato nikkhantattā nibbānaṃ, vānanāmaṃ taṇhaṃ padhānaṃ katvā sabbakilese pahāya nibbānaṃ pattanti attho.
2. කටච්‌ඡුභික්‌ඛං දත්‌වානාති කරතලෙන ගහෙතබ්‌බා දබ්‌බි කටච්‌ඡු, භික්‌ඛීයති ආයාචීයතීති භික්‌ඛා, අභි විසෙසෙන ඛාදිතබ්‌බා භක්‌ඛිතබ්‌බාති වා භික්‌ඛා, කටච්‌ඡුනා ගහෙතබ්‌බා භික්‌ඛා කටච්‌ඡුභික්‌ඛා, දබ්‌බියා භත්‌තං දත්‌වාති අත්‌ථො. සෙසං සබ්‌බත්‌ථ උත්‌තානත්‌ථමෙවාති.
2.Kaṭacchubhikkhaṃ datvānāti karatalena gahetabbā dabbi kaṭacchu, bhikkhīyati āyācīyatīti bhikkhā, abhi visesena khāditabbā bhakkhitabbāti vā bhikkhā, kaṭacchunā gahetabbā bhikkhā kaṭacchubhikkhā, dabbiyā bhattaṃ datvāti attho. Sesaṃ sabbattha uttānatthamevāti.
භික්‌ඛාදායකත්‌ථෙරඅපදානවණ්‌ණනා සමත්‌තා.
Bhikkhādāyakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 1. භික්‌ඛදායකත්‌ථෙරඅපදානං • 1. Bhikkhadāyakattheraapadānaṃ
