| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. ভিক্খকসুত্তং
10. Bhikkhakasuttaṃ
২০৬. সাৰত্থিনিদানং। অথ খো ভিক্খকো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো ভিক্খকো ব্রাহ্মণো ভগৰন্তং এতদৰোচ – ‘‘অহম্পি খো, ভো গোতম, ভিক্খকো, ভৰম্পি ভিক্খকো, ইধ নো কিং নানাকরণ’’ন্তি?
206. Sāvatthinidānaṃ. Atha kho bhikkhako brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho bhikkhako brāhmaṇo bhagavantaṃ etadavoca – ‘‘ahampi kho, bho gotama, bhikkhako, bhavampi bhikkhako, idha no kiṃ nānākaraṇa’’nti?
‘‘ন তেন ভিক্খকো হোতি, যাৰতা ভিক্খতে পরে।
‘‘Na tena bhikkhako hoti, yāvatā bhikkhate pare;
ৰিস্সং ধম্মং সমাদায, ভিক্খু হোতি ন তাৰতা॥
Vissaṃ dhammaṃ samādāya, bhikkhu hoti na tāvatā.
‘‘যোধ পুঞ্ঞঞ্চ পাপঞ্চ, বাহিত্ৰা ব্রহ্মচরিযং।
‘‘Yodha puññañca pāpañca, bāhitvā brahmacariyaṃ;
সঙ্খায লোকে চরতি, স ৰে ভিক্খূতি ৰুচ্চতী’’তি॥
Saṅkhāya loke carati, sa ve bhikkhūti vuccatī’’ti.
এৰং ৰুত্তে, ভিক্খকো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি।
Evaṃ vutte, bhikkhako brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. ভিক্খকসুত্তৰণ্ণনা • 10. Bhikkhakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. ভিক্খকসুত্তৰণ্ণনা • 10. Bhikkhakasuttavaṇṇanā
